တႃႇတေလႆႈႁဵတ်းၸွမ်းၼင်ႇလွင်ႈၶႂ်ႈပဵၼ်ၼၼ်ႉ ယၢပ်ႇၼႃႇတေႉဢိူဝ်ႈ၊ မၼ်းလႆႈၶတ်းႁႅင်း လႆႈၶဵင်ႇတႃႉၸွမ်းၼမ်ၼႃႇတေႉယဝ်ႉ။ ဢမ်ႇႁူႉမိူဝ်ႈလႂ်တေထိုင်ယိူင်းမႆၢဢၼ်ဝႃႈဢွင်ႇမၢၼ်ယဝ်ႉ။
ၵူႈဝၼ်းဝၼ်း ၵွပ်ႈပဵၼ်လုၵ်ႈပေႃႈႁႆႈမႄႈသူၼ်ၵူၺ်းလႄႈ တႃႇတေၵႂႃႇယူႇၼႂ်းၵႄႈၵူၼ်းမီးငိုၼ်းမီးတွင်းၼမ်ၶဝ်ၼၼ်ႉ ပဵၼ်လႆႈတၢင်းၶွႆၵူၺ်း။ ဢမ်ႇလႆႈမီးငိုၼ်းၶမ်းၼမ်ၵေႃႈ ႁႂ်ႈပေႃးလႆႈႁဵတ်းၸွမ်းၼင်ႇဝႃႇသၼႃႇၵူၺ်းၵေႃႈယင်းလီ။
မိူင်းၶူင်းၵၢင်ၼႆႉဢမ်ႇၽဵင်ႇပဵင်းလႆႈၼႆၵေႃႈ ပဵၼ်လႆႈတၢင်းပွင်ႉၶၢင်းၵူၺ်း၊ ဝၼ်းလႂ်ၼႂ်းၸႂ်ႁိုဝ်ၵျေႃႇသိူဝ်းလႆႈ မိူဝ်ႈမႄႈၶႃႈယၢၼ်ၽၢတ်ႇ ဢူႈၵေႃႈဢမ်ႇၽၢတ်ႇလဝ်ႈသေ မဝ်းယူႇဝၼ်းဝၼ်းၶိုၼ်းၶိုၼ်း၊ၵၢၼ်ႁိူၼ်းၵၢၼ်ယေးၵၢၼ်သူၼ်ႁႆႈၼႃး ပႃးၶႃႈလႆႈႁဵတ်းၵႂႃႇ ၶႃႈၵေႃႈလႆႈဢွၵ်ႇႁူင်းႁဵၼ်းၸဵမ်မိူဝ်ႈဢသၢၵ်ႈလႆႈသိပ်းသီႇ မႄႈပဵၼ်တၢင်းပဵၼ်သေ ဢမ်ႇမီးၽႂ်လုမ်းလႃးလႄႈလႆႈဢွၵ်ႇယဝ်ႉ။
မိူဝ်ႈမႄႈဢမ်ႇယူႇယဝ်ႉ ၶႃႈတေၵႂႃႇသေတၢင်းလႂ် ယူႇတီႈႁိူၼ်းၵေႃႈဢမ်ႇမီးတီႈဢုၼ်ႇၸႂ်လႆႈ၊ တေၵႂႃႇလႂ်ၵေႃႈဢမ်ႇႁူႉတေပိုင်ႈၽႂ် ၼႂ်းၸႂ်တိပ်ႇတၼ်ဝႆႉယူႇဢိူဝ်ႈ။
ၶႃႈဢမ်ႇႁၼ်သင်တေႉယဝ်ႉ တေႃႈၼင်ႇဢူႈႁဝ်းၵူၺ်းယင်းဢမ်ႇမႃးႁိူၼ်း၊ ႁိူၼ်းႁဝ်းၼၼ်ႉၵေႃႈၸိုင်ပေႉငိၼ်းငႅဝ် ၶႃႈၵႅၼ်ႇပေႉၶုၵ်းၸႂ်လႆႈမႄႈႁိုဝ်ဢမ်ႇႁူႉ ၼမ်ႉတႃၶႃႈၵေႃႈၸိုမ်းမႃးယဝ်ႉ။ မၢင်ပွၵ်ႈၵေႃႈ ၼင်ႈမိူၼ်ၵူၼ်းယွင်ႇသေ ဢုပ်ႇလၢတ်ႈတေႃႇမႄႈယူႇႁဵတ်းၼၼ်။
ဝၼ်းၸဝ်ႉတေႃႇၶမ်ႈ ၵုမ်ႇႁဵတ်းႁႆႈႁဵတ်းသူၼ်ယူႇၵူၺ်း ဢမ်ႇတၼ်းတူၺ်းဝၼ်းတူၺ်းလိူၼ် ၶၢဝ်းယၢမ်းၵေႃႈသုတ်းၵႂႃႇဢမ်ႇႁူႉၶိင်ႇႁူႉၶၢဝ်းသင်၊ ၶမ်ႈၼိုင်ႈ ဢူႈႁဝ်းၵေႃႈလီလီသေယူႇႁိူၼ်း ၼင်ႈယူႇၼႂ်းသွင်ႇၾႆးၼင်ႇဝႃႈပႂ်ႉၶႃႈယူႇၼၼ်ႉယဝ်ႉ။ ၶႃႈၵေႃႈပူတ်းၵုပ်းႁွႆႈၽႃယဝ်ႉ ပူတ်းပႅမ်းဢဝ်ၽၵ်းထွၵ်ႇသႂ်ႇၼႂ်းလူင်ႈသေ တမ်းဝႆႉႁိမ်းၸွၵ်ႉၽၵ်းတူ။
“ဢူႈႁဝ်းဢမ်ႇၵႂႃႇလႄႇႁၶမ်ႈၼႆႉ”
“ဢိူဝ်ႈ..”
ယဵၼ်ၵႂႃႇႁိုင်ၵႅပ်ႉၼိုင်ႈမၼ်းၸင်ႇလၢတ်ႈၸူးၶႃႈထႅင်ႈ
“မႂ်းၵေႃႈဢႃႇယုဢသၢၵ်ႈယႂ်ႇမႃးယဝ်ႉ သမ်ႉပဵၼ်ၽူႈယိင်းႁေ လီတႄႇၼႃႈႁိူၼ်းယဝ်ႉၵဝ်ႇယူဝ်ႉမႃႈ”
“ယိင်းတိုၵ်ႉၸင်ႇႁႃလႆႈသိပ်းႁူၵ်းၵူၺ်း သင်ပဵၼ်လႆႈတႄႉယိင်းတင်းၶႂ်ႈယူႇႁူင်းႁဵၼ်းထႅင်ႈၵွၼ်ႇဢေႃႈ”
“မႂ်းတေယူႇႁဵတ်းသင် မေႃဢမ်ႇမေႃၵေႃႈမွၵ်ႈၼၢၼ်ႉၵူၺ်း တေႃႈၼင်ႇမႂ်းယူႇမႃးပေႃးလႆႈပဵၼ်ၸၼ်ႉပႅတ်ႇယဝ်ႈ မႂ်းၵေႃႈမႃးႁဵတ်းသူၼ်ႁဵတ်းၼႃးၵူၺ်းၵဝ်ႇ ၵူၼ်းဢမ်ႇယူႇႁူင်းႁဵၼ်းတင်းမေႃလႃႈ ဢဝ်ၽူဝ်ႁေလႃႈၵဝ်ဝႃႈ ၵဝ်ၶၢၼ်ႉတူၺ်းမႂ်းယဝ်ႉဢိူဝ်ႈ”
“ယိင်းတိုၵ်ႉဢသၢၵ်ႈလဵၵ်ႉယူႇ”
“ၸၢင်ႈၵႂႃႇလဵၵ်ႉသင် တၢၼ်ႇမႂ်းၼႆႉပိူၼ်ႈပေႃးဢဝ်ၽူဝ်ႁေမီးလုၵ်ႈယဝ်ႉဢိူဝ်ႈ ဢႆၢႈၸွႆႉလုၵ်ႈၶိင်းသႃႇၵေႃႈၵျိူၵ်ႈမႂ်းဝႃႇၼၢၼ်ႉ ပေႃးမႂ်းၽွမ်ႉၵေႃႈမၼ်းတေမႃးထၢမ်ဢိူဝ်ႈမႂ်း”
“ယိင်းဢမ်ႇၶႂ်ႈလႆႈၼႃဢူႈ”
“ဢမ်ႇၶႂ်ႈလႆႈၵေႃႈဢဝ်ဢိူဝ်ႈ မၼ်းၸၢင်ႈပဵၼ်ႁင်ဢႄႈ ၸွင်ႇၶႅၼ်းမႂ်းဢမ်ႇႁူႉၸၵ်းမၼ်းၵေႃႈဢမ်ႇၸႂ်ႈ မၼ်းၵေႃႈပဵၼ်ၵူၼ်းလီယူႇႁိုဝ်လႃႇ ၵဝ်လၢတ်ႈဝႆႉယဝ်ႉဢိူဝ်ႈ ၶဝ်တေမႃးထၢမ်ၶမ်ႈၼႆႉဝႃႇမႂ်း”
ၶႃႈတေလႆႈႁဵတ်းႁိုဝ်လႃႇ တႃႇတေႇၼႃႈႁိူၼ်းဢၼ်ဝႃႈၼၼ်ႉ ၶႃႈတင်းဢမ်ႇတွၼ်ႉဝူၼ်ႉၺႃးလူး၊ ပီႈၸွႆႉၼႆၼၼ်ႉၵေႃႈ ၶႃႈႁူႉၸၵ်းလီယူႇ မၼ်းပဵၼ်ပေႃႈႁၢင်ႉၵူပ်းလုၵ်ႈဝႆႉၵေႃႉၼိုင်ႈ ၼႃႈႁိူၼ်းၶဝ်တႄႉပဵၼ်ၵူၼ်းမီးဝႆႉယူႇတၢၼ်ႇတၢၼ်ႇ မီးလူတ်ႉမီးၵႃး မီးၸၢၵ်ႈထႆလူင်ၸိူဝ်းၼႆႉလႄႈ တီႈႁိူၼ်းၵေႃႈၽုၺ်ႇသႅင်ႇဝႆႉယဝ်ႉ ဢူႈႁဝ်းၵေႃႈၵႆႉၵႆႉၵႂႃႇၵိၼ်လဝ်ႈတီႈႁိူၼ်းၶဝ်ၼႃႇ၊ တႃႇၶႃႈဢမ်ႇလႆႈမီးၸႂ်ႁၵ်ႉပႅင်းသင်တီႈမၼ်း ၶႃႈၵေႃႈဢမ်ႇႁူႉတေလႆႈႁဵတ်းၸိူင်ႉႁိုဝ်ယဝ်ႉ ၶႃႈၵူၺ်းႁူႉဝႃႈလူဝ်ႇလႆႈပႆၢႈၼႆသေ မိူဝ်ႈႁူႉၼင်ႇၼၼ် ၶႃႈၵေႃႈမိူဝ်းႁႅၼ်းၶူဝ်းၶႃႈသေယဝ်ႉ လႅၼ်ဢူႈႁဝ်းဝႃႈၵႂႃႇဢၢပ်ႇၼမ်ႉၼႆသေ ဢဝ်တင်းလူတ်ႉၶိူင်ႈဢွၼ်ႇႁဝ်းၼၼ်ႉ မႃးတၢင်းဝဵင်းသေလႄႈ ၸၢၵ်ႈမၼ်းသမ်ႉတႆၢပႅတ်ႈ လပ်းၵေႃႈသိင်ႇမီးၵေႃႉလဵဝ်ၵူၺ်းၵေႃႈ ဢမ်ႇမီးတီႈၵႂႃႇယဝ်ႉလူး တၢင်းၵူဝ်ၼၼ်ႉပႅတ်ႈသေ ပႆလူင်မိူဝ်းၵႂႃႇႁင်းၵူၺ်းယဝ်ႉ။
လိုၵ်းၼႃႇယဝ်ႉ ၶႃႈႁွတ်ႈၽႅဝ်ၵႂႃႇတီႈႁိူၼ်းမေႃသွၼ်ၶႃႈ ၵူၺ်းၵႃႈဢမ်ႇမီးၽႂ်ၽုၺ်ႇၽၵ်းတူဢွၵ်ႇမႃး ၶႃႈၵေႃႈၼင်ႈၶူတ်းယူႇၼွၵ်ႈဝၢင်းႁိူၼ်း မွင်းႁႂ်ႈၶမ်ႈၶိုၼ်းၼႆႉပူၼ်ႉၵႂႃႇတေႉယဝ်ႉ။
ထိုင်ၼင်ႇၵၢင်ၼႂ်မႃး မေႃသွၼ်ၼူၼ်း ဢွၵ်ႇၽၵ်းတူမႃးႁၼ်ၶႃႈၼႆၵေႃႈ တူၵ်းၸႂ်သေ
“ၼွင်ႉယုမ်ႉ ႁဵတ်းႁိုဝ်မႃးလႃႇ မႃးႁွတ်ႈၸဵမ်မိူဝ်ႈလႂ်”
“ၶႃႈဢမ်ႇႁူႉတေလႆႈၵႂႃႇတၢင်းလႂ်ယဝ်ႉမေႃသွၼ်”
ၶႃႈၵေႃႈလၢတ်ႈၼႄလွင်ႈတၢင်းတီႈမေႃသွၼ်သေ မေႃသွၼ်ၵေႃႈ ႁႃလႆၢးတၢင်းပၼ်ၶႃႈယဝ်ႉ၊ ၶႃႈၵေႃႈလႆႈႁွတ်ႈၽႅဝ်မႃးတီႈႁူင်းႁဵၼ်းၸိူဝ်ႉၸၢတ်ႈယူႇယဝ်ႉ။
မၼ်းပဵၼ်ႁူင်းႁဵၼ်းသွၼ်လိၵ်ႈတႆးဝႆႉပိူင်လူင်ၵူၺ်းလႄႈ ၶႃႈသမ်ႉႁဵၼ်းမႃးႁူင်းႁဵၼ်းလူင်ပွင်ၸိုင်ႈ လိၵ်ႈတႆးၼၼ်ႉတေႃႉတႄႉမေႃလူမေႃတႅမ်ႈဢိတ်းဢွတ်း မိူဝ်ႈၽွင်းပိူၼ်ႈသွၼ်လိၵ်ႈတႆးၶၢဝ်းမႆႈၼၼ်ႉယဝ်ႉ။ ၶႃႈလႆႈၶိုၼ်းမႃးယူႇၸၼ်ႉပႅတ်ႇၶိုၼ်းၵူၺ်းသေ ၼႂ်းႁွင်ႈႁဵၼ်းၼၼ်ႉတႄႉၼင်ႇဝႃႈဢသၢၵ်ႈၶႃႈယႂ်ႇလိူဝ်ပိူၼ်ႈဝႆႉယူႇ။
တီႈႁူင်းႁဵၼ်းၵေႃႈ ၵူႈၽႃႇသႃႇပဵၼ်လိၵ်ႈတႆးသွၼ်ဝႆႉယဝ်ႉ။ ပေႃးႁႂ်ႈလၢတ်ႈၵေႃႈ ၶႃႈႁဵၼ်းပွင်ႇၸႂ်လိူဝ်သေမိူဝ်ႈယူႇၵျွင်းမၢၼ်ႈၼၼ်ႉတႄႉတႄႉ။
ဢၼ်ၶႃႈဢမ်ႇတွၼ်ႉႁူႉသေပွၵ်ႈၼၼ်ႉတႄႉ ပိုၼ်းတႆးၼၼ်ႉယဝ်ႉ၊ ႁဝ်းမီးပိုၼ်းမႃးပၢၼ်သိုပ်ႇပၢၼ် ႁဝ်းမီးၼင်လိၼ်မိူင်းၵႂၢင်ႈယႂ်ႇ မီးၶုၼ်မိူင်းဢုပ်ႉပိူင်ႇလႄႈ ၶႃႈၵေႃႈ လႆႈၸႂ်လူပပ်ႉဢၼ်ဝႃႈ “ယၢၼ်” ၼၼ်ႉတႄႉဢေႃႈ။
လိူဝ်သေပိုၼ်းတႆးယဝ်ႉ ပိုၼ်းလုၵ်ႉၽိုၼ်ႉတႆးႁဝ်းၵေႃႈ ပၢၼ်သိုပ်ႇပၢၼ် လူမ်ႉၸူမ်မႃးဢမ်ႇၽွမ်ႉၽဵင်ႇၵၼ် တႅၵ်ႇယႆၢႈၸတ်ႉၵၼ်မႃးတႃႇသေႇလူး၊ ဢမ်ႇၸႂ်ႈပၢၼ်ႁဝ်းၼႆႉၵူၺ်း။
ၶႃႈၵေႃႈလႆႈလူလိၵ်ႈတႆး လႆႈႁူႉလွင်ႈတႆး လႄႈ ယူႇတီႈၼႆႈၵေႃႈ မီးႁွင်ႈလူလိၵ်ႈ မီးပပ်ႉလိၵ်ႈတင်းၼမ်ယဝ်ႉ။
ၶႃႈမႃးယူႇတီႈၼႆႈ ဢမ်ႇလႆႈယူႇႁင်းၵူၺ်း ၶႃႈမီးဢူၺ်းၵေႃႉလႄႈ လႆႈယူႇၸွမ်းၵူၼ်းတင်းၼမ်၊ ႁဵတ်းသင်ၵေႃႈ လႆႈႁဵတ်းၸွမ်းၵၼ်။ ပိူၼ်ႈတႄႉမီးဢူႈမႄႈၸွႆႈထႅမ် ၵႆႉသူင်ႇငိုၼ်းပၼ်ၸိူဝ်းၼႆႉယဝ်ႉ၊ ၵူၺ်းၵႃႈ ၶႃႈတႄႉဢမ်ႇမီးၽႂ်ယဝ်ႉလူး မၢင်ပွၵ်ႈၵေႃႈၶုၵ်းၸႂ်လႆႈယူႇဢိူဝ်ႈ ၵူၺ်းၵႃႈၶႃႈၵေႃႈဢဝ်လိၵ်ႈသေပဵၼ်ဢူၺ်းၵေႃႉၵူၺ်းယဝ်ႉ။
ဢူၺ်းၵေႃႉ ၶဝ်တႄႉ ၵၢင်ၶမ်ႈမႃးၵေႃႈၶဝ်တေၵႆႉတူၺ်းၾူၼ်းၼႃႇ၊ တႃႇၶႃႈတႄႉၵေႃႈဢမ်ႇမီးၾူၼ်းမိူၼ်ပိူၼ်ႈ လႆႈတၢင်းၸွၼ်ပိူၼ်ႈတူၺ်းၵူၺ်း။
မၢင်ပွၵ်ႈၶႃႈၵေႃႈၵႂႃႇငွၵ်ႈတူၺ်းၸွမ်းၶဝ်ယူႇ ၵူၺ်းၵႃႈၵမ်ႈၼမ်တႄႉၶႃႈတေတူၺ်းလိၵ်ႈၵူၺ်း။ လိၵ်ႈတႆးၼႆႉ မၼ်းမီးဢေႇၼႃႇတေႉဢေႃႈ ၼႂ်းႁွင်ႈလူလိၵ်ႈၼၼ်ႉ ပပ်ႉလိၵ်ႈတႆးၼႆႉမီးဢေႇတေႉတေႉယဝ်ႉ။ ၵမ်ႈၼမ်ၵေႃႈမီး ပပ်ႉလိၵ်ႈထႆးသေ လိၵ်ႈမၢၼ်ႈၵေႃႈလႆႈဝႃႈၼမ်ယူႇတၢၼ်ႇတၢၼ်ႇ။
ၶႃႈမႃးတီႈၼႆႈၵေႃႈ လႆႈႁဵၼ်းပႃးလိၵ်ႈထႆးသေ လိၵ်ႈထႆးၵေႃႈ လႆႈဝႃႈပွင်ႇၸႂ်ငႆၢႈယူႇ။ ၵၢင်ၶမ်ႈမႃးၵေႃႈ ၶႃႈတေၽိုၵ်းလူ ၽိုၵ်းတႅမ်ႈတူၺ်းယဝ်ႉ။
သမ်ႉဝႃႈၶႃႈဢမ်ႇမီးၾူၼ်းတႃႇဢုပ်ႇၽႂ်ၵေႃႈ ၶႃႈတႄႉမီးလိၵ်ႈပဵၼ်ဢူၺ်းၵေႃႉၶႃႈၵႂႃႇယဝ်ႉ။
ၶႃႈႁဵၼ်းယဝ်ႉၸၼ်ႉၵဝ်ႈသေ ၶိုၼ်းသိုပ်ႇၶိုၼ်ႈထႅင်ႈၸၼ်ႉသုင်၊ မၼ်းဢမ်ႇငႆၢႈတေႉဢေႃႈ လုၵ်ႉတီႈၶႃႈပဵၼ်ၵူၼ်းၵူဝ်လႆႈယူႇပႃႈၼႃႈၵူၼ်းၼမ် လႄႈ ပဵၼ်ၵူၼ်းၵူဝ်ၶေႃႈထၢမ်လိူဝ်သေပိူၼ်ႈယဝ်ႉ၊ မၼ်းပဵၼ်လွင်ႈၶဵင်ႇတႃႉတွၼ်ႈတႃႇၶႃႈ မိူဝ်ႈတႄႇၶိုၼ်ႈႁူင်းႁဵၼ်းၸၼ်ႉသုင်ၼႆႉယဝ်ႉ။
ၶႃႈလႆႈမႃးယူႇၸၼ်ႉသုင်ၼႆႉ တွၼ်ႈတႃႇၶႃႈတႄႉမိူၼ်လင်ႁိူၼ်းဢၼ်ၼိုင်ႈ ၶႃႈမီးဢူၺ်းၵေႃႉလႄႈ မီးမေႃသွၼ်ဢၼ်ၸၢင်ႈဢုပ်ႇၵုမ်လႆႈ ၶႃႈလႆႈႁဵၼ်းႁူႉလွင်ႈဢုၼ်ႇၸႂ် ဢၼ်ဢူႈၶႃႈၵေႃႈဢမ်ႇပၼ်လႆႈ ၶႃႈလႆႈႁူႉဝႃႈ ႁဝ်းၼၼ်ႉၵိုင်ႇတၢၼ်ႇတေလႆႈႁပ်ႉမၼ်းယူႇဢိူဝ်ႈ လွင်ႈဢုၼ်ႇၸႂ်ၼၼ်ႉ။
လႄႈၶႃႈၵေႃႈမေႃမီးတၢင်းႁၵ်ႉမႃးယဝ်ႉ မိူဝ်ႈၶႃႈယူႇလႆႈၸၼ်ႉသိပ်းဢဵတ်း ၶႃႈလႄႈတင်းၸႆၢးၸွမ် လႆႈၵဝ်းဢုပ်ႇမႅၼ်ႈၵၼ်လႄႈ ၼႂ်းၵႄႈႁႃးသွင်ၼၼ်ႉၵေႃႈ မီးၶမ်းၽွင်ပဵၼ်ၶဵဝ်ယဝ်ႉ။ ၶႃႈၵေႃႈဢမ်ႇႁူႉ ၵွပ်ႈသင်လႄႈဝႆႉၸူႉ ၵူၺ်းၵႃႈမၼ်းႁဵတ်းႁႂ်ႈၶႃႈလူႉတႄႉဢေႃႈ။ ၶႃႈဢမ်ႇမီးၾူၼ်းသေတႃႉ ၶမ်းၽွင်ဢဝ်ၾူၼ်းၵဝ်ႇမၼ်းပၼ်ၶႃႈသေ တင်းၶိုၼ်းတင်းၶိုၼ်းဢုပ်ႇၵၼ် ဢမ်ႇပဵၼ်ၵၢၼ်ပဵၼ်ငၢၼ်းၵွပ်ႈမၼ်းယဝ်ႉ။
ၵွပ်ႈပိူဝ်ႈဢမ်ႇယၢမ်ႈလႆႈႁပ်ႉတၢင်းႁၵ်ႉႁိုဝ် ၵွပ်ႈဢမ်ႇႁူႉႁဵတ်းႁိုဝ်ႁၵ်ႉႁႃႉ ၽဝၶႃႈၵေႃႈလႆႈလူႉသုမ်းၵႂႃႇၸွမ်း ၵႂၢမ်းဝၢၼ်ဢွၼ်ႇမၼ်းၼၼ်ႉလႄႈ ၼႂ်းၵႄႈႁႃးၵေႃႈ မီးလွင်ႈပူၼ်ႉတိၼ်ပူၼ်ႉမိုဝ်းၵၼ်ၵႂႃႇ လူၺ်ႈဢမ်ႇမီးလွင်ႈႁႄႉၵင်ႈၵၼ်သေ ၶႃႈၵေႃႈလႆႈၸပ်းတွင်ႉပႃးတူဝ်မႃးယဝ်ႉလႄႈ ႁႃးၵေႃႈလႆႈဢွၵ်ႇႁူင်းႁဵၼ်းၵႂႃႇယဝ်ႉ။
မိူဝ်ႈၼၼ်ႉ ၶႃႈၸင်ႇတေဝူၼ်ႉၶိုၼ်း ဝၼ်းဢၼ်ၶႃႈပႆၢႈဢွၵ်ႇႁိူၼ်းမႃးသေ ပဵၼ်ဝၼ်းဢၼ်ၶႃႈလႆႈၼႅင်ၸႂ်လိူဝ်ပိူၼ်ႈယဝ်ႉ။ တူဝ်ၶႃႈၵူၺ်း ဢၼ်ႁဵတ်းႁႆၢႉတူဝ်ၸဝ်ႈၵဝ်ႇ။
ယဝ်ႉၸၼ်ႉသိပ်းယဝ်ႉ ႁဵတ်းမေႃသွၼ်လႆႈယူႇ ၵူၺ်းၵႃႈ လွင်ႈႁဵတ်းသၢင်ႈ တၢင်းယၢမ်ႈဢၼ်ၶႃႈႁဵတ်းဝႆႉတီႈၼႂ်းႁူင်းႁဵၼ်းၼၼ်ႉ မၼ်းဢမ်ႇၵိုင်ႇထိူၵ်ႈတႃႇပဵၼ်မေႃသွၼ်လႆႈလႄႈ ဢမ်ႇၸႂ်ႈတူဝ်ယၢင်ႇလီတွၼ်ႈတႃႇတေဢဝ်ႁဵတ်းမေႃသွၼ်လႆႈ ၶႃႈလိူၵ်ႈဢွၵ်ႇတီႈဢၼ်ဝႃႈႁူင်းႁဵၼ်းၼၼ်ႉသေ ႁဵတ်းသိုၵ်းဢဝ်ယဝ်ႉ သမ်ႉဝႃႈၶႃႈၶႂ်ႈပဵၼ်မေႃသွၼ်ၼႃႇၵေႃႈယဝ်ႉ ၵႃႈတေလႆႈၸုၼ်ႉပႅတ်ႈၵူၺ်း။
တႃႇဝႃႈဢွၵ်ႇမႃးသၢင်ႈၼႃႈႁိူၼ်းဢၼ်ဝႃႈၼၼ်ႉၵေႃႈ ဢမ်ႇပႆႇ ဝူၼ်ႉၺႃးလႄႈ ဢမ်ႇမီးၵၢၼ်ႁၢင်ႈႁႅၼ်းသင်သေလွင်ႈလူး။ ၵွမ်ႉယူႇႁဵတ်းၵၢၼ်သေပႂ်ႉၵိၼ်ငိုၼ်းလိူၼ်ဢွၼ်ႇႁႃးၼၼ်ႉတႄႉ ၵိၼ်းယူႇၵေႃႈ ၵႃႈတေလႆႈတိၼ်းတွၼ်းဢဝ်ၵူၺ်း။
ဢွၵ်ႇႁူင်းႁဵၼ်းယဝ်ႉ ၸႆၢးၸွမ်ၵေႃႈ သမ်ႉမေႃၵိၼ်လဝ်ႈလုတ်ႇလႅၼ်းယႃႈမႃးသေ ဢူၺ်းၵေႃႉၵေႃႈၼမ် တႃႇၵၢၼ်ၼႃႈႁိူၼ်းၼၼ်ႉ မၼ်းၵေႃႈဢမ်ႇဝူၼ်ႉဢမ်ႇၼပ်ႉဢမ်ႇသွၼ်ႇသင်ယဝ်ႉလႄႈ ၶႃႈၵေႃႈၵႆႉဝႃႈႁင်းမၼ်းသေ မၼ်းၵေႃႈဝႃႈၶႃႈၸၢင်ႈပွင်ႉသေ ၵႂႃႇႁႃလႄႇႁႃလၢဝ်း ၵၢင်ၶမ်ႈၵၢင်ၶိုၼ်းမၢၵ်ပွၵ်ႈၵေႃႈဢမ်ႇထိုင်ႁိူၼ်းၵေႃႈမီးယဝ်ႉ။
ၶႃႈဝူၼ်ႉဝႃႈၶႃႈပၢႆႈပေႃႈၶီႈလဝ်ႈသေ သမ်ႉမႃးၺႃးၽူဝ်ၶီႈလဝ်ႈထႅင်ႈ ၶႃႈၵႂင်ၸႂ်မိုတ်းတၼ်ယူႇဢိူဝ်ႈ ၶႃႈသမ်ႉတေလႆႈႁဵတ်းႁိုဝ်။
ၵွႆႈယူႇၵွႆႈၸမ်ထိုင်ၶိင်ႇၶၢဝ်းလုၵ်ႈဢွၼ်ႇတေၵိူတ်ယဝ်ႉ၊ ၶႃႈၵေႃႈဢမ်ႇႁူႉတေလႆႈႁၢင်ႈႁႅၼ်းသင် ၵွပ်ႈဢမ်ႇမီးသင်တေလႆႈႁၢင်ႈႁႅၼ်းလူး၊ ၸူးဢဝ်ပိူၼ်ႈတူၺ်းႁၼ်သေ ၸွႆႈထႅမ်ပၼ်ၵူၺ်းယဝ်ႉ။
တႃႇတေမီးလုၵ်ႈၼႆႉ ဢမ်ႇငႆၢႈတေႉဢိူဝ်ႈ ၸဵမ်မိူဝ်ႈပႃးတွင်ႉပေႃးဝႃႈယၢပ်ႇယဝ်ႉ ၵိူတ်ႇဢွၵ်ႇမႃးသေလုမ်းလႃးၵႂႃႇထႅင်ႈၼၼ်ႉ ယိုင်ႈၶႅၼ်းယၢပ်ႇယဝ်ႉ။ ၶိင်ႇၵိၼ်ဢမ်ႇလႆႈၵိၼ်လီလီ၊ ၶိင်ႇၼွၼ်းဢမ်ႇလႆႈၼွၼ်းလီထႅင်ႈ။ ၸႆၢးၸွမ်ၵေႃႈ ယႃႇဝႃႈတေၸွႆႈ မဝ်းလဝ်ႈမႃးသမ်ႉပႆၢမႃးမေႃးၵၼ်ထႅင်ႈသေ ၶႃႈႁိူဝ်ႉတေႉယဝ်ႉ ႁိူဝ်ႉထိုင်တီႈၶႃႈသမ်ႉပေႃးလႆႈႁွင်ႉႁႆႈဢွၵ်ႇမႃးဢိူဝ်ႈ။
ၵူၺ်းၵႃႈ ၼႃႈဢွၼ်ႇလုၵ်ႈယိင်းၶႃႈၼၼ်ႉတႄႉ ပဵၼ်ႁႅင်းၸႂ်သေ သိုပ်ႇၵၢၼ်းၵႂႃႇထႅင်ႈၵူၺ်းယဝ်ႉ။
ၵွပ်ႈသင်လႄႈၶႃႈယင်းယဵၼ်ႉၶၢမ်ႇ ၵွပ်ႈသင်လႄႈၶႃႈတေလႆႈယဵၼ်ႉ တိူၵ်ႈတီႈမၼ်းၵေႃႈဢမ်ႇၸွႆႈသင်ၶႃႈလႆႈလႄႈ မီးမၼ်းၵေႃႈ ဢမ်ႇႁဵတ်းႁႂ်ႈၸၢတ်ႈပၢၼ်ၶႃႈလီမႃး၊ ၶႃႈၸင်ႇတေပွင်ႇၸႂ်ဝႃႈ တၢင်းႁၵ်ႉၼၼ်ႉ ဢမ်ႇလႆႈလမ်ႇလွင်ႈသင်ယဝ်ႉ မီးႁိုဝ်ဢမ်ႇမီးမၼ်း ဢမ်ႇယူႇတီႈတၢင်းႁၵ်ႉ မၼ်းယူႇတီႈဝႃႈၸၢတ်ႈပၢၼ်တေလီႁိုဝ်တေလူမ်ႉၸူမ်ၵႂႃႇႁိုဝ်ၼႆၼၼ်ႉၵူၺ်း။
ၵမ်ႈၽွင်ႈၵေႃႈဝႃႈ ပေႃးပႅတ်ႈသမ်ႉလုၵ်ႈတေဢမ်ႇမီးပေႃႈ ၵူၺ်းၵႃႈ တူဝ်ထူပ်းၶႃႈတႄႉ သင်မီးပေႃႈၶီႈလဝ်ႈ ဢမ်ႇမီးတင်းတေလီလိူဝ် ၼႆလႄႈ မိူဝ်ႈလုၵ်ႈဢွၼ်ႇႁႃးတိုၵ်ႉလႆႈသွင်လိူၼ် ၶႃႈၵေႃႈယွၼ်းပႅတ်ႈမၼ်း ၵူၺ်းၵႃႈ ၵူၼ်းလူင်ၶဝ်ဢမ်ႇပၼ်ပႅတ်ႈလႄႈ ၽိူဝ်ႇလႆႈႁူၵ်းလိူၼ်မႃး ၶႃႈၸင်ႇယွၼ်းပႅတ်ႈထႅင်ႈ မၼ်းၵေႃႈၽွမ်ႉလႄႈ ပိူၼ်ႈၵေႃႈ ၽွမ်ႉသေ ၶႃႈၵေႃႈလႆႈလဵင်ႉလုၵ်ႈႁင်းၵူၺ်းၵႂႃႇယဝ်ႉ။
လဵင်ႉလုၵ်ႈၵေႃႉလဵဝ်ဢမ်ႇငႆၢႈသေတႃႉ မီးသွင်ၵေႃႉယူႇလႄႈ ဢမ်ႇလဵင်ႉၸွႆႈၵၼ်ၼၼ်ႉယိုင်ႈၶႅၼ်းႁိူဝ်ႉယဝ်ႉ။ ႁိူဝ်ႉၵေႃႈယဝ်ႉလႄႈ ဝၼ်းၼိုင်ႈတေပူၼ်ႉၵႂႃႇယူႇၵႂႃႈ ဢဝ်လုၵ်ႈပဵၼ်ႁႅင်းၸႂ်သေသိုပ်ႇၵႂႃႇၼႆသေတႃႉၵေႃႈ မၢင်ပွၵ်ႈတင်းလၵ်ႉႁႆႈယူႇၵူၺ်း။
မီးလုၵ်ႈယဝ်ႉၵေႃႈ မိူၼ်ဝႃႈၸၢတ်ႈပၢၼ်ၼၼ်ႉမၼ်းသုတ်းတိူၵ်ႈယဝ်ႉ၊ ၵူၺ်းၵႃႈ ၽႂ်ႁိုဝ်ႁူႉလႆႈလႃႇ သဵၼ်ႈတၢင်းၸၢတ်ႈပၢၼ်တၢင်းၼႃႈၼၼ်ႉမီးတင်းၼမ်ၼႆ ၽွင်းၼၼ်ႉ ၽႆၢႇယူႇလီၶဝ်ပိုတ်ႇႁပ်ႉၵူၼ်းၼႆသေ ၶႃႈၵေႃႈလႆႈၵႂႃႇၶိုၼ်ႈၸွမ်း။
မိူဝ်ႈဢွၼ်တၢင်း ၶႃႈတႄႉဝူၼ်ႉဝႃႈ ၶႃႈၶႂ်ႈႁဵတ်းမေႃသွၼ် ၵူၺ်းၵႃႈတူဝ်ၶႃႈတင်းသွၼ်ဢမ်ႇလႆႈလႄႈ ၶႃႈဢမ်ႇႁတ်းႁဵတ်းမၼ်းယဝ်ႉ။ ၽိူဝ်ႇလႆႈမႃးလဵပ်ႈႁဵၼ်းတီႈၽႆၢႇယူႇလီ ၶႃႈၵေႃႈဢမ်ႇထၢင်ႇဝႃႈၶႃႈတေလႆႈၸႂ်မၼ်း သမ်ႉဝႃႈၶႃႈမီးလုၵ်ႈယဝ်ႉၵေႃႈ ၶႃႈတင်းလႆႈၸႂ်ႁဵၼ်းယူႇလႄႈ ၶႃႈၸင်ႇ လႆႈမႃးၶိုၼ်ႈသေ မိူၼ်လႆႈယူႇႁူင်းႁဵၼ်းထႅင်ႈလႄႈ လႆႈၽိူမ်ႉၼမ်ႉၵတ်ႉမႃးထႅင်ႈ။
ၶႃႈၵေႃႈဢမ်ႇဝူၼ်ႉမႅၼ်ႈဝႃႈ ၼမ်ႉၵတ်ႉဢၼ်ၶႃႈႁဵၼ်းမႃးၼၼ်ႉ တေႁဵတ်းႁႂ်ႈၶႃႈလႆႈၵႂႃႇၶိုၼ်ႈႁဵၼ်းထႅင်ႈတီႈၼွၵ်ႈမိူင်း၊ တႃႇတေၵႂႃႇၶိုၼ်ႈႁဵၼ်းၵေႃႈ ဢမ်ႇငႆၢႈတွၼ်ႈတႃႇၶႃႈမိူၼ်ၵၼ် လုၵ်ႈယိင်းၶႃႈၵေႃႈ ၸင်ႇႁႃဢသၢၵ်ႈသိပ်းၶူပ်ႇ တူဝ်ၶႃႈတႄႉၵေႃႈ သၢမ်သိပ်းယဝ်ႉ။
တိုဝ်ႉတၢင်းၼၼ်ႉ ပဵၼ်လွင်ႈလီတွၼ်ႈတႃႇၶႃႈသေတႃႉ ၵူၺ်းၵႃႈ ၶႃႈၵေႃႈၵႂင်ၸႂ်ယူႇတႃႇတေၵႂႃႇသေ ပႅတ်ႈလုၵ်ႈၶႃႈဝႆႉၵေႃႉလဵဝ်ၵူၺ်း။ သင်တူဝ်လဵဝ်တႄႉ ၶႃႈတေဢမ်ႇဝူၼ်ႉသင်ၼမ်ယဝ်ႉ။ မၢင်ပွၵ်ႈမၼ်းၵႃႈတေလႆႈလိူၵ်ႈ တိုဝ်ႉတၢင်းဢၼ်ဝႃႈၼၼ်ႉဢမ်ႇမီးလႆၢပွၵ်ႈ ၶႃႈႁူႉလီ၊ ၵူၺ်းၵႃႈပေႃးဝႃႈၶႃႈၵႂႃႇတေလႆႈပွႆႇလုၵ်ႈဝႆႉပဵၼ်လႆၢပီ ပဵၼ်ၽွင်းလုၵ်ႈဢွၼ်ႇတိုၵ်ႉၵေႃႉယႂ်ႇလႅၵ်ႈလႆၢႈၶိုၼ်ႈမႃးသေဢမ်ႇၵႃး မၼ်းၵေႃႈဢမ်ႇမီးၽႂ် ၵူၺ်းၵႃႈ တီႈၼၼ်ႈတႄႉ ဢမ်ႇမီးၶႃႈၵေႃႈ တေမီးတၢင်ႇၵေႃႉတႅၼ်းယူႇၼႆလႄႈ ၶႃႈလႆႈပွႆႇမၼ်းၵႂႃႇသေ ယူႇၵႂႃႇၸွမ်းလုၵ်ႈၵူၺ်းယဝ်ႉ။
ၶႃႈဢမ်ႇသေလႆၢ ဢၼ်ဢမ်ႇလႆႈသိုပ်ႇႁဵၼ်းထႅင်ႈ ၵူၺ်းၵႃႈသင်ၶႃႈပွႆႇလုၵ်ႈၶႃႈၵႂႃႇ ၶႃႈတေတိူဝ်ႉၸႂ်တေႃႇၸူဝ်ႈႁိုဝ်ဢမ်ႇႁူႉ။
သမ်ႉဝႃႈဢမ်ႇလႆႈၵႂႃႇၶိုၼ်ႈႁဵၼ်းၵေႃႈ ၵၢၼ်လဵပ်ႈႁဵၼ်းၼၼ်ႉတႄႉ ၶႃႈဢမ်ႇၵိုတ်းလႄႈ တင်းတိုၵ်ႉသိုပ်ႇလဵပ်ႈႁဵၼ်းၵႂႃႇယူႇ။ မိူဝ်ႈလႆႈႁူႉလႆႈႁၼ် လွင်ႈမႂ်ႇမႂ်ႇလွင်ႈလၢၵ်ႇလႆၢးၸိူဝ်းၼႆႉ ၶႃႈတိုၼ်ႇတဵၼ်ႈၶႂ်ႈႁူႉတႃႇသေႇ ၶႃႈဝႃႈ ဢမ်ႇၸႂ်ႈလႄႈၶႃႈၶႂ်ႈပဵၼ်ၶူးႁိုဝ်မေႃယႃ ၶႃႈၶႂ်ႈပဵၼ်ၽူႈလဵပ်ႈႁဵၼ်းၵူၺ်းႁိုဝ် ထိုင်မိူဝ်ႈလဵဝ်ၵေႃႈၶႃႈယင်းတိုၵ်ႉသွၵ်ႈႁႃမၼ်းယူႇ ယိူင်းဢၢၼ်းၼၼ်ႉ။
ၶႃႈဢမ်ႇတိူဝ်ႉၸႂ် ဢၼ်ၶႃႈလႆႈပႆၢႈပႅတ်ႈႁိူၼ်းလင်ၼၼ်ႉမႃး၊ ၶႃႈဢမ်ႇတိူဝ်ႉၸႂ် ဢၼ်ၶႃႈပႆၼွၵ်ႈသဵၼ်ႈတၢင်း၊ ၶႃႈဢမ်ႇတိူဝ်ႉၸႂ် ဢၼ်လႆႈမီးလုၵ်ႈ၊ ၶႃႈဢမ်ႇသေလႆၢ ဢၼ်ၶႃႈပွႆႇပႅတ်ႈၽူဝ်ၶႃႈၵႂႃႇ၊ ၶႃႈတေဢမ်ႇၶိုၼ်းၼႅင် ၵွပ်ႈသဵၼ်ႈတၢင်းၵူႈသဵၼ်ႈ ၶႃႈပဵၼ်ၵူၼ်းတႅပ်းတတ်း ပဵၼ်ၵူၼ်းၵေႃႉလိူၵ်ႈၵူၺ်းလႄႈ ၶႃႈၵေႃႈတေၵႃႈလႆႈဢဝ်ပုၼ်ႈၽွၼ်း။
တိုဝ်ႉတၢင်းဢၼ်ၶဝ်ႈမႃးၼၼ်ႉ မၢင်ႈပွၵ်ႈၵေႃႈမႃးၸွမ်းလွင်ႈၶဵင်ႇတႃႉယဝ်ႉ။ ၶၢဝ်းယၢမ်း ပူၼ်ႉၵႂႃႇႁိုင် ၵူၼ်းႁဝ်းၵေႃႈလႅၵ်ႈလႆၢႈလႆႈယဝ်ႉ။ သဵၼ်ႈတၢင်းၸၢတ်ႈပၢၼ်ဢၼ်ဝႃႈသုတ်းတိူၵ်ႈယဝ်ႉ ပေႃးႁဝ်းတိုၵ်ႉသိုပ်ႇလိုပ်ႈလမ်းၵႂႃႇတိၵ်းတိၵ်းၼၼ်ႉ မၼ်းတိုၼ်းမီးတိုဝ်ႉတၢင်းပုၼ်ႈတႃႇႁဝ်းယူႇဝၼ်းၼိုင်ႈ။
ပႆၢၵ
12/01/2026 – 16/02/2026
