ယၢမ်းၵၢင်ၼႂ် ၼႃႈၾႃႉၼႃႈမိူင်းၸိုၼ်ႈပၢင်ႇသႂ် လူမ်းဢွၼ်ႇၵေႃႈထူဝ်းမႃး ပတ်ႉထွင်းဢဝ် ၽႃႈၸဵတ်ႉဢၼ်ၽႅၼ်ဝႆႉယူႇတီႈႁၢဝ်းၼႃႈႁိူၼ်းၼၼ်ႉလူၼ်ႇႁူင်ႈတူၵ်းလူင်းၵႂႃႇတႂ်ႈလၢင်ႈ ၶႃႈၵေႃႈလႅၼ်ႈလူင်းၵူမ်ႈၵဵပ်းသေ ယၢမ်းၼၼ်ႉ ႁႅၼ်မုင်ႈတူၺ်းတွင်ႉၾႃႉၵၢင်ႁၢဝ် ဢမ်ႇတၼ်းႁူႉမွၵ်ႇၵုမ်ႈၵိုင်ႉၵၢင်ႉသုမ်ႇလမ်ၽိုတ်းၽိုတ်း မိူင်းၵေႃႈလပ်းသိင်ႇလူင်မႃး ၼင်ႇဝႃႈၾူၼ်တေတူၵ်းၼၼ်ႉယဝ်ႉ။ ၵူၺ်းၵႃႈ လႆႈငိၼ်းသဵင်ႁွင်ႉ ၵွင်ႈႁူၺ်ႈၵွင်ႈလွႆ ၼင်ႇဝႃႈ ဢမ်ႇယၢမ်ႈငိၼ်းသေပွၵ်ႈယဝ်ႉ။
တႃၶႃႈလၢႆးယူႇႁိုဝ် ယူႇၼင်ႇၼၼ် ႁၢင်ႈမိူၼ်ၼၵႃး ငွၵ်ႈႁူဝ်ပေႃႇလူင်မႃးၵႆၵႆ ၽႃႇႁူၺ်ႈၽႃႇလွႆလူင်ၵႂႃႇ လွႆလုၵ်ႈၼိုင်ႈယဝ်ႉလုၵ်ႈၼိုင်ႈ လူမ်ႉၵူၼ်ႇပင်းၵွႆ ၶႃႈၼႅတ်ႈၸၵ်ႉၾူၼ်းဢွၵ်ႇမႃးထႆႇ၊ ယိင်ႈသုမ်းတူၺ်းၸမ်ယိင်ႈႁၼ်ၸႅင်ႈ ၼၵႃးတေႉဢိူဝ်ႈ။
လွႆၵူၼ်ႇလူႉပင်းလႅဝ် ၾုၼ်ႇၽူင်ႉဢုၺ်တႅၵ်ႇယၢႆႈ တူၼ်ႈမႆႉယႂ်ႇၵူၼ်ႇလူမ်ႉပင်းလႅဝ်ပဵၼ်တၢင်ႉပဵၼ်တေး၊ ၵမ်ႈၽွင်ႈႁၼ်ယဝ်ႉ ႁွင်ႉသႅၼ်ႇပၢႆႈ၊ ၵူၼ်းၵူဝ်ၼႅတ်ႈဢွၼ်ၵၼ်ပၢႆႈၶိူဝ်းၶိူဝ်းယႂ်းယႂ်း ပၢႆႈၵႂႃႇၵေႃႉႁူးၵေႃႉတၢင်းယဝ်ႉ။
ၶႃႈၵေႃႈလႅၼ်ႈပၢႆႈၵႂႃႇ ၵူၺ်းဢမ်ႇႁူႉတေၵႂႃႇတၢင်းလႂ် တီႈယူႇၶႃႈမီးႁိူၼ်းဢွၼ်ႇလင်ၼႆႉၵူၺ်းလႄႈ ၶူဝ်းၶွင်ၶႃႈဢၼ်သၢင်ႈမႃးတင်းသဵင်ႈ ယူႇၵိုၵ်းႁိူၼ်းၼႆႉၵူၺ်း ဢမ်ႇႁူႉတေပၢႆႈၵႂႃႇတၢင်းလႂ် မိူဝ်ႈလႂ်ၸင်ႇမိူဝ်ႈၼၼ်ႉၵူၺ်းယဝ်ႉၵႃႈ မၼ်းပႆႇမႃးထိုင်လူင် ၼႃထိုဝ်တိုဝ်တၼ်သေယူႇၵႂႃႇ။
ၼၵႃးတူဝ်ၼၼ်ႉလမ်းလႄႇလဵပ်ႈၽႅဝ်ၵႂႃႇၵူႈတၢင်း သဵင်ၶၢင်းႁွင်ႉသႅၼ်ႇလီယုပ်းၽၢၼ်ႈၵူဝ်မႃးယူႇဢိူဝ်ႈ၊ ၾူၼ်ၾူၼ်လူမ်းလူမ်းထူဝ်းထွင်းပဝ်ႇ မၢင်ၽဝ်ႇၼၵႃးတေမႃးႁွတ်ႈတၢင်းၼႆႉယူႇႁိုဝ် ၵေႃႈၵူဝ်ဝႆႉယူႇ။
ဝၢၼ်ႈယဝ်ႉဝၢၼ်ႈ ဝဵင်းယဝ်ႉဝဵင်း ၵူၼ်းၵူဝ်ဢွၼ်ၵၼ်ပၢႆႈၵႂႃႇပၢႆႈၵႂႃႈ ဝၢၼ်ႈပေႃးယဵၼ် မိူင်းပေႃးၶႂ်ႈႁၢမ်းယဝ်ႉ။
ၶဝ်ႈၼမ်ႉတၢင်းၵိၼ်ဢမ်ႇလိူင်ႇ လႆႈမႅတ်ႇသိမ်းပႅင်းၵိၼ်ၵူႈဝၼ်းဝၼ်း မၢင်ပွၵ်ႈၵေႃႈလႆႈႁိမ်ၵၼ်ၵိၼ် ၽိတ်းမေႃးပေႃႉႁႅမ်ၵၼ်တၢႆၶိုၼ်း၊ ၽူႈလၵ်ႉလိူင်ႇ ၸူၼ်လိူင်ႇ ၵူၼ်းဢိုပ်းယၢၵ်ႈၵူၼ်းယွၼ်းလိူင်ႇ ၵူၼ်းတၢႆယွၼ်ႉဢမ်ႇလႆႈၵိၼ်ႁင်ၼမ်မႃးၵူႈမိုဝ်ႉၵူႈဝၼ်း။
ၾူၼ်တူၵ်းဢမ်ႇထၢတ်ႇ ၼမ်ႉၼွင်းၶိုၼ်ႈသုင်မႃး လင်ႁိူၼ်းမုင်းၶႃးၶႃႈၼၼ်ႉၵေႃႈ ၸူမ်ႁၢႆလွင်ႈလူင်းၼမ်ႉၵႂႃႇ၊ တူဝ်ၶႃႈၵေႃႈပႃးၵႂႃႇၸွမ်းသၢႆၼမ်ႉယဝ်ႉ။ ၼၵႃးၽႅတ်းႁၢင်ၼိုင်ႈၵမ်း ယွပ်ႇယွၼ်ႈႁႅင်းၼႃႇတၢၼ်ႇမိတ်ႈၸူၵ်ႉတႅင်းသႂ်ႇ ၶႃႈဢမ်ႇလွတ်ႈယဝ်ႉ ႁႅင်းၼမ်ႉဢီးထွင်း လႆလွင်ႈလူင်းၸွမ်းတုမ်မႆႉၵႂႃႇ၊ ယိင်ႈယူႇၼမ်ႉယိင်ႈသုင် လွႆလူင်လုၵ်ႈပင်းၵူၼ်ႇယွၼ်ႉၼၵႃးလူမ်ႉၸူမ်မႃးယဝ်ႉလူး။
ဝၢၼ်ႈႁိူၼ်းတီႈယူႇၵဝ်ႇ ယဵၼ်းပဵၼ်ပၢင်ႇလၢႆႇလူင်ၵႂႃႇသေယဝ်ႉ တူဝ်ၶႃႈဢၼ်လႆႈမိုၼ်းတႃမႃး လႆႈႁၼ်သီၶၢဝ်ႁိူဝ်ႈ ၼင်ႇဝႃႈတၢႆၵႂႃႇယဝ်ႉၼၼ်ႉဢိူဝ်ႈ။
ၶႃႈယူႇတီႈလႂ်ဢမ်ႇႁူႉယဝ်ႉ ၸုၵ်းဢမ်ႇလႆႈပႆဢမ်ႇၸၢင်ႈ ယၢင်ႈဢမ်ႇထိုင်လႂ် တၢႆၵႂႃႇယဝ်ႉႁိုဝ်ၼႆ ဝိၼ်ႇဝၢႆႇတူၺ်းၵႂႃႇၽၢႆႇတႂ်ႈႁၼ် မိူင်းၵူၼ်းလူင်ၼႆႉသုၵ်ႉသၵ်ႉယူႇသဵင်ႈ ၼၵႃးလူင်ၼၼ်ႉၵေႃႈၵဝ်းယႃႉတၢင်းၼိုင်ႈယဝ်ႉတၢင်းၼိုင်ႈ။
မၢင်ၸိူဝ်းယွၼ်းသူးၶုပ်ႉဝႆႈ မၢင်ၸိူဝ်းႁၢဝ်ႈႁတ်းတေႃႇသူႈသေတၢႆၵႂႃႇ၊ လွင်ႈၵႂႃႇၸူမ်ၵႂႃႇၸွမ်းၼမ်ႉၼွင်း လူၵ်ႈၵမ်ႇၽႃႇလူင်ၼႆႉပဵၼ်ႁင်ၵႂႃႇမူတ်းယဝ်ႉလႃႇ။
ၶႃႈတူၺ်းယဝ်ႉၼမ်ႉတႃပေႃးတူၵ်း သဵင်ၽႃႇၽိုၼ်းမေႃးယူႇတူၵ်ႈတူၵ်ႈ
“လုၵ်ႉဢႄႈဢေးၼၢင်း တိုၵ်ႉႁႃၼွၼ်းၵိၼ်ဝၢၼ်ႈၵိၼ်မိူင်းယူႇလႃႇၶၢဝ်းၼႆႉ”
“မႄႈ…ၶႃႈတၢႆယဝ်ႉ”
“ၸိုင်မႂ်းၸၢင်ႈဝႃႈၼႆ ၽႂ်တၢႆ”
ၽိူဝ်ႇဝႃႈၼၼ် ၶႃႈၸင်ႇႁူႉဝႃႈပဵၼ်ၾၼ်။
“သဵင်ၽႂ်ၽိတ်းၵၼ်ၼွၵ်ႈၵိဝ်ႇပုၼ်ႉဢႃႇမႄႈ”
“ၼၢႆးလႃႉၶႃလုင်းသႅမ်းႁိုဝ်”
“ၽိတ်းၵၼ်ႁႅင်ႉဢႃႇ”
“ၼၢႆးလႃႉဝႃႈလုင်းသႅမ်းၶႂၢၵ်ႈသူၼ်မၼ်းၼႆႁိုဝ် မေႃးၵၼ်တၢင်းၼႂ်ယဝ်ႉၼၼ်ႉ”
ၶႃႈၵေႃႈၵႂႃႇငွၵ်ႈတူၺ်းႁေ ႁၼ်လုင်းသႅမ်းလွမ်ႉႁူဝ်ႉၶဝ်ႈမႃးၼႂ်းဝၢင်းၼၢႆးလႃႉယူႇတေႉ ၶႃႈၵေႃႈၵႂႃႇထွမ်ႇၶဝ်မေႃးၵၼ်ယဝ်ႉ ဢမ်ႇယဵၼ်ႉလႆႈလႄႈ
“လိၼ်ဢွၼ်မွၵ်ႈသွၵ်ႇပၢႆဝႃးၵူၺ်း မႃးႁႃၶႅၼ်ၵၼ်ယူႇ သူၼ်ႁၢမ်းၼႃးႁၢမ်းမီးၼမ်ပေႉတၢၼ်ႇၼႆႉ ဢမ်ႇၵႂႃႇႁႃႁဵတ်း”
“မၼ်းမီးၸဝ်ႈမၼ်းလႄႇၼၼ်ႉ”
“ၼႆႉၵေႃႈမီးၸဝ်ႈမၼ်းယူႇႁိုဝ်လႃႇ တင်းၶႂ်ႈလႆႈယူႇ ၼၼ်ႉတၢင်းပုၼ်ႉၵႂႃႇဢဝ်လႄႈ ၽႂ်တေမႃးၶႅၼ်ဢႃႈ”
“တေႉဢိူဝ်ႈၼႆ”
“ပႃႈႁဝ်းၵေႃႈ လိၼ်ဢွၼ်ႇမွၵ်ႈၼႆႉၵူၺ်းႁၢင်ႈၸႂ်ပွတ်းၼႃႇၵဝ်ႇ ၽိူဝ်လိူဝ်ၵူၼ်းဝၢၼ်ႈႁဝ်းမီးဢဝ်လၢႆလင်ၵူၺ်းၼႆႉ သမ်ႉမႃးဢမ်ႇမႅၼ်ႈၵၼ်ထႅင်ႈႁေ တေႁဵတ်းႁိုဝ်ယူႇၵႂႃႇၸွမ်းၵၼ်လႃႇ”
“မႂ်းႁမ်ႉၵဵဝ်ႇႁင်လႃႇ”
“ၵဵဝ်ႇဢမ်ႇၵဵဝ်ႇဢမ်ႇႁူႉယဝ်ႉ တီႈလိၼ်ပဝ်ႇလိၼ်ႁၢမ်းၸိူဝ်းၼၼ်ႉတႄႉ ပိူၼ်ႈမႃးလွမ်ႉဢဝ်လွမ်ႉဢဝ်ယဝ်ႉၼႃႇ ပေႃးၽႂ်ဢမ်ႇဢဝ်ၵေႃႈ လၢဝ်းပၢၼ်းၶဝ်တေမႃးဢဝ်ယဝ်ႉဢိူဝ်ႈ မိူင်းႁဝ်းသမ်ႉပဵၼ်လိၼ်ပိူၼ်ႈၼႆၽွမ်ႉယူႇၼႄႇ”
“ဢမ်ႇၽွမ်ႉမႂ်း”
“ပေႃးလႆႈငိုၼ်းတႄႉၶၢႆဢိူဝ်ႈၵဝ်”
“ပိူၼ်ႈႁွင်ႉၵူၼ်းၶၢႆၽႅၼ်ႇလိၼ်ဝႃႇၼၼ်ႉၶႂ်ႈႁူႉၵေႃႈ မိူဝ်ႈလဵဝ်ၼႆႉ ဢၼ်ႁဝ်းယဵပ်ႇယူႇၵိၼ်သၢင်ႈၼိူဝ်မၼ်းယူႇၼႆႉ ပွင်ႇဝႃႈႁၵ်ႉၽႅၼ်ႇလိၼ်ၼႆဝႃႇ”
“မႂ်းၵႂႃႇဢဝ်တီႈလႂ်မႃးလၢတ်ႈ”
“ၵူၼ်းမိူင်းပိူၼ်ႈဢၼ်ၶိုၼ်ႈယႂ်ႇမၢၵ်ႈမီးၼၼ်ႉ ပိူၼ်ႁၵ်ႉၽႅၼ်ႇလိၼ်ပိူၼ်ႈ ပိူၼ်ႈဢမ်ႇပၢႆႈၵႂႃႇတၢင်းလႂ်လႄႈၸင်ႇမီးၵူၺ်းဢိူဝ်ႈၼၼ်ႉ တူၺ်းလေႃႇမိူင်းထႆးမိူင်းၶႄႇၸွင်ႇပိူၼ်ႈပၢႆႈႁိုဝ်”
“ပိူၼ်ႈဢမ်ႇမီးသိုၵ်းလႄႇ”
“ဢူး သိုၵ်းပိူၼ်ႈမီးတဵမ်ဝၢၼ်ႈတဵမ်မိူင်းလႃႈ ၶႃႈၵႂႃႇႁၼ်မႃးယဝ်ႉ ”
“တႃႉႁေဝႃႈမႂ်းလႆႈၵႂႃႇမိူင်းထႆးၵေႃႈ”
“မႂ်းႁမ်ႉမႃးႁဵတ်းႁင်လႃႇထၢၼ်ႈၼၼ်”
“ၶႃႈႁၵ်ႉၽႅၼ်ႇလိၼ်မိူင်းၶႃႈလႄႇဢိူဝ်ႈ”
ၶႃႈၵေႃႈလၢတ်ႈလူမ်းလၢတ်ႈလႅင်ႉတေႃႇၶႃႁေ ဢဝ်ယဵၼ်ၵႂႃႇႁင်းၽႂ်ႁင်းမၼ်းယဝ်ႉ။ မိူဝ်ႈၵူႈပွၵ်ႈပိူၼ်ႈယွၵ်ႇလုၵ်ႈဢွၼ်ႇ ၵမ်းၼႆႉႁဝ်းသမ်ႉမႃးယွၵ်ႇၵူၼ်းထဝ်ႈႁဵတ်းၼၼ်ၼႃႇ။
ၵူႈပွၵ်ႈပွၵ်ႈ မိူဝ်ႈၶႃႈယူႇတီႈဝၢၼ်ႈသေ ပႆႇၵႂႃႇႁဵၼ်းၼၼ်ႉ တီႈဝၢၼ်ႈၼႆႉၵူၼ်းၵေႃႈၵိုၼ်း လင်ႁိူၼ်းၵေႃႈၼမ် ၵူၼ်းၼုမ်ႇၵေႃႈၼမ်တႄႉတႄႉ၊ ၵူၺ်းၵႃႈမိူဝ်ႈလဵဝ် ႁိူၼ်းႁၢမ်းၵေႃႈၼမ် ၵူၼ်းယူႇႁိူၼ်းၼႆၵေႃႈ ၵိုတ်းၵူၼ်းထဝ်ႈၵူၺ်းယဝ်ႉ။
သင်ဝႃႈၵူၼ်းထဝ်ႈၸိူဝ်းၼႆႉဢမ်ႇမီး၊ ၵူၼ်းၼုမ်ႇဢၼ်ၵိူတ်ႇမႃးသမ်ႉ ပၢႆႈၵႂႃႇပႅတ်ႈတိၵ်းတိၵ်းၼႆ တေမီးၽႂ်ၵမ်ႉဝၢၼ်ႈၵမ်ႉမိူင်း၊ တေမီးၽႂ်ပဵၼ်ႁႅင်းမိူင်းလႆႈယဝ်ႉလႃႇ ဢမ်ႇၸႂ်ႈၵၢၼ်ၶႃႈၵေႃႈ ဝူၼ်ႉႁၼ်ၼႂ်းၾၼ်ၼၼ်ႉမႃးယဝ်ႉ။
ၶႃႈတႄႉၵေႃႈ ဢၢၼ်းမႃးယူႇတီႈႁိူၼ်းသေ ႁဵတ်းၵၢၼ်ၸွႆႈတီႈႁိူၼ်းၵႂႃႇ ၸွႆႈၸွမ်းပွၵ်ႉၸွမ်းဝၢၼ်ႈ ၼႃႈဝၢၼ်ႈတႃသူၼ်ၵႂႃႇ။ ၶႃႈႁၼ်ပိူၼ်ႈယူႇမိူင်းထႆး လႄႈမႃးတႅၵ်ႈတီႈမိူင်းႁဝ်းၼႆႉ တင်းလီယူႇလိူဝ်ၵွၼ်ႇ။
သမ်ႉဝႃႈမၼ်းယူႇငၢႆႈလူမ် ၶိုၼ်ႈယႂ်ႇၶိုတ်းၵၢပ်ႈယူႇသေတႃႉ ႁဝ်းဢမ်ႇမီးသုၼ်ႇလႆႈသင် လိူဝ်သေႁဵတ်းလုၵ်ႈၸၢင်ႈပိူၼ်ႈ၊ ၼင်လိၼ်ပိူၼ်ႈ ပိူၼ်ႈလၢတ်ႈၸိူင်ႉႁိုဝ် ပိူင်မီးၸိူင်ႉႁိုဝ်ၵေႃႈလႆႈၸွမ်းပၵ်းၸွမ်းပိူင်၊ ဢမ်ႇမီးဝတ်းမီးဝႂ်ၵေႃႈယူႇယၢပ်ႇ၊ ပေႃးႁဵတ်းၵေႃႈသဵင်ႈၼမ် မီးငိုၼ်းၵေႃႈၵုမ်ႇၵႃႈဝတ်းၵႃႈဝႂ်ၵူၺ်း၊ ၵိၼ်ဢမ်ႇလႆႈၵိၼ်ဢိမ်ႇ ၼွၼ်းဢမ်ႇလႆႈၼွၼ်းဝၢၼ် ၵူႈဝၼ်းပဵၼ်ၵၢၼ်ၵၢၼ်။
ယူႇမိူင်းႁဝ်းဢမ်ႇၶိုၼ်ႈယႂ်ႇ ဢမ်ႇလႆႈငိုၼ်းၼမ် ဢမ်ႇပဵၼ်ၶႃႈၽႂ် ပဵၼ်ၶႃႈတူဝ်ၵဝ်ႇ၊ ႁဵတ်းလႆႈမွၵ်ႈႁိုဝ်ၵေႃႈပဵၼ်ၶွင်ႁဝ်း တင်းဢၼ်သၢင်းၶွၼ်ႇပိူၼ်ႈႁေ တင်းဢၼ်ႁဵတ်းဝတ်းၼၼ်ႉႁေ မႃးတႅၵ်ႈၵၼ်ၼႆႉၵိုင်ႇၵိုင်ႇၵၼ်ၵေႃႈတင်းဝႃႈၶႅၼ်းယူႇ သင်ဢမ်ႇသင်ၼင်လိၼ်ႁဝ်းယဵပ်ႇယူႇၼႆႉ တင်းဝႃႈလႆႈမၼ်းပဵၼ်ၶွင်ႁဝ်းၼႆ။ တုၵ်ႉၶၵေႃႈ ယူႇလႂ်ၵေႃႈတုၵ်ႉၶယဝ်ႉ ပေႃးဝႃႈမိူင်းဢမ်ႇသုၵ်ႉ ပိူၼ်ႈဢမ်ႇတိုၵ်းဢမ်ႇၽၼ်းၵၼ်တႄႉ ၶႃႈတိုၼ်းဝႃႈဢမ်ႇၶႂ်ႈပၢႆႈၵႂႃႇလႂ်ယဝ်ႉ။
ပၢႆၵမ် – သႅၼ်ငဝ်း
20-23 /07/2026
