တွၼ်ႈသၢမ်
“မႂ်းတေၵႂႃႇလႂ် ၵဝ်လၢတ်ႈလဵၼ်ႈၵူၺ်းဢိူဝ်ႈ”
ၵူၺ်းၵႃႈသီၼႃႈသီလိူၼ်ၵေႃႈ ဢမ်ႇၸိုၼ်ႈဢမ်ႇပၢင်ႇဝႆႉယူႇ။
“မႂ်းယႃႇမႃးႁႃလၢတ်ႈလဵၼ်ႈယူႇၼႆႉ ၶေးၸႂ်ႈတေႉတင်းဢမ်ႇႁူႉမေႃႉ မႂ်းလၢတ်ႈတေႉႁႃႉ”
“ၵဝ်လၢတ်ႈတေႉဢိူဝ်ႈ”
“ၼၼ်ႉၼႃႇ ပဵၼ်လွင်ႈတေႉဢမ်ႇၸႂ်ႈႁႃႉ”
“မႂ်းၼႆႉၵေႃႈ ၵဝ်လၢတ်ႈတေႉဝႃႈ ၵဝ်လၢတ်ႈၼၼ်ႉဢမ်ႇၸႂ်ႈလွင်ႈတေႉ မႂ်းႁမ်ႉပေႉႁၢင်ႈၽိတ်းၸႂ်ၽိတ်းၶေဝႆႉလႃႇ မႂ်းဢမ်ႇယုမ်ႇၽူဝ်မႂ်းႁႃႉ”
“ယုမ်ႇၵေႃႈဢမ်ႇတဵမ်ႁူဝ်ပၢၵ်ႇလေႃႇ မႂ်းပေႃးလၢတ်ႈဢွၵ်ႇသူပ်းမႃးၸိူင်ႉၼၼ်”
“ၸွင်ႇႁိူဝ်ႉႁႃႉမီးၽူဝ်ၼႆႉ တေလႆႈၸွမ်းၶႅၼ်ၸွမ်းသီးယူႇၸိူင်ႉၼၼ် ယွၼ်ႉႁဝ်းယုမ်ႇဝႃႈၶဝ်တေပဵၼ်ၶွင်ႁဝ်းၵေႃႉလဵဝ် တီႈတေႉႁဝ်းၵေႃႈဢမ်ႇႁူႉလႆႈ ၸႂ်ၶဝ် သမ်ႉဝႃႈႁူႉၸၵ်းၵၼ်မႃးႁိုင်ၵေႃႈ မၼ်းၸၢင်ႈမေႃလႅၵ်ႈလႆၢႈယူႇ ၵွပ်ႈၼၼ် မိူဝ်ႈဢမ်ႇႁူႉၸၵ်းၼႆႉယူႇႁၢင်ႇႁၢင်ႇဝႆႉတေလီလိူဝ် သင်ၶဝ်ႈၸမ်ပူၼ်ႉတေၸၢင်ႈႁဵတ်းႁႂ်ႈလူင်တူဝ်လိုမ်းၶိင်းၸွမ်းၵႂၢမ်းလၢတ်ႈၶဝ်လႆႈ မႂ်းၵေႃႈမိူဝ်ႈငိၼ်းၵဝ်လၢတ်ႈၸိူင်ႉၼႆ တေၵိူတ်ႇလွင်ႈထၢင်ႇထိူမ်မႃးယဝ်ႉ ယိင်ႈမႂ်းႁူႉၼမ်မႂ်းယိင်ႈၶႅၼ်းထၢင်ႇ ၵွပ်ႈၼၼ်လႄႈ ႁူဝ်ၸႂ်ၼႆႉၵေႃႈ ယိင်ႈၸမ်ၸႂ်တၢၼ်ႇႁိုဝ် ယိင်ႈၶႅၼ်းၸဵပ်းႁႅင်းယဝ်ႉ ၵဝ်ၵေႃႈဢမ်ႇၶႂ်ႈသုမ်းၶၢဝ်းယၢမ်းၸွမ်း လွင်ႈတၢင်းႁၵ်ႉမိူၼ်ၵၼ်”
“လိူဝ်ၸႂ်ၼႃႇမႂ်းၼႆႉတႄႉ ပေႃးၵျေႃႇပေႉၼၢၼ်ႉၵေႃႈႁဵတ်းသၢဝ်ထဝ်ႈႁေလႄႈ ဢမ်ႇလူဝ်ႇဢဝ်ဝႃႈၽူဝ်”
“ႁဵတ်းႁိုဝ်လႄႈဝႃႈဢမ်ႇဢဝ်လႆႈဢႃႈ”
“ဢမ်ႇႁိုင်ပိူၼ်ႈပေႃးတေၶဝ်ႈဝႃႇယဝ်ႉမႂ်း”
“မီးဝႃႇလဵဝ်ၵူၺ်းၵေႃႈဢမ်ႇၸႂ်ႈ..မႂ်းဢမ်ႇႁူႉယူဝ်ႉ…ဢွၵ်ႇဝႃႇၼႆႉၵဝ်တေပဵၼ်ႁိူၼ်းယဝ်ႉ”
သမ်ႉပေႃးဢဝ်သီလိူၼ်ငိူဝ်ႈလူင်ၵႂႃႇသေ
“ႁႅင်ႉမႂ်းဢမ်ႇလၢတ်ႈၵဝ်”
“မႂ်းတမ်ႉဢမ်ႇထၢမ်..”
“ၵဝ်ငိူဝ်ႈၵူၺ်းပေႃးၼၼ်..ၸင်ႇဝႃႈလႄႇႁၼ်မၢဝ်ႇယဝ်ဢမ်ႇတၵ်ႉ ဢၵျွင်းဝႃႈမၼ်းပဵၼ်ၼႆ” သႆၢတႃယၵ်ႉတူၺ်းၼုမ်ႇႁွမ်ယဝ်ႉ”ၽႂ်လႃႇ”
“ပေႃးမႂ်းႁူႉပိူၼ်ႈၵေႃႈတေႁူႉတၢင်းဝၢၼ်ႈဢမ်ႇၸႂ်ႈႁိုဝ် ၸင်ႇလႂ်ၵဝ်ၶၢၼ်ႉလၢတ်ႈမႂ်း”
“ႁူႉၵေႃႈၸၢင်ႈပဵၼ်ႁင်ဢႃႈ…လၢတ်ႈမႃးလႄႈ”
“လၢမ်းဢဝ်ၵူၺ်းမႂ်းလႃႈ”
“ၵူၼ်းဝၢၼ်ႈႁဝ်းႁႃႉတၢင်ႇတီႈ”
“ဢမ်ႇႁူႉၼၼ်ႉတႄႉ”
“မႂ်းလၢတ်ႈတေႉႁႃႉလၢတ်ႈလဵၼ်ႈၼႆႉ ၵဝ်ပေႃးဢမ်ႇၶႂ်ႈယုမ်ႇမႂ်းလႆႈယဝ်ႉ”
“ၵဝ်လၢတ်ႈလဵၼ်ႈၵူၺ်း”
“ၶႂ်ႈဝႃႈတေႉ”
“ယူႇတီႈမႂ်းဝူၼ်ႉၵူၺ်း”
“ပေႃးၼၼ်လွင်ႈၽူဝ်ၵဝ်ၵေႃႈ..”
“မႂ်းဝူၼ်ႉၸိူဝ်ႉႁိုဝ်လႃႇ..”
“တေဝႃႈမီးၸူႉႁႃႉၼႆၵေႃႈ ဢမ်ႇႁၼ်မႂ်းဢုပ်ႇၽႂ် တေဝႃႈဢမ်ႇမီးႁႃႉၼႆၵေႃႈ ဢမ်ႇႁူႉႁၼ်ၸွမ်းလႆႈတႃႇသေႇ မႂ်းၼႆႉၵွႆႈယူႇၵွႆႈလၵ်းလိင်းမႃးတိၵ်းတိၵ်းယဝ်ႉ”
ဝၼ်းယဝ်ႉဝၼ်းသုတ်းသဵင်ႈ တႄႇၸဵမ်မႃးဝၼ်းၼၼ်ႉၵေႃႈ ဢမ်ႇလႆႈႁၼ်မႃးထႅင်ႈ၊ မၢင်ၵမ်းၵေႃႈၼုမ်ႇႁွမ်ၼၼ်ႉၵႆႉၵႆႉၶျွင်းတူၺ်းယူႇၸွမ်းႁိူၼိးလုင်းႁဵင်ၼၼ်ႉယဝ်ႉ။
ဝၼ်းၼိုင်ႈ..ၼုမ်ႇႁွမ်တိုၵ်ႉၵႂႃႇသူၼ်မႃး လႆႈႁၼ်လူတ်ႉၶိူင်ႈလမ်းဢၼ်ၶႂ်ႈႁၼ်ၼၼ်ႉ တၢင်ႇၽူႈယိင်းၽႅတ်ႈၵႂႃႇပႃႈၼႃႈသေ ဢမ်ႇတူင်ႉဢမ်ႇတၵ်ႉ မိူဝ်းၵႂႃႇတၢင်းႁိူၼ်းလုင်းႁဵင်ၼၼ်ႉလႄႈ ပႃးၶူဝ်းသမ်ႉပေႃးတဵမ်ဝႆႉယဝ်ႉ။
မၼ်းၼၼ်ႉၵေႃႈၼင်ႇႁၢင်ႈၸႂ်ပေႃးဢမ်ႇသိူဝ်းမႃးၵမ်းလဵဝ်၊ မိူဝ်ႈမိူဝ်းထိုင်တီႈႁိူၼ်းယဝ်ႉၵေႃႈၼင်ႈယူႇတႂ်ႈလၢင်ႈႁိူၼ်းသေငဝ်ယူႇၸိူင်ႉၼၼ်။
“ပီႈၼုမ်ႇ..ဢူႈႁဝ်းႁႂ်ႈမႃးႁွင်ႉ ႁႂ်ႈမ်ိူဝ်းတီႈႁိူၼ်းၵႅပ်ႉၼိုင်ႈဝႃႇ” လုၵ်ႈယိင်းဢွၼ်ႇ လုင်းႁဵင်မႃးႁွင်ႉယဝ်ႉ။
“ဢိုမ်ႈ..ၵမ်ႉမိူဝ်း”
မၼ်းၵေႃႈဢမ်ႇႁၢင်ႈၶိူင်ႈႁဵတ်းၽၢင်သင်သေ မိူဝ်းၵႂႃႇတင်းပုၵ်ႉယုၵ်ႉပႆးယႂ်းၶူဝ်းၶႆးယူႇၸိူင်ႉၼၼ်ယဝ်ႉ။
