ၸၢႆးဢွၼ်ႇၵေႃႉၼိုင်ႈ မႃးလၢတ်ႈတီႈပေႃႈမၼ်းဝႃႈ
“ပေႃႈ ၵူၼ်းႁိမ်းႁိူၼ်းၼၼ်ႉမႃးလၵ်ႉမၢၵ်ႇမူင်ႈႁဝ်းၼေႈ”
ပေႃႈၶဝ်ယုမ်ႉယဝ်ႉထၢမ် “မၢၵ်ႇမူင်ႈႁဝ်းၵိုတ်းလၢႆလုၵ်ႈလႃႇ”
“ယင်းတိုၵ်ႉၵိုတ်းယူႇလၢႆလုၵ်ႈၶႃႈ”
“ပေႃးၼၼ်ၵႂႃႇသေႇမၢၵ်ႇမူင်ႈဢၼ်သုၵ်းမၼ်းမႃးပၼ်ထႅင်ႈႁေ ၸဵတ်းလုၵ်ႈၼႆႉလႄႈ”
လုၵ်ႈဢွၼ်ႇၼၼ်ႉၵေႃႈ ပွင်ႇၸႂ်ဝႃႈ ပေႃႈၶဝ်ႁႂ်ႈၵႂႃႇသေႇမၢၵ်ႇမူင်ႈ ၵူဝ်ၵူၼ်းႁိမ်းႁိူၼ်းတေလၵ်ႉၵႂႃႇထႅင်ႈ ၸင်ႇလႆႈၼႅတ်ႈသေႇပၼ်ပေႃႈၶဝ်၊ မိူဝ်ႈလႆႈမၢၵ်ႇမူင်ႈယဝ်ႉၵေႃႈ ႁွပ်ႇမႃးပၼ်ပေႃႈၶဝ်သေ ဝူၼ်ႉဝႃႈတေလႆႈၵိၼ်ဝၢၼ်ဝၢၼ် ၵူၺ်းၵႃႈ ပေႃႈမၼ်းၼၼ်ႉသမ်ႉ ဢဝ်မၢၵ်ႇမူင်ႈတင်းမူတ်းသႂ်ႇၼႂ်းသႃႉႁၢင်ႈလီလီသေ ၵႂႃႇတဵၵ်းႁိင်ႇၼႃႈႁိူၼ်း ၵူၼ်းႁိမ်းႁိူၼ်းဢၼ်လုၵ်ႈမၼ်းဝႃႈမႃးလၵ်ႉမၢၵ်ႇမူင်ႈၼၼ်ႉ။
ၸၢႆးဢွၼ်ႇၼၼ်ႉၵေႃႈ ဢမ်ႇပွင်ႇၸႂ်ဝႃႈပေႃႈၶဝ်ႁဵတ်းသင်ယူႇ၊ မိူဝ်ႈၵူၼ်းႁိမ်းႁိူၼ်းၽုၺ်ႇၽၵ်းတူႁူဝ်ႉဢွၵ်ႇမႃး ပဵၼ်ၸၢႆးၵူၼ်းၶၢဝ်ႉ သီၼႃႈဢမ်ႇလီဝႆႉၼၼ်ႉ မိူၼ်ႁဵတ်းသေလွင်ႈလွင်ႈၽိတ်းလႄႈ ၵေႃႉပဵၼ်ပေႃႈၼၼ်ႉၵေႃႈ ဢဝ်တင်းမၢၵ်ႇမူင်ႈၼႂ်းသွင်းယိုၼ်ႈပၼ်သေ လၢတ်ႈဝႃႈ “ၶႃႈဢဝ်မၢၵ်ႇမူင်ႈမႃးတွၼ်ႈဢေႃႈ ပဵၼ်ၵူၼ်းယူႇႁိူၼ်းၸမ်ၵၼ်ၼႆႉၵူၺ်း မီးလွင်ႈသင်ၵေႃႈလၢတ်ႈၵၼ်လႆႈၶႃႈ တေၸွႆႈထႅမ်ၵၼ်လႆႈ”
ၵူၼ်းၵေႃႉၼၼ်ႉၵေႃႈ မီးသီၼႃႈဢၼ်ၸႂ်ဢမ်ႇသိူဝ်းမႃး ၶဝ်ၵေႃႈႁႂ်ႈပေႃႈၸၢႆးဢွၼ်ႇၼၼ်ႉပႆႉၵမ်းၼႆလႄႈ ဢဝ်တင်းသႃႉသႂ်ႇမၢၵ်ႇမူင်ႈၼၼ်ႉ သႂ်ႇၶႆႇၵႆႇတဵမ်သွင်းမႃးပၼ်
“တီႈႁိူၼ်းႁဝ်းလဵင်ႉၵႆႇဝႆႉလၢႆတူဝ် ႁဝ်းတေဢဝ်ၶႆႇၵႆႇတွၼ်ႈၶိုၼ်းၶႃႈၼႃႈ”
ပေႃႈၵေႃႈလၢတ်ႈၵႂၢမ်းယိၼ်းၸူမ်းသေ ၸုင်မိုဝ်းၸၢႆးဢွၼ်ႇပွၵ်ႈၶိုၼ်းယဝ်ႉ။
ၸၢႆးဢွၼ်ႇထၢမ်ပေႃႈၶဝ်ဝႃႈ
“ပဵၼ်ႁင်လႄႈ ပေႃႈဢဝ်မၢၵ်ႇမူင်ႈၵႂႃႇပၼ်ၶဝ်လႃႇ တႅၼ်းတီႈတေၵႂႃႇဢဝ်မၢၵ်ႇမူင်ႈႁဝ်းၶိုၼ်း”
“သင်ပေႃႈၵႂႃႇဢဝ်မၢၵ်ႇမူင်ႈ ႁဝ်းၵေႃႈတေလႆႈမၢၵ်ႇမူင်ႈၶိုၼ်းၵူၺ်း ႁဝ်းၵေႃႈတေသုမ်းၵူၼ်းႁိမ်းၸမ်ႁဝ်းၵႂႃႇလႄႈ တေၸၢင်ႈလႆႈလွင်ႈၸဵပ်းၸႂ်ၵၼ်မႃး ၵူၺ်းၵႃႈ ပေႃႈဢဝ်မၢၵ်ႇမူင်ႈၵႂႃႇပၼ်ၸဵတ်းလုၵ်ႈ ပႃးဢၼ်ၶဝ်သေႇၵႂႃႇၼိုင်ႈလုၵ်ႈၼၼ်ႉၵေႃႈ ပႅတ်ႇလုၵ်ႈ ႁဝ်းတင်းလႆႈပႃးၼမ်ႉၸႂ်ၶဝ် ဢၼ်ပဵၼ်ၶႆႇၵႆႇၼႂ်းသွင်းၼႆႉ ယင်းလႆႈၵူၼ်းႁိမ်းၸမ်ဢၼ်လီတေႃႇၵၼ်ထႅင်ႈ လုၵ်ႈဝႃႈၸိူင်ႉႁိုဝ်လီလိူဝ်လႃႇ”
ဢူၺ်းၵေႃႉလီပၢၵ်ႇၵေႃႉၼၼ်ႉ ယင်းတိုၵ်ႉဢေႇယူႇ၊ မီးၽူႈၶဵၼ်ၵေႃႉလဵဝ်ၼၼ်ႉ မၼ်းၼမ်ႁႅင်းၼႃႇ၊ တႃႇမီးဢူၺ်းၼၼ်ႉ ဢမ်ႇယၢပ်ႇ တႃႇထိင်းသိမ်းမၼ်းဝႆႉႁႂ်ႈယူႇလႆႈႁိုင်ၼၼ်ႉတႄႉယၢပ်ႇဢိူဝ်ႈ။
ပိၼ်ႇ-ငဝ်မွင်မိုတ်းမူဝ်း
