သႅင်လိုၼ်းၵေႃႈ ဢမ်ႇဢၢၼ်းၵႂႃႇႁဵတ်းၵၢၼ်ၶိုၼ်းၼင်ႇၵွၼ်ႇ ၵူၺ်းၵႃႈ မိူဝ်ႈၵႂႃႇႁွတ်ႈတီႈႁဵတ်းၵၢၼ် ၵၢၼ်သမ်ႉသုၵ်ႉမႃးလႄႈ ဢမ်ႇမီးၽႂ်သေ ပိူၼ်ႈသမ်ႉႁႂ်ႈမၼ်းၸွႆႈ ၸွမ်းလူၺ်ႈတၢင်းယၢမ်ႈဢၼ်ၵႆႉႁဵတ်းတႃႇသေႇၼၼ်ႉ မၼ်းၵေႃႈလႆႈႁဵတ်းၵႂႃႇ။ ၵၢၼ်တၢမ်းၶၢဝ်ႇၼိုင်ႈဢၼ်ၼႆႉၵေႃႈ မၼ်းဢမ်ႇယဝ်ႉသေ ၵႃႈလႆႈတၢမ်းယူႇတိၵ်းတိၵ်းလႄႈ ႁိုင်ၵႂႃႇပဵၼ်လိူၼ်ယဝ်ႉ ဢမ်ႇတၼ်းႁူႉ။
မိူဝ်ႈလႆႈႁဵတ်းၵၢၼ် တူင်ႉတိုၼ်ႇမႃးၼႆၵေႃႈ ၼင်ႇႁၢင်ႈမိူၼ်ၵူၼ်းမီးၸႂ်မႃးၶိုၼ်းယူႇ။
ၶမ်ႈၼိုင်ႈ ႁဵတ်းၵၢၼ်ယဝ်ႉၸဝ်ႉဝႆႉလႄႈ ပွၵ်ႈႁိူၼ်းၸဵမ်ၸဝ်ႉ ႁဵတ်းၵိၼ်ႁဵတ်းယႅမ်ႉယဝ်ႉ ဢမ်ႇၸၢင်ႈႁဵတ်းသင်လႄႈ ယိပ်းၾူၼ်းဢွၵ်ႇမႃးတူၺ်းယဝ်ႉ ယူႇယူႇၵေႃႈၶုၵ်းၸႂ်လႆႈမၢင်ၵေႃႉမႃး ၸင်ႇတေႁူႉတူဝ်ဝႃႈ ဢမ်ႇလႆႈတီႈၵပ်းသိုပ်ႇမၼ်းဝႆႉ လႆႈတၢင်းၼင်ႈသေဝူၼ်ႉလၢႆၵူၺ်းယဝ်ႉၼႃႇ။
မိူဝ်ႈၶဝ်ႈၵႂႃႇၼႂ်းပွႆးၼၼ်ႉ ၸွမ်းလူၺ်ႈတၢင်းယၢမ်ႈ ၵႂႃႇပွႆးမိူဝ်ႈလႂ် ဢမ်ႇတွၼ်ႉလႆႈၵႂႃႇလၢႆလၢႆသေပွၵ်ႈ ဢွၵ်ႇၸႂ်ၶုၵ်းၸႂ်လႆႈ ဢူၺ်းၵေႃႉႁူမ်ႈၵၢၼ်ၸိူဝ်းၼၼ်ႉမႃးယဝ်ႉ။ သမ်ႉဝႃႈလႆႈႁဵတ်းၵၢၼ်ၵေႃႈ ဢမ်ႇလီၶၢၼ်ႉၵႃႈႁိုဝ်၊ သင်ၼႂ်းပွႆးၼႆႉ ဢမ်ႇမီးၸိုၼ်ႈမိူင်းၼႆ ၶႅၼ်းတေလီၶၢၼ်ႉၵွၼ်ႇယဝ်ႉ။
မၼ်းႁူႉလီဝႃႈၶၢဝ်းၼႆႉ ၵၢၼ်ၶဝ်တေသုၵ်ႉလႄႈ လိူၼ်ၸဵင်မႂ်ႇၼိုင်ႈဝၼ်း မၼ်းၵေႃႈဢွၵ်ႇႁိူၼ်းၵႂႃႇၸဵမ်ၸဝ်ႉ ဢမ်ႇတၼ်းလၢတ်ႈၽႂ်ယဝ်ႉ။
ၸိုၼ်ႈမိူင်းဢၼ်လိုဝ်ႈမႃးႁိုင်ၼၼ်ႉၼႆၵေႃႈ ၵိုင်ႉၵၢင်ႉမီးၵၢၼ်မႃးသေ မိူဝ်းသူင်ႇၶဝ်ယဝ်ႉ ၶိုၼ်းဢွၵ်ႇၵႂႃႇၸဵမ်ၶမ်ႈၼၼ်ႉၵမ်းလဵဝ်။
ၸႂ်ထိုင်ယူႇၵေႃႈ လႆႈတၢင်းမွင်းၵူၺ်း၊ တူၺ်းၾူၼ်းယူႇၵေႃႈႁၢင်ႈဢမ်ႇမီးသင် သေလႄႈ ၼွၼ်းၵႂႃႇၸဵမ်ၸဝ်ႉယဝ်ႉ။
ဝၼ်းလိုဝ်ႈၽွင်းတိုၵ်ႉၼွၼ်းဝၢၼ်ယူႇၼၼ်ႉ လႅင်ႇၶၢဝ်ႇသႅင်လိုၼ်း တီႈၼႂ်းဝၢၼ်ႈၵပ်းသိုပ်ႇမႃး တီႈႁိမ်းဝၢၼ်ႈၼၼ်ႉ မီးၸုမ်းၵူၼ်းတၢင်ႇတီႈမႃးၶၢတ်ႈသူၼ်ၵူၼ်းဝၢၼ်ႈၶဝ်သေယူႇ၊ မိူဝ်ႈဢွၼ်တၢင်းတႄႉဝႃႈ တေမႃးႁဵတ်းသူၼ်ၵူၺ်း ႁိုင်မႃးၵေႃႈ ထုၺ်ပႅတ်ႈလိၼ်သေႁဵတ်းႁူဝ်ႉလဵၵ်းလွမ်ႉဝႆႉတီႈယူႇၶဝ် ဢမ်ႇပၼ်ၽႂ်ၶဝ်ႈၵႂႃႇ၊ လိူၼ်ဢွၼ်တၢင်းတႄႉၶဝ်မႃးပၼ်ၵႃႈမၼ်းယူႇ၊ လိူၼ်ထီႉသွင်မႃးၶဝ်ၵေႃႈဢမ်ႇပၼ်ၵႃႈၶၢတ်ႈမၼ်းသေ ၵႆႉၵႆႉမႃးဢဝ်ၽၵ်းၵူၼ်းၼႂ်းဝၢၼ်ႈၶဝ် ဢဝ်ၵႂႃႇၼမ်ၼႃႇ ၵူၺ်းၵႃႈဢမ်ႇပၼ်ၵႃႈမၼ်း ၵူၼ်းၼႂ်းဝၢၼ်ႈၵေႃႈဢမ်ႇၶႂ်ႈၶၢမ်ႇလႆႈယဝ်ႉ။
လႅင်ႇၶၢဝ်ႇၵေႃႉၼၼ်ႉၵေႃႈ တင်းႁတ်းၽွင်ႈဢမ်ႇႁတ်းၽွင်ႈသေလၢတ်ႈမႃးယဝ်ႉ၊ မၼ်းၵေႃႈဢမ်ႇပေႃးၵႆဝဵင်းသေၵႃႈႁိုဝ်လႄႈ ၼင်ႇႁိုဝ်ပေႃးတေလႆႈပႃးသၢၵ်ႈသေႇလၵ်းထၢၼ်မၼ်းၽွင်ႈၼၼ်ႉ တင်းၶိူင်ႈၸႂ်ႉၶူဝ်းတိုဝ်းမၼ်းသေႁႅၼ်းသႂ်ႇထူင်ၵႂႃႇယဝ်ႉ။
မိူဝ်ႈဢွၼ်တၢင်းတႄႉယင်းၶႅၼ်းယူႇ မီးၵေႃႉၵၼ်တင်းပီႈၸွမ် ပေႃးဝႃႈၵၢၼ်ၼႆၽွမ်ႉတႃႇသေႇ၊ မိူဝ်ႈလဵဝ်သမ်ႉ တေႁွင်ႉၽႂ်ၵေႃႈ ဝၼ်းလိုဝ်ႈပိူၼ်ႈၶႂ်ႈဢၢၼ်းၼႃႇဝႆႉယူႇ။
“ႁလူဝ်..ပီႈၸွမ်တၼ်းယူႇႁႃႉမိူဝ်ႈၼႆႉ”
“ပီႈဢမ်ႇလႆႈယူႇတီႈႁိူၼ်း..မႃးႁႃသိုဝ်ႉၵုၼ်ႇပၼ်ပီႈလူဝ်းသူယူႇဢိူဝ်ႈၼႆႉ”
“ၼွင်ႉလူဝ်ႇႁင်လႃႇ”
“ၶႃႈဢၢင်ႈမိူဝ်းလႄႇၼႆၵူၺ်း..တၢင်ႇပွၵ်ႈၸွင်ႇၵွႆႈမိူဝ်းပေႃးၼႆ”
သႅင်လိုၼ်းၵေႃႈ ႁေႃႈၵႃးဢွၵ်ႇၵႂႃႇႁင်းၵူၺ်း ၸင်ႇတေၶုၵ်းၸႂ်လႆႈမိူဝ်ႈမႃးထိုင်ၼၼ်ႉလႄႈ
“ပေႃးပဵၼ်ၵႂႃႇၸိူင်ႉဝၼ်းပူၼ်ႉတႄႉ တေႁဵတ်းႁိုဝ်ၼႆႉ..ၽႂ်ၵေႃႈဢမ်ႇၸၢင်ႈမႃးၸွႆႈယဝ်ႉ..ၵေႃႈယဝ်ႉမၼ်းႁေႁႃႉတေႃႈ..”
ဢၢင်ႈပိၼ်ႇႁူဝ်ၵႃးမၼ်း မီးၸၢႆးၼုမ်ႇႁွင်ႉၸိုၼ်ႈမိူင်း မႃးၸုၵ်းယူႇတၢင်းၼႃႈမၼ်းသေ။
“တိုၵ်ႉမႃးထိုင်ၵူၺ်း တေမိူဝ်းယဝ်ႉႁႃႉ”
“သူႁဵတ်းႁိုဝ်မႃးမီးယူႇတီႈၼႆႈလႃႇၼႆႉ”
“ႁဝ်းမႃးပႂ်ႉသူဢိူဝ်ႈ”
“ပႂ်ႉႁဝ်းႁဵတ်းသင် မီးၵၢၼ်လႄႈမႃးၵူၺ်းၵႃႈ”
“ဢမ်ႇႁူႉသေဢိၼ်ႉဢမ်ႇလႆႈႁႃႉ”
“ဢိုမ်ႈ..ၸွင်ႇသူႁၼ်မႅၼ်ႈႁႃႉ..တီႈၶဝ်ဝႃႈၶဝ်ဢဝ်ၵႃးမႃးထုၺ်”
ၸိုၼ်ႈမိူင်းၵေႃႈ ဢဝ်မိုဝ်းၸီႉၵႂႃႇတၢင်းၸၢၼ်းဝၢၼ်ႈၼၼ်ႉသေ
“မီးတၢင်းတႂ်ႈပုၼ်ႈၼေႈ ၸွင်ႇႁဝ်းတေလႆႈၵႂႃႇၸွမ်းႁိုဝ်”
“ဢမ်ႇၵႂႃႇၵေႃႈလႆႈယဝ်ႉ” သႅင်လိုၼ်းလၢတ်ႈယဝ်ႉမၼ်းတူၺ်း။
“ပေႃးၼၼ်ႁဝ်းတေၵႂႃႇၵွၼ်ႇယဝ်ႉ”
“သူတေၵႂႃႇလႂ်ထႅင်ႈ”
“တေမိူဝ်းၶိုၼ်းယဝ်ႉ ပိူၼ်ႈဢမ်ႇပၼ်ႁဝ်းၶိုၼ်ႈၵႃးလူး”
“မိူဝ်းလွႆးလွႆးၼႃႈ”
“ႁတ်းၵႂႃႇၵူၺ်းတေႉၼႃ”
“ဢိုမ်ႈ..ႁဝ်းတေၵႂႃႇႁင်းၵူၺ်းၵူၺ်း..”
“ၸွင်ႇႁူႉၼႄႇဝႃႈတႂ်ႈၼၼ်ႈပဵၼ်တီႈၸိူင်ႉႁိုဝ်ၼႆ ပေႃးပဵၼ်ႁင်မႃးတႄႉၽႂ်ဢမ်ႇၸၢင်ႈၸွႆႈၼႃႈ”
“ၵေႃႈယဝ်ႉလႄႈ..ပေႃးသူဢၢၼ်းပွႆႇႁႂ်ႈႁဝ်းပဵၼ်ယူႇၵေႃႈ”
“ႁႂ်ႈႁဝ်းၵႂႃႇၸွမ်းလႄႈပိူၼ်ႈၼႆ”
“လၢတ်ႈႁဝ်းမႃးၵွၼ်ႇလႄႈ သူမႃးႁဵတ်းသင်တေႉၼႆ”
“ႁဝ်းတေႁဵတ်းႁိုဝ်လၢတ်ႈလႃႇ ၵမ်ႉပိူၼ်ႈငိၼ်းမူတ်းႁေယဝ်ႉဢိူဝ်ႈလေႃႇ မီးသူၵူၺ်းဢိူဝ်ႈဢၼ်ႁူႉၸၵ်းႁဝ်းၼႆႉ”
“ၸႂ်ႈယူႇတေႉ..”
“ၸႂ်ႈၵႃႈ..”
“သူသမ်ႉမႃးလိုဝ်ႈတီႈလႂ်လႃႇ”
ဝိၼ်ႇသၢႆႉဝိၼ်ႇၶႂႃသေယဝ်ႉ
“ပၼ်ႁဝ်းၶိုၼ်ႈၵႃးၵွၼ်ႇလႄႈ ပိူၼ်ႈတေႁၼ်ႁႃးမူတ်းယဝ်ႉ”
သႅင်လိုၼ်းပိုတ်ႇၽၵ်းတူပၼ်သေ
“ထၢမ်မႃးလႄႈၵမ်းၼႆႉ မႄႈၸဝ်ႈႁိူၼ်းၶဝ်”
“သူဝႃႈၽႂ်ပဵၼ်မႄႈၸဝ်ႈႁိူၼ်း ၶႂ်ႈလူင်းၵႃးၶိုၼ်းၼႄႇတေႃႈ”
“မီးမႄႈၸဝ်ႈႁိူၼ်းၶဝ်ၵူၺ်းၼႃႇ ၵႆႉထၢမ်တႂ်ႈထၢမ်ၼိူဝ်ၼႃႇၼႆႉ”
“လၢတ်ႈမႃးလႄႈ သူလိုဝ်ႈတီႈလႂ်”
“ယူႇၼႂ်းထိူၼ်ႇတၢင်းပုၼ်ႉၼေႈ”
“သူသမ်ႉတေၵႂႃႇတၢင်းလႂ်လႃႇ”
“ၵႂႃႇၸွမ်းသူၼၼ်ႉၼႃႇ”
“ႁဝ်းတေမိူဝ်းၵူၺ်းဢိူဝ်ႈ ၸွင်ႇတေမိူဝ်းၸွမ်းႁိုဝ်”
“သူၵႂႃႇလႂ်ႁဝ်းၵႂႃႇၼၼ်ႈယဝ်ႉ”
သႅင်လိုၼ်းႁေႃႈၵႃးမိူဝ်းၵႂႃႇၶိုၼ်း
“မိူဝ်းတေႉႁၼႆႉ..”
“မိူဝ်းတေႉဢိူဝ်ႈ..”
“ပေႃးၶႂ်ႈႁႂ်ႈႁဝ်းမိူဝ်းယူႇၸွမ်းသူၵေႃႈလႆႈဢိူဝ်ႈၸၢင်ႈပဵၼ်သင်”
“ဢမ်ႇပဵၼ်သင်ႁဝ်းတေဢဝ်သူမိူဝ်းယူႇၸွမ်းၵူၺ်း”
ပုင်ႈၵႃးမိူဝ်းၵႂႃႇဝႆးဝႆးယဝ်ႉၼႃႇ။
“ၼေႈသူ..ပွႆႇႁဝ်းလူင်းလႄႈ”
“လၢတ်ႈမႃးလႄႈ..သူမႃးႁဵတ်းသင်”
“ႁဝ်းမႃးႁဵတ်းၵၢၼ်ဢေႃႈ..တီႈလဵဝ်ၵၼ်တင်းသူ”
“တီႈၼၼ်ႈ မၼ်းပဵၼ်တီႈပိူၼ်ႈႁဵတ်းသင် သူႁူႉၸွင်ႇၸႂ်ႈ”
“မၼ်းပဵၼ်တီႈၸုမ်းၵျႃးၽႅၼ်ႉၶဝ်မႃးယူႇ မီးမွၵ်ႈသွင်လိူၼ်ၼႆႉၸမ်ယဝ်ႉ ၸဵမ်မိူဝ်ႈမႃးႁဵတ်းတီႈယူႇ၊ ၵူၼ်းၵေႃႈတေမီးယူႇ 200 ၼႆႉ ၵမ်ႈၽွင်ႈၵေႃႈ ထုၵ်ႇလႅၼ်မႃးႁဵတ်းၵၢၼ် ၵမ်ႈၽွင်ႈၵေႃႈထုၵ်ႇတဵၵ်းတဵင်မႃး”
“သူသမ်ႉႁူႉမႃးတီႈလႂ်လႃႇ”
“ၼႆႉတႄႉႁဝ်းဢမ်ႇၸၢင်ႈလၢတ်ႈ လွင်ႈႁူမ်ႇလူမ်ႈလႅင်ႇၶၢဝ်ႇႁဝ်း သူပဵၼ်သိုဝ်ႇၶၢဝ်ႇတေႁူႉလီယူႇႁိုဝ်လႃႇ”
သႅင်လိုၼ်းႁေႃႈၵႃးၵႂႃႇဢမ်ႇသူၼ်ၸႂ်ၽႂ်ယဝ်ႉလႄႈ
“တေႉဢိူဝ်ႈၼႆႉသူ..ႁဝ်းတွင်းပၢၼ်ႇယဝ်ႉ မိူဝ်းသူင်ႇႁဝ်းၶိုၼ်းလႃႈ ႁဝ်းဢမ်ႇယဝ်ႉသူထႅင်ႈယဝ်ႉ”
“ၶႂ်ႈမိူဝ်းၵေႃႈ..လူင်းတီႈၼႆႈၵူၺ်းလႄႈ”
“မႃးၵႆပေႃးတၢၼ်ႇၼႆႉတေႁႂ်ႈႁဝ်းပႆမိူဝ်းၵူၺ်းၵႃႈ”
“ဢိုမ်ႈ..ၽႂ်ၸႂ်ႉသူၶႂ်ႈယွၼ်းၶိုၼ်ႈၵႃးမႃးႁင်းၵူၺ်း”
“သူၼႆႉပဵၼ်ၵူၼ်းၸႂ်ႁၢႆႉတေႉယဝ်ႉ”
“သူၶႅၼ်းၸႂ်ႁၢႆႉယဝ်ႉ..တေၵႂႃႇၵေႃႈဢမ်ႇသူင်ႇဢမ်ႇလၢတ်ႈ တီႈၵပ်းသိုပ်ႇၵေႃႈဢမ်ႇမီး”
“ႁဝ်းမိူဝ်းႁႃသူၶိုၼ်းယူႇလူး သူပေႃးမႃးတၢင်းၼႆႉယဝ်ႉၼႃႇ”
“ၽႂ်ၸႂ်ႉၶႂ်ႈၵႂႃႇပႅတ်ႈႁဝ်း”
“ႁဝ်းၸႂ်ထိုင်သူ”
သႅင်လိုၼ်းၵိုတ်းၵႃးမၼ်းၵႂႃႇ
“သူတေပၼ်ႁဝ်းလူင်းတီႈၼႆႈတေႉႁႃႉ”
“ဢိုမ်ႈ..ၵႃးလူင်မႃးတၢင်းၼႃႈၼၼ်ႉၸွင်ႇသူႁၼ်”
“ႁဵတ်းႁင်လႃႇ..”
“ႁဝ်းယၢမ်ႈထုၵ်ႇၺွပ်းၶင်သႂ်ႇၼႂ်းၵႃးၸိူင်ႉၼၼ် မိူဝ်ႈလူင်းၵႃးၵႂႃႇ ၶဝ်ၵေႃႈဢဝ်ႁဝ်းၵႂႃႇၶင်ယူႇၼႂ်းလပ်းသိင်ႇ တီႈႁွင်ႈၵႅပ်ႈၵႅပ်ႈ ဢၢႆတူႇၼဝ်ႈမဵၼ် ထုၵ်ႇမတ်ႉဝႆႉဢမ်ႇပွႆႇၵႂႃႇတၢင်းလႂ်လႆႈ ဢမ်ႇႁူႉဝၼ်းဢမ်ႇႁူႉၶိုၼ်း တၢၼ်ႇဝႃႈပဵၼ်ၵၢင်ၶမ်ႈယူႇတႃႇသေႇယဝ်ႉ သမ်ႉဝႃႈပူၼ်ႉလွတ်ႈယဝ်ႉၵေႃႈ မိူၼ်ႁဝ်းတိုၵ်ႉၶမ်ဝႆႉယူႇၼႂ်းၼၼ်ႉ ထိုင်တီႈပေႃးလႆႈၵႂႃႇယူႇၵျွင်းယဝ်ႉ လွင်ႈၼႆႉႁဝ်းတမ်ႉဢမ်ႇႁတ်းလၢတ်ႈၼႄမႄႈႁဝ်းၵွၼ်ႇယဝ်ႉ”
ၸိုၼ်ႈမိူင်းယိပ်းဢဝ်မိုဝ်းမၼ်းသေ
“ဢမ်ႇပဵၼ်သင်ယဝ်ႉၼႃ..”
“ဢၼ်ႁဝ်းလွတ်ႈမႃးလႆႈၵေႃႈ..ၸုမ်းၶူဝ်းလမ်ၶဝ်မႃးၸွႆႈဝႆႉယဝ်ႉ..သင်ဢမ်ႇမီးၶဝ်ၶေးႁဝ်းတေၵႂႃႇမီးယူႇတၢင်းလႂ်ယဝ်ႉဢမ်ႇႁူႉမိူဝ်ႈလဵဝ် ၸွင်ႇသူႁူႉၸၵ်းၸုမ်းၼၼ်ႉႁိုဝ်”
“သူသမ်ႉတေၶႂ်ႈႁူႉႁဵတ်းသင်လႃႇ”
“ႁဝ်းယၢမ်ႈလၢတ်ႈၼႄသူယဝ်ႉလူး..”
“သူတေယွၼ်းႁဵတ်းမေးၼွႆႉမၼ်းၼႆၼၼ်ႉၼႃ”
“ဢိုမ်ႈ..”
“သူၵျိူၵ်ႈမၼ်းထိုင်တၢၼ်ႇၼၢၼ်ႉတေႉႁႃႉၼႆႉ”
“ၶဝ်ပဵၼ်ၽူႈမီးၵုင်ႇမုၼ်ၼိူဝ်ႁဝ်းလူး ႁဝ်းဢမ်ႇမီးသင်တွပ်ႇတႅၼ်းၶဝ် လိူဝ်သေတူဝ်လႄႈႁူဝ်ၸႂ်ႁဝ်းဢၼ်မီးယူႇၼႆႉၵူၺ်း”
သၢႆတႃသႅင်လိုၼ်းယၵ်ႉတူၺ်းၸိုၼ်ႈမိူင်း ၼႃႈဢမ်ႇၵီႈၼၼ်ႉသေ “သင်သူပဵၼ်ၵူၼ်းၵေႃႉၼၼ်ႉတႄႉ တေလီၵႃႈႁိုဝ်ၼေႃ ပဵၼ်သူဢမ်ႇလႆႈႁ ၵူၼ်းၵေႃႉၼၼ်ႉ”
“ႁဵတ်းႁင်လႄႈတေလႆႈပဵၼ်ၵူၼ်းၵေႃႉၼၼ်ႉလႃႇ ပဵၼ်ၽႂ်ၵေႃႈဢမ်ႇႁူႉၸၵ်းၸိူင်ႉၼႆ”
“ႁဵတ်းႁိုဝ်လႄႈဝႃႈဢမ်ႇႁူႉ”
