မိူဝ်ႈပဵၼ်လုၵ်ႈဢွၼ်ႇ ပဵၼ်တၢင်းႁၵ်ႉဢၼ်ဝႃႈ လၵ်ႉတူၺ်းလၵ်ႉႁၵ်ႉၽႂ်သေၵေႃႉၵေႃႉ ပဵၼ်တၢင်းႁၵ်ႉဢၼ်ၸႅတ်ႈၸၢင်ႇ ဢမ်ႇႁတ်းလၢတ်ႈၼႄၽႂ်။
ၵေႃႉယႂ်ႇမႃးထႅင်ႈ လႆႈဢုပ်ႇလၢတ်ႈသိုပ်ႇၾူင်းႁႃၵၼ် မိူဝ်ႈတေၼွၼ်း ၊ ၵဝ်းလူၺ်ႈ သူင်ႇမွၵ်ႇသူင်ႇၶူဝ်းတွၼ်ႈပၼ်ၵၼ် ပဵၼ်တၢင်းႁၵ်ႉဢၼ်တႄႇႁဵၼ်းႁူႉဝႃႈ ၵၢၼ်မီးတၢင်းႁၵ်ႉ မၼ်းလီလိူဝ်သေယူႇၵေႃႉလဵဝ်မွၵ်ႈႁိုဝ် တႄႇမုင်ႈမွင်း ၶႂ်ႈၵုမ်းၵမ် ထိုင်တီႈမၢင်ပွၵ်ႈမႃး ထူပ်းလွင်ႈဢမ်ႇမိူၼ်ၼင်ႇၸႂ်သေ တိူဝ်ႉၸႂ်မႃး ႁွင်ႉႁႆႈမႃး။
ၵေႃႉယႂ်ႇမႃးထႅင်ႈၵေႃႈ ပဵၼ်တၢင်းႁၵ်ႉဢၼ်ၶႂ်ႈမီးၽႂ်သေၵေႃႉယူႇႁိမ်းၶၢင်ႈ ပဵၼ်လွင်ႈလူမ်ၸႂ် ပဵၼ်ႁႅင်းၸႂ်ပၼ်ၸၢတ်ႈပၢၼ်ႁဝ်း လႄႈ တႄႇႁဵၼ်းႁူႉတေပွႆႇႁႂ်ႈၽႂ်သေၵေႃႉဢွၵ်ႇၵႂႃႇၼႂ်းၸၢတ်ႈပၢၼ်ႁဝ်း ၼႂ်းဝၼ်းဢၼ်ၶဝ်ဢမ်ႇမိူၼ်ၵဝ်ႇယဝ်ႉ။
ဢႃႇယုၸၢတ်ႈပၢၼ်ႁဝ်းၼၼ်ႉ မီးတၢင်းႁၵ်ႉဢၼ်ပႅၵ်ႇပိူင်ႈၵၼ်။
ၶၢဝ်းယၢမ်းသွၼ်ႁႂ်ႈႁဝ်းလႆႈႁဵၼ်းႁူႉလွင်ႈတၢင်းႁၵ်ႉဢၼ်လၢၵ်ႇလၢႆလႄႈၼမ်မႃး ၵူၺ်းၵႃႈမၼ်းၵေႃႈဢမ်ႇပဵင်းပေႃးတေႁဵတ်းႁႂ်ႈႁဝ်း ဢမ်ႇလႆႈထူပ်းတၢင်းႁၵ်ႉဢၼ်ႁဵတ်းႁႂ်ႈႁဝ်းၽိတ်းပိူင်ႈလႆႈ။
ၸိူင်ႉႁိုဝ်ၵေႃႈယဝ်ႉ မိူဝ်ႈတၢင်းႁၵ်ႉမၼ်းၵိူတ်ႇပဵၼ်မႃးယဝ်ႉ မၼ်းတိုၼ်းပဵၼ်တၢင်းႁၵ်ႉဢၼ်ႁၢင်ႈလီယူႇယဝ်ႉ။
ပိၼ်ႇ – ငဝ်မွင်မိုတ်းမူဝ်း
