ၵွပ်ႈမၼ်းယွမ်းႁပ်ႉတၢင်းၽိတ်းမၼ်းၼၼ်ႉႁိုဝ် ႁဵတ်းႁႂ်ႈၶႃႈလႆႈၸႂ်ဢူၼ်ႈၵႂႃႇသေၶႂၢင်းပၼ်မၼ်းလႆႈလႄႈ တႃႇယုမ်ႇၸႂ်မၼ်းထႅင်ႈၼၼ်ႉၵေႃႈ ဢမ်ႇလႆႈတဵမ်ပၢၵ်ႇယဝ်ႉဢိူဝ်ႈ၊ ၵူၺ်းၵႃႈ ဢဝ်ဝႃႈပဵၼ်ၼႃႈႁိူၼ်းၵၼ်မႃးႁိုင် မီးလုၵ်ႈႁူမ်ႈၵၼ်ယဝ်ႉလႄႈ သမ်ႉဝႃႈဢမ်ႇၶႂ်ႈယုမ်ႇၵေႃႈ ၵႃႈတေလႆႈပွႆႇၵႂႃႇတူၺ်းပွၵ်ႈၼိုင်ႈယူႇ။
လႆႈမႃးယူႇႁိူၼ်းၶိုၼ်းၵေႃႈ ၶုၵ်းၸႂ်လႆႈၶိုၼ်းမိူဝ်ႈတႄႇႁၼ်ၵၼ်ၼၼ်ႉမႃး လႆႈမႃးယူႇၸွမ်းၵၼ်ပေႃႈမႄႈလုၵ်ႈႁဵတ်းၼႆၵေႃႈ ၼင်ႇဝႃႈမိူၼ်ၼႃႈႁိူၼ်းဝႆႉယူႇယဝ်ႉ၊ သင်မၼ်းပဵၼ်ၼႆယူႇတႃႇသေႇၵေႃႈတႃႉလီမိူၼ်ၵၼ်။
“သူ..”
“ႁိုမ်..”
“ၸူမ်းယဝ်ႉၼႃႈ”
“မီးလွင်ႈသင်လႃႇ..”
“ဢၼ်သူၶၢမ်ႇယၢပ်ႇသေ ယူႇၸွမ်းႁဝ်းမႃးတေႃႇဝၼ်းမိူဝ်ႈၼႆႉ ၼႂ်းၸၢတ်ႈပၢၼ်ႁဝ်းၼႆႉ တေႁႃၽႂ်ႁႂ်ႈမိူၼ်သူဢမ်ႇလႆႈထႅင်ႈယဝ်ႉ”
မိူၼ်မၼ်းတေတတ်းၶၢတ်ႇပႅတ်ႈၽူႈယိင်းၵေႃႉၼၼ်ႉမႃးယဝ်ႉ။ တၢင်းႁၵ်ႉၼႆႉ သမ်ႉဝႃႈၶဝ်ႈလဵၼ်ႈၵေႃႈမေႃၸဵပ်းတေႉဢိူဝ်ႈ သီၼႃႈမၼ်းၵေႃႈမွင်ၵႂႃႇ ဝၢႆးမၼ်းၵႂႃႇလၢတ်ႈၾူၼ်းသေမႃးႁႃၶႃႈၶိုၼ်းၼၼ်ႉ။
မၢင်လွင်ႈၼႆႉ ၶဝ်ဢမ်ႇလၢတ်ႈၼႆ ဢမ်ႇၸႂ်ႈဝႃႈႁဝ်းဢမ်ႇႁူႉထိုင်မၼ်းလႆႈ ႁဝ်းႁပ်ႉႁူႉမၼ်းလႆႈယူႇ လိူဝ်သေဢမ်ႇႁၼ်တႂ်ႈတႃဢမ်ႇမီးသၢၵ်ႈသေႇမၼ်းၵူၺ်းလႄႈ ဢမ်ႇၸၢင်ႈလၢတ်ႈ။
ၶႃႈၵေႃႈဢမ်ႇလႆႈလၢတ်ႈသင် ဢမ်ႇတွပ်ႇသင်ၶိုၼ်းသေ ၼွၼ်းၵွင်လင်ယဝ်ႉ လၵ်ႉပွႆႇၼမ်ႉတႃဢွၵ်ႇမႃးယူႇ။ လွင်ႈဢၼ်မၼ်းႁဵတ်း မၼ်းတေလႆႈဢဝ်ပုၼ်ႈၽွၼ်းၼႆၵေႃႈ မိူဝ်ႈႁၼ်ၶဝ်ပဵၼ်ၸိူင်ႉၼၼ် ၶႃႈၵေႃႈဢမ်ႇသိူဝ်းလႆႈမိူၼ်ၵၼ်။ မိူၼ်မၼ်းတေႁၵ်ႉၽူႈယိင်းၵေႃႉၼၼ်ႉယူႇဢမ်ႇဢေႇ။
ပီၼႆႉၵေႃႈၼွင်ႉယိင်းၶႃႈႁဵၼ်းယဝ်ႉၸၼ်ႉသုင်သေ တႃႇတေသိုပ်ႇႁဵၼ်းထႅင်ႈၼၼ်ႉ ပိုၼ်းၶိူဝ်းၵေႃႈလႆႈၸွႆႈၵမ်ႉထႅမ်သိုပ်ႇႁဵၼ်းၸၼ်ႉၸွမ်ယူႇ။ လွင်ႈပဵၼ်ယူႇၼႃႈႁိူၼ်းႁဝ်းၼၼ်ႉ ပေႃးလူဝ်ႇသင်မႃးၼႆ မၼ်းၵေႃႈၸွႆႈထႅမ်မႃးတႃႇသေႇ။
ၸူဝ်ႈၶႃႈတေႇၼႃႈႁိူၼ်းမႃးၼႆႉ ၶႃႈၵေႃႈဢမ်ႇလႆႈႁဵတ်းၵၢၼ်မိူၼ်မိူဝ်ႈယူႇႁိူၼ်းယဝ်ႉလႄႈ လူဝ်ႇႁင်သိုဝ်ႉႁင်ၵေႃႈဢမ်ႇလႆႈဝူၼ်ႉလႆႈသွၼ်ႇၼင်ႇမိူဝ်ႈယူႇႁိူၼ်းၼႆႉယဝ်ႉ၊ မၼ်းႁဵတ်းႁႂ်ႈၶႃႈယူႇငၢႆႈလူမ်ထိုင်တီႈပေႃးလိုမ်းတူဝ်ၵႂႃႇဝႃႈ ပေႃးဢမ်ႇမီးမၼ်းယဝ်ႉ ၶႃႈၸွင်ႇတေႁဵတ်းၵၢၼ်လႆႈမိူၼ်ၵဝ်ႇယူႇႁိုဝ်၊ သင်ဢမ်ႇသင်ၵေႃႈ ၶႃႈလီမီးၵၢၼ်ႁဵတ်းယူႇ၊ တေႃႈဝႃႈတေႁဵတ်းၵၢၼ် ဢဝ်လုၵ်ႈၵူၺ်းပေႃးဢမ်ႇတၼ်းႁဵတ်းႁင်ယဝ်ႉ။
ၵူၼ်းဢမ်ႇမီးၵၢၼ်ႁဵၼ်းသုင် လုၵ်ႈပေႃႈႁႆႈမႄႈၼႃးၸိူင်ႉၶႃႈၼႆႉၵေႃႈ ႁႂ်ႈဝႃႈၵႂႃႇႁဵတ်းၵၢၼ်ၸိူင်ႉၶဝ်ႁဵတ်းယူႇၼၼ်ႉ ပဵၼ်ဢၼ်ယၢပ်ႇဝႆႉယူႇ။
ယူႇယူႇၼွင်ႉၶႃႈၵေႃႈမႃးထၢမ်
“ႁိူၼ်းပီႈၶူၺ်ၶဝ်ႁဵတ်းၵၢၼ်ႁင်လႃႇ”
“ႁင်းပီႈၶူၺ်သူၵေႃႈတေမီး သႅင်ႇမႄးၵႃးၼၼ်ႉၼႃႇ၊ ဢူႈၶဝ်တႄႉၵေႃႈပဵၼ်ၵူၼ်းၵႃႉလူင်ဢိူဝ်ႈ”
“ၶဝ်ဢမ်ႇႁဵတ်းၸွမ်းၵၼ်ၵႃႈ”
“ဢမ်ႇ မၼ်းဢွၵ်ႇမႃးႁဵတ်းႁင်းမၼ်းၵူၺ်း၊ ဢူႈၶဝ်ၵေႃႈႁဵတ်းႁင်းမၼ်း မၢင်ပွၵ်ႈၵေႃႈႁမ်ႉမိူၼ်ႁဵတ်းၸွမ်းၵၼ်ယူႇၵူၺ်းၵဝ်ႇ ပေႃးလူတ်ႉၵွႆမႃးၵေႃႈ ၵႂႃႇၸူးတီႈသႅင်ႇမၼ်းလၢႆလၢႆ”
“ပီႈလူး..မိူဝ်းယူႇၵႆႈပုၼ်ႉဢမ်ႇႁဵတ်းႁင်ႁႃႉ”
“ၸၢင်ႈတေႁဵတ်းႁင်..ဢဝ်လၢၼ်မႂ်းၵူၺ်းၵဝ်ပေႃးဢမ်ႇတၼ်းယူႇယဝ်ႉ”
“ထႅင်ႈဢိၼ်ႉၵေႃႈ မၼ်းပေႃးတေၵႂႃႇႁူင်းႁဵၼ်းယဝ်ႉ ပီႈႁမ်ႉဢမ်ႇႁႃသေလွင်ႈလွင်ႈႁဵတ်းတူၺ်း၊ ၵႂႃႇႁႃႁဵၼ်းထႅင်ႈၵေႃႈလႆႈယူႇလူး ၼႂ်းဝဵင်းလူင်ၼင် တီႈလဵပ်ႈႁဵၼ်းၸိူဝ်းၼႆႉလိူင်ႇၵႃႈႁိုဝ်”
“တၢၼ်ႇၵဝ်ၼႆႉတေႁဵၼ်းႁင်ထႅင်ႈ”
“တၢၼ်ႇပီႈၼႆႉ ပိူၼ်ႈတိုၵ်ႉႁဵၼ်းယူႇဢိူဝ်ႈ တီႈၸၼ်ႉၸွမ်ၶႃႈၵႂႃႇတၢင်ႇဝႂ်ၶိုၼ်ႈႁဵၼ်း ၵူၼ်းဢသၢၵ်ႈယႂ်ႇလိူဝ်ပီႈၼႆႉတင်းမီး”
“မႂ်းႁႂ်ႈၵဝ်ၵႂႃႇၶိုၼ်ႈၸၼ်ႉၸွမ်ၸိူင်ႉၼၼ်ၵႃႈ”
“ဢမ်ႇၸႂ်ႈ မိူၼ်ၸိူင်ႉဝႃႈပီႈၶႂ်ႈမေႃယဵပ်ႉၶူဝ်းၼႆႁိုဝ်လႃႇ ၵၢၼ်ႁႃလဵင်ႉတွင်ႉပီႈဢိူဝ်ႈ ပေႃးပီႈမေႃၵေႃႈ ဢမ်ႇမီးပီႈၶူၺ်ၵေႃႈ ပီႈတေဢမ်ႇလႆႈမႃးႁဵတ်းသူၼ်မိူၼ်မိူဝ်ႈၼၼ်ႉၶိုၼ်းၼၼ်ႉၼႃႇ”
ဢၼ်မၼ်းလၢတ်ႈမႃးၵေႃႈႁမ်ႉၸႂ်ႈယူႇၵူၺ်းၼင်ႇၵဝ်ႇ ၶႃႈတႄႉၵေႃႈၵွပ်ႈပိူဝ်ႈမီးယူႇလႄႈ ဢမ်ႇၶႂ်ႈႁႃမၼ်းထႅင်ႈယဝ်ႉ၊ ဢမ်ႇလႆႈၶၢတ်ႇလိူဝ်သင်လႄႈ ဢမ်ႇဝူၼ်ႉတေႁႃသင်မႃးထႅင်ႈယူႇၵႂႃႇၸိူင်ႉၼၼ်ၵူၺ်း။
တင်းၼွင်ႉၶႃႈလၢတ်ႈသေ တင်းဢၼ်ငဝ်းလၢႆးၶႃႈတိုၵ်ႉပူၼ်ႉမႃးၼၼ်ႉၵူၺ်းႁေ ၶႃႈၵေႃႈဢွၵ်ႇၸႂ်ၶႂ်ႈႁဵတ်းသေလွင်ႈလွင်ႈမႃးယဝ်ႉ။
