တၢင်းသိူဝ်းၼၼ်ႉဢမ်ႇလႆႈမႃးယွၼ်ႉဝႃႈမီးၵူႈလွင်ႈဢၼ်ၶႂ်ႈပဵၼ် မၼ်းလႆႈမႃးတီႈဢၼ်မေႃႁူႉၸၵ်းၵႃႈၶၼ်မၼ်းလႄႈယိၼ်းၸူမ်းလွင်ႈဢၼ်မီးယူႇယဝ်ႉ ဢမ်ႇဝႃႈလွင်ႈလဵၵ်ႉလဵၵ်ႉဢွၼ်ႇၵူၺ်းၵေႃႈ ႁဵတ်းႁႂ်ႈယုမ်ႉၶူဝ်လႆႈယူႇ။
ၸႂ်ႉၸၢတ်ႈပၢၼ်ငၢႆႈငၢႆႈ ဢမ်ႇလူဝ်ႇသုၵ်ႉသၵ်ႉ ဢမ်ႇလူဝ်ႇၵႂႃႇတႅၵ်ႈၼိူင်းတင်းၽႂ် ယူႇၸွမ်းတူဝ်ၸဝ်ႈၵဝ်ႇဢၼ်ပဵၼ်ယူႇ ၵိၼ်တၢင်းၵိၼ်ဢၼ်လႆႈၸႂ် ထွမ်ႇၵႂၢမ်းဢၼ်လႆႈၸႂ် ၼၼ်ႉၵူၺ်းၵေႃႈ ထႅမ်ႁႅင်းလႆႈယဝ်ႉ။
မၢင်ဝၼ်းႁိူဝ်ႉဢိူဝ်ႈၼႆၵေႃႈ သင်လႆႈၼင်ႈလိုဝ်ႈသေ ထူၺ်ႈၸႂ်ၶဝ်ႈလိုၵ်ႉလိုၵ်ႉ တူၺ်းၵၢင်ႁၢဝ်ယူႇလႄႈ ဢၢၼ်ႇပပ်ႉလိၵ်ႈဢွၼ်ႇၵူၺ်းၼႆ ႁဵတ်းႁႂ်ႈၸႂ်ၵတ်းယဵၼ်မႃးလႆႈယူႇ။
မၢင်ပွၵ်ႈၸၢင်ႈတေဝူၼ်ႉထိုင်လွင်ႈပူၼ်ႉမႃး မႆႈၸႂ်ၸွမ်းလွင်ႈမိူဝ်းၼႃႈ ထိုင်တီႈလိုမ်းဝႃႈ မိူဝ်ႈၼႆႉႁဝ်းတိုၵ်ႉထူၺ်ႈၸႂ်ယူႇလႄႈ မီးတိုဝ်ႉတၢင်းႁဵတ်းလွင်ႈလီထႅင်ႈတင်းၼမ်။
ၸႂ်ႉၶၢဝ်းယၢမ်းၸွမ်းဢၼ်ႁဝ်းႁၵ်ႉ ဢမ်ႇဝႃႈပဵၼ်ၵူၼ်းၼႂ်းၼႃႈႁိူၼ်း၊ ဢူၺ်းၵေႃႉ၊ သတ်းလဵင်ႉ ၶၢဝ်းယၢမ်းဢၼ်မီးပၼ်ၵၼ်ၼၼ်ႉ မီးၵႃႈၶၼ်လိူဝ်သေၶူဝ်းၶွင်ၵႃႈၶၼ်ယႂ်ႇၵွၼ်ႇ မၢႆတွင်းလီလီၼၼ်ႉ တေယူႇၸွမ်းႁဝ်းၵႂႃႇတေႃႇၸူဝ်ႈယဝ်ႉ။
ႁဵတ်းလွင်ႈဢၼ်ႁၵ်ႉ ဢမ်ႇဝႃႈပဵၼ်လွင်ႈလဵၵ်ႉဢွၼ်ႇၵူၺ်းၵေႃႈလႆႈ သင်လႆႈၸႂ်ၽုၵ်ႇတူၼ်ႈမႆႉ ၵေႃႈၽုၵ်ႇလႄႈ၊ သင်လႆႈၸႂ်ၸၼ်ႁၢင်ႈ ၵေႃႈၸၼ်လႄႈ တၢင်းသိူဝ်းၼၼ်ႉတေၵႆႉယူႇၸွမ်းလွင်ႈလဵၵ်ႉလဵၵ်ႉဢွၼ်ႇ ဢၼ်ႁဝ်းႁဵတ်းလူၺ်ႈၸႂ်ၼၼ်ႉယဝ်ႉ။
ဢမ်ႇၸႂ်ၸပ်းၸွမ်းလွင်ႈဢၼ်ၵုမ်းထိင်းဢမ်ႇလႆႈ ၾူၼ်တေတူၵ်း၊ တၢင်းတေယၢပ်ႇ ၽႂ်တေဝူၼ်ႉၸိူင်ႉႁိုဝ်တေႃႇႁဝ်း ဢမ်ႇၸႂ်ႈလွင်ႈဢၼ်ႁဝ်းၵုမ်းထိင်းလႆႈ ႁူႉမေႃပွႆႇဝၢင်းသေ တေႁဵတ်းႁႂ်ႈၵတ်းယဵၼ်ၸႂ်မႃးလႆႈယဝ်ႉ။
ဢွၵ်ႇဢဵၼ်ႁႅင်း၊လုမ်းလႃးတူၺ်းထိုင်တူဝ်ၵဝ်ႇလႄႈ ဢမ်ႇလူဝ်ႇသိုဝ်ႉဢွၵ်ႇၵေႃႈလႆႈ တူင်ႉတူင်ႉၼိုင်ၼိုင် ပႆလဵၼ်ႈ ထွမ်ႇၵႂၢမ်းသေလႅၼ်ႈလွႆးလွႆးၵူၺ်းၵေႃႈ ပၢႆးယူႇလီၶႅမ်ႉယဝ်ႉ ၸႂ်ၵေႃႈသိူဝ်းၸွမ်းၵွၼ်ႇ။
မိူဝ်ႈႁဵတ်းၽိတ်းၵေႃႈမေႃဢဝ်တွၼ်ႈသွၼ် ၵူႈၵေႃႉၼၼ်ႉယၢမ်ႈႁဵတ်းၽိတ်းလႄႈ ဢမ်ႇမီးၽႂ်တဵမ်ထူၼ်ႈၵူႈလွင်ႈ ယွမ်းႁပ်ႉသေႁဵၼ်းႁူႉယဝ်ႉ သိုပ်ႇၵႂႃႇလႄႈ လီလိူဝ်သေၼေးတူဝ်ၵဝ်ႇယဝ်ႉ ပၼ်ႁႂ်ႈၶၢဝ်းယၢမ်းပူၼ်ႉပႅတ်ႈလၢႆလၢႆ။
ဢမ်ႇဢဝ်တူဝ်ၸဝ်ႈၵဝ်ႇၵႂႃႇတႅၵ်ႈၼိူင်းတင်းၽႂ် ၵူၼ်းႁဝ်းၼၼ်ႉမီးသဵၼ်ႈတၢင်းၽႂ်မၼ်း မၢင်ၵေႃႉလႅၼ်ႈဝႆး မၢင်ၵေႃႉပႆထိူင်း မၼ်းဢမ်ႇလႆႈလမ်ႇလွင်ႈသေၵႃႈႁိုဝ် ပေႃးဝႃႈႁဝ်းယင်းတိုၵ်ႉၵႂႃႇတၢင်းၼႃႈၵေႃႈလႆႈပေႃးယဝ်ႉ။
မေႃယိုၼ်ႈမႅင်ႇဢၼ်ဢမ်ႇမုင်ႈမွင်းလွင်ႈတွပ်ႇတႅၼ်းၶိုၼ်း တၢင်းယုမ်ႉ ၵႂၢမ်းယိၼ်းၸူမ်း လွင်ႈၸွႆႈထႅမ်လဵၵ်ႉလဵၵ်ႉဢွၼ်ႇ တေၸၢင်ႈလႅၵ်ႈလႆၢႈဝၼ်းဢမ်ႇလီၽႂ်သေၵေႃႉၼိုင်ႈလႄႈ မၢင်ပွၵ်ႈႁဝ်းယင်းတေလႆႈၶိုၼ်းလူၺ်ႈဢမ်ႇဝူၼ်ႉၺႃးလူးၵွၼ်ႇ။
မေႃၶႂၢင်းပၼ်တူဝ်ၵဝ်ႇလႄႈပိူၼ်ႈ ပေႃးဝႃႈၵဵပ်းလွင်ႈၸႂ်လမ်ဝႆႉႁိုင်ႁိုင်ၵေႃႈ ႁဵတ်းႁႂ်ႈႁဝ်းၼၵ်းၸႂ်ၵူၺ်း၊ ၶႂၢင်းပၼ်လႆႈဢၼ်ဝႃႈၼၼ်ႉဢမ်ႇၸႂ်ႈဝႃႈတေလိုမ်း တွၼ်ႈတႃႇမၼ်းတေဢမ်ႇၸၼ်ႁဝ်းၸူမ်ယူႇၸွမ်းမၼ်းဝႆႉၵူၺ်း။
ႁႃလွင်ႈမႂ်ႇမႂ်ႇႁဵတ်းႁႂ်ႈတိုၼ်ႇတဵၼ်ႈ ၸၢမ်းႁဵတ်းလွင်ႈမႂ်ႇ သမ်ႉဝႃႈႁဵတ်းလွင်ႈယွင်ႇယွင်ႇၵူၺ်းၵေႃႈ ၸၢတ်ႈပၢၼ်ၼၼ်ႉတေဢမ်ႇလီၶၢၼ်ႉယဝ်ႉ။
ႁၵ်ႉတူဝ်ၵဝ်ႇၼမ်ၼမ် ၵူၼ်းၵေႃႉဢၼ်ႁဝ်းထုၵ်ႇလီလုမ်းလႃးလိူဝ်သေပိူၼ်ႈၵေႃႈ တူဝ်ႁဝ်းၼၼ်ႉယဝ်ႉ လၢတ်ႈလီတေႃႇတူဝ်ၵဝ်ႇ ပၼ်ၶၢဝ်းယၢမ်းတူဝ်ၵဝ်ႇ ယႃႇလိုမ်းလၢတ်ႈတူဝ်ၵဝ်ႇဝႃႈ “မႂ်းႁဵတ်းလႆႈယူႇၼႃႈ”။
ပိၼ်ႇ- ငဝ်မွင်မိုတ်းမူဝ်း
