မႃးယူႇႁိုင်ၼႃႇ မႄႈၶဝ်တၢင်းပုၼ်ႉၵေႃႈမွင်းၼႃႇယဝ်ႉလႄႈ ဝၢႆးပိုၼ်းမိူင်းၵႂႃႇၶိုၼ်းၶႃႈၵေႃႈ ၶႃႈလႆႈမိူဝ်းၵႂႃႇၶိုၼ်းယဝ်ႉ။ ႁႃးၵေႃႈ မႃးယူႇၸွမ်းၵၼ်မီးယူႇသွင်လိူၼ်ၼႆႉယဝ်ႉလႄႈ မိူဝ်းၵႂႃႇ ၼင်ႇဝႃႈ ႁူဝ်လိူၼ်ၶႃႈႁၢႆၵႂႃႇယဝ်ႉ၊ ဢမ်ႇတၼ်းလႆႈႁဵတ်းသင် ၶႃႈပေႃးတေလႆႈလဵင်ႉလုၵ်ႈထႅင်ႈၵေႃႉၼိုင်ႈယဝ်ႉၼႃႇ။
ဢၼ်ၶႃႈၶႂ်ႈႁဵတ်းလိူဝ်ပိူၼ်ႈၵေႃႈ ၶႂ်ႈမေႃႁေႃႈၵႃးႁင်းၵူၺ်းယဝ်ႉ ယွၼ်ႉပိူဝ်ႈလုၵ်ႈၵေႃႈတေလႆႈၵႂႃႇႁူင်းႁဵၼ်းယဝ်ႉလႄႈ လူဝ်ႇၵႂႃႇႁပ်ႉၵႂႃႇသူင်ႇမၼ်းယဝ်ႉ။ ပေႃးႁႂ်ႈပိူၼ်ႈၵႂႃႇသူင်ႇၵေႃႈလႆႈယူႇ ၵူၺ်းၵႃႈ ၶႃႈၵေႃႈၶႂ်ႈမေႃၵႂႃႇႁင်းၵူၺ်းၼၼ်ႉယဝ်ႉ။
တႄႇတီႈၼၼ်ႈသေ ၶႃႈၵေႃႈလႆႈၽိုၵ်းၵႂႃႇတေႃႇပေႃးႁူႉပေႃးမေႃမႃးယဝ်ႉ။ မၢင်ပွၵ်ႈယူႇၸွမ်းလုၵ်ႈၵေႃႈ လီမိူၼ်ၵၼ် ႁဝ်းၵေႃႈလႆႈလူလိၵ်ႈဢၢၼ်ႇလိၵ်ႈၼမ်မႃး လဵပ်ႈႁဵၼ်းယူႇၸွမ်းၶဝ်မႃး ၶဝ်ၵေႃႉယႂ်ႇမႃးၵေႃႈ ၶႂ်ႈႁႂ်ႈၶဝ်ၶႅၼ်ႇလိူဝ်သေႁဝ်း၊ ႁဝ်းၼႆၵေႃႈလႆႈၶတ်းၸႂ်ႁဵၼ်းႁႃတၢင်းႁူႉတႃႇမႃးၵမ်ႉၸွႆႈပၼ်ၶဝ်ယူႇယဝ်ႉ။
သမ်ႉဝႃႈၶႃႈတေႇၼႃႈႁိူၼ်းၸဝ်ႉ ဢမ်ႇယဝ်ႉႁူင်းႁဵၼ်းသုင်သုင်ၼႆသေတႃႉ၊ သင်ၶႃႈဢမ်ႇလဵပ်ႈႁဵၼ်းၵေႃႈ တင်းတေၸုၵ်းယူႇတီႈၼၼ်ႈၵူၺ်း၊ ၵၢၼ်လဵပ်ႈႁဵၼ်းၼႆႉဢမ်ႇမီးတီႈသုတ်းသဵင်ႈ ယိုင်ႈႁူႉယိုင်ႈၶႅၼ်းၶႂ်ႈႁူႉၵႂႃႇတိၵ်းတိၵ်းယဝ်ႉ။ သမ်ႉဝႃႈမီးလုၵ်ႈယူႇၵေႃႈ ၶႃႈယင်းတိုၵ်ႉၵႂႃႇႁဵၼ်းလိၵ်ႈ ၼင်ႇလုၵ်ႈဢွၼ်ႇၼၼ်ႉယူႇယဝ်ႉ။
ၵွပ်ႈပဵၼ်ၵူၼ်းဝၢၼ်ႈၼွၵ်ႈၵူၺ်းလႄႈ လိၵ်ႈမၢၼ်ႈၵႂၢမ်းမၢၼ်ႈၼႆၵေႃႈဢမ်ႇမေႃ၊ ၶႃႈၸင်ႇလႆႈၵႂႃႇႁဵၼ်းလိၵ်ႈမၢၼ်ႈၵႂၢမ်းမၢၼ်ႈသေ ဢဝ်ၶႃႈဢမ်ႇမီးၶၢဝ်းယၢမ်းတၼ်း လၢတ်ႈတၼ်းတၵ်ႉတေႃႇ ပိုၼ်းမိူင်းမႃးယဝ်ႉ။
မိူဝ်ႈၶႃႈပွၵ်ႈႁိူၼ်းမႃး လႆႈႁၼ်မၼ်းမီးယူႇပႃႇၽၵ်းတူၼၼ်ႉလႄႈ
“မႃးမိူဝ်ႈလႂ်လႃႇ”
“ၸူဝ်ႈပိူၼ်ႈမေႃႁေႃႈၵႃးႁင်းၵူၺ်းၼႆႉ ဢမ်ႇပေႃးၶႂ်ႈလၢတ်ႈတေႃႇၵၼ်ယဝ်ႉ ထူဝ်းၵေႃႈဢမ်ႇႁပ်ႉ တၵ်ႉၵေႃႈဢမ်ႇတွပ်ႇယဝ်ႉၼႃႇ”
လႆႈႁၼ်မၼ်းလၢတ်ႈၸိူင်ႉၼၼ်ၵေႃႈ ဢဝ်ၶႃႈသမ်ႉပေႃးယုမ်ႉဢွၵ်ႇမႃးယဝ်ႉ “သူၵူဝ်ႁဝ်းၵႂႃႇႁႃပေႃႈမႂ်ႇပၼ်လုၵ်ႈႁဝ်းႁေၵႃႈၼႆႉ”
“ၵူဝ်ဢေႃႈ..ၵူဝ်လိူဝ်သေပိူၼ်ႈယဝ်ႉ”
“ၸႂ်ထိုင်သူတေႉယဝ်ႉ”
ၶႃႈၵေႃႈၶဝ်ႈၵႂႃႇၵွတ်ႇမၼ်းဝႆႉသေ မၼ်းၵေႃႈဢဝ်မိုဝ်းမၼ်းၵွတ်ႇၶႃႈယဝ်ႉ ၼင်ႇႁၢင်ႈၼႂ်းဢွင်ႈဢူၵ်းမၼ်းၼၼ်ႉပေႉမႃးဢုၼ်ႇ၊ ဢၼ်ႁိူဝ်ႉမႃးတၢင်းဝၼ်းၼၼ်ႉ ႁၢႆၵႂႃႇတၢင်းလႂ်မူတ်းယဝ်ႉဢမ်ႇႁူႉ။
ၶႃႈၵေႃႈႁဵၼ်းႁေႁဵတ်းၵၢၼ်ႁေ ယူႇယူႇဢူႈၸဝ်ႈႁဝ်းၵေႃႈ ၽုၺ်ႇသႅင်ႇၶၢႆၶူဝ်းပၼ်ၶႃႈသေ ၶႃႈၵေႃႈမီးၵၢၼ်မီးငၢၼ်းမႃးယဝ်ႉ၊ လုမ်းလႃးလုၵ်ႈႁေ ႁဵတ်းၵၢၼ်ၸွမ်းႁေ ၼင်ႇႁၢင်ႈၸၢတ်ႈပၢၼ်ၼႆႉသုၵ်ႉသၵ်ႉယူႇၵူႈဝၼ်း ၵူၺ်းၵႃႈ ဢမ်ႇတၼ်းဝူၼ်ႉသင်ၼမ် ၶႃႈမႃးၶိုၼ်ႈပႂ်ႉၶဝ်ၼႆႉၵေႃႈ သမ်ႉပေႃးမီး သိပ်းပီယဝ်ႉၼႃႇ။
ပေႃးဝႃႈႁဝ်းလႅၵ်ႈလၢႆႈမႃးၵေႃႈ ၵူၼ်းႁိမ်းႁွမ်းႁဝ်းၵေႃႈမေႃလႅၵ်ႈလၢႆႈမႃးယူႇ၊ ၼင်ႇႁၢင်ႈလွင်ႈၸမ်ၸႂ် မၼ်းလႄႈတင်းဢူႈၶဝ်ၵေႃႈလီမႃးယဝ်ႉ၊ တေပဵၼ်ယွၼ်ႉဢၼ်မၼ်းၼွၵ်ႈၸႂ်ၶႃႈပွၵ်ႈၼၼ်ႉၵေႃႈပႃးႁိုဝ်ဢမ်ႇႁူႉ တေဝူၼ်ႉထိုင်လုၵ်ႈမၼ်းယူႇၽွင်ႈ မၼ်းၵေႃႈဢမ်ႇလႆႈပိူင်ႈၵႂႃႇ ၸူဝ်ႈၶႃႈႁဵတ်းၵၢၼ်ၼႆႉၵႆႉၵႆႉမႃးၸႂ်းႁိူၼ်းယူႇသေႇသေႇ။
တေဝႃႈႁိုဝ်ၵေႃႈ မၼ်းဢသၢၵ်ႈယႂ်ႇယဝ်ႉဢမ်ႇႁူႉၼႃႇ ႁႃးသွင်ၵေႃႉ ၵႂႃႇၵၼ်ယူႇသိပ်းပီၼႆႉယဝ်ႉ။ ဝၢႆးသေၶႃႈမႃးၶိုၼ်ႈပႂ်ႉၶဝ် ၶႃႈၸင်ႇတေႁူႉဝႃႈ မၼ်းယၢမ်ႈဝႆႉၸူႉမိူဝ်ႈၵႂႃႇၶိုၼ်ႈၵျွင်းႁေ ၶႃႁၵ်ႉၵၼ်ၵျႃႉၵွၼ်ႇ ၶိုင်ဢၢင်ႈတေႇၼႃႈႁိူၼ်းၸွမ်းၵၼ်ယဝ်ႉ မိူဝ်ႈၼၼ်ႉမၼ်းတႄႉၵေႃႈႁဵတ်းၵၢၼ်ႁႃငိုၼ်းႁင်းၵူၺ်း လွင်ႈၵိၼ်လွင်ႈယူႇမၼ်းၵေႃႈဢမ်ႇယွၼ်းတီႈႁိူၼ်း ယူႇၸွမ်းလုင်းသေႁဵတ်းၵၢၼ်မႄးလူတ်ႉမႄးၵႃးယူႇၸိူင်ႉၼၼ်ၼၼ်ႉၼႃႇ။
ၸူႉမၼ်းၼၼ်ႉတႄႉၵေႃႈ ပဵၼ်ၵူၼ်းႁၢင်ႈလီၼႃႇတေႉဢိူဝ်ႈ မၼ်းၵေႃႈသမ်ႉလဝ်းၼၼ်ႉၼႃႇ၊ မၼ်းတႄႉၵေႃႈႁၵ်ႉၽူႈယိင်းၵေႃႉၼၼ်ႉ တေႉတေႉဝႃႈဝႃႈ ၶႂ်ႈလႆႈသင်ၵေႃႈ ႁဵတ်းပၼ်ႁႃပၼ်၊ ငိုၼ်းႁွမ်မၼ်းဢၼ်ႁဵတ်းၵၢၼ်မႃးပေႃးဢမ်ႇၵိုတ်း၊ ၵမ်းလိုၼ်းသုတ်း ၽူႈယိင်းၵေႃႉၼၼ်ႉၵေႃႈ ၵႂႃႇၼွၵ်ႈၸႂ်မၼ်းထႅင်ႈသေ လူၺ်ႈလွင်ႈဝႃႈၵူၼ်းၵေႃႉၼၼ်ႉမၢၵ်ႈမီးလိူဝ်သေမၼ်း ၵူၺ်းၵႃႈ တူဝ်မၼ်းၼၼ်ႉသမ်ႉဢမ်ႇမီးၸၢတ်ႈပၢၼ်တၢင်းၼႃႈ ဢၼ်တေၵႂႃႇၸွမ်းၵၼ်လႆႈၼႆၼၼ်ႉယဝ်ႉ။
သမ်ႉဝႃႈမၼ်းပဵၼ်ၽူႈၸၢႆးၵေႃႈ မၼ်းပဵၼ်ၵူၼ်းဢၼ်ၸႂ်ဢူၼ်ႈဢွၼ်ႇၼႃႇ၊ မၼ်းၸင်းတေႉယဝ်ႉၵူၼ်းၼွၵ်ႈၸႂ်ၼႆႉ၊ မၼ်းၵေႃႈလၢတ်ႈဝႃႈတူဝ်မၼ်းတေဢမ်ႇႁဵတ်း၊ ယွၼ်ႉလွင်ႈၼႆႉသေ ၶႃႈၵေႃႈလႆႈယုမ်ႇယမ်မၼ်းယဝ်ႉ။ ၵူၺ်းၵႃႈၵူၼ်းႁဝ်းၼႆႉသမ်ႉ ပေႃးၵျေႃႇမႃးၵေႃႈ ၵႆႉလိုမ်းမိူဝ်ႈတုၵ်ႉမႃးလႄႈ လႆႈႁဵတ်းမႅၼ်ႈၺႃးဢၼ်ႁဝ်းဢမ်ႇၵျိူၵ်ႈ လူၺ်ႈလွင်ႈတၢင်းဝႃႈ ၸႂ်မၼ်းပႃးၵႂႃႇၸွမ်းယဝ်ႉဢိူဝ်ႈ ၼႆၼၼ်ႉၼႃႇ။
ၸင်ႇလႂ် မၼ်းဢမ်ႇတွၼ်ႉလၢတ်ႈၶႃႈဝႃႈမၼ်းပဵၼ်ၵူၼ်းမီး တေႃႇပေႃးပႃးတွင်ႉသေမႃးတီႈႁိူၼ်းၶဝ် ၶႃႈၸင်ႇတေႁူႉ။ သမ်ႉဝႃႈဢဝ်ၵၼ်ယဝ်ႉၵေႃႈ မၼ်းယင်းတိုၵ်ႉၸၢမ်းၸႂ်ၶႃႈသေ ယူႇတုၵ်ႉယူႇယၢၵ်ႈယူႇ။ ၵူၺ်းၵႃႈ ဢမ်ႇဝႃႈၸိူင်ႉႁိုဝ် ႁႃးၵေႃႈၽၢၼ်ႇပူၼ်ႉမၼ်းမႃးသိပ်းပီယဝ်ႉၼင်ႇၵွၼ်ႇ။
ပေႃးဝႃႈၼႃႈႁိူၼ်းၼႆ ဢမ်ႇၸႂ်ႈလႄႈဝႃႈႁၵ်ႉႁိုဝ်ဢမ်ႇႁၵ်ႉၵူၺ်း ၵႃႈတေလႆႈတူၺ်းႁႂ်ႈၵႆ၊ လွင်ႈလႂ်မူၼ်ႉမႄးလႆႈၵေႃႈမႄးၵႂႃႇ၊ လွင်ႈလႂ်ဢမ်ႇလီၵေႃႈငိူင်ႉဝႄႈသေ၊ တၢင်းၽိတ်းဢၼ်လႂ်ၸၢင်ႈၵႄႈၶႆ ပေႃးဝႃႈပွႆႇလွတ်ႈလႆႈယူႇၼႆၶႂၢင်းပၼ်သေ၊ တူၺ်းႁၼ်ၼႃႈႁိူၼ်းႁဝ်းပဵၼ်ယႂ်ႇသႂ်ႇၸႂ်ၵူၼ်းၼႂ်းႁိူၼ်းၼမ်ၼမ် လုမ်းလႃးတူဝ်ၵဝ်ႇႁႂ်ႈလီ ၸင်ႇတေမီးႁႅင်းလုမ်းလႃးၵူၼ်းၼႂ်းႁိူၼ်းလႆႈ။
ယွၼ်ႉပိူဝ်ႈႁဝ်းသွင်ႁူမ်ႈပဵၼ်ႁိူၼ်းလဵဝ်ယဝ်ႉ ဢမ်ႇၸႂ်ၶွင်ၵဝ်ၶွင်မႂ်း လွင်ႈၵဝ်လွင်ႈမၼ်းယဝ်ႉ၊ လွင်ႈသူၵေႃႈမိူၼ်လွင်ႈႁဝ်း လွင်ႈႁဝ်းၵေႃႈမိူၼ်လွင်ႈသူ၊ လီဢိၵ်ႇၸႃႉ ႁူမ်ႈၽဝဢၼ်လဵဝ်ၵၼ်ယဝ်ႉလႄႈ မီးပၼ်ႁႃၵေႃႈၸွႆႈၵၼ်ၵႄႈ ဢမ်ႇၸႂ်ႈလႄႈ ဝႄႈတၢင်းၽိတ်းယဝ်ႉပွႆႇႁႂ်ႈတုၵ်ႉယူႇၽၢႆႇလဵဝ်ၸိူင်ႉၼၼ် ႁိုင်မႃးၸၢင်ႈပၼ်ႁႂ်ႈမၼ်းတႅၵ်ႇလႅဝ်ၵႂႃႇယဝ်ႉ။
သုတ်း
တႅမ်ႈ – သႅၼ်ငဝ်း
27/6/2026 – 05/07/2026
