ၵူႈဝၼ်းၵူႈဝၼ်းလႆႈငိၼ်းသဵင်ၵွင်ႈသဵင်မၢၵ်ႇႁဵတ်းၼၼ် သမ်ႉပေႃးလိုၼ်ႈႁူၵႂႃႇယဝ်ႉ၊ ၵူၼ်းမၢတ်ႇၼႆၵေႃႈ မီးၵူႈဝၼ်းတေႉ ၵူၼ်းတၢႆတႄႉၵေႃႈႁၢင်ႇႁၢင်ႇၸင်ႇမီး။
ယၢမ်းၵၢင်ၶိုၼ်းၽွင်းၼွၼ်းဝၢၼ်ယူႇၼၼ်ႉ
“မေႃယႃ..လုၵ်ႉႁႅၼ်းၶူဝ်းလႄႈ”
ၸဵမ်မိူဝ်ႈမႃး ၶူဝ်းၵေႃႈဢမ်ႇလႆႈပႃးသင် မီးၶူဝ်းၸပ်းတူဝ်လႄႈတိူၵ်ႈယႃၵူၺ်း၊ ၶူဝ်းၼုင်ႈၼႆၵေႃႈ မီးမေႃၼၼ်ႉဢဝ်မႃးပၼ်ၸုမ်ႇၼိုင်ႈသေ လၢႆႈပုတ်ႈၵၼ်ၵႂႃႇႁဵတ်းၼၼ်။
“သိုၵ်းသူၼႆႉ ပေႃးဢမ်ႇလႆႈယႃႉတႃၼွၼ်းပိူၼ်ႈႁေၵေႃႈၸႂ်ဢမ်ႇလီၼေႃ”
ၶႅၼ်းယူႇ တင်းလႆႈၶီႇၵႃး ၶႃႈတႄႉၶႂ်ႈလပ်းၼႃႇယဝ်ႉလႄႈ ဢိင်ၵူၼ်းႁိမ်းၶၢင်ႈသေလပ်းလူင်မိူဝ်းသုတ်းတၢင်းယဝ်ႉ။
ပေႃးၶဝ်ဝႃႈႁွတ်ႈယဝ်ႉၼႆၵေႃႈၸင်ႇတိုၼ်ႇမႃးသေ လႆႈႁၼ်ပဵၼ်ႁိူၼ်းမေႃၼၼ်ႉယဝ်ႉ။
“လိုၵ်းၼႃႇယဝ်ႉၶမ်ႈၼႆႉ လိုဝ်ႈတီႈၼႆႈသေၵွၼ်ႇ
လႄႈ မိူဝ်ႈၽုၵ်ႈႁဝ်းၸဝ်ႇမိူဝ်းသူင်ႇ”
တီႈႁိူၼ်းၶဝ်ၵေႃႈ မီးသိူဝ်ႈၶူဝ်းဝႆႉပၼ်သေ လႆႈဢၢပ်ႇၼမ်ႉလီငၢမ်းသေၼွၼ်းၼႆၵေႃႈ မဝ်တူဝ်မဝ်ၸႂ်လီၼႃႇ ၵႂႃႇယူႇတီႈပုၼ်ႉၼႆႉလႆႈဢၢပ်ႇၼမ်ႉပွၵ်ႈလဵဝ်ဝႃႇ၊ လူမ်းမႆႈပေႃးၶႂ်ႈပေႃႇယဝ်ႉဝႃႈ။
လႆႈၼွၼ်းၶႅမ်ႉၼႃႇႁိုဝ် ဢမ်ႇလႆႈၼွၼ်းမႃးလၢႆဝၼ်းယဝ်ႉႁိုဝ်ဢမ်ႇႁူႉ တိုၼ်ႇမႃးၵၢင်ဝၼ်းပေႃးၸမ်တဵင်ႈယဝ်ႉၼၼ်ႉၼႃႇ။
ၵိၼ်ၶဝ်ႈၼႂ်လေႃးၶဝ်ႈဝၼ်းသေ ဢူႈမႄႈၶဝ်ၵေႃႈၵႂႃႇလႂ်ဢမ်ႇႁူႉယဝ်ႉ။
“မႄႈပႃႈပေႃႈလုင်းႁဝ်းၵႂႃႇလႂ်ယဝ်ႉလႃႇ”
“ၵႂႃႇၵၢၼ်ၶဝ်ၸဵမ်ၸဝ်ႉယဝ်ႉ”
“ၶဝ်ၵေႃႈႁဵတ်းၵၢၼ်သေႁႃႉ”
“ႁဵတ်းၵႃႈ..”
“ၶွင်ႁဝ်းႁၼ်မိူဝ်ႈၼၼ်ႉ ဢမ်ႇႁၼ်ၶဝ်ၵႂႃႇတၢင်းလႂ်လႄႇ”
“ၸႂ်ႈၵႃႈမိူဝ်ႈၼၼ်ႉတႄႉ”
“သူၼႆႉၵေႃႉယႂ်ႇပေႃးထဝ်ႈယဝ်ႉ တင်းယူႇမိူၼ်လုၵ်ႈဢွၼ်ႇယူႇၼေႃ”
ၵမ်းၶဝ်ႈမၼ်းသမ်ႉပေႃးၶႂ်ႈၵႅၼ်ႉယဝ်ႉ
“မိူဝ်ႈၵေႃႉလဵၵ်ႉ ႁဝ်းဢမ်ႇလႆႈယူႇမိူၼ်ၼႆၼႃ ဢမ်ႇလႆႈယူႇႁိူၼ်း ၵႂႃႇၶိုၼ်ႈႁဵၼ်းႁေ ၵႂႃႇႁဵတ်းသိုၵ်းႁေ ၸင်ႇႁႃၶိုၼ်းမႃးယူႇႁိူၼ်းမွၵ်ႈသီႇႁႃႈပီၼႆႉၵူၺ်း”
“ႁဵတ်းသိုၵ်းၸဵမ်မိူဝ်ႈဢသၢၵ်ႈၵႃႈႁိုဝ်ပုၼ်ႉလႃႇ”
“ၸဵမ်မိူဝ်ႈသိပ်းပႅတ်ႇပုၼ်ႉယဝ်ႉ”
“ပေႃးၼၼ်ၵေႃႈလႆႈသိပ်းပႅတ်ႇပီယဝ်ႉဢိူဝ်ႈၼေႃႈ”
“ၸႂ်ႈယဝ်ႉဝႃႈ..”
“မီးလုၵ်ႈလၢႆၵေႃႉယဝ်ႉလႃႇ”
မၼ်းၵေႃႈယၵ်ႉတူၺ်းၼႃႈၶႃႈ ၼင်ႇဢမ်ႇပေႃးတဵမ်ၸႂ်သေၵႃႈႁိုဝ်ၼၼ်ႉယဝ်ႉ။
“ႁဝ်းပဵၼ်ၵူၼ်းလၢတ်ႈသိုဝ်ႈၵူၺ်း ဢမ်ႇမေႃၵဵင်ၸႂ် ၶႂ်ႈတွပ်ႇၵေႃႈတွပ်ႇဢမ်ႇတွပ်ႇၵေႃႈယူႇတီႈသူၵူၺ်း ပေႃးလၢတ်ႈလွင်ႈၽူဝ်လွင်ႈမေးလွင်ႈသိုၵ်းၼႆႉ ႁဝ်းတိုၼ်းဢမ်ႇယုမ်ႇဝႃႈၶဝ်ဢမ်ႇယၢမ်ႈမီးၼႃႈႁိူၼ်းလေႃႇၼႃႈ”
“မီးၵေႃႉၼိုင်ႈ မိူဝ်ႈလဵဝ်ယူႇၸွမ်းမႄႈၶဝ် ႁဝ်းၵေႃႈပႅတ်ႈၵၼ်ၵႂႃႇ မီးသိပ်းပီပၢႆယဝ်ႉ မိူဝ်ႈလဵဝ်ၶဝ်ၵေႃႈၶိုၼ်းဢဝ်ၽူဝ်မႂ်ႇထႅင်ႈယဝ်ႉဝႃႈ”
“သူလူးလႃႇ ဢမ်ႇမီးထႅင်ႈၼႄႇ”
“ႁဝ်းဢမ်ႇၶႂ်ႈမီးယဝ်ႉ..”
ၶႃႈၵေႃႈၼိမ်သေ ပႂ်ႉထွမ်ႇၶဝ်သိုပ်ႇၵႂၢမ်းၵႂႃႇထႅင်ႈ
ၵူၺ်းၵႃႈမၼ်းၵေႃႈယဵၼ်ၵႂႃႇတီႈၼၼ်ႈၵူၺ်း။
“သူဢမ်ႇၸႂ်ထိုင်လုၵ်ႈသူၼႄႇ”
“ၸဵမ်မိူဝ်ႈၶဝ်ၵိူတ်ႇမႃး ႁဝ်းဢမ်ႇလႆႈလူမ်းလႃးၶဝ် ႁၼ်ၶဝ်ၵေႃႈပေႃးမေႃလၢတ်ႈၵႂၢမ်းယဝ်ႉ ၶဝ်ၵေႃႈတင်းဢမ်ႇႁူႉၸၵ်းႁဝ်းလူးၵွၼ်ႇ ပွၵ်ႈၼၼ်ႉ ပဵၼ်ပွၵ်ႈဢွၼ်တၢင်းသုတ်းလႄႈပွၵ်ႈလိုၼ်းသုတ်း ဢၼ်ႁဝ်းလႆႈႁၼ်ၶဝ် မေးႁဝ်းၵေႃႈယွၼ်းပႅတ်ႈႁဝ်းမိူဝ်ႈၼၼ်ႉယဝ်ႉ မိူဝ်ႈလဵဝ်ၶေးတေၵေႃႉယႂ်ႇပဵၼ်မၢဝ်ႇယဝ်ႉႁိုဝ်ဢမ်ႇႁူႉ”
“ယူဝ်ဝႃႈမီးၵူၼ်းဢမ်ႇမေႃပေႃးၵူၺ်းၼႃး ဢၵျွင်းဝႃႈမီးၵူၼ်းမေႃဢိမ်ႇသေ”
“ၵူၼ်းမၼ်းဢမ်ႇမိူၼ်ၵၼ်လေႃႇၼႃႈ ယႃႇဢဝ်လွင်ႈဢၼ်သူႁၼ်ၵူၺ်းၼၼ်ႉ မႃးတႅပ်းတတ်းၵၼ်လႄႈ”
“ၸွင်ႇသူႁူႉ ၽူႈယိင်းဢၼ်လဵင်ႉလုၵ်ႈၵေႃႉလဵဝ်ၼၼ်ႉမၼ်းႁိူဝ်ႉမိူၼ်ႁိုဝ်ၼႆ ၶႂ်ႈၼွၼ်းဢမ်ႇလႆႈၼွၼ်း တွင်ႉမႆႈယူႇၵေႃႈဢမ်ႇလႆႈၵိၼ် ႁိူဝ်ႉယူႇၵေႃႈဢမ်ႇလႆႈလိုဝ်ႈ ၶႂ်ႈတၢႆၼႆၵေႃႈတင်းတၢႆဢမ်ႇလႆႈၵွၼ်ႇယဝ်ႉ လႄႈ လုၵ်ႈဢွၼ်ႇဢၼ်ဢမ်ႇမီးပေႃႈၼႆၼၼ်ႉၵေႃႈ မၼ်းလႆႈၼႃႈလဵၵ်ႉမွၵ်ႈႁိုဝ် လိူဝ်သေဢမ်ႇမီးပေႃႈယဝ်ႉ ပိူၼ်ႈသမ်ႉမႃးထၢမ်ဝႃႈ ပေႃႈမႂ်းၵႂႃႇလႂ် ပေႃႈမႂ်းပဵၼ်ၽႂ်ၼႆထႅင်ႈ ယဝ်ႉထႅင်ႈ
ပေႃးလႆႈငိၼ်းပိူၼ်ႈလၢတ်ႈထိုင်ၸိုဝ်ႈဢူႈၸိုဝ်ႈမႄႈၼႆၵေႃႈ ၸႂ်ႁိုဝ်တေၵျေႃႇလႆႈ ႁဝ်းယၢမ်ႈပဵၼ်လုၵ်ႈဢွၼ်ႇၵေႃႉၼၼ်ႉဢိူဝ်ႈ ႁဝ်းလႆႈယူႇၸွမ်းမႄႈလုၵ်ႈဢွၼ်ႇၵေႃႉၼၼ်ႉယဝ်ႉ ႁဝ်းႁူႉလီ မၼ်းဢမ်ႇၵဵဝ်ႇဝႃႈပဵၼ်သိုၵ်းႁိုဝ်ၵူၼ်းမိူင်းလေႃႇ မၼ်းပဵၼ်တီႈတၢင်းယၢမ်ႈၵူၼ်းၵူၺ်း”
မၼ်းၵေႃႈၼိမ်ယဵၼ်ၵႂႃႇသေ မိူၼ်ႇယၵ်ႉတူၺ်းၼႃႈၶႃႈယူႇလႄႈ
“ယႃႇပေဝႃႈ ဢီးလူႁဝ်းၼႆၼ ႁဝ်းဢမ်ႇၶႂ်ႈႁႂ်ႈၽႂ်မႃးဢီးလူၵူၺ်ႉ”
“ဢမ်ႇၸႂ်ႈၸိူင်ႉၼၼ်..ႁဝ်းယိၼ်းၸူမ်းသူၵူၺ်း..ၸွႆႈၵႄႈပၼ်လွင်ႈၶမ်ၸႂ်ႁဝ်း ဢၼ်ၵဵပ်းမႃးၼႂ်းၶၢဝ်းတၢင်းသိပ်းပီပၢႆၼၼ်ႉလႆႈ”
“ၶႂ်ႈဝႃႈၼႂ်းၸႂ်ၼႆႉ ပေႃးလၢတ်ႈလွင်ႈၽူႈယိင်းၼႆ ဝူၼ်ႉထိုင်ၼႃႈမေးသေ ထၢင်ႇထိူမ်မၼ်းယူႇတႃႇသေႇဢိူဝ်ႈၼေႃႈ”
“သူႁူႉၸၵ်းႁဝ်းၼမ်ၼႃႇယဝ်ႉ”
“ဢမ်ႇ ႁဝ်းႁူႉတၢၼ်ႇဢၼ်ႁဝ်းၶႂ်ႈႁူႉၵူၺ်း”
“ယဝ်ႉသူသမ်ႉႁူႉမွၵ်ႈႁိုဝ်”
“မွၵ်ႈဢၼ်သူၶႂ်ႈႁႂ်ႈႁဝ်းႁူႉၵူၺ်း”
“သူသမ်ႉၶႂ်ႈႁူႉသင်ထႅင်ႈလႃႇ”
“ႁူႉၼမ်ၵေႃႈဢမ်ႇလီၼႃ”
“ႁဝ်းတႄႉၶႂ်ႈႁႂ်ႈသူႁူႉၼမ်လိူဝ်ၼႆႉဢိူဝ်ႈ”
“ႁဝ်းပေႃးယဝ်ႉၼႃႈ သူလူးပေႃးယဝ်ႉႁ ႁဝ်းတေလႆႈၵဵပ်းၵႂႃႇလၢင်ႉ”
“ဢမ်ႇပဵၼ်သင် ႁဝ်းတေႁဵတ်းၵူၺ်း”
“ၵႆႉမႃးၼႃႇယဝ်ႉ ဢမ်ႇပဵၼ်သင်ယဝ်ႉဝႃႈ”
“ပေႃးၼၼ်ၵေႃႈမႃးယူႇတေႉသေလႄႈ”
“သူႁဵတ်းလႄႈပေႃးၼၼ်”
“ၵႆႉႁၼ်ပေႃးပဵၼ်ၼႃႈႁိူၼ်းလဵဝ်ၵၼ်မႃးၼႆ ၶဝ်ၵႆႉၸႂ်ႉၵၼ်လၢင်ႉဝၢၼ်ႇၸိူင်ႉၼႆၼေႈ”
“ႁိူၼ်းသူလူးသူၵေႃႈလၢင်ႉလႄႈ ႁဝ်းပဵၼ်ၶႅၵ်ႇၵူၺ်း”
“ၸိုင်ဝႃႈၵႆႉမႃးၼႃႇယဝ်ႉၼႆဢမ်ႇၸႂ်ႈႁ”
“မိူဝ်ႈၼႆႉပေႉလၢတ်ႈၼမ်လႃႇ”
“လၢတ်ႈယဝ်ႉဝႃႈၶႂ်ႈႁႂ်ႈသူႁူႉၸၵ်းႁဝ်းလိူဝ်ၼႆႉ”
“ႁဝ်းဢမ်ႇၶႂ်ႈႁူ.. ဢမ်ႇလူဝ်ႇ..ယႃႇလၢတ်ႈသင်ထႅင်ႈယဝ်ႉဝႃး”
ဢမ်ႇႁူႉပဵၼ်သင် ၼႃႈၶႃႈသမ်ႉပေႃးလႅင်ဝၢၼ်းဝၢၼ်း ဝၢၼ်ႁူပေႃးမႆႈဝိုဝ်ႈဝိုဝ်ႈ ၶႃႈပေႃးဢမ်ႇႁတ်းယၵ်ႉတူၺ်းၼႃႈၶဝ်သေဢိတ်း လၢတ်ႈသင်ၵေႃႈၶဝ်ပေႃးလၢတ်ႈပေႉဝႆႉယူႇတိၵ်းတိၵ်း ပေႃးဝႃႈထဵင်ပိူၼ်ႈၼႆႉ ၶႃႈဢမ်ႇတွၼ်ႉသုမ်းၼႃ ၵူၺ်းၵႃႈ
ပွၵ်ႈၼႆႉ ၶႃႈႁူႉတူဝ်ဝႃႈၶႃႈသုမ်းယဝ်ႉ။
ၵိၼ်ၶဝ်ႈယဝ်ႉသေ မၼ်းၵေႃႈမိူဝ်းသူင်ႇၶႃႈ မိူဝ်ႈၸမ်ထိုင်ႁိူၼ်းၼၼ်ႉ မၼ်းၵေႃႈႁႂ်ႈၶႃႈၸွႆႈယိပ်းၶူဝ်းပၼ်မၼ်းသေ ယွၼ်းမိုဝ်းၶႃႈယဝ်ႉ မၼ်းၸူၵ်းဢဝ်ၸွမ်ႇမိုဝ်းၶမ်းဢၼ်ၼိုင်ႈ မႃးသုပ်းသႂ်ႇပၼ်ၼိဝ်ႉၵၢင်ၶႃႈလႄႈ မိုဝ်းၶႃႈပၢႆႈပႅတ်ႈတမ်ႉဢမ်ႇတၼ်းၶိုတ်း။
“သင်သူလႃႇ”
“ၵႃႈႁႅင်း ဢၼ်သူၵႂႃႇႁဵတ်းၵၢၼ်ၸွမ်းႁဝ်းပၢတ်ႈၼႆႉ ႁဝ်းဢဝ်ၶမ်းၵမ်ႉဝႆႉၵွၼ်ႇ ၸွင်ႇၵွႆႈဢဝ်ငိုၼ်းမႃးပၼ် ယႃႇပေဢဝ်ႁၢႆၼႃႈ ႁဝ်းတေမႃးဢဝ်ၶိုၼ်း”
“ႁဝ်းဢမ်ႇဢဝ် ဢဝ်ၵႂႃႇၶိုၼ်းလႄႈ” ၽိူဝ်ႇၶႃႈထွတ်ႇ ထွတ်ႇဢွၵ်ႇသမ်ႉဢမ်ႇလႆႈယဝ်ႉဝႃႇ ၵႅၼ်ႇၵႅၵ်းၵႅၵ်း။
“ပေႃးဝႃႈႁဝ်းဢမ်ႇလႆႈပွၵ်ႈမႃးၶိုၼ်းၵေႃႈ ၸွမ်ႇမိုဝ်းၼႆႉၵေႃႈပဵၼ်ၶွင်သူယဝ်ႉ”
“ႁဝ်းဢမ်ႇၶႂ်ႈလႆႈတေႉဢိူဝ်ႈ ပေႃးသူဢမ်ႇဢဝ်ဝႆႉ သင်ႁၼ်ၵၼ်ထႅင်ႈပွၵ်ႈၼႃႈၵေႃႈ ႁဝ်းတေသႂ်ႇပၼ်ၼိဝ်ႉၼၢင်းၼႃႈ”
“ဢမ်ႇ..”
ၶႃႈၼႅတ်ႈၵမ်မိုဝ်းၶႃႈပႅတ်ႈယဝ်ႉ။
မိူၼ်ၶႃႈတေႁူႉၸၵ်းလွင်ႈၽူႈၸၢႆးၼမ်ယဝ်ႉ ၵူၺ်းၵႃႈမႃးၺႃးမေႃၼႆႉၼႆ ၶႃႈလၢမ်းသင်ပေႃးဢမ်ႇလႆႈသေဢိတ်း မၼ်းမိူၼ်ပဵၼ်ၵူၼ်းလၢႆၼႃႈဝႆႉ ဢၼ်ထူပ်းၵၼ်မိူဝ်ႈပူၼ်ႉမႃးလႄႈ ၵေႃႉမိူဝ်ႈၼႆႉ တၢၼ်ႇဝႃႈဢမ်ႇၸႂ်ႈၵေႃႉလဵဝ်ၵၼ်ယဝ်ႉ၊ ၶႃႈၵေႃႈဢမ်ႇၶႂ်ႈယုမ်ႇယဝ်ႉ ဢၼ်မၼ်းလၢတ်ႈမႃးၸိူဝ်းၼၼ်ႉ ပဵၼ်လွင်ႈတေႉႁ မၼ်းႁဵတ်းၵႅင်ႈႁ တူၺ်းမၼ်းလႅပ်ႈတေႁူႉလွင်ႈၶႃႈလီလႄႈ ႁၼ်တီႈယူပ်ႈယွမ်းၶႃႈဝႆႉယဝ်ႉ။ လၢႆးလၢတ်ႈလႄႈလၢႆးႁဵတ်းသၢင်ႈမၼ်း လၢႆးလိင်ႉလၢႆးလေႉမၼ်း တၢၼ်ႇဝႃႈပဵၼ်သိူဝ်ၽူႈယိင်းယဝ်ႉ။
သမ်ႉဝႃႈပဵၼ်ၸိူင်ႉၼၼ်ယူႇၵေႃႈ ၼႂ်းၸႂ်တႄႉလွမ်မွင်းၶဝ်ဝႆႉယူႇ မွင်းပႂ်ႉႁႂ်ႈၶဝ်မႃးလႅၵ်ႈဢဝ်ၸွမ်ႇမိုဝ်းၼႆႉႁိုဝ်၊ မွင်းႁႂ်ႈလႆႈထူပ်းၶဝ်ႁိုဝ်၊ ၸဵမ်မိူဝ်ႈဝၼ်းၼၼ်ႉ ၶဝ်ၵေႃႈႁၢႆၵႂႃႇသေ ဢမ်ႇႁူႉၶၢဝ်ႇၶဝ်ထႅင်ႈဝႃႈ ပဵၼ်ႁိုဝ်တၢႆႁိုဝ်။ ၵွပ်ႈမွင်းၼႃႇလႄႈ ၶၢဝ်းယၢမ်းၼႆႉၵေႃႈႁိုင်ၼႃႇတေႉ။
ႁူႉတူဝ်ယူႇဝႃႈၶဝ်ပဵၼ်သိုၵ်း ဝူၼ်ႉယူႇဝႃႈၶဝ်လႅပ်ႈပဵၼ်ၵူၼ်းၸႂ်ၼမ် ၵူၺ်းၵႃႈ ၵွပ်ႈသင်လႄႈ ယင်းတိုၵ်ႉၸႂ်ထိုင်ၶဝ်ယူႇ၊ သင်ၺႃးလႅၼ်ၵေႃႈယွမ်းပၼ်
မၼ်းလႅၼ်ယဝ်ႉႁိုဝ်၊ ဢီႈသင်မႃးလၢင်ႉတၢင်းဝူၼ်ႉႁဝ်းၵႂႃႇယဝ်ႉလႃႇ။
ယိုင်ႈဝႃးဢမ်ႇၶႂ်ႈႁူႉ ၸွမ်ႇမိုဝ်းၼၼ်ႉၵေႃႈယိင်ႈႁတ်ႉမိုဝ်း၊ ၵူႈဝၼ်းၵူႈဝၼ်းၼႆႉ ၶႃႈႁႃလၢႆးဢဝ်ဢွၵ်ႇၸွမ်ႇမိုဝ်းၼၼ်ႉ သမ်ႉပေႃးၵိၼ်ဢမ်ႇဝၢၼ်ၼွၼ်းဢမ်ႇလပ်းလႆႈယဝ်ႉ။
