ၸၢႆးသၢႆၶိူဝ်းလႄႈ ၼၢင်းၸၢမ်ၶမ်း တူၺ်းတၢင်းႁၢင်ႈလီၼႂ်းၼွင်ၼၢင်း ယီႈသႅင်ၵေႃႇ ဢမ်ႇၼၼ် ၼွင်ပၼ်ႇၼႆႉ တီႈၼိုင်ႈယဝ်ႉတီႈၼိုင်ႈသေ
“မိူင်းပၼ်ႇၼႆႉ ပိူၼ်ႈသမ်ႉႁွင်ႉၸွမ်းတီႈလႂ် ၵွပ်ႈသင်ႁွင်ႉဝႃႈမိူင်းပၼ်ႇ လႃႇၸၢမ်ၶမ်း”
“ဢေႃႈၸႂ်ႈတႄႉဢေႃႈၼေႃႈ မႃးၼွင်ႉဢွၼ်ၵႂႃႇ တူၺ်းတီႈၵုၼ်ပၼ်ႇ ၼႆၼၼ်ႉ မီးတၢင်းၼိူဝ်(ၽၢႆႇႁွင်ႇ) ပုၼ်ႉၼေႈ” ၵႂႃႇထိုင်ယဝ်ႉၵေႃႈ“ၼႆႉ ယဝ်ႉဝႃႈၵုၼ်ပၼ်ႇ ၵုၼ်လုၵ်ႈၼႆႉပေႃးသၢမ်လိူၼ်တေပၼ်ႇၶၢႆႉမီးၼိုင်ႈ ၽၢႆႇဢေႃႈၼႆႉ”
“ပိူၼ်ႈတႅမ်ႈလိၵ်ႈဝႆႉယူႇၼၼ်ႉ” ၸၢႆးသၢႆၶိူဝ်းယၵ်ႉတူၺ်းတီႈပၢႆႉၼၼ်ႉလႄႈ ႁၼ်တူဝ်လိၵ်ႈဢၼ်တႅမ်ႈ ဝႆႉဝႃႈ (ၵူၼ်ပၼ်ႇ) ၼႆလႄႈ ၸင်ႇဝႃႈ
“ၸၢမ်ၶမ်းဢၢၼ်ႇတူၺ်းတူဝ်လိၵ်ႈတီႈပၢႆႉၼၼ်ႉလီလီလူး”
ၼၢင်းၸၢမ်ၶမ်းတူၺ်းသေ “ၵူၼ်းတႅမ်ႈမၼ်းၽိတ်းၵေႃႈ ၵူၼ်းဢၢၼ်ႇ မၼ်းမေးသေယဝ်ႉၶႃႈလေႃႇ”
“ဢေႃႈ ဢေႃႈၶႃႈ မႄႈသြႃႇလူင်ႁဝ်းၶႃႈ” ယၢမ်းၼၼ်ႉ ၶမ်းႁွမ်လႄႈၶမ်း သႃႇမႃးၽၢႆႇလင်ၶဝ်သေ
“ႁိူၺ်ႉ! ၸၢမ်ၶမ်း”
ၼၢင်းၸၢမ်ၶမ်းတူၵ်းၸႂ်သေဝၢႆႇတူၺ်းယဝ်ႉ “ဢေႃ ၶမ်းသႃႇ သူမႃးႁိုင် ယဝ်ႉႁႃႉ”
“ၸင်ႇႁႃမႃးၽႅဝ်ၵူၺ်း ႁဝ်းမိူဝ်းတီႈႁိူၼ်းဢိူဝ်ႈ ႁႃးၶမ်းႁွမ်ဢၢင်ႈမိူဝ်း ႁွင်ႉသူၼႆၵႂႃႈ ၵျွင်းဝႃႈသူပေႃးလၵ်ႉမႃးပႅတ်ႈႁဝ်းယဝ်ႉၼေႃႈ ၸူဝ်ႈပိူၼ်ႈ မီးၵူၼ်းႁေႃႈၵႃးၼႆႉ ပိူၼ်ႈသမ်ႇၼႃႇၼေႃ ၶမ်းႁွမ်ၼေႃ”
“ၸႂ်ႈယဝ်ႉဝႃႈ” ၶမ်းႁွမ်ၵေႃႈတူၺ်းၸၢႆးသၢႆၶိူဝ်းသေ “တႃႉသေဝႃႈ (CRV) ၼႆႉ ဢမ်ႇႁၢင်ႈလီမိူၼ် (Fortuner) ၼေႃႈ ႁႃၵူၼ်းႁေႃႈမၼ်းယၢပ်ႇ ၼႃႇ”
ၸၢႆးသၢႆၶိူဝ်းၵေႃႈ ဢမ်ႇၸၢင်ႈတၵ်းသဵင်ၸွမ်း ဝႆႉၼႃႈယုမ်ႉယုမ်ႉသေ ထွမ်ႇၶဝ်ယူႇ မၼ်းၸၢႆးၸင်ႇဝႃႈ “ဢိူဝ်ႈဢိူဝ်ႈ ပေႃးၸိူင်ႉၼၼ်ၵေႃႈ ႁဵတ်းၼႆလႄႈ ၵွပ်ႈၸၢမ်ၶမ်းဢမ်ႇမိူဝ်းၸူဝ်းၶိူဝ်လႄႈ မၼ်းမီးတၢင်း ၽိတ်းၼႆသေ ႁႂ်ႈမၼ်းၵေႃႉလဵင်ႉၶဝ်ႈလႄႈ လႆႈယူႇၼေႃႈၸၢမ်ၶမ်း ၼေႃႈ”
မၼ်းၸၢႆးယၵ်ႉတူၺ်းၸၢမ်ၶမ်းသေ လၵ်ႉၽႅမ်ႉတႃယူႇ။
“ဢူဝ်ႇၶေႇၶႃႈ”
“ဢႃ ဢမ်ႇလႆႈၶႃႈလေႃႇ လူဝ်ႇလႆႈပၼ်တၢမ်ႇမၼ်းႁၢမ်ႉၼၵ်းꧦဢေႃႈ ၼႆႉ”
ၸၢႆးသၢႆၶိူဝ်းၸင်ႇဝႃႈ “ပေႃးမၼ်းၼၵ်းပူၼ်ႉတီႈၼႃႇၵေႃႈ ပီႈတေၵေႃႉ ႁပ်ႉတႅၼ်းၵူၺ်း ပၼ်မႃးလႃႈ ပေႃးမၼ်းၼၵ်းၼႃႇပီႈဢမ်ႇပေႉလႆႈၼႆ ၵေႃႈ ၶိူဝ်သွင်ၵေႃႉၵူၺ်းၼင်ႇၵဝ်ႇ ဢၼ်တေလႆႈၶိုၼ်းၸွႆႈပီႈ”
“ၶမ်းသႃႇၸင်ႇဝႃႈ ဢႃ ၼွင်ႉတႄႉဢမ်ႇၽွမ်ႉလေႃႇ ပီႈသၢႆၶိူဝ်းၼၼ်ႉ တႄႉ တုၵ်းတႃၸၢမ်ၶမ်းသမ်ႉဝႃႈ ႁေႉပႅတ်ႈလုမ်းလုမ်းၼႆႉ”
“ၵေႃႈ ပီႈပဵၼ်လုၵ်ႈလဵင်ႉၸၢမ်ၶမ်းလူး ၵႃႈတေလႆႈႁဵတ်းၸိူင်ႉၼၼ် ၵူၺ်းဢိူဝ်ႈလေႃႇ”
ၶမ်းႁွမ်ၸင်ႇဝႃႈ “တေႉႁႃႉၸၢမ်ၶမ်း” ၸၢမ်ၶမ်းငွၵ်းႁူဝ်ၼႄယူႇ
“ဢူဝ်ပေႃးၼၼ်တႄႉ ဢမ်ႇႁတ်းပၼ်တၢမ်ႇယဝ်ႉဝႃႈ မိူဝ်းလႃႈပေႃး ၼၼ်မိူဝ်း ပီႈသၢႆၶိူဝ်း” ၶမ်းႁွမ်ဝႃႈၼၼ်သေ ၸၼ်ပႃးၶႅၼ်မၼ်းၸၢႆးပႆ ဢွၵ်ႇမႃးယဝ်ႉ။
မၼ်းၸၢႆးပႆဢွၵ်ႇမႃးယဝ်ႉ မၼ်းၸၢႆးဝၢႆႇတူၺ်းၸၢမ်ၶမ်းသေ “ၸၢမ်ၶမ်း ၸွင်ႇပႃႈၶႂ်ႈမိူဝ်းၼႄႇၼွင်ႉ”
“ၼွင်ႉၶႂ်ႈဝႃႈၼၼ်ၸဵမ်မိူဝ်ႈၵႆႈယဝ်ႉဝႃႈ ၼွင်ႉတွင်ႉမႆႈၶဝ်ႈၼႃႇယဝ်ႉၶႃႈ ဢေႃႈၼႆႉ” ၼႆသေပႆၶိုၼ်ႈၶူဝ်မႃးယူႇ။
“ႁိူဝ်ႇ! ၸၢမ်ၶမ်း ၶမ်းသႃႇၶဝ်ပႆႇၶိုတ်းမႃးလႃႇ”
“ၵေႃႈယဝ်ႉလႃႈ မိူဝ်းလွႆးလွႆး မိူဝ်းပႂ်ႉတီႈၵႃးပုၼ်ႉၼေႈ”
“ၸၢမ်ၶမ်းမႃးလႄႇၸွမ်းပီႈၸိူင်ႉၼႆၼႆႉ ဢမ်ႇၵူဝ်မၢဝ်ႇၸၢမ်ၶမ်းထၢင်ႇ ၽိတ်းႁႃႉ”
“မၢဝ်ႇၵေႃႉလႂ် ၼွင်ႉဢမ်ႇမီးမၢဝ်ႇၶႃႈလေႃႇ ပိူၼ်ႈဢမ်ႇႁတ်းလၢတ်ႈ တေႃႇၼွင်ႉ ပိူၼ်ႈဝႃႈၼွင်ႉမၢၼ်ႇယႂ်ႇၼႃႇၼႆၼၼ်ႉ ၼွင်ႉၸင်ႇလႆႈပဵၼ် သၢဝ်ထဝ်ႈမႃးတေႃႇႁၢၼ်ႉၼႆႉၶႃႈၼႃႇ”
တီႈႁိူၼ်းပႃႈသူၺ်ႇၼူႉၶဝ်ၼႆႉသမ်ႉ
“ပီႈၼၢင်းႁဵတ်းသင်ယူႇလႃႇ”
“ဢေႃႈ သၢင်ႇမွင်ႇႁႃႉ ၼင်ႈၵွၼ်ႇလႄႈ သူတ်ႉၼမ်ႉမႆႉလူး ၸေႃးယဵၼ်ႇ ၸင်ႇႁႃလေႃႇမႃးမႂ်ႇမႂ်ႇၵူၺ်းဢိူဝ်ႈၼႆႉ ဢေႃႈတေႉဢိူဝ်ႈ ဢၢႆႈႁဝ်းၼႆႉလႆႈ ပေးၺူဝ်ႇမႃးဢိူဝ်ႈၼၼ်ႉ ၵဝ်ယင်းပႆႇတူၺ်းလႃႈၼၼ်ႉ”ပႃႈသူၺ်ႇၼူႉ ထူၵ်းဢဝ်ပေးၺူဝ်ႇမႃတမ်းလႄႈ လုင်းသၢင်ႇမွင်ႇသူတ်ႉၼမ်ႉၼဵင်ႈၵမ်း ၼိုင်ႈယဝ်ႉ ႁၵ်းဢဝ်ပေးၺူဝ်ႇပွတ်းၼိုင်ႈသေ
“ငိၼ်းဝႃႈပီႈၼၢင်းႁဝ်းၶႂ်ႈလႆႈၵႃးၼႆႁႃႉ”
“ဢိူဝ်ႈဝႃႈၼၼ်ယူႇဢိူဝ်ႈၼၼ်ႉ”
“ဢၢင်ႈၶႂ်ႈလႆႈၵႃးမဵဝ်းလႂ်လႃႇ”
“ဢၢႆႈႁဝ်းၼႆႉဝႃႈတႄႉ ဢဝ်ၵႃး (Vigo) ၵေႃႈလႆႈၼႆဝႃႈ ၵဝ်ထွမ်ႇတူၺ်း ၼႆႉ မၼ်းလႅပ်ႈၶႆႈလဵင်ႉၵႆႇလဵင်ႉမူယူဝ်ႉၼၼ်ႉ”
“ဢေႃႈ ဝီးၵူဝ်ႉၵေႃႈသၢင်ႇထုၵ်ႇယူႇတေႉၼင်ႇၵဝ်ႇဢိူဝ်ႈ”
“ၸွင်ႈလႅပ်ႈတေမီးၼႄႇသၢင်ႇမွင်ႇဝႃႈ”
“မီးဢိူဝ်ႈ ၵႃးတႄႉလိူင်ႇယူႇၵူၺ်း ၶႂ်ႈလႆႈဢၼ်ၵဝ်ႇၵေႃႈလႆႈ ၶႂ်ႈလႆႈဢၼ် မႂ်ႇၵွၵ်းၸေႈမၼ်းၵေႃႈ မီးယဝ်ႉဝႃႈ”
“ပေႃးသိုဝ်ႉၵေႃႈဢဝ်ဢၼ်မႂ်ႇမၼ်းဢိူဝ်ႈမႂ်းၵေႃႈ ၵိုင်ႇတၢင်းသိုဝ်ႉမၼ်း ”
“ၵႃးၵူၼ်းမၢဝ်ႇလူးၼေႃႈ မၼ်းမႃးယူႇၸွမ်းပီႈၼၢင်းႁဝ်းႁေယဝ်ႉႁႃႉ ၼၼ်ႉ”
“ဢိူဝ်ႈ ၵဝ်ဝႃႈ ႁႂ်ႈမႃးယူႇၸွမ်းၵဝ်ႁေ ၵဝ်ဝႃႈၼႆ ၼၢင်ႉသၢင်ႇၶဝ်ၵေႃႈ သမ်ႉလၢတ်ႈမႃးဝႃႈ ယႃႇပၼ်မၼ်းၵႂႃႇတၢင်းလႂ်ၼႃႉ တီႈၶႃႈၼႆႉတႄႉ မၼ်းဢမ်ႇၶႂ်ႈယူႇၼႆဝႃႈၼၼ်ႉ ႁႂ်ႈမၼ်းယူႇၸွမ်း ပီႈၼၢင်းႁဝ်းႁေၵေႃႈ လီဢေႃႈ မၼ်းဢမ်ႇၸႂ်ႈၵူၼ်းၼူၵ်ႇၵူၼ်းတိုဝ်သင်ၼႆၼႃႇ ပဵၼ်ၼၼ် ယူႇတႄႉၵဝ်ႇဢိူဝ်ႈ လဝ်ႈၵေႃႈဢမ်ႇၵိၼ် လႅၼ်းယႃႈၵေႃႈဢမ်ႇသူႇလူး”
“ပေႃႈမႄႈၶဝ်သမ်ႉၵႂႃႇလႂ်မူတ်းယဝ်ႉလႃႇၼၼ်ႉ”
“ပေႃႈမႄႈၶဝ်တၢႆသဵင်ႈယဝ်ႉဢိူဝ်ႈၼၼ်ႉ ပီႈၼၢင်းၶဝ်ၵေႃႈတၢႆႁေ ၼွင်ႉ မၼ်းၵေႃႈၵႂႃႇမီးၵေႃႉတီႈၵေႃႉတၢင်းသေ ယွၼ်ႉၼၼ်ဢိူဝ်ႈ မၼ်းဢမ်ႇ ၶႂ်ႈယူႇတီႈဝၢၼ်ႈၶဝ်ၼၼ်ႉ”
“ဢိူဝ်ႈတူၺ်းၵေႃႈ လႅပ်ႈပဵၼ်ၵူၼ်းလီမီးတၢင်းႁူႉယူႇၼင်ႇၵဝ်ႇ ယဝ်ႉ ၵေႃႈလႅပ်ႈတေပဵၼ်ၵူၼ်း ၸႂ်ၵႂၢင်ႈၸႂ်ယၢဝ်းယူႇႁေး တူၺ်းမၼ်းၸွမ်း ၸႂ်ၸၢမ်ၶမ်းႁဝ်းၼႆႉတႄႉ ဢမ်ႇမီးၽႂ်ၸွမ်းၸႂ်မၼ်းလႆႈလူင်”
“မိူဝ်ႈၵႆႈသၢင်ႇမွင်ႇ ဢမ်ႇမႃးႁၼ်ၼႃႇ မၼ်းတိုၵ်ႉၶုတ်းသူၼ်ယူႇ ၸၢမ် ၶမ်းမႃးဝႃႈႁင်းမၼ်းဝႃႈဢၢပ်ႇၼမ်ႉလၢႆႈၶူဝ်းလႃႈႁႃးၵႂႃႇလႄႇၼႆဝႃႇ မၼ်း ၵေႃႈဢၢပ်ႇၼမ်ႉလၢႆႈၶူဝ်းယဝ်ႉသေ မႃးၼင်ႈၵိၼ်ၶဝ်ႈ တၼ်းလႆႈၵိၼ် သွင်သၢမ်ၵမ်းၵူၺ်းယူဝ်ႉၼၼ်ႉ ၸွင်ႇၸၢမ်ၶမ်းဢမ်ႇမႃးဢဝ်သုမ်ႇႁူမ်ႇ ပႅတ်ႈၽိူၼ်ၶဝ်ႈမၼ်းသေ တဵၵ်းႁွင်ႉမၼ်းလုၵ်ႉမိူဝ်းၸွမ်းၵၼ်ႁေယဝ်ႉ ႁိုဝ် ၼမ်ႉၵေႃႈဢမ်ႇတၼ်းၵိၼ်”
သိုပ်ႇလူဢၢၼ်ႇတွၼ်ႈတေမႃးၶႃႈ။
