တွၼ်ႈသွင်
လိုၼ်းၼုမ်ႇၵေႃႈ မိူဝ်ႈႁွတ်ႈၵႂႃႇၼႂ်းႁွင်ႈၽူႈၸတ်းၵၢၼ် ၵေႃႉပဵၼ် “လုင်းဢွင်ႇ” ၼၼ်ႉ လႆႈႁၼ် ၼင်ႈဢုပ်ႇၵုမ်ၵၼ်တင်း ၸၢႆးၼုမ်ႇႁၢင်ႈလဝ်းၵေႃႉၼိုင်ႈယူႇ၊ ယၢမ်းၼၼ်ႉ လုင်းဢွင်ႇၵေႃႈ ႁွင်ႉမၼ်းမႃးၼင်ႈတင်ႇၸွမ်းၵၼ်သေ ၼႄႉၼမ်းလိုၼ်းၼုမ်ႇ ပၼ်တီႈၵေႃႉပဵၼ်ၽူႈပွင်ၵၢၼ်ၵႂႃႇယူႇယဝ်ႉ။
လိူၵ်ႈလိူၵ်ႈလုင်းဢွင်ႇသမ်ႉမီးၼႃႈၵၢၼ်ၶဝ်ႈမႃးထႅင်ႈလႄႈ လႆႈဢွၵ်ႇႁွင်ႈၼၼ်ႉၵႂႃႇပႅတ်ႈ၊ ၼႂ်းႁွင်ႈၼၼ်ႉ ၵိုင်ႉၵၢင်ႉယဵၼ်ၵႂႃႇၵမ်းလဵဝ် လိုၼ်းၼုမ်ႇၵေႃႈ ၶႂ်ႈယူႇယၢပ်ႇမႃးယဝ်ႉသေ ၸႂ်ၵေႃႈဢမ်ႇလီ သီၼႃႈဢၼ်မီးလွင်ႈၶွင်ႈၶမ်ၼၼ်ႉၵေႃႈ ၼႄဢွၵ်ႇမႃးယူႇ။ ၵေႃႉပဵၼ်ၽူႈပွင်ၵၢၼ် ၸိုဝ်ႈႁွင်ႉ “တိုၼ်းႁၢၼ်” ၼၼ်ႉ ယုမ်ႉၸူးမၼ်းယဝ်ႉ လၢတ်ႈၵႂၢမ်းယွၵ်ႇဢိတ်းဢွတ်း ၵႂႃႇဝႃႈ
“သူၵူဝ်ၵူၼ်းလဝ်းၶႃႈႁႃႉ ယူႇႁႂ်ႈလူမ်ၸႂ်ၵေႃႈလႆႈယူႇၶႃႈ ပဵၼ်ႁဝ်းႁႃးၼင်ႇၵၼ်ၵူၺ်း”
“ဢေႃႈ…”
“မႃးပွၵ်ႈဢွၼ်တၢင်းသုတ်း တေဢမ်ႇပႆႇယၢမ်ႈ.. ႁဝ်းပွင်ႇၸႂ်ယူႇ မိူဝ်ႈလႂ်သူၵႆႉၵႆႉလႆႈမႃး တေႁၼ်ႁဝ်းၵူၼ်းလီၵူဝ် ပဵၼ်ၵူၼ်းလီႁၵ်ႉမႃးၵမ်းလဵဝ်ယဝ်ႉ”
ဢမ်ႇၸၢင်ႈလၢတ်ႈသင် လိုၼ်းၼုမ်ႇၵေႃႈ ယုမ်ႉႁႅင်ႈႁႅင်ႈၸူးၵူၺ်း။
“ႁဵတ်းၵၢၼ်တီႈၼႆႈ ပဵၼ်ၸိူင်ႉႁိုဝ်ၶႃႈ”
“ပဵၼ်ၵၢၼ်ငၢၼ်းဢၼ်လီတႄႉဢေႃႈ..”
“ႁဝ်းပဵၼ်ဢၼ်ယိၼ်းၸူမ်းတႄႉယဝ်ႉ လႆႈႁၼ်ၵူၼ်းႁဵတ်းၵၢၼ်ႁဝ်းတင်ႈၸႂ်ႁဵတ်းၵၢၼ်ၵၼ် လႄႈ မေႃႁပ်ႉဢဝ်ပုၼ်ႈၽွၼ်းတူဝ်ၵဝ်ႇလႆႈလီ”
မိူဝ်ႈငိၼ်းၸိူင်ႉၼႆၵေႃႈ ဢဝ်လိုၼ်းၼုမ်ႇဝူၼ်ႉၽိတ်း ၼိူဝ်လွင်ႈဢၼ်ႁဵတ်းသၢင်ႈဝၼ်းမိူဝ်ႈၼႆႉမႃးသေ
“ယွမ်းၼွမ်းယူႇၶႃႈ..”
လိုၼ်းၼုမ်ႇၶႂ်ႈလၢတ်ႈထိုင်လွင်ႈသင်ၼႆၼၼ်ႉ တိုၼ်းႁၢၼ်ၵေႃႈ ပွင်ႇၸႂ်လီယူႇ
“သူႁဵတ်းထုၵ်ႇမႅၼ်ႈယဝ်ႉ… ပဵၼ်လွင်ႈႁဵတ်းသၢင်ႈဢၼ်ႁဝ်းယွမ်းႁပ်ႉလႆႈဝႃႈ တုမ်ႉတွပ်ႇၶိုၼ်းလႆႈလီတႄႉတႄႉ သူလႃႇၶဝ်တေႉႁိုဝ်ဢမ်ႇလႃႇၼၼ်ႉ မိူဝ်ႈၶဝ်မႃးပူၼ်ႉပႅၼ်သူ.. သူမီးသုၼ်ႇတႃႇတေၵႅတ်ႇၶႄတူဝ်သူ လႆႈတဵမ်တဵမ်ထူၼ်ႈထူၼ်ႈ၊ မိူဝ်ႈႁဝ်းႁပ်ႉသူမႃးႁဵတ်းၵၢၼ်ယဝ်ႉၼၼ်ႉ သူၵေႃႈပဵၼ်ၵူၼ်းႁဝ်းယဝ်ႉ ႁဝ်းၵေႃႈတေလႆႈၵႅတ်ႇၶႄပၼ် ၵူၼ်းႁဝ်းမိူၼ်ၵၼ်”
မိူဝ်ႈငိၼ်းၸိူင်ႉၼႆ ဢဝ်လိုၼ်းၼုမ်ႇၼၼ်ႉ ၼမ်ႉတႃသမ်ႉပေႃးယိုင်ႈႁူၺ်ႇမႃးယဝ်ႉ။
“ယိၼ်းၸူမ်းယဝ်ႉၶႃႈ ယိၼ်းၸူမ်းတႄႉတႄႉဢေႃႈ.. ၶႃႈယိၼ်းၸူမ်းတႄႉယဝ်ႉ ဢၼ်လႆႈမႃးထူပ်းၸဝ်ႈၵၢၼ်လီလီၸိူင်ႉၼႆ”
လွင်ႈၼႆႉတႄႉ ပေႃးဢမ်ႇၸႂ်ႈၸိုၼ်ႈၶိူဝ်းမႃးလၢတ်ႈၼႄ တိုၼ်းႁၢၼ် မၼ်းၵေႃႈတေဢမ်ႇႁူႉၼင်ႇၵဝ်ႇ။
ယၢမ်းဝၢႆးဝၼ်း ၶၢဝ်းလူင်းႁူင်းႁဵၼ်းယဝ်ႉ မီးပေႃႈမႄႈလုၵ်ႈဢွၼ်ႇ ဢွၼ်ၵၼ်ပႂ်ႉႁပ်ႉလုၵ်ႈၶဝ် ပေႃးတဵမ်ၼႃႈႁူင်းႁဵၼ်းဝႆႉယူႇယဝ်ႉ။ လိုၼ်းၼုမ်ႇၵေႃႈ လိုဝ်ႈၵၢၼ်ယဝ်ႉၼႆလႄႈ လႆႈမႃးႁပ်ႉလုၵ်ႈမၼ်းမိူၼ်ၵၼ် ၽွင်းတိုၵ်ႉပႂ်ႉယူႇၼၼ်ႉ မီးပႃႈၵေႃႉၼိုင်ႈ လႆႈတူင်ႉတၵ်ႉလၢတ်ႈဢုပ်ႇၸူးလိုၼ်းၼုမ်ႇ ဢၼ်ၸုၵ်းပႂ်ႉယူႇႁိမ်းၵၼ်ၼၼ်ႉသေဝႃႈ
“မႃးႁပ်ႉၼွင်ႉၶႃႈႁႃႉ…”
“ဢေႃႈ..ဢမ်ႇၸႂ်ႈၶႃႈ မႃးႁပ်ႉလုၵ်ႈၶႃႈဢေႃႈ”
“ႁၼ်သူယင်းတိုၵ်ႉမိူၼ်သၢဝ်ယူႇ ဢမ်ႇထၢင်ႇဝႃႈတေမီးလုၵ်ႈယဝ်ႉၶႃႈၼႆႉ”
ယၢမ်းၼၼ်ႉ လုၵ်ႈဢွၼ်ႇၵေႃႉၼိုင်ႈ တင်းလႅၼ်ႈတင်းႁွင်ႉ“မႄႈ!” ၼႆသေ လႅၼ်ႈမႃးၸူးလိုၼ်းၼုမ်ႇယဝ်ႉ။
“လႅင်းဢွၼ်ႇ! လႅၼ်ႈလွႆးလွႆးလႄႈလုၵ်ႈ”
မႄႈပႃႈၼၼ်ႉ လႆႈႁၼ်လႅင်းဢွၼ်ႇ ဢၼ်မီးၼႃႈတႃႁၢင်ႈငၢမ်းၼၼ်ႉယဝ်ႉၵေႃႈ ယဵၼ်ႉၸႂ်ဢမ်ႇလႆႈ ဢၼ်တေယွင်ႈဢၢမ်းဝႃႈ မၼ်းလီႁၵ်ႉၼႆ။
“လုၵ်ႈသူလီႁၵ်ႉတႄႉၶႃႈယဝ်ႉ တူၺ်းယဝ်ႉ တေလႆႈသူမႃးတၢင်းမူတ်းၶႃႈဢေႃႈၼႆႉ”
လိုၼ်းၼုမ်ႇၵေႃႈ ႁိုဝ်တေလၢတ်ႈသင်လႆႈ ယုမ်ႉၸူးပဵၼ်လွင်ႈယဵၼ်ႇငႄႈၵႂႃႇသေ “ဢေႃႈ.. မိူဝ်းၵွၼ်ႇယဝ်ႉၶႃႈ”
သွင်ၵေႃႉမႄႈလုၵ်ႈ ၸုင်ယိပ်းမိုဝ်းၵၼ် ပွၵ်ႈမိူဝ်းၵႂႃႇယူႇယဝ်ႉ။
“မႄႈၸွင်ႇၶႂ်ႈႁူႉႁႃႉ မိူဝ်ႈၼႆႉ ၶူးသွၼ်သင်”
“ၶႂ်ႈႁူႉဢေႃႈ ၶူးသွၼ်သင်လႃႇလၢတ်ႈၼႄမႄႈၸွင်ႇလႆႈႁိုဝ်”
“မႄႈတေလႆႈႁဵတ်းၶဝ်ႈသွႆးဝၢၼ်ဝၢၼ်လဵင်ႉၸၢႆးၼႃ”
“လႆႈဢေႃႈ မႄႈတေႁဵတ်းလဵင်ႉဝၢၼ်ဝၢၼ်ၵူၺ်း ၶူးသွၼ်သင် လၢတ်ႈၼႄမႄႈဢိတ်းၼိုင်ႈလႄႈ”
“မိူဝ်ႈၼႆႉ ၶူးသွၼ်ၸၼ်ႁၢင်ႈ ၵူၼ်းႁိူၼ်းႁဝ်း…”
လႅင်းဢွၼ်ႇၵေႃႈ ဢဝ်ၽိုၼ်ၸေႈၼႂ်းထူင်မၼ်းၼၼ်ႉ ဢွၵ်ႇမႃးၼႄမႄႈၶဝ်သေ ၼႂ်းၼၼ်ႉ တေမီး လိုၼ်းၼုမ်ႇ လႅင်းဢွၼ်ႇ ႁၢင်ႈၽူႈၸၢႆးၵေႃႉၼိုင်ႈယဝ်ႉ မိူဝ်ႈႁၼ်ၸိူင်ႉၼၼ် ဢဝ်လိုၼ်းၼုမ်ႇသမ်ႉပေႃးဢိုၵ်ႉၼိုၵ်ႉလူင်ၵႂႃႇၵမ်းလဵဝ်၊ မိုဝ်းလဵၵ်ႉလဵၵ်ႉဢွၼ်ႇလႅင်းဢွၼ်ႇၼၼ်ႉ ၸီႉၸမ်ႈၼႄတီႈတူဝ်ၵူၼ်းၵမ်းၵေႃႉၵေႃႉယူႇ ။
“ၼႆႉပဵၼ်မႄႈ.. ၼႆႉပဵၼ်ၸၢႆး… ၼႆႉပဵၼ်…ပဵၼ်ၼႃႉမူၺ် ၸွင်ႇမိူၼ်ႁိုဝ်.. ” ၶူဝ်တေႃႇလိုၼ်းၼုမ်ႇ ဢဝ်လွင်ႈဢၼ်တိုၵ်ႉဢိုၵ်ႉၼိုၵ်ႉယူႇၼၼ်ႉ ႁဵတ်းႁႂ်ႈမၼ်းပေႃးယုမ်ႉၶူဝ်မႃးၸွမ်းယဝ်ႉ။
“ၼႃႉမူၺ်ၶူၼ်ႁူဝ်ဢမ်ႇပွတ်းမိူၼ်ၼၼ်ၼႃ”
“ၸၢႆးၸၼ်ပႆႇယဝ်ႉ ၶူးဝႃႈပေႃးလႆႈယဝ်ႉၼႆၼႃႇ ႁႂ်ႈၸၢႆးမိူဝ်းၸၼ်တီႈႁိူၼ်းဢဝ်ၼႆဝႃႇ”
သမ်ႉဝႃႈလႅင်းဢွၼ်ႇ ပဵၼ်လုၵ်ႈဢွၼ်ႇမွၵ်ႈႁႃႈၶူပ်ႇပၢႆပၢႆၵူၺ်းသေတႃႉ ပဵၼ်လုၵ်ႈဢွၼ်ႇလႅတ်းသႅဝ်းလႄႈ ႁူႉၵႂၢမ်းတႄႉတႄႉၼၼ်ႉယဝ်ႉ၊ ႁူႉဝႃႈ လၢတ်ႈထိုင်ပေႃႈမိူဝ်ႈလႂ် လိုၼ်းၼုမ်ႇတေဢမ်ႇၵတ်းယဵၼ်ၸႂ်ၼႆၵေႃႈ ၶတ်းၸႂ်ငိူင်ႉဝႄႈဢမ်ႇႁႂ်ႈလၢတ်ႈထိုင်ယူႇ။
ႁွတ်ႈထိုင်ႁိူၼ်းယဝ်ႉ သွင်ၵေႃႉမႄႈလုၵ်ႈ ၸွႆႈၵၼ်ႁဵတ်းၵၢၼ်ႁိူၼ်း၊ ႁုင်ၶဝ်ႈမိုဝ်ႉၽၵ်းၵိၼ်ၸွမ်းၵၼ်ၵႂႃႇ၊ ယၢမ်းၼၼ်ႉ မူၺ်ႁွမ် ဢၼ်ယူႇႁူင်းယႃ တႃႇသေႇၼၼ်ႉၵေႃႈ လႆႈပွၵ်ႈမႃးႁိူၼ်းယူႇ မွင်းငိၼ်းသဵင်ပိုတ်ႇၽၵ်းၵူၺ်း လႅင်းဢွၼ်ႇသမ်ႉပေႃးလႅၼ်ႈၵႂႃႇႁပ်ႉၵမ်းလဵဝ်။
“ၼႃႉမူၺ် မႃးႁိူၼ်းယဝ်ႉႁႃႉ ႁၢႆၵႂႃႇတၢင်းႁိုင် ၸၢႆးၸႂ်ထိုင်ၼႃႇယဝ်ႉ”
မူၺ်ႁွမ်ၵေႃႈ ၵွတ်ႇဢဝ်လႅင်းဢွၼ်ႇယဝ်ႉ
“ၼႃႉၵေႃႈၸႂ်ထိုင်မိူၼ်ၵၼ် ၵိၼ်ၶဝ်ႈသွႆးထႅင်ႈယဝ်ႉႁႃႉ” ၶဝ်ႈသွႆးဢၼ်လိုၼ်းၼုမ်ႇႁဵတ်းၼၼ်ႉ ပဵၼ်တၢင်းၵိၼ်ဢၼ် လႅင်းဢွၼ်ႇလႆႈၸႂ်ၵိၼ်ယူႇတႃႇသေႇလႄႈ ပေႃးမီးၶဝ်းသွႆးၼႆ မိူၼ်ဝႃႈၵိၼ်လႆႈၼမ်တႄႉတႄႉၼၼ်ႉယဝ်ႉ။ လိုၼ်းၼုမ်ႇၸင်ႇထၢမ်တီႈ မူၺ်ႁွမ်ၵႂႃႇ
“ၵိၼ်ၶဝ်ႈမႃးယဝ်ႉႁႃႉ”
“ပႆႇၵိၼ် ငိၼ်းဢၢႆၶဝ်ႈသွႆးထိုင်တီႈႁူင်းယႃ ပုၼ်ႉလႄႈၼႅတ်ႈမႃးၼၼ်ႉယဝ်ႉ”
ၶဝ်သၢမ်ၵေႃႉၵေႃႈ ၵိၼ်ၶဝ်ႈၵုမ်းၵၼ် ပဵၼ်ၼႃႈႁိူၼ်းဢၼ်ဢုၼ်ႇၸႂ်ၵၼ်ဝႆႉယူႇယဝ်ႉ။
ပေႃးမႃးတူၺ်းၽၢႆႇတၢင်း ႁိူၼ်းလူင်ဢၼ်ၶိုၵ်ႉၶႅမ်ႉ ပိုၼ်ႉတီႈလိၼ်ႁိူၼ်းဢၼ်ၵႂၢင်ႈယႂ်ႇ မီးတဵမ်ထူၼ်ႈၵူႈလွင်ႈ ပဵၼ်ႁိူၼ်းၵူၼ်းမၢၵ်ႈမီး၊ မီးၸၼ်ႉထၢၼ်ႈၼႂ်းတူင်ႇဝူင်း တီႈၼႂ်းႁိူၼ်းလင်ၼႆႉၵေႃႈ မိူဝ်ႈၼႆႉပဵၼ်ဝၼ်းၵိူတ်ႇ လုင်းၸိုၼ်ႈလႅင်း ပူႇၶွင်ၸိုၼ်ႈၶိူဝ်းၼႆယူႇ။ ၸိုၼ်ႈၶိူဝ်းၵေႃႈ ၶဝ်ႈမႃးထိုင်ၼႂ်းဝၢင်းႁိူၼ်းလင်ၼႆႉၼၼ်ႉ လႆႈဝႃႈ ၶွပ်ႈၶူပ်ႇၼိုင်ႈပီႊ ႁွတ်ႈၼိုင်ႈပွၵ်ႈၼၼ်ႉယဝ်ႉ။
ၼိူဝ်ၽိူၼ်မူႇၶဝ်ႈ ဢၼ်မီးၶဝ်ႈၽၵ်း ၸၼ်ႉသုင်ၶိုၵ်ႉၶႅမ်ႉ ၵႃႈၶၼ်ယႂ်ႇလွၼ်ႉလွၼ်ႉၵူၺ်းၼၼ်ႉသမ်ႉ ဢမ်ႇလႆႈငိၼ်းသဵင်ဢုပ်ႇသဵင်လၢတ်ႈသင်သေဢိတ်း သဵင်မၼ်းတဵတ်ႇယဵၼ်ႁႅင်းလိူဝ် တေႃႉတႄႉငိၼ်းသဵင်ၸေႃႉသဵင်ဝၢၼ်ႇၵူၺ်း။ ၸိုၼ်ႈၶိူဝ်းၵေႃႈ ၵိၼ်ၶဝ်ႈသွင်သၢမ်ၵမ်းသေ။
“ႁူမ်ၸူမ်းဝၼ်းၵိူတ်ႇၶႃႈပူႇ.. ၶႃႈမီးၵၢၼ်လူဝ်ႇႁဵတ်းထႅင်ႈ ယွၼ်းမိူဝ်းၵွၼ်ႇၶႃႈ”
“ဢိူဝ်ႈ! ဢွၵ်ႇၶၢဝ်းတၢင်းမိူဝ်းလီလီလႄႈၼႃႈ”
“မိူဝ်ႈလႂ်မႂ်းတေပွၵ်ႈမႃးႁဵတ်းပၼ်ၵၢၼ်တီႈႁိူၼ်းလႃႇ” လုင်းႁိူင်းၾႃႉ ၵေႃႉပဵၼ်ပေႃႈမၼ်း လၢတ်ႈ။
ၸိုၼ်ႈၶိူဝ်းၵိၼ်ၼမ်ႉၵွၵ်းၼိုင်ႈယဝ်ႉ
“ပီႈမိူင်းလၢဝ်မီးပဵၼ်ၵေႃႉ ၼႃႈၵၢၼ်ၵေႃႈမိူၼ်ဝႃႈၵႂႃႇလႆႈလီယူႇ တေႁႂ်ႈၶႃႈပွၵ်ႈမႃး ႁဵတ်းႁႂ်ႈပီႈၼွင်ႉၼင်ႇၵၼ် တႅၵ်ႇၵၼ်ၶႃႈႁႃႉ ”
“ၸႂ်ႈယဝ်ႉၶႃႈပေႃႈ ၸိုၼ်ႈၶိူဝ်းၵေႃႈ မီးၶွမ်ႇပၼီႇႁင်းမၼ်းယူႇယဝ်ႉ သင်တေႁႂ်ႈမႃးႁဵတ်းၼႃႈၵၢၼ်ၶွင်တီႈႁိူၼ်းပႃး မၼ်းယိုင်ႈၶႅၼ်းတေႁိူဝ်ႉထႅင်ႈၵူၺ်းဢေႃႈ တေႃႈၼင်ႇၶၢဝ်းယၢမ်းၵိၼ်ၶဝ်ႈၵူၺ်း ၵိၼ်သမ်ႉပေႃးဢမ်ႇတၼ်းယဝ်ႉ”
သၢႆတႃဢၼ်လီၵူဝ်မၼ်းၼၼ်ႉ ယၵ်ႉတူၺ်းၸူး ပီႈပႂ်ႉမၼ်းၼၼ်ႉသေ
“ပီႈပႂ်ႉႁဝ်းလၢတ်ႈထုၵ်ႇမႅၼ်ႈယဝ်ႉ ၶႂ်ႈလၢတ်ႈထႅင်ႈလွင်ႈၼိုင်ႈ ၶဝ်ႈၽၵ်းတီႈႁိူၼ်းလင်ၼႆႉ သမ်ႉဝႃႈမၼ်းတေတူၺ်းႁၼ်ၵႃႈၶၼ်ယႂ်ႇသေတႃႉ ဢရသႃႇမၼ်းၼၼ်ႉတႄႉ ၵိၼ်ဢမ်ႇလူင်းၶေႃးလႆႈမိူၼ်ၵၼ်”
လုၵ်ႉဢွၵ်ႇၵႂႃႇပႅတ်ႈဢမ်ႇလႆႈသူၼ်ၸႂ်ၽႂ် သမ်ႉဝႃႈတေပဵၼ် ပေႃႈပဵၼ်မႄႈ ပီႈၼွင်ႉမၼ်းၵေႃႈယဝ်ႉ။ ဝၢႆးသေဢွၵ်ႇၵႂႃႇယူႇႁင်းၵူၺ်းမၼ်းၼၼ်ႉ မိူၼ်ဝႃႈ တတ်းၶတ်ႇလွင်ႈၸမ်ၸႂ်ၼႃႈႁိူၼ်းၶဝ်တင်းမူတ်းယဝ်ႉ ၵူၺ်းၵႃႈ ၵူၼ်းၵေႃႉလဵဝ် ဢၼ်မၼ်းတတ်းၶၢတ်ႇဢမ်ႇလႆႈၼၼ်ႉတႄႉ ပဵၼ်ပူႇမၼ်းၵူၺ်း ဝၢႆးသေမႄႈမၼ်းလူႉသဵင်ႈၵႂႃႇ ပေႃႈၵေႃႈတႄႇၼႃႈႁိူၼ်းမႂ်ႇထႅင်ႈ မီးပူႇၵေႃႉလဵဝ် ဢၼ်တူၺ်းထိုင်မၼ်းလႄႈ ၵမ်ႉထႅမ်မၼ်းယူႇတႃႇသေႇ။
ယၢမ်းၵၢင်ၶိုၼ်းလိုၵ်းယဵၼ် လိုၼ်းၼုမ်ႇ ဢဝ်လႅင်းဢွၼ်ႇၶဝ်ႈၼွၼ်းယဝ်ႉ မၼ်းတင်းမူၺ်ႁွမ် လႆႈၼင်ႈဢုပ်ႇၵၼ်ယူႇတီႈၼႂ်းႁွင်ႈၼွၼ်းမူၺ်ႁွမ်ၼၼ်ႉလႄႈ မၼ်းၸင်ႇဢဝ်ၶႅပ်းႁၢင်ႈ ဢၼ်လႅင်းဢွၼ်ႇၸၼ်ၼၼ်ႉ မႃးၼႄယူႇ။
“မူၺ်ႁွမ် လႅင်းဢွၼ်ႇၸၼ်ႁၢင်ႈပၼ်ဝႃႇၼႆႉတူၺ်းလႄႈ”
“ၽႂ်လႃႇႁၢင်ႈၽူႈၸၢႆးၼႆႉ ၶႂ်ႈလဝ်းဝႆႉၵဝ်ႇ”
“မၼ်းလၢတ်ႈတႄႉဝႃႈပဵၼ်သူၼႆဝႃႇ”
“ႁဝ်းၼႆႁႃႉ! ” ဢဝ်မူၺ်ႁွမ်သမ်ႉပေႃးၶူဝ်ဢွၵ်ႇမႃးယဝ်ႉ ၵူၺ်းၵႃႈ သဵင်ၶူဝ်ၼၼ်ႉၵေႃႈ ယဵၼ်ၵႂႃႇၼႂ်းၸူဝ်ႈၵႅပ်ႉၵမ်းသေ
“ႁဝ်းငိၼ်းၸူမ်း ဢၼ်ၶဝ်ပဵၼ်လုၵ်ႈဢွၼ်ႇဝႃႈငၢႆႈ ၵူၺ်းၵႃႈ မၼ်းၵေႃႈႁဵတ်းႁႂ်ႈႁဝ်းဢမ်ႇၵတ်းယဵၼ်ၸႂ်မိူၼ်ၵၼ် ၶဝ်ႁူႉၵႂၢမ်းထိုင်တီႈ ဢမ်ႇႁတ်းလၢတ်ႈဢွၵ်ႇမႃးလွင်ႈဢၼ်မီးယူႇၼႂ်းၸႂ်ၼၼ်ႉ သင်ႁဝ်းဢမ်ႇႁၼ်ႁၢင်ႈဢၼ်ၶဝ်ၸၼ် ႁဝ်းၵေႃႈတေဢမ်ႇႁူႉဝႃႈ ၼႂ်းၸႂ်ၶဝ်ၼၼ်ႉ မီးၸိူင်ႉႁိုဝ် ”
လိုၼ်းၼုမ်ႇထူၺ်ႈၸႂ်လူင်ၵမ်းၼိုင်ႈသေ သိုပ်ႇလၢတ်ႈထႅင်ႈ
“ႁဝ်းဝူၼ်ႉဝႃႈ ဢၼ်ႁဝ်းႁဵတ်းပၼ်ၶဝ်ၵူႈလွင်ႈၼၼ်ႉတေတဵမ်ထူၼ်ႈ ဢမ်ႇလႆႈမႆႈၸႂ်သင် ၵူၺ်းၵႃႈ ႁဝ်းၵေႃႈႁဵတ်းလႆႈလွင်ႈၽၢႆႇၼွၵ်ႈတူဝ်ၵူၺ်း ၽၢႆႇၼႂ်းၸႂ်လိုၵ်ႉလိုၵ်ႉၼၼ်ႉ ႁဝ်းဢမ်ႇၸၢင်ႈႁဵတ်းသင်ပၼ်ၶဝ်လႆႈ တေႃႈၼင်ႇ တေလၢတ်ႈဝႃႈပေႃႈၶဝ်ပဵၼ်ၽႂ်ၼႆၵူၺ်းၵေႃႈ ႁဝ်းယင်းလၢတ်ႈဢမ်ႇလႆႈ ၶဝ်တေၸႂ်လဵၵ်ႉမွၵ်ႈၵႃႈႁိုဝ် မိူဝ်ႈပိူၼ်ႈထၢမ်ထိုင်ပေႃႈၶဝ် ၶဝ်တေလႆႈတွပ်ႇၸိူင်ႉႁိုဝ်လႃႇ ”
ႁႆႈဢွၵ်ႇမႃး တေႃႇၼႃႈမူၺ်ႁွမ်သေ မူၺ်ႁွမ်ၵေႃႈ လႆႈဢွတ်ႇဢဝ်မၼ်းဝႆႉယူႇ။
“သူလဵင်ႉလူၶဝ်မႃးလႆႈထိုင်တၢၼ်ႇၼႆႉၵူၺ်းၵေႃႈဢမ်ႇငၢႆႈယဝ်ႉ” ယဵၼ်ၵႂႃႇၵႅပ်ႉၼိုင်ႈယဝ်ႉ လၢႆႈၵႂၢမ်းၵႂႃႇဝႃႈ “ႁဝ်းဝႃႈ.. ႁဝ်းႁူႉလွၵ်းလၢႆးမၼ်းယဝ်ႉ”
လိုၼ်းၼုမ်ႇ ၸိုၼ်ႇတူဝ်ဢွၵ်ႇတီႈမူၺ်ႁွမ်ယဝ်ႉ
“ၸိူင်ႉႁိုဝ်! သူမီးလွၵ်းလၢႆးၸိူင်ႉႁိုဝ်လႃႇ”
“ၵေႃႈ.. ဢိူဝ်ႈ..ငၢႆႈငၢႆႈၵူၺ်း သူၵေႃႈတေႇၼႃႈႁိူၼ်းသေယဝ်ႉၼႃႇ တေဢမ်ႇလႆႈၵူဝ်လႅင်းဢွၼ်ႇၸႂ်လဵၵ်ႉသင်ယဝ်ႉ”
မိူဝ်ႈလၢတ်ႈထိုင်လွင်ႈၼႆႉမႃးၵေႃႈ ႁဵတ်းႁႂ်ႈလိုၼ်းၼုမ်ႇ ဝူၼ်ႉထိုင်ၶိုၼ်း မိူဝ်ႈပူၼ်ႉမႃးၸိူဝ်းၼၼ်ႉ မီးၼုမ်ႇႁၢင်ႈလဝ်း ၶဝ်ႈႁႃယူႇလၢႆလၢႆၵေႃႉယူႇ ၵူၺ်းၵႃႈ မိူဝ်ႈလႂ်မၼ်းလၢတ်ႈၼႄဝႃႈ မီးလုၵ်ႈယဝ်ႉၼႆ ၶဝ်ၵေႃႈဢွၵ်ႇႁၢင်ႇၵႂႃႇပႅတ်ႈၵမ်းလဵဝ် လူၺ်ႈဢမ်ႇတၼ်းလႆႈလၢတ်ႈၼႄလွင်ႈၼႄတၢင်းသင်။ မိူဝ်ႈႁူႉဝႃႈမၼ်းမီးလုၵ်ႈယဝ်ႉၼႆ ၵူၼ်းထၢင်ႇလဵၵ်ႉၼိူဝ်မၼ်းၸိူဝ်းၼႆႉၵေႃႈ မီးမႃးယူႇယဝ်ႉ။
ဝၼ်းၼိုင်ႈ မိူဝ်ႈသၢမ်ပီႊပူၼ်ႉမႃးၼၼ်ႉ မီးၵူၼ်းႁွင်ႉမၼ်းၵႂႃႇထူပ်းၵူၼ်းၵေႃႉဢၼ်ဝႃႈ တေလဵင်ႉလူလုမ်းလႃးလုၵ်ႈမၼ်းလႆႈလီၼႆလႄႈ မၼ်းၸင်ႇတင်ႈၸႂ်ႁၢင်ႈၶိူင်ႈႁၢင်ႈလီသေ ပႃးတင်းလႅင်းဢွၼ်ႇၵႂႃႇယဝ်ႉ။ မိူဝ်ႈၵႂႃႇႁွတ်ႈထိုင်ၼႂ်းလၢၼ်ႉတၢင်းၵိၼ် လၢၼ်ႉၼိုင်ႈၼၼ်ႉ ႁၼ်ၽူႈၸၢႆးၵူၼ်းၶၢဝ်ႉၵေႃႉၼိုင်ႈ ဢိၵ်ႇတင်းၵူၼ်းၵေႃႉဢၼ်ႁွင်ႉမၼ်းမႃးထူပ်းၼၼ်ႉလႄႈ တူၺ်းမိူၼ် ၽူႈၸၢႆးၵေႃႉၼၼ်ႉ တေသူၼ်ၸႂ်ၼိူဝ်မၼ်းတႄႉတႄႉၼင်ႇဝႃႈ မွင်းလိုၼ်းၼုမ်ႇၵႂႃႇၼင်ႈၵူၺ်း ၵူၼ်းၵေႃႉၼၼ်ႉၵေႃႈ ဢုပ်ႇထိုင်လွင်ႈတူဝ်မၼ်း လွင်ႈဝႃႈမၢၵ်ႈမီးတၢၼ်ႇႁိုဝ် ႁဵတ်းၵၢၼ်သင် မၼ်းမီးၼႃႈမီးတႃၼႂ်းတူင်ႇဝူင်းၸိူင်ႉႁိုဝ် ဢမ်ႇမီးၽႂ်တေမႃးၶႄႉၶဵင်ႇလႆႈ ႁႂ်ႈလိုၼ်းၼုမ်ႇယွမ်းႁဵတ်းပဵၼ်မေးမၼ်းၼႆယူႇ။
ၸွမ်းလူၺ်ႈလွင်ႈႁဵတ်းသၢင်ႈၶဝ်ၼၼ်ႉ ၶတ်းႁူၶတ်းတႃ လၢႆးလၢတ်ႈ ၼမ်ႉၵႂၢမ်းၶဝ်ၼၼ်ႉ မၼ်းဢမ်ႇထွမ်ႇမူၼ်ႈႁူၼႆလႄႈ လိုၼ်းၼုမ်ႇၵေႃႈ ထဵင်ၶိုၼ်းၵမ်းလဵဝ်ယဝ်ႉ ဢဝ်တင်းလုၵ်ႈသေ လုၵ်ႉဢွၵ်ႇမိူဝ်းၵႂႃႇပႅတ်ႈယူႇ။ ၵူၼ်းၵေႃႉဢၼ် ဢွၼ်မၼ်းမႃးႁႃၵူၼ်းၵေႃႉၼၼ်ႉတႄႉ ပွင်ႉလႃႇဝႃႈႁင်းမၼ်းၵႂႃႇ
“ၵူၼ်းပေႃးမီးလုၵ်ႈယဝ်ႉ တိုၵ်ႉႁႃလိူၵ်ႈၼမ်ယူႇ ၶဝ်တင်းမီးငိုၼ်း မီးႁိူၼ်းမီးယေး ယူႇၸွမ်းၶဝ်ယဝ်ႉ လႆႈယူႇၵျႃႇတေႃႇၸူဝ်ႈဢိူဝ်ႈ မဵဝ်းဢမ်ႇလၵ်းလီလူင် ဢမ်ႇၵိုင်ႇတၢင်း ႁွင်ႉမႃးသေဢိတ်း သုမ်းၶၢဝ်းယၢမ်းၼႃႇ”
လိုၼ်းၼုမ်ႇၵေႃႈ ၸွမ်းႁွင်ႉလၢတ်ႈပႃႈလင်မၼ်းၵႂႃႇ
“ၶႃႈၽိတ်းၵူၺ်း ဢၼ်ႁၼ်ထိုင်ပႃႈပဵၼ်ၵူၼ်းမေႃတူၺ်းၵူၼ်းလႄႈယုမ်ႇၸႂ် ဢမ်ႇထၢင်ႇဝႃႈ ပႃႈတေလႆႈၸႂ်ၵူၼ်းၸိူင်ႉၼင်ႇၶဝ်”
“မႂ်းမၼ်းလိူၵ်ႈၼမ်ႁင်းၵူၺ်း တေႁႂ်ႈၵဝ်ႁႃပၼ်ၵူၼ်းၸိူင်ႉႁိုဝ်လႃႇ ဢၼ်ယွမ်းႁပ်ႉလုၵ်ႈမႂ်းလႆႈ မႂ်းမီးလုၵ်ႈမီးလၢင်းယဝ်ႉ တေၶႂ်ႈလႆႈဢၼ်ႁၢင်ႈၼုမ်ႇႁၢင်ႈလဝ်းၼႆၵႂႃႈ တေမီးၽႂ်ဢဝ်မႂ်း ပေႃးၶႂ်ႈလႆႈၵူၼ်းမေႃႁၵ်ႉလုၵ်ႈဢွၼ်ႇၵေႃႈ ၵူၼ်းၶၢဝ်ႉၵူၼ်းၵႄႇၵူၺ်းဢိူဝ်ႈၵဝ်ႁၼ် ဢၼ်ၼႆႉပဵၼ်ဢၼ်လိူၵ်ႈမႃးလီယဝ်ႉလူးၵွၼ်ႇၼႆႉ တေဝႃႈထဝ်ႈၵေႃႈယင်းပႆႇထဝ်ႈၵႃႈႁိုဝ် လိူဝ်ၼၼ်ႉသမ်ႉမီးငိုၼ်း ယွမ်းႁပ်ႉလုၵ်ႈမႂ်းလႆႈထႅင်ႈလူးၵွၼ်ႇ”
“မၼ်းလီတီႈလႂ်လႃႇ ၸဵမ်မိူဝ်ႈၶႃႈၶဝ်ႈမႃး ၶဝ်ၵေႃႈၵုမ်ႇလၢတ်ႈထိုင်လွင်ႈ မၢၵ်ႈမီးၶဝ်ယူႇၵူၺ်း သမ်ႉဝႃႈၶဝ်တေတူၺ်းၶႃႈသေတႃႉ ယွမ်းႁပ်ႉလုၵ်ႈလႆႈသေတႃႉ ၶဝ်ယင်းဢမ်ႇသူၼ်ၸႂ်ၼိူဝ်လုၵ်ႈသေဢိတ်း ၶႃႈတေယွမ်းႁပ်ႉလႆႈၸိူင်ႉႁိုဝ်၊ သင်ဢမ်ႇသင် ၶဝ်လၢတ်ႈဢုပ်ႇၸူးလုၵ်ႈၶႃႈ ၵႂၢမ်းၶေႃႈသွင်ၶေႃႈၵေႃႈယင်းလီ ဢမ်ႇၸႂ်ႈဝႃႈ ၶႃႈၶႂ်ႈလႆႈၽူဝ်ၼႃႇလႄႈႁႂ်ႈပႃႈႁႃပၼ်လေႃႇၼႃႈ ၶႃႈၵေႃႈၶႂ်ႈႁႂ်ႈလႅင်းဢွၼ်ႇမီးပေႃႈမိူၼ်ပိူၼ်ႈလႄႈ မီးၽႂ်သေၵေႃႉၼိုင်ႈ ၸွႆႈၽိူမ်ႉထႅမ်ပၼ်ၼႃႈႁိူၼ်းႁဝ်းတဵမ်ထူၼ်ႈ သၢင်ႈပၼ်ၼႃႈႁိူၼ်းဢၼ်ဢုၼ်ႇၸႂ်လႆႈ၊ ၵူၼ်းဢၼ်ၶႂ်ႈႁပ်ႉပဵၼ်ပေႃႈလႅင်းဢွၼ်ႇၼၼ်ႉဢေႃႈ ဢၼ်ၶႃႈၶႂ်ႈလႆႈ သမ်ႉဝႃႈပႃႈတေႁွင်ႉၵူၼ်းၶၢဝ်ႉႁိုဝ်ၵူၼ်းထဝ်ႈမႃးၵေႃႈယဝ်ႉ ဢမ်ႇလမ်ႇလွင်ႈတၢၼ်ႇ ၵူၼ်းဢၼ်ႁပ်ႉလုၵ်ႈၶႃႈလႆႈၼင်ႇတဵမ်ၸႂ်..”
ၼႂ်းဝၼ်းၼၼ်ႉၵူၺ်းၼင်ႇၵဝ်ႇ မိူဝ်ႈဢၼ်သွင်ၵေႃႉမႄႈလုၵ်ႈ ပွၵ်ႈမိူဝ်းႁိူၼ်း ယၢမ်းၵၢင်ၶမ်ႈလပ်းသိင်ႇၸွမ်ႉႁွမ်ႉၼၼ်ႉ မီးၵႃးဢၼ်ၶိုၵ်ႉၶႅမ်ႉလမ်းၼိုင်ႈ ၵိုတ်းယူႇၼႃႈႁိူၼ်းၶႃ လႆႈႁၼ်ငဝ်းလမ်လမ်ၸုၵ်းပႂ်ႉယူႇၼႃႈႁိူၼ်းၼၼ်ႉယဝ်ႉ မိူဝ်ႈႁၼ်ၸိူင်ႉၼၼ် လိုၼ်းၼုမ်ႇၵေႃႈ ၵွတ်ႇလုၵ်ႈဝႆႉမၼ်ႈမၼ်ႈသေ ဢၢၼ်းႁူၼ်လင် ႁွင်ႉႁႃၵူၼ်းၸွႆႈယူႇ မိူၼ်ဝႃႈ ၵူၼ်းၵေႃႉၼၼ်ႉ ႁူႉၶိုတ်းလႄႈ လမ်းၶႃမႄႈလုၵ်ႈၵႂႃႇယဝ်ႉ ၸွမ်းလူၺ်ႈပႃးလုၵ်ႈသေ ဢမ်ႇလႅၼ်ႈဝႆးလႆႈ ထိုင်တီႈၵူၼ်းၵေႃႉၼၼ်ႉ လမ်းၶိုတ်းမႃးယူႇ။ မိူဝ်ႈႁၼ်ၼႃႈၵေႃႈ ၸင်ႇႁူႉဝႃႈ ပဵၼ်ၵူၼ်းၵေႃႉလဵဝ်ၵၼ်တင်းၵူၼ်းမိူဝ်ႈၵၢင်ဝၼ်းၼၼ်ႉယဝ်ႉ။
သမ်ႉဝႃႈ ၵူၼ်းၵေႃႉၼၼ်ႉ လမ်းၶိုတ်းယဝ်ႉသေတႃႉ ၸွမ်းၼင်ႇၵႃႈႁႅင်းတိုၵ်ႉမီးၼၼ်ႉ လိုၼ်းၼုမ်ႇၵေႃႈႁိုဝ်ထွႆ ယင်းတိုၵ်ႉသိုပ်ႇလႅၼ်ႈယူႇ။ ၵူၼ်းၵေႃႉၼၼ်ႉၵေႃႈ ၶုၼ်ႇႁုၵ်ႉၸၼ်ဢဝ်လိုၼ်းၼုမ်ႇ ဢီးသႂ်ႇၽႃႁူဝ်ႉဢုတ်ႇၸွမ်းတၢင်းၼၼ်ႉ ဢဝ်လိုၼ်းၼုမ်ႇလႄႈတင်းလုၵ်ႈ လူမ်ႉလူင်းၵႂႃႇၸွမ်းၵၼ်ယဝ်ႉ။
ၵူၼ်းၵေႃႉၼၼ်ႉ ပဵၼ်ၵူၼ်းၶၢဝ်ႉၵူၺ်းၼႆသေတႃႉ ယင်းတိုၵ်ႉၵႅၼ်ႇၶႅင်မီးႁႅင်းလီယူႇလႄႈ ၸင်ႇဢီးလႅင်းဢွၼ်ႇၽၢတ်ႇလိုၼ်းၼုမ်ႇယဝ်ႉ လႅင်းဢွၼ်ႇႁွင်ႉႁႆႈလင်ႁႅင်းမႃးသေ ႁိုတ်းထလႃႇသႂ်ႇလႅင်းဢွၼ်ႇ သမ်ႉပေႃးငွႆလူင်ၵႂႃႇ၊ ၵူၺ်းၵႃႈ သဵင်ႁႆႈလႅင်းဢွၼ်ႇၼၼ်ႉ ယင်းႁွင်ႉလင်ပၼ်းလႆႈယူႇ သဵင်မၼ်းလင်မေႃးႁႅင်း ထိုင်တီႈၵူၼ်းၽၢၼ်ႇၵႂႃႇမႃးၸွမ်းတၢင်းၼၼ်ႉ ပေႃးယၵ်ႉတူၺ်းယဝ်ႉ။ ၵူၺ်းၵႃႈ ဢမ်ႇမီးၽႂ်သူၼ်ၸႂ် ယွၼ်ႉမၼ်းမိူၼ်ပၼ်ႁႃၼႂ်းၼႃႈႁိူၼ်းၵူၺ်းၼႆလႄႈ မိူဝ်ႈႁၼ်ၵူၼ်းဢမ်ႇလႆႈသူၼ်ၸႂ် သဵင်ႁႆႈလႅင်းဢွၼ်ႇယဝ်ႉ ၵူၼ်းၵေႃႉၼၼ်ႉ ၸင်ႇသမ်ႉၶဝ်ႈႁႃလိုၼ်းၼုမ်ႇတိၵ်းတိၵ်း လိုၼ်းၼုမ်ႇၵေႃႈ တင်းၵူဝ်ၼႃႇႁေ သုတ်ႉပၢႆႈၵႂႃႇၸပ်းႁူဝ်ႉဢုတ်ႇၼၼ်ႉတိၵ်းတိၵ်းယဝ်ႉ မိူဝ်ႈတၢင်းတိူၵ်ႈ ဢမ်ႇၸၢင်ႈသုတ်ႉၵႂႃႇတၢင်းလႂ်ယဝ်ႉ ၼၼ်ႉ ၵူၼ်းၵေႃႉၼၼ်ႉၵေႃႈ ၸၼ်ဢဝ် လိုၼ်းၼုမ်ႇလုၵ်ႉၶိုၼ်ႈမႃးယဝ်ႉ။
“သင်ယွမ်းပဵၼ်မေးႁဝ်းလီလီ ႁဝ်းတေဢမ်ႇႁဵတ်းထိုင်တၢၼ်ႇၼႆႉလေႃႇ သူတေပၢႆႈႁဝ်းဢမ်ႇလႆႈယဝ်ႉ လႄႈ ဢမ်ႇမီးၽႂ်တေမႃးၸွႆႈသူလႆႈယဝ်ႉ” ထတ်းသၢင်တူၺ်းယဝ်ႉ ႁိမ်းႁွမ်းၼၼ်ႉၵေႃႈ ဢမ်ႇလႆႈမီးၶိူင်ႈမႆႉၶိူင်ႈမိုဝ်းသင် တႃႇတေၵႅတ်ႇၶႄတူဝ်လႆႈ ၵူၺ်းၵႃႈ လိုၼ်းၼုမ်ႇၵေႃႈ ဢဝ်တိုဝ်ႉတၢင်း မိူဝ်ႈၵူၼ်းၵေႃႉၼၼ်ႉဢမ်ႇႁူႉတူဝ်သေ ႁွမ်ႁႅင်းမၼ်းတၢင်းမူတ်းဢၼ်မီးၼၼ်ႉ ၶၢႆႉတူဝ်သုတ်ႉဢွၵ်ႇ ဢီးဢဝ်တူဝ်ၵူၼ်းၵေႃႉၼၼ်ႉ ၸၼ်ဢဝ်ၵွၵ်းႁူဝ်မၼ်းလေႃႇသႂ်ႇႁူဝ်ႉဢုတ်ႇၵႂႃႇႁႅင်းႁႅင်း ၵူၼ်းၵေႃႉၼၼ်ႉၵေႃႈ ၼွၼ်ႉလူမ်ႉလိုမ်းတူဝ်ၵႂႃႇတီႈၼၼ်ႈၵမ်းလဵဝ်ယဝ်ႉ။
ၵၢင်ၼႂ်ၸဵမ်ၸဝ်ႉ မီးပႃႈၵေႃႉၼိုင်ႈမႃးလႃႇဝႃႈၼႃႈႁိူၼ်းသေ လၢတ်ႈဝႃႈလိုၼ်းၼုမ်ႇ ၵဝ်းၽူဝ်မၼ်းယဝ်ႉ ႁဵတ်းႁၢႆႉၽူဝ်မၼ်းၼႆယူႇ၊ ႁွင်ႉသေႃႇ ပိူၼ်ႈသမ်ႉပေႃးငိၼ်းတၢင်းဝၢၼ်ႈယဝ်ႉ။ လိုၼ်းၼုမ်ႇၸင်ႇတေႁူႉဝႃႈ ၵူၼ်းၵေႃႉၼၼ်ႉ သမ်ႉပေႃးမီးမေးယဝ်ႉ။ တီႈဢၼ်မၼ်းယူႇသဝ်းၼၼ်ႉၵေႃႈ ႁဵတ်းႁႂ်ႈမၼ်းပဵၼ်ၽူႈယိင်းဢၼ်ပဵၼ်တီႈသေႉၼႄးလႄႈ ယူႇသဝ်းဢမ်ႇလႆႈယဝ်ႉသေ လႆႈႁႃတီႈယူႇမႂ်ႇထႅင်ႈယူႇယဝ်ႉ။
ဝၢႆးၼၼ်ႉမႃးၵေႃႈ မၼ်းလႆႈၵိုတ်းလိုဝ်ႈ ႁႃၵူၼ်းၵေႃႉဢၼ်တေမႃးပဵၼ်ပေႃႈလႅင်းဢွၼ်ႇသေ ၶတ်းၸႂ်လဵင်ႉလူလႅင်းဢွၼ်ႇၵႂႃႇ ၸွမ်းၼင်ႇႁႅင်းတူဝ်မၼ်းမီးၼၼ်ႉၵူၺ်းယူႇယဝ်ႉ။
ယၢမ်းၵၢင်ၼႂ် လိုၼ်းၼုမ်ႇ ၵႂႃႇသူင်ႇလႅင်းဢွၼ်ႇတီႈႁူင်းႁဵၼ်းယဝ်ႉ သိုပ်ႇၵႂႃႇႁဵတ်းၵၢၼ်မၼ်းမိူၼ်ၵဝ်ႇ၊ တီႈၼႂ်းလၢၼ်ႉၼၼ်ႉၵေႃႈ ပေႃးထိုင်မႃးယၢမ်းၵၢင်ဝၼ်းၼႆ ၵူၼ်းသမ်ႉပေႃးတဵမ်လူင်ဝႆႉ ပေႃးသုၵ်ႉသိၵ်ႉသုၵ်ႉသၵ်ႉၵႂႃႇမူတ်း မီးယူႇၽိူၼ်ၼိုင်ႈ မိူဝ်ႈလိုၼ်းၼုမ်ႇၵႂႃႇတမ်း ၽၵ်းဢၼ်ၶဝ်သင်ႇမႃးၼၼ်ႉသေ မႅၼ်ႈၽွင်းတိုၵ်ႉတေယုၵ်ႉဝၢၼ်ႇၽၵ်း တမ်းပၼ်ၶဝ်ယူႇၼၼ်ႉ ၽူႈယိင်းၵေႃႉၼိုင်ႈ တင်ႈၸႂ်ဢဝ်မိုဝ်းဢီးပၢၵ်ႈသႂ်ႇလိုၼ်းၼုမ်ႇ သိူဝ်ႈၶူဝ်းမၼ်းသမ်ႉပေႃးဢိူၵ်ႇၵႂႃႇမူတ်း သဵင်ဝၢၼ်ႇၼၼ်ႉၵေႃႈ လင်မေႃးတူဝ်ႈတၢင်းလၢၼ်ႉ သၢႆတႃၵူၼ်းၼမ်ၵူၼ်းလၢႆ ယၵ်ႉတူၺ်းတီႈၶဝ်ၵႂႃႇ ၽူႈယိင်းၵေႃႉၼၼ်ႉၵေႃႈ မိူဝ်ႈၸၼ်သၢႆတႃၵူၼ်းလႆႈယဝ်ႉၼၼ်ႉ ၶိုၼ်ႈသဵင်ႁိုတ်းလႃႇလိုၼ်းၼုမ်ႇၵမ်းလဵဝ်။
“ပဵၼ်သင်ဢမ်ႇတမ်းပၼ်လီလီလႃႇ ၵၢမ်ႇလီမၼ်းယင်းဢမ်ႇႁေႈသႂ်ႇၶူဝ်းႁဝ်းလူးၵွၼ်ႇၼႆႉ ”
မိူဝ်ႈၼၼ်ႉ သမ်ႉမႅၼ်ႈၽွင်းဢၼ် ၸိုၼ်ႈၶိူဝ်းလႄႈ တိုၼ်းႁၢၼ်ၶဝ်ၶဝ်ႈမႃးဢဝ်လီလီ တိုၼ်းႁၢၼ်ပဵၼ်ဢၼ်မႆႈၸႂ်သေ တေဢၢၼ်းၶဝ်ႈၵႂႃႇၸွႆႈၵႄႈၶႆယူႇ ၵူၺ်းၵႃႈထုၵ်ႇၸိုၼ်ႈၶိူဝ်းႁၢမ်ႈဝႆႉ။ မိူဝ်ႈႁၼ်ၸိုၼ်ႈၶိူဝ်းႁၢမ်ႈၸိူင်ႉၼၼ် တိုၼ်းႁၢၼ်ၵေႃႈ လၢမ်းဢမ်ႇလႆႈယဝ်ႉဝႃႈ ၵူၼ်းတဵတ်ႇယဵၼ်ၸႂ်ၶႅင်ၸိူင်ႉၼင်ႇၶဝ်ၼၼ်ႉ ပဵၼ်ၵူၼ်းၸိူင်ႉႁိုဝ် မိူဝ်ႈဢွၼ်တၢင်း လွင်ႈၸိူင်ႉၼႆၶဝ်တေဢမ်ႇသုၵ်ႉယုင်ႈသင်ၸွမ်း ဢမ်ႇဝႃႈ တိုၼ်းႁၢၼ်တေႁဵတ်းသင် ၵူၺ်းၵႃႈ ပွၵ်ႈၼႆႉသမ်ႉႁၢမ်ႈဝႆႉလႄႈ ထၢင်ႇပိူင်ႈမႃးယူႇယဝ်ႉ။ လိူၵ်ႈလိူၵ်ႈ သမ်ႉပဵၼ်ၵူၼ်းဢၼ် မၼ်းၼႄႉၼမ်းၼႄ ၼႂ်းဝၼ်းၼၼ်ႉ သမ်ႉပၢႆၸုၵ်းတူၺ်းလီလီထႅင်ႈလူးၵွၼ်ႇ။
လိုၼ်းၼုမ်ႇၵေႃႈ ၵူမ်ႈၸဵတ်ႉၶူဝ်းမၼ်းသေယဝ်ႉ ၵူမ်ႈၼႃႈလၢတ်ႈၵႂႃႇလွႆးလွႆး တီႈႁိမ်းၽူႈယိင်းၵေႃႉၼၼ်ႉဝႃႈ
“တေၵၢမ်ႇလီလိူဝ်သေၼႆႉဢေႃႈ သင်ဝႃႈမိုဝ်းသူၼၼ်ႉ ဢမ်ႇမႃးပၢႆႇၺႃးဝၢၼ်ႇၽၵ်းႁဝ်းတူၵ်းၵႂႃႇၸိူင်ႉၼႆ” သၢႆတႃလိုၼ်းၼုမ်ႇ ယၵ်ႉတူၺ်းၸူး CCTV ဢၼ်မီးၼႂ်းလၢၼ်ႉၼၼ်ႉ ၼႄယူႇ။ ၽူႈယိင်းၵေႃႉၼၼ်ႉၵေႃႈ ႁူႉယူႇတီႈၸႂ်ယဝ်ႉ တဵတ်ႇယဵၼ်လူင်ၵႂႃႇ။ ငဝ်းလၢႆးၼႂ်းလၢၼ်ႉၵေႃႈၶိုၼ်းလီမႃးသေ ၸိုၼ်ႈၶိူဝ်းၶႃၸင်ႇတေပႆပူၼ်ႉၵႂႃႇလႆႈယူႇ။
တိုၼ်းႁၢၼ်ၵေႃႈ မိူဝ်ႈႁၼ်ၸိုၼ်ႈၶိူဝ်း တူၺ်းလိုၼ်းၼုမ်ႇယဝ်ႉ ယုမ်ႉဢွၵ်ႇမႃးၼၼ်ႉ ပဵၼ်ဢၼ်ပႅၵ်ႇႁူပႅၵ်ႇတႃ တႃႇမၼ်းတႄႉတႄႉလႄႈ ၸင်ႇထၢမ်ၸိုၼ်ႈၶိူဝ်းၵႂႃႇဝႃႈ
“သူၼ်ၸႂ်ၶဝ်ယူႇႁႃႉ”
တွၼ်ႈသွင်သုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢမ်ၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင် တၢင်း YouTube ၵေႃႈလႆႈၶႃႈ။
