ၵေႃႉဢၼ်မေႃလႅၼ်လိူဝ်ပိူၼ်ႈ ဢမ်ႇၸႂ်ၵေႃႉဢၼ်မေႃလၢတ်ႈ ၵူၺ်းပဵၼ်ၵေႃႉဢၼ်ႁူႉဝႃႈယၢမ်းလႂ်ထုၵ်ႇလီယဵၼ် လိူၵ်ႈလၢတ်ႈဢၼ်တေႁဵတ်းႁႂ်ႈၶဝ်လွတ်ႈၽေးဝႆႉ တေႃႇထိုင်လွင်ႈတေႉပေႃးတေၼႄဢွၵ်ႇမႃး လူၺ်ႈဢမ်ႇမီးၽႂ်ႁူႉ။
ၵူၼ်းၵေႃႉဢၼ်ၵႆႉဝႃႈ “ဢမ်ႇပဵၼ်သင်” ၼႆၼၼ်ႉ ၵႂၢမ်းၶေႃႈၼႆႉ ဢမ်ႇလႆႈပွင်ႇဝႃႈၶဝ်တေဢမ်ႇပဵၼ်သင်တေႉ မၼ်းပွင်ႇဝႃႈၶဝ်ဢမ်ႇၶႂ်ႈလၢတ်ႈ ၶဝ်လႅၼ်ႁႂ်ႈပေႃးမီးႁႅင်းၸႂ်ၵႂႃႇထႅင်ႈ ဢမ်ႇၸႂ်ႈတႃႇႁဵတ်းႁႆၢႉၽႂ်။
ၵူၼ်းၵေႃႉဢၼ်ၵႅၼ်ႇၶႅင်ယူႇတႃႇသေႇၼၼ်ႉ ၵွပ်ႈဢမ်ႇမီးၽႂ်ထၢမ်ဝႃႈ ၸွင်ႇႁိူဝ်ႉႁိုဝ်၊ ၶဝ်ၸင်ႇလႆႈဢဝ်တၢင်းယုမ်ႉတႅၼ်းတၢင် ၵႂၢမ်းယွၼ်းတၢင်းၸွႆႈထႅမ်သေ လႅၼ်တူဝ်ၵဝ်ႇဝႃႈႁဵတ်းလႆႈယူႇ တိူၵ်ႈတီႈႁိူဝ်ႉယူႇၵေႃႈယဝ်ႉ။
ၵူၼ်းၵေႃႉၵူဝ်လွင်ႈလူႉသုမ်းၵႂႃႇပႅတ်ႈၼၼ်ႉ ၶဝ်တေလႅၼ်တႃႇႁႂ်ႈလွင်ႈၸမ်ၸႂ်ၼၼ်ႉယူႇႁႂ်ႈႁိုင်သုတ်း ၵမ်းလိုၼ်းၵေႃႈဝၼ်းၼၼ်ႉႁွတ်ႈမႃးထိုင်ယူႇၼင်ႇၵဝ်ႇ။
ၵူၼ်းၵေႃႉဢၼ်သိုဝ်ႈယူဝ်းယဝ်ႉလႆႈၸဵပ်းသေ လွင်ႈတေႉႁဵတ်းႁႂ်ႈၶဝ်လႆႈတိူဝ်ႉၸႂ်လႄႈ ၶဝ်ၸင်ႇလႅၼ် တႃႇႁႄႉၵင်ႈတူဝ်ၵဝ်ႇ ဢမ်ႇၸႂ်ႈႁဵတ်းႁႆၢႉၽႂ် ယွၼ်ႉဢမ်ႇၶႂ်ႈၸဵပ်းတိၵ်းတိၵ်း။
ၵူၼ်းၵေႃႉႁၢပ်ႇဝႆႉလွင်ႈမုင်ႈမွင်းၵူၼ်းတင်းႁိူၼ်း ၶဝ်လႅၼ်ဝႃႈၵူႈလွင်ႈၵႂႃႇလႆႈလီယူႇ၊ တိူၵ်ႈတီႈၽႆၢႇၼႂ်းၸႂ် လူႉလႅဝ်ဝႆႉယူႇယဝ်ႉ ယွၼ်ႉဢမ်ႇၶႂ်ႈႁႂ်ႈၽႂ်လႆႈႁိူဝ်ႉၸႂ်ၸွမ်း။
ၵူၼ်းၵေႃႉဢၼ်ဝႃႈ “ၸွင်ႇၵွႆႈလၢတ်ႈၵၼ်” ၵႂၢမ်းၶေႃႈၼႆႉသိမ်းဝႆႉလွင်ႈတေႉဢၼ်ပႆႇၽွမ်ႉလၢတ်ႈဢွၵ်ႇ ၶဝ်ပႅတ်ႉလႅၼ်ၶၢဝ်းယၢမ်း ဢမ်ႇလႆႈလႅၼ်ၸႂ် မၼ်းၵေႃႈပဵၼ်ၵၢၼ်ပႆၢႈၵူၺ်း။
ၵူၼ်းၵေႃႉၵႆႉယုမ်ႉတီႈၵူၼ်းၼမ် ယုမ်ႉဢမ်ႇပၼ်ႁႂ်ႈၽႂ်ထၢမ်၊ ယုမ်ႉႁႂ်ႈၵႂၢမ်းသုတ်းဝႆး၊ ယုမ်ႉသိူင်ႇသိမ်းဝႆႉလွင်ႈဢမ်ႇၶႂ်ႈလၢတ်ႈ။
ၵူၼ်းဢၼ်လၢတ်ႈဝႃႈ ဢမ်ႇၶႂ်ႈလႆႈသင်ၼႆၼၼ်ႉ တီႈတေႉၶဝ်ယၢမ်ႈၶႂ်ႈလႆႈယဝ်ႉ ၵူၺ်းၵႃႈဢမ်ႇယၢမ်ႈလႆႈလႄႈ လႅၼ်ဝႃႈပေႃးယဝ်ႉၼႆသေ တိူၵ်ႈတီႈၸႂ်ယင်းလူဝ်ႇၵေႃႈယဝ်ႉ။
ၵူၼ်းမေႃၵဵင်ၸႂ်ႁႅင်းၼႃႇ ပႅတ်ႉလႅၼ်ၸႂ်ၸဝ်ႈၵဝ်ႇ တႃႇထိင်းသိမ်းဝႆႉလွင်ႈယူႇလူမ်ပိူၼ်ႈ ထိုင်တီႈလိုမ်းထၢမ်တူဝ်ၵဝ်ႇဝႃႈ လႆႈယူႇႁ။
ၵူၼ်းဢၼ်ယူႇၸွမ်းလွင်ႈၸမ်ၸႂ်ဢမ်ႇၸႅင်ႈလႅင်း ၶဝ်လႅၼ်ဝႃႈတိုၵ်ႉမီးတၢင်းမုင်ႈမွင်းယူႇ ယွၼ်ႉလွင်ႈတေႉ မၼ်းၸဵပ်းတႃႇတေႁပ်ႉလႆႈယၢမ်းၼႆႉ။
ၵူၼ်းၵေႃႉဢၼ်လၢတ်ႈဝႃႈ “ယၢမ်ႈယဝ်ႉ” မၼ်းဢမ်ႇမီးၽႂ်ယၢမ်ႈၸွမ်းၵၢၼ်ထုၵ်ႇတူၺ်းၶၢမ်ႈလႆႈတေႉတေႉ ၶေႃႈၵႂၢမ်းဝႃႈ ယၢမ်ႈယဝ်ႉ လႅၼ်တႃႇယူႇၵႂႃႇႁႂ်ႈလႆႈၵူၺ်း။
ၵူၼ်းၵေႃႉဢမ်ႇၶႂ်ႈပၼ်တၢင်းမႆႈၽႂ် ၶဝ်လိူၵ်ႈလႅၼ်ဝႃႈ ဢမ်ႇၶႂ်ႈလႆႈတၢင်းၸွႆႈထႅမ်တီႈၽႂ် တိူၵ်ႈတီႈၼႂ်းၸႂ်ၵေႃႈ ၶႂ်ႈႁႂ်ႈၽႂ်သေၵေႃႉတူၺ်းႁၼ်ယူႇ။
ၵူၼ်းၵေႃႉဢၼ်ၵူဝ်လွင်ႈသၢၼ်ၶတ်း ၶဝ်လႅၼ်တႃႇထိင်းသိမ်းလွင်ႈၵတ်းယဵၼ်ဝႆႉ ၵူၺ်းၵႃႈမၼ်းၵေႃႈတေၵဵပ်းဝႆႉၼႂ်းၸႂ်သေ တေပွႆႇမၼ်းဢွၵ်ႇမႃးမိူဝ်ႈဢမ်ႇတၼ်းႁူႉတူဝ်။
ၵူၼ်းၵေႃႉဢၼ်ယၢမ်ႈလၢတ်ႈလွင်ႈတေႉယဝ်ႉ ထုၵ်ႇပွႆႇၽႃႈ တွၼ်ႈသွၼ်ၼၼ်ႉႁႂ်ႈၶဝ်လႅၼ်တႃႇမီးၽႂ်ယူႇႁိမ်းၸမ်။
ၵူၼ်းၵေႃႉဢၼ် ၵေႃႉယႂ်ႇ ၸဵမ်ဢသၢၵ်ႈလဵၵ်ႉ ၶဝ်လႅၼ်ဝႃႈဢမ်ႇလူဝ်ႇၽႂ်ပၼ်ႁႅင်းၸႂ်ၵေႃႈလႆႈ ယွၼ်ႉယၢမ်ႈပဵၼ်ၽႆၢႇပၼ်ႁႅင်းၸႂ်ပိူၼ်ႈတႃႇသေႇ။
ၵူၼ်းၵေႃႉဢၼ်ၺႃးလႅၼ်ၵေႃႉလိုၼ်းသုတ်းၼၼ်ႉပဵၼ်တူဝ်ႁဝ်းၵူၺ်းလႄႈ လႅၼ်ဝႃႈဢမ်ႇပဵၼ်သင် လႆႈယူႇၵူၺ်း လႄႈ လႅၼ်ၵႂႃႇတေႃႇပေႃးလိုမ်းဝႃႈ ၵၢၼ်ယွမ်းႁပ်ႉလွင်ႈတေႉၼၼ်ႉၵေႃႈ ပဵၼ်ၵၢၼ်ယႃၸႂ်မဵဝ်းၼိုင်ႈ။
ပိၼ်ႇ – ငဝ်မွင်မိုတ်းမူဝ်း
ၽႂ်ၺႃးလႅၼ်ပဵၼ်ၵေႃႉလိုၼ်း
