လွင်ႈတူင်ႉတၵ်ႉၵၼ် လႆႈႁၼ်တၢင်းယုမ်ႉဢွၼ်ႇၵူၺ်းၵေႃႈ ႁဵတ်းႁႂ်ႈၵူၼ်းၵေႃႉၼိုင်ႈ လႆႈသိူဝ်းၸႂ်ၸွမ်းယဝ်ႉ။
“ႁဝ်းဢမ်ႇထၢင်ႇဝႃႈသူတေမေႃယုမ်ႉၸိူင်ႉၼႆ”
“ႁဝ်းယၢမ်ႈယုမ်ႉမႃးတႃႇသေႇ ထိုင်တီႈတၢင်းယုမ်ႉႁဝ်းၼၼ်ႉႁဵတ်းႁၢႆႉႁဝ်းၶိုၼ်းဢိူဝ်ႈ”
“သူတေတုၵ်ႉၸႂ်ၵႃႈႁိုဝ်ၼေႃ..”
“ႁဝ်းၵေႃႈဢမ်ႇႁူႉမိူၼ်ၵၼ် ယၢမ်ႈၵႂႃႇယဝ်ႉ”
“ၼႃႈတူႇၸိူင်ႉၼႆ ဢမ်ႇဝူၼ်ႉဝႃႈပိူၼ်ႈတေလီၵူဝ်ၽွင်ႈႁိုဝ်”
“သူၵေႃႈၵူဝ်ယူႇၼႄႇ”
“ဢိုမ်ႈ..မိူဝ်ႈတႄႇတႄႉၵေႃႈၵူဝ်ယူႇ ၵူၺ်းၵႃႈ.. မိူဝ်ႈလဵဝ်တႄႉ ႁဝ်းဝႃႈ သူလီႁၵ်ႉ”
သမ်ႉပေႃးဢဝ်သၢႆတႃၸိုၼ်ႈမိူင်း မိုင်ယၵ်ႉတူၺ်း သႅင်လိုၼ်း ၵမ်းလဵဝ် သႅင်လိုၼ်းဢမ်ႇၶၢမ်ႇလႆႈသေဝၢႆႇၼႃႈပၢႆႈပႅတ်ႈမၼ်းၵႂႃႇ။
“ႁဝ်းမိူဝ်းႁိူၼ်းၵွၼ်ႇယဝ်ႉၼႃႈ ၵူဝ်မႄႈႁဝ်းမွင်းႁိုင်”
ၸိုၼ်ႈမိူင်း ၵမ်ႁၢဝ်ႉဢဝ်ၶႅၼ်သႅင်လိုၼ်းဝႆႉသေ “ၵမ်ႉၵွၼ်ႇလႄႈ သူလိုမ်းငိုၼ်းဢၢၼ်း”
သႅင်လိုၼ်းၼႅတ်ႈၸၵ်ႉဢဝ်ယဝ်ႉ လႅၼ်ႈလူင်ဢွၵ်ႇသႅင်ႇပႃႈၸိင်ႇမႄႈၸိုၼ်ႈမိူင်းၶဝ်ၼၼ်ႉသေ ပူၼ်ႉၽၵ်းတူ ၵႂႃႇၵေႃႈ ယုမ်ႉၸူမ်းသိူဝ်းၵျွၵ်းႁူင်ၵျွၵ်းႁွင်လူင်မိူဝ်း။ ၸိုၼ်ႈမိူင်း ၶျွင်းတူၺ်းမၼ်းသေယုမ်ႉယူႇၸုတ်းၵုတ်း။
သႅင်လိုၼ်းၵႂႃႇႁဵတ်းၵၢၼ်ယူႇၼႂ်းဝဵင်းလူင် ၼပ်ႉႁူဝ်ပီႁူဝ်လိူၼ် ႁိုင်ႁိုင်ၼၢၼ်းၼၢၼ်းၸင်ႇမႃးလႄႇႁိူၼ်း တီႈဝၢၼ်ႈၼွၵ်ႈဢွၼ်ႇၶဝ် ၸူဝ်ႈၵႅပ်ႉၸူဝ်ႈၵမ်းသေၵႂႃႇၶိုၼ်း၊ ၵူၺ်းၵႃႈ ပွၵ်ႈၼႆႉ ၸဵမ်မိူဝ်ႈႁူဝ်ႁိုဝ်ႉတေႃႇထိုင် ၶၢဝ်းပၢတ်ႇၶဝ်ႈ ဢဝ်ၶဝ်ႈဢဝ်ၼမ်ႉယဝ်ႉၵေႃႈ ဢမ်ႇပႆႇႁၼ်ဝႃႈမၼ်းတေၵႂႃႇၶိုၼ်း။
မိူဝ်ႈတိုၵ်ႉမိူဝ်းၸွမ်းတၢင်းယူႇၼၼ်ႉ
“မႂ်းတေၵႂႃႇၶိုၼ်းမိူဝ်ႈလႂ်လႃႇ”
“ၶႂ်ႈၵႂႃႇမိူဝ်ႈလႂ်ၸင်ႇမိူဝ်ႈၼၼ်ႉၶႃႈၵႂႃႈ”
“ဢမ်ႇလူဝ်ႇႁဵတ်းယဝ်ႉႁၵၢၼ်မႂ်း ႁၢင်ႈမိူဝ်ႈလႂ်ၵေႃႈဢမ်ႇတၼ်းသေႇသေႇ မိူဝ်ႈလဵဝ်သမ်ႉမႃးယူႇလၢႆၵိၼ်လူင်တီႈႁိူၼ်းၼႆႉၵူၺ်း”
“ယူႇလၢႆၵေႃႈဢမ်ႇၵိၼ်လူင်ၵဝ်ႇပႃႈၵေႃႈ”
“ၸႂ်ႈဢိူဝ်ႈ ဢမ်ႇၵႂႃႇႁေ ႁဵတ်းသူၼ်ၸွႆႈဢူႈသူမႄႈသူတီႈႁိူၼ်းၼႆႉႁေယဝ်ႉၼႃႇမႂ်းၵေႃႈ”
“ၶႃႈၵေႃႈၶႂ်ႈဝႃႈၼၼ်ယူႇဢေႃႈၼႆႉ”
“ႁဵတ်းၽၵ်းႁင်လႃႇၶမ်ႈၼႆႉ သိုဝ်ႉတင်းၼင်ပွင်းႁေ”
“မၢၵ်ႇၶိူဝ်ႁုင်ဝႃႇ ပေႃႈႁဝ်းဢမ်ႇၶႂ်ႈသႂ်ႇၽွင်ၼင်ၼႆၵေႃႈ သႂ်ႇၼင်ပွင်းၼၼ်ႉယိင် ဢမ်ႇမီးဢၼ်ၶႅဝ်းၵေႃႈၵိၼ်ဢမ်ႇဝၢၼ်ၵွၼ်ႇ ပႃႈသႅင်ၼႃႇတိဝ်ႈတင်းၼိူဝ်ႉႁေ ဢဝ်တၢင်းလႂ်မႃးလႃႇၼၼ်ႉ”
“ဢၢႆႈၶွင်ႇၶဝ်ႁိူၼ်းတႂ်ႈ ၵႂႃႇလႆႈၽၢၼ်းမႃးဝႃႇမႂ်း ၼိူဝ်ႉၶႅမ်ႉၵျႃႉၼေႈ”
“ၶႃႈၵေႃႈလူဝ်ႇၵႂႃႇတူၺ်းယူႇဢေႃႈပေႃးၼႆ”
“မူတ်းယဝ်ႉဢိူဝ်ႈ ၵဝ်တင်းလႆႈမႃးဢဝ်ဢိတ်ႉၵူၺ်းၼႆႉမႂ်း”
“ၽႄပၼ်ၶႃႈၽွင်ႈလႄႈပေႃးၼၼ် ၶႃႈၶႂ်ႈၵိၼ်ၼိူဝ်ႉသူမ်ႈဢုၼ်ႇဢေႃႈ”
“ၵဝ်ၵေႃႈဝႃႈၵဝ်တေမိူဝ်းႁဵတ်းၼႆဢိူဝ်ႈၼႆႉမႂ်း”
“ပေႃးပႃႈသႅင်ၶၢၼ်ႉႁဵတ်းၵေႃႈပၼ်ၶႃႈႁဵတ်းလႆႈယူႇၼႃႇ”
“ပႂ်ႉမိူဝ်းႁဵတ်းၶႅၵ်ႇၵဝ်ဢဝ်လႄႈ”
“လႆႈၽႅဝ်ၵႃႈ ၵမ်ႉတေၶုတ်းၶိဝ်းမိူဝ်းၼႃႉ”
“ဢိူဝ်ႈ..ၵဵပ်းၽၵ်းၵီးႁိူၼ်းသူမႃးႁေလႄႈ ၼုမ်ႇၼႃႇလူင်ၼၼ်ႉ”
“လႆႈၵႂႃႈ..ယႃႇပေၵိၼ်ပႅတ်ႈၶႃႈမူတ်းၼ ၶႃႈမိူဝ်းႁဵတ်းၽၵ်းပၼ်ဢူႈႁဝ်းၶႃၵမ်ႉ”
ပေႃးမႃးတႅၵ်ႈတူၺ်း ၽဝဢၼ်ယူႇဝဵင်းလူင်လႄႈ ဝၢၼ်ႈၼွၵ်ႈၼႆႉမၼ်းပိူင်ႈၵၼ်တေႉဢိူဝ်ႈ၊ ၵူၼ်းႁိမ်းၸမ်ၵၼ် ႁၼ်ၼႃႈၵၼ်ယူႇၵူႈဝၼ်းၵေႃႈ ဢမ်ႇတူင်ႉတၵ်ႉလၢတ်ႈဢုပ်ႇၵၼ်၊ ၶူဝ်းၶွင်ဢၼ်ဝႃႈယွၼ်းလၢႆၵၼ်ၼႆၼၼ်ႉၵေႃႈဢမ်ႇမီး ၵူႈလွင်ႈပဵၼ်ငိုၼ်းပဵၼ်တွင်းယူႇသဵင်ႈ၊ ၸဵမ်ႁူဝ်တေႃႇတိၼ် ၽႂ်ၵေႃႈဢမ်ႇတွၼ်ႉပၼ်လၢႆ ၽၵ်းဢွၼ်ႇယွတ်ႈသွင်ယွတ်ႈၵူၺ်းၵေႃႈ ပိူၼ်ႈၼပ်ႉငိုၼ်းယဝ်ႉ။
သႅင်လိုၼ်းၵေႃႈ ၵဵပ်းဢဝ်ၽၵ်းၵပ်းၼိူဝ်ႉသူမ်ႈဢုၼ်ႇမၼ်းၼႂ်းသူၼ်ၼၼ်ႉသေ ႁၵ်းဢဝ်ဝႂ်ၵူၺ်ႈၸဵင်ႇႁူဝ်ႉ ႁေႃႇတွင်မိူဝ်းတၢင်းႁိူၼ်းပႃႈသႅင်ၶဝ်ၼၼ်ႉယဝ်ႉ။
မိူဝ်းထိုင်ယဝ်ႉၵေႃႈ မိုဝ်းပႃႈသႅင်ၼၼ်ႉၸပ်းတင်းၶဝ်ႈၵူဝ်ႈၼိူဝ်ႉသူမ်ႈၼၼ်ႉသေ ႁဵတ်းလုင်းႁဵတ်းလုင်းသႂ်ႇဝၢၼ်ႇဝႆႉယူႇ။
“ပႃႈႁဝ်းသုၵ်ႈမိုဝ်းၶႅမ်ႉယူႇႁၼႆႉ”
“ၶႅၼ်းႁေမိူဝ်ႈမႂ်းလဵၵ်ႉယူႇၵႂႃႈ မိုဝ်းၵူမ်ႇမိုဝ်းၶႆးလူင်သေ ယဵတ်ႈသႂ်ႇယဵတ်ႈသႂ်ႇၼႂ်းသူပ်းမႂ်းၼၼ်ႉ”
“မိူဝ်ႈၼၼ်ႉၵူၺ်းၼႃႇပႃႈသႅင်ၵေႃႈ ဝႃႈပေႉတၢၼ်ႇၼၢၼ်ႉဝႃႇ၊ ၵိၼ်လႆႈယဝ်ႉၼႄႇၼႆႉ”
“ဢဝ်ၼမ်ႉမၼ်းႁွမ်ၼႂ်းမေႃႈၼၼ်ႉသႂ်ႇၼႂ်းဝၢၼ်ႇႁေလႄႈ လုင်းသူၵေႃႈၵမ်ႉမႃးယဝ်ႉၵဝ်ႇယူဝ်ႉ”
“မၼ်းၵႂႃႇလႂ်လႃႇ”
“ၵႂႃႇလႄႇၶဝ်ႁိူၼ်းၼိူဝ်ၼၼ်ႉယိုင်”
“ၶဝ်မီးႁင်လႃႇ”
“မိူဝ်းႁႃထူဝ်ႈႁႃၵႃးဢိူဝ်ႈ မႂ်းဢမ်ႇၶႂ်ႈၵႂႃႇၼႄႇ”
“ၵႂႃႇလႂ်လူင်လၢင်ဢႃႈ”
“ၵႂႃႇပွႆးဢိူဝ်ႈ ပီမႂ်ႇတႆးၼႆယိုင်ၼႃႇ”
“ဢမ်ႇၵႂႃႇယဝ်ႉယူဝ်ႉ ၶႃႈဢိမ်ႇပွႆးၼႃႇယဝ်ႉဝႃႈ”
“ၵႂႃႇႁဵတ်းၵၢၼ်ႁေၵႂႃႇလႄႇ ၸွင်ႇမိူၼ်ၵၼ်ၵေႃႈဢမ်ႇၸႂ်ႈ ၸိုၼ်ႈမိူင်းတႄႉတေႁေႃႈၵႃးၶဝ်ၵႂႃႇၼႆယိုင်”
“ဢမ်ႇၵႂႃႇယဝ်ႉ”
“ၶိူဝ်ၸႂ်လမ်ၵၼ်ၵႃႈ”
“ၶႃႈၸၢင်ႈၸႂ်လမ်သင်မၼ်းလႃႇပႃႈၵေႃႈ”
“ၸိုင်ၶိူဝ်ဢမ်ႇဢဝ်ၵၼ်ႁေ”
“ၵူၼ်းလူင်ၼႆႉပေႃးႁၼ်ပိူၼ်ႈပဵၼ်မၢဝ်ႇပဵၼ်သၢဝ်ၼႆၵေႃႈ ႁၢင်ႈမေႃဢဝ်တွႆးၵၼ်ၼႃႇ”
“ၸွင်ႇမၼ်းဢမ်ႇလႅပ်ႈၵၼ်ႁိုဝ်လႃႇ မႂ်းၵေႃႈပဵၼ်သၢဝ်လူင် မၼ်းၵေႃႈပဵၼ်မၢဝ်ႇလူင်ႁေ”
“ၸိုင်ဝႃႈမၼ်းဢၢင်ႈဢဝ်မေးၼႆႁိုဝ်လႃႇ ႁမ်ႉႁဵတ်းႁိုဝ်ႁဵတ်းႁႃႁေယဝ်ႉၼၼ်ႉ”
“ဢၢင်ႈဢဝ်ၵၼ်တေႉတေႉဝႃႈဝႃႈၵွၼ်ႇဢိူဝ်ႈ မၼ်းသမ်ႉၵႂႃႇႁဵတ်းသိုၵ်းပႅတ်ႈႁေ ဢေး..ၵေႃႈဢဝ်ၽူဝ်ပႅတ်ႈမၼ်းၼၼ်ႉၼႃႇ”
“မၼ်းၵႂႃႇႁိုင်ယဝ်ႉႁၼၼ်ႉ”
“မၼ်းၵႂႃႇပေႃးတေလႆႈႁူၵ်းၸဵတ်းပီယဝ်ႉယူဝ်ႉ ဝၢႆးမႂ်းၵႂႃႇႁဵတ်းၵၢၼ်ၵူၺ်း မၼ်းၵေႃႈၵႂႃႇၵမ်းလဵဝ်ယဝ်ႉၼႃႇ”
“ၵႂႃႇႁိုင်ပေႃးတၢၼ်ႇၼၢၼ်ႉတႄႉ ဢမ်ႇဝႃႈယူဝ်ႉဢမ်ႇမီးမေးတႄႉ ၶႃႈမႃႇယုမ်ႇလေႃႇ”
“ဢမ်ႇႁူႉၵွၼ်ႇပေႃးမၼ်းဢဝ်ႁေဢမ်ႇလၢတ်ႈမႄႈၶဝ်တႄႉ မႂ်းဢမ်ႇထၢမ်မၼ်းတူၺ်းလႃႇ”
ပေႃးဝႃႈၼၼ်ၵေႃႈ မၼ်းၶိုၼ်းဝူၼ်ႉႁၼ်ၺႃး
ၵူၼ်းၵေႃႉဢၼ်မၼ်းယၢမ်ႈႁၵ်ႉသုတ်းၸႂ်ၼႃႇ။
ၵူၼ်းၵေႃႉၼၼ်ႉ ပဵၼ်သိုၵ်းသေ လႅၼ်မၼ်းဝႃႈ ပဵၼ်မၢဝ်ႇၵူၺ်း၊ ၼႃႈတႃၵေႃႈႁၢင်ႈလဝ်း တိုၵ်ႉၼုမ်ႇတိုၵ်ႉၵမ် ဢသၢၵ်ႈယႂ်ႇလိူဝ်မၼ်းဢိၼ်ႉ၊ မိူဝ်ႈၵူၼ်းၵေႃႉၼၼ်ႉၶဝ်ႈမႃး မၼ်းၵေႃႈသွၵ်ႈႁႃတူၺ်းၶေႃႈမုၼ်းလွင်ႈမၼ်းၸိူဝ်းၼႆႉ လီယုမ်ႇယမ်ယူႇၼႆလႄႈ တူင်ႉတၵ်ႉတွပ်ႇၶိုၼ်း၊ ၵူၼ်းၵေႃႉၼၼ်ႉသမ်ႉ ၶႂ်ႈမေႃဢုပ်ႇမေႃလၢတ်ႈဝႆႉႁိုဝ် လႆႈႁူပ်ႉထူပ်းၵၼ်သေယဝ်ႉ ႁဵတ်းႁႂ်ႈမၼ်းယွင်ႇ ထိုင်တီႈလၢတ်ႈလွင်ႈၼႃႈႁိူၼ်းမႃး၊ ၵူၺ်းၵႃႈ မၼ်းသမ်ႉလႆႈႁူႉမႃးဝႃႈ ပဵၼ်ၵူၼ်းတၢင်းလဵဝ်ၵၼ်တင်းပီႈၸွမ်လႄႈ ပီႈၸွမ်ၵေႃႈလၢတ်ႈၼႄလွင်ႈဢၼ်ၵူၼ်းၵေႃႉၼၼ်ႉ တေႇၼႃႈႁိူၼ်း မီးလုၵ်ႈယဝ်ႉ။ ၽိူဝ်ႇႁူႉတူဝ်ၵေႃႈ သမ်ႉပေႃးႁၵ်ႉႁႅင်းၼႃႇယဝ်ႉလူး တႃႇတတ်းၸႂ်ၼၼ်ႉ ၸဵပ်းၵႅၼ်းၼႃႇတၢၼ်ႇလႂ်ၵေႃႈ ဢမ်ႇၸဵပ်းႁႅင်းတၢၼ်ႇဢၼ်ၶဝ်ယႃႉလူႉလွင်ႈယုမ်ႇယမ်တေႃႇမၼ်းၼၼ်ႉလႄႈ ပႅတ်ႉလႅၼ်မၼ်းမႃးတႃႇသေႇ တၢင်းႁၵ်ႉလႄႈတၢင်းၸင်း မီးယူႇတီႈၵူၼ်းၵေႃႉၼၼ်ႉတင်းသဵင်ႈယဝ်ႉ။
ဝူၼ်ႉၶိုၼ်းလွင်ႈဝၼ်းလင်ယဝ်ႉၵေႃႈ သမ်ႉပေႉမႃးဢိမ်ႇၸၢၼ်ႈတၢင်းႁၵ်ႉဝႆႉၵေႃႈဢမ်ႇႁူႉယဝ်ႉ ထူၺ်ႈၸႂ်လူင်ဢွၵ်ႇမႃးယူႇ။
“မႂ်းပဵၼ်ႁင်လႃႇၵဝ်ဝႃႈ”
“ပဵၼ်တုၶိတ်ႉတႁူဝ်ၸႂ်ယူဝ်ႉပႃႈဝႃႈ”
“ၸင်ႇလႂ်ဝႃႈႁဵတ်းသၢဝ်ၵႄႇယူႇၼႆႉၼေႃႈ”
“ပႆႇၵႄႇသႄႈ တိုၵ်ႉပဵၼ်သၢဝ်ၼုမ်ႇယူႇ”
“တေႉဢိူဝ်ႈ မိူဝ်ႈၶျၢၵ်ႈပူၼ်ႉငိၼ်းဝႃႈမႂ်းႁၢႆၵႂႃႇၼႆၼႃႇ ဢေးၶမ်းဢႆႇၶဝ်မႃးလၢတ်ႈ”
“လုၵ်ႈဢွၼ်ႇၸိူဝ်းၼၼ်ႉႁမ်ႉပေႉႁူႉလႃႇ”
“ၶဝ်လၢတ်ႈတေႃႇပီႈၼၢင်းၶဝ်သေႇသေႇ ႁဵတ်းၵၢၼ်တီႈလဵဝ်ၵၼ်တင်းမႂ်းၵူၺ်းႁိုဝ်လႃႇၼၼ်ႉၵေႃႈ”
“မၼ်းၼၼ်ႉယဝ်ႉ ၸူဝ်းၶႃႈၵႂႃႇႁဵတ်းၵၢၼ်ၸွမ်း”
“မႄႈသူတႄႉပဵၼ်ၵီးပဵၼ်မင်းယူႇယဝ်ႉဢိူဝ်ႈမႂ်းႁူႉ ၵပ်းသိုပ်ႇၵေႃႈဢမ်ႇလႆႈ မႂ်းသမ်ႉၵႂႃႇယူႇတၢင်းလႂ်လႃႇ”
“ၶႃႈၵေႃႈၵႂႃႇႁဵတ်းၵၢၼ်ႁေ ဢမ်ႇလၢတ်ႈၶဝ်ၵူၺ်းဢိူဝ်ႈ”
“ၸိူင်ႉၼႆၵေႃႈမႂ်းႁဵတ်း”
ၵိၼ်ၶဝ်ႈႁေဢုပ်ႇၵၼ် ၵၢင်ဝၼ်းသမ်ႉပေႃးလပ်းသိင်ႇယဝ်ႉၼႃႇ…
သိုပ်ႇလူထႅင်ႈတွၼ်ႈတေမႃးၶႃႈ
