We Are All Trying Here ယွၼ်ႉၸိူင်းႁူဝ်ၼႆႉႁေ ႁဵတ်းႁႂ်ႈၶႃႈဢမ်ႇလႆႈလပ်းလႆႈၼွၼ်း ၼင်ႈပေႃးဢမ်ႇၶႂ်ႈလုၵ်ႉၵွပ်ႈမၼ်းယဝ်ႉ။
ၶႃႈယၢမ်ႈပဵၼ်ၵူၼ်းယွင်ႇၸိူင်းၵေႃႉၼိုင်ႈ ၵျိူၵ်ႈတူၺ်းၸိူင်းၼႃႇလႄႈ ပေႃးဝႃႈလႆႈတူၺ်းယဝ်ႉ တေတူၺ်းတေႃႇသုတ်း တေဢမ်ႇၶၢမ်ႈ ၼၼ်ႉမၼ်းပဵၼ်မိူဝ်ႈသွင်ပီပူၼ်ႉမႃးယဝ်ႉ။ ပေႃးတူၺ်းၸိူင်းၼႆ မၼ်းလႆႈတွၼ်ႈသွၼ်လႄႈတၢင်းဝူၼ်ႉမႃးပႃး တႃႇဢဝ်မႃးပဵၼ်ႁႅင်းဢီးၼႂ်းၵၢၼ်တႅမ်ႈၸိူင်းလႆႈယဝ်ႉ။
ဝၢႆးလင်မႃးၼႆႉ ၶၢဝ်းယၢမ်းတူၺ်းၸိူင်းၵေႃႈဢမ်ႇပေႃးမီးလႄႈ ၵၢၼ်သူၼ်ၸႂ်ၼိူဝ်ၸိူင်းၵေႃႈဢႄႇတႄႉတႄႉ တႅမ်ႈၵေႃႈဢမ်ႇပေႃးတႅမ်ႈလႆႈ တူၺ်းၸိူင်းမၢင်ႁူဝ်ၵေႃႈဢမ်ႇသုတ်း၊ မၢင်ႁူဝ်ၵေႃႈၶၢမ်ႈပႅတ်ႈႁေတင်းပုၵ်ႈ ယွၼ်ႉၸိူင်းဢမ်ႇၶႅမ်ႉႁႃႉ ယွၼ်ႉဢမ်ႇသူၼ်ၸႂ်မၼ်းႁိုဝ် ၶႃႈၵေႃႈဢမ်ႇႁူႉမိူၼ်ၵၼ်၊ ၵူၺ်းမီးၶေႃႈထၢမ်ယူႇလၢႆၵမ်းဝႃႈ “ၵဝ်ဢမ်ႇလႆႈသူၼ်ၸႂ်မၼ်းယဝ်ႉႁိုဝ်” တူၺ်းယူႇၵေႃႈဢမ်ႇလႆႈသိူဝ်းၸွမ်းမၼ်း ဢိမ်ႇမၼ်းမႃးယူႇ။ မိူဝ်ႈၼၼ်ႉႁဵတ်းႁႂ်ႈၶႃႈၶုၵ်းၸႂ်လႆႈၶိုၼ်း မိူဝ်ႈပူၼ်ႉမႃးၼၼ်ႉတႄႉတႄႉ ၶႂ်ႈၶိုၼ်းႁူၼ်လင်ပွၵ်ႈၵႂႃႇယူႇဢွင်ႈတီႈၼၼ်ႈၶိုၼ်းဝႃႈ တူၺ်းၸိူင်းၼႆႉမၼ်းၵျေႃႇႁေၵႃႈႁိုဝ်။
မၼ်းပၼ်တၢင်းယုမ်ႉ၊ မၼ်းပၼ်တၢင်းဝူၼ်ႉလႄႈ မၼ်းႁဵတ်းႁႂ်ႈႁဝ်းလႆႈႁွင်ႉႁႆႈ တုမ်ႉယွၼ်ႈထိုင်ဢူၵ်းထိုင်ၸႂ်လႆႈ ဝူၼ်ႉဝႃႈၶႃႈတေဢမ်ႇပဵၼ်ၸိူင်ႉၼႆလႆႈယဝ်ႉ၊ ၵူၺ်းၵႃႈ ၸိူင်း “We Are All Trying Here ” ႁူဝ်ၼႆႉ မၼ်းၵေႃႈႁဵတ်းႁႂ်ႈၶႃႈလႆႈတိုၼ်ႇမႃးၶိုၼ်း။
ၽူႈလူလိၵ်ႈႁဝ်းၶဝ်တူၺ်းယဝ်ႉၸွင်ႇတေဝူၼ်ႉမိူၼ်ၵၼ်တႄႉဢမ်ႇႁူႉ တွၼ်ႈတႃႇၶႃႈတႄႉ ပဵၼ်ၸိူင်းၶိုၵ်ႉတွၼ်းဢၼ်ၼိုင်ႈ မၼ်းမႃးယွၼ်ႈထိုင်ၸၢတ်ႈပၢၼ်ၶႃႈပႃးႁိုဝ်ဢမ်ႇႁူႉ လႄႈ မၼ်းၵေႃႈလႆႈဝႃႈပၼ်ႁႅင်းၸႂ်လႆႈၼမ်တႄႉတႄႉ။
လိူင်ႈၸိူင်းမၼ်းတႄႉ ၸၢႆးၸိူင်း ပဵၼ်ၽူႈငမ်းငဝ်း (Director) မႃး 20 ပီယဝ်ႉ ၵူၺ်းၵႃႈ ၸိူင်းၶွင်မၼ်းၼၼ်ႉ ဢမ်ႇလႆႈၽၢၼ်ႇတႃႇတေထႆႇဢွၵ်ႇပဵၼ်ၸိူင်းလႆႈႁေပွၵ်ႈ၊ မၼ်းပဵၼ်ၵေႃႉလဵဝ်ၼႂ်းၸုမ်းဢၼ်ႁူမ်ႈၵၼ်ႁဵတ်းၵၢၼ်ၼႆႉမႃး မၼ်းၵေႃႈ ဢမ်ႇဢွင်ႇမၢၼ်ၼိူဝ်ၼႃႈၵၢၼ်ဢၼ်ၼႆႉ၊ မၼ်းတေဢဝ်လွင်ႈထၢင်ႇယႂ်ႇတူဝ် လွင်ႈသႄႉသွမ်းပိူၼ်ႈ ၵႅတ်ႇႁႄႉလွင်ႈဢူၼ်ႈဢွၼ်ႇမၼ်းသေ ႁဵတ်းႁႂ်ႈဢူၺ်းၵေႃႉမၼ်း ၶၢၼ်ႉႁၼ်လီၸင်းမၼ်းမႃးလႄႈ ၵူၼ်းႁိမ်းႁွမ်းၵေႃႈထၢင်ႇလဵၵ်ႉ သႄႉသွမ်းမၼ်းမိူၼ်ၵၼ်။
ၵူၺ်းၵႃႈမၼ်းၵေႃႈယူႇၵႂႃႇလူၺ်ႈပဵၼ်တူဝ်ၸဝ်ႈၵဝ်ႇ၊ မၢင်ၵေႃႉတေတူၺ်းဝႃႈမၼ်းလီၸင်း ၵူၺ်းၵႃႈ ပေႃးတူၺ်းလိုၵ်ႉလိုၵ်ႉယဝ်ႉ မၼ်းပဵၼ်ၵူၼ်းၵေႃႉဢၼ်မီးႁႅင်းၵေႃႉၼိုင်ႈ ၵူၼ်းၵေႃႉဢၼ်ႁူႉၸၵ်းမၼ်းတေႉတေႉ လႆႈယူႇၸွမ်းမၼ်းတေႁဵတ်းႁႂ်ႈဢုၼ်ႇၸႂ်ယဝ်ႉ။
ၼၢင်းၸိူင်းၵေႃႈပဵၼ်ၵူၼ်းၵေႃႉဢၼ်ၵတ်ႉၶႅၼ်ႇသေ ပဵၼ်ၵူၼ်ထတ်းလိူၵ်ႈၸိူင်းဝႃႈ ဢၼ်လႂ်ၵႂႃႇလွတ်ႈလႆႈဢမ်ႇလွတ်ႈ၊ ပဵၼ်တီႈပိူၼ်ၶီႈၵေႉလႄႈ ပဵၼ်ၵူၼ်းဢမ်ႇသူၼ်ၽႂ် ပဵၼ်ၵူၼ်းၵေႃႉဢၼ်ၽၢၼ်ႇလွင်ႈတုၵ်ႉၶမႃးတင်းၼမ် လႄႈမီးတၢင်းပဵၼ်ပၢႆးၸႂ်ဝႆႉသေ ပဵၼ်ၵူၼ်းပႅၵ်ႇပိူင်ႈၼႂ်းသၢႆတႃပိူၼ်ႈဝႆႉသေ ပဵၼ်ၵေႃႉဢၼ်ႁၼ်ၵႃႈၶၼ်ၸၢႆးၸိူင်း ဢၼ်ထုၵ်ႇပိူၼ်ႈပွႆႇပိုၼ်ႉပွႆႇပႅတ်ႈ ယွၼ်ႉၸိူင်းတႅမ်ႈဢွၵ်ႇမႃးဢမ်ႇၶႅမ်ႉၼႆၼၼ်ႉယဝ်ႉ။
ယွၼ်ႉသင်လႄႈဢူၺ်းၵေႃႉမၼ်းဢမ်ႇၵျိူၵ်ႈၸၢႆးၸိူင်း ယွၼ်ႉသင်လႄႈၼၢင်းၸိူင်းလႆႈပဵၼ်ၵူၼ်းတဵတ်ႇယဵၼ်ၵႂႃႇၸိူင်ႉၼၼ် မၼ်းပဵၼ်တီႈဢၼ်လီၶႂ်ႈသွၵ်ႈႁႃတႄႉတႄႉ။
တီႈၼႂ်းတူင်ႇဝူင်းဢၼ်ၶဝ်ယူႇၼၼ်ႉပဵၼ်ၸိူင်ႉႁိုဝ်ဝႆႉ ၵူၼ်းဢၼ်ႁဵတ်းလႆႈဢွင်ႇမၢၼ်ဢၼ်ဝႃႈၼၼ်ႉသမ်ႉပဵၼ်ၸိူင်ႉႁိုဝ်၊ မၼ်းသမ်ႉလွတ်ႈပူၼ်ႉလွင်ႈသုၵ်ႉၸႂ်ၼၼ်ႉလႆႈယူႇႁႃႉ ႁဵတ်းလႆႈပွၵ်ႈလဵဝ်ၼၼ်ႉ ပဵၼ်တီႈပိူၼ်ႈယွမ်းႁပ်ႉလႆႈယူႇသေတႃႉ တႃႇၽွၼ်းၵၢၼ်ပေႃးတေဢွၵ်ႇမႃးလႆႈလီထႅင်ႈၼၼ်ႉ မၼ်းၵေႃႈလႆႈၶတ်းၸႂ်ၵႂႃႇထႅင်ႈ ၸွင်ႇမၼ်းသမ်ႉပိူင်ႈၵၼ်တင်း ၵူၼ်းၵေႃႉဢၼ်ယူႇၸွမ်းလွင်ႈတူၵ်းသုမ်းၼၼ်ႉယူႇႁိုဝ် မၼ်းပၼ်ၶေႃႈဝူၼ်ႉလႆႈၼမ်တႄႉတႄႉ။
ႁဵတ်းႁႂ်ႈႁၼ်ထႅင်ႈဝႃႈ လွင်ႈဢၼ်တူၵ်းသုမ်းပွၵ်ႈၼိုင်ႈယဝ်ႉပွၵ်ႈၼိုင်ႈၼၼ်ႉ သင်ဝႃႈဢမ်ႇလႆႈယွမ်းၵၢၼ်ႉၼိူဝ်တူဝ်ၸဝ်ႈၵဝ်ႇသေ သိုပ်ႇႁဵတ်းၵႂႃႇထႅင်ႈ ႁဵတ်းၸွမ်းၼင်ႇဢၼ်ၸဝ်ႈၵဝ်ႇၶႂ်ႈပဵၼ် သမ်ႉဝႃႈဢမ်ႇမီးၽႂ်ယွမ်းႁပ်ႉၵေႃႈဢမ်ႇပဵၼ်ႁင် သင်ဝႃႈလႆႈႁဵတ်းၵူၺ်းၵေႃႈလႆႈယဝ်ႉ၊ လူႉလႅဝ်ၵႂႃႇၵေႃႈဢမ်ႇပဵၼ်သင် တေယူႇၸွမ်းလွင်ႈတူၵ်းသုမ်းၼႆႉၵႂႃႇၵူၺ်း မၼ်းပဵၼ်ၶေႃႈဢၼ်ၸၢႆးၸိူင်းၵႆႉလၢတ်ႈလိူဝ်ပိူၼ်ႈ ၼႂ်းၸိူင်းၼႆႉယဝ်ႉ။
မၼ်းၵေႃႈပဵၼ်ၸိူင်းၸၢတ်ႈပၢၼ်ဢၼ်ၼိုင်ႈ ၸိူင်းဢၼ်ၼႄႁႂ်ႈႁၼ်လၢႆလၢႆၽၢႆႇ ဢမ်ႇၸႂ်ႈၸိူင်းတၢင်းႁၵ်ႉဢၼ်ႁွမ်ဝၢၼ် ၵူၺ်းၵႃႈပဵၼ်ၸိူင်းတၢင်းႁၵ်ႉဢၼ်ဢုၼ်ႇၸႂ် ဢမ်ႇဝႃႈ ပီႈၼွင်ႉ၊ ၵေႃႉႁၵ်ႉ၊ ဢူၺ်းၵေႃႉ လႄႈ မၼ်းၵေႃႈပဵၼ်ၸိူင်းဢၼ်ယူတ်းယႃပၼ် လႆႈ လွင်ႈမၢတ်ႇၸတ်ႉၼႂ်းၸႂ်ၸိူဝ်းၼႆႉယဝ်ႉ။
ၼႂ်းၸိူင်းမၼ်းၼၼ်ႉၵေႃႈ ဢမ်ႇလႆႈမီးသင်ၼမ် ၼင်ႇဝႃႈပဵၼ်သၽႃႇဝယူႇၵူႈဝၼ်းဝၼ်း၊ ၵိၼ်ၼွၼ်း ႁဵတ်းၵၢၼ် ဢုပ်ႇၵၼ်လွင်ႈၶမ်ၸႂ် ၽိတ်းၵၼ်ထဵင်ၵၼ် လီၵၼ် လွင်ႈတဵတ်ႇယဵၼ် ဢၼ်မီးယူႇၼႂ်းၸိူင်းၼၼ်ႉ မၼ်းၸၼ်ဢဝ်ၸႂ်ပၵ်းၵႂႃႇၸွမ်းမၼ်းလႆႈတင်းပိုၵ်းယဝ်ႉ။
လႄႈတင်း လႆႈလဵပ်ႈႁဵၼ်းပႃးထႅင်ႈ ၵၢၼ်တႅမ်ႈၸိူင်း၊ ၵၢၼ်သၢင်ႈၸိူင်းၸိူဝ်းၼႆႉထႅင်ႈ။
ၼႆႉတႄႉပဵၼ်တၢင်းႁၼ်ထိုင်ၶႃႈဢၼ်လႆႈတူၺ်းၵူၺ်းလႄႈ သင်ၸိူဝ်ႉဝႃႈ ၽူႈလူလိၵ်ႈႁဝ်းၶဝ် လႆႈတူၺ်းၸိုင် တေလႆႈတၢင်းႁၼ် ဢၼ်ပႅၵ်ႇပိူင်ႈၵၼ်တင်းၶႃႈယူႇ၊ ၸိူင်းႁူဝ်ၼႆႉတႄႉ တေပိုၼ်ၽႄႈဢွၵ်ႇတၢင်း Netflix ၶႃႈဢေႃႈ၊ မၼ်းပၼ်ၶေႃႈဝူၼ်ႉထႅင်ႈတင်းၼမ် ဢမ်ႇၵွမ်ႉၵႃးမွၵ်ႈၼႆႉၵူၺ်း ပေႃးလႆႈတူၺ်းတႄႉတေႁူႉလီယူႇ။
ၼပ်ႉယမ်ၽူႈလူလိၵ်ႈႁဝ်းယူႇဢေႃႈ
ပၢႆၵမ်- သႅၼ်ငဝ်း
25/07/2026
