သႅင်လိုၼ်းၵေႃႈႁဵတ်းဝီႇတီႇဢူဝ်ႇၶလိပ်ႉလွင်ႈၶၢဝ်ႇႁူင်းလႅမ်းၼၼ်ႉယဝ်ႉသေ ဢဝ်ၵႂႃႇပၼ်ၽူႈၸတ်းၵၢၼ်ထတ်းယဝ်ႉ။ ၶေႃႈတွပ်ႇဢၼ်လႆႈၵေႃႈ ၽူႈၸတ်းၵၢၼ်တူၺ်းယဝ်ႉသေ
“ၸွင်ႇလႆႈသူင်ႇပၼ်ၽႂ်ယဝ်ႉ”
သႅင်လိုၼ်းၵေႃႈဢမ်ႇတၵ်းသဵင်
“မွတ်ႇပႅတ်ႈသေလႄႈ”
“လွင်ႈၼႆႉမၼ်းပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းဢေႃႈ..”
“ၸွင်ႇႁူႉႁိုဝ်ဢၼ်ယူႇလွတ်ႈမႃးလႆႈ ဢၼ်မီးငိုၼ်း
လိူၼ်သေႁဵတ်းၵၢၼ်ယူႇၼႆႉ ၵွပ်ႈမီးၵူၼ်းၸိူဝ်းၼႆႉယဝ်ႉ”
“ဢေႃႈ..”
သႅင်လိုၼ်းၵေႃႈဢဝ်တင်းဝႂ်ဢွၵ်ႇၵၢၼ်ယိုၼ်ႈပၼ်ယဝ်ႉ။
“ဝႆႉဝႃႈပဵၼ်ၶၢဝ်ႇႁူဝ်လိုၼ်းသုတ်းဢၼ်ၶႃႈႁဵတ်းတီႈၼႆႈ လႄႈ ပဵၼ်ႁူဝ်ဢၼ်ၶႃႈတေဢမ်ႇဢဝ်ဢွၵ်ႇတီႈၼႆႈ၊ ၶႃႈႁူႉယူႇယဝ်ႉ ၶႃႈတေလႆႈၶေႃႈတွပ်ႇၸိူင်ႉၼႆ ၶၢဝ်ႇႁူဝ်ၼႆႉတႄႉ ၶႃႈလႆႈသူင်ႇပၼ်တၢင်ႇတီႈယဝ်ႉ၊ လုၵ်ႈဢွၼ်ႇၶဝ်ၵေႃႈ မွၵ်ႈၶၢဝ်ႇဢၼ်ႁဵတ်းတႃႇသေႇၸိူင်ႉၼၼ်ႉတႄႉ ပေႉၵၢၼ်လီယဝ်ႉလႄႈ ၶႃႈတေယွၼ်းၵႂႃႇၵွၼ်ႇ”
လၢတ်ႈဢဝ်ၽူႈၸတ်းၵၢၼ်ပေႃးဢမ်ႇၸၢင်ႈသိုပ်ႇၸွမ်းလႆႈလႄႈ မၼ်းၵေႃႈႁႅၼ်းၶူဝ်းသေ ဢွၵ်ႇလုမ်းၵႂႃႇယဝ်ႉ။
မိူဝ်ႈၼႆႉဢွၵ်ႇလုမ်းမႃးပေႃးယဵၼ်သီႇသီႇ ၵူၼ်းဢၼ်ၵႆႉမႃးပႂ်ႉတႃႇသေႇၵေႃႈဢမ်ႇလႆႈငိၼ်းသဵင်ယဝ်ႉ။ သႅင်လိုၼ်းၵေႃႈ သိမ်းၶူဝ်းမၼ်းသေ ဢွၵ်ႇၶၢဝ်းတၢင်းမိူဝ်းၵႂႃႇႁင်းၵူၺ်း သဵင်တဵတ်ႇယဵၼ်လူင်ၼၼ်ႉ ၸိုင်သမ်ႉပေႉမႃးၶုၵ်းၸႂ်လႆႈမၢင်ၵေႃႉႁိုဝ်ဢမ်ႇႁူႉယဝ်ႉ ၵွႆႈၵႂႃႇ ၶၢဝ်းတၢင်းၵေႃႈၸိုင်ပေႉမႃးၵႆ ၼႂ်းၸႂ်ၵေႃႈပေႃးဢမ်ႇၵျေႃႇသေဢိတ်း။
သႅင်လိုၼ်းမိူဝ်းယူႇႁိူၼ်းၵေႃႈ မိူဝ်းႁဵတ်းၵၢၼ်တီႈႁိူၼ်းသေ ၵႂႃႇသူၼ်ၵႂႃႇၼႃးၸွမ်းပိူၼ်ႈ ယူႇၵႂႃႇႁဵတ်းၼၼ်ၵူၺ်း။
လၢႆလိူၼ်ပူၼ်ႉမႃးထိုင်ၶိင်ႇၽွင်းသၢင်းၵျၢၼ်ႇယဝ်ႉၼႆၵေႃႈ ပိူၼ်ႈဢွၼ်ၵၼ်လိုဝ်ႈၵၢၼ်လိုဝ်ႈငၢၼ်းသေယဝ်ႉ ၵႂႃႇႁႃၵၼ်ႇတေႃးၵျွင်းတႂ်ႈၵျွင်းၼိူဝ် သေ ဝၢႆးသၢင်ႈၵျၢၼ်ႇယဝ်ႉၼႆၵေႃႈ တေဢၢၼ်းၵႂႃႇမိူင်းထႆးၼႆယဝ်ႉ။
လၢတ်ႈဝႃႈတေၵႂႃႇသေတႃႉၵေႃႈ ၼႂ်းၸႂ်တႄႉပႆႇၶႂ်ႈၵႂႃႇသေၵႃႈႁိုဝ် လွမ်မွင်းၽႂ်သေၵေႃႉယူႇလႄႈ တူၺ်းဝၼ်းလီ ပႂ်ႉဝၼ်းၼၼ်ႉဝၼ်းၼႆႉသေ ႁဵတ်းၵႅင်ႈလိုမ်းၵႂႃႇယဝ်ႉဢဝ်ပူၼ်ႉၵႂႃႇပႅတ်ႈ။
သမ်ႉပေႃးၶဝ်ႈမႃးၼႂ်းလိူၼ်ၸဵတ်း ၶၢဝ်းပိူၼ်ႈႁႃႁဵတ်းၼႃးယဝ်ႉၼႃႇ။
“ဢေးလိုၼ်း မႂ်းဝႃႈမႂ်းတေၵႂႃႇ ဢမ်ႇၵႂႃႇႁေပွၵ်ႈလႃႇ ပေႃးဢမ်ႇၵႂႃႇၵေႃႈ ပီၼႆႉၸွႆႈႁႃးႁဵတ်းၼႃးႁေယဝ်ႉဢိူဝ်ႈ”
“ပေႃးဢမ်ႇၵႂႃႇၵေႃႈ ၵွမ်ႉတီႈႁိူၼ်းၼႆႉၵူၺ်း ၸွင်ႇႁဝ်းတေလႆႈၵိၼ်ႁိုဝ် ထၢမ်းၵူၺ်းပေႃးဢမ်ႇၶႂ်ႈပေႃးယဝ်ႉ လုၵ်ႈၵေႃႈတင်းဢမ်ႇလႆႈႁဵတ်းၵၢၼ်တီႈၼၼ်ႈယဝ်ႉသေ မိူဝ်ႈၼႆႉၶႃႈတေမိူဝ်း
တူၺ်းၵႃးၵွၼ်ႇၵႃႈ”
“ဢမ်ႇၶႂ်ႈၵႂႃႇၵေႃႈၸၢင်ႈပဵၼ်သင် ပီႈဢၢႆႈမႂ်းၵေႃႈမီးယူႇလူး မႂ်းယူႇၸွမ်းႁႃးဢူႈသူၵူၺ်းၵေႃႈလႆႈယဝ်ႉဝႃႈ ႁႃးၵေႃႈထဝ်ႈၼႃႇယဝ်ႉ ႁႅင်းႁဵတ်းၵူၺ်းၵေႃႈၸမ်သဵင်ႈယဝ်ႉမႂ်း”
“ၶႃႈယူႇႁိူၼ်းၵေႃႈသမ်ႉဢမ်ႇပဵၼ်ၵၢၼ်ႁင်တေႉတေႉလူး”
“မႂ်းႁဵတ်းၶဝ်ႈႁဵတ်းၽၵ်းလဵင်ႉႁႃးၵူၺ်းၵေႃႈလႆႈယဝ်ႉဝႃႈ”
“မၼ်းယူႇလၢႆၼႃႇလႄႇ”
“ၶႂ်ႈတႄႇၼႃႈႁိူၼ်းၵေႃႈဢဝ်သေလႄႈ ဢၢႆႈလုၵ်ႈၼၢႆးၸိင်ႇၼၼ်ႉၶိူဝ်တွႆးၵၼ်ယူႇဢမ်ႇႁိုဝ်”
“မႄႈႁဝ်းၼႆႉၵေႃႈ..မၼ်းတမ်ႉဢမ်ႇမႃးႁိူၼ်းသေပွၵ်ႈ”
“မိူဝ်ႈၵႆႈၵဝ်ႁၼ်မီးယူႇတီႈႁိူၼ်းလူး”
“ၵေႃႈယဝ်ႉလႃႈ ၶႃႈတေမိူဝ်ႈတူၺ်းၵႃးၵူၺ်းယဝ်ႉ ႁႂ်ႈၶႃႈလႆႈၵႂႃႇသေ ပေႃးဝႃႈၵႂႃႇယဝ်ႉဢမ်ႇမိုတ်ႈ ၶႃႈတေၶိုၼ်းမႃးယူႇၸွမ်းမႄႈႁဝ်းၶဝ်တေႉတေႉယဝ်ႉ”
“ဢဝ်ၵၢင်ၸႂ်မႂ်းဝႃႈလႃႈ”
သႅင်လိုၼ်းၵေႃႈ ဢဝ်တင်းၵႃးမၼ်းမိူဝ်းၵႂႃႇတၢင်းဝဵင်းယဝ်ႉ၊ လိူၵ်ႈလိူၵ်ႈႁူပ်ႉၺႃးၵႃးပႃႈၸိင်ႇၶဝ် ဢၼ်မီးၸိုၼ်ႈမိူင်းၵေႃႉႁေႃႈလႄႈ ၽႅတ်ႈၵၼ်ပူၼ်ႉၵႂႃႇၵူၺ်းယဝ်ႉ။
သႅင်လိုၼ်းၵေႃႈလႆႈၵႃးယဝ်ႉသေ ၵၢင်ၶမ်ႈမႃးၵေႃႈႁႅၼ်းၶူဝ်းယဝ်ႉ၊ ဢမ်ႇမိူဝ်းၵၢႆႁိူၼ်းပႃႈၸိင်ႇၶဝ်ၼၼ်ႉသေဢိတ်း ၵၢင်ၼႂ်မိူင်းပႆႇလႅင်းၵေႃႈ ႁႂ်ႈပေႃႈၶဝ်မႃးသူင်ႇမၼ်းသေ ဢွၵ်ႇၶၢဝ်းတၢင်းၵႂႃႇတဵမ်ၸဝ်ႉယဝ်ႉ။
ၵႂႃႇယူႇမိူင်းထႆးၼႆၵေႃႈ ဢမ်ႇငၢႆႈငၢႆႈ ၵႃႈဝတ်းၵႃႈဝႂ်ဝႃႇ၊ ၵႃႈတီႈယူႇတီႈၵိၼ်ဝႃႇ၊ လႆႈငိုၼ်းၼမ်ၵေႃႈ သဵင်ႈငိုၼ်းၼမ်မိူၼ်ၵၼ်လႄႈ သႅင်လိုၼ်းၼၼ်ႉတႄႉၵေႃႈ ၵႂႃႇလႄႇပီႈဢၢႆႈၶဝ်သေ ၵႂႃႇလႄႇဢူၺ်းၵေႃႉမၼ်းသေ လႄႇတူၺ်းမိူင်းပိူၼ်ႈၸိူဝ်းၼႆႉသေ ႁိုင်ၵႂႃႇၼိုင်ႈလိူၼ်ၼႆႉယူႇလႄႈ မၼ်းၵေႃႈ ဢမ်ႇမိုတ်ႈသေ ပွၵ်ႈၶိုၼ်းမိူဝ်းသွမ်ႈၼႃးယူႇတီႈႁိူၼ်းၼၼ်ႉၶိုၼ်းယဝ်ႉ။
ယူႇယူႇမိူဝ်းၵႂႃႇတီႈႁိူၼ်းပႃႈၸိင်ႇၶဝ်
“ၸိုင်ဝႃႈမႂ်းၵႂႃႇမိူင်းထႆး ပေႃးတၼ်းမႃးယဝ်ႉလႃႇ”
“မၼ်းဢမ်ႇလီမိုတ်ႈပႃႈဢိူဝ်ႉ ၶိုၼ်ႈယႂ်ႇတႄႉၶိုၼ်ႈယႂ်ႇၵျႃႉၵွၼ်ႇဢိူဝ်ႈ၊ ၶႃႈၵႂႃႇႁၼ်ၶဝ်ႁဵတ်းၵၢၼ်ၼႆႉတႄႉ တၢင်းဝၼ်းတၢင်းဝၼ်းဢမ်ႇလႆႈလိုဝ်ႈလူင် ပေႃးဢမ်ႇႁဵတ်းၵၢၼ်ၵေႃႈဢိုပ်းတေႉဢိူဝ်ႈ”
“မႃးႁဵတ်းလုၵ်ႈပႂ်ႉၵဝ်ႁေလႄႈပေႃးၼၼ်”
“လုၵ်ႈၸၢႆးပႃႈႁဝ်းဢမ်ႇၶႂ်ႈလႆႈၶႃႈလေႃႇ”
“ဝၼ်းမႂ်းၵႂႃႇၼၼ်ႉ မၼ်းလမ်းၸွမ်းမႂ်းယူႇၵူၺ်းဢိူဝ်ႈ ဢမ်ႇႁၼ်မၼ်းၼႄႇ”
သႅင်လိုၼ်းၸင်ႇတေၶုၵ်းၸႂ်လႆႈ သၢႆတႃမွင်မွင်ဢၼ်ယူႇၵႆၵႆသေ ၸုၵ်းမိူၼ်ႇတူၺ်းမၼ်းယူႇၼၼ်ႉ ႁဵတ်းႁႂ်ႈမၼ်းၽၢတ်ႇၵႂႃႇၵေႃႈ ဢမ်ႇလိုမ်းၸႂ်လႆႈလႄႈလႆႈၶိုၼ်းမႃးၼႆႉယဝ်ႉ။
“ဢမ်ႇႁၼ်..ၶႃႈတင်းဢမ်ႇတၼ်းတူၺ်းလႃႈ”
“မႂ်းၵူၺ်းယူဝ်ႉဢမ်ႇၶႂ်ႈလႆႈမၼ်း”
“လုၵ်ႈၸၢႆးပိူၼ်ႈလဝ်းပေႉတၢၼ်ႇၼၢၼ်ႉႁဵတ်းႁိုဝ်လႄႈဝႃႈဢမ်ႇၶႂ်ႈလႆႈဢႃႈ”
“ပေႃးၼၼ်ၵေႃႈလူဝ်ႇမိူဝ်းထၢမ်ယဝ်ႉယူဝ်ႉၶမ်ႈၸူဝ်ႈ”
“ထၢမ်ၸဝ်ႈတူဝ်မၼ်းၵွၼ်ႇလႄႈ”
“မၼ်းတႄႉလႆႈယူႇၵူၺ်းလေႃႇ”
“ပႃႈႁဝ်းလႆႈလုၵ်ႈပႂ်ႉ ၶႃႈသမ်ႉဢမ်ႇလႆႈၽူဝ်ၼႆၶႃႈတေၽွမ်ႉၼႄႇ တူဝ်မၼ်းတမ်ႉဢမ်ႇယူႇၸိူင်ႉၼၼ်”
“မႂ်းၼႆႉလိူဝ်ၸႂ်တေႉႁေႉ”
“ပွႆႇမၼ်းမႃးၵွၼ်ႇမႂ်း မိူဝ်းထၢမ်ၵမ်းလဵဝ်လူးဢႃႈ”
“ထႅင်ႈလၢႆဝၼ်းၵူၺ်း ပိူၼ်ႈပေႃးတေၶဝ်ႈဝႃႇယဝ်ႉ မၼ်းဢမ်ႇတၼ်းမႃးလေႃႇ”
“ပေႃးမၼ်းမႃးတႄႉမိူဝ်းထၢမ်လႆႈၼေႃႈ”
“သွၼ်ႇႁႂ်ႈမၼ်းမႃးၵွၼ်ႇလႃႈ”
“လႆႈတေႉၼေႃႈ”
“ႁႂ်ႈမၼ်းမႃးၵူၺ်းမၼ်းၼႃ”
“ဢိူဝ်ႈ..လႆႈၽႅဝ်ၵႃႈ..မႂ်းတေဝႃႈႁိုဝ်” ပႃႈၸိင်ႇယၵ်ႉတူၺ်းတၢင်းၶဝ်ႈၽၵ်းတူၼၼ်ႉသေ”ၼၼ်ႉ..မႃးပုၼ်ႉယဝ်ႉမႂ်း”
သႅင်လိုၼ်းယၵ်ႉတူၺ်းသေ ပႃႈၸိင်ႇတိုၵ်ႉပႆၵႂႃႇႁွင်ႉလုၵ်ႈၸၢႆးမၼ်းယူႇ သႅင်လိုၼ်းၵေႃႈလႅၼ်ႈၶဝ်ႈၵႂႃႇဝၢင်းႁိူၼ်းပႃႈလွတ်ႈ ဢၼ်ၸပ်းၵၼ်ၼၼ်ႉသေ ၵႂႃႇဢွၵ်ႇၽၵ်းတူႁိူၼ်းပုၼ်ႉယဝ်ႉ။
“ဢေးလိုၼ်း..တၼ်းၵႂႃႇတၢင်းလႂ်ယဝ်ႉလႃႇၼႆႉ”
“ၼၼ်ႉ..ဢွၵ်ႇၵႂႃႇတၢင်းပုၼ်ႉယဝ်ႉဝႃႈ”
ၸိုၼ်ႈမိူင်းတူၺ်းသေယုမ်ႉယဝ်ႉလၢတ်ႈၼႄမႄႈၶဝ်။
“ၶမ်ႈၸူဝ်ႈၸွင်ႇတေမိူဝ်ႈၶိုၼ်းႁိုဝ်”
“မိူဝ်းယူႇယူဝ်ႉ..ၶႃႈမႃးၵၢၼ်သေဢမ်ႇလႆႈမႃးႁိုင်ယဝ်ႉလႄႈမႃးဝႄႉၵူၺ်း သႅင်လိုၼ်းတၼ်းမႃးၶိုၼ်းမိူဝ်ႈလႂ်လႃႇ”
“မႃးမိူဝ်ႈလိူၼ်မႂ်ႇၼၼ်ႉၼႃႇ ၸွင်ႇမၼ်းၵႂႃႇဢဝ်လိူၼ်ၵူၺ်းႁိုဝ် ဢမ်ႇၶႂ်ႈယူႇႁေမႃးၶိုၼ်းႁေယဝ်ႉဝႃႇ”
ၸိုၼ်ႈမိူင်းၵေႃႈတင်ႈၸႂ်သေထွမ်ႇတေႉထွမ်ႇဝႃႈယူႇ။
“ၵဝ်ဝႃႈပေႃးမႂ်းယူႇၶမ်ႈၼႆႉ တေႁွင်ႉမႂ်းမိူဝ်းထၢမ်မၼ်းၼႆဢိူဝ်ႈ”
“မၼ်းဝႃႈႁႂ်ႈမိူဝ်းထၢမ်ၼႆၶႃႈႁႃႉ”
“ၵဝ်ဝႃႈၵဝ်တေမိူဝ်းထၢမ်မၼ်းၼႆဢိူဝ်ႈ မၼ်းဝႃႈပေႃးတူဝ်မႂ်းဢမ်ႇမႃးတႄႉဢမ်ႇလႆႈ ပေႃးမႃးတႄႉလႆႈယူႇၼႆႁေ မၼ်းႁၼ်မႂ်းၵေႃႈၼႅတ်ႈပၢႆႈၼၼ်ႉၼႃႇ ပေႃးမႂ်းလူဝ်ႇၵႂႃႇၵေႃႈ ဝႆႉဝႃႈႁႃးလၢတ်ႈယဝ်ႉၵၼ်ၵူၺ်းလႃႈၼႃႈ”
“ၶမ်ႈၸူဝ်ႈၶႃႈတေမႃးၶိုၼ်း”
ၸိုၼ်ႈမိူင်းၵေႃႈ ၼႅတ်ႈဢႅၼ်ႇဢွၵ်ႇမိူဝ်းၵႂႃႇၶိုၼ်းဝႆးဝႆးယဝ်ႉ။
