ၸၢႆးသၢႆၶိူဝ်းႁေႃႈၵႃးမႃးလွႆးလွႆးသေ ဝူၼ်ႉယူႇဝႃႈ
“ဢေႃ ၸၢမ်ၶမ်းၼႆႉ ပဵၼ်လုၵ်ႈၵေႃႉလဵဝ် သမ်ႉပၢႆဢမ်ႇမီးမႄႈၸဵမ်လဵၵ်ႉ လႄႈ ပေႃႈၶဝ်တိုၼ်းၸွမ်းၸႂ်မၼ်းတႃႇသေႇလူးၼႆႉ ဢေႃ ၵွပ်ႈဢမ်ႇမီး မႄႈ ဢမ်ႇလႆႈယူႇတႂ်ႈႁူမ်ႈငဝ်းမႅတ်ႉတႃႇၵေႃႉပဵၼ်မႄႈလႄႈ မၼ်းၸင်ႇ ၶီႈႁဵတ်းၸဝ်ႈပိူၼ်ႈလူးၼႆႉ” မၼ်းၸၢႆးၶိုၼ်းၵႂႃႇဝူၼ်ႉလႆႈ ဢၼ်ၸၢမ် ၶမ်း ဢဝ်သုမ်ႇႁူမ်ႇၽိူၼ်ၶဝ်ႈပႅတ်ႈမၼ်းၸိူဝ်ႉၼၼ်ႉလႄႈ ၸင်ႇဝူၼ်ႉ ထႅင်ႈဝႃႈ
“ပေႃးၵေႃႉဢမ်ႇႁူႉတႄႉ တေဝႃႈမၼ်းၼၢင်း လိူင်းၼႃႇၼႆဢိူဝ်ႈၼႆႉ ဢမ်ႇၸႂ်ႈၸိူင်ႉၼၼ်ၼင်ႇၵဝ်ႇလူး သမ်ႉယဵၼ်ႇငႄႈဢူၼ်ႈဢွၼ်ႇမေႃ ၵပ်းသိုပ်ႇမေႃမိုတ်ႈပိူၼ်ႈသေ မေႃတႅပ်းတတ်း ဢၼ်လီဢၼ်ၸႃႉယူႇ လူး ၵွပ်ႈမၼ်းႁူႉၸႂ်ၵဝ် ယုမ်ႇၸႂ်ၵဝ်ၸိူဝ်းၼႆႉၼေႃ”
“ႁဝ်းၵႂႃႇလႄႇၼွင်ပၼ်ႇၼေႃႈပီႈသၢႆၶိူဝ်း” ၸၢမ်ၶမ်းလၢတ်ႈတေႃႇမၼ်းၸၢႆးပႆႇငိၼ်း
“ပီႈသၢႆၶိူဝ်းၼႆၵေႃႈ”
“ဢေႃႈ ဢိူဝ်ႈလီဢိူဝ်ႈၸၢမ်ၶမ်း ၶႂ်ႈၵႂႃႇလႄႇတီႈလႂ်ၵေႃး”
“ပီႈသၢႆၶိူဝ်းၵုမ်ႇဝူၼ်ႉလွင်ႈသင်ယူႇၶႃႈလႃႇ ၼွင်ႉလၢတ်ႈတေႃႇယူႇ ၵေႃႈ ဝႃႈဢမ်ႇငိၼ်းၼႆႉ တိုၵ်ႉဝူၼ်ႉထိုင်သၢဝ်ပီႈသၢႆၶိူဝ်းယူႇၸွင်ႇၸႂ်ႈ”
“ဢမ်ႇၸႂ်ႈလေႃႇ ပီႈၸၢင်ႈၵႂႃႇမီးသၢဝ်တီႈလႂ် ၸၢမ်ၶမ်းၼႆႉၵေႃႈ”
“ၽႂ်ႁူႉလေႃႇၼွင်ႉလၢတ်ႈတေႃႇယူႇၵေႃႈ ပီႈသၢႆၶိူဝ်းဢမ်ႇလႆႈငိၼ်းၶႃႈ လူး”
“ပီႈဝႃႈၵႃးလမ်းၼႆႉ လီႁေႃႈၼႃႇ တႃႉၶွႆပိူၼ်ႈမီးၵႃးလႃႈ ဝႃႈလႃးၵေႃႈ တႃႇၸၢတ်ႈၼႆႉတႄႉ တေၵွမ်ႉပေႃးလႆႈၸွၼ်ႁေႃႈၵႃးပိူၼ်ႈ ဢဝ်ၵႃး ပိူၼ်ႈႁဵတ်းႁၢင်ႈၵႂႃႇ ၸိူင်ႉၼႆၵူၺ်းယဝ်ႉႁိုဝ်ၼႆၵႂႃႈ”
“ပီႈသၢႆၶိူဝ်းမီး..” မၼ်းၼၢင်းၶိုၼ်းၾၢင်ႉလႆႈသေ “မီးငိုၼ်းယူႇလႄႈ ဢမ်ႇၶႂ်ႈသိုဝ်ႉၵူၺ်းယူဝ်ႉၼႆၵႂႃႈ”
“ပီႈတေႁဵတ်းႁိုဝ်မီး တေဢဝ်တီႈလႂ်မႃးလႃႇၸၢမ်ၶမ်းၼႆႉၵေႃႈ ၵေႃႉ ၽၢၼ်လိူဝ်ပီႈၼႆႉၵေႃႈ ဢမ်ႇမီးၽႂ်ယဝ်ႉယူဝ်ႉ”
“ႁိုဝ်ႉ! ပေႃးတၢၼ်ႇဝႃႈ”
“ပေႃးတၢၼ်ႇဝႃႈၸိူင်ႉႁိုဝ်”
“ပေႃးတၢၼ်ႇဝႃႈၼွင်ႉဢမ်ႇမေႃတူၺ်းၵူၼ်းယဝ်ႉၼႆဢေႃႈ”
“ႁႃႉႁႃႉ ၸၢမ်ၶမ်းတူၺ်းၵူၼ်းၽိတ်းယဝ်ႉပေႃးၼၼ်”
“တွင်းဝႆႉၶႃႈၼႃႉ ပၼ်ႁႂ်ႈၼွင်ႉမီးတိုဝ်ႉတၢင်းလီလီၵွၼ်ႇ ၼွင်ႉတေ..”
“ၼွင်ႉတေႁဵတ်းသင် တေဢႃႈသူပ်းပီႈယဝ်ႉၼပ်ႉတူၺ်းၶဵဝ်ႈပီႈလီꧦၼႆ ႁႃႉ”
“ဢၼေႃ ပေႃးလႆႈလၢတ်ႈသင်ၵေႃႈ ပူၼ်ႉလိူဝ်တေႉယဝ်ႉ”
“ႁႂ်း..ၵႃးၼမ်ၵျႃႉလႃႇၸၢမ်ၶမ်း”
“ပေႃးဝႆႉၵႃးတီႈၼႆႈတႄႉ လႆႈပႆလူင်းၵႆဝႆႉဢေႃႈၼႆႉ”
ၸၢႆးသၢႆၶိူဝ်းလႄႈ ၼၢင်းၸၢမ်ၶမ်းပႆၽႃၶၢင်ႈၵၼ် လူင်းၸူးၼွင်ၼၢင်း ယီႈသႅင်ၵေႃႇ ဢမ်ႇၼၼ် ၼွင်ပၼ်ႇၼၼ်ႉယူႇ။ ၵမ်ႈၼမ်တႄႉႁွင်ႉဝႃႈ ဝတ်ႉၺွင်ႇၶမ်းၼႆယဝ်ႉ။ ၵူၼ်းမႃးလႄႇၵေႃႈ ၼမ်တႄႉꧦ။ ၸၢႆးသၢႆၶိူဝ်း လႄႈၼၢင်းၸၢမ်ၶမ်း တွႆးမိုဝ်းၵၼ်သေ ပႆလႄႇတူၺ်းတၢင်းႁၢင်ႈလီၼႂ်း ၼွင်ၼႆႉ တီႈၼိုင်ႈယဝ်ႉတီႈၼိုင်ႈသေ ၽႅဝ်မႃးတီႈ ႁၢင်ႈပၼ်ႈၼၢင်းယီႈ သႅင်ၵေႃႇလဵင်ႉဝူဝ်းၼႆႉယဝ်ႉ။
“ပိုၼ်းဢၼ်တေႉမၼ်းၼႆႉ ၸွင်ႇပီႈသၢႆၶိူဝ်း ႁူႉလီလီၶႃႈႁႃႉၼႆႉ”
“ဢၼ်ပီႈယၢမ်ႈဢၢၼ်ႇတႄႉ ပဵၼ်ဢပုမ်ႇဢွၼ်ႇ ဢိတ်းဢွတ်းၵူၺ်း ပိုၼ်းတေႉမၼ်းတႄႉဢမ်ႇမီးယူဝ်ႉ ဢၼ်မီးဝႆႉယူႇ ၸိူဝ်းၼၼ်ႉတႄႉ ပဵၼ်ဢပုမ်ႇၵူၺ်း ပေႃးဝႃႈပိုၼ်းၼႆၼၼ်ႉ တေလႆႈမီးၶိူင်ႈမၢႆမၵ်းမၼ်ႈ သေမီးပီလိူၼ်ဝၼ်းၵိုၵ်းပႃးတဵမ်ထူၼ်ႈဢိူဝ်ႈ။ မိူၼ်ၼင်ႇ ပိုၼ်းၸဝ်ႈ ၵၢင်းသိူဝ်ဝႃႇ ၸဝ်ႈသိူဝ်ၶၼ်ႇၾႃႉဝႃႇ ၸဝ်ႈၵေႃးလီ မိူင်းပၼ်ႇၸိူဝ်းၼႆႉ ပိူၼ်ႈမီးမိၵ်ႈမၢႆၵိုၵ်းပႃးတဵမ်ထူၼ်ႈလူး။ ၵူၺ်းၵႃႈ ငိၼ်းပိူၼ်ႈဝႃႈတႄႉ ဢမ်ႇလႆႈၶႆႈၼႆဝႃႈ ဢပုမ်ႇၼၢင်းယေႈသႅင်ၵေႃႇလႄႈ တင်းဢပုမ်ႇၶုၼ် သၢမ်လေႃး+ၼၢင်းဢူးပဵမ်ႇၼႆႉၼႃ”
“မၼ်းပဵၼ်သင်ၶႃႈလႃႇ ပီႈသၢႆၶိူဝ်း”
“ငိၼ်းပိူၼ်ႈဝႃႈတႄႉ ပေႃးႁဝ်းၶႆႈလွင်ႈၼၢင်းယေႈသႅင်ၵေႃႇၼိုင်ႈပွၵ်ႈ ၼႆ ဢၼ်ပဵၼ်မႄႈၼွႆႉၼၼ်ႉ တၢမ်ႇငရၢႆးမၼ်းတေလိူဝ်ၶိုၼ်ႈမႃးထႅင်ႈ ၼိုင်ႈပီၼႆဝႃႈ ၵွပ်ႈမၼ်းမိူၵ်ႈပူၼ်ႉတီႈၼႃႇလူး ပေႃးပဵၼ်လွင်ႈၶုၼ်သၢမ် လေႃး+ၼၢင်းဢူးပဵမ်ႇၼႆႉသမ်ႉ ၼၢႆးၵၼ်ႇထႃႉၵၼ်ႇယူင်ႇၼၼ်ႉၵေႃႈ မိူၼ်ၼၼ်ၼင်ႇၵဝ်ႇၼႆဝႃႈ ၸႂ်ႉတႄႉဢမ်ႇၸႂ်ႉတႄႉၼႆတႄႉ ပီႈၵေႃႈ ဢမ်ႇႁူႉၼင်ႇၵဝ်ႇၼႃ”
“ၵွပ်ႈငိၼ်းပိူၼ်ႈဝႃႈၵူၺ်းၼင်ႇၵဝ်ႇလူးၼေႃႈ”
“ၸႂ်ႈယဝ်ႉဝႃႈ ၵူၺ်းၵႃႈပိုၼ်းၵေႃႈဢမ်ႇၸႂ်ႈ ဢပုမ်ႇၼၢင်းယေႈသႅင်ၵေႃႇ ၼႆႉတႄႉ ပီႈဢမ်ႇႁတ်းၶႆႈလေႃႇ ”
“မၼ်းပဵၼ်သင်ၶႃႈ ပီႈသၢႆၶိူဝ်း”
“သင်ဝႃႈ ပဵၼ်ၸၢမ်ၶမ်းၵေႃႉၶႆႈ လွင်ႈၼၢင်းၽၵ်းၶူမ်ၼႄပီႈၼႆတႄႉ ပီႈဢမ်ႇႁတ်းထွမ်ႇသေဢိတ်းယဝ်ႉဝႃႈ”
ၸၢႆးသၢႆၶိူဝ်းၶႂ်ႈဝႃႈႁိုဝ်ၼႆၵေႃႈ ၸၢမ်ၶမ်းႁူႉတၼ်းယူႇလႄႈ
“ဢေႃႈ ဢပုမ်ႇၼၢင်းယီႈသႅင်ၵေႃႇၼႆႉ ၼွင်ႉၵေႃႈဢၢင်ႈၶႆႈၼႄပီႈသၢႆ ၶိူဝ်းယူႇၶႃႈဢေႃႈ ၵူၺ်းၵႃႈ.. ပိူၼ်ႈဢမ်ႇလီၶႆႈလူးၼေႃႈ”
“ၼၼ်ႉၶႃႈယဝ်ႉ” ၼႃႈယုမ်ႉယုမ်ႉဢွၼ်ႇသေ ၸၢႆးသၢႆၶိူဝ်းၵေႃႉဢုပ်ႇ ပေႃးဢမ်ႇလိုဝ်ႈ။ ၼၢင်းၸမ်ၶမ်းၵေႃႉထွမ်ႇပေႃးဢမ်ႇၶၢၼ်ႉ။ သမ်ႉပၢႆ ယုမ်ႉပေႃးတၢၼ်ႇၵႅမ်ႈတေတႅၵ်ႇၸိူင်ႉၼႆ ၵေႃႉလႂ်ႁၼ်ၵေႃႈ တိုၼ်းဢၢမ်း သူပ်းပေႃးၵူင် မၢင်ၸိူဝ်းဝၢႆႇတူၺ်းၸွမ်းၶေႃးပေႃးၶတ်းယဝ်ႉ။
ၸိူဝ်းဢၼ်ၶဝ်ႁူႉၸၵ်းၼၢင်းၸၢမ်ၶမ်းၼၼ်ႉ ၵမ်ႈၽွင်ႈလၵ်ႉဢုပ်ႇၵၼ် ဝႃႈ “ၸၢမ်ၶမ်းပေႃးတၼ်းတေႇၼႃႈႁိူၼ်းယဝ်ႉႁႃႉ”
“တၢၼ်ႇမၼ်းၶီႈသဵတ်ႈယူႇတေႉၼေႃႈ လႅပ်ႈၵၼ်တေႉယဝ်ႉႁေးၵေႃႉ ၼႆႉတႄႉ”
“ၵူၼ်းတၢင်းလႂ်လႃႇမႃႈ”
“ပဵၼ်ၵူၼ်းလၢင်းၶိူဝ်းၼႆဢမ်ႇႁိုဝ် ပဵၼ်လၢၼ်ပႃႈသူၺ်ႇၼူႉ ပွၵ်ႉတူၵ်း ၼႆဝႃႈ”
“ပီႈၼႆႉႁႃႉ ဢၼ်ပိူၼ်ႈဝႃႈမၼ်းမေႃႁွင်ႉၵႂၢမ်းၼႃႇၼႆၼၼ်ႉ”
“ၵၢၼ်ၵေႃႈမေႃၵူႈမဵဝ်း ၵႆႉၵေႃႈၵႆႉၼႃႇ ဢမ်ႇယူႇလၢႆႁေပွၵ်ႈၼႆၼၼ်ႉ”
“ၵျႃႉလီလီယဝ်ႉဢိူဝ်ႈပေႃးၼၼ် ၸၢမ်ၶမ်းပေႉၵၢမ်ႇလီမႃႈ”
လၵ်ႉဢၢမ်းသေ တူၺ်းၸွမ်းၽၢႆႇလင် မၢဝ်ႇလုၵ်ႈမိူင်းၼၢင်းၽၵ်းၶူမ် လႄႈသၢဝ်ႁၢင်ႈလီ လုၵ်ႈယိင်းမိူင်းၼၢင်းယီႈသႅင်ၵေႃႇၼၼ်ႉယူႇ။
သိုပ်ႇလူထႅင်ႈတွၼ်ႈတေမႃးၶႃႈ
