တွၼ်ႈသၢမ်
ဢွမ်သႂ်ၼၼ်ႉတႄႉၵေႃႈ တူဝ်ပေႃးဢူၼ်ႈပေႃးဢွၼ်ႇ ၼင်ႈလူမ်ႉၵႂႃႇၼႂ်းၵၢင်ႁိူၼ်းၼၼ်ႉသေ ဢိုတ်ႇႁႆႈပၼ်တႃပေႃးၵမ်ႇပေႃးလႅင်ယူႇယဝ်ႉ။
ၽူႈယိင်းၵေႃႉၼၼ်ႉၶိုၼ်းလၢတ်ႈမႃးထႅင်ႈ “သမ်ႉဝႃႈမၼ်းၵဝ်းမႂ်းၵေႃႈမၼ်းဢမ်ႇဢဝ်မႂ်းလေႃႇ ဢွၼ်တၢင်းမႂ်းၼႆႉ မၼ်းမီးပဵၼ်လႆၢၵေႃႉယဝ်ႉ မၼ်းၵေႃႈဢမ်ႇပႅတ်ႈၵဝ်”
“ၵၼ်ႇတေႃးၶႃႈ..ၶႃႈဢမ်ႇႁူႉၸၵ်းမၼ်း”
ၵွပ်ႈႁၵ်ႉႁႅင်းၼႃႇလႄႈ မိူၼ်လႆႈၶိုၼ်းတႅင်းႁႂ်ႈၸဵပ်းႁႅင်း၊ ၵွပ်ႈဝႃႈႁၵ်ႉၼႆၼၼ်ႉ ႁဵတ်းႁႂ်ႈႁူၼူၵ်ႇတႃႇမွတ်ႇမႃးဢိူဝ်ႈ၊ ၵွပ်ႈယုမ်ႇယမ်ၼႃႇပူၼ်ႉတီႈလႄႈ မိူဝ်ႈထုၵ်ႇႁၵ်းလင်မႃးၼၼ်ႉ ၸင်ႇပဵၼ်တၢင်းၶၢၼ်ၸႂ်ယဝ်ႉ။
ၶမ်ႈၶိုၼ်းလပ်းသိင်ႇတၼ် ၼွၼ်းၶိုၼ်းႁိုဝ်လပ်းလႆႈ ႁူဝ်ၸႂ်ႁွၼ်ႉမႆႈတႅၵ်ႇပဵၼ်မုၵ်ႉၾႆးၵိုၼ်း ဝၼ်းသိုၼ်းၸိူဝ်းပူၼ်ႉမႃး မိူၼ်လႆႈသုမ်းမၼ်းၵႂႃႇတင်းသဵင်ႈယဝ်ႉ။
ဢွၼ်ႇယိင်းလႆႈႁူႉငိၼ်းလွင်ႈဢူႈတင်းမႄႈမၼ်းယဝ်ႉၵေႃႈ မႄးၵွတ်ႇဢဝ်မႄႈမၼ်းသေယဝ်ႉ ႁႆႈဢွၵ်ႇမႃးသိုတ်ႉသိုတ်ႉယူႇ။
“ယိင်းလုၵ်ႈႁႆႈႁဵတ်းသင်”
“ယိင်းႁၵ်ႉမႄႈဢေႃႈ”
“ၶႂၢင်းပၼ်မႄႈၼႃႈလုၵ်ႈ မႄႈႁဵတ်းႁႂ်ႈလုၵ်ႈၵဝ်ဢမ်ႇမီးဢူႈမိူၼ်ပိူၼ်ႈ”
“ယိင်းၵေႃႈဢမ်ႇၶႂ်ႈမီးဢူႈဢၼ်ဢမ်ႇလူဝ်ႇယိင်းမိူၼ်ၵၼ်”
မႄႈၸဵတ်ႉၼမ်ႉတႃပၼ်ယိင်းယဝ်ႉ
“မႄႈ မိူဝ်ႈယိင်းၵႂႃႇသိုဝ်ႉၽၵ်းတီႈၵၢတ်ႇၼၼ်ႉ ႁၼ်ဢူႈႁဝ်းႁေဢိူဝ်ႈ မိူဝ်ႈတႄႇယိင်းၵေႃႈဢမ်ႇႁူႉၵွၼ်ႇ ပႃႈဢွင်ႇလၢတ်ႈၼႄယိင်းၵူၺ်း မၼ်းမႃးၸွမ်းၽူႈယိင်းၵေႃႉၼိုင်ႈ လႄႈ ဢုမ်ႈလုၵ်ႈဢွၼ်ႇၵေႃႉၼိုင်ႈ မွၵ်ႈၶူပ်ႇပႆၢၼႆႉ မိူဝ်ႈၼၼ်ႉယိင်းၵေႃႈဝႃႈသင်ယိင်းလႆႈယူႇၸွမ်းဢူႈတေမိူၼ်ႁိုဝ်ၼေႃ ၵူၺ်းၵႃႈမိူဝ်ႈလဵဝ် ယိင်းၵေႃႈဢမ်ႇၶႂ်ႈယူႇယဝ်ႉ ၵူဝ်ပဵၼ်လုၵ်ႈမေးၼွႆႉမေးလူင်ၸိူင်ႉၼင်ႇၼႂ်းၸိူင်းၼၼ်ႉ”
“မႄႈႁဵတ်းၽိတ်းတေႃႇယိင်းတေႉဢိူဝ်ႈ”
“ဢမ်ႇၼႃ မႄႈပဵၼ်ၵူၼ်းလီလိူဝ်သေပိူၼ်ႈတွၼ်ႈတႃႇယိင်းယဝ်ႉ မႄႈၵေႃႈႁၵ်ႉယိင်းလိူဝ်ပိူၼ်ႈယဝ်ႉ ပေႃးဢမ်ႇၼၼ်ယိင်းတေႁဵတ်းႁိုဝ်ၵိူတ်ႇမႃးလႃႇ မႄႈလဵင်ႉယိင်းမႃးႁင်းၵူၺ်းၸိူင်ႉၼႆ မႄႈၵေႃႈပဵၼ်ၵူၼ်းၶႅၼ်ႇတႃႇယိင်းယဝ်ႉ” သဵင်မၼ်းယဵၼ်ၵႂႃႇၵႅပ်ႉယဝ်ႉ။
ၶိုၼ်းသိုပ်ႇထႅင်ႈ
“မိူဝ်ႈၵေႃႉလဵၵ်ႉ ယိင်းၶွႆပိူၼ်ႈမီးဢူႈတေႉယဝ်ႉ တေလႆႈလဵၼ်ႈၵေႃႉယိင်း တေလႆႈၸွႆႈမႄႈႁဵတ်းၵၢၼ်၊ မၢင်ပွၵ်ႈပေႃးႁၼ်ပိူၼ်ႈမႃးၵဝ်းမႄႈ ယိင်းတင်းၶႂ်ႈႁွင်ႉဢူႈၵွၼ်ႇ၊ ၵူၺ်းၵႃႈ ၽိူဝ်ႇၵေႃႉယႂ်ႇမႃး ယိင်းလႆႈႁၼ်ဢူၺ်းၵေႃႉယိင်း ၶဝ်ဝႃႈၶဝ်ၶွႆယိင်း ဢၼ်မီးမႄႈၵူၺ်းၵေႃႈ လဵင်ႉယိင်းႁႂ်ႈလႆႈယူႇလီၵိၼ်ဢိမ်ႇလိူဝ်ၸိူဝ်းၶဝ်ဢၼ်မီးဢူႈမႄႈယူႇၸွမ်းၵၼ် လႄႈမီးပီႈၼွင်ႉတေလႆႈလုမ်းလႃးတူၺ်းထိုင် မၢင်ၵေႃႉမီးဢူႈမႄႈၵေႃႈမိူၼ်ဢမ်ႇမီး ၵုမ်ႇႁဵတ်းၵၢၼ်သေပွႆႇၶဝ်ယူႇႁင်းၵူၺ်း၊ မၢင်ၵေႃႉၵေႃႈမီးဢူႈၶီႈလဝ်ႈ ၵႆႉၽိတ်းမေႃးၵၼ်တႃႇသေႇ၊ မၢင်ၵေႃႉၵေႃႈ ဢူႈမီးမေးၼမ် မီးပီႈၼွင်ႉၼမ်၊ ဢူႈမႄႈဢမ်ႇထုၵ်ႇၵၼ် ပေႃးဢူႈမႄႈၽိတ်းၵၼ်ၵေႃႈ ၸႅၵ်ႇၵဝ်ၸႅၵ်ႇမႂ်း လုၵ်ႈၶဝ်ဢမ်ႇမီးတၢင်းလိူၵ်ႈသေ ၶႂ်ႈၸွမ်းမႄႈၵေႃႈယူႇၸွမ်းဢူႈ၊ မၢင်ၵေႃႉယူႇၸွမ်းဢူႈသိုပ်ႇမႄႈသိုပ်ႇၵေႃႈဢမ်ႇလႆႈၵိၼ်ဢိမ်ႇၼွၼ်းလီ”
ၸွမ်းၼင်ႇဢၼ်မၼ်းႁၼ် ဢၼ်မၼ်းလႆႈႁူႉငိၼ်းမႃးတီႈဢူၺ်းၵေႃႉမၼ်းၼၼ်ႉ၊ မိူၼ်တေပွင်ႇၸႂ်မႄႈၶဝ်မႃးႁင်းၵူၺ်းယူႇယဝ်ႉ။
“ႁိုင်မႃး ယိင်းၵေႃႈပွင်ႇၸႂ်ယဝ်ႉ ယွၼ်ႉသင်လႄႈမႄႈဢမ်ႇတေႇၼႃႈႁိူၼ်း မိူဝ်ႈၼႆႉၵေႃႈႁဵတ်းႁႂ်ႈယိင်းလႆႈႁူႉဝႃႈ မီးမႄႈၵူၺ်းၵေႃႈလီလိူဝ်သေၽႂ်ယဝ်ႉ၊ ယိင်းၸူမ်းတေႉယဝ်ႉဝႃႈ ဢၼ်မႄႈယွမ်းပႅတ်ႈၽူႈၸႆၢးၵေႃႉၼၼ်ႉသေ လဵင်ႉယိင်းမႃး”
“ယိင်းၵေႃႈၵေႃႉယႂ်ႇမႃးၼႃႇယဝ်ႉလူး ပေႃးယိင်းတေတေႇၼႃႈႁိူၼ်းၵေႃႈတူၺ်းလီလီဢိူဝ်ႈ”
“ယိင်းတေႁဵတ်းသၢဝ်လူင်”
“ၸိုင်ဝႃႈမီးၵူၼ်းဢၼ်လုၵ်ႈလၵ်ႉၵျိူၵ်ႈယူႇၼႆဢမ်ႇႁိုဝ်”
“ဢမ်ႇၸၢင်ႈဝႃႈပေႃးလႆႈပဵၼ်လုၵ်ႈပႂ်ႉၵူဝ်းရီးယႃးတႄႉ”
“ၶႂ်ႈၵႂႃႇႁဵၼ်းတီႈၵူဝ်းရီးယႃးၵေႃႈၶတ်းၸႂ်ႁဵၼ်းလႄႈ မႄႈမီးၵူၼ်းႁူႉၸၵ်းယူႇ”
“မႄႈၸႂ်လီလိူဝ်ပိူၼ်ႈ”
ဝၼ်းယဝ်ႉဝၼ်းပူၼ်ႉၵႂႃႇ လုၵ်ႈယိင်းသၢဝ်ၵေႃႈဢွၵ်ႇႁိူၼ်းၵႂႃႇသၢင်ႈတူဝ်ႁင်းၵူၺ်းယူႇတီႈၼွၵ်ႈမိူင်းၼၼ်ႉယဝ်ႉ၊ ဢမ်ႇထၢင်ႇမၼ်းတေလႆႈပဵၼ်တွၵ်ႇတိူဝ်ႇမေႃယႃ ဢၼ်မီးတၢင်းၵတ်ႉၶႅၼ်ႇၼႃႇလႄႈ ထိုင်တီႈပိူၼ်ႈႁွင်းႁပ်ႉမၼ်းပဵၼ်ၵူၼ်းမိူင်းပိူၼ်ႈလႆႈယဝ်ႉ။
ဢွၵ်ႇႁိူၼ်းၵႂႃႇယဝ်ႉၵေႃႈ ဢမ်ႇလိုမ်းတေပွၵ်ႈမႃးတီႈႁိူၼ်း ႁွပ်ႇၼမ်ႉတႃသေမႃးၸူးမႄႈၶဝ်ယူႇ။
“မႄႈယိင်းၸႂ်ထိုင်မႄႈ”
“မိူဝ်ႈယူႇၸွမ်းမၢဝ်ႇတႄႉဢမ်ႇႁၼ်လၢတ်ႈတေႃႇမႄႈမႃး”
“ႁဝ်းၽႄတၢင်းၵၼ်ယဝ်ႉ”
“လီယဝ်ႉလူး..”
“ယိင်းတိူဝ်ႉၸႂ်ယူႇဢိူဝ်ႈၼႆႉ”
“ၽူႈၸႆၢးမီးမၼ်းၵူၺ်းၵေႃႈဢမ်ႇၸႂ်ႈ လုၵ်ႈယိင်းမႄႈႁၢင်ႈလီၵတ်ႉၶႅၼ်ႇပေႃးပဵၼ်တၢၼ်ႇၼႆႉ မီးၵူၼ်းၶဝ်ႈထႅဝ်ပႂ်ႉတင်းၼမ်ယဝ်ႈ”
“မႄႈၵေႃႈတႄႇၼႃႈႁိူၼ်းထႅင်ႈသေလႄႈ ယိင်းဢမ်ႇၶႂ်ႈႁႂ်ႈမႄႈယူႇၵေႃႉလဵဝ်မိူၼ်ၵၼ် ႁွင်ႉၵႂႃႇယူႇၸွမ်းၵေႃႈဢမ်ႇၶႂ်ႈၵႂႃႇ”
“မႄႈယူႇတီႈၼႆႈမႃးၸဵမ်ၵိူတ်ႇ ယႂ်ႇတီႈၼႆႈ တေတႆၢတီႈၼႆႈၵူၺ်း တီႈၼႆႈပဵၼ်ၽႅၼ်ႇလိၼ်မိူင်းၵိူတ်ႇမႄႈယဝ်ႉ သမ်ႉဝႃႈလီႁိုဝ်ႁႆၢႉႁိုဝ်ၵေႃႈမႄႈဢမ်ႇၶႂ်ႈပႆၢႈမၼ်းပႅတ်ႈ လုၵ်ႈၵေႃႈ ၵႂႃႇမီးမိူင်းလႂ်ၵေႃႈယဝ်ႉ ယႃႇလိုမ်းဝႃႈတီႈၼႆႈပဵၼ်မိူင်းၵိူတ်ႇၽႅၼ်ႇလိၼ်လုၵ်ႈမိူၼ်ၵၼ်ၼႆ”
သိုပ်ႇလူဢၢၼ်ႇထႅင်ႈတွၼ်ႈတေမႃးၶႃႈ
