ဝၼ်းၼိုင်ႈသင်ၶိုၼ်းလႆႈႁၼ် ၸွင်ႇတေႁူပ်ႉတေႃႇၼႃႈၶဝ်လႆႈႁိုဝ် ၶၢဝ်းယၢမ်းပူၼ်ႉမႃးႁိုင်ယဝ်ႉၵေႃႈ ၸွင်ႇႁဝ်းယင်းတိုၵ်ႉႁၵ်ႉၶဝ်လႆႈယူႇႁိုဝ်
မိူဝ်ႈဝၼ်းတၢင်းႁၵ်ႉပီၵႆၢ
ၼမ်ႉတႃၸိုမ်ႉယမ်းယွႆႉ ၼႂ်းၵႄႈလပ်းသိင်ႇ ၶမ်ႈၶိုၼ်းၸၢႆးပီႈမၢဝ်ႇၵေႃႉႁၵ်ႉဢွၼ်ႇၽူၺ်း လႆႈၸုပ်ႇၼူမ်သၢဝ်ယူႇႁိမ်းၶၢင်ႈတၢင်း မိူဝ်ႈၽူၺ်းလႆႈႁူပ်ႉႁၼ် ႁူၺ်ႇတႃလမ်ၸိုမ်းယွႆႉ ၼႅတ်ႈၵွင်လင်ပႆၢႈၽၢတ်ႇၵႂႃႇ ဢမ်ႇပၼ်ႁႂ်ႈၸႆၢးပီႈမၢဝ်ႇလႆႈႁပ်ႉႁၼ်ၼႃႈ ဝႆၢးၼၼ်ႉၵၢၼ်ၵပ်းသိုပ်ႇႁဝ်းယဵၼ်ႁႆၢ ဢမ်ႇသူင်ႇသင်ႇၵႂၢမ်းၶၢတ်ႇ သွင်ၵေႃႉၵေႃႈ လႆႈႁၢင်ႇယၢၼ်ၵၢၼ်ၵပ်းသိုပ်ႇၵၼ်ၵႂႃႇႁင်းၽႂ်မၼ်းယဝ်ႉ။
ဢမ်ႇလႆႈႁူပ်ႉ ဢမ်ႇလႆႈႁူႉႁၼ် ဢမ်ႇလႆႈတၵ်ႉၵၼ် ယိုင်ႈၶႅၼ်းႁဵတ်းႁႂ်ႈ ႁူဝ်ၸႂ်လိူတ်ႇမႆႈတိူဝ်းႁႅင်း ၶႂ်ႈလၢတ်ႈတေႃႇၵေႃႈဢမ်ႇၸၢင်ႈ ၶႂ်ႈႁူႉၶဝ်ပဵၼ်ၸိူင်ႉႁိုဝ်ၵေႃႈဢမ်ႇလႆႈ ၶၢၼ်ၸႂ်လိူဝ်မိူဝ်ႈလႆႈၸဵပ်းၵႅၼ်း၊ လႆႈတၢင်းဝူၼ်ႉၵူၺ်းသေ ၶီမွင်ၵႂႃႇပဵၼ်မိူဝ်ႈပဵၼ်ၵမ်းယဝ်ႉ။
ဢမ်ႇလႆႈဝူၼ်ႉထိုင် ဢမ်ႇလႆႈသူၼ်ၸႂ်ၼႆၼၼ်ႉ လႅၼ်တူဝ်ၵဝ်ႇတူဝ်ၵဝ်ႇသေ ဢဝ်ယၢမ်ႈၵႂႃႇပႅတ်ႈယဝ်ႉဢိူဝ်ႈ။
ဝၼ်းယဝ်ႉဝၼ်းလိူၼ်သိုပ်ႇလိူၼ် ၶတ်းၸႂ်ႁဵတ်းၵၢၼ်ယႃႇႁႂ်ႈတၢင်းဝူၼ်ႉၼၼ်ႉႁူမ်ႇငမ်းႁႂ်ႈၸႂ်ထိုင်ၶဝ်ယူႇၵေႃႈ သမ်ႉၵိုင်ႉၵၢင်ႉလႆႈမႃးႁူပ်ႉႁၼ် မိူဝ်ႈၽူၺ်းၵႂႃႇၸႆၢႇၵၢတ်ႇၼၼ်ႉဝႃႇ။
“မႃးသိုဝ်ႉၽၵ်းႁ..”
ၼႂ်းသႃႉၽူၺ်းယိပ်းၼၼ်ႉပဵၼ်ၽၵ်းဝႆႉလႄႈၵႃႈလႆႈဝႃႈ “ၸႂ်ႈယဝ်ႉဝႃႈ… ပီႈၵေႃႈမႃးသိုဝ်ႉၽၵ်းမိူၼ်ၵၼ်ႁ”
“ဢိုမ်ႈ.. မႃးၵေႃႉလဵဝ်ႁ”
“ၸႂ်ႈယဝ်ႉဝႃႈ” ၽူၺ်းၵူမ်ႈၼႃႈၵူမ်ႈတႃသေ “ႁဝ်းမိူဝ်းၵွၼ်ႇၼႃႈ” ၼႅတ်ႈပႆဢွၵ်ႇၵႂႃႇဝႆးဝႆးယဝ်ႉ
သမ်ႉဝႃႈပႆၽၢတ်ႇဢွၵ်ႇၵႂႃႇၵေႃႈ ၼႂ်းႁူဝ်ၸႂ်ၽူၺ်းၼၼ်ႉတႄႉ ၸဵပ်းၵႅၼ်းလူင်မႃးၵမ်းလဵဝ်၊ ဢမ်ႇႁတ်းႁူပ်ႉတေႃႇၼႃႈလႄႈ ဢမ်ႇယွမ်းႁပ်ႉမၼ်းလႆႈ ႁူႉတူဝ်လီယူႇၵေႃႈ သမ်ႉႁဵတ်းဢမ်ႇလႆႈလူး။
ယူႇယူႇသမ်ႉပေႉမႃးၵႆႉႁူပ်ႉၵႆႉၺႃးၵၼ် ၵႆႉႁၼ်ၵေႃႈဢမ်ႇၸၢင်ႈႁဵတ်းႁိုဝ်ဝႄႈ ၵႃႈလႆႈႁူပ်ႉၸူးလႄႈတူင်ႉတၵ်ႉၵႂႃႇ။ “ဢမ်ႇပဵၼ်သင်” ၼႆၼၼ်ႉ လႆႈႁဵတ်းၵႅင်ႈဝႆႉၵူၺ်းၼႆ ၸွင်ႇၶဝ်တေတူၺ်းႁၼ်မၼ်းယူႇႁိုဝ် လွမ်လွမ်ၵူဝ်မႃးယဝ်ႉ။
ဝၢၼ်ႇၽၼ်းၵေႃႈႁၼ်တူၼ်ႈ ၽုၵ်ႇတူၼ်ႈၵေႃႈဢွၵ်ႇမွၵ်ႇဢွၵ်ႇမၢၵ်ႇမႃး ၸူႉၵဝ်ႇသၢဝ်ၼွင်ႉၽူၺ်းၵေႃႈ လႆႈၵူပ်ႉၵူႈပဵၼ်ႁိူၼ်းၵႂႃႇပႅတ်ႈသေယဝ်ႉၼႃႇ။
ပၢၼ်ဢွၼ်ဢမ်ႇထိူၵ်ႈ ၵျိူၵ်ႈယူႇၵေႃႈ ဢမ်ႇၸႂ်ႈၵေႃႉႁူမ်ႈၶၢင်း ၼၢင်းႁၵ်ႉသုတ်းၸႂ်ၵေႃႈ တေႃႈလႆႈတၢင်းမႆႈမွင် မၼ်းပေႃးပဵၼ်ၶွင်ပိူၼ်ႈယဝ်ႉလူး ယွၼ်းသူးယူႇၵေႃႈ ဢမ်ႇၵိုင်ႇထိူၵ်ႈ ၸင်ႇလႆႈယၢၼ်ၽၢတ်ႇ ၼမ်ႉယၢတ်ႇပၢၼ်ဢွၼ်ႁဝ်းႁႂ်ႈမၼ်းသုတ်းသဵင်ႈၵႂႃႇၸၢတ်ႈၼႆႉသေလႄႈ….
“ႁၼ်သူၸူမ်းသိူဝ်းၵေႃႈ ႁဝ်းၵေႃႈသိူဝ်းၸွမ်းယဝ်ႉ ယိၼ်းၸူမ်းၶၢဝ်းယၢမ်းၸိူဝ်းပူၼ်ႉမႃး ၵူႈလွင်ႈလွင်ႈၼႃႈ”
ဝၼ်းတၢင်းႁၵ်ႉပီၼႆႉ ၽူၺ်းလႆႈယုမ်ႉၸူးၼင်ႇတဵမ်ၸႂ်သေ လၢတ်ႈဢွၵ်ႇမႃးတဵမ်သူပ်းတဵမ်ၵႂၢမ်း ၼင်ႇလူမ်ၸႂ် ယူႇယဝ်ႉ။
လႆႈႁူပ်ႉႁၼ်ၶဝ်ၶိုၼ်းၼၼ်ႉ ႁဵတ်းႁႂ်ႈလွင်ႈၵူဝ်ႁႆၢၵႂႃႇလႄႈ ယွမ်းႁပ်ႉမၼ်းလႆႈလွႆးလွႆးယဝ်ႉ။
ႁၵ်ႉၵၼ်လႆႈၵေႃႈ ယၢၼ်ၶၢတ်ႇၵၼ်လႆႈ
တၢင်းႁၵ်ႉသုတ်းသဵင်ႈ ဢမ်ႇလႆႈပဵၼ်တၢင်းၸင်းသေႇသေႇ
ပေႃးဢမ်ႇမီးၸႂ်ႁၵ်ႉ လီတၵ်ႉလၢတ်ႈမွၵ်ႇသိုဝ်ႈသိုဝ်ႈ
ႁၵ်ႉမႂ်ႇထႅင်ႈၵေႃႈ ၽႃႈဝၢင်းသေလႄႈၵေႃႉၵဝ်ႇ
လွင်ႈယဵၼ်ႉၶၢမ်ႇယူႇဢမ်ႇဝႆႉၵႃႈၶၼ်ၵၼ်ၼၼ်ႉ မၼ်းၸဵပ်းလိုၵ်ႉထိုင်ၸႂ်လိူဝ်ဢမ်ႇႁၵ်ႉၵၼ်ၵွၼ်ႇ
တႅမ်ႈ-သႅၼ်ငဝ်း
14/02/2025
