လုင်းသၢင်ႇမွင်ႇၵေႃႈယုမ်ႉယုမ်ႉသေ “ၵႂႃႇယဝ်ႉဝႃႈ ၶဝ်တေပႃး ၵၼ်ၵႂႃႇလႄႇတီႈလႂ်တႄႉဢမ်ႇႁူႉယဝ်ႉ။ ပေႃးဢမ်ႇၵိၼ်လဝ်ႈ ၵိၼ်သင် တႄႉၶႅၼ်းယူႇ ဢမ်ႇပေႃးလႆႈမႆႈၸႂ်”
ၼႂ်းသႅင်ႇၶဝ်ႈၽၵ်းတႆး/ထႆး တီႈႁူဝ်ဝၢၼ်ႈ ဝၢၼ်ႈၼွင်ႁီးၼႆႉသမ်ႉ
“မိူဝ်ႈလဵဝ်ၶဝ်ႈၵေႃႈၵိၼ်ယဝ်ႉ ၸၢမ်ၶမ်းတေၶႂ်ႈလႄႇတီႈလႂ်ထႅင်ႈလႃႇ”
“မႃးႁဝ်းၵႂႃႇလႄႇတီႈၵွင်းမူးၼၼ်ႉ ၶိုၼ်းၼေႃႈပီႈသၢႆၶိူဝ်း ဝၼ်းၼၼ်ႉ ၶႂ်ႈပေႃႉၶႅပ်းႁၢင်ႈၵေႃႈ ဢမ်ႇလႆႈပေႃႉႁေလႄႈ တႆးၵေႃႉၼွင်ႉၵေႃႉၼႆႉ ၵေႃႈတေၵႂႃႇၼႆဝႃႈ ဢေႃႈ ၼွင်ႉပေႃးလိုမ်းၵႂႃႇယဝ်ႉၶႃႈၼေႃ ပီႈသၢႆၶိူဝ်း ၶႃႈ ၵေႃႉၼႆႉၸိုဝ်ႈႁွင်ႉဝႃႈ ၼူၼ်းႁွမ်ၼႆဢေႃႈ ၼႆႉသမ်ႉႁွင်ႉဝႃႈ ပီႈသၢႆ ၶိူဝ်းၼႆဝႃႇ ၼူၼ်းႁွမ်”
“ငိၼ်းၸူမ်းတႄႉယဝ်ႉၶႃႈ လႆႈမႃးႁူႉၸၵ်းပီႈသၢႆၶိူဝ်းၸိူင်ႉၼႆ”
“ပီႈၵေႃႈငိၼ်းၸူမ်းတေႉတေႉဢိူဝ်ႈတီႈလႆႈမႃးႁူႉၸၵ်းၼူၼ်းႁွမ်ၸိူင်ႉၼႆ”
“ဢေႃႈၶႃႈ ပေႃးမီးၶၢဝ်းယၢမ်း လႆႈမႃးလႄႇ တၢင်းၺွင်ႇၶမ်းၼႆႉၵေႃႈ မႃးလႄႇပႃးၼူၼ်းႁွမ်ၶဝ်ၶႃႈလႄႈၼႃႉ။ ႁိူၼ်းၼူၼ်းႁွမ်ၶဝ်ၶၢႆသႅင်ႇဝႆႉ ၼင်ႇၵဝ်ႇဢေႃႈ။ ဝႃႈလႃးၵေႃႈ ပီႈသၢႆၶိူဝ်း ဢမ်ႇပေႃးမိုတ်ႈတၢင်းပွၵ်ႉ ၼူၼ်းႁွမ်ၶဝ်ၶႃႈယူဝ်ႉတေႃႈ”
“ၸိူင်ႉၼၼ်တႄႉဢမ်ႇဝႃႈလေႃႇ ၼူၼ်းႁွမ်ၵေႃႈ ၼူၼ်းႁွမ်ၶဝ်ပဵၼ် ၵူၼ်းႁၢင်ႈလီသမ်ႉပၢႆသူပ်းဝၢၼ်တၢၼ်ႇၼႆႉ ပဵၼ်ၽႂ်ၵေႃႈတိုၼ်းၶႂ်ႈမိုတ်ႈ ယဝ်ႉဝႃႈ”
“ဢႃႉၼေႃ တၢႆႁေလႃႈ တင်ႈတႄႇၵိူတ်ႇမႃး ၼူၼ်းႁွမ်ပႆႇတွၼ်ႉယၢမ်ႈ လႆႈငိၼ်းၵႂၢမ်းၸိူင်ႉၼႆသေပွၵ်ႈ ပီႈသၢႆၶိူဝ်းၼႆႉ မေႃယွင်ႈပိူၼ်ႈတႄႉ ယဝ်ႉၼေႃ။ ဢမ်ႇတၢပ်ႈယွင်ႈတၢၼ်ႇၼၼ်ႉၵေႃႈလႆႈယူႇၶႃႈၼႃ ၵမ်ႉမႃး တိၼ်ၼူၼ်းႁွမ်တေဢမ်ႇၸပ်းလိၼ်ယဝ်ႉၶႃႈၼေႈ” ယုမ်ႉပႃးၼႃႈလီဢၢႆဢွၼ်ႇဝႆႉယူႇ။
“ၵူၺ်းၵႃႈပီႈၶႂ်ႈလၢတ်ႈၼႄၼူၼ်းႁွမ်ဝႃႈ”
“ပီႈသၢႆၶိူဝ်းမီးၼႃႈႁိူၼ်းယဝ်ႉၶႃႈႁႃႉ”
“ၼႃႈႁိူၼ်းတႄႉဢမ်ႇမီး ပီႈၶႂ်ႈလၢတ်ႈၼႄၼူၼ်းႁွမ်ဝႃႈ ပီႈၼႆႉဢမ်ႇ ၸႂ်ႈၵူၼ်းမီးငိုၼ်းၶမ်း ဢမ်ႇၸႂ်ႈၵူၼ်းမီးလူတ်ႉမီးၵႃးမိူၼ်ပိူၼ်ႈၼႆဢိူဝ်ႈ ပေႃႈမႄႈၵေႃႈဢမ်ႇမီးယဝ်ႉ တီႈယူႇတီႈသဝ်းၵေႃႈဢမ်ႇမီး မိူဝ်ႈလဵဝ်လႆႈ မႃးၸွၼ်ယူႇၸွမ်း ၵေႃႉပဵၼ်ပႃႈၵူၺ်းၼႆဢိူဝ်ႈ။ ပီႈတႄႉပေႃးမႃးဝူၼ်ႉ ၸွမ်းၸၢတ်ႈပၢၼ်ပီႈတႃႇမိူဝ်းၼႃႈၼႆႉတႄႉ တႃႇတေယုမ်ႉတေၶူဝ်ၵူၺ်း ၵေႃႈပေႃးပဵၼ်ယၢပ်ႇၵွၼ်ႇဢိူဝ်ႈ ၼူၼ်းႁွမ်”
“ဢေႃႈ ၸိူင်ႉၼၼ်ၶႃႈႁႃႉ ဢမ်ႇပဵၼ်သင်ၶႃႈ ၵူၼ်းႁဝ်းၼႆႉပေႃးမီးတၢင်း ၶတ်းၸႂ်ယူႇတႄႉ ၸၢင်ႈၶိုတ်းပိူၼ်ႈလႆႈယူႇၶႃႈ”
“ယိၼ်းၸူမ်းတႄႉယဝ်ႉၼူၼ်းႁွမ် ပၼ်ႁႅင်းပီႈၸိူင်ႉၼႆၼႆႉ ပီႈတေဢဝ် ၶေႃႈၵႂၢမ်းပၼ်ႁႅင်းၼူၼ်းႁွမ်ၼႆႉသေ ႁဵတ်းႁႅင်းၸႂ်ၶတ်းၸႂ်ၵႂႃႇၵႂႃႈ”
“ၸၢမ်ၶမ်း လပ်းပႅတ်ႈယဝ်ႉယူဝ်ႉ ဢမ်ႇလၢတ်ႈသင်ၸွမ်းသေဢိတ်း လႃႇ”
“ၼွင်ႉတေႁဵတ်းႁိုဝ် ၸၢင်ႈလၢတ်ႈၸွမ်း သေဢိတ်းယဝ်ႉၶႃႈလႃႇ ၵဝ် လၢတ်ႈမႂ်းလၢတ်ႈမႃးလၢတ်ႈယူႇၸိူင်ႉၼၼ်”
“ဢေႃႈၶႃႈ လူင်းၵႃးလႆႈယဝ်ႉယူဝ်ႉ ပေႃးတေပေႃႉၶႅပ်းႁၢင်ႈယူႇၵေႃႈ” ၸၢႆးသၢႆၶိူဝ်းတင်းလၢတ်ႈတင်းလူင်းၵႃးသေ ယိပ်းဢဝ်ၵွင်ႈထႆႇ မၼ်းပႆ မႃးဢွၼ်တၢင်းၶဝ်ယူႇ။
ၸၢမ်ၶမ်းၵေႃႈတင်းပႆမႃး တင်းမေးသိူဝ်ႈၶူဝ်းမၼ်းသေ “ပေႃႉတင်း ၼၼ်ႉၶႃႈလေႃႇပီႈသၢႆၶိူဝ်း”
“ပီႈတႄႉဢမ်ႇပေႃႉၵေႃႈလႆႈယူႇယူဝ်ႉၼေႃႈၸၢမ်ၶမ်း”
ၼၢင်းၸၢမ်ၶမ်းၸႂ်ႉၼႃႈဢမ်ႇႁၢၼ်ႉၸႂ်သေယၵ်ႉတူၺ်းမၼ်းၸၢႆးယဝ်ႉ “ပေႃးပီႈသၢႆၶိူဝ်းဢမ်ႇပေႃႉၵေႃႈတိုၼ်းဢမ်ႇလူဝ်ႇပေႃႉသေၵေႃႉယဝ်ႉ ၵွင်ႈထႆႇၼၼ်ႉၵေႃႈ ဢဝ်ထိုမ်ႈပႅတ်ႈလႃႈ”
“ပီႈဝႃႈလဵၼ်ႈၵူၺ်းၼေႈ ယႃႇၸႂ်လမ်ၼႃ ၵမ်ႉမႃးတေဢမ်ႇႁၢင်ႈလီ ယဝ်ႉဝႃႈ”
ၼၢင်းၼူၼ်းႁွမ်တႄႉယင်းတိုၵ်ႉမေးၶူဝ်းမၼ်းယူႇတီႈၵႃးၼၼ်ႉလႄႈ
“ၼူၼ်းႁွမ်”
“ဢေႃႈ”
“ပီႈယွၼ်းပိုင်ႈၼူၼ်းႁွမ်ဢဝ်မႃးပႃးၶႃတမ်းၵွင်ႈထႆႇပီႈၼၼ်ႉလူး”
“ဢေႃႈၶႃႈ”
“ယေႃႈၸၢမ်ၶမ်းပေႃႉပၼ်ပီႈလူႉ” ၸၢႆးသၢႆၶိူဝ်းယိုၼ်ႈၵွင်ႈထႆႇပၼ်မၼ်းယဝ်ႉ
“ပေႃႉဢဝ်ၶိုင်ႈတူဝ်ၵူၺ်းၶႃႈႁႃႉ”
မၼ်းၸၢႆးယုမ်ႉႁမ်ႉပႃးၶႂ်ႈၶူဝ်ဢိတ်းဢိတ်းလႄႈ “ၵမ်ႉၵွၼ်ႇလူးၸၢမ်ၶမ်း ဢႃ..ဢမ်ႇၶႅမ်ႉယဝ်ႉယူဝ်ႉၼၼ်ႉ မွတ်ႇပႅတ်ႈ ၶိုၼ်းလႃႈ လႂ်မႃး ပီႈမွတ်ႇပႅတ်ႈ”
“ဢမ်ႇမွတ်ႇၶႃႈလေႃႇ ၼွင်ႉတေဢဝ်ဝႆႉဢေႃႈၼႆႉ” မၼ်းတၢင်းဢဝ် ၵွင်ႈထႆႇ ပႅပ်ႉပႅတ်ႈၽၢႆႇလင်လႄႈ ၸၢႆးသၢႆၶိူဝ်းဢမ်ႇၸၢင်ႈႁိမ်ဢဝ်လႆႈ။
“ပေႃးၼၼ်မႃးလႄႈပီႈပေႃႉ ပီႈတေဢဝ်တၢင်ႇဝႆႉတီႈၼႃႈၶွမ်းပီႈ”
“ၼွင်ႉၵေႃႈလူဝ်ႇဢဝ်တၢင်ႇဝႆႉတီႈၼႃႈၶွမ်းၼွင်ႉၼင်ႇၵဝ်ႇၶႃႈလေႃႇ”
“ပေႃးၼၼ် ၸၢမ်ၶမ်းဢမ်ႇပၼ်ပီႈႁႃႉဢေႉ”
“ဢမ်ႇၸႂ်ႈဢၼ်ၶႅပ်းႁၢင်ႈပီႈသၢႆၶိူဝ်းၼၼ်ႉၶႃႈၼေႈ ၼွင်ႉတေဢဝ်ဝႆႉ ဢူး..ၶႅပ်းႁၢင်ႈၼွင်ႉမီးၼမ်ၼႃႇ ၸင်ႇၵွႆႈပႂ်ႉလိူၵ်ႈဢဝ်ၶႃႈလႃႈ”
“ၵႂႃႇၸုၵ်းၸွမ်းၸၢမ်ၶမ်းလႄႈၼူၼ်းႁွမ် ပီႈတေၶဵင်ႇတေပေႃႉဢိူဝ်ႈ” ၸၢႆးသၢႆၶိူဝ်းမႃးၸုၵ်းႁိမ်းၶဝ်သေယဝ်ႉ ၵွင်ႈထႆႇၵေႃႈ ႁဵတ်းၵၢၼ်ႁင်း ၵူၺ်းမၼ်းသေယဝ်ႉ ၸၢမ်ၶမ်းမႃးဢဝ်သေ တူၺ်းၶိုၼ်းယူႇလႄႈ လႆႈ ႁၼ်ပႃးၶႅပ်းႁၢင်ႈလႄႈဝီႇတီႇဢူဝ်ႇ ဢၼ်ၸၢႆးသၢႆၶိူဝ်းႁွင်ႉၵႂၢမ်းၸိူဝ်း ၼၼ်ႉလႄႈ ၶဝ်သွင်ၵေႃႉႁိမ်ၵၼ်တူၺ်းယူႇလႄႈ ၸၢမ်ၶမ်းၸင်ႇဝႃႈ
“ပီႈသၢႆၶိူဝ်းၼႆႉ မီးၶႅပ်းႁၢင်ႈၵေႃႈဢမ်ႇၼႄပိူၼ်ႈဝႃႈ ၸႂ်ၵူတ်ႉၼႃႇ”
ၵႃးၶဝ်ၵေႃႈၶိုၼ်းတႆႇတဵၼ်ႈလႅၼ်ႈၶဝ်ႈဝဵင်းမႃးၶိုၼ်းယဝ်ႉ “မိူဝ်းသူင်ႇၼူၼ်းႁွမ်ၵမ်ႉၼေႃႈ”
“ၶိူဝ်သွင်ၵေႃႉၶႂ်ႈၵႂႃႇလႄႇတီႈလႂ်ထႅင်ႈလႃႇတေႃႈ”
“ၸၢမ်ၶမ်း ၼွင်ႉတေဝႃႈႁိုဝ် ၵိၼ်တၢင်းၵိၼ်ထႅင်ႈၼႄႇ ပီႈတေၵေႃႉ လဵင်ႉ”
ၼူၼ်းႁွမ်ၸင်ႇဝႃႈ “ၵိုတ်းၵႃးတီႈသႅင်ႇတၢင်းၼႃႈၼၼ်ႉၶႃႈလႄႈ ပေႃး ၸိူင်ႉၼၼ်ၵေႃႈ ၶဝ်ၶၢႆဢဢေးဢေႃႈတီႈၼၼ်ႈ”
“ၼႄႈပီႈၵႆႉဝႃႈႁင်းၸၢမ်ၶမ်းတႃႇသေႇ မႃးထႅင်ႈၵေႃႉၼိုင်ႈယဝ်ႉ ဢၢႆႈ ဢေးဝႃႇ၊ ၽလူႇတႃႇဝႃႈ ထူဝ်ႇၽူးၼူၺ်းဝႃႈ ၶဝ်ႈသွႆးယေႇၸဵင်ႇဝႃႇ ၸိူဝ်းၼႆႉ ၵႂၢမ်းတႆးဢမ်ႇမီးႁႃႉၼေႃ”
ၵိုတ်းၵႃးမၼ်းသေ “လူင်းမႃးလႄႈပေႃးတေၵိၼ်ဢၢႆႈဢေးၵေႃႈ သႂ်ႇပႃး ယေႇၶေး သိုဝ်ႉမိူဝ်းပႃးတွၵ်ႉယေႇတၢၼ်ႉႁေယူဝ်ႉၼေႃႈၼူၼ်းႁွမ်”
“ပီႈသၢႆၶိူဝ်းၼႆႉ ၸၢင်ႈၵိူဝ်ႉပိူၼ်ႈၼႃႇဢေႉၼေႃ”
“ဝႃႈတႄႉၵေႃႈၼူၼ်းႁွမ်ၶဝ်မေႃမိုတ်ႈပိူၼ်ႈယူႇလူး လီႁၵ်ႉၼႃႇလေႃႇ ၸၢမ်ၶမ်း ႁဝ်းသိုဝ်ႉတႅင်မိူဝ်းလဵင်ႉပႃႈႁဝ်းလုင်းႁဝ်းၶဝ် တေႃႈ လိူၵ်ႈဢဝ် လုၵ်ႈယႂ်ႇယႂ်ႇမၼ်းၼၼ်ႉလႄႈၼႃႉ”
ၵိၼ်တၢင်းၵိၼ်ယဝ်ႉ ၸၢမ်ၶမ်းလိူၵ်ႈတႅင်သိုဝ်ႉတႅင်ယဝ်ႉၵေႃႈ မႃးသူင်ႇ ၼူၼ်းႁွမ်ယူႇ။
“ပီႈသၢႆၶိူဝ်းၶဝ် ဢမ်ႇၵိုတ်းလႄႇၼူၼ်းႁွမ်ယဝ်ႉၶႃႈႁႃႉ”
“လႆႈၵွၼ်ႇယဝ်ႉၼူၼ်းႁွမ် တၢင်ႇပွၵ်ႈၸင်ႇမႃးလႄႇ ပေႃးလႆႈႁူႉၸၵ်း ၵၼ်ႁၼ်ႁိူၼ်းၵၼ်ယဝ်ႉၸိူင်ႉၼႆတႄႉ ၵမ်ႉမႃး ၵူဝ်ၼူၼ်းႁွမ်ၶဝ်လီ ၸင်းလူးၵွၼ်ႇဢိူဝ်ႈ”
“ဢူး ဢမ်ႇၸင်းၶႃႈလေႃႇ ၵူၺ်းၵူဝ်ဢမ်ႇမႃးၵွၼ်ႇဢေႃႈ”
“မိူဝ်းၵွၼ်ႇၼႃႉ”
“ဢေႃႈၶႃႈ လွႆးလွႆးၶႃႈပေႃးၼၼ်”
သၢႆၶိူဝ်းငွၵ်းႁူဝ်ၼႄမၼ်းၼၢင်းယုၵ်ႉမိုဝ်းပၢႆးပၢႆၼေသေ “လွႆးလွႆးၼႃႉၸၢမ်ၶမ်း”
ၸၢမ်ၶမ်းပၢႆးပၢႆၼေသေၶိုၼ်းမိူဝ်းၵႂႃႇယဝ်ႉ မၼ်းၼၢင်းၶဝ်ႈသႅင်ႇမႃးယဝ်ႉ
“သူၵႂႃႇလႄႇတီႈလႂ်မႃးလႃႇၼူၼ်းႁွမ်” တႆးၵေႃႉမၼ်းထၢမ်။
“ၵႂႃႇလႄႇၵွင်းမူးၵျွင်းလွႆမႃးဢိူဝ်ႈ သူမႃးႁိုင်ယဝ်ႉႁႃႉသႅင်ၼူၼ်း”
“ဢမ်ႇပေႃးႁိုင်ၵႃႈႁိုဝ်ၼင်ႇၵဝ်ႇ ၵႃးမၢဝ်ႇတီႈလႂ်လႃႇမႃးသူင်ႇသူၼၼ်ႉ”
“ၸၢင်ႈပဵၼ်မၢဝ်ႇတီႈလႂ် ၵူၼ်းမႃးယူႇၸွမ်းပႃႈသူၺ်ႇၼူႉပွၵ်ႉတူၵ်းၼႆ ဝႃႇ”
“တင်းၸၢမ်ၶမ်းဢမ်ႇၸႂ်ႈႁႃႉၼၼ်ႉ ယူဝ်ပဵၼ်မၢဝ်ႇမၼ်းယူဝ်ႉ”
“ဢမ်ႇႁူႉ ၸၢမ်ၶမ်းတႄႉဝႃႈဢမ်ႇၸႂ်ႈသင်ၵၼ်ၼႆဝႃႇ ဢမ်ႇၸႂ်ႈတႄႉ ၼင်ႇၵဝ်ႇယူဝ်ႉ ယူဝ်ပဵၼ်ၵူၼ်းႁေႃႈၵႃးပၼ်ပိူၼ်ႈၵူၺ်းတႄႉယူဝ်ႉသူဝႃႈ ၵေႃႈယဝ်ႉလႃႈ ႁဝ်းဢမ်ႇၶဝ်ႈၸႂ်သင် တေထၢမ်ၸၢမ်ၶမ်းၼၼ်ႉၵေႃႈ မႃႇပေႃးတၵ်းသဵင်ၼႄႇၼႃ”
ၸၢႆးသၢႆၶိူဝ်းႁေႃႈၵႃးမႃးလွႆးလွႆးသေ “ၸၢမ်ၶမ်းမိူဝ်ႈၽုၵ်ႈပိူၼ်ႈၶိုၼ်ႈၵျွင်းယဝ်ႉဢမ်ႇၸႂ်ႈႁႃႉၼွင်ႉ”
“ဢေႃႈၸႂ်ႈတႄႉဢေႃႈၼၼ်ႉ”
“ၼွင်ႉဢမ်ႇႁဵတ်းဢူတ်ႇမွၵ်ႇဢူတ်ႇတွင်သင်ႁႃႉ”
“ဢမ်ႇၶႃႈ ပီႈၶမ်းလိုၼ်းၵေႃႉႁဵတ်းၵူၺ်း ၼွင်ႉဢမ်ႇမေႃ”
“ၸၢမ်ၶမ်းၵေႃႈလီလႆႈၽိုၵ်းႁဵတ်းဢိူဝ်ႈ ဢမ်ႇၵွမ်ႉဝႃႈဢူတ်ႇမွၵ်ႇၵူၺ်းၼႃ ၵၢၼ်ၼႃႈႁိူၼ်းဢၼ်ပဵၼ်ၵၢၼ်ၼၢင်းယိင်းၵူႈလွင်ႈလွင်ႈၼႆႉ ဢမ်ႇမေႃၵေႃႈၼွင်ႉလူဝ်ႇလႆႈၽိုၵ်းဢိူဝ်ႈၼႃ”
“ဝၢႆးၼႆႉမႃးပေႃးၼွင်ႉမီးၼႃႈႁိူၼ်းမႃးၼႆ ဢၼ်လႂ်ၵေႃႈဝႃႈဢမ်ႇမေႃႁဵတ်းၼႆတႄႉ ၼႃႈလဵၵ်ႉၼႃႇၵူၺ်ႉ ယဝ်ႉၵေႃႈ ပိူၼ်ႈၸၢင်ႈထၢင်ႇလဵၵ်ႉသေ ၸၢင်ႈပဵၼ် တီႈပိူၼ်ႈသေႉၼေးၵူၺ်းဢိူဝ်ႈ ၵႃႈၶႂ်ႈႁၢင်ႈလီ ၵႃႈၶႂ်ႈပဵၼ်ၵူၼ်းမီး ၸၼ်ႉလိၵ်ႈၵႃႈၶႂ်ႈသုင်လႃႈ ၼၢင်းယိင်း ၵေႃႈတိုၼ်းလူဝ်ႇလႆႈႁူႉမေႃၵၢၼ်ၼၢင်းယိင်း တႃႇလုမ်းလႃးၼႃႈႁိူၼ်း ၸွမ်းၼင်ႇပုၼ်ႈၽွၼ်းၼၢင်းယိင်းၼၼ်ႉ ႁႂ်ႈတဵမ်ထူၼ်ႈဢိူဝ်ႈ။ ၵူၼ်း ၸၢႆးၵေႃႈတေႃႈၼၼ်ယဝ်ႉဝႃႈ ပေႃးဢမ်ႇမေႃၵၢၼ်သင်ၼႆတႄႉ ပိူၼ်ႈ ထၢင်ႇလဵၵ်ႉၼႃႇ ပိူၼ်ႈပၢႆႁွင်ႉဝႃႈ ဢၢႆႈသၢဝ်းၼၢဝ်းၼႆၵွၼ်ႇဢိူဝ်ႈ”
“ၼွင်ႉၵေႃႈဢမ်ႇမီးမႄႈမိူၼ်ပိူၼ်ႈၶႃႈၼႃႇ”
“ၵွပ်ႈၼၼ်ယဝ်ႉပီႈၸင်ႇဝႃႈ ၼွင်ႉလူဝ်ႇႁဵတ်းႁႂ်ႈပေႃႈ ပေႃးလႆႈၸႂ်ယႂ်ႇ ပႂ်ႉပိုင်ႈဢိင်လႆႈ ၵတ်းၸႂ်ၸွမ်းလႆႈဢိူဝ်ႈၼွင်ႉ”
ၼၢင်းၸၢမ်ၶမ်းငွၵ်းႁူဝ်ၼႄသေ ဝူၼ်ႉယူႇႁင်းမၼ်းဝႃႈ “ဢေႃဢၼ်ပီႈ သၢႆၶိူဝ်းလၢတ်ႈမႃးၼႆႉ ဢမ်ႇၸႂ်ႈၵႂၢမ်းသေႉၼေးလူးၼႆႉ ပဵၼ်ၵႂၢမ်းတွတ်ႇ တိုၼ်ႇပၼ်သတိဢိူဝ်ႈၼႆႉ ၸႂ်ႈယဝ်ႉ ၸႂ်ႈယဝ်ႉ ပီႈသၢႆၶိူဝ်းဝႃႈၼႆႉ ပေႃႈ မႄႈလႄႈလုၵ်ႈလၢင်း ၼၢင်းမေးလႄႈၸဝ်ႈၽူဝ် ပေႃႈလဵင်ႉလႄႈလုၵ်ႈ လဵင်ႉ ၸဝ်ႈႁိူၼ်းလႄႈတင်းၶႅၵ်ႇၸိူဝ်းၼႆႉ တိုၼ်းမီးပုၼ်ႈၽွၼ်းၽႂ်မၼ်း လူး တေႉယဝ်ႉတေႉယဝ်ႉ” ၼႆသေ
တႄႇၼွၼ်းမႃးၼၢင်းၸၢမ်ၶမ်းၵေႃႈ လႅၵ်ႈလၢႆႈမႃးပဵၼ်ၸၢမ်ၶမ်းထႅင်ႈ ၵေႃႉၼိုင်ႈယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ။
