သႅင်လိုၼ်းၼၼ်ႉၵေႃႈ ပိၼ်ႇႁူဝ်ၵႃးမၼ်း လမ်းၵႂႃႇႁၢင်ႇႁၢင်ႇတင်းၵႃးလူင်။
“လမ်းၵႂႃႇၵႆပေႃးတၢၼ်ႇၼႆႉ ဢမ်ႇတၼ်းႁၼ်ၵူၼ်ႈမၼ်းယဝ်ႉလေႃႇ”
“ၵႂႃႇၸမ်ၼႃႇ ၵမ်ႉပိူၼ်ႈႁၼ်ႁေယဝ်ႉဢိူဝ်ႈလေႃႇ”
“ႁၼ်ၵေႃႈႁၼ်ႁေယဝ်ႉၼႃႇ ၸိူင်ႉၼႆပိူၼ်ႈၶႅၼ်းထၢင်ႇယဝ်ႉ ႁၼ်ႁိုဝ်မႃးထႅင်ႈလမ်းယဝ်ႉၼၼ်ႉ”
“ႁဝ်းပေႃးဢမ်ႇၶႂ်ႈမေႃႁေႃႈယဝ်ႉ”
“မႃးလႄႈႁဝ်းႁေႃႈ”
သွင်ၶႃၵေႃႈပုတ်ႈၵၼ်ႁေႃႈၵႂႃႇသေ ပူၼ်ႉၵႃးလူင်ၵႂႃႇယဝ်ႉၵေႃႈ သိုပ်ႇမုင်ႈၼႃႈၵႂႃႇၼႂ်းဝၢၼ်ႈၼၼ်ႉလႄႈ ၵႂႃႇၵိုတ်းသႂ်ႇတီးသႅင်ႇတီႈဝၢၼ်ႈၸပ်းႁိမ်းတၢင်းၼၼ်ႉယဝ်ႉ ၼင်ႈၵိၼ်တၢင်းၵိၼ်သေပႂ်ႉတူၺ်းယူႇ။ ဢမ်ႇႁၼ်လွင်ႈပႅၵ်ႇပိူင်ႈသင်မႃး ၵၢင်ဝၼ်းၵေႃႈၸမ်ၶမ်ႈယဝ်ႉလႄႈ
“သူပႆႇမိူဝ်းႁၶၢဝ်းၼႆႉ”
“ႁဝ်းတေမိူဝ်းႁဵတ်းသင်”
“ႁဝ်းတႄႉတေမိူဝ်းယဝ်ႉဢိူဝ်ႈ သူတေႁတ်းယူႇယူႇၼႄႇ”
“ႁဝ်းတေလိုဝ်ႈၼႂ်းဝၢၼ်ႈၼႆႉၵူၺ်းယဝ်ႉ ႁဝ်းမီးၵူၼ်းႁူႉၸၵ်းယူႇ မိူဝ်းလႄႈသူၶႂ်ႈမိူဝ်းၵေႃႈ”
“ၵႂႃႇလႄႈႁဝ်းမိူဝ်းသူင်ႇသူပေႃးၼၼ်”
“ႁဝ်းၵူၺ်းဢိူဝ်ႈတေလႆႈဝႃႈၼၼ် ယူႇၵႆယူႇၼႄႇ”
“ဢမ်ႇ.. ပႆၵႂႃႇၵမ်ႉၵေႃႈထိုင်ယဝ်ႉ ယဝ်ႉၵေႃႈပိူၼ်ႈဢမ်ႇပၼ်ၵူၼ်းၼွၵ်ႈၶဝ်ႈ”
“သူႁၼ်ႁဝ်းပဵၼ်ၵူၼ်းၼွၵ်ႈၵူၺ်းႁႃႉၼႆႉ”
“ဢၼ်လီၵူဝ်လိူဝ်သေၽူႈၶဵၼ်ၵေႃႈ ၽူႈဢဝ်ၶၢဝ်ႇယဝ်ႉ ပေႃးဢဝ်ၼႃႈၵၢၼ်ဝႃႈတႄႉသူပဵၼ်ၵူၼ်းၼွၵ်ႈယဝ်ႉ၊ ပေႃးဢဝ်သုၼ်ႇတူဝ်ဝႃႈတႄႉ ပဵၼ်ၵူၼ်းၼႂ်းႁူဝ်ၸႂ်ႁဝ်းဢိူဝ်ႈၼႃႈ”
“ပေႃးၼၼ်ၵေႃႈႁဝ်းဢမ်ႇလူဝ်ႇႁူႉၸၵ်းၵၼ်လီယူဝ်ႉ ႁဝ်းတႄႉဢမ်ႇမေႃၸႅၵ်ႇလူင်”
“သူၼႆႉ ႁၢႆႉလိူဝ်သေၽူႈၶဵၼ်ႁဝ်းၵွၼ်ႇယဝ်ႉ”
“မိူဝ်းလႃႈၶႂ်ႈမိူဝ်းၵေႃႈ” သႅင်လိုၼ်းႁဵတ်းၼႃႈဢမ်ႇသူၼ်ၸႂ်သေဝိၼ်ႇၼႃႈပႅတ်ႈယဝ်ႉ
“မႃးလႄႈၶႂ်ႈၸွမ်းၵေႃႈ တီႈႁဝ်းယူႇတႄႉမီးၵူၼ်းၸၢႆးလၢႆလၢႆၵူၺ်းဢိူဝ်ႈ ပေႃးပဵၼ်မေးႁဝ်းတႄႉၶဝ်ၵေႃႈဢမ်ႇဝႃႈသင်ၵွၼ်ႇ”
“ၵႂႃႇ…မိူဝ်းလႃႈ..”
ၸိုၼ်ႈမိူင်းၵႂႃႇဢမ်ႇၵႆ
“သူ..ႁဝ်းလိုမ်း”
“လိုမ်းႁင်သူလႃႇ”
သႅင်လိုၼ်းလႅၼ်ႈမႃးၵွတ်ႇဢဝ်မၼ်းသေ
“လုမ်းလႃးတူဝ်လီလီၼႃႈ”
“ဢေႃႈၶႃႈ”
ၸိုၼ်ႈမိူင်းၵေႃႈ ၶဝ်ႈၵႂႃႇတီႈပၢင်ၶဝ်ယဝ်ႉ၊ သႅင်လိုၼ်ႉၼၼ်ႉတႄႉ ယူႇၼႂ်းၵႃးမၼ်းသေ ၼင်ႈႁဵတ်းၵၢၼ်မၼ်းယူႇလႄႈ ၼင်ႈထွမ်ႇၸိုၼ်ႈမိူင်းၶဝ်ဢုပ်ႇၵၼ် ယၢမ်းဢၼ်မၼ်းဢဝ်ၶိူင်ႈတိသဵင်တွတ်ႈသႂ်ႇၼႂ်းထွင်းၸိုၼ်ႈမိူင်းၵႂႃႇၸွမ်းၼၼ်ႉယဝ်ႉ။
ယၢမ်းၵၢင်ၶမ်ႈ ၽွင်းၶၢဝ်းၼွၼ်းယဵၼ် ဢွင်ႈတီႈၸုမ်းၵျႃးၽႅၼ်ႉၶဝ်ၼၼ်ႉတႄႉ ဢမ်ႇလပ်းသိင်ႇလႆႈ လႅင်းဝႆႉယူႇတင်းၶိုၼ်း၊ ယူႇယူႇ ၾႆးၶဝ်ၵိုင်ႉၵၢင်ႉမွတ်ႇၵႂႃႇသေ ၸုမ်းၶူဝ်းလမ်ၶဝ်ၵေႃႈ လုၵ်ႉၵူႈႁူးၵူႈတၢင်း လႅၼ်ႈၶဝ်ႈၵႂႃႇဝႅတ်ႉလွမ်ႉဝႆႉယဝ်ႉ၊ ယူႇၵႅပ်ႉၼိုင်ႈ သဵင်ၵွင်ႈၵေႃႈလင်မႃး သႅင်လိုၼ်းဢၼ်လၵ်ႉၶျွင်းတူၺ်းယူႇၼၼ်ႉ ၵိုင်ႉၵၢင်ႉတူၵ်းၸႂ်ၵႂႃႇသေ လူမ်ႉလူင်းၵႂႃႇယဝ်ႉ။
ၸုမ်းၶူဝ်းလမ်ၶဝ် ၽဵဝ်ႈႁုပ်ႈသိမ်းလႆႈၶူဝ်းၶွင်တင်းၼမ်လႄႈ ၵေႃႉဢၼ်ပဵၼ်ဢွၼ်ႁူဝ်ၶဝ်လၢႆၵေႃႉၼၼ်ႉၵေႃႈ လႆႈယိုဝ်းပႅတ်ႈတီႈၼၼ်ႈသေ လိုပ်ႈႁေႃႈၵူၼ်းဢွၵ်ႇၵႂႃႇတင်းသဵင်ႈယဝ်ႉ ဢဝ်မၢၵ်ႇပွႆႇၽဵဝ်ႈလၢင်ႉပႅတ်ႈတင်းမူတ်း။
သႅင်လိုၼ်းတႄႉၵေႃႈ တိုၼ်ႇမႃးၶိုၼ်းမီးယူႇတီႈၼႂ်းႁိူၼ်းၸဝ်ႈသႅင်ႇ ဢၼ်ၶႃမႃးၼင်ႈၵိၼ်မိူဝ်ႈၵၢင်ဝၼ်းၼၼ်ႉယဝ်ႉၼႃႇ။
“ၶႃႈတၼ်းမႃးမီးယူႇတီႈၼႆႈမိူဝ်ႈလႂ်ၶႃႈၼႆႉ”
“ၶမ်ႈဝႃး ၸူႉသူဢုမ်ႈသူမႃးဢိူဝ်ႈ”
“မၼ်းၵႂႃႇလႂ်ယဝ်ႉၶႃႈလႃႇ”
“ဢမ်ႇႁူႉၶႃႈ မၼ်းဢဝ်သူမႃးဝႆႉယဝ်ႉၵေႃႈၵႂႃႇၵမ်းလဵဝ် ႁိပ်ႈၼႃႇၶႃႈ”
“ၶမ်ႈဝႃးၼႆႉၸွင်ႇမီးလွင်ႈသင်ၶႃႈႁႃႉ”
“မီးၵႃႈ..တီႈယူႇၸုမ်းၵျႃးၽႅၼ်ႉၶဝ်ထုၵ်ႇၾႆးမႆႈၼၼ်ႉယိုင်”
မၼ်းၼႅတ်ႈဢဝ်ၶူဝ်းၶွင်မၼ်းသေ ဢွၵ်ႇၵႂႃႇတူၺ်းၵမ်းလဵဝ်၊ မၼ်းပိုတ်ႇၽုၺ်ႇၵွင်ႈထႆႇမၼ်းယဝ်ႉၼႆၵေႃႈ ၼႂ်းၵၢတ်ႉဢၼ်ပဵၼ်ၶေႃႈမုၼ်းလွင်ႈၼႆႉၼၼ်ႉ ႁၢႆၵႂႃႇတင်းမူတ်း၊ ဝူၼ်ႉတူၺ်းၶိုၼ်းၶမ်ႈဝႃးၼၼ်ႉၼႆၵေႃႈ မိူဝ်ႈသဵင်ၵွင်ႈပႆႇယဵၼ်ၼၼ်ႉ မိူၼ်မီးသဵင်တိၼ်မေႃးမႃးတၢင်းလင်လႄႈ ယူႇယူႇၵေႃႈ ၵွင်ႇၵေႃႈၸဵပ်းမႃးယဝ်ႉ။ တင်းပဵၼ်လူမ်းတင်းထုၵ်ႇၽတ်ႉမိူဝ်ႈလဵဝ်ၵၼ်ႁိုဝ်ဢမ်ႇႁူႉ ၶႂ်ႈတွင်းလိုမ်းတွင်းလိုမ်းဝႆႉၼၼ်ႉယိုင်။
“ၸိုၼ်ႈမိူင်း..သူႁဵတ်းၸိူင်ႉၼႆတေႃႇႁဝ်းလႆႈၵေႃႈ လူဝ်ႇပဵၼ်ၽူႈၶဵၼ်ၵၼ်ၵူၺ်းယဝ်ႉ”
ၸိုၼ်ႈမိူင်းၵေႃႈဢမ်ႇႁူႉဝႃႈ သႅင်လိုၼ်းသႂ်ႇၶိူင်ႈတီႉသဵင်ၵႂႃႇၸွမ်း၊ ၽိူဝ်ႇလၢႆႈၶူဝ်း ၸင်ႇတေၵမ်းၺႃးသေ ႁူႉဝႃႈသႅင်လိုၼ်းႁူႉၽႅၼ်ၶဝ်မူတ်းယဝ်ႉလႄႈ တွၼ်ႈတႃႇလွင်ႈႁူမ်ႇလူမ်ႇတင်းသွင်ၽၢႆႇၼၼ်ႉ မၼ်းၵေႃႈလႆႈၶပ်းၶိုင်သႅင်လိုၼ်းပႅတ်ႈယူႇ။
ယွၼ်ႉမၼ်းပဵၼ်ၵၢၼ်လပ်ႉၵူၺ်းလႄႈ ဢမ်ႇလီတႃႇတေဢဝ်ဢွၵ်ႇၶၢဝ်ႇလႆႈ၊ သင်ဢဝ်ဢွၵ်ႇၵႂႃႇၵေႃႈ လွင်ႈႁူမ်ႇလူမ်ႈသႅင်လိုၼ်းတေဢမ်ႇမီးလႄႈ မၼ်းတေၸၢင်ႈထုၵ်ႇႁဵတ်းႁၢႆႉလႆႈၼၼ်ႉယဝ်ႉ။
လွင်ႈတၢင်းဢၼ်ပီႈၸွမ်ဢွၵ်ႇၵၢၼ်ၵႂႃႇၼႆႉၵေႃႈ ပႃးၵွပ်ႈၵဵဝ်ႇၶွင်ႈတင်းၸုမ်းၶဝ်ၼႆႉၽွင်ႈယူႇ။ ဢမ်ႇၶႂ်ႈႁႂ်ႈသႅင်လိုၼ်းလႆႈသုမ်းၼႃႈၵၢၼ်ၵႂႃႇၵွပ်ႈလွင်ႈၼႆႉၵေႃႈပႃး။
သႅင်လိုၼ်းၸူၵ်းၼႂ်းထူင်ၵွင်ႈထႆႇမၼ်းသေ ႁၼ်ၺႃးလိၵ်ႈပွတ်းဢွၼ်ႇ
“သႅင်လိုၼ်း..သင်ႁဝ်းလႆႈထူပ်းၵၼ်ၵေႃႈ ႁႂ်ႈႁဝ်းလႆႈထူပ်းၵၼ်တီႈႁိူၼ်းၵူၺ်းလႄႈၼႃႈ”
မၼ်းၵေႃႈမိူၼ်ႇမိုင်ယူႇၼႂ်းၵႃးၼၼ်ႉႁေယဝ်ႉလေႃႇ သၢၵ်ႈသေႇလၵ်းထၢၼ်ဢၼ်ၵဵပ်းမႃး မိူဝ်ႈဝႃးတင်းဝၼ်းၼၼ်ႉၵေႃႈႁၢႆမူတ်း ၶေႃႈမုၼ်းဢၼ်ၸိုၼ်ႈမိူင်းလၢတ်ႈၼၼ်ႉ ဢဝ်မၼ်းဢမ်ႇၶႂ်ႈယုမ်ႇမႃးယဝ်ႉ။
ယူႇယူႇသဵင်ၾူၼ်းမေႃးမႃး
“ဝႃႈႁိုဝ်ၼွင်ႉၶိူဝ်း”
“မိူဝ်ႈၼႆႉပီႈဢမ်ႇၶဝ်ႈလုမ်းႁႃႈ မီးၵူၼ်းဢဝ်ၶူဝ်းမႃးၽၢၵ်ႇဝႆႉ ၽူႈၸတ်းၵၢၼ်ၵေႃႈထၢမ်ႁႃပီႈယူႇဢိူဝ်ႈၼၼ်ႉ”
“ၵမ်ႉပီႈမိူဝ်းယဝ်ႉ မိူဝ်ႈလဵဝ်ပီႈတိုၵ်ႉမႃးႁႃသေလွင်ႈလွင်ႈယူႇ”
သႅင်လိုၼ်းၵေႃႈႁေႃႈၵႃးမၼ်းဢွၵ်ႇမိူဝ်းၵႂႃႇၶိုၼ်း။ မိူဝ်ႈႁွတ်ႈတီႈလုမ်း မီးၶူဝ်းတွၼ်ႈသႂ်ႇၵွင်ႇဢၼ်ၼိုင်ႈ တမ်းဝႆႉယူႇၼိူဝ်ၽိူၼ်မၼ်းၼၼ်ႉလႄႈ ၽုၺ်ႇတူၺ်းယဝ်ႉ ပဵၼ်ဢၼ်တီႉသဵင် ဢၼ်ၸွမ်ႇပၼ်ၸိုၼ်ႈမိူင်းၵႂႃႇၼၼ်ႉယဝ်ႉ။
“ၼွင်ႉၶိူဝ်း ၸွင်ႇတွင်းၵူၼ်းဢဝ်မႃးပၼ်ၶွင်ပီႈၼၼ်ႉၼႄႇ”
“ပဵၼ်ၽူႈၸၢႆးဢေႃႈပီႈ”
“တူဝ်သုင်သုင်မင်ႈမင်ႈဝႆႉဢိတ်းဢိတ်း ၼႃႈၶႂ်ႈသဵမ်ႈမိူၼ်ၼင်ႇႁူၺ်ႇၶႆႇၵႆႇ ၶူၼ်ႁူဝ်ဢမ်ႇယၢဝ်းၼႃ ၼႃႈတႃၵေႃႈဢမ်ႇယုမ်ႉဢမ်ႇၵီႈဝႆႉၸွင်ႇၸႂ်ႈ”
“ႁၢင်ႈၶႂ်ႈမိူၼ်ၼင်ႇပီႈဝႃႈဝႆႉယူႇ”
“ၶႃႈပေႃးၶႂ်ႈႁၼ်ၼႃႈၶဝ်ယဝ်ႉ ထွမ်ႇပီႈဝႃႈလႅပ်ႈလဝ်းၼႃႇ”
“ယႃႇယွင်ႇၼႃႇလူးသႅင်ယုမ်ႉ..”
“လဝ်းယူႇၵဝ်ႇဢိူဝ်ႈ ၵူၺ်းပီႈႁမ်ႉပေႉတွင်းႁၢင်ႈမၼ်းၼႃႇလႃႇ ပဵၼ်ၸူႉၵၼ်ၵႃႈထၢင်ႇ”
“ပဵၼ်ၽူႈၶဵၼ်ၵၼ်ယဝ်ႉမိူဝ်ႈလဵဝ်ၼႆႉ..” သႅင်လိုၼ်းလၢတ်ႈလေႃးလွင်ႈဢမ်ႇႁၢၼ်ႉၸႂ် “မၼ်းမႃးႁိုင်ယဝ်ႉၼႄႇ”
“မႃးပၼ်ႁေဢွၵ်ႇၵႂႃႇၵူၺ်း မိူဝ်ႈၶႃႈသိုပ်ႇၾူၼ်းႁႃပီႈၵေႃႈမၼ်းပေႃးၵႂႃႇယဝ်ႉ”
“ၵေႃႈယဝ်ႉလႄႈ ၸွမ်းႁႃၵေႃႈဢမ်ႇႁၼ်ၵွၼ်ႇ”
“ပီႈၶႃဢမ်ႇမီးတီႈၵပ်းသိုပ်ႇၵၼ်ႁႃႉ ၸိုင်ဝႃႈပဵၼ်ၸူႉၵၼ်လႃႇ”
“ၽႂ်ဝႃႈပဵၼ်ၸူႉၵၼ်”
“ၶွင်ပီႈဝႃႈ မိူဝ်ႈလဵဝ်တႆႉပဵၼ်ၽူႈၶဵၼ်ၵၼ်ၼႆ တၢၼ်ႇဝႃႈမိူဝ်ႈဢွၼ်တၢင်းယၢမ်ႈပဵၼ်ၸူႉၵၼ်ယဝ်ႉ”
“ဢမ်ႇမီးၵၢၼ်ႁဵတ်းယဝ်ႉၼႄႇသႅင်ယုမ်ႉ”
ၸူဝ်ႈမၼ်းမႃးၼႆႉ မီးလုၵ်ႈဢွၼ်ႇၽိုၵ်းၵၢၼ်မႃးယူႇၸွမ်းမၼ်းသွင်ၵေႃႉ၊ ၸၢႆးၶိူဝ်းလႄႈသႅင်ယုမ်ႉ၊ မိူဝ်ႈဝႃးပဵၼ်ဝၼ်းလိုဝ်ႈလႄႈ မၼ်းၵေႃႈဢမ်ႇၶႂ်ႈသုၵ်ႉၶၢဝ်းယၢမ်းၶႃသေ ဢမ်ႇလႆႈႁွင်ႉၵႂႃႇပႃးယဝ်ႉ။
