ၵူၼ်းၵေႃႉဢၼ်ႁၵ်ႉတူဝ်ၵဝ်ႇၼၼ်ႉ ပဵၼ်ၵူၼ်းၵေႃႉဢၼ် ဢမ်ႇယၢမ်ႈထၢမ်ဝႃႈ တူဝ်ၵဝ်ႇမီးၵႃႈၶၼ်မွၵ်ႈႁိုဝ် ၵူၺ်းၵႃႈ တေတူၺ်းႁၼ်လွင်ႈလီလီဢၼ်မီးယူႇလႄႈ ႁူႉၸၵ်းမေႃၸႂ်ႉၽွၼ်းလီႁႂ်ႈမၼ်းတိူဝ်းလီမႃးထႅင်ႈ ဢမ်ႇၼေးတၢင်းၽိတ်းၽႂ် ဢမ်ႇတႅၵ်ႈၼိူင်းၽႂ် ဢမ်ႇထၢင်ႇလဵၵ်ႉတူဝ်ၵဝ်ႇ။
ႁၵ်ႉတူဝ်ၵဝ်ႇ ပဵၼ်ၵူၼ်းဢမ်ႇပွႆႇပႅတ်ႈလွင်ႈၼွၼ်းၾၼ် ဢၼ်တေယုၵ်ႉပၼ်ၸၢတ်ႈပၢၼ်ႁႂ်ႈလီမႃးၵူႈဝၼ်းဝၼ်း ပဵၼ်ၵူၼ်းဢၼ်တူၺ်းႁၼ်တိုဝ်ႉတၢင်းလႆႈၵူႈမိူဝ်ႈ မီးသတိမေႃၸတ်းၵၢၼ်လႄႈၵႄႈၶႆပၼ်ႁႃ။
ႁၵ်ႉတူဝ်ၵဝ်ႇ ပဵၼ်ၵူၼ်းဢၼ်ႁူႉၸၵ်း ဢၼ်လႂ်လမ်ႇလွင်ႈဢၼ်လႂ်ဢမ်ႇလမ်ႇလွင်ႈ ဢၼ်လႂ်ထုၵ်ႇလီတူၺ်းၶၢမ်ႈ ဢၼ်လႂ်ထုၵ်ႇလီဝႆႉၵႃႈၶၼ် ဢမ်ႇသုမ်းၶၢဝ်းယၢမ်းၸွမ်းလွင်ႈဢမ်ႇလႆႈလွင်ႈ ဢမ်ႇၸူမ်ယူႇၸွမ်းလွင်ႈတုၵ်ႉၼႃႇပူၼ်ႉ ၸႂ်ႉၸၢတ်ႈပၢၼ် တုၵ်ႉၵမ်ႉ သိူဝ်းငၢႆႈ။
ႁၵ်ႉတူဝ်ၵဝ်ႇ ၵေႃႉယႂ်ႇလႆႈလီ မီးတၢင်းသိူဝ်းထုၵ်ႇမႅၼ်ႈၸွမ်းတီႈၸွမ်းတၢင်း ႁူႉမေႃပဵင်းပေႃးလႄႈ ၼပ်ႉယမ်တူဝ်ၵဝ်ႇ ဢမ်ႇၵႂႃႇထၢင်ႇလဵၵ်ႉပိူၼ်ႈ။
ႁၼ်သုၼ်ႇတူဝ် ပဵၼ်ၵူၼ်းၸႂ်ၵႅပ်ႈႁႅင်း ဢဝ်ပၢႆးဝူၼ်ႉတူဝ်ၵဝ်ႇပဵၼ်လၵ်း ဢဝ်ၽွၼ်းလီမႃးပဵၼ်ယႂ်ႇလိူဝ်လွင်ႈထုၵ်ႇမႅၼ်ႈ ႁဵတ်းတႃႇတူဝ်ၵဝ်ႇလွတ်ႈ ဢမ်ႇသူၼ်ၸႂ်ဝႃႈၽႂ်တေလႆႈလိူတ်ႇမႆႈ။
ႁၼ်သုၼ်ႇတူဝ် ၵူၼ်းဢၼ်ႁၼ်သုၼ်ႇလႆႈ ႁတ်းႁၵ်းလင်ပိူၼ်ႈ ၸႂ်ၵူတ်ႉၸႂ်ငေႃး ဢမ်ႇမေႃဢၢႆတူဝ်ၵဝ်ႇ မီးလွင်ႈတၢင်း မီးၶေႃႈဢၢင်ႈ ပၼ်ႁႂ်ႈတူဝ်ၵဝ်ႇလႆႈလီ ယဵပ်ႇႁူဝ်ပိူၼ်ႈ ယွၼ်ႉၶႂ်ႈလႆႈလီပဵၼ်ယႂ်ႇ။
ႁၵ်ႉတူဝ်ၵဝ်ႇလႄႈႁၼ်သုၼ်ႇတူဝ်ႇၼၼ်ႉ မီးသဵၼ်ႈမၢင်မၢင်ၶႅၼ်ႈဝႆႉ ဢၼ်ႁွင်ႉဝႃႈ “ၸႂ်ဝူၼ်ႉႁူႉ” လႄႈ ၸႅၵ်ႇႁႂ်ႈႁူႉဢၼ်လႂ်ပဵၼ်ဢၼ်လႂ်။
ပိၼ်ႇ-ငဝ်မွင်မိုတ်းမူဝ်း
