တီႈၼႂ်းႁိူၼ်းလင်ၼိုင်ႈ ၼၢင်းသိုဝ်ႉလူႇၶဝ်ႈၼႂ်းဝၢင်းႁိူၼ်း မႄႈပႃႈၶဝ်ပီႈၼၢင်းမႄႈၶဝ်ၼၢႆးဢွင်ႇၼၼ်ႉ ၼင်ႈယူႇၼႂ်းႁိူၼ်း မုင်ႈႁၼ်ၵူၼ်းၵေႃႉၼိုင်ႈပႆၶဝ်ႈမႃးၼႂ်းဝၢင်းၼၼ်ႉသေ
“ၼၼ်ႉၸွင်ႇဢမ်ႇၸႂ်ႈသၢင်ႇဢိင်ႇတႃႇၶဝ်ဢမ်ႇၸႂ်ႈႁိုဝ်လႃႇၼၼ်ႉ ဢီႇၸၢမ်ႇ”
“ၼၼ်ႉႁမ်ႉပဵၼ်ဢီႇလူႇႁိုဝ်လႃႇ”
“ၸႂ်ႈဢိူဝ်ႈ” ၼၢႆးဢွင်ႇ လင်ၵွမ်းၵွမ်းလုၵ်ႉမႃးသေၵႂႃႇႁပ်ႉယဝ်ႉ။
ၼၢင်းၸၢမ်ႇၵေႃႈၵႂႃႇၸွႆႈဢဝ်ၶူဝ်းဢဝ်ၶွင်သေ
“ၶဝ်ႈမႃးတၢင်းၼႂ်းႁိူၼ်းႁေၵွၼ်ႇလႄႈ”
ဢဝ်ၶူဝ်းတမ်းယဝ်ႉ
“ႁဵတ်းႁိုဝ်မႃးလႃႇၼၼ်ႉ ၸိုင်ဝႃႈမိူဝ်းယူႇတီႈဢီႇမူၼ်းၶဝ်ယဝ်ႉၼႆဢမ်ႇၸႂ်ႈႁႃႉ”
“ၸႂ်ႈယဝ်ႉဝႃႈ”
“ပီႈသၢင်ႇသူၶဝ်ယူႇလီၵိၼ်ဝၢၼ်ယူႇၼေႃႈ”
“ယူႇလီၵၼ်ဝၢၼ်ယူႇၶႃႈ”
“ၸိုင်ဝႃႈမႂ်းတေႇၼႃႈႁိူၼ်းယဝ်ႉၼႆႁႃႉ”
“ဢေႃႈ”
သၢင်ႇဢိင်ႇတႃႇၵေႃႈ လုၵ်ႉႁိူၼ်းတီႈဝဵင်းၼၼ်ႉ မႃးသူင်ႇၼၢင်းသိုဝ်ႉလူႇသေ ၶိုၼ်းပွၵ်ႈမိူဝ်းၵႂႃႇယဝ်ႉ။
“ပီႈသၢင်ႇသူတႄႉ ပူၼ်ႉတူဝ်ၵႂႃႇၸဵမ်မိူဝ်ႈသိုၼ်းယဝ်ႉဢိူဝ်ႈၼၼ်ႉ” ၼၢင်းၸၢမ်ႇလၢတ်ႈ
“ဢၢႆႈၼုမ်ႇၶႃပီႈၼွင်ႉလူး”
“မီးယူႇတီႈႁိူၼ်းပီႈၶူၺ်သူ လဵၼ်ႈၵေႃႉဢေးယိင်းၶႃဢေးလိုၼ်းၼၼ်ႉယိုင်”
“မႄႈၶဝ်ဢမ်ႇမႃးတူၺ်းၵဝ်ႇၼႄႇ”
“ပေႃးလၢတ်ႈၶိူဝ်းမႄႈၶဝ်ၵေႃႈမႂ်းႁူႉ ၵဝ်ပေႉဢိမ်ႇပေႉၸၢၼ်ႈဢမ်ႇႁူႉယဝ်ႉဝႃႈ ၵႂႃႇလဵၼ်ႈၽူဝ်ၼွႆႉထႅင်ႈႁေ ယွၼ်းပႅတ်ႈပီႈသၢင်ႇသူၼၼ်ႉၼႃႇ မၼ်းတႄႉႁိုဝ်ၶႂ်ႈပႅတ်ႈၼႄႇ မီးလုၵ်ႈမီးလၢင်းႁူမ်ႈၵၼ်ယဝ်ႉၼႆႁေ မၼ်းၵေႃႈ တဵၵ်းၸႂ်ႉဝႃႈပႅတ်ႈဢိူဝ်ႈပႅတ်ႈဢိူဝ်ႈၼႆယူႇတိၵ်းတိၵ်းၼၼ်ႉၼႃႇ ပီႈသၢင်ႇသူၵေႃႈၵႃႈလႆႈပႅတ်ႈပၼ်ႁေ မၼ်းၵေႃႈ ႁွပ်ႇၶူဝ်းႁွပ်ႇလဵင်းမၼ်းၵႂႃႇ လုၵ်ႈမၼ်းႁႆႈၸွမ်းယူႇၵေႃႈ တင်းဢမ်ႇယၵ်ႉတူၺ်းၵွၼ်ႇမႂ်း ပီႈသၢင်ႇသူၼၼ်ႉၵေႃႈ ၵုမ်ႇၵိၼ်လဝ်ႈႁေတၢင်းဝၼ်းတၢင်းဝၼ်းတိၵ်းတိၵ်းၼႃႇ ဢဝ်ပဵၼ်ပွတ်ႇၵႂ်ႈႁေ တၢႆပႅတ်ႈၵူၺ်းဢိူဝ်ႈၼၼ်ႉ။ ၼၢႆးၼၼ်ႉၵေႃႈ ပိူၼ်ႈမိူဝ်းလၢတ်ႈမၼ်း ႁႂ်ႈမႃးဢဝ်လုၵ်ႈမၼ်းၼႆၵေႃႈ ထိုင်မိူဝ်ႈလဵဝ် မၼ်းတင်းပႆႇမႃးတူၺ်းသေဢိတ်းဢိူဝ်ႈၼၼ်ႉ ၵဝ်တႄႉဢီးလူလုၵ်ႈဢွၼ်ႇၵူၺ်းယဝ်ႉမႂ်း”
“ၶႃႈၵေႃႈဝႃႈ ပေႃးမႄႈၶဝ်ဢမ်ႇလဵင်ႉလႆႈၵေႃႈ တေဢဝ်မိူဝ်းယူႇၼိူဝ်လွႆပုၼ်ႉဢိူဝ်ႈ တီႈပုၼ်ႉတႄႉမီးႁူင်းႁဵၼ်းႁေ ၶဝ်ၵေႃႈတေလႆႈမေႃလိၵ်ႈမေႃလၢႆးၸိူင်ႉၼင်ႇပိူၼ်ႈၼႆ”
“လီဢိူဝ်ႈၼၼ်ႉလီဢိူဝ်ႈ”
လုၵ်ႈဢွၼ်ႇလဵၼ်ႈလႅၼ်ႈၸွမ်းၵၼ် ၼႂ်းၵၢင်ပၢင်ႇၽွင်းယၢမ်းၵၢင်ၼႂ် ၼၢင်းသိုဝ်ႉလူႇၵေႃႈ မိူဝ်းၵႂႃႇတီႈႁိူၼ်းပီႈၶူၺ် ၵေႃႉပဵၼ်ၽူဝ်ၼၢင်းသႃႇၼၼ်ႉသေ
“ပီႈၶူၺ်ယူႇႁိူၼ်းယူႇႁႃႉ”
“မီးဢိူဝ်ႈၶိုၼ်ႈမႃးလႄႈ”
ဢဝ်ၼမ်ႉမႆႈၼမ်ႉၼဵင်ႈမႃးတမ်းယဝ်ႉ။
“ငိၼ်းဝႃႈမႂ်းမႃးၶမ်ႈဝႃးၼႆ ဢၢင်ႈမိူဝ်းလႄႇမႂ်းယူႇဢိူဝ်ႈၼႆႉ”
“ယူႇလီၵိၼ်ဝၢၼ်ယူႇၼႄႇ”
“ဢိူဝ်ႈ မိူၼ်ၼႆၵူၺ်းယဝ်ႉမႂ်းႁူႉ ဝၢႆးသေပီႈၼၢင်းသူလူႉပႅတ်ႈယဝ်ႉၵေႃႈ တေႁဵတ်းႁိုဝ် ၵဝ်ၵူၺ်းၵေႃႈလဵင်ႉလုၵ်ႈလဵင်ႉလၢင်းမၼ်းဢမ်ႇငၢႆႈငၢႆႈလူး ႁမ်ႉပၢႆပဵၼ်ၽူႈယိင်းထႅင်ႈႁေမႂ်းၵေႃႈ”
“ၸၢင်ႈပဵၼ်သင် ၶႃႈၸၢင်ႈတေဝႃႈသင် ပေႃးၶဝ်လီယူႇၵေႃႈ ဢဝ်ဢိူဝ်ႈ”
ၵၢၼ်ယၢပ်ႇၵၢၼ်ၵျၢမ်းၼၼ်ႉၽူႈၸၢႆးႁဵတ်းလႆႈသေတႃႉ ၵၢၼ်မႃႇၵၢၼ်ၶျေႃးၼႂ်းၼႃႈႁိူၼ်းတႃယေး လွင်ႈၵိၼ်လွင်ႈယႅမ်ႉလွင်ႈၼႂ်းႁိူၼ်းၼႂ်းယေးၼၼ်ႉ ပေႃးဢမ်ႇမီးၽူႈယိင်းၵေႃႈဢမ်ႇယဝ်ႉ။ ၽူႈယိင်းပေႃးဢမ်ႇမီးၽူႈၸၢႆးၵေႃႈသမ်ႉလႆႈယၢပ်ႇ ႁၢပ်ႇသမ်ႉဢမ်ႇပေႉထႅင်ႈ မၼ်းၵေႃႈႁူႉၵႃႈလႆႈပိုင်ႈဢိင်ၵၼ်ၵႂႃႇယဝ်ႉ။
ဢဝ်ၶဝ်ႈမုၼ်းၶဝ်ႈပွင်းပၼ်လုၵ်ႈဢွၼ်ႇၶဝ်သေ ၶဝ်သၢမ်သီႇၵေႃႉၵေႃႈ ဢွၼ်ၵၼ်ၸူမ်းၵိၼ် ၵမ်းပုတ်းၵမ်းမႅၼ်းယူႇ။
“ၶႃႈဝႃႈၶႃႈတေဢဝ်ၶႃသွင်ၵေႃႉမိူဝ်းၼႆဢိူဝ်ႈ”
“မႂ်းသမ်ႉတေလဵင်ႉလႆႈယူႇၼႄႇ”
“တီႈပုၼ်ႉၵေႃႈမီးႁူင်းသဝ်းလုၵ်ႈဢွၼ်ႇယူႇ ပိူၼ်ႈၵေႃႈလဵင်ႉယူႇဢိူဝ်ႈ ႁႂ်ႈၶဝ်လႆႈႁဵၼ်းလိၵ်ႈႁဵၼ်းလၢႆးၸိူင်ႉၼင်ႇပိူၼ်ႈၼၼ်ႉၼႃႇ”
“လီဢိူဝ်ႈပေႃးမႂ်းဝႃႈၸိူင်ႉၼၼ်ယူႇၵေႃႈ ယူႇတီႈၼႆႈတႄႉ ၸၢင်ႈတေၵႂႃႇလႆႈႁဵၼ်းလိၵ်ႈႁဵၼ်းလၢႆးသင် လဵင်ႉၶဝ်ႈယႂ်ႇမႃးႁဵတ်းၼၼ်ၵူၺ်းယဝ်ႉ၊ ဢၢင်ႈဝႃႈႁႂ်ႈမႄႈၶဝ်မႃးဢဝ်ယူႇဢိူဝ်ႈၼႆႉ ပေႃးမႂ်းဝႃႈၼႆၵေႃႈလီယဝ်ႉ”
ယၵ်ႉတူၺ်းၼႃႈလုၵ်ႈဢွၼ်ႇၼၼ်ႉသေ သိုပ်ႇလၢတ်ႈထႅင်ႈ “လဵင်ႉလုၵ်ႈဢွၼ်ႇၼႆႉဢမ်ႇငၢႆႈငၢႆႈမႂ်းႁူႉ”
“ဢေးယိင်းၶႃဢေးလိုၼ်းၵေႃႈ ပေႃးၶႂ်ႈမိူဝ်းၸွမ်း မိူဝ်းလႆႈယူႇလူး”
“ပေႃးၶႃၶႂ်ႈမိူဝ်းတႄႉဢဝ်မိူဝ်းလႃႈ တင်းတေလႆႈမေႃပၺ်ႇၺႃႇတၢင်းႁူႉမိူၼ်ပိူၼ်ႈ ယူႇတၢင်းၼႆႉႁူင်းႁဵၼ်းၼႆၵေႃႈဢမ်ႇၸၢင်ႈၶိုၼ်ႈတီႈလႂ်မႂ်းဝႃႈ”
ၽွင်းမိူဝ်ႈမိူဝ်းၵႂႃႇၼၼ်ႉ ပဵၼ်ၽွင်းၶၢဝ်းၾူၼ်လႄႈ တၢင်းၼႆႉတႄႉၵူမ်ႇပိူဝ်ႉဢုင်တေႃႇသုတ်းတၢင်းယဝ်ႉ၊ ပေႃးဝႃႈလႅတ်ႇမႆႈၼႆၵေႃႈၶႅၼ်းယူႇဢိတ်ႉၼိုင်ႈ။ လူတ်ႉဝႃႇထူဝ်ႈဝႃႇၼႆၵေႃႈဢမ်ႇလိူင်ႇလႄႈ ႁၢင်ႇႁၢင်ႇမီးၼိုင်ႈႁိူၼ်းၸိူဝ်းၼႆႉၵူၺ်း လေႃႉဝူဝ်းတႄႉၶႂ်ႈဝႃႈမီးယူႇၵူႈႁိူၼ်းယဝ်ႉ။
လႅတ်ႇမႆႈၸႃႉယူႇတၢၼ်ႇတၢၼ်ႇ ၼၢင်းသိုဝ်ႉလူႇၵေႃႈ မိူဝ်းႁွင်ႉဢဝ်လၢၼ်မၼ်း ဢွၵ်ႇၶၢဝ်းတၢင်းၵႂႃႇ။ မိူဝ်ႈဢဝ်ၶူဝ်းသႂ်ႇၼႂ်းလေႃႉဝူဝ်းၶဝ်ၼၼ်ႉယဝ်ႉၼႆၵေႃႈ ႁွင်ႉလုၵ်ႈဢွၼ်ႇၶိုၼ်ႈလေႃႉမိူဝ်းၼႆ ၸၢႆးၼုမ်ႇတႄႉၶိုၼ်ႈလေႃႉၵႂႃႇယဝ်ႉ၊ ဢေးလိုၼ်းလႄႈဢေးယိင်းၼၼ်ႉၵေႃႈ ပေႃႈၶဝ်မႃးႁွပ်ႇၶိုၼ်ႈလေႃႉၵႂႃႇသေ ဢမ်ႇၶႆႈၵႂႃႇ ႁွင်ႉႁွင်ႉႁႆႈႁႆႈယူႇၼိူဝ်လေႃႉၼၼ်ႉယဝ်ႉၼႃႇ။ လေႃႉသုင်သေတႃႉၵေႃႈ ဢေးလိုၼ်းၼၼ်ႉတႄႉ ၵျွၵ်းတူၵ်းလေႃႉသေ လႅၼ်ႈၵႂႃႇၵွတ်ႇဝႆႉၶႃပေႃႈၶဝ် သမ်ႉပေႃးမၼ်ႈတိုင်ႈတိုင်ႈယူႇယဝ်ႉဢိူဝ်ႈ၊ ဢေးယိင်းၼၼ်ႉၵေႃႈလႅၼ်ႈလူင်းၸွမ်းၼွင်ႉမၼ်းသေ သွင်ၵေႃႉပီႈၼွင်ႉၵေႃႈ ဢမ်ႇၶၢမ်ႇၶိုၼ်ႈလေႃႉယဝ်ႉ တိုတ်ႉၸၼ်ၶႃပေႃႈၶဝ်ဝႆႉယဝ်ႉ။
သဵင်ႁွင်ႉႁႆႈသွင်ၵေႃႉပီႈၼွင်ႉၼၼ်ႉမၼ်းဢိုၵ်ႉၼိုၵ်ႉထိုင်ၸႂ်ၼႃႇလႄႈ
“ဢမ်ႇဢဝ်ၵႂႃႇယဝ်ႉဝႃႈမႂ်း ဢီႇလူႇဢိူဝ်ႉ ဢီးလူၶဝ်”
ဢဝ်ၶူဝ်းၶႃပီႈၼွင်ႉလူင်းလေႃႉသေ ၼၢင်းသိုဝ်ႉလူႇၸင်ႇႁွပ်ႇဢုမ်ႈဢဝ် လၢၼ်ဢွၼ်ႇမၼ်း ဢေးၼၢင်းၶမ်းမၢႆၼၼ်ႉ ၶိုၼ်ႈလေႃႉၵႂႃႇယဝ်ႉ။ သမ်ႉဝႃႈမၼ်းတေႁွင်ႉႁွင်ႉႁႆႈႁႆႈ ဢမ်ႇၶႂ်ႈၵႂႃႇတၢၼ်ႇလႂ်ၵေႃႈ မၼ်းဢမ်ႇမီးပေႃႈမိူၼ်ၼင်ႇဢေးလိုၼ်းၶႃၼၼ်ႉယဝ်ႉလူး။
