- မဵဝ်းႁၢင်ႈလီဢၼ်ဝႃႈၼၼ်ႉတႄႉ ႁၢင်ႈလီတၢၼ်ႇမီလွင်ႈႁူၺ်ႈ ပေႃးတၢၼ်ႇၵူၺ်ႈတူၵ်းႁိူဝ်း ပေႃးတၢၼ်ႇမၢၵ်ႇသၢင်းၽေႃးၼဝ်ႈဢၼ်ဝႃႈၶႃႈယူဝ်ႉၼေႃႈ
2. ၵူၵ်ႉၵၢၵ်ႉသႂ်ႇသၢႆပေႃ သူပိူၼ်ႈပၼ်ပီႈတႆးတႂ်ႈဢွၼ်ႇၶဝ်တိုဝ်း၊ ပေႃးပဵၼ်ၵႂၢင်းသႅင်ဢွၼ်ႇသုပ်းသဵၼ်ႈပၢႆမိုဝ်း သူဝႆႉပၼ်ၸူႉလဝ်းသူယူဝ်ႉၼေႃႈ။
- လူမ်းထူဝ်းမႆႉမၼ်းမူ လူမ်းထူမႆႉမႅင်းၵႅင်း လၢတ်ႈပၼ်တီႈလႅင်းလႅင်း ဢမ်ႇငိၼ်းၶေႃႈမၼ်းလီဢိူဝ်ႈမိူဝ်ႈၵႆႈ။
- တွၼ်ႈတႃႇပီႈႁဝ်းၼႆႉတႄႉ လွင်ႈလုၵ်ႈလွင်ႈမေးတိုၼ်းဝႃႈဢမ်ႇမီးယဝ်ႉ လွတ်ႈဝႃႈလွတ်ႈပေႃးတၢၼ်ႇမွတ်ႈၸီးပၼ်ႇတႃၽႃဢိူဝ်ႈ။
ပေႃးဢမ်ႇဢဝ်မႆႉၺႃးလိူၼ်မၼ်းၵေႃႈ ႁူႉၵႃႈလႆႈမွတ်ႈၶႃႈလေႃႇ ၸိူင်ႉၼၼ်တႄႉႁဵတ်းႁိုဝ်တႅၵ်ႈလႆႈ။
- ငိၼ်းၶၢဝ်ႇထုပ်ႉၼဵင်ႈပိူၼ်မိူဝ်းတွင် ႁေႃႇတွင်ပိူၼ်ႈမိူဝ်းတမ်း ၶွင်ႈငိုၼ်းၶွင်ႈၶမ်းမႃးတဵင်ႇ ၼႆဢမ်ႇၸႂ်ႈႁိုဝ်။
- ႁဝ်းၼႆႉတႄႉဢမ်ႇသူင်ႇတႂ်ႈတႅပ်း ဢမ်ႇမႅပ်းတႂ်ႈတွင် ဢမ်ႇၵွင်တႂ်ႈယိူဝ်ႈ ဢမ်ႇသွၼ်ႉတႂ်ႈသိူဝ်ႈၵူၺ်ႉၼႃႈ။
ႁဝ်းၼႆႉတႄႉ ယူႇၼိူဝ်လိၼ်ၵိၼ်တႂ်ႈၾႃႉၼင်ႇၵၼ် ပႅၵ်ႉသမ်ႉဝႃႈသူင်ႇတၢၼ်ႇႁိုဝ် မႅပ်းတႂ်ႈတွင် ၵွင်တႂ်ႈသၢတ်ႇ ၵႂၢတ်ႇတိၼ်ထူင် ထူမ်ဢမ်ႇထူမ်ၵေႃႈ ၼမ်ႉၶူင်းၸၢင်ႈမေႃၼွင်းဢိူဝ်ႈ။
ၸႂ်ႈယဝ်ႉ ပေႃးဝႃႈထူမ်ဢမ်ႇပေႃးဢဝ်သၢႆႉၼမ်ႉပၢင်ပုၼ်ႉမႃးလေႃးလႄႈပီႈ သိမ်းၶႅမ်ႉၶႅမ်ႉၵႅတ်ႇၶႅမ်ႉၶႅမ်ႉလႄႈ။
- သင်သူပဵၼ်ငိုၼ်းၶမ်းၵေႃႈ ပိူၼ်ႈပေႃးဢဝ်သႂ်ႇထူင်
သင်ပဵၼ်လူင်ၵေႃႈ မီးၸုမ်ႈသိူဝ်လၢႆး
သင်ပဵၼ်ၵႂၢႆးပိူၼ်ႈၶုတ်းၸၢၵ်ႇႁႆႈလိၼ်ၶၢႆးပေႃးငႄႈမႃးႁိုင်ယဝ်ႉ
သင်ပဵၼ်ဢမဵဝ်းလွင်ႇသႂ်ႇၶဝ်ႈယေးႁိုင်ၵေႃႈၵူၼ်းၽွမ်ႉၵၼ်သိုဝ်ႉယႆးယႆး
သူၼႆႉသင်ပဵၼ်ဢမဵဝ်းမၵူၺ်ႇပွင်ႈတိၼ်ၽႂ်း ယင်းမီးၵေႃႉသုပ်းၵၵ်ႉလေႃးၵိူဝ် ၵွၼ်ႇဢိူဝ်ႈ။ - သူးတွင်းလွင်းမွၵ်ႇဝႃႈၼႆ သမ်ႉထွၵ်ႇပႅတ်ႈၸွမ်းႁူဝ်ႉလႅၼ်ၵျွင်းၶႃႈဢိူဝ်ႈၼႆ၊
ႁဝ်းၶႃႈတႄႉ သူးတွင်းလွင်းမွၵ်ႇ ၶဝ်ႈတႅၵ်ႇပေႃးသဵင်ႈသၢမ်ၶႂၢႆး
ၸၢၵ်ႉၸႃႇတွင်ႈတူဝ်လၢႆးပေႃးသဵင်ႈသိပ်းသႅၼ်
မွၵ်ႇႁူဝ်ႉဝၢင်းလႅၼ်ပေႃးသဵင်ႈသၢမ်ယုမ်း
မဵဝ်းဢမ်ႇၵုမ်းလႆႈတၢင်းၵၼ်ယူဝ်ႉၼေႃႈ။ - ပိူၼ်ႈဝႃႈထွမ်ႇၵႂၢမ်းၵၢင်လၢႆၸၢင်ႈၶေးမဝ်း ထွမ်ႇၵႂၢမ်းႁဝ်းၸၢင်ႈၶေးပဵၼ်ဝႃႇၼေႃႈ။
10. ႁဝ်းၼႆႉတႄႉဢၢၼ်းလၢတ်ႈဢဝ်တီႈမၼ်းမၢၼ်ႇ ၵၢၼ်ႇဢဝ်တီႈမၼ်းၸိုဝ်ႈမၼ်းၸႂ်ႈ ႁႂ်ႈမၼ်းပဵၼ်ၸင်ႇလၢတ်ႈဢိူဝ်ႈ။
11.ပႅၵ်ႉသမ်ႉဝႃႈမိူဝ်းၼႆၵေႃႈ ယႃႇမိူဝ်းၶွင်ႉတေႃၶုတ်ႇ ယႃႇမိူဝ်းၶုတ်ႇတေႃၶမ် ပီႈလူဝ်းၵွင်ႉၶေႃးထၢမ်ယႃႇလၢတ်ႈၼႃႈ။
- ၼမ်ႉမေႃႇၵေႃႈလွတ်ႈဝူၺ်
ၵူၺ်ၵေႃႈလွတ်ႈႁူ
ၼူၵေႃႈလွတ်ႈၸွၵ်ႉ
မွင်းၵေႃႈလွတ်ႈၸႃႇ
ၼႃႈလွတ်ႈၸမ်ႈ
ၶမ်းလွတ်ႈၸိင်ႇ
မိင်ႇလွတ်ႈၵွၼ်
တီႈၼွၼ်းလွတ်ႈၸဝ်ႈ
ၶဝ်ႈလွတ်ႈယွင်
ၵွင်လွတ်ႈႁႆႇ
ၵႆႇလွတ်ႈပိၵ်ႇ
ႁိပ်ႇလွတ်ႈမၢၵ်ႇမူႉ
ၸူႉႁၵ်ႉၶမ်းပႅင်းဢၼ်ဝႃႈ
ၵိၼ်ႇဢဝ်ၵေႃႈလွတ်ႈ ၶျွတ်ႈဢဝ်ၵေႃႈၵၢင်းယဝ်ႉၼႃ။
ၼႃႈလွတ်ႈၸမ်ႈ ၶမ်းလွတ်ႈၸိင်ႇ မိင်ႇလွတ်ႈၵွၼ် ၼွၼ်လွတ်ႈလုပ်ႇ လွတ်ႈၵေႃႉၸုပ်ႇၵေႃႉၼူမ်ၶႃႈယဝ်ႉ။ - ၵႂၢမ်းပိူၼ်ႈဝႃႈ တေႃႈၼင်ႇမႆႉယင်းၸၢင်ႈမီးငဝ်း
ၵူၼ်းႁၢင်ႈလီႁၢင်ႈလဝ်းၸိူင်ႉၼင်ႇသူဝႃႈဢမ်ႇမီးၸူႉ
တေႃႈၼင်ႇမၢၵ်ႇမူႉယင်းၸၢင်ႈမီးႁိပ်ႇ
ၵႂၢမ်းသူလၢတ်ႈမႃးၼိုင်ႈၶေႃႈၼိုင်ႈၵမ်းၼႆႉထိပ်ႇၸႂ်ႁဝ်းၵူၺ်းယဝ်ႉ။ - ႁဵတ်းမိူၼ်ၼင်ႇ ၵိူမ်ႈတွၵ်ႇမၢၵ်ႇ ၵိူမ်ႈၽၢတ်ႇယၢၼ်
ၵိူမ်ႈမၢၵ်ႇၽႃႈ ၵိူမ်ႈဝႃႈပိုၼ်ႉဝႃႈပႅတ်ႈ
ၵိူမ်ႈမၢၵ်ႇသၢင်းၽေႃး ၵိူမ်ႈမၢၵ်ႇပေႃးၵေႃႈ ဝႃႈထႅင်ႈလႄႈ။ - ၵႂၢမ်းပိူၼ်ႈဝႃႈ ၵိူမ်ႈမၢၵ်ႇၽႃႈ ပေႃးဝႃႈၵေႃႈၸႂ်ၸွမ်း
ၵိူမ်ႈမၢၵ်ႇၸွၵ်းပေႃးၵွၵ်းၵေႃႈႁၼ်သႆႈ ပေႃးလႆႈၵေႃႈဢဝ်တေႉ
ပေႃးပေႉၸႂ်ၵေႃႈႁၵ်ႉၼၼ်ႉၶႃႈၼႃႇ။ - သူၼႆႉတႄႉၸုၵ်းၵေႃႈၸၢင်ႈႁၢင်ႈၵေႃႈၸွမ်း
တၢင်းႁၢင်ႈလီၽၢင်လီၸိူင်ႉၼင်ႇသူၼႆႉ
ယုမ်ႉတေႃႇၼမ်ႉပေႃးသႂ် ယုမ်ႉတေႃႇၸႂ်ပေႃးၵီႈ
ယုမ်ႉတေႃႇထၢၼ်ႇမီႈပေႃးၶၢဝ်
ယုမ်ႉတေႃႇလၢဝ်ပေႃးၶွၼ်ႈ
ယုမ်ႉတေႃႇၸိူၵ်ႈၶွတ်ႇတၵ်ႉပေႃးလိတ်ႈ
ယုမ်ႉတေႃႇမိတ်ႈမွင်းၶျႃႉပေႃးႁူင်ႈဢွၵ်ႇမၢၵ်ႈယဝ်ႉ။ - လၢတ်ႈၵႂၢမ်းမႃးၼိုင်ႈၶေႃႈၼိုင်ႈၵမ်း ပေႃးတၢၼ်ႇၶမ်းႁဵင်ၵျၢပ်ႈယဝ်ႉ မၼ်းဢမ်ႇၵိုင်ႇဢၢပ်ႈတၢၼ်ႇၼၼ်ႉၼင်ႇၵဝ်ႇၶႃႈ။
- သင်ပဵၼ်ၶီႈၸိုင်းၵေႃႈၸွၼ်လႆႈၸင်ႈၼင်ႈ
ၶီႈၶင်ႈၼႆၵေႃႈ ၸွၼ်လႆႈၸၢင်ႈပႆၵူၺ်း။ - သင်မိူၼ်ၼင်ႇၶႅပ်းၶႆၵေႃႈပိူၼ်ႈဢမ်ႇၸေႃးၼေႃႇၶႃႈ
ဢမ်ႇၵျေႃႇၶႂ်ႈလၢတ်ႈတေႃႇမိူၼ်ၸိူင်ႉၼင်ႇႁဝ်းဝႃႈ
တေလၢတ်ႈၵႂႃႇလၢတ်ႈမႃးၵေႃႈ မဵဝ်းႁၢင်ႈၸႃႉ
မိူၼ်ၼင်ႇဢၢၵ်ႇၶၢင်ၵၢၼ်းၶိုၼ်ႈၸွမ်းယုမ်း
လၢတ်ႈလၢႆလၢႆၵေႃႈၵူဝ်သုမ်းၵူၺ်းဢေႃႈ။ - လႆႈၸွၼ်ႁၼ်မိူၼ်ၼင်ႇလိူၼ်ၵၢင်ႁၢဝ်
လၢဝ်ၵၢင်ၽွင်း ၼမ်ႉၼွင်းၵၢင်ပီ
ၶဝ်ႈလီၵၢင်ၵေႃ ၼေႃႇလီၵၢင်ၽူၺ်း
ၸွၼ်ႁၼ်ၸွၼ်တူၺ်း
ၸူဝ်ႈႁူမ်ႈမႆႉပႆႇၸိူၼ်း ႁူမ်ႈႁိူၼ်းပႆႇဝၢႆႇ
သၢႆလႅတ်ႇပႆႇၶႅင် သၢႆသႅင်ပႆႇႁိူဝ်ႈ
ၸူဝ်ႈမိူဝ်ႈၵူၼ်းႁၢင်ႈလီၶဝ်
ပႆႇဢဝ်လုၵ်ႈၸၢႆးပိူၼ်ႈ မႃးယူႇႁူမ်ႈႁွမ်းၸွမ်းသူၼၼ်ႉၼႃႇ။ - သင်ပဵၼ်ႁူဝ်ႉၵေႃႈပဵၼ်ၼင်ႇႁူဝ်ႉတွင်ႇတွင်း
ႁူဝ်ႉႁွင်းပိူၼ်ႈတၢင်းၼွၵ်ႈ တွင်ၸိင်
ႁူဝ်ႉဢိင်ပိူၼ်ႈတၢင်းၼႂ်း
လၢတ်ႈထၢမ်ယူႇယႆးယႆးၵေႃႈ ၽိတ်းသိၼ်ၵူၺ်းၶႃႈဢိူဝ်ႈ။ - ၶဵမ်ပႆၵေႃႈမႆႁွမ်း ပေႉၸႂ်ၸွမ်းၸင်ႇလၢတ်ႈၼႆၶႃႈၼႃႇ
ပေႃးႁၵ်ႉၵေႃႈဢဝ်တေႉ ပေႃးပေႉၸႂ်ၵေႃႈ မႃးတွင်ႈမႃးထၢမ်လႄႈ။ - ပိူၼ်ႈဝႃႈ ၼမ်ႉဢွၼ်ႇလိူၼ်ႈၼိူဝ်သၢႆး ၼမ်ႉလၢႆးလိူၼ်ႈၼိူဝ်လိၼ်ႉပၢႆမူၼ်း
ၵႂၢမ်းၵူၼ်းလၢတ်ႈၸိူင်ႉႁိုဝ်ၵေႃႈ မၼ်းပဵၼ်ၸိူင်ႉၼၼ်ၼႆဝႃႇ။ - ၶဝ်ႈသၢၼ်ဢမ်ႇလိူၵ်ႈၶဝ်ႈပိူင်ႇဢမ်ႇယူၺ်း ၽၢၼ်ၽၢၼ်မီးမီး ယွမ်ယွမ်ပီးပီး ဢမ်ႇသဵတ်ႈၶႃႈ။
- သွင်တၢပ်ႈၸင်ႇပဵၼ်ႁူၺ်ႈ ႁႂ်ႈလႆႈယူႇလူၺ်ႈၵိုၵ်းၵၼ်ၼႆ
ပႆႇလပ်းပေႃးၾၼ်ပႆႇႁၼ်ပေႃးတွင်း မု
င်ႈမွင်းတႃႇတေလႆႈမႃးႁူပ်ႉၺႃးသူၼၼ်ႉ
ယၢတ်ႇၼမ်ႉပေႃးဢမ်ႇႁူႉပဵၼ်တႃႈလၢႆၵျွင်း
သူးတွင်းမွၵ်ႇပေႃးဢမ်ႇႁူႉသဵင်ႈပဵၼ်လၢႆလွႆယဝ်ႉ
ၵူၺ်းၵႃႈ သူသမ်ႉယၢတ်ႇၼမ်ႉသုတ်းတွင်းႁႂ်ႈပေႃးၺႃးႁဝ်းဢၼ်ဝႃႈၼၼ်ႉတႄႉ
ယူဝ်သုတ်းတွင်းယၢတ်ႇၼမ်ႉႁႂ်ႈၵၢင်းၵႆ
ပႆတၢင်းႁႂ်ႈၵၢင်းသဵၼ်ႈ ၵူၺ်းယူဝ်ႉၼေႃ။ - ယၢတ်ႇၼမ်ႉသူးတွင်းၵျွင်းသမ်ႉပေႃးဝႆ သူးတွင်းၵျွင်းသမ်ႉပေႃးၵိူင်းဢၼ်ဝႃႈၼၼ်ႉၶႃႈယဝ်ႉ။
- လၢတ်ႈၵေႃႈဢမ်ႇၼႅင် ၵႅင်ၵေႃႈဢမ်ႇၸေႃး ဢမ်ႇဢဝ်သူမ်ႈတၢင်ႇတီႈမႃးသႂ်ႇလေႃး။
လၢတ်ႈယဝ်ႉတိုၼ်းဢမ်ႇၼႅင် ၵႅင်ယဝ်ႉတိုၼ်းဢမ်ႇၸေႃး
ပေႃးလေႃးယဝ်ႉတိုၼ်းဢမ်ႇလိူၵ်ႈဢဝ်ၶိုၼ်းၼႆ။ - ဝၢၼ်ႈၶႂ်ႈလူႉလူႉမိူင်းၶႂ်ႈမႃႇမႃႇ လႆႈငိၼ်းၶေႃႈၵႂၢမ်းသူလၢတ်ႈမႃးဝၼ်းမိူဝ်ႈၼႆႉ
သိပ်းဝၼ်းဢမ်ႇၵိၼ်ၶဝ်ႈ ၵဝ်ႈဝၼ်းဢမ်ႇၵိၼ်ၼမ်ႉၼႆၵေႃႈ
ပေႃးပျေႃႇၼႅၼ်ႇယဝ်ႉ မၢတ်ႈတၢၼ်ႇလႆႈဝႃႈၶမ်းတဵမ်ၽၢၵ်ႇ မၢၵ်ႇတဵမ်သိူင်း မိူင်းတဵမ်လုၵ်ႈယဝ်ႉၼႃ။ - တေယူႇပဵၼ်ၼႃႈႁိူၼ်းႁူမ်ႈႁွမ်း ၵင်ႈၸွင်ႈပွင်းလူင်ႇ
ႁႂ်ႈပေႃးလႆႈသူင်ႇၸွမ်းႁူမ်ႈသႃႉ
ႁူမ်ႈၵႃႉႁူမ်ႈၶၢႆၵႂႃႇၸွမ်းၵၼ်ၼၼ်ႉ ၽွမ်ႉယူႇတႃႇသေႇယဝ်ႉ။ - ယွၼ်းလၢတ်ႈတေႃႇသေၶေႃႈၼိုင်ႈသွင်ၵမ်းၼႆ ၵူၺ်းၵႃႈ
ၸွင်ႇသမ်ႉတေလႆႈၽိတ်းၵၢမ်ႇမေႇသု ၸွင်ႇသမ်ႉတေလႆႈလူႉၵၢမ်ႇမေႇမွၵ်ႇ
သူၼ်ဢွၼ်ႇတူၼ်ႈႁိူၼ်းတူၼ်ႈယေးပိူၼ်ႈႁိုဝ်ၼေႃ။ - ပိူၼ်ႈဝႃႈတႃႈၼမ်ႉဢမ်ႇလွတ်ႈမၢၵ်ႇႁိၼ်သီ
ၵူၼ်းႁၢင်ႈလီဢမ်ႇလွတ်ႈမီးၸူႉလႃႇၼေႃႈ။ - ပဵၼ်ပေႃႈႁၢင်ႉပိူၼ်ႈတိူၼ်း
ပေႃႈႁိူၼ်းပိူၼ်ႈၸၢပ်ႈ
ၵၢမ်ႇဢွၼ်ႇႁဝ်းၼႆႉ
သမ်ႉပေႃးလႆႈတူၵ်းလႃႈတူၵ်းလိုၼ်း ယဝ်ႉယူဝ်ႉၼေႃ။ - ၵူဝ်မိူၼ်ၼင်ႇၵိူမ်ႈမၢၵ်ႇၵိပ်ႇပေႃးမိပ်ႇၵေႃႈႁၼ်ၵႅၼ်
ပေႃးတေလႅၼ်ယႃႇလၢတ်ႈ
မိူၼ်ၼင်ႇၵိူမ်ႈမၢၵ်ႇၽႃႈ သူပ်းဝႃႈၵေႃႈၸႂ်လူဝ်ႇၸွမ်းၶႃႈဢေႃႈ။ - ႁၵ်ႉသူႉၼႆႉ ၵႂၢင်ႈသေၵႂၢင်ႈသေၵၢင်ႁၢဝ်ၶႃႈ
ၼမ်သေလၢဝ်လႅင်း ႁႅင်းယႂ်ႇသေလူမ်း
ၵွပ်ႈပိူဝ်ႈဢမ်ႇမႅပ်ႇဢမ်ႇတူမ်းလႆႈလႄႈ
ၸင်ႇလႆႈထူၵ်းဢွၵ်ႇၼႄမႃးယဝ်ႉ။ - သင်ဝႃႈၼမ်ႉၼၢႆးပႆႇၸူမ်လွႆ တူဝ်ႁွႆပႆႇႁူႉၵႂၢမ်းၵူၼ်းၼႆ
တၢင်းႁၵ်ႉႁဝ်းၵေႃႈတိုၼ်းတေဢမ်ႇႁၢႆ။ - ၼမ်ႉတၢင်းၵေးၼႆႉဢၢၼ်းယၵ်ႉတူၺ်းႁွႆ
ၽၢၼ်းတၢင်းလွႆၼႆႉဢၢၼ်းယၵ်ႉတူၺ်းယိူင်း
ပၢၵ်ႇလၢၼ်ႉသႅၼ်ၵူၼ်းၼႆႉ ႁဝ်းတေယၵ်ႉတူၺ်းသူၵေႃႉလဵဝ်။ - မိူၼ်ၼင်ႇၽၵ်းၵီးဝၢၼ်ႇသူၼ်တႃႈ မွၵ်ႇယႃႈဝၢၼ်ႇၼိူဝ်လွႆ ႁႃတီႈၵွႆတီႈသုတ်းမၼ်းတိုၼ်းဢမ်ႇမီးယဝ်ႉ တၢင်းႁၵ်ႉႁဝ်းၼႆႉ။
- ႁၵ်ႉမိူၼ်ၼင်ႇၵိူမ်ႈတွၵ်ႇၽိဝ်လိဝ်ၶွတ်ႇတၵ်ႉ
ႁၵ်ႉတေႉလႄႈၸွင်ႇလၢတ်ႈ
ႁၵ်ႉမိူၼ်ၼင်ႇၵိူမ်ႈတွၵ်ႇသွင်း
ၵိူမ်ႈပွင်းၽေႃႇ ၵိူမ်ႈတေႃႇၼႃႈႁိူၼ်းမူၼ်းၶႃႈဢိူဝ်ႈ။ - ႁဝ်းတႄႉၵူဝ်သူ ႁၵ်ႉမိူၼ်ၼင်ႇၵိူမ်ႈမၢၵ်ႇဢူဝ်း
ၵိူမ်ႈၸူဝ်းပိုၼ်ႉၸူဝ်းပႅတ်ႈၵူၺ်းၶႃႈဢေႃႈ။ - ႁဝ်းၼႆႉ ၽိူဝ်လိူဝ်ပဵၼ် မွၵ်ႇၼႂ်းဢုင်ပိူၼ်ႈဝၢင်း
မွၵ်ႇၼႂ်းတၢင်းပိူၼ်ႈၶၢမ်ႈ မွၵ်ႇၶၢင်ႈဝၢၼ်ႈပိူၼ်ႈၸင်း
ၸွင်ႇသမ်ႉတေဢၢၼ်းႁၵ်ႉလႆႈႁိုဝ်။ - ႁဝ်းတႄႉ ၼမ်ႉၼွင်းဢမ်ႇၶိုၼ်ႈလွႆ တူဝ်ႁွႆဢမ်ႇၶဝ်ႈသၢႆး
ၼမ်ႉၼၢႆးဢမ်ႇၶုၼ်ႇဢူၼ် ၽူၼ်ဢမ်ႇတူၵ်းယမ်း
တႅင်ႈၶမ်းဢမ်ႇယဵၼ်းပဵၼ်ႁိၼ်
လိၼ်ဢမ်ႇပဵင်းတွင်ႉၾႃႉ
ၵူၼ်းႁၢင်ႈၸႃႉၸိူင်ႉႁဝ်းၼႆႉ
ၽႂ်တေတူၺ်းႁၼ်လႃႇ။ - သူၼႆႉ ပုင်ႇၵေႃႈၸၢင်ႈႁၢင်ႈၵေႃႈၸွႆး
ၶဝ်ႈပွႆးႁိုဝ်လွတ်ႈၵေႃႉတွႆးလႃႇၼေႃႈ
သူပ်းၵေႃႈၸၢင်ႈႁၢင်ႈၵေႃႈၸွမ်း ၽၢႆႇလၢတ်ႈၵေႃႈႁိုဝ်ယွမ်းၽႂ်လႃႇၼေႃႈ။ - တေႃႇလွၵ်ႇဢမ်ႇလီၶဝ်း
ၵူၼ်းလဝ်းဢမ်ႇလီလဵၼ်ႈ
ၵူၼ်းလဝ်းၸိူင်ႉသူၼႆႉတႄႉ
ဢမ်ႇမီးၵေႃႉတမ်းၸႂ်တႄႉဢမ်ႇယုမ်ႇလေႃႇ။ - မဵဝ်းလိၼ်ႉဢမ်ႇမီးလုပ်ႇ ဢုပ်ႇသင်ၵေႃႈလႆႈၼေႃႈ
ၵၢၼ်ႉၼႅတ်ႈၵဝ်း ဢၵျွင်းဝႃႈပဵၼ်မေးလဝ်းပိူၼ်ႈၼွၼ်းၵွမ်ႇ
ၼွၼ်းထွမ်ႇသဵင်ထူၺ်ႈၸႂ်ၶၢင်းဝႃႈႁဝ်းသူၼႆၵူၺ်းၵႃႈ။ - လႆႈၸွၼ်ႁၵ်ႉဢဝ်တီႈၼႂ်းၼွၵ်ႇ လႆႈၸွၼ်ယွၵ်ႇဢဝ်တီႈၼႂ်းလုၵ်ႈယိင်းပိူၼ်ႈၵူၺ်းယဝ်ႉ။
- လႆႈၸွၼ်ဢဝ်ၸူဝ်ႈၵႅပ်ႉၵမ်း ၸူဝ်ႈယၢမ်းလုၵ်ႈၸၢႆးပိူၼ်ႈၽၢတ်ႇယၼ် ပဵၼ်ၼွင်ႉၶိူဝ်းၶမ်းပိူဝ်ႇယုမ်းပႃႇၼၢမ်ပဝ် ပဵၼ်ၼွင်ႉၵဝ်းယဝ်ႉၼွင်ႉဢမ်ႇဢဝ်ၵူၺ်း။
- ဢၵျွင်းဝႃႈ ပဵၼ်မႆႉၼႂ်းၵေႃ ၼေႃႇၼႂ်းသူၼ် ပဵၼ်ၵူၼ်းႁိူၼ်းပိူၼ်ႈယဝ်ႉလႄႈဢ။
ဢၢင်ႈဢိင်ဢဝ်မႃး တီႈၵႂၢမ်းတႆးပၢၼ်ၵဝ်ႇ လႄႈ မၢင်ၶေႃႈမၢင်ဢၼ် တေဢမ်ႇၸႅင်ႈဢမ်ႇလႅင်းၼႆၵေႃႈ ယွမ်းၼွမ်းယႂ်ႇၼမ်ယူႇဢေႃႈ၊ သင်ဝႃႈမီးတီႈၽိတ်းတီႈပိူင်ႈ တီႈႁိူင်ႈတီႈၵိူင်း တီႈလီမူၼ်ႉမႄးၼႆၵေႃႈ ၶႅၼ်းတေႃႈလၢတ်ႈဢွၵ်ႇမွၵ်ႇၼႄသေၵမ်း ၼင်ႇႁိုဝ်ပေႃးတေၶပ်ႉတမ်းႁႂ်ႈထုၵ်ႇမႅၼ်ႈၼၼ်ႉၶႃႈယဝ်ႉ။
လိူဝ်သေၼႆႉယဝ်ႉ ပေႃးဝႃႈမီးထႅင်ႈႁူႉထႅင်ႈႁၼ်ထႅင်ႈၼႆၵေႃႈ မွၵ်ႇလၢတ်ႈၼႄမႃးပၼ်လႆႈယူႇၶႃႈ ႁၼ်ထိုင်ဝႃႈ ၵႂၢမ်းဢုပ်ႇမၢဝ်ႇသၢဝ်ၵဝ်းၵၼ်ၼႆႉ လီလႆႈၵဵပ်းသိမ်းဝႆႉပဵၼ်ၽိုၼ်လိၵ်ႈၽိုၼ်လၢႆးယူႇ၊ ယွၼ်ႉပိူဝ်ႈ ၵူၼ်းၼုမ်ႇသႅၼ်းႁုၼ်ႈမႂ်ႇႁဝ်းယၢမ်းလဵဝ်ၼႆႉ ဢၼ်ဢမ်ႇႁူႉဢမ်ႇပွင်ႇ ဢမ်ႇမေႃမီးတင်းၼမ်ၶႃႈယဝ်ႉ မၼ်းၵေႃႈ ပဵၼ်မိူၼ်ၼင်ႇၵႂၢမ်းလၢတ်ႈၾိင်ႈငႄႈၾိင်ႈထုင်းႁဝ်း ဢၼ်ၼိုင်ႈမိူၼ်ၵၼ်လႄႈ ၸင်ႇလႆႈသႂ်ႇၸႂ် သွၵ်ႈႁႃၵဵပ်းတႅမ်ႈမႃးယူႇ။
ယုမ်ႇယမ်ၼပ်ႉထိုဝ်ယူႇၶႃႈ
(ၵဵပ်းတႅမ်ႈ) ငဝ်မွင်မိုတ်းမူဝ်း
