တီႈၼႂ်းႁူင်းလႅမ်းမွၵ်ႇဝၢႆႇဝၼ်း ႁူင်းလိုဝ်ႈသဝ်း ႁူင်းလႅမ်းႁႃႈလၢဝ်ႁၢင်ႈလီၶိုၵ်ႉၶႅမ်ႉၶိုတ်းၵၢပ်ႈ ၸိုၼ်ႈပၢင်ႇမူတ်းသႂ်၊ ပဵၼ်တီႈပေႃႈလဵင်ႉမႄႈလဵင်ႉသထေးၽူႈမၢၵ်ႈၶဝ်ၵွၼ်ႇ ၸင်ႇမႃးၶၢတ်ႈၼွၼ်းလႆႈ၊ ၵူၺ်းၵႃႈ ၽူႈသိုဝ်ႇၶၢဝ်ႇၶဝ်တႄႉ လႆႈၺိၼ်းသႅဝ်တူႇမႃးယဝ်ႉလႄႈ သႅင်လိုၼ်းၵေႃႈလႆႈမႃးလႄႇလဵပ်ႈတူၺ်းယဝ်ႉ။
ၸင်ႇသမ်ႉၼၢတ်ႉမၢႆၵၼ်တင်းဢူၺ်းၵေႃႉ ဢၼ်ပဵၼ်မေးလူင်ပေႃႈလဵင်ႉၽူႈမၢၵ်ႈၼၼ်ႉသေ ၸူဝ်းၵၼ်မႃးလိုဝ်ႈတီႈႁူင်းလိုဝ်ႈသဝ်းၼႆႉလႄႈ ၵူၼ်းႁဵတ်းၵၢၼ်ၶဝ် ၽူႈၸၢႆးၼႃႈတႃႁၢင်ႈလဝ်းသွင်ၵေႃႉ မႃးပႂ်ႉႁပ်ႉတွၼ်ႈယူႇ။
တီႈၼႂ်းႁူင်းလႅမ်းၼႆႉၵေႃႈ လိူဝ်သေတီႈလိုဝ်ႈသဝ်းယဝ်ႉ မီးတင်းလၢၼ်ႉလဝ်ႈပႃး၊ ၶေႇထီႇဝီႇ လွင်ႈၵျေႃႇမူၼ်ႈမိူင်းၵူၼ်း ၸိူဝ်းၶႂ်ႈႁၼ်မိူင်းၽီ၊ ၶိူင်ႈမဝ်းမိင်းမီးၵူႈၸိူဝ်း၊ ၼင်ႇႁိုဝ်တေႁူႉၸုင်ႇႁၼ်ၸေး ၶႃၵေႃႈၶဝ်ႈၸၢမ်းတူၺ်း ႁႂ်ႈပေႃးၸေးတီႈမၼ်းၵႂႃႇယဝ်ႉ၊ ၵၢင်ၶမ်ႈမူၼ်ႈ ၵၢင်ဝၼ်းၼွၼ်း၊ သႅင်လိုၼ်းၼၼ်ႉတႄႉ သမ်ႉဝႃႈႁဵတ်းၼၼ်ယူႇၵေႃႈ ႁဵတ်းၵႅင်ႈၵူၺ်း ဢူၺ်းၵေႃႉမၼ်းတႄႉပဵၼ်တေႉယူႇ။
ထႅင်ႈၶမ်ႈၼိုင်ႈ ၶႃၵေႃႈဢမ်ႇလႆႈလႄႇတၢင်းလႂ် ၼွၼ်းလိုဝ်ႈယူႇတီႈႁွင်ႈသေ တၢင်းလင်ႁွင်ႈလိုဝ်ႈၶဝ်ၼၼ်ႉ ငိၼ်းသဵင်ၵူၼ်းလႄႈ မၼ်းၵေႃႈလွမ်ၶျွင်းတူၺ်း လႆႈႁၼ်ၵူၼ်းလၢၵ်ႈၵူႇဢၼ်ႁူမ်ႇၽႃႈၶၢဝ်လူင်ဢွၵ်ႇၵႂႃႇၸူးတီႈၼႂ်းသိင်ႇလူင်ၼၼ်ႉယဝ်ႉၼႃႇ၊ ၶဝ်တႄႉဝႃႈပဵၼ်ၵူဝ်ႇတွင်ႇၵဵပ်းၶူဝ်းၶွင်ၼႆၼၼ်ႉယဝ်ႉ။
မၼ်းသမ်ႉလပ်းသိင်ႇလႄႈ တေၸွမ်းၵႂႃႇသမ်ႉတင်းၵူဝ်တင်းၶႂ်ႈၵႂႃႇဝႆႉယဝ်ႉ။
ယၢမ်းၼၼ်ႉ တီႈၵူဝ်ႇတွင်ႇၶဝ်ၼၼ်ႉၵေႃႈ မီးမၢၵ်ႇတႅၵ်ႇလင်မေႃးသေ ၾႆးၵေႃႈလုၵ်ႉႁုၼ်ႈႁုၼ်ႈဝႆႉယူႇ၊ ၵူၼ်းၸိူဝ်းၼၼ်ႉၵေႃႈတိုၼ်ႇသၢၼ်ႈလႅၼ်ႈပၢႆႈမူတ်းသေ ၵိုတ်းၵႅၼ်ႇၵူၼ်းတၢႆၼၼ်ႉၵူၺ်းယဝ်ႉ။
မိူဝ်ႈပဵၼ်ၸိူင်ႉၼၼ်ၽႂ်ၵေႃႈဢမ်ႇႁတ်းယူႇယဝ်ႉ ဢွၼ်ၵၼ်တူင်ႉတိုၼ်ႇသၢၼ်ႈလႅၼ်ႈပၢႆႈၵႂႃႇသဵင်ႈ၊ သႅင်လိုၼ်းၵေႃႈႁႂ်ႈဢူၺ်းၵေႃႉမၼ်း ဢဝ်လူတ်ႉဢွၵ်ႇၵႂႃႇပႂ်ႉထႃႈသေ မၼ်းႁဵတ်းၸွမ်းႁႃဢူၺ်းၵေႃႉမၼ်းၸွၵ်ႉၼိုင်ႈတၢင်းၼိုင်ႈ ပၼ်ႇလဵပ်ႈၸွမ်းၼၼ်ႉပေႃးၸွတ်ႇယဝ်ႉ။
မိူဝ်ႈမီးယူႇၸဵင်ႇၸွၵ်ႉႁင်းၵူၺ်း ၼႃႈႁူင်းလိုဝ်ႈသဝ်းၵူၼ်းႁဵတ်းၵၢၼ်ၶဝ်ၼၼ်ႉ မၢၵ်ႇတႅၵ်ႇလင်မႃးထႅင်ႈလႄႈ ဢမ်ႇတၼ်းႁူႉတူဝ် မၼ်းထုၵ်ႇၸၼ်မူပ်ႇလူင်းလိၼ်ၵႂႃႇသေ တူဝ်ၵူၼ်းၵေႃႉၼိုင်ႈႁွင်းႁပ်ႉမၼ်းဝႆႉယဝ်ႉ။
“ၸွင်ႇပဵၼ်သင်ႁိုဝ်”
သဵင်ဢၼ်လိုၼ်ႈႁူ ၼႃႈတႃဢၼ်ဢမ်ႇပေႃးမိုတ်ႈႁၼ် ၼုင်ႈၶူဝ်းလမ်တင်းၸုမ်ႇလႄႈ ပိၵ်ႉၼႃႈဝႆႉၵိုတ်းႁူးတႃ ပႃးၶိူင်ႈၵွင်ႈၵၢင်ႇၸေးမိုဝ်း။
သႅင်လိုၼ်းတႄႉ တင်းၵူဝ်တင်းတူၵ်းၸႂ် သမ်ႉပေႃးဢမ်ႇၸၢင်ႈလၢတ်ႈၵႂၢမ်းသင်ထႅင်ႈယဝ်ႉ။
ၵူၼ်းၵေႃႉၼၼ်ႉၵေႃႈ ၸုင်ယိပ်းမိုဝ်းမၼ်းလႅၼ်ႈဢွၵ်ႇၵႂႃႇတၢင်းၽၵ်းတူဢွၼ်ႇၶဝ် တၢင်းတူၵ်းၼၼ်ႉသေ
“ပွၵ်ႈမိူဝ်းလႄႈၼႃႈ ၸူဝ်ႈၵႃႈသူတိုၵ်ႉလွတ်ႈၽေးလီယူႇၼႆႉ၊ သင်သူၶဝ်ႈၵႂႃႇၶိုၼ်း ဢမ်ႇႁူႉလႆႈဝႃႈၸွင်ႇသူတေမီးသၢႆၸႂ်ဢွၵ်ႇမႃးလႆႈ”
ၵူၼ်းၵေႃႉၼၼ်ႉၵေႃႈ ၶဝ်ႈၵႂႃႇၶိုၼ်းယဝ်ႉပိၵ်ႉၽၵ်းတူဝႆႉ ဢဝ်သႅင်လိုၼ်းလႆႈမုင်ႈတူၺ်းၸွမ်းၽၢႆႇလင်ၵူၺ်း။
မၼ်းၵေႃႈပၼ်ႇလဵပ်ႈၵႂႃႇၸူးတၢင်းၼႃႈတီႈဢူၺ်းၵေႃႉမၼ်းပႂ်ႉဝႆႉယူႇၼၼ်ႉယဝ်ႉ။
ၾႆးလုၵ်ႉႁုပ်ႇမႆႈ လင်ၼိုင်ႈယဝ်ႉလင်ၼိုင်ႈ တေႃႇသမ်ႉပေႃးမႆႈမူတ်း ၸင်ႇတေမီးၵူၼ်းၶဝ်ႈမႃးၶႄလႄႈ ၽူႈဢဝ်ၶၢဝ်ႇၶဝ်ၵေႃႈ ဢွၼ်ၵၼ်လႅၼ်ႈမႃးလႅၼ်ႈမႃးယဝ်ႉ၊ သႅင်လိုၼ်းၵေႃႈ ႁႂ်ႈလုၵ်ႈဢွၼ်ႇၽိုၵ်းၵၢၼ်ၶႃမႃးဢဝ်သေ မၼ်းၵေႃႈမႄးၵဵပ်းသၢၵ်ႈသေႇၸိူဝ်းဢၼ်မၼ်းႁႃႁွမ်ၸူႉတွၼ်လႆႈ တႃႇၶိုၼ်းႁဵတ်းပဵၼ်ပွင်ႈၵႂၢမ်း၊ လွင်ႈထုၵ်ႇတဵၵ်းတဵင်ႁၢႆႉၸႃႉ ၽဝပၢၼ်ၵူၼ်း ၼႂ်းႁူင်းလိုဝ်ႈသဝ်းမွၵ်ႇဝၢႆႇဝၼ်းၼႆႉလႄႈ၊ ၵူၼ်းဢၼ်မၼ်းလႆႈႁူႉၸၵ်း ဢၼ်မၼ်းလႆႈႁူပ်ႉၼႂ်းၼၼ်ႉၵေႃႈ လႆႈၵႂႃႇတွင်ႈထၢမ်ဝႆႉၽွင်ႈယူႇယဝ်ႉ။
ယၢမ်းႁူဝ်ၶမ်ႈ မိူဝ်ႈသႅင်လိုၼ်းလူင်းၵၢၼ်မိူဝ်းၼၼ်ႉ။
“ၵိၼ်ၶဝ်ႈယဝ်ႉၼႄႇ”
သမ်ႉပေႃးဢဝ်သႅင်လိုၼ်းတူၵ်းၸႂ်သေ”မႃးမိူဝ်ႈလႂ်”
“တိုၵ်ႉပႆမႃးႁွတ်ႈမိူဝ်ႈၵႆႈၼႆႉ”
“ဢေႃႈ..ၼၼ်ႁႃႉ”
“သူႁၢႆၵႂႃႇလႂ်ပဵၼ်သီႇႁႃႈဝၼ်း”
“ႁဝ်းၵႂႃႇၸွမ်းၶႆႈသူၼၼ်ႉၼႃႇ ပွႆႇပႅတ်ႈသူမႃးၸိူင်ႉၼၼ် ၸႂ်ႁဝ်းၵေႃႈဢမ်ႇလီၵွၼ်ႇလေႃႇ..ၵႂႃႇၶႆႈၶိုၼ်းတင်းဢမ်ႇႁၼ်သူယဝ်ႉၼႃႇ”
“သူတေၵႂႃႇလႂ်လႃႇ..မိူဝ်းႁိူၼ်းႁႃႉ”
“ၵႂႃႇၵိၼ်ၶဝ်ႈ ၵႂႃႇၸွမ်းၼႄႇ..”
“ပေႃးႁွင်ႉတႄႉၵႂႃႇၵႃႈ”
သွင်ၶႃၵေႃႈၵႂႃႇၵိၼ်ၶဝ်ႈယူႇတီႈသႅင်ႇၶဝ်ႈၽၵ်းၼၼ်ႉသေယဝ်ႉ။
“သူဝူၼ်ႉဝႃႈ..ပေႃးႁဝ်းဢမ်ႇႁဵတ်းၵၢၼ်ၶၢဝ်ႇယဝ်ႉႁဝ်းတေႁဵတ်းၵၢၼ်ႁင်လီ လိူဝ်သေၵၢၼ်ဢၼ်ၼႆႉယဝ်ႉ ႁဝ်းပေႃးဢမ်ႇႁူႉတေႁဵတ်းၵၢၼ်သင်ယဝ်ႉ”
“ႁဵတ်းၵၢၼ်ၶၢႆသႅင်ႇၶၢႆၶူဝ်းယူႇတီႈႁိူၼ်းၼၼ်ႉၼႃႇဢမ်ႇလီႁႃႉ”
“ဢလၢင်းမၼ်းယႂ်ႇၼႃႇလူင်ၸႃႉၼၼ်ႉ”
“ႁဝ်းတေဢွၵ်ႇပၼ်ၵႂႃႈ”
“လႆႈယဝ်ႉဝႃႈ…”
“တေႉဢိူဝ်ႈ…ပေႃးမိူဝ်းယူႇႁိူၼ်းမိူဝ်ႈလႂ်ႁဝ်းတေမိူဝ်းထၢမ်ၼႃႈ”
“မိူဝ်ႈလဵဝ်ဢမ်ႇၸႂ်ႈတီႈႁိူၼ်း ႁဝ်းတေဝႆႉဝႃႈဢမ်ႇလႆႈငိၼ်းသေ”
ၵိၼ်ၶဝ်ႈယဝ်ႉၵေႃႈ သႅင်လိုၼ်းၶိုၼ်းၵႂႃႇတီႈလုမ်းယဝ်ႉ၊ ၸိုၼ်ႈမိူင်းၵေႃႈလူင်းၵႃးမႃးၸွမ်း။
“သူဢမ်ႇလူဝ်ႇၵႂႃႇလႂ်ယဝ်ႉၼႄႇ”
“ဢမ်ႇလူဝ်ႇၵႂႃႇၶႃႈ”
“သမ်ႉတေၵႂႃႇလႂ်ထႅင်ႈလႃႇ”
“သူၵႂႃႇလႂ်ႁဝ်းၵႂႃႇၼၼ်ႈယဝ်ႉ”
“ယႃႇၶႂ်ႈၶတ်းၵၼ်ၼႃႇလူး ႁဝ်းဢမ်ႇတၼ်းယဝ်ႉသူလဵၼ်ႈၼႃ”
“ဢမ်ႇၶတ်း ႁဝ်းလၢတ်ႈတေႉဢိူဝ်ႈ”
“ယူႇပႂ်ႉတၢင်းၼွၵ်ႈၼႆႉလႃႈ”
သႅင်လိုၼ်းၵႂႃႇပႅတ်ႈၼင်ႇဢမ်ႇသူၼ်ၸႂ်မၼ်း။ မၼ်းၵေႃႈ ၼင်ႈႁေပႂ်ႉယူႇတၢင်းၼွၵ်ႈၼၼ်ႉတေႉယဝ်ႉ။ သႅင်လိုၼ်းၵေႃႈ ယူႇယူႇၵႆႉငွၵ်ႈတူၺ်းသေ ႁၼ်မၼ်းလႅပ်ႈၵတ်းၼႃႇ ယဵၼ်ႉဢမ်ႇလႆႈယဝ်ႉၵေႃႈ ဢွၵ်ႇမႃးၸူးမၼ်းၶိုၼ်း။
“တေၶၢမ်ႇၵတ်းသေပႂ်ႉႁဵတ်းသင်လႃႇ”
“ၵတ်းၼႃႇတေႉဢိူဝ်ႈတၢင်းၼွၵ်ႈၼႆႉ”
“ပေႃးၵတ်းၵေႃႈမိူဝ်းၶိုၼ်းတီႈယူႇသူလႄႈ”
“ႁဝ်းဢမ်ႇမီးတီႈယူႇယဝ်ႉ”
“ၵူႈဝၼ်းသူယူႇတီႈလႂ်ၵေႃႈၵႂႃႇယူႇတီႈၼၼ်ႈၵူၺ်းၼႃႇ”
“ႁဝ်းၵေႃႈယူႇၸွမ်းၸိူဝ်းၼႆႉၵူၺ်းၼႃႇ”
“ဢိူဝ်ႈ…ယူႇၸိူင်းၼႆႉၵူၺ်းလႄႈပေႃးၼၼ်”
သႅင်လိုၼ်းၸႂ်ဢမ်ႇယၢဝ်းသေ ၶဝ်ႈၵႂႃႇၶိုၼ်းယဝ်ႉ။ မၼ်းၵေႃႈၼင်ႈႁဵတ်းၵၢၼ်ယူႇတင်းၶိုၼ်း ၵၢင်ၶမ်ႈပေႃးလိုၵ်းၼႃႇယဝ်ႉၸင်ႇတေဢွၵ်ႇမႃး ၸိုၼ်ႈမိူင်းၵေႃႈၼင်ႈဢိင်ၽႃသေလပ်းယူႇ၊ သႅင်လိုၼ်းပိၵ်ႉၽၵ်းတူသေ မၼ်းၵေႃႈတိုၼ်ႇမႃးလႄႈ
“မိူဝ်းယဝ်ႉႁ”
“ဢိုမ်ႈ..” ဢဝ်သိူဝ်ႈဢုၼ်ႇမၼ်းပၼ်ၵႂႃႇသေ
“ပေႃးၵတ်းၵေႃႈသွၼ်ႉသႂ်ႇလႄႈ”
ဢွၵ်ႇၵႂႃႇပႅတ်ႈၼင်ႇဢမ်ႇသူၼ်ၸႂ်ယူႇ။
“တေပွႆႇႁဝ်းဝႆႉၼႆႈတေႉႁႃႉ”
“ယူႇၼၼ်ႈၵူၺ်းလႄႈပေႃးၶႂ်ႈယူႇၵေႃႈ”
“ဢမ်ႇၶႂ်ႈယူႇလေႃႇ”
“မိူဝ်းတီႈယူႇသူလႄႈ”
“ယူႇၵေႃႈလႆႈ”
သႅင်လိုၼ်းႁေႃႈၵႃးမၼ်းဢွၵ်ႇဝၢင်းၵႂႃႇသေ မိူဝ်ႈလူင်းပိၵ်ႉၽၵ်းတူဝၢင်းၼၼ်ႉ ၸိုၼ်ႈမိူင်းပေႃးတၼ်းၶိုၼ်ႈၵႃးမၼ်းယဝ်ႉ။
“တၼ်းလိုၼ်ႈမႃးမိူဝ်ႈလႂ်ၼႆႉ”
“မိူဝ်ႈသူဢမ်ႇႁၼ်ၼၼ်ႉယဝ်ႉ”
“ဢမ်ႇႁူႉတေႁဵတ်းၸိူင်ႉႁိုဝ်တီႈသူယဝ်ႉၼႆႉ”
“ပွႆႇႁဝ်းဝႆႉႁဵတ်းၼႆလႄႈ”
“ဢိုမ်ႈ..”
သႅင်လိုၼ်းၵေႃႈ ႁေႃႈၵႃးမိူဝ်းတီႈႁိူၼ်းသေ ၵိုတ်းၵႃးယဝ်ႉၶဝ်ႈႁိူၼ်းမိူဝ်းၵႂႃႇ ဢမ်ႇသူၼ်ၸႂ်မၼ်းသေဢိတ်းယဝ်ႉ။ ယူႇႁိုင်ၸူဝ်ႈၼိုင်ႈမႆႈၸႂ်မၼ်းသေ ႁွပ်ႇၽႃႈလူင်းမႃး ၸိုၼ်ႈမိူင်းၵေႃႈပေႃးဢမ်ႇမီးယဝ်ႉ။
“ၶႂ်ႈၵႂႃႇၵေႃႈၵႂႃႇၶႂ်ႈမႃးၵေႃႈမႃး ပေႃးဢမ်ႇလၢတ်ႈၽႂ်ယဝ်ႉ ဢဝ်ၵၢင်ၸႂ်သူဝႃႈလႄႈ” ပွင်ႉဢုမ်းဢုမ်းႁင်းမၼ်း။
