ၶမ်ႈၶိုၼ်းဢၼ်တဵတ်ႇယဵၼ်လူင်ၼၼ်ႉ ၸွင်ႇမီးၽႂ်ဢၼ်ဢမ်ႇယၢမ်ႈႁွင်ႉႁႆႈၼႂ်းလပ်းသိင်ႇၼၼ်ႉယူႇႁိုဝ်။
ဢမ်ႇမီးၽႂ်ဢၼ်ဢမ်ႇယၢမ်ႈၼွၼ်းၵိင်ႈယၢမ်းလိုၵ်း ၼွၼ်းဢမ်ႇလပ်းယွၼ်ႉလွင်ႈတုၵ်ႉသုၵ်ႉၸႂ်ၼႃႇၼၼ်ႉလႆႈ။
ၽႂ်ၵေႃႈတိုၼ်းယၢမ်ႈၽၢၼ်ႇၶၢဝ်းယၢမ်းဢၼ်ဝႃႈ မၼ်းလူမ်ႉၸူမ်ၵႂႃႇမူတ်း ဢမ်ႇႁၼ်တၢင်းမုင်ႈမွင်း ငိုပ်းတၼ်ဢမ်ႇႁၼ်တၢင်းဢွၵ်ႇယဝ်ႉ။
ၸဵမ်မိူဝ်ႈႁဝ်းမိုၼ်းတႃႁၼ်မိူင်းၵူၼ်းမႃး ႁဝ်းဢဝ်ၶၢမ်ႈပူၼ်ႉလွင်ႈတုၵ်ႉၼၼ်ႉမႃးလႆႈလၢႆပွၵ်ႈယဝ်ႉ။
မိူဝ်ႈပဵၼ်လုၵ်ႈဢွၼ်ႇလဵၵ်ႉ တၢင်းတုၵ်ႉဢွၼ်တၢင်းသုတ်းၸၢတ်ႈပၢၼ် တေၸၢင်ႈပဵၼ်လွင်ႈထုၵ်ႇၶတ်းၶႂၢင် မိူဝ်ႈၼၼ်ႉမၼ်းပဵၼ်တၢင်းတုၵ်ႉဢၼ်ယႂ်ႇလိူဝ်ပိူၼ်ႈယဝ်ႉ ၵူၺ်းၵႃႈ မၼ်းၵေႃႈဢဝ်ၶၢမ်ႈပူၼ်ႉမႃးလႆႈ။
ၵေႃႉယႂ်ႇမႃးထႅင်ႈ ထဵင်မေႃးၸွမ်းဢူၺ်းၵေႃႉ ၺႃးပေႃႈမႄႈႁႅမ် ၼၼ်ႉၵေႃႈဝူၼ်ႉဝႃႈတုၵ်ႉၼႃႇယဝ်ႉ ၵူၺ်းၵႃႈမၼ်းၵေႃႈၶၢမ်ႈပူၼ်ႉမႃးလႆႈမိူၼ်ၵၼ်။
မိူဝ်ႈမီးတၢင်းႁၵ်ႉသေ သုမ်းႁၵ်ႉပွၵ်ႈဢွၼ်တၢင်းသုတ်းၼၼ်ႉ မိူၼ်ၸႂ်ပေႃးၶႂ်ႈၶၢတ်ႇယဝ်ႉ ဝူၼ်ႉဝႃႈမၼ်းတေတေဢမ်ႇမီးလႆႈထႅင်ႈယဝ်ႉ ၵူၺ်းၵႃႈမၼ်းၵေႃႈၽၢၼ်ႇပူၼ်ႉမႃးဢမ်ႇၸႂ်ႈႁိုဝ်။
မိူဝ်ႈလဵဝ် ႁဝ်းၵေႃႉယႂ်ႇယဝ်ႉၼႆၵေႃႈ တေၸၢင်ႈထူပ်းတၢင်းတုၵ်ႉဢၼ်ၼၵ်းၼႃလိူဝ်သေၵဝ်ႇယဝ်ႉ။
ႁဝ်းတေၸၢင်ႈမီးၼီႈထူမ်ႈႁူဝ်၊ လွင်ႈၸမ်ၸႂ်ဢၼ်တႅၵ်ႇၸတ်ႉၵႂႃႇ ၊ လွင်ႈလႆႈလူႉသုမ်းၵေႃႉႁၵ်ႉၵႂႃႇ လွင်ႈၸဵပ်းသႅပ်ႇဢၼ်မႃးမိပ်ႇတႅင်းႁူဝ်ၸႂ်ယူႇၼၼ်ႉ မၼ်းမိူၼ်တေပဵၼ်တၢင်းတုၵ်ႉဢၼ်ယႂ်ႇလိူဝ်ပိူၼ်ႈ မၼ်းၼၵ်းၼႃၼႃႇတႃႇယဵၼ်ႉၶၢမ်ႇမၼ်းလႆႈ။
ၸၢမ်းဝူၼ်ႉတူၺ်းၶိုၼ်းဝႃႈ တၢင်းတုၵ်ႉၸိူဝ်းပူၼ်ႉမႃး ဢမ်ႇဝႃႈမၼ်းတေၼၵ်းၼႃတၢၼ်ႇႁိုဝ် လိုၼ်းသုတ်းမၼ်းၵေႃႈပူၼ်ႉၵႂႃႇ။
မၢင်ပွၵ်ႈ ယွမ်းႁပ်ႉဝႃႈႁဝ်းတုၵ်ႉၸႂ်ယူႇ ပၼ်ၶႂၢင်ႉႁႂ်ႈတူဝ်ၵဝ်ႇလႆႈပူတ်းပွႆႇမၼ်းဢွၵ်ႇမႃး လႆႈႁွင်ႉႁႆႈဢွၵ်ႇမႃး မၼ်းၵေႃႈပဵၼ်ၵၢၼ်ၸွႆႈယႃၸႂ်လႆႈယူႇယဝ်ႉ။
မိူဝ်ႈႁဝ်းႁူႉၸၵ်းတူဝ်ၵဝ်ႇလီ ႁဝ်းတေႁႃတၢင်းလႄႈႁဵၼ်းႁူႉယူႇၸွမ်းမၼ်းၵႂႃႇလႆႈ တေႃႇထိုင်မၼ်းပေႃးတေႁၢႆလၢႆၵႂႃႇၸွမ်းၶၢဝ်းယၢမ်း။
ဝၼ်းၼိုင်ႈပေႃးဝႃႈႁဝ်းၶိုၼ်းဝၢႆႇတူၺ်း တေမီးလွင်ႈႁၢၼ်ႉၸႂ်မႃး ဢၼ်တူဝ်ၵဝ်ႇဢမ်ႇယွမ်းသုမ်း ႁၢၼ်ႉၸႂ်ဢၼ်ဢဝ်ၶၢမ်ႈပူၼ်ႉမၼ်းမႃးလႆႈ ႁဝ်းတေပွင်ႇၸႂ်ဝႃႈႁဝ်းၵႅၼ်ႇၶႅင်လိူဝ်သေဢၼ်ဝူၼ်ႉဝႆႉလူးၵွၼ်ႇ၊ ယဵၼ်ႉၵၼ်ႈမႃးလႆႈလိူဝ်သေဢၼ်ယုမ်ႇယမ်လႄႈ မိူဝ်ႈလႂ်ဢဝ်ၶၢမ်ႈပူၼ်ႉလွင်ႈတုၵ်ႉၸႂ်ၸိူဝ်းၼၼ်ႉမႃး မၼ်းတေႁဵတ်းႁႂ်ႈႁဝ်းၵႅၼ်ႇၶႅင်မႃးထႅင်ႈယဝ်ႉ။
ႁဝ်းတေႁူႉလိုၵ်ႉပွင်ႇၸႂ်ၸၢတ်ႈပၢၼ်မႃး မေႃႁူႉပွင်ႇၸႂ်ပိူၼ်ႈမႃး ၽွမ်ႉတႃႇပဵၼ်ႁႅင်းၸႂ်ပၼ်ၵေႃႉဢၼ်ၸူမ်ယူႇၼႂ်းလပ်းသိင်ႇ ဢၼ်မိူၼ်ၼင်ႇႁဝ်းယၢမ်ႈပဵၼ်မႃး။
ဝၼ်းမိူဝ်ႈၼႆႉပဵၼ်ဝၼ်းဢၼ်တုၵ်ႉၸႂ်သေတႃႉ ယႃႇလိုမ်းဝႃႈႁဝ်းယၢမ်ႈဢဝ်ၶၢမ်ႈပူၼ်ႉမၼ်းမႃးယဝ်ႉလၢႆပွၵ်ႈ လႄႈ မိူဝ်ႈၽုၵ်ႈၼၼ်ႉၵေႃႈတေပဵၼ်ဝၼ်းဢၼ်ႁဝ်းတေတႄႇမႂ်ႇလႆႈထႅင်ႈ လူၺ်ႈႁူဝ်ၸႂ်ဢၼ်ၵႅၼ်ႇၶႅင်လႄႈ ပွင်ႇၸႂ်ၸၢတ်ႈပၢၼ်မႃးထႅင်ႈ။
ပိၼ်ႇ – ငဝ်မွင်မိုတ်းမူဝ်း
