လွင်ႈၸမ်ၸႂ်ဢၼ်လႆႈၽၢတ်ႇၵၼ်ၵႂႃႇယဵၼ်ယဵၼ်ၼၼ်ႉ မၼ်းမီးယူႇတေႉဢိူဝ်ႈ
မၢင်ပွၵ်ႈလွင်ႈၸမ်ၸႂ်ၵၼ် ဢမ်ႇလႆႈသုတ်းသဵင်ႈ ယွၼ်ႉလွင်ႈထဵင်မေႃးၵၼ်၊ ယွၼ်ႉဢမ်ႇလႆႈသူင်ႇသင်ႇၵၼ်၊ ဢမ်ႇလႆႈမီးလွင်ႈမီးတၢင်းသင်၊ ဢမ်ႇမီးၽႂ်ႁဵတ်းၽိတ်း၊ ဢမ်ႇမီးၽႂ်ပဵၼ်ၽၢႆႇၵႂႃႇဢွၼ်တၢင်း။
ၵူၺ်းပဵၼ်လွင်ႈၸမ်ၸႂ်ဢၼ်သုတ်ႉႁၢႆၵႂႃႇလွႆးလွႆး ၵႂႃႇတဵတ်ႇတဵတ်ႇ တေႃႇထိုင်ဝၼ်းၼိုင်ႈ ႁဝ်းၸင်ႇတေႁူႉတူဝ်ဝႃႈ ဢူၺ်းၵေႃႉၵေႃႉၼၼ်ႉ ဢမ်ႇလႆႈယူႇၼႂ်းၸၢတ်ႈပၢၼ်ႁဝ်းၵႂႃႇထႅင်ႈယဝ်ႉ။
မၼ်းပဵၼ်လွင်ႈၽၢတ်ႇယၢၼ်ဢၼ်ဢမ်ႇလႆႈၸႂ်ႉၶေႃႈၵႂၢမ်းလၢတ်ႈ၊ ဢမ်ႇလၢတ်ႈလႆႈဝႃႈပဵၼ်ယွၼ်ႉသင်။
လုၵ်ႉတီႈယၢမ်ႈဢုပ်ႇလၢတ်ႈတေႃႇၵၼ်ၵူႈဝၼ်း ယဵၼ်းပဵၼ်ဢုပ်ႇၵၼ်ပဵၼ်မၢင်ဝၼ်း၊ လုၵ်ႉတီႈယၢမ်ႈမီးလွင်ႈဢၼ်ဢုပ်ႇလၢတ်ႈၼႄၵၼ်လႆႈၵူႈလွင်ႈ ယဵၼ်းပဵၼ်လွင်ႈဢၼ်ၽႂ်ၵေႃႈဢမ်ႇႁူႉလွင်ႈၽႂ်ၵႂႃႇ။
မၢင်ပွၵ်ႈ ႁဝ်းၵေႃႈဢမ်ႇၶႂ်ႈႁႂ်ႈလွင်ႈၸမ်ၸႂ်ၼၼ်ႉသုတ်းသဵင်ႈၵႂႃႇ ၵူၺ်းၵႃႈ ၸၢတ်ႈပၢၼ်ႁဝ်းမၼ်းမီးသဵၼ်ႈတၢင်းဢၼ်ပႅၵ်ႇပိူင်ႈၵၼ်ၵႂႃႇ။
ႁဝ်းၵေႃႉယႂ်ႇမႃးလႆႈထူပ်းလွင်ႈမႂ်ႇ မီးတူင်ႇဝူင်းမႂ်ႇ လႄႈ မၢင်ပွၵ်ႈ လွင်ႈတဵတ်ႇယဵၼ်ၼၼ်ႉၵေႃႈ ႁဵတ်းႁႂ်ႈလွင်ႈၸမ်ၸႂ်သုတ်းသဵင်ႈၵႂႃႇ လူၺ်ႈတီႈၽႂ်ၵေႃႈဢမ်ႇလႆႈတင်ႈၸႂ်ယဝ်ႉ။
ဢၼ်လီမွင်ၸႂ်လိူဝ်သေၼၼ်ႉၵေႃႈ မိူဝ်ႈႁဝ်းၶိုၼ်းဝၢႆႇမႃးသေ ၶႂ်ႈတူင်ႉတၵ်ႉၸူးၶိုၼ်းထႅင်ႈပွၵ်ႈၼိုင်ႈၵေႃႈ ဢမ်ႇယုမ်ႇၸႂ်လႆႈယဝ်ႉဝႃႈတေတူင်ႉတၵ်ႉၸိူင်ႉႁိုဝ်လီ တေႃႈၼင်ႇၶႂ်ႈလၢတ်ႈဝႃႈ“ပဵၼ်ၸိူင်ႉႁိုဝ်ၽွင်ႈ” ၼႆၵူၺ်းၵေႃႈ တင်းလႆႈဝူၼ်ႉယၢပ်ႇယူႇ။
သမ်ႉဝႃႈၽၢတ်ႇယၢၼ်ၵၼ်ၵႂႃႇယဵၼ်ယဵၼ်သေတႃႉၵေႃႈ မၼ်းယင်းတိုၵ်ႉယူႇၼႂ်းၸႂ်တႃႇသေႇလႄႈ သမ်ႉဝႃႈဢမ်ႇလႆႈဢုပ်ႇၵၼ်ယဝ်ႉ မၢင်ပွၵ်ႈၵေႃႈလႆႈၶဝ်ႈတူၺ်းၸွမ်းလွင်ႈတူင်ႉၼိုင်ဢၼ်မီးယူႇၼိူဝ်ဢွၼ်ႇလၢႆးၸိူဝ်းၼၼ်ႉယူႇ၊ သမ်ႉဝႃႈဢမ်ႇလႆႈထူပ်းၵၼ်ယဝ်ႉၵေႃႈ ယင်းတိတ်းတၢမ်းၵၼ်ၽၢၼ်ႇသိုဝ်ႇယူႇ၊ သမ်ႉဝႃႈဢမ်ႇလႆႈမီးလွင်ႈၼူင်ႉၼိုင်ႁူမ်ႈၵၼ်ယဝ်ႉၵေႃႈ ယင်းတိုၵ်ႉတူၺ်းလွင်ႈၶိုပ်ႈၼႃႈယူႇၵႆၵႆ။
သင်ဝႃႈဝၼ်းၼိုင်ႈ လႆႈၶိုၼ်းထူပ်းၵၼ်ထႅင်ႈ တေဢမ်ႇမီးၶေႃႈထၢမ်ဝႃႈ “ႁၢႆၵႂႃႇလႂ်မႃး” ၽႂ်ၵေႃႈတေႁူႉလီဝႃႈ ဢမ်ႇလႆႈတင်ႈၸႂ်ႁၢႆၵႂႃႇ လိူဝ်သေဝႃႈၸၢတ်ႈပၢၼ်ႁဝ်း မၼ်းၵႂႃႇသဵၼ်ႈတၢင်းပႅၵ်ႇပိူင်ႈၵၼ်ၵူၺ်း။
လွင်ႈၸမ်ၸႂ်ႁဝ်းၼၼ်ႉ မၼ်းမီးတီႈဢၼ်ၸၢင်ႁၢႆၵႂႃႇလွႆးလွႆးယဝ်ႉ သမ်ႉဝႃႈပွၵ်ႈၼိုင်ႈ ႁဝ်းယၢမ်ႈၸမ်ၸႂ်ၵၼ်ယူႇၵေႃႈယဝ်ႉ။
ပိၼ်ႇ – ငဝ်မွင်မိုတ်းမူဝ်း
