“ပွႆႇမၼ်းၵႂႃႇသေ လႄႈ မၼ်းႁၵ်ႉတေႉယူႇႁႃႉ မႂ်းႁူႉလိူဝ်သေၽႂ်ယဝ်ႉ သင်မၼ်းႁၵ်ႉတေႉ မၼ်းတေဢမ်ႇပွႆႇႁႂ်ႈမႂ်းလႆႈၸဵပ်းလေႃႇ”
တီႈၼႂ်းသႅင်ႇလဝ်ႈ ဢေးဢၢမ် ၼင်ႈလၢတ်ႈတီႈဢူၺ်းၵေႃႉမၼ်း ဢေးသႅင် ဢၼ်သုမ်းတၢင်းႁၵ်ႉမႃး မိူဝ်ႈမၼ်းလႆႈႁၼ် ၵူၼ်းၵေႃႉဢၼ်မၼ်းႁၵ်ႉ တွႆးသၢဝ်မႃးယူႇၽႆၢႇၼႃႈမၼ်းသေ ႁဵတ်းမိူၼ်ဢမ်ႇႁူႉၸၵ်းမၼ်းယူႇၼၼ်ႉ။
ဢေးဢၢမ်ႁူႉလွင်ႈတၢင်းသေလႄႈ ဝႆႉၸႂ်ၼိမ်ၼိမ်လၢတ်ႈလီလီတေႃႇဢေးသႅင် မၼ်းၵေႃႈႁူႉၸၵ်းၵူၼ်းၵေႃႉၼၼ်ႉလီယူႇယဝ်ႉလႄႈ ဢမ်ႇႁၼ်လီၸွမ်းသေဢိတ်း ဢၼ်ဢေးသႅင်ၵႂႃႇၵျိူၵ်ႈမၼ်းၼၼ်ႉ။
“သင်မႂ်းႁၵ်ႉသေ မႂ်းသိူဝ်းၸႂ်ၵေႃႈ ၵဝ်တေဢမ်ႇႁၢမ်ႈ ၵူၺ်းၵႃႈ ၵဝ်ႁၼ်မႂ်းလႆႈႁိူဝ်ႉၵွပ်ႈမၼ်းမႃးၼမ်ၼႃႇယဝ်ႉလူး မႂ်းတေယဵၼ်ႉၵႂႃႇၸိူင်ႉၼႆတိၵ်းတိၵ်းၵေႃႈ မႂ်းၵူၺ်းႁဵတ်းႁႆၢႉတူဝ်ၵဝ်ႇ”
“ဢိုမ်ႈ..ၵဝ်ဝႃႈၵဝ်ထုၵ်ႇလီပေႃးယဝ်ႉ ၵဝ်လႆႈၶေႃႈတွပ်ႇၸဵမ်မိူဝ်ႈ မၼ်းဝႃႈႁႃးဢမ်ႇမီးဢၼႃႇၵၢတ်ႈၼႆၼၼ်ႉယဝ်ႉ လိူဝ်သေဝႃႈမိူဝ်ႈၼၼ်ႉၵဝ်ယွမ်းႁပ်ႉပႆႇလႆႈၵူၺ်း”
“မိူဝ်ႈလဵဝ်လူး..”
“ဢၼ်မၼ်းပႃးသၢဝ်မႃးတေႃႇၼႃႈတေႃႇတႃၸိူင်ႉၼႆၵေႃႈ လႆႈဝႃႈၸွႆႈလႆႈၼမ်တေႉဢိူဝ်ႈ၊ ပေႃးမႃးဝူၼ်ႉတူၺ်းလီလီ မၼ်းတင်းဢမ်ႇယွမ်းႁပ်ႉၵဝ်ဝႃႈပဵၼ်ၸူႉမၼ်းလူးၵွၼ်ႇ”
ဢေးသႅင်ယုၵ်ႉၵွၵ်းလေႃႇဢေးဢၢမ်သေဢိုၵ်ႉၵိၼ်လဝ်ႈမၼ်းၵႂႃႇယဝ်ႉ ၼင်ႈၼိမ်မိူၼ်ႇတူၺ်းၼႂ်းလၢၼ်ႉၼၼ်ႉသေ
မၢဝ်ႇသၢဝ်ၵူႈၼိုင်ႈပႆၶဝ်ႈမႃးၼင်ႈၼႂ်းသႅင်ႇၼၼ်ႉလႄႈ မိူဝ်ႈဢေးသႅင်ႁၼ်မႅၼ်ႈၼႆၵေႃႈ သီၼႃႈလႅၵ်ႈလႆၢႈၵႂႃႇသေ ဝိၼ်ႇၼႃႈပႆၢႈပႅတ်ႈၵႅပ်ႉၼိုင်ႈယဝ်ႉ ၸင်ႇၶိုၼ်းတူင်ႉတၵ်ႉၸူးၶဝ်ၵႂႃႇ
“ပီႈသႆၢႁိူင်းၵေႃႈမႃးလၢၼ်ႉၼႆႉသေၶႃႈႁႃႉ မႃးၼင်ႈၸွမ်းႁဝ်းၼႄႇ”
ဢေးဢၢမ်ယၵ်ႉတူၺ်းဢေးသႅင်သေမိူၼ်ႇငိူဝ်ႈၵႂႃႇ။ ၸႆၢးသႆၢႁိူင်း ဢၢင်ႈထဵင်ၶိုၼ်းယူႇ ၽူႈယိင်းၵေႃႉၼၼ်ႉၵေႃႈ ယၵ်ႉတူၺ်းတီႈဢေးသႅင်ၶဝ်ၼၼ်ႉသေ
“ဢူၺ်းၵေႃႉပီႈႁႃႉ ၵႂႃႇတူင်ႉတၵ်ႉၶဝ်ၽွင်ႈလႄႈ”
ၸႆၢးသႆၢႁိူင်းၵေႃႈၵႃႈလႆႈမႃးၸူးယဝ်ႉ။
ၶဝ်ၵေႃႈၼင်ႈၵိၼ်ၵုမ်းၵၼ်ၵႂႃႇ ဢေးဢၢမ်ၼၼ်ႉတႄႉ သမ်ႉပေႃးဢမ်ႇႁူႉတေလႆႈႁဵတ်းႁိုဝ်ယူႇၼႂ်းၵႄႈၶဝ်ယဝ်ႉ ၵိၼ်းၸႂ်ယူႇၵေႃႈၵႃႈလႆႈယူႇ။
ဢေးသႅင်ၵေႃႈ ႁဵတ်းၵႅင်ႈဢမ်ႇႁူႉဢမ်ႇႁၼ်သေ
“သူသွင်ၵေႃႉ ပဵၼ်ၵေႃႉႁၵ်ႉၵၼ်မႃးႁိုင်ယဝ်ႉႁႃႉ” ယၵ်ႉတူၺ်းၼႃႈၸၢႆးသႆၢႁိူင်းသေ “ႁႃးပဵၼ်ဢူၺ်းၵေႃႉၵၼ် ဢမ်ႇႁၼ်လၢတ်ႈၼႄၵၼ်သေပွၵ်ႈလႃႇဝႃႈသြႃႇႁႃးမီးၵေႃႉႁၵ်ႉယဝ်ႉၼႆ”
“ၼွင်ႉသႅင် သူမဝ်းၼႃႇယဝ်ႉယူဝ်ႉၼႆႉ”
“တိုၵ်ႉၸင်ႇႁႃမႃးၵိၼ်ၵူၺ်း ပႆႇမဝ်းလႆႈလေႃႇ” သႆၢတႃၵေႉတူၺ်းသႆၢႁိူင်းသေ ယၵ်ႉတူၺ်းၼႃႈသၢဝ်မၼ်းယူႇၼၼ်ႉယဝ်ႉ။
“မၼ်းၶႂ်ႈမဝ်းယဝ်ႉဝႃႈၼၼ်ႉၼွင်ႉ ယႃႇသူၼ်ၸႂ်မၼ်းၼႃႈ” ဢေးဢၢမ်လၢတ်ႈၵႂႃႇ။
“ၶႂ်ႈၵိၼ်သင်ၵေႃႈၵိၼ်လႄႈၼႃႈ မိူဝ်ႈၼႆႉႁဝ်းလဵင်ႉၵူၺ်း ၵွပ်ႈပိူဝ်ႈပဵၼ်ဝၼ်းဢၼ်ႁဝ်းလႆႈလွတ်ႈလႅဝ်း လွတ်ႈဢွၵ်ႇၶွၵ်ႈႁၵ်ႉပိူၼ်ႈယဝ်ႉ”
သႆၢတႃသႆၢႁိူင်းယၵ်ႉတူၺ်းၸူး ယိင်းသႅင်ဢၼ်ဢမ်ႇလႆႈသူၼ်ၸႂ်သင်မၼ်းယဝ်ႉၼၼ်ႉ ဢဝ်သီၼႃႈမွင်ၵႂႃႇယူႇ။
ယိင်းသႅင်ၼၼ်ႉတႄႉ ဢမ်ႇသူၼ်ၸႂ်သင်သေ ဢိုၵ်ႉၵိၼ်ႁိုဝ်ႈၵိၼ် မဝ်းပေႃးတၢၼ်ႇမႃၵေႃႈ လၢတ်ႈဝႃႈဢမ်ႇပဵၼ်သင် ဢမ်ႇပဵၼ်သင်ၼႆတိၵ်းတိၵ်းၵူၺ်း၊ ႁူဝ်ၸႂ်ၵူၼ်းတူၺ်း သမ်ႉပေႃးဢိုၵ်ႉၼိုၵ်ႉထိုင်တီႈ လႆႈဢဝ်ၼမ်ႉတႃၸိုမ်ႉယမ်းၸွမ်းယဝ်ႉ။
“ပေႃးလႆႈယဝ်ႉၼႃႈဢေးသႅင်”
“ၵဝ်ဢမ်ႇပဵၼ်သင် လၢတ်ႈယဝ်ႉလူး ပွႆႇၵဝ်ဝႆႉၸိူင်ႉၼႆသေဝၼ်းၼိုင်ႈဢမ်ႇလႆႈႁႃႉ ၵဝ်ပေႃးတေႉယဝ်ႉဢိူဝ်ႈ”
“ပီႈသႆၢႁိူင်း မိူဝ်းသူင်ႇၼွင်ႉၶဝ်ၵွၼ်ႇလႄႈ ဢေးသႅင်တႄႉၶႃႈတေတူၺ်းၵူၺ်း”
ၸႆၢးသႆၢႁိူင်းၵေႃႈ ဢမ်ႇတၵ်းသဵင်သင်သေ ၸွမ်းသူင်ႇၼွင်ႉၶဝ်မိူဝ်းယဝ်ႉ၊ ဢေးဢၢမ်ၶႃၵေႃႈဢွၵ်ႇလၢၼ်ႉမိူဝ်းၵႂႃႇ ပႆၵႂႃႇဢမ်ႇပေႃးၵႆ ဢေးသႅင်တႄႉၸူၵ်းၵူင်ၶေႃးသေဢေႃႉယူႇႁိမ်းတၢင်းၼၼ်ႉယဝ်ႉၼႃႇ။
ၸႆၢးသႆၢႁိူင်းၵေႃႈ မိူဝ်းၵႂႃႇဢမ်ႇလိုမ်းၸႂ်သေ ၶိုၼ်းပွၵ်ႈမႃးၸူးၶႃ
“ႁႂ်ႈပီႈဢဝ်မိူဝ်းလႄႈ မိူဝ်းၸိူင်ႉၼႆမိူဝ်ႈလႂ်တေႁွတ်ႈ”
ၸေးဢဝ်ဢေးသႅင်ၶီႇလင်မၼ်းမိူဝ်းၵႂႃႇလွႆးလွႆးယဝ်ႉ၊ ဢေးဢၢမ်ၵေႃႈယိပ်းၶႅပ်းတိၼ်ဢေးသႅင်မိူဝ်းၵႂႃႇၸွမ်းလင်။ မိူဝ်းထိုင်ႁိူၼ်းယဝ်ႉ
“ဢၢမ် မိူဝ်းပႂ်ႉႁဝ်းၼႂ်းႁိူၼ်းၵွၼ်ႇလႄႈၼႃႈ ႁဝ်းမီးလွင်ႈတေလၢတ်ႈတီႈပီႈသႆၢႁိူင်း”
မိူၼ်ဢေးသႅင်တိုၵ်ႉမီးသတိလီယူႇလႄႈ ဢေးဢၢမ်ၵေႃႈၶဝ်ႈမိူဝ်းၵႂႃႇၼႂ်းႁိူၼ်းပႅတ်ႈယဝ်ႉ ဝႆႉၵိုတ်းၶႃသွင်ၵေႃႉၵူၺ်းယဝ်ႉလႄႈ ၼင်ႈတၢၵ်ႇလူမ်းယူႇတီႈၼႃႈၽၵ်းတူဝၢင်းၼၼ်သေ သဵင်ယဵၼ်ၵႂႃႇတင်းႁိုင်ယဝ်ႉ။
“ႁဝ်းဢမ်ႇပဵၼ်သင်ယဝ်ႉၼႃႈ ႁဝ်းယွမ်းၽိတ်းယူႇဢိူဝ်ႈ…လႄႈ ႁဝ်းၵေႃႈယိၼ်းၸူမ်းသူ ၸူမ်းယဝ်ႉၼႃႈတီႈမႃးသူင်ႇ”
“ဢေႃႈ”
ဢေးသႅင်ၵေႃႈတၢဝ်းတိဝ်းၶဝ်ႈမိူဝ်းၵႂႃႇၼႂ်းႁိူၼ်းယဝ်ႉ ၸႆၢးသႆၢႁိူင်းၵေႃႈ သမ်ႉပေႃးဢမ်ႇႁူႉတေလႆႈလၢတ်ႈသင်ထႅင်ႈ။
“မႂ်းလၢတ်ႈသင်တီႈမၼ်းလႃႇ..” ဢေးဢၢမ်ၶႂ်ႈႁူႉၼႃႇလႄႈထၢမ်။
“ၵဝ်ၶႂ်ႈယိၼ်းၸူမ်းမၼ်းၵူၺ်း ဝူၼ်ႉဝႃႈမၼ်းတေသုတ်းၵႂႃႇတေႉတေႉယဝ်ႉ”
“ႁႂ်ႈမၼ်းပဵၼ်ၼၼ်တေႉၵူၺ်းလႃႈ မၼ်းႁဵတ်းတေႃႇမႂ်းပေႉၼၼ်ႉ မႂ်းယင်းတိုၵ်ႉၸူမ်းမၼ်းယူႇလႃႇ”
“မၼ်းထုၵ်ႇလီလႆႈႁပ်ႉဢိူဝ်ႈ ယိၼ်းၸူမ်းဢၼ်လႆႈႁူႉၸၵ်းမၼ်း ၶၢဝ်းယၢမ်းၸိူဝ်းပူၼ်ႉမႃးၼၼ်ႉႁဵတ်းႁႂ်ႈလႆႈႁူႉဝႃႈ မၼ်းဢမ်ႇထိူၵ်ႈလႆႈႁပ်ႉတၢင်းႁၵ်ႉၵဝ်ထႅင်ႈ၊ ယိၼ်းၸူမ်းယဝ်ႉ ဢၼ်ႁဵတ်းႁႂ်ႈႁဝ်းတႅပ်းတတ်းႁႂ်ႈၶၢတ်ႇလႆႈ၊ ယိၼ်းၸူမ်းယဝ်ႉ ဢၼ်ပၼ်တိုဝ်ႉတၢင်းႁႂ်ႈလႆႈထူပ်းၵူၼ်းၵေႃႉဢၼ်ထုၵ်ႇလီလႆႈႁပ်ႉတၢင်းႁၵ်ႉႁဝ်း”
“ၶႂ်ႈဝႃႈ မႂ်းၵေႃႈမီးထႅင်ႈယဝ်ႉ”
“သမ်ႉဝႃႈမိူဝ်ႈလဵဝ်ဢမ်ႇမီးၵေႃႈ မၼ်းတေမီးယူႇၵႂႃႈဝၼ်းၼိုင်ႈ မိူဝ်ႈလႂ်ၸင်ႇမိူဝ်ႈၼၼ်ႉၵူၺ်းယဝ်ႉ”
“ယုမ်ႇၸႂ်လႆႈတေႉၼေႃႈ ဝႃႈမႂ်းတေဢမ်ႇၵႂႃႇႁႃမၼ်းထႅင်ႈ”
“မၼ်းဢမ်ႇမီးၵႃႈၶၼ်ထိုင်တီႈတေလႆႈသေလႆၢယူႇယဝ်ႉ”
တၢင်းႁၵ်ႉဢမ်ႇလႆႈလူႉလႅဝ်ၵႂႃႇယွၼ်ႉဢမ်ႇလႆႈႁၵ်ႉၵၼ်၊ ယွၼ်ႉဢမ်ႇမီးသႅတ်ႉၸႃႇတေႃႇၵၼ်သေ သမ်ႉဝႃႈတိုၵ်ႉႁၵ်ႉယူႇၵေႃႈ ၵႃႈတေလႆႈပွႆႇၵႂႃႇယဝ်ႉ။
မိူဝ်ႈမၼ်းသုတ်းၵႂႃႇယဝ်ႉၼၼ်ႉ ႁႂ်ႈမၼ်းသုတ်းသဵင်ႈၵႂႃႇလူၺ်ႈလီသေ သမ်ႉဝႃႈယၵ်ႉတူၺ်းၼႃႈၵၼ်ယူႇၵေႃႈ ဢမ်ႇလႆႈၸၢၼ်ႈၸင်းၵၼ်လႄႈ ယုမ်ႉလၢတ်ႈဢုပ်ႇတေႃႇၵၼ်ၼင်ႇဢူၺ်းၵေႃႉလႆႈယူႇ။
မႆၢတွင်း မိူဝ်ႈၽွင်းဢူၺ်းၵေႃႉသုမ်းႁၵ်ႉသေ ၶႂ်ႈၽၢၵ်ႇတွၼ်ႈထိုင်မၼ်းဝႃႈ “ၵူၼ်းၵေႃႉဢၼ်ႁၵ်ႉမႂ်းတေႉတေႉၼၼ်ႉ မၼ်းဢမ်ႇၶႂ်ႈႁၼ်မႂ်းၸဵပ်း ဢမ်ႇဝႃႈတၢင်းတူဝ်ႁိုဝ်တၢင်းၸႂ်၊ ဝူၼ်ႉဝႃႈမႂ်းတေဢဝ်ၶၢမ်ႈပူၼ်ႉမၼ်းၵႂႃႇလႄႈ တေလႆႈထူပ်းလွင်ႈလီလီ ၵူၼ်းလီလီ ၵူၼ်းၵေႃႉဢၼ်ထိူၵ်ႈလႆႈႁပ်ႉတၢင်းႁၵ်ႉမႂ်းၼၼ်ႉယူႇၼႃႈ”
ပႆၢၵမ် – သႅၼ်ငဝ်း
04/12/2025
