ပီႈၸွမ်ဢၼ်ယူႇၼႂ်းၵႃးသေ ထွမ်ႇသဵင်ယူႇၼၼ်ႉ ယူႇယူႇၵေႃႈမီးၵႃးလူင်လင်မႃး ဢမ်ႇတၼ်းႁေႃႈၵႃးပၢႆႈ ၵူၺ်းတၼ်းပိုတ်ႇၽၵ်းတူသေ ဝႅၼ်ၵျွၵ်းဢွၵ်ႇၵႂႃႇၼွၵ်ႈတၢင်းၼၼ်ႉလႄႈ ၵူၼ်းၼိူဝ်ၵႃးၼၼ်ႉၵေႃႈ လူင်းၵႃးသေ လႅၼ်ႈလမ်းၸွမ်းမၼ်းၵႂႃႇ မၼ်းၵေႃႈလႅၼ်ႈၶဝ်ႈၸွၵ်ႉၶဝ်ႈၸဵင်ႇ လႅၼ်ႈၶဝ်ႈယုမ်းၶဝ်ႈယွမ်ႇသေ မိူဝ်ႈမီးယူႇၼႂ်းထိူၼ်ႇယဝ်ႉၼႆၵေႃႈ ၶဝ်ယိုဝ်းၵွင်ႈသႂ်ႇပၼ်မၼ်း ၵႃႈဝႃႈၵႃႈပဵၼ်ယဝ်ႉ။
ၵူၺ်းၵႃႈ လႆႈႁၼ်မုၵ်ႉၾႆးၵေႃႇလုၵ်ႉႁုၼ်ႈႁုၼ်ႈယူႇၸွမ်းထိူၼ်ႇၼၼ်ႉ မီးၶဝ်သွင်ၵေႃႉၵူၺ်းၼႆသေ ထွႆလင်ၵႂႃႇၶိုၼ်းယဝ်ႉ။
ပီႈၸွမ်ၼၼ်ႉၵေႃႈ ဢမ်ႇႁူႉပဵၼ်ၵူၼ်းလီႁိုဝ်ဢမ်ႇလီယဝ်ႉ မွင်းဝႃႈႁၼ်ၵူၼ်းၵူၺ်း ယွၼ်းတၢင်းၸွႆႈထႅမ်ပိူၼ်ႈၵမ်းလဵဝ်။ မိူဝ်ႈဝႃႈမၼ်းႁၼ်ၵွင်ႈၼႆၵေႃႈ သမ်ႉပေႃးလူမ်ႉလူင်ၵႂႃႇ ပိူၼ်ႈပေႃးလႆႈၽႃၽိူဝ်းဢဝ်မၼ်းၶဝ်ႈၵႂႃႇၼႂ်းပၢင်ပိူၼ်ႈၼၼ်ႉယဝ်ႉ။
သႅင်လိုၼ်းၼၼ်ႉၵေႃႈ ဢမ်ႇႁူႉယူႇႁိုင်ၵႃႈႁိုဝ် ပိူၼ်ႈဢဝ်ၶဝ်ႈဢဝ်ၼမ်ႉသႂ်ႇဢၢင်ႇသေ မႃးတမ်းပၼ်ၵႂႃႇၸိူင်ႉၼၼ်ၵူၺ်းလႄႈ ပေႃးၶႂ်ႈၵိၼ်ၼႆၵေႃႈ ဢဝ်ၼႃႈၵူမ်ႈၵိၼ်ၼင်ႇမႃၼၼ်ႉယဝ်ႉ၊ တွင်ႉမႆႈယူႇၵေႃႈၵိၼ်ဢမ်ႇလူင်းလႆႈသေဢိတ်း။
ထူင်ဢၼ်မၼ်းပႃးမႃးၼၼ်ႉၵေႃႈ ပိူၼ်ႈဢဝ်ဝႆႉမူတ်းယဝ်ႉ ၾူၼ်းၵေႃႈဢမ်ႇမီး ၵိုတ်းၶူဝ်းၸပ်းတူဝ်ၵူၺ်းလႄႈ လိူၵ်ႈလိူၵ်ႈမၢၼ်ႇတႃဢၼ်မၼ်းသႂ်ႇဝႆႉတီႈထွင်းသိူဝ်ႈမၼ်းၼၼ်ႉဢမ်ႇတူၵ်းပႅတ်ႈ ႁဵတ်းႁႂ်ႈမၼ်းတူၵ်းသေ ဢဝ်မၢၼ်ႇလႅဝ်ယဝ်ႉၵေႃႈ ယိပ်းၶၼ်ႇၸိူၵ်ႈၼၼ်ႉယူႇတိၵ်းတိၵ်းၵူၺ်း။ သမ်ႉ
ဝႃႈၸိူၵ်ႈၼၼ်ႉလုတ်ႈမိုဝ်းၵႂႃႇသေတႃႉ မၼ်းၵေႃႈဢမ်ႇဢဝ်ဢွၵ်ႇ ယွၼ်ႉမီးယူႇၼႂ်းၶွၵ်ႈၶင်ၼၼ်ႉၵူၺ်းလူး။
ပီႈၸွမ်ၵေႃႈ ႁူႉတူဝ်မႃးၶိုၼ်း ႁၼ်ၵူၼ်းၼုင်ႈသိူဝ်ႈၶူဝ်းလမ် ပူၵ်ႉၼႃႈပူၵ်ႉတႃသေၼႆၵေႃႈ ႁဵတ်းၵႅင်ႈဢမ်ႇႁူႉတူဝ်ဝႆႉသေ ထွမ်ႇၶဝ်ဢုပ်ႇၵၼ်ယူႇ၊ ၵူၺ်းသမ်ႉပဵၼ်ၵႂၢမ်းတႆးၵူၺ်းလႄႈ လွမ်လွမ်တူၺ်းၵူၼ်းပႂ်ႉယူႇၼွၵ်ႈသုမ်ႉၼၼ်ႉ ႁၼ်တသိၵ်ႈသိူဝ်ႈၶဝ် ပဵၼ်သိုၵ်းတႆးၼႆၵေႃႈ ၼႅတ်ႈၽုၼ်ႇၽၢၼ်ႇလုၵ်ႉမႃးသေ။
“ၸွႆႈဢိတ်ႉၼိုင်ႈၶႃႈ”
“မီးလွင်ႈသင်ၶႃႈ ယူဝ်ဝႃႈသူတေဢမ်ႇတိုၼ်ႇယဝ်ႉဢေႃႈၼႆႉ”
“ၼွင်ႉယိင်းၶႃႈထုၵ်ႇလၵ်ႉတူဝ်ၵႂႃႇဢေႃႈ ၶႃႈႁၼ်တီႈမၼ်းယူႇ ၶႃႈပဵၼ်ၽူႈဢဝ်ၶၢဝ်ႇဢေႃႈ” ဢဝ်ပၢႆႉၸိုဝ်ႈပုၼ်ႈၽွၼ်းမၼ်းၼႄၵႂႃႇယဝ်ႉ။
“ပဵၼ်ၸိူင်ႉႁိုဝ်ၶႃႈ”
မၼ်းၵေႃႈၸၼ်ႁၢင်ႈၼႄ တီႈဢၼ်မၼ်းတွင်းၸိူဝ်းၼၼ်ႉပၼ်ၶဝ်ၵႂႃႇ၊ ယဝ်ႉၵေႃႈ ဢဝ်ၶႅပ်းႁၢင်ႈၸိူဝ်းမၼ်းထႆႇဝႆႉၼၼ်ႉလႄႈတင်းသဵင်သႅင်လိုၼ်း ၼႄၶဝ်ၵႂႃႇ။
ၵူၼ်းသွင်ၵေႃႉ ဢၼ်လမ်းပီႈၸွမ်မႃးၼၼ်ႉၼႆၵေႃႈ လႆႈႁၼ်လႅပ်ႈပဵၼ်ၸုမ်းသိုၵ်းသေၸုမ်းၸုမ်းဝႆႉလႄႈ တီႈယူႇၶဝ်ၼၼ်ႉဢမ်ႇလႅပ်ႈတေမီးလွင်ႈႁူမ်ႇလူမ်ႈၼႆၵေႃႈ မိူဝ်းပွင်ႇႁူဝ်ၼႃႈၶဝ်ၵမ်းလဵဝ်ယဝ်ႉ။
သႅင်လိုၼ်း ႁူမ်ႈတင်းၽူႈယိင်းလႄႈလုၵ်ႈဢွၼ်ႇယိင်းၸိူဝ်းၼၼ်ႉၵေႃႈ လႆႈထုၵ်ႇၵူၼ်းၸိူဝ်းၼၼ်ႉ ႁွင်ႉၶိုၼ်ႈၵႃးတၢင်းလင်ဢၼ်ပဵၼ်တိူၵ်ႈလူင်ၼၼ်ႉသေ ပိၵ်ႉၶႅမ်ႉၶႅမ်ႉယဝ်ႉဢွၵ်ႇၵႃးၵႂႃႇ ဢမ်ႇႁူႉၵႂႃႇလႂ်ထိုင်လႂ်၊ ၵူၺ်းႁူႉဝႃႈ ထူၺ်ႈၸႂ်ယူႇၵေႃႈမိူၼ်တေတၢႆယဝ်ႉ။
ၸုမ်းသိုၵ်းတႆးၶဝ်ၵေႃႈ မိူဝ်ႈႁူႉလွင်ႈႁူႉတၢင်းယဝ်ႉ ဢွၼ်ၵၼ်မႃးငွႆးတူၺ်းသေ ပီႈၸွမ်ၵေႃႉၵႂႃႇတွႆႇၽၵ်းတူယဝ်ႉ ၵူၺ်းၵႃႈဢမ်ႇလႆႈႁၼ်ၽႂ်ဢွၵ်ႇမႃး ၽၵ်းတူၼၼ်ႉသမ်ႉဢမ်ႇလႆႈလွၵ်ႉဝႆႉလႄႈ ၵူၼ်းဢၼ်ယူႇဢမ်ႇၸမ်ဢမ်ႇၵႆပီႈၸွမ်ၼၼ်ႉ မိူၼ်လႆႈငိၼ်းသဵင်မၢၵ်ႇဝႆႉသေ ႁႂ်ႈပီႈၸွမ်ထွႆဢွၵ်ႇယဝ်ႉ ႁႂ်ႈၵူၼ်းၶဝ်ထွႆတင်းမူတ်း မၢၵ်ႇတႅၵ်ႇမႃးၵမ်းလဵဝ် ႁိူၼ်းၵေႃႈလႅဝ်ၽွင်ၵႂႃႇမူတ်းယဝ်ႉ။
ၵႂႃႇဢမ်ႇပေႃးႁိုင် ပိူၼ်ႈၵေႃႈႁႂ်ႈၶဝ်လူင်းၵႃးသေ ၶိုၼ်းၶဝ်ႈၵႂႃႇယူႇ ၼႂ်းဝၢင်းႁိူၼ်းလူင်ထႅင်ႈတီႈၼိုင်ႈ ၶဝ်ႈၵႂႃႇၼႂ်းႁွင်ႈတႂ်ႈလိၼ်သေ ႁၼ်ၵူၼ်းၵွင်ယူႇတီႈၼၼ်ႈထႅင်ႈယဝ်ႉ ၶဝ်ႈၵႂႃႇယူႇၼႂ်းၶွၵ်ႈၶင်ၼၼ်ႉၵေႃႈ ၶဝ်လွၵ်ႉသေႃးပႅတ်ႈ မီးၵူၼ်းပႂ်ႉဝႆႉယူႇသွင်ၵေႃႉၼႃႈႁွင်ႈၶင်ၼၼ်ႉ။
ၵူၼ်းသိုၵ်းၶဝ်ၵေႃႈ ပွင်ႇၶၢဝ်ႇပၼ်ၵူၼ်းၶဝ် ႁႂ်ႈပႂ်ႉၵူတ်ႇထတ်းၵႃးလူင်ၵူႈလမ်း ဢမ်ႇဝႃႈတၢင်းၵႃးႁိုဝ်တၢင်းထိူၼ်ႇတၢင်းလိၼ်ၵေႃႈယဝ်ႉ။
ႁဵတ်းၵၢၼ်မိူင်းသမ်ႉပေႃးလႅင်းၵေႃႈ ဢမ်ႇမီးသင်ၶိုပ်ႈၼႃႈမႃး။
ၸင်ႇတေဢဝ်တရူၼ်းဢွၼ်ႇၶဝ်ၸွပ်ႇသွၵ်ႈႁႃတူၺ်း ဢမ်ႇႁၼ်တီႈလၢၵ်ႇလၢႆးသင်၊ ယၢမ်းၵၢင်ဝၼ်းၵေႃႈပွႆႇၵူၼ်းၶဝ်ႈၸွပ်ႇတူၺ်းၸွမ်းၼႂ်းဝဵင်းၼွၵ်ႈဝဵင်း ၵမ်ႈၼမ်ပၵ်းတူၺ်းၸွမ်းတီႈမီးၵႃးလူင်ၼၼ်ႉယဝ်ႉ။
သႅင်လိုၼ်းယူႇၼႂ်းၼၼ်ႉ ဢမ်ႇႁၼ်လိူၼ်ႁၼ်လႅင်း ဢမ်ႇႁူႉဝၼ်းႁူႉၶိုၼ်း ဢမ်ႇၵိၼ်ၶဝ်ႈၵိၼ်ၼမ်ႉသင် သမ်ႉပေႃးဢူၼ်ႈလူင်ဝႆႉယဝ်ႉ။
“မီးၶွင်တေဢွၵ်ႇမိူဝ်ႈၼႆႉသီႇၵေႃႉ”
သဵင်ၵူၼ်းမႃးလၢတ်ႈၵူၼ်းပႂ်ႉယၢမ်းသေ ၵူၼ်းပႂ်ႉယၢမ်းၵေႃႈလိူၵ်ႈဢဝ်သႅင်လိုၼ်းလႄႈ ၽူႈယိင်းထႅင်ႈသီႇၵေႃႉ ၶိုၼ်ႈၵႃးဢွၵ်ႇၵႂႃႇယဝ်ႉ။
ၶဝ်ၵေႃႈ ၸႅၵ်ႇၽႄပႂ်ႉတူၺ်းငဝ်းလၢႆးၵႂႃႇႁင်းၽႂ်ႁင်းမၼ်း၊ ၸွမ်းၼင်ႇပုၼ်ႈၽွၼ်းမီးၼၼ်ႉသေ လၢႆဝၼ်းယဝ်ႉၸင်ႇၾၢင်ႉႁၼ်မႅၼ်ႈၵႃးလူင်လမ်းသွင်လမ်း ၵႆႉၵႆႉၶဝ်ႈဢွၵ်ႇ တီႈႁိူၼ်းတိူၵ်ႈလင်ၼိုင်ႈ ဢၼ်မီးယူႇဢမ်ႇၸမ်ဢမ်ႇၵႆလႅၼ်ဝဵင်းၼၼ်ႉလႄႈ ပီႈၸွမ်ၵေႃႈ ပွမ်ႁဵတ်းၽူႈယိင်းသေယဝ်ႉပႆၵႂႃႇၸွမ်းၼၼ်ႉ တေႉဢမ်ႇတေႉ ၶဝ်ၵေႃႈမႃးၺွပ်းမၼ်းၵႂႃႇ ၸုမ်းၶဝ်ၵေႃႈဝႅတ်ႉလွမ်ႉတီႉဢဝ်ၵူၼ်းၸိူဝ်းၼၼ်ႉသေ မတ်ႉၸွၵ်းၸွပ်ႇထၢမ်ၵူၼ်းၸိူဝ်းၼၼ်ႉ လႆႈႁူႉတီႈႁူႉတၢင်းမူတ်းယဝ်ႉၼႆၵေႃႈ။ ပွမ်တူဝ်ႁေႃႈၵႃးၶဝ်ႈၵႂႃႇၶိုၼ်း မွင်းဝႃႈပိုတ်ႇၽၵ်းတူၵူၺ်း ၵူၼ်းသိုၵ်းၶဝ်လႆဢွၵ်ႇဝႅတ်ႉလွမ်ႉၵူၼ်းတီႈႁိူၼ်းၼၼ်ႉ ဢမ်ႇၸၢင်ႈတူင်ႉတူဝ်လႆႈယဝ်ႉလႄႈ။ သိုပ်ႇလမ်းၶဝ်ႈသွၵ်ႈတဝ်ၼႂ်းႁိူၼ်းတီႈၼိုင်ႈတၢင်းၼိုင်ႈ ထူပ်းႁၼ်ၶူဝ်းၶွင်ၽိတ်းမၢႆမီႈတင်းၼမ် ႁူမ်ႈပႃး လုၵ်ႈဢွၼ်ႇၽူႈယိင်းၼင်ႈပေႃးသႅမ်းလူင်ဝႆႉ။ ၵူၺ်းၵႃႈ သႅင်လိုၼ်းသမ်ႉႁၢႆၵႂႃႇ ၽူႈယိင်းဢွၼ်ႇၸိူဝ်းၼၼ်ႉၵေႃႈလၢတ်ႈဝႃႈ မီးၵူၼ်းထုၵ်ႇၺွပ်းၵႂႃႇထႅင်ႈၼႆသေ ၶဝ်ၵေႃႈသိုပ်ႇၸွမ်းသွၵ်ႈႁႃပေႃးတူဝ်ႈႁိူၼ်းၵေႃႈဢမ်ႇႁၼ်ယဝ်ႉ။
ၸုမ်းသိုၵ်းၶဝ်ၵေႃႈမႃးႁုပ်ႈသိမ်းဢွင်ႈတီႈၼၼ်ႈ သဵင်ၵွင်ႈလင်
မေႃးယူႇၵႅပ်ႉၼိုင်ႈၵေႃႈယိုတ်းသိမ်းလႆႈမူတ်းယဝ်ႉ။
သႅင်လိုၼ်းလႄႈ ၵူၼ်းယိင်းထႅင်ႈသၢမ်ၵေႃႉၵေႃႈ ထုၵ်ႇႁွင်ႉတူဝ်ၶိုၼ်ႈၵႃးၵႂႃႇထႅင်ႈ ဢမ်ႇၸႂ်ႈၵႃးလူင်ယဝ်ႉလႄႈ ႁဵတ်းမိူၼ်ပဵၼ်ၵႃးလႄႇသေ ပူၼ်ႉၵႂႃႇပူၼ်ႉၵႂႃႇၸွမ်းၵိၵ်ႉၸွမ်းလၢၼ်ႇၵေႃႈ ပိူၼ်ႈဢမ်ႇႁႄႉဢမ်ႇထၢမ်သင်ယဝ်ႉ။ ၵူၼ်းၶဝ်ဢမ်ႇပေႃးပႃးမႃးၼမ် ဝႆႉတၢင်းလင်သွင်ၵေႃႉ တင်းၼႃႈသွင်ၵေႃႉ ပႃးၵူၼ်းႁေႃႈၵႃး။
ၶမ်ႈလိုၵ်းတၢၼ်ႇတၢၼ်ႇ ၵူၼ်းႁေႃႈၵႃးလူင်းယဵဝ်ႈၼႆသေ သႅင်လိုၼ်းၶဝ်ဢၼ်ႁဵတ်းၵႅင်ႈလပ်းယူႇၼၼ်ႉ ဢဝ်ၸိူၵ်ႈဢၼ်မၼ်းလိတ်ႈလႆႈႁိုင်ယဝ်ႉ ဢဝ်ဢွၵ်ႇမိုဝ်းသေ ႁတ်ႉသႂ်ႇၶေႃးၵူၼ်းၼင်ႈတၢင်းၼႃႈယဝ်ႉ ႁႂ်ႈၶဝ်သၢမ်ၵေႃႉၼၼ်ႉၸွႆႈၸၼ်ၵိုၵ်းဝႆႉတင်ႇၼင်ႈၼၼ်ႉသေ မၼ်းၵေႃႈပိၵ်ႉၽၵ်းတူၵႃးယဝ်ႉ ႁေႃႈဢွၵ်ႇၵႂႃႇပႅတ်ႈၶဝ်။
ၵူၼ်းဢၼ်ယူႇၽၢႆႇလင်ၼၼ်ႉၵေႃႈ ဢမ်ႇလူင်းၸွမ်းလႄႈ မၼ်းၵေႃႈႁေႃႈၵႂႃႇၵႃႈဝႃႈၵႃႈပဵၼ်ယဝ်ႉ ၵူၺ်ႉႁူဝ်ၵႃးမိူဝ်းၶိုၼ်းယူႇ၊ သမ်ႉဝႃႈၵူၼ်းၵေႃႉၼၼ်ႉတေထုၵ်ႇႁတ်ႉၶေႃးဝႆႉယဝ်ႉသေတႃႉ မိုဝ်းမၼ်းတႄႉတိုၵ်ႉၸွမ်းႁၢမ်ႈသႅင်လိုၼ်းလႆႈယူႇ။
ႁႅင်းမၼ်းၼၼ်ႉသမ်ႉၼမ်ၼႃႇလႄႈ ႁႅင်းၽူႈယိင်းဢၼ်ဢူၼ်ႈဢွၼ်ႇ ဢမ်ႇမီးႁႅင်းသင်ၼၼ်ႉၵေႃႈဢမ်ႇၶႂ်ႈပေႉမၼ်းလႆႈယဝ်ႉ၊ ၵူၺ်းၵႃႈတႃႇလွတ်ႈတၢႆၼၼ်ႉတႄႉ ဢမ်ႇၵူဝ်သင်ယဝ်ႉ သႅင်လိုၼ်းႁၼ်ၵႃးမႃးၼႆၵေႃႈ ၼႅတ်ႈႁေႃႈတတ်းၼႃႈၵႂႃႇၵမ်းလဵဝ်။
“တၢႆၵေႃႈယဝ်ႉလႃႈ ပေႃးတေလႆႈယူႇမိူၼ်ၼႆယူႇတႄႉ”
ၵႃးၼၼ်ႉသမ်ႉၶုၼ်ႇၵိုတ်းဢဝ်ပလိၵ်ႈမၼ်းလႆႈလႄႈ ၵူၼ်းသွင်ၵေႃႉၼႅတ်ႈလူင်းၵႃးမႃး ၵူၼ်းၼႂ်းၵႃးလမ်းၼၼ်ႉၵေႃႈ ဢွၼ်ၵၼ်ဢွၵ်ႇမႃးတူၺ်း ပဵၼ်ၸုမ်းဢၼ်ၶဝ်ၸွမ်းၶႆႈႁႃ သႅင်လိုၼ်းၶဝ်လႄႈ ၵူၼ်းသွင်ၵေႃႉၼၼ်ႉၵေႃႈ ထုၵ်ႇယိုဝ်းမၢတ်ႇၸဵပ်းၵႂႃႇတီႈၼၼ်ႈသေ သႅင်လိုၼ်းၼၼ်ႉၵေႃႈ ထုၵ်ႇဢဝ်ၵွင်ႈငႃႁူဝ်ဝႆႉယူႇယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
