တၢင်းသိူဝ်းဢၼ်ၸႅတ်ႈၸၢင်ႇ

“တၢင်းသိူဝ်းဢၼ်ၸႅတ်ႈၸၢင်ႇ ”

တၢင်းသိူဝ်းၼႆႉ မၼ်းပဵၼ်ဢၼ်သၢၼ်ၶတ်းၵၼ်တင်း လွင်ႈတၢင်းတုၵ်ႉဝႃႈၼႆႉသေတႃႉ သမ်ႉဝႃႈဢမ်ႇမီး တၢင်းတုၵ်ႉၵေႃႈ တေမီးတၢင်းသိူဝ်းၼႆ ဢမ်ႇၸႂ်ႈ ၵွပ်ႈပိူဝ်ႈ ၼႂ်းၵႄႈ တၢင်းတုၵ်ႉလႄႈတၢင်းသိူဝ်းၼႆႉ ယင်းမီး ၶေႃႈဝႃႈ ဢမ်ႇတုၵ်ႉဢမ်ႇသိူဝ်းၼႆၼၼ်ႉထႅင်ႈယူႇ။

လွင်ႈတၢင်းသိူဝ်းၼႆႉ ပဵၼ်မႃးမိူဝ်ႈၽွင်း ဢၼ်မီးလွင်ႈတၢင်းပဵၼ်မႃး မႅၼ်ႈမိူဝ်ႈလဵဝ်ၵၼ်တင်းဢၼ်ၸဝ်ႈၵဝ်ႇ ၶႂ်ႈပဵၼ်ၼၼ်ႉယဝ်ႉ။

ပိူင်တႅၵ်ႈမၼ်း မိူၼ်ၼင်ႇ~

ၸဝ်ႈၵဝ်ႇၶႂ်ႈၵိၼ်လႄႈလႆႈၵိၼ် ၸဝ်ႈၵဝ်ႇၶႂ်ႈလႄႇ လႄႈ လႆႈလႄႇ ၶႂ်ႈမီးငိုၼ်းလႄႈမီး တႄႇၵႂႃႇ ၵွပ်ႈပိူဝ်ႈမီးမႃး လွင်ႈတၢင်းဢၼ်ႁဵတ်းႁႂ်ႈပဵၼ်ၼင်ႇၸႂ်လႄႈ ၸင်ႇမီးတၢင်းသိူဝ်းယဝ်ႉ။

တီႈမူၼ်ႈသိူဝ်းၼၼ်ႉ ဢမ်ႇၸႂ်ႈတၢင်းသိူဝ်းတႃႇၵူႈၵေႃႉ

မိူၼ်ၼင်ႇ ပၢင်မူၼ်ႈသိူဝ်း ၊ KTV၊  Bar ၊ ၸိူဝ်းၼႆႉ ပဵၼ်တီႈမူၼ်ႈသိူဝ်းဝႃႈၼႆသေတႃႉ ၵွပ်ႈပိူဝ်ႈတၢင်းသူင်ၵျိူၵ်ႈ ဢမ်ႇမိူၼ်ၵၼ်လႄႈ ၵူၼ်းဢၼ်ဢမ်ႇလႆႈၸႂ်တီႈၸိုင်ႉ ၼႆၵေႃႈယင်းမီးယူႇ ။

လွင်ႈတၢင်းသိူဝ်း ဢၼ်ပဵၼ်မႃးလူၺ်ႈ ၸႂ်ၶႂ်ႈပဵၼ်လႄႈ ပဵၼ်မႃးၼၼ်ႉ မၼ်းသိူဝ်းလႆႈၸူဝ်ႈၶၢဝ်းၵူၺ်း ၵွပ်ႈပိူဝ်ႈ ၸႂ်ႁဝ်းလႅၵ်ႈလၢႆႈယူႇၵူႈၶၢဝ်းလႄႈ တၢင်းသိူဝ်းယွၼ်ႉလူၺ်ႈ ဢၼ်ၼိုင်ႈပဵၼ်မႃးယဝ်ႉသေၶိုၼ်းႁၢႆၵႂႃႇ သမ်ႉလႆႈၶိုၼ်းမုင်ႈမွင်းထႅင်ႈ ၵွပ်ႈၼၼ် ၼႂ်းၵႄႈမၼ်းၼၼ်ႉ ယင်းပဵၼ်လႆႈတၢင်းတုၵ်ႉယူႇ။

တႃႇႁႂ်ႈမီးတၢင်းသိူဝ်းဢၼ်ၸႅတ်ႈၼၼ်ႉ ၸဝ်ႈၵဝ်ႇ တေလႆႈႁဵတ်းသၢင်ႈဢဝ်ၼႂ်းၸႂ်ၸဝ်ႈၵဝ်ႇႁင်းၵူၺ်းယဝ်ႉ ။

ၵွပ်ႈပိူဝ်ႈ တၢင်းတုၵ်ႉလႄႈတၢင်းသိူဝ်းၼၼ်ႉပဵၼ်မႃးယွၼ်ႉၸႂ်ၵူၺ်းလႄႈ ပေႃးမႅၼ်ႈၸႂ်ၵေႃႈသိူဝ်းသေ ပေႃးဢမ်ႇမႅၼ်ႈၸႂ်ၵေႃႈပဵၼ်တၢင်းတုၵ်ႉမႆႈၸႂ်ၸဝ်ႈၵဝ်ႇ ၼၼ်ႉ တေႁဵတ်းႁိုဝ်ၵႄႈလိတ်ႈမၼ်းၼႆ ~

1. တေလႆႈၽိုၵ်းပွႆႇဝၢင်းၸႂ် – မၢင်ပွၵ်ႈ ဢၼ်ၸဝ်ႈၵဝ်ႇယိူင်းဢၢၼ်းဝႆႉ ဢမ်ႇပဵၼ်မႃးလႄႈ ၸၢင်ႈႁဵတ်းႁႂ်ႈတုမ်ႉယွၼ်ႈၸႂ်ၸဝ်ႈၵဝ်ႇယဝ်ႉ ၽွင်းၼၼ်ႉ ႁႂ်ႈမေႃဝႆႉၸႂ်ဝႃႈ ဢမ်ႇမီးသင်မၼ်ႈၵိုမ်း လွင်ႈဢမ်ႇထၢင်ႇၼၼ်ႉ ၸၢင်ႈပဵၼ်မႃးယူႇ ၼႆသေ ႁႂ်ႈမေႃယူႇၸွမ်းပတ်ႉၸုပၢၼ်ႇ ၶၢဝ်းယၢမ်းမိူဝ်ႈလဵဝ် ၊ ယွၼ်ႉပိူဝ်ႈလွင်ႈတၢင်း ဢၼ်တၢင်ႇၵေႃႉႁဵတ်းဢမ်ႇမႅၼ်ႈၸႂ် ၊ ဢမ်ႇၼၼ် ၸဝ်ႈၵဝ်ႇႁဵတ်းဢမ်ႇမိူၼ်ၸႂ်ႁင်းၵူၺ်းသေ တေၸၢင်ႈပဵၼ်တၢင်းတုၵ်ႉၼၼ်ႉ ႁႂ်ႈမေႃဝႆႉဝၢင်းၸႂ်ဝႃႈ ဢမ်ႇမီးသင် ဢၼ်မိူၼ်ၸႂ်လႆႈ ၶႂ်ႈယဝ်ႉမၼ်းသေ ယႃႇပေၸႂ်လမ်ယဝ်ႉ။

ဢၼ်ဢမ်ႇသႅင်ႇသင်တင်းၸဝ်ႈၵဝ်ႇၼၼ်ႉ ယႃႇပေယုင်ႈၸွမ်း ~ မၢင်ပွၵ်ႈမၢင်လႂ် ပိူၼ်ႈထဵင်ၵၼ် ၸဝ်ႈၵဝ်ႇပႆၽၢတ်ႈၵႂႃႇႁၼ် ဢမ်ႇၼၼ် ပဵၼ်ႁိမ်းၸဝ်ႈၵဝ်ႇၼၼ်ႉ  ယႃႇပေဢဝ်သႂ်ႇၸႂ်ၸွမ်း ။

2. ၽိုၵ်းႁၵ်ႉၼိူဝ်ၵူၼ်းၵူႈၵေႃႉၵူႈသႅၼ်း ~ ႁၵ်ႉတီႈၼႆႈၼႆႉ ဢမ်ႇလႆႈမၢႆထိုင်ႁႂ်ႈႁၵ်ႉမိူၼ်ၼင်ႇၵေႃႉႁၵ်ႉ တေလႆႈႁၵ်ႉမဵတ်ႉတႃႇ ဝႆႉပိူၼ်ႈမိူၼ်ၼင်ႇ ဢူၺ်းၵေႃႉ ပီႈၼွင်ႉၸဝ်ႈၵဝ်ႇ ၊ သင်ဝႃႈ ႁဝ်းဝႆႉၸႂ်ၸိုင်ႉၼၼ်လႆႈ တႃႇႁႂ်ႈတေၸင်းၵူၼ်းတၢင်ႇၵေႃႉၼၼ်ႉၵေႃႈ တေဢမ်ႇပဵၼ်မႃး ပေႃးဢမ်ႇမီးတၢင်းၸင်းၵေႃႈ ၸႂ်တေဢမ်ႇတုၵ်ႉ ။

တၢင်းႁၵ်ႉၼႆႉၵေႃႈ သင်ဝႃႈႁၵ်ႉႁႅင်းၼႆ ၸၢင်ႈပဵၼ်တၢင်းတုၵ်ႉယူႇလႄႈ ႁႂ်ႈမေႃႁၵ်ႉပၢၼ်ၵၢင်သေၵမ်း။

3. ႁႂ်ႈမေႃၸူမ်းၸွမ်းပိူၼ်ႈ – မၢင်ပွၵ်ႈ မႅၼ်ႈမိူဝ်ႈႁၼ်ၺႃး ၵူၼ်းတၢင်ႇၵေႃႉ လႆႈလီလႆႈပဵၼ်လိူဝ်ၸဝ်ႈၵဝ်ႇၼၼ်ႉ ၵႆႉပဵၼ်ၸႂ်သုၺ်ႈ သီႇၵေႉလႄႈ တေၸၢင်ႈႁဵတ်းႁႂ်ႈ ၸဝ်ႈၵဝ်ႇဢမ်ႇမီးတၢင်းသိူဝ်းႁင်းၵူၺ်းယဝ်ႉ သင်ဝႃႈႁဝ်း ဝႆႉၸႂ်ၸူမ်းၸွမ်းမၼ်းၸိုင် ၸဝ်ႈၵဝ်ႇၵေႃႈတေမီးတၢင်းသိူဝ်းၸႂ်ယူႇ။
4. ႁႂ်ႈမေႃႁၼ်လီၼိူဝ်ၵူၼ်းတၢင်ႇၵေႃႉ ~ သင်ဝႃႈ ပဵၼ်လႆႈ 3 ၶေႃႈတီႈၼိူဝ်ၼႆႉၵေႃႈ လွင်ႈမေႃႁၼ်လီၼိူဝ်ၵူၼ်းတၢင်ႇၵေႃႉၼၼ်ႉတေပဵၼ်မႃးၵူၺ်း ၊ မၢင်ပွၵ်ႈ ယွၼ်ႉၸႂ်ႁဝ်းထၢင်ႇႁင်းၵူၺ်းသေ ၵႆႉပဵၼ်မႃးလွင်ႈဢမ်ႇႁၼ်လီၼိူဝ်ပိူၼ်ႈယဝ်ႉ သင်ဝႃႈၸႂ်ႁဝ်း ထၢင်ႇၽိတ်း ထၢင်ႇပိူင်ႈၼိူဝ်ပိူၼ်ႈၵေႃႈ လွင်ႈႁဵတ်းသၢင်ႈႁဝ်း တေႃႇၶဝ်ၼၼ်ႉၵေႃႈၸၢင်ႈပိူင်ႈမႃးယဝ်ႉ ၊ လွင်ႈႁၼ်ၽိတ်းၼႆႉၵေႃႈ ပဵၼ်ငဝ်ႈႁၢၵ်ႈတၢင်းတုၵ်ႉၸႂ် ဢၼ်ၼိုင်ႈလႄႈ တေလႆႈဝႄႈမၼ်းယဝ်ႉ။

ၵွပ်ႈၼၼ် ပိူင်လူင်မၼ်းတႄႉ လူဝ်ႇယိပ်းၵမ်ၸႂ်ၸဝ်ႈၵဝ်ႇ ႁႂ်ႈလႆႈၼၼ်ႉယဝ်ႉ ပေႃးဝႃႈႁဵတ်းၼႆၸိုင် လွင်ႈတၢင်းသိူဝ်းၸႅတ်ႈၸၢင်ႇၼၼ်ႉၵေႃႈ တိုၼ်းတေၶဝ်ႈမႃးႁႃၸဝ်ႈၵဝ်ႇၵူၺ်း။

ၵူၼ်းၵေႃႉဢၼ်မီးတၢင်းသိူဝ်းၸႅတ်ႈၸၢင်ႇၼၼ်ႉ တေလႆႈႁၼ် ၼႃႈၶဝ်ၸိုၼ်ႈသႂ်လႄႈ ၵႆႉယုမ်ႉယဝ်ႉ ။

သင်ဝႃႈႁုပ်ႈၵႅပ်ႈၶိုၼ်းၸိုင် တၢင်းသိူဝ်းၸႅတ်ႈၸၢင်ႇၼႆႉ ပဵၼ်လွင်ႈႁၢင်ႈၶိူင်ႈၸႂ်ၸဝ်ႈၵဝ်ႇ ႁႂ်ႈႁၼ်ၶူင်းၵၢင်ၼႆႉ ႁၢင်ႈလီယူႇတႃႇသေႇၼၼ်ႉယဝ်ႉ။

ၶေႃႈလူပ်း ~ ယွၼ်းသူးႁႂ်ႈၽူႈလူဢၢၼ်ႇႁဝ်းၶဝ် မီးတၢင်းတၢင်းသိူဝ်းဢၼ်ၸႅတ်ႈၸၢင်ႇၵၼ် ၵူႈၵေႃႉသေၵမ်း

ၶွပ်ႈၸႂ်သေ~

ၼုမ်ႇၸိုၼ်ႈၾႃႉ ထုင်ႉမေႃႇငိုၼ်း

15 March 2025 21:30