“ၵဝ်ယူဝ်ဝႃႈမႂ်းၵႂႃႇယဝ်ႉၼႆႉ မႂ်းပႆႇၵႂႃႇၵွၼ်ႇႁႃႉ”
မၼ်းၵေႃႈ ၼင်ႈသိၵ်ႇၵိၼ်ၶဝ်ႈမုၼ်းၼၼ်ႉသေ
“မိူဝ်ႈလႂ်မိူဝ်ႈလႆႈလိုဝ်ႈၼႆၵေႃႈလိုဝ်ႈတိၵ်းတိၵ်းၵႃႈ…ပႃႈၸိင်ႇၵေႃႈ ႁဵတ်းယူႇတၢင်းပီတမ်ႉဢမ်ႇလႆႈလိုဝ်ႈႁေပွၵ်ႈၼႆႉ”
“ၸႂ်ႈယူႇလႂ် ၵႆႉႁၼ်ၼႃႈမႂ်းၼႃႇ ၵဝ်ထၢင်ႇပဵၼ်ၶၢဝ်းပိူၼ်ႈလိုဝ်ႈၵၢၼ်ၼၼ်ႉၼႃႇဢေႉ”
“ၸႂ်ႈဢိူဝ်ႈၼေႃႈ ပေႃးၶႃႈမႃးၵေႃႈ မႃးၶၢဝ်းပိူၼ်ႈလိုဝ်ႈၵူၺ်းလႄႇၼႆ ဝၢၼ်ႈႁဝ်းၼႆႉၵေႃႈ ၵွႆႈယူႇၵူၼ်းၵွႆႈဢႄႇၵႂႃတိၵ်းတိၵ်းယဝ်ႉၼေႃ”
“ၸႂ်ႈဢိူဝ်ႈ ၸိူဝ်းပၢႆႈၵေႃႈပၢႆႈ ၸိူဝ်းတၢႆၵေႃႈတၢႆလူးမႂ်းၵေႃႈ ဢၼ်ၵိူတ်ႇမႃးၵေႃႈဢမ်ႇတၼ်းၶိုတ်းၵွၼ်ႇလႄႇ”
“ၶဝ်ပေႉၶႂ်ႈပၢႆႈဢေႉ”
“ၽႂ်ႁမ်ႉတေၶႂ်ႈယူႇ ပေႃးၵဝ်ပဵၼ်ၵူၼ်းၼုမ်ႇၸိူင်ႉသူၼႆႉၵေႃႈၶႂ်ႈပၢႆႈယဝ်ႈ ၵႂႃႇႁဵတ်းၵၢၼ်မိူင်းပိူၼ်ႈၼႆႉ တင်းၶႅၼ်းလိူဝ်မိူင်းႁဝ်းၼႆႉတေႉတေႉဝႃႈဝႃႈ”
“ပေႃးၵႂႃႇပႅတ်ႈယဝ်ႉ ႁိူၼ်းႁဝ်းသူၼ်ႁဝ်းဢမ်ႇသေလၢႆၼႄႇဢေႉ”
“သေလၢႆၵူၺ်းၵဝ်ႇဢိူဝ်ႈ ယူႇမိူင်းပိူၼ်ႈၵေႃႈဢမ်ႇမိူၼ်မိူင်းႁဝ်းလူင်၊ ႁိူၼ်းပိူၼ်ႈၵေႃႈဢမ်ႇၸႂ်ႈႁိူၼ်းႁဝ်းၵဝ်ႇလႂ်၊ ႁဵတ်းၵၢၼ်မိူင်းၼႆႉၵေႃႈဢမ်ႇတေႃႇတေႃႇလူး၊ ၽုၵ်ႇၶဝ်ႈသွမ်ႈၼႃးႁဵတ်းသူၼ်ၵေႃႈ သဵင်ႈငိုၼ်းယဝ်ႈ၊ ၵႃႈၽုၼ်ႇၵႃႈၵႃႈၽၼ်း ၽႂ်ၵေႃႈဢမ်ႇမႃးမႅင်ႇလၢႆလူးမႂ်းဝႃႈ၊ ပေႃးတေၶၢႆသမ်ႉတဵၵ်း ပေႃးႁဵတ်းၵၢၼ်မိူင်းပိူၼ်ႈတႄႉ ႁဵတ်းၵေႃႈလႆႈႁင်းႁဝ်းၵူၺ်း၊ ဢမ်ႇႁဵတ်းၵေႃႈဢမ်ႇလႆႈၵူၺ်း”
“မိူင်းပိူၼ်ႈၵေႃႈ ၵႃႈဝတ်းၵႃႈဝႂ်သဵင်ႈၼမ်ၼႃႇၽႅဝ်ၵွၼ်ႇ”
“ဢူး..မႂ်းႁူႉ တၢင်းၼႆႉၶႅၼ်းၼႃႇယဝ်ႉဢိူဝ်ႈ ၵမ်ႉထၢမ်းဢၼ်ပုၼ်ႉၵမ်ႉထၢမ်းဢၼ်ၼႆႉဝႃႇ ယိုင်ႈမီးၼမ်ယိုင်ႈလႆႈသႂ်ႇၼမ်ယဝ်ႈမႂ်း မၢင်ၸိူဝ်းၵေႃႈ ဢမ်ႇပေႉထၢမ်းလႆႈႁေပၢႆႈၵူၺ်းၵဝ်ႇမႂ်း”
“ပေႉတၢၼ်ႇတၢၼ်ႉၵႃႈၼႆႉ”
“တၢၼ်ႇၼၢၼ်ႉဢိူဝ်ႈမႂ်းဝႃႈ ၶွင်မႂ်းတႄႉဢမ်ႇယူႇလႄႇတေႁိုဝ်ႁူႉၼႄႇ သင်ဢမ်ႇလႆႈႁၢပ်ႇလႆႈထၢမ်းၼမ်ၼႃႇတႄႉ ၵူၼ်းၵေႃႈတေဢမ်ႇပေႃးပၢႆႈၼမ်ၵဝ်ႇလေႃႇ သႂ်ႇသႂ်ႇထၢမ်းထၢမ်းတႃႇႁဝ်းၵူၺ်းပေႃးဢမ်ႇမီးလႆႈယဝ်ႉၼႃႇ”
“ၵမ်ႈၽွင်ႈၵေႃႈပၢႆႈသိုၵ်းၵဝ်ႇႁိုဝ်လႃႇ”
“ၼၼ်ႉၵေႃႈပႃးဢိူဝ်ႈ”
“ၶဝ်ပေႉၵူဝ်လႆႈႁဵတ်းသိုၵ်းၼေႃ ၶႃႈတင်းဝႃႈၶႂ်ႈၵႂႃႇႁဵတ်းတူၺ်းၼႆႉ”
“ၵဝ်ၵေႃႈဢမ်ႇႁူႉၵွၼ်ႇ မိူဝ်ႈဢွၼ်တၢင်းတႄႉ ၵဝ်ဢမ်ႇၶႂ်ႈႁႂ်ႈမၼ်းၵႃႇၵဝ်ႇဢၢႆႈၸၢႆးႁဝ်းၵေႃႈ၊ လုၵ်ႈႁဝ်းလၢင်းႁဝ်းၵိူတ်ႇမႃး..လဵင်ႉမႃးပေႃးယႂ်ႇမေႃႉ ၶဝ်သမ်ႉယွၼ်းယူႇတိၵ်းတိၵ်း ႁမ်ႉမီးပီႈၼွင်ႉသွင်ၵေႃႉၼၼ်ႉၼႃႇ မၼ်းၵေႃႈဝႃႈမၼ်းၶႂ်ႈၵႂႃႇ ၵဝ်ၵေႃႈပွႆႇမၼ်းၵႂႃႇႁေဢိူဝ်ႈ ပွႆႇၵႂႃႇယဝ်ႉၵေႃႈဢမ်ႇၵႃႈႁိုဝ်ၵွၼ်ႇမႂ်း၊ တေဝႃႈႁိုဝ်ၵေႃႈ ၸဵမ်မိူဝ်ႈပၢၼ်ႁဝ်းပဵၼ်လုၵ်ႈဢွၼ်ႇယဝ်ႉၵဝ်ႇ သိုၵ်းၼႆႉတႄႉ..လႆႈၵႂႃႇ ပီႈဢၢႆႈၵဝ်ၵေႃႈၵႂႃႇႁဵတ်းသိုၵ်းႁေ ပဵၼ်ႁိုဝ်တၢႆၵေႃႈဢမ်ႇငိၼ်းၶၢဝ်ႇငိၼ်းငၢဝ်းသင်ၶိုၼ်း”
“ထိုင်မိူဝ်ႈလဵဝ်ၵႃႈ”
“ထိုင်မိူဝ်ႈလဵဝ်ဝႃႈ ႁဝ်းပေႃးႁႅၼ်းသွမ်းပၼ်မၼ်းယဝ်ႉၵွၼ်ႇဢိူဝ်ႈ”
“ပီႈဢၢႆႈၶဝ်ႁမ်ႉၵႂႃႇလႂ်ယဝ်ႉၼၼ်ႉ”
“ပွႆႇၵႂႃႇမိူင်းထႆးယဝ်ႉ ၵႂႃႇယဝ်ႉၵေႃႈမီးလုၵ်ႈမီးမေးႁေ ဢမ်ႇပေႃးလႆႈၸႂ်ယႂ်ႇၸႂ်ၵႆႈၵႃႈႁိုဝ်မႂ်းၼၼ်ႉ”
မုင်ႈႁၼ်ၸိုၼ်ႈမိူင်းသႂ်ႇၶူဝ်းသိုၵ်းတဵမ်ၸုမ်ႇသေ ပႆလူင်မႃးတၢင်းႁိူၼ်းလႄႈ
“ၸိုၼ်ႈမိူင်းၼႆႉၵူၺ်းယဝ်ႉ မိူဝ်ႈလဵဝ်မၼ်းမႃးယူႇတၢင်းၼႆႉႁေၵေႃႈ လႆႈၸႂ်ယႂ်ႇယူႇၵဝ်ႇဢိူဝ်ႈ”
သႅင်လိုၼ်းဝၢႆႇတူၺ်းၸွမ်းသေ ႁၢင်ႈၾၢင်တူဝ်ၶိင်းၵူၼ်းၼႆႉၵေႃႈ ပေႃးၼုင်ႈၶူဝ်းသိုၵ်းၼႆ ၸိုင်ပေႉလႅပ်ႈဝႆႉဢမ်ႇႁူႉယဝ်ႉ၊ ၵူၺ်းၵႃႈႁၼ်မိူဝ်ႈလႂ်ၵေႃႈ ၼႃႈဢမ်ႇယုမ်ႉဢမ်ႇၵီႈႁေပွၵ်ႈၼၼ်ႉၵူၺ်း။
“ၶႃႈမိူဝ်းၵွၼ်ႇယဝ်ႉပႃႈ ပေႃးၼႆ”
သႅင်လိုၼ်းၵေႃႈမိူဝ်းၵႂႃႇ ၸိုၼ်ႈမိူင်းဝၢႆႇယၵ်ႉ
တူၺ်းၸွမ်းလင်သေ မႄႈၶဝ်ၵေႃႈႁွင်ႉထၢမ်။
“ၵိၼ်ၶဝ်ႈမႃးယဝ်ႉၼႄႇလုၵ်ႈ”
“ဢေႃႈ ပႆႇၵိၼ်ၶႃႈ မႄႈႁဝ်းၼႃႇ”
“ၵဝ်တိုၵ်ႉဢၢင်ႈၵိၼ်ယူႇ ဢေးလိုၼ်းမႃးဢုပ်ႇႁေၵေႃႈဢဝ်လိုမ်းပႅတ်ႈယဝ်ႉၼႃႇ”
ၸိုၼ်ႈမိူင်းၵေႃႈ ဝႄႉႁိူၼ်းၵႅပ်ႉၼိုင်ႈသေ မႃးယိမ်ၵႃးတီႈႁိူၼ်းလႄႈ
“တီႈသူဢမ်ႇမီးၵႃးၼႄႇ”
“ၶဝ်လူဝ်ႇဢဝ်ၵႂႃႇတၢင်ႇၵူၼ်းဝႃႇ”
“မိူဝ်ႈလႂ်မႃးဢဝ်ၵႃးႁဝ်းသေႇသေႇ ၵႃႈၼမ်ႉမၼ်းၵေႃႈဢမ်ႇပၼ် ၵွႆမႃးၵေႃႈႁဝ်းမေးၵူၺ်းလၢႆလၢႆ တၢင်းၵႂႃႇလူင်သူၵေႃႈ ၵႂႃႇၸွမ်းၸွၵ်ႉၸွမ်းၸဵင်ႇလၢႆလၢႆလူင်မေႃႉ တၢင်းလီၵေႃႈဢမ်ႇတွၼ်ႉၵႂႃႇသေပွၵ်ႈ ပေႃးႁေႃႈၵေႃႈႁေႈလွႆးလွႆးၵႃႈ”
တင်းဢဝ်ၵၢၵ်ႇသေႃးပၼ်ႁေ တင်းလၢတ်ႈၵႂႃႇ သင်ဢမ်ႇၸႂ်ႈလုၵ်ႈမၼ်းတႄႉၵေႃႈ ဢမ်ႇတၵ်းသဵင်ၵဝ်ႇၼၼ်ႉ ပေႃးပိူၼ်ႈမႃးယိမ်ၵေႃႈဢဝ်ပၼ်ၵႂႃႇႁဵတ်းၼၼ်ၵူၺ်း
“ပေႃးမၼ်းၵွႆၵေႃႈ လၢတ်ႈၶဝ်မႄးပၼ်ႁေလႄႈၼႃႈ ၸွင်ႇၶႅၼ်းလႆႈယွၼ်းငိုၼ်းပိူၼ်ႈမႃးလၢႆၵူၺ်းဢမ်ႇၸႂ်ႈမေႃႉ ဢဝ်ၵႂႃႇၵေႃႈမႂ်းယႃႇပၼ်ပိူၼ်ႈႁေႃႈ ပေႃးပဵၼ်ၵႃးႁဝ်းတႄႉႁဝ်းႁၵ်ႉဢိူဝ်ႈ ပေႃးပဵၼ်ပိူၼ်ႈတႄႉပိူၼ်ႈဢမ်ႇဝူၼ်ႉမိူၼ်ႁဝ်းမႂ်းႁူႉ”
“ၸၢႆးၵႂႃႇၵွၼ်ႇယဝ်ႉ”
“ႁေႃႈၵႃးမၼ်းဢွၵ်ႇၵႂႃႇတၢင်းပၢင်သဝ်းၶဝ်ၼၼ်ႉယဝ်ႉ”
ပဵၼ်သိုၵ်းၼႆၵေႃႈ ၶႅၼ်းမီးငိုၼ်းၼႃႇၵေႃႈဢမ်ႇၸႂ်ႈ ၵူၺ်းၵႃႈပေႃးဢမ်ႇၸႂ်ႈၶွင်ၶဝ်သမ်ႉ ဢမ်ႇပေႃးမေႃမီးၸႂ်ဢၢၼ်းၼႃႇပိူၼ်ႈသေ ၶီႇၵႃႈဝႃႈၵႃႈပဵၼ်ၼႃႇလႄႈ ပႃႇၸိင်ႇၵေႃႈၶႂ်ႈမေႃဢိမ်ႇမႃးယဝ်ႉ။
“မၢင်ပွၵ်ႈမႃးၵေႃႈ ၶႂ်ႈၶၢႆၵိၼ်ပႅတ်ႈႁေ တၢင်ႇလေႃႉၸိူင်ႉပၢၼ်ၵူႈပွၵ်ႈၵူၺ်းယဝ်ႉမႂ်း လိူဝ်ၸႂ်လိူဝ်ၶေႃးၼႃႇမေႃႉ”
ဝၼ်းႁိုင်မႃး သႅင်လိုၼ်းၵေႃႈ ၶၢၼ်ႉၼႃႇယဝ်ႉလႄႈ တႅပ်းမႆႉတၢင်းလင်ႁိူၼ်းၶဝ်ၼၼ်ႉသေ မႃးၸၵ်းႁဵတ်းတွၵ်ႇ တင်းၾူၼ်းမၼ်းၼၼ်ႉသေ တင်းႁဵတ်းတင်းဢုပ်ႇယူႇႁင်းမၼ်းၼႂ်းၾူၼ်းၼၼ်ႉယဝ်ႉ။ မၢင်ပွၵ်ႈၵေႃႈသၢၼ်သွင်း ဢႅပ်ႇၶဝ်ႈ၊ သၢၼ်ပဵတ်ႈ၊ သၢၼ်ၵူၺ်တႃႁၢင်ႇၸိူဝ်းၼႆႉ၊ ႁဵတ်းႁဵတ်းၵႂႃႇ မီးၵူၼ်းပၼ်ႁႅင်းမႃး မီးၵူၼ်းထၢမ်သိုဝ်ႉမႃးယဝ်ႉ ၵမ်ႈၽွင်ႈၵေႃႈ ႁႂ်ႈမၼ်းႁဵတ်းၸိူင်ႉၼၼ်ၸိူင်ႉၼႆလႄႈ သမ်ႉၵေႃႈႁဵတ်းၸွမ်းယူႇ။ ၵူၺ်းၵႃႈ မၼ်းၵေႃႈဢမ်ႇၼႄၼႃႈတႃလႄႈ လၢႆလၢႆၽႂ်ၵေႃႈဢမ်ႇႁူႉဝႃႈပဵၼ်မၼ်း ပေႃးပိူၼ်ႈတွင်းသဵင်တႄႉၶေးထၢင်ႇယူႇ။
ယူႇယူႇပီႈၸွမ်သူင်ႇသွင်ႉမၼ်းမႃးၼႄသေ
“သႅင်လိုၼ်း ၸွင်ႇၸႂ်ႈၼွင်ႉႁၼႆႉ”
“ဢမ်ႇၸႂ်ႈ ပဵၼ်မႄႈႁဝ်းၵူၺ်းဢေႃႈၼႆႉ”
“ဝႃႈလႄႇသဵင်ပေႉမိူၼ်ၼႆ”
“သဵင်တႄႉၶႃႈလၢတ်ႈပၼ်မၼ်းၵူၺ်းဢေႃႈၼၼ်ႉ”
“မႄႈၼွင်ႉႁမ်ႉပေႉတၼ်းလႃႇဢေႉ ဢမ်ႇၵႂႃႇသူၼ်ႁႃႉ”
“မၼ်းၵႂႃႇၵၢင်ၼႂ်ႁေ ၵၢင်ၶမ်ႈႁေၵူၺ်းႁိုဝ် ပေႃးၵၢင်ဝၼ်းသမ်ႉဢမ်ႇၸၢင်ႈႁဵတ်းႁင်လႄႇ”
“ယႃႇမႃးလႅၼ်ယူႇလႃႈ ႁူႉယူႇဝႃႈပဵၼ်ၼွင်ႉ မႄႈၼွင်ႉလၢတ်ႈၼႄပီႈမူတ်းယဝ်ႈ”
“တၼ်းၵပ်းသိုပ်ႇတင်းမႄႈႁဝ်းႁေၵႃႈ”
“မိူဝ်ႈမႃးၶႆႈၼွင်ႉပွၵ်ႈပူၼ်ႉၼၼ်ႉၼႃႇ ၸွင်ႇတေမႃးၶိုၼ်းႁ ပီႈၵေႃႈဝႃႈတေဢွၵ်ႇယဝ်ႉဢိူဝ်ႈ”
“ႁဵတ်းသင်လႃႇ..”
“ၸဵမ်မိူဝ်ႈၼၼ်ႉ မေးပီႈၵေႃႈ..ဢမ်ႇပေႃးၶႂ်ႈႁႂ်ႈႁဵတ်းယဝ်ႉ ပီႈဝႃႈပေႃးၼွင်ႉမႃးၶိုၼ်းတႄႉ ပီႈတေပႆႇဢွၵ်ႇၵေႃႈပဵၼ်လႆႈ”
“ယူႇတီႈပီႈၵူၺ်း ယႃႇပေဢဝ်ၶႃႈဝႃႈလႄႈ ၶႃႈတႄႉတူဝ်ၵေႃႉလဵဝ်ၸိူင်ႉႁိုဝ်ၵေႃႈလႆႈယဝ်ႉ ပီႈၼၼ်ႉၵူၺ်းဢိူဝ်ႈတင်းၼႃႈႁိူၼ်းႁေ ပေႃးပဵၼ်သင်မႃး ၸွင်ႇပိုၼ်ႈသမ်ႉတေတူၺ်းပၼ်ၼႃႈႁိူၼ်းႁဝ်းၵေႃႈဢမ်ႇၸႂ်ႈ”
“ၵေႃႈၸႂ်ႈယူႇၵူၺ်း ထႅင်ႈၽၢႆႇၼိုင်ႈၵေႃႈ သမ်ႉပႆႇၶႂ်ႈပွႆႇၵၢၼ်ၼႆႉၼၼ်ႉၼႃႇ”
“ဝူၼ်ႉတူၺ်းလီလီၼၼ်ႉၼႃႇ ပဵၼ်သင်မႃးၵေႃႈ ၵူၼ်းတီႈႁိူၼ်းၵူၺ်းလူး ဢၼ်တူၺ်းထိုင်ႁဝ်း ႁဵတ်းၵၢၼ်ယၢပ်ႇၽိုတ်ႇမႃးၼၼ်ႉ ၽႂ်ဢမ်ႇတူၺ်းႁၼ်မၼ်းသေဢိတ်းၵွၼ်ႇလႃႈ ပေႃးလၢတ်ႈၵေႃႈ ၶႃႈၶႂ်ႈၸိူမ်ႈယဝ်ႉဝႃႈ”
“ၼွင်ႉတေဢမ်ႇမႃးၶိုၼ်းယဝ်ႉၼႄႇ”
“ၶႃႈၵေႃႈဢမ်ႇႁူႉယဝ်ႉမိူၼ်ၵၼ် တၢင်းၼႆႉၵေႃႈ ႁဵတ်းၵၢၼ်ဢမ်ႇၶဝ်ႈတီႈၶဝ်ႈတၢင်းသင်သေလွင်ႈ”
“သၢၼ်ၵူၺ်သၢၼ်သွင်းၵေႃႈဢမ်ႇလႆႈၶၢႆၼႄႇ”
“ၼႆႉ…” မၼ်းၵေႃႈဢဝ်ၾူၼ်းမၼ်းထႆႇၼႄၵႂႃႇ”မႄႈႁဝ်းၵူၺ်းယဝ်ႉ ပေႃးမၼ်းႁၼ်ၵွင်ၸိူဝ်းၼၼ်ႉၵေႃႈပွင်ႉၶႃႈတင်းဝၼ်းတင်းဝၼ်းယဝ်ႉ”
“မၢင်ပွၵ်ႈၵေႃႈ မိူၼ်လႆႈၶိုၼ်းတႄႇမႂ်ႇၵူႈလွင်ႈၼၼ်ႉယဝ်ႉ”
“ပီမႂ်ႇၼႆႉဢမ်ႇမႃးလႄႇတၢင်းၼႆႉၼႄႇ”
“ၶႅပ်းႁၢင်ႈပီႈမီးတေႉယူႇႁႃႉ”
“မီးဢိူဝ်ႈ မႃးတူၺ်းဢဝ်ၵူၺ်းလႄႈ”
“သူင်ႇမႃးၼႄဢိၼ်ႉလူး ပေႃးၶႂ်ႈႁႂ်ႈၼွင်ႉယိင်းလႆႈၽူဝ်ယူႇၵေႃႈ”
“တေဢၢၼ်းဢဝ်သိုၵ်းတေႉၵႃႈ ဢမ်ႇတေႃႇတေႃႇတေၺႃးၵၼ်ယူဝ်ႉ ယူဝ်ၶေးပိူၼ်ႈမီးမေးယဝ်ႉတင်းဢမ်ႇႁူႉ”
“ယႃႇဝႃႈႁင်းၵၼ်တိၵ်းတိၵ်းလူး ပဵၼ်ၵူၼ်းၵေႃႈမေႃၸဵပ်းယူႇဢိူဝ်ႈ… ၶႃႈၶႂ်ႈႁူႉဝႃႈမၼ်းၸွင်ႇၸႂ်ႈၵူၼ်းၵေႃႉဢၼ်ၶႃႈႁူႉၸၵ်းၼႆၵူၺ်း ႁဵတ်းႁင်လႄႈမၼ်းပေႉလီတေႃႇၶႃႈၼႆၼၼ်ႉၼႃႇ”
“ပေႃးဝႃႈၼႆၵေႃႈၶႅၼ်းဢိၼ်ႉ”
ယူႇယူႇ ၶေႃႈၵႂၢမ်းၶဝ်ႈမႃးတင်းဢီးမေးလ်၊ သႅင်လိုၼ်းၶဝ်ႈတူၺ်းယဝ်ႉ
“ၵူၼ်းၼမ်ၵျႃႉလႃႇ ပဵၼ်ၵေႃႉလႂ်ၽႂ်တေႁဵတ်းႁိုဝ်ႁူႉၼႆႉ သႂ်ႇၶူဝ်းလမ်မိူၼ်ၵၼ်မူတ်း”
“ပီႈဝႃႈယူႇယဝ်ႉ ပီႈၵေႃႈဢမ်ႇႁူႉ ႁႃတူၺ်းလႄႈ တူဝ်ၶဝ်တႄႉဢမ်ႇမိူၼ်ၵၼ်ၵွၼ်ႇ”
သႅင်လိုၼ်းၵေႃႈ သုမ်းၶဝ်ႈသုမ်းဢွၵ်ႇၵေႃႉၼိုင်ႈယဝ်ႉၵေႃႉၼိုင်ႈ ၸင်ႇႁၼ်မႅၼ်ႈၺႃးၵူၼ်းၵေႃႉၼိုင်ႈ တူဝ်ၶိင်းႁၢင်ႈၶႂ်ႈငၢႆးၵၼ် ဝူၼ်ႉႁၼ်ၶိုၼ်းၵူၼ်းၵေႃႉၼုင်ႈၶူဝ်းသိုၵ်းဝၼ်းၼၼ်ႉသေ
“ၶႃႈဝၢင်းၵွၼ်ႇၼႃႈ ၸွင်ႇၵွႆႈဢုပ်ႇၵၼ်ထႅင်ႈ”
“ဢူဝ်ႇၶေႇ”
မၼ်းၵေႃႈ လႅၼ်ႈလူင်ၵႂႃႇတၢင်းႁိူၼ်းပႃႈၸိင်ႇၶဝ်ၼၼ်ႉယဝ်ႉ၊ ၵႂႃႇႁၼ်ၸိုၼ်ႈမိူင်း ၸုၵ်းထွၼ်းငိုၼ်းပိူၼ်ႈယူႇသေ မၼ်းၵႂႃႇယူႇၼႂ်းၸွၵ်ႉယဝ်ႉ ဢဝ်ထူင်ၶဝ်ႈမုၼ်းႁႄႉဝႆႉၼႃႈသေ ႁႂ်ႈႁၼ်ႁူၺ်ႇတႃမၼ်းၵူၺ်းလႄႈ တူၺ်းၸိုၼ်ႈမိူင်းယဝ်ႉ ၶိုၼ်းတူၺ်းၵူၼ်းၼႂ်းၶႅပ်းႁၢင်ႈၼၼ်ႉသေ ဝူၼ်ႉတူၺ်းၶိုၼ်း တႃၵူၼ်းၵေႃႉဢၼ်မၼ်းႁၼ်ၶမ်ႈၼၼ်ႉ ၼင်ႇႁၢင်ႈၶႂ်ႈငၢႆးငၢႆးၵၼ်ဝႆႉယူႇ ၵူၺ်းသမ်ႉဢမ်ႇယုမ်ႇၸႂ်လႆႈၼၼ်ႉယဝ်ႉ။
