ပႃႈသူၺ်ႇၼူႉၵေႃႈ ယိပ်းဢဝ်မၢၼ်ႇတႃမၼ်းမႃးတိုဝ်းသေဢၢၼ်ႇတူၺ်း လိၵ်ႈဢၼ်ၼွင်ႉၸၢႆးမၼ်းပၼ်မႃၼၼ်ႉယူႇ။
ထိုင်
ပီႈၼၢင်းႁဝ်းၶႃႈ ပီႈၼၢင်းသူၺ်ႇၼူႉ
မိူဝ်ႈလဵဝ်ပီႈၼၢင်း ႁဝ်းၸွင်ႇယူႇလီၵိၼ်ဝၢၼ်ယူႇၶႃႈႁိုဝ်ၼေႃ ႁဝ်းၶႃႈ တေႉ ယူႇလီၵိၼ်ဝၢၼ်ၵၼ်ယူႇၵူႈၵေႃႉၶႃႈ။ ၸႂ်ထိုင်ၵၼ်ယူႇၵေႃႈပႆႇ ၸၢင်ႈမႃးၸႂ်းၵၼ်ၶႃႈၼေႃႈ ဢၼ်ၶႃႈၶႂ်ႈပွင်ႇလႅင်းထိုင်ပီႈၼၢင်းႁဝ်းတႄႉ သၢႆၶိူဝ်းၼႆႉ ၶႃႈၶႂ်ႈႁႂ်ႈပီႈၼၢင်းႁဝ်းႁွင်ႉယူႇဝႆႉၸွမ်းပီႈၼၢင်းႁဝ်းၼႆဢေႃႈ မႅၼ်ႈၵၼ်တင်းပီႈၼၢင်းႁဝ်းၵေႃႈ ဢမ်ႇမီးလုၵ်ႈလၢင်း ဢႃႇယုပီႈၼၢင်း ႁဝ်းၵေႃႈထဝ်ႈမႃးတိၵ်းတိၵ်းယဝ်ႉ ယူႇၵေႃႉလဵဝ်ဢမ်ႇပေႃးသၢင်ႇထုၵ်ႇ ဢေႃႈ သၢႆၶိူဝ်းၼႆႉမၼ်းၵေႃႈ ပဵၼ်ၵူၼ်းလၢတ်ႈငၢႆႈသွၼ်ငၢႆႈယူႇ တီႈၶႃႈ ၼႆႉတႄႉ မၼ်းဢမ်ႇၶႂ်ႈယူႇ သင်ဝႃႈမၼ်းယွၼ်းၵႂႃႇတၢင်ႇတီႈၼႆ ယႃႇ ပၼ်မၼ်းၵႂႃႇၶႃႈၼႃႈ ႁႃလွၵ်းလၢႆးသေဢၼ်ဢၼ် ႁၢမ်ႈမၼ်းဝႆႉ ဢိတ်ႉၼိုင်ႈၶႃႈၼႃႉ ပေႃးၵုမ်ႇၵႂႃႇတၢင်းၼိုင်ႈယဝ်ႉတၢင်းၼိုင်ႈယူႇၸိူင်ႉ ၼၼ်တိၵ်းတိၵ်းၵေႃႈ ဢီးလူးမၼ်း မၼ်းၵေႃႈ ဢမ်ႇၸၢင်ႈပဵၼ်ႁိူၼ်း ပဵၼ်ယေးလႆႈသေပွၵ်ႈယဝ်ႉ ပီႈၼၢင်းႁဝ်းၵေႃႈ ဢမ်ႇမီးလုၵ်ႈၼႆၵေႃႈ မီးလၢၼ်ယူႇၼႃႇၼႆႁေယဝ်ႉၵေႃႈ တေၶႃႈၵေႃႈတေၵႆႉၵႆႉမႃးလႄႇ ပီႈ ၼၢင်းႁဝ်းယူႇၵူၺ်းၶႃႈ။
မီးၸိူင်ႉၼႆၵူၺ်းၶႃႈ
ႁႂ်ႈယူႇလီၵတ်းယဵၼ်သေၵမ်းၶႃႈ
မႂ်ႇသုင်ၶႃႈ
ၼွင်ႉၸၢႆး
ပႃႈသူၺ်ႇၼူႉၵေႃႈ ဢၢၼ်ႇတူၺ်းလိၵ်ႈ ၼွင်ႉၸၢႆးမၼ်းသေ ယဝ်ႉ ဝူၼ်ႉယူႇႁင်းမၼ်းဝႃႈ “ဢၼ်ၼွင်ႉၸၢႆးလၢတ်ႈမႃးၼႆႉ ၸႂ်ႈတေႉ ယဝ်ႉၼွင်ႉၸၢႆးဢူၺ်ႉ ပီႈၼၢင်းၵေႃႈမုင်ႈမွင်းယူႇတႃႇသေႇဢိူဝ်ႈ ဢမ်ႇမီး လုၵ်ႈၵေႃႈမီးလၢၼ်ယူႇလူး”
ၸၢႆးသၢႆၶိူဝ်းၵေႃႈ ဢၢပ်ႇၼမ်ႉလၢႆႈၶူဝ်းသေယဝ်ႉ
“ပႃႈၶႃႈၶဝ်ႈၽၵ်းႁႅၼ်းယဝ်ႉယဝ်ႉၶႃႈ”
“ဢိူဝ်ႈၵိၼ်လႄႈမႄႈႁႅၼ်းယဝ်ႉၵေႃႈ”
ၵိၼ်ၶဝ်ႈယဝ်ႉသေ
“ၸွင်ႇလီမိုတ်ႈႁိုဝ်လုၵ်ႈမိူင်းပၼ်ႇၼႆႉ”
“ဢေႃႈလီမိုတ်ႈယူႇၶႃႈပႃႈ လုၵ်ႈတႄႉ ၵႂႃႇၽႅဝ်တီႈလႂ်ၵေႃႈ မိူၼ်ႁၢင်ႈ မိုတ်ႈယူႇၵူႈတီႈယဝ်ႉၶႃႈဝႃႈ”
“ဢိူဝ်ႈလီယဝ်ႉပေႃးလုၵ်ႈမိုတ်ႈယူႇၼႆၵေႃႈ လုၵ်ႈဢမ်ႇလူဝ်ႇၵႂႃႇတၢင်း လႂ်ယဝ်ႉလႃႈ။ မႄႈၵေႃႈထဝ်ႈမႃးၵူႈမိုဝ်ႉၵူႈဝၼ်းယဝ်ႉလူး ပေႃးလုၵ်ႈၵုမ်ႇ ၵႂႃႇတိၵ်းတိၵ်းတႄႉ မႄႈတၢႆၵေႃႈလုၵ်ႈတေဢမ်ႇလႆႈႁၼ်ႁေယဝ်ႉဢိူဝ်ႈ ထႅင်ႈလွင်ႈၼိုင်ႈၵေႃႈ လုၵ်ႈလီမီးၼႃႈႁိူၼ်းယဝ်ႉဢိူဝ်ႈၼႆႉ မႄႈပေႃး လႆႈလႆႈဢုမ်ႈလၢၼ်ဢွၼ်ႇယူႇယဝ်ႉဢိူဝ်ႈ”
“လွင်ႈၼႃႈႁိူၼ်းတႄႉ ယူဝ်ဢမ်ႇမီးၼၢင်းယိင်းၵေႃႈလႂ်မႃးယွမ်းႁပ်ႉလႆႈ ၸွမ်းၸၢတ်ႈပၢၼ်လုၵ်ႈၼႆႉၶႃႈယူဝ်ႉပႃႈ”
“ဢိူဝ်ႈ ၵႃႈပူၼ်ႉမႃးတႄႉ ပေႃးဝူၼ်ႉတူၺ်းၵေႃႈ တေပဵၼ်ၼၼ်ႉယူႇ တေႉၼင်ႇၵဝ်ႇ ၵူၺ်းၵႃႈ ဢဝ်ၼႆႉၵႂႃႇတႄႉဝႆႉဝႃႈ ႁိူၼ်းလင်ၼႆႉပဵၼ် ႁိူၼ်းလုၵ်ႈယဝ်ႉၼႆသေ ယူႇၵႂႃႇလႄႈမႄႈ ဢမ်ႇလူဝ်ႇၸႂ်လဵၵ်ႉ တေႃႈ ၼင်ႇမိူဝ်ႈၵိူတ်ႇမႃး ယင်းဢမ်ႇလႆႈၶူဝ်းၸပ်းတူဝ်မႃးသေမဵဝ်းလူး မႄႈ ၵေႃႈဝၢႆးဢူႈလုင်းသူတၢႆၼႆႉ ဢမ်ႇမီးၵေႃႉၶိုင်သၢင်ႈႁၢင်ႈပွင်သင် ၶႂ်ႈႁဵတ်း သင်ၵေႃႈဢမ်ႇၸၢင်ႈႁဵတ်း ၵမ်းၼႆႉတႄႉလုၵ်ႈမႃးယူႇၸွမ်းမႄႈၸိူင်ႉၼႆ မႄႈၸူးမ်းဝႃႈၸူမ်းယဝ်ႉၼႆႉ လုၵ်ႈၶႂ်ႈလႆႈၵႃးၵေႃႈ မႄႈတေသိုဝ်ႉပၼ် ၵူၺ်းၵႂႃႈ လီယဝ်ႉပေႃးၼၼ် မႄႈတေဝႆႈၽြႃးၵမ်ႉၵွၼ်ႇ”
“ဢေႃႈၶႃႈ” ၸၢႆးသၢႆၶိူဝ်းၵေႃႈဢၢၼ်ႇလိၵ်ႈဢိတ်းဢွတ်းသေ ၼွၼ်းၵႂႃႇ ယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
