သဵင်ၸုပ်ႇၾူၼ်းဢေးၸိင်ႇမေႃးၶတ်းႁူၼႃႇလႄႈ
“ၾူၼ်းမႂ်းယမ်းမူတ်းယဝ်ႉ”
“ဝၢင်းၵွၼ်ႇယဝ်ႉၼႃႈသူ မီးၵူၼ်းၶွႆႁဝ်းဢိူဝ်ႈ”
“ဢေႃႈၶႃႈမေးႁၵ်ႉ..ႁၵ်ႉၼႃႈ”
ဝၢႆးသေမၼ်းဝၢင်းၾူၼ်းယဝ်ႉ
“ၵဝ်ဢမ်ႇမႃးၼွၼ်းႁဵတ်းၵေႃႉမႂ်းလႆႈယူႇယူဝ်ႉမႃႈ ပေႃးမႂ်းတေပိုတ်ႇလမ်းၾူင်းသေလၢတ်ႈလင်ပေႉၼႆႉတႄႉ”
“ၵဝ်တင်ႈၸႂ်ႁႂ်ႈမႂ်းငိၼ်းၵူၺ်းလူင်”
“ဢဝ်တွင်ႉၵဝ်ၶူၼ်ႉၵူၺ်းဢိူဝ်ႈ..”
“ပီႈလၢဝ်သႅင် ယွၼ်းတီႈၵပ်းသိုပ်ႇမႂ်းယူႇ ၵဝ်လႆႈဢဝ်ပၼ်မၼ်းဢိူဝ်ႈ ဢမ်ႇလၢတ်ႈတေႃႇမႂ်းၼႄႇ”
“လၢတ်ႈဢိူဝ်ႈ ၵဝ်ဝႃႈၵဝ်မီးၽူဝ်ယဝ်ႉၼႆႁင်းမၼ်း”
“မၼ်းတမ်ႉဢမ်ႇယုမ်ႇႁိုဝ်”
“မၼ်းတိုၼ်းဢမ်ႇယုမ်ႇယဝ်ႉ ၽိူဝ်ႇၵဝ်ဝႃႈမၼ်းမီးမေးယဝ်ႉၼႆၵေႃႈ ႁၢႆဝိတ်းယဝ်ႉဢိူဝ်ႈ”
ၶႃႈၵေႃႈတင်ႈၸႂ်လၢတ်ႈၾၢင်ႉဢေးၸိင်ႇၵူၺ်းၼင်ႇၵဝ်ႇ၊ ၸွမ်းၼင်ႇဢူၺ်းၵေႃႉၶႃႈ ဢၼ်ႁဵတ်းၵၢၼ်ၸွမ်းၶဝ်ၼၼ်ႉတႄႉ လၢတ်ႈၼႄဝႃႈ ပီႈဢွင်ႇမီးမေးမီးလုၵ်ႈယဝ်ႉၼႆ ၶႃႈၵေႃႈပႆႇႁတ်းလၢတ်ႈၼႄမၼ်း ဢမ်ႇႁူႉဝႃႈတေလၢတ်ႈၼႄမၼ်းၸိူင်ႉႁိုဝ်လူးၵွၼ်ႇ။
ၵူၺ်းၵႃႈ ၶႃႈၵေႃႈဢမ်ႇထၢင်ႇတေလႆႈငိၼ်း
“မႂ်းႁူႉယဝ်ႉဢိူဝ်ႈၼေႃႈပေႃးၼႆ ပီႈဢွင်ႇၵေႃႈ”
ၶႃႈၵေႃႈတူၵ်းၸႂ်ဢိူဝ်ႈဢၼ်မၼ်းႁူႉၸိူင်ႉၼၼ်
“မႂ်းႁူႉၸဵမ်မိူဝ်ႈလႂ်လႃႇၼၼ်ႉ”
“ၸဵမ်မိူဝ်ႈၶမ်ႈပၢင်ၶႅၵ်ႇၼၼ်ႉ..မေးမၼ်းသိုပ်ႇၾူၼ်းမႃးလႄႈ ၵဝ်လႆႈႁပ်ႉၺႃး”
“ယဝ်ႉႁဵတ်းႁိုဝ်ထႅင်ႈလႃႇ..”
“ၵၢင်ၼႂ်မႃးၵဝ်ၵေႃႈထၢမ်မၼ်းဢိူဝ်ႈ မၼ်းၵေႃႈလၢတ်ႈၼႄၵဝ်မူတ်း..”
“မေးမၼ်းလူးႁူႉယူႇႁႃႉ..”
“ၶမ်ႈၼၼ်ႉၵဝ်ႁပ်ႉၾူၼ်းလၢႆလၢႆၵူၺ်း ဢမ်ႇလႆႈလၢတ်ႈသင် မေးမၼ်းၵေႃႈသိုပ်ႇၾူၼ်းမႃးပွင်ႉလွ
င်ႈမၼ်းဢမ်ႇၵပ်းသိုပ်ႇမိူဝ်းတီႈႁိူၼ်းၼႆ ၵဝ်တူၵ်းၸႂ်ထိုင်တီႈဢမ်ႇလႆႈလၢတ်ႈသင်ထႅင်ႈ”
“မႂ်းသမ်ႉတေႁဵတ်းႁိုဝ် တေႁဵတ်းၼႆၵႂႃႇၵူၺ်းႁႃႉ”
“ၵဝ်ၸၢင်ႈတေႁဵတ်းႁိုဝ်လႃႇ မိူဝ်ႈလဵဝ်ၵဝ်ပႃးတွင်ႉဝႆႉယဝ်ႉလူး သမ်ႉပဵၼ်တူဝ်ၵေႃႉလဵဝ်ထႅင်ႈ ပေႃးၵိူတ်ႇလုၵ်ႈမႃး ၵၢၼ်ၵေႃႈဢမ်ႇၸၢင်ႈႁဵတ်းတၢင်းလီယဝ်ႉမႂ်းၵေႃႈ ၵဝ်ၵေႃႈၵႃႈတေလႆႈပိုင်ႈဢိင်မၼ်းဢိူဝ်ႈ”
“ပေႃးမၼ်းပႅတ်ႈမႂ်းၵႂႃႇသေလူးႁမ်ႉ..”
“မႂ်းယႃႇဝႃႈၼၼ်လႄႈ ၸႂ်ၵဝ်ႁၢႆၼႃႇ”
“ၵူၼ်းဢၼ်ယၢမ်ႈႁၵ်းလင်ၼႆႉ ၵဝ်ဢမ်ႇယၢမ်ႈဝူၼ်ႉဝႃႈမၼ်းတေသိုဝ်ႈယူဝ်းလေႃႇၼႃႈ မိူဝ်ႈတေႃႇၼႃႈတႄႉႁၵ်ႉဢေႃႈႁၵ်ႉဢေႃႈ ၽၢႆႇလင်မႃး သမ်ႉပေႃးဝူၼ်ႉႁႃထႅင်ႈယူႇယဝ်ႉ တူၺ်းဢဝ်ဢူႈတႄႉၵဝ်ၼၼ်ႉၵူၺ်း မိူဝ်ႈလဵဝ်ၵႂႃႇႁဵတ်းလုၵ်ႈဢွၼ်ႇပၼ်ပိူၼ်ႈဝႆႉ ဢမ်ႇႁူႉမီးပဵၼ်လၢႆၵေႃႉယဝ်ႉ”
“ၵူၼ်းၵေႃႉၼိုင်ႈလႄႈၵေႃႉၼိုင်ႈ ဢမ်ႇမိူၼ်ၵၼ်လူးမႂ်းၵေႃႈ ပီႈဢွင်ႇၶေးတေဢမ်ႇၸႂ်ႈၵူၼ်းၸိူင်ႉၼၼ်”
“ဢမ်ႇပဵၼ်သင် ပေႃးဝႃႈမၼ်းပႅတ်ႈမႂ်းမိူဝ်ႈလႂ် ၵဝ်တေၵႂႃႇၶႆႈမၼ်းထိုင်တီႈၵူၺ်း”
မိူဝ်ႈယၢမ်းၼင်ႇၼၼ် ၼွင်ႉၸၢႆးၶႃႈ ဢၢႆႈၼုမ်ႇ
ဢၼ်ၵႂႃႇ ႁဵတ်းသိုၵ်းၼၼ်ႉၵေႃႈ ပိူၼ်ႈပွင်ႇၶၢဝ်ႇမႃး မၼ်းလၵ်ႉပၢႆႈယဝ်ႉၼႆဝႃႇ။ ၶႃႈၵေႃႈသိုပ်ႇၾူၼ်းထၢမ်မၼ်းဢိူဝ်ႈၼေႃႈ ႁဵတ်းၵႂႃႇႁဵတ်းမႃး ၽူႈယိင်းႁွင်ႉႁေပၢႆႈၵႂႃႇၸွမ်းၼႆဝႃႇ။ ဢေးၼၼ်ႉဝႃႈႁိုဝ်ႁင်းမၼ်းၼႆ “ႁဝ်းတႄႉယူႇၵိၼ်ၸွမ်းသူဢမ်ႇလႆႈ ပေႃးသူႁၵ်ႉႁဝ်းၵေႃႈ မႃးယူႇၸွမ်းႁဝ်းလႄႈ” ၼႆသေ မၼ်းၵေႃႈၵႂႃႇႁႃဢေးၼၼ်ႉတေႉ ၽိူဝ်ႇၵႂႃႇႁႃယဝ်ႉ ဢေးၼၼ်ႉသမ်ႉပႅတ်ႈမၼ်းႁေၼၼ်ႉၼႃႇ။
ၶႃႈၵေႃႈလႃႇပၼ်မၼ်းတွႆးပေႃးယၢဝ်းလူင်ဝႆႉယဝ်ႉ ႁႂ်ႈမၼ်းၶိုၼ်းမိူဝ်း ပေႃးမၼ်းဢမ်ႇမိူဝ်းၵေႃႈ ဢၢႆႈၶမ်းၼွင်ႉမၼ်း ဢၼ်တိုၵ်ႉႁဵၼ်းဝႆႉယူႇၼၼ်ႉၵႃႈတေလႆႈၵႂႃႇယဝ်ႉ။
ၵူၼ်းၼႆႉၵေႃႈ မီးၸေးတေႉႁေး ၵမ်ႈၽွင်ႈဢဝ်မေးၼပ်ႉဢမ်ႇလႆႈ၊ ၵမ်ႈၽွင်ႈၶႂ်ႈလႆႈမေးသမ်ႉပေႃးပၢႆႈၸွမ်းလင် သႂ်ႇၵႂႃႇသႂ်ႇမႃးၺႃးပိူၼ်ႈလႅၼ်ထႅင်ႈ။
ၶႃႈၵေႃႈဝႃႈ ပေႃးမၼ်းဢမ်ႇမႃး ၶႃႈၵေႃႉတေၵႂႃႇၶႆႈမၼ်းၼႆလႄႈ မၼ်းၵေႃႈၵႃႈလႆႈၶိုၼ်းၵႂႃႇယဝ်ႉ၊ ပဵၼ်ႁိုဝ်ပဵၼ်ႁႃ ၵၢၼ်ၵပ်းသိုပ်ႇမၼ်းၵေႃႈလႆႈႁၢႆၵႂႃႇ။
တၢင်းၼႆႉၵေႃႈ ဢေးၸိင်ႇၵိူတ်ႇလုၵ်ႈႁေပီႈဢွင်ႇၵေႃႈၵပ်းသိုပ်ႇဢမ်ႇလႆႈထႅင်ႈ။ မိူဝ်ႈလဵဝ်တႄႉပႆႇၸၢင်ႈႁဵတ်းသင်လႆႈ ၵႃႈလႆႈၸွႆႈလုမ်းလႃးမၼ်းၵႂႃႇၵူၺ်းယဝ်ႉ။
