တူၼ်ႈမႆႉႁၢင်ႈၶိူင်ႈ

တူၼ်ႈမႆႉမဵဝ်းဢၼ်ႁၢင်ႈၶိူင်ႈ တႅပ်းၵိင်ႇတႅပ်းႁၢင်ႈမၼ်းသေ တမ်းဝႆႉၼိူဝ်ၽိူၼ် ပဵၼ်တူၼ်ႈမႆႉဢၼ်ႁၢင်ႈလီတေႉယဝ်ႉ။

ပဵၼ်မႆႉဢၼ်မီးၵႃႈၶၼ်တႄႉတႄႉ တွၼ်ႈတႃႇၵူၼ်းမီးငိုၼ်းၶဝ် တွၼ်ႈတႃႇၵူၼ်းသူင်ၵျိူၵ်ႈမၵ်ႉတၢင်းႁၢင်ႈလီၶဝ် ယွမ်းၸႆၢႇငိုၼ်းသေလဵင်ႉလူလုမ်းလႃး တူၺ်းၶမ်ႈတူၺ်းၼႂ် သိုဝ်ႉဢုမ်ဝၢင်းတမ်းဝႆႉပၼ်ႁႂ်ႈပေႃးၵိုင်ႇႁၢင်ႈၵိုင်ႇၽၢင် လႆႈႁၼ်တၢင်းႁၢင်ႈလီမၼ်းယူႇသေႇသေႇ။

ထိုင်တီႈမႆႉၼၼ်ႉပေႃးလိုမ်းတူဝ်ၵႂႃႇယဝ်ႉဢိူဝ်ႈ ဝႃႈမၼ်းၵေႃႈပဵၼ်မႆႉဢၼ်လုၵ်ႉမႃးၼိူဝ်လိၼ် ယႂ်ႇမႃးၸွမ်းၶီႈၸွမ်းငႂ်ႈ မၼ်းႁၢင်ႈလီယူႇတီႈၼိူဝ်ၽိူၼ်ၼၼ်ႉ ထိုင်တီႈ မၼ်းဢမ်ႇႁူႉၸၵ်းငိူၼ်ႈငဝ်ႈၸိူဝ်ႉၽၼ်းမၼ်းယဝ်ႉ။

မႆႉမဵဝ်းၼႆႉ တေဢဝ်မႃးႁဵတ်းသင်ဢမ်ႇလႆႈ သႂ်ႇၾႆးတင်းဢမ်ႇပေႉၵၢၼ်ႈၶေႈလူးၵွၼ်ႇ၊ တွၼ်ႈတႃႇဢဝ်ၸႂ်ႉတိုဝ်းတႄႉ ဢမ်ႇမီးၽွၼ်းလီသင်၊ ပဵၼ်မဵဝ်းဢဝ်ဝႆႉယၵ်ႉတူၺ်းလႆၢလႆၢၵူၺ်း။

တူၼ်ႈမႆႉၸိူင်ႉၼႆ ၵႆႉၵႆႉႁၼ်ပိူၼ်ႈၽုၵ်ႇယူႇလႄႈ မိူဝ်ႈမၼ်းပႆႇယႂ်ႇတႄႉႁၢင်ႈလီ ၸဝ်ႈမၼ်းႁၵ်ႉႁွမ်လုမ်းလႃးတႄႉတႄႉ။ ပေႃးတူၺ်းဢိမ်ႇယဝ်ႉၵေႃႈ သိုပ်ႇၶႆၢၵႂႃႇထႅင်ႈ ဢမ်ႇၼၼ် သိုဝ်ႉတူၼ်ႈမႂ်ႇမႃးထႅင်ႈ၊ ပေႃးတူၼ်ႈလမ်းယႂ်ႇမႃး ဢမ်ႇႁၢင်ႈလီယဝ်ႉၵေႃႈ ပွႆႇပိုၼ်ႉပွႆႇပႅတ်ႈၵႂႃႇၵူၺ်း။

တူၼ်ႈမႆႉႁၢင်ႈၶိူင်ႈၼႆႉ မၼ်းၽုၵ်ႇႁဵတ်းငႆၢႈ လႄႈ ႁၼ်ၼမ်ႉႁၼ်တူဝ်မၼ်းဝႆး၊ မႆႉဢၼ်ၶဝ်ႈတၢင်းတိုဝ်းတေႉတေႉၼၼ်ႉတႄႉ လႆႈၸႂ်ႉၶၢဝ်းယၢမ်းႁိုင်လႄႈ ယႂ်ႇၵႂႃႇၵမ်းလွႆးလွႆး ၸင်ႇတေၵႅၼ်ႇၶႅင်ၸုၵ်းမၼ်ႈလႆႈယဝ်ႉ။

ၶူမ်ၽၢတ်ႇ
22/09/2026