တွၼ်ႈသၢမ်သိပ်းၵဝ်ႈ
သုတ်ႉႁူၼ်ၶၢဝ်းယၢမ်းၵႂႃႇၶိုၼ်း ပီႊ 2022
ၼႂ်းၶမ်ႈၶိုၼ်းလပ်းသိင်ႇလူင်ၼၼ်ႉ ၶမ်းလၢဝ်တူၵ်းလူင်းၵႂႃႇၼႂ်းၼမ်ႉယဝ်ႉၵေႃႈ ၶတ်းၸႂ်လုၺ်းႁႂ်ႈပေႃးၵႂႃႇႁွတ်ႈၽင်ႇၽၢႆႇပုၼ်ႉၼမ်ႉၼႆယူႇ ၵူၺ်းၵႃႈ ႁႅင်းၶၢမ်ႇမၼ်းၼၼ်ႉ ဢမ်ႇပေႉႁႅင်းၼမ်ႉလႆႈလႄႈ လႆလွင်ႈလူင်းၵႂႃႇၸွမ်းၼမ်ႉတိၵ်းတိၵ်းယဝ်ႉ၊ သမ်ႉဝႃႈၶတ်းၸႂ်လုၺ်းဝၢႆႈၽၢႆႈၵႂႃႇယူႇၵေႃႈ မိူၼ်ဢမ်ႇတူင်ႉတူဝ်လႆႈသေဢိတ်း ၼင်ႇၵႃႈႁႅင်းမီးၶတ်းၸႂ်ၽိုတ်ႉတူဝ်ၽူးၼိူဝ်ၼမ်ႉဝႆႉ ဢမ်ႇပၼ်ႁႂ်ႈမၼ်းၸူမ်ၵႂႃႇၵူၺ်းယဝ်ႉ။ လိူၵ်ႈလိူၵ်ႈ သမ်ႉမီးတုမ်လႆလွင်ႈလူင်းၸွမ်းလႄႈ မၼ်းၵေႃႈ ႁၢဝ်ႉဢဝ်တုမ်ၼၼ်ႉသေ လွင်ႈလူင်းၵႂႃႇၸွမ်းတုမ်ၼၼ်ႉတိၵ်းတိၵ်းယဝ်ႉ။
ၵၢင်ဝၼ်းလႅတ်ႇဢွၵ်ႇ ၾႃႉပၢင်ႇမိူင်းလႅင်း ၵူၼ်းၸၢႆးၶၢဝ်ႉလူင်သွင်သၢမ်ၵေႃႉ ဢွၼ်ၵၼ်ပႃးတင်းၵၼ်းမဵတ်း မူၵ်ႇပႃၶဝ်သေ ၶီႇႁိူဝ်းၵေႃႉလမ်းလမ်းယဝ်ႉ ဢွၵ်ႇၵႂႃႇႁႃပႃၼႂ်းမႄႈၼမ်ႉလူင်ဢၼ်ၵႂၢင်ႈတၢၼ်ႇတၢၼ်ႇၼၼ်ႉယူႇ။
လိူၵ်ႈလိူၵ်ႈၼႂ်းၵုၼ်ၵၢင်ၼမ်ႉ တၢင်းဢၼ်ၶဝ်ၵႂႃႇၼၼ်ႉသမ်ႉ လႆႈႁၼ်မိူၼ်ပဵၼ်ၵူၼ်းဝႆႉလႄႈ ၸင်ႇလႆႈမႃးၵိုတ်းႁိူဝ်းၶဝ်သေဝႄႉတူၺ်းယဝ်ႉ တူၺ်းၵႆၵႆတႄႉမိူၼ်ၵူၼ်းတၢႆဝႆႉယဝ်ႉ လုင်းၵေႃႉၼိုင်ႈၸင်ႇဢဝ်ၼိဝ်ႉမိုဝ်းၵႂႃႇၸမ်ၸမ်ၶူႈၼင်ၼၼ်ႉ ယင်းတိုၵ်ႉထူၺ်ႈၸႂ်ယူႇလႄႈ။
“မၼ်းဢမ်ႇပႆႇတၢႆ!!..”
ၶဝ်ၵေႃႈၼႅတ်ႈဢွၼ်ၵၼ်ယွင်ႈမၼ်းသႂ်ႇႁိူဝ်းမိူဝ်းၵႂႃႇယဝ်ႉ။
ၶမ်းလၢဝ်ၼၼ်ႉၵေႃႈ မိူဝ်ႈႁူႉတူဝ်သေမိုၼ်းတႃမႃး တီႈဢၼ်လပ်းသိင်ႇၽိုတ်းၽိုတ်း သဵင်ဢၼ်ယၢမ်ႈငိၼ်းယူႇၼႂ်းႁူၼၼ်ႉၵေႃႈ မေႃးမႃးဝႃႈ
“ႁူႉတူဝ်ယဝ်ႉႁႃႉ..”
မၼ်းၽုၺ်ႇႁူၺ်ႇတႃမိုၼ်းၵႂၢင်ႈ ႁႅၼ်ငွၵ်ႈၶေႃးမႃးဢိတ်ႉၼိုင်ႈယၵ်ႉတူၺ်းယဝ်ႉ ႁၼ်ၵူၼ်းဢၼ်ယၢမ်ႈႁူႉၸၵ်း လၢတ်ႈယူႇၼႂ်းၸႂ်ႁင်းမၼ်း “ပီႈမေႃ..” မႄးဝၢင်းႁူဝ်မၼ်းၵႂႃႇယဝ်ႉ “ႁဝ်းလႆႈတၢႆၵႂႃႇယဝ်ႉ တၢႆၵႂႃႇယဝ်ႉ လႆႈမႃးၺႃးၵၼ်ၸိူင်ႉၼႆၵေႃႈ ပေႉၸႂ်ယူႇ” မႄးလပ်းတႃမၼ်းၵႂႃႇၶိုၼ်းယဝ်ႉ။
“ၶမ်းလၢဝ်!! ၶမ်းလၢဝ်! ”
သဵင်ၼၼ်ႉလင်ၸႅင်ႈၼႂ်းႁူလီၼႃႇ တီႈႁူဝ်မႃႇသွင်ၽၢႆႇၼၼ်ႉၵေႃႈ မီးမိုဝ်းၶႅင်ၶႅင်မႃးၶဝ်ႇၶွၼ်းတူဝ်မၼ်း ႁွင်ႉႁႂ်ႈတိုၼ်ႇယူႇၼၼ်ႉယဝ်ႉ။ မိူဝ်ႈႁူႉၼိူဝ်ႉမႃးၸိူင်ႉၼၼ် ၸင်ႇၶိုၼ်းမိုၼ်းတႃတူၺ်းထႅင်ႈ လႆႈႁူႉဝႃႈၵူၼ်းႁိမ်းၶၢင်ႈၼၼ်ႉ ပဵၼ်မေႃယႃဢွၼ်တိုၼ်းၵမ်းလဵဝ် လႄႈ
“ပီႈမေႃ!! ၸႂ်ႈပီႈမေႃယူႇတေႉႁႃႉ”
“ဢိုမ်ႈ..ၸႂ်ႈယဝ်ႉ ပဵၼ်ႁဝ်းၵူၺ်း”
ၶမ်းလၢဝ်ၼၼ်ႉၵေႃႈ ဢမ်ႇသူၼ်သင်ယဝ်ႉ တူဝ်ဢွၼ်ႇမၼ်းလႄႈသွင်ၶႅၼ်ဢွၼ်ႇမၼ်းၼၼ်ႉ သွတ်ႇၵွင်ႉၶဝ်ႈၼႂ်းဢွင်ႈဢူၵ်းမေႃယႃဢွၼ်တိုၼ်းၵႂႃႇယဝ်ႉ။
ဢွၼ်တၢင်းၾႆးတေမႆႈဝၢၼ်ႈၸိင်ဝၼ်းၼၼ်ႉ မီးသိုၵ်းမႃးတီႈႁူင်းယႃလႄႈ မႃးၺွပ်းမေႃယႃဢွၼ်တိုၼ်းၵႂႃႇ ႁႂ်ႈၵႂႃႇၸွႆႈယူတ်းယႃပၼ်ၵူၼ်းသိုၵ်းၶဝ်ၼႆယဝ်ႉ။ မၼ်းၵေႃႈလႆႈၵႂႃႇယူႇၸွမ်းၵူၼ်းသိုၵ်းၸိူဝ်းၼၼ်ႉသေ ယူတ်းယႃပၼ်ၵူၼ်းၶဝ် ဢၼ်မၢတ်ႇၸဵပ်းၼႂ်းပၢင်တိုၵ်းၸိူဝ်းၺႃးမၢၵ်ႇၵွင်ႈ ၸိူဝ်းၺႃးမၢၵ်ႇယဵပ်ႇၸိူဝ်းၼၼ်ႉ၊ မိူဝ်ႈဝႃႈပဵၼ်မေႃယႃၼႆ ပေႃးႁၼ်ၵူၼ်းပဵၼ်မၢတ်ႇၸဵပ်းမႃး ဢမ်ႇဝႃႈတေပဵၼ်ၽူႈၶဵၼ်ႁိုဝ်ၵူၼ်းဢမ်ႇလီ မၼ်းၵေႃႈ ဢမ်ႇယဵၼ်ႉလႆႈတူၺ်းလၢႆလႄႈ သၢႆၸႂ်ၵူၼ်းၵူႈၵေႃႉၼၼ်ႉ မီးၵႃႈၶၼ်မိူၼ်ၵၼ်ယဝ်ႉ၊ မၼ်းၸွႆႈထႅမ်ၶဝ်ၵႂႃႇ တေႃႇပေႃးဝႃႈ တပ်ႉဢၼ်မၼ်းယူႇၼၼ်ႉ လႆႈတႅၵ်ႇလႅဝ်သေ မၼ်းၵေႃႈလႆႈပၢႆႈမႃးၵေႃႉလဵဝ်ႁင်းမၼ်းၼႂ်းထိူၼ်ႇ ၵႂင်တၢင်းၽွင်ႈ ပၢႆႈသိုၵ်းၽွင်ႈ ၸင်ႇလႆႈမႃးပွင်ႇထိုင် ဝၢၼ်ႈႁူၺ်ႈႁူၵ်းၼႆႉယူႇယဝ်ႉ။
ဝၢၼ်ႈႁူၺ်ႈႁူၵ်းၼႆႉ ပဵၼ်ဝၢၼ်ႈၼွၵ်ႈၸွၵ်ႉထိူၼ်ႇဢၼ်ၵႆၵူၼ်းၼႃႇၼႃႇ တႃႇႁွတ်ႈထိုင်ၵေႃႈ ပဵၼ်ပႃႇထိူၼ်ႇႁူၺ်ႈယႂ်ႇလွႆလူင် သဵၼ်ႈတၢင်းၵေႃႈၵႅပ်ႈ မၢၵ်ႇႁိၼ်မၢၵ်ႇၽႃလွႆသုင်ၸၼ်း တၢၼ်ႇတၢၼ်ႇၽႂ်ၵေႃႈဢမ်ႇၶႂ်ႈၵႂႃႇ ၼင်ႇဝႃႈၶဝ်ၼၼ်ႉၵေႃႈယူႇၵႂႃႇႁင်းၶဝ်ၵူၺ်း ပေႃးဢမ်ႇလူဝ်ႇၼႃႇၼႃႇဝဵင်းဢၼ်ဝႃႈၼၼ်ႉတင်းဢမ်ႇထိုင်ၵွၼ်ႇယဝ်ႉ။ တႃႇမိူဝ်းဝဵင်းၼႆၼၼ်ႉၵေႃႈ ၵႆဝႃႈၵႆထႅင်ႈ တၢင်းႁူၺ်ႈတၢင်းလွႆ ၵႃးၵေႃႈဢမ်ႇပွင်ႇ တၢင်းလူတ်ႉတေႃႉတႄႉၵႂႃႇလႆႈ လေႃႉဝူဝ်းၵေႃႈပေႃးၵႂႃႇယူႇဢိတ်းဢိတ်း။
ၶဝ်ၵေႃႈယူႇသၢင်ႈၵိၼ်သဝ်းၸွမ်းသၽႃႇဝၵမ်ႈၼမ်ယဝ်ႉ ႁဵတ်းႁႆႈႁဵတ်းသူၼ် ၽုၵ်ႇမၢၵ်ႇၶဝ်ႈတဝ်ႈၼမ်ႉၵိၼ်ႁင်းၵူၺ်း၊ လဵင်ႉသတ်းႁင်းၵူၺ်း၊ ႁႃၵိၼ်ၸွမ်းထိူၼ်ႇၸွမ်းၶိူဝ်း ၸွမ်းၼမ်ႉၸွမ်းၼွင် ဢမ်ႇလႆႈၶီၸႂ်မႆႈၸႂ်ၸွမ်း လွင်ႈယူႇလွင်ႈသဝ်း သမ်ႉဝႃႈဝၢၼ်ႈၼွၵ်ႈၸွၵ်ႉထိူၼ်ႇၵေႃႈ ယူႇသၢင်ႈသဝ်းၵတ်းယဵၼ်လီတေႉတေႉယဝ်ႉ။
တေဝႃႈမေႃယႃပဵၼ်ၵူၼ်းၼိူဝ်ႉႁွမ်ႁိုဝ် ၵႂႃႇတီႈလႂ်ၵေႃႈၵူၼ်းႁၵ်ႉၵူၼ်းၵျိူၵ်ႈ ၽႂ်ၽႂ်ၵေႃႈဢမ်ႇၶႂ်ႈပၼ်ၽၢတ်ႇပၼ်မိူဝ်း ႁႂ်ႈယူႇသၢင်ႈသဝ်းၵႂႃႇၸွမ်းၶဝ်၊ ၸိူဝ်းမီးလုၵ်ႈယိင်းၼၢင်းသၢဝ်ၵေႃႈ ႁိမ်ၵၼ်တွၼ်ႈပၼ်ယဝ်ႉ။ ၵူၺ်းၵႃႈ လုၵ်ႈဢွၼ်ႇယိင်းၶဝ် ၵေႃႉယႂ်ႇယင်းပႆႇပူၼ်ႉသိပ်းႁူၵ်း ၶဝ်ပေႃးဢွၼ်ၵၼ်ပၼ်တေႇၼႃႈႁိူၼ်းၵႂႃႇယဝ်ႉယိုင်။
မေႃယႃတႄႉၵေႃႈ သမ်ႉဝႃႈၼမ်ႉၸႂ်ၶဝ်လီၼႃႇသေတႃႉလွင်ႈၸိူဝ်းၼႆႉတႄႉ ၵႃႈလႆႈထဵင်ၶိုၼ်းၵႂႃႇသိုဝ်ႈသိုဝ်ႈၵူၺ်းယဝ်ႉ။
မိူဝ်ႈယူႇၼႂ်းထိူၼ်ႇၸိူင်ႉၼႆၵေႃႈ တႃႇပၢႆးပိၺ်ႇၺႃႇတေၶဝ်ႈထိုင်လႆႈၼၼ်ႉ မၼ်းၵေႃႈယၢပ်ႇမိူၼ်ၵၼ်ယဝ်ႉ။ လုၵ်ႈဢွၼ်ႇလဵၵ်ႉပၢၼ်ႁဵၼ်း ၵူၺ်းသမ်ႉဢမ်ႇႁူႉလိၵ်ႈႁူႉလၢႆး၊ ၵူၺ်းၵုမ်ႇ လဵၼ်ႈၵူမ်ႇလဵၼ်ႈလိၼ် ၼုၵ်းထူၵူဝ်ႈဢိူၵ်ႇၸွမ်းၽုင်ဝူဝ်းၽုင်ၵႂၢႆး ၸွမ်းဝၼ်းလႂ်ဝၼ်းၼၼ်ႉ တေႃႇပေႃးယႂ်ႇမႃႈၵႃႈႁႅင်း ပေႉတူဝ်ပေႉၶိင်းမႃးယဝ်ႉၵေႃႈ တေႇၼႃႈႁေႃတေႃႁိူၼ်းႁေ မီးလုၵ်ႈမီးလၢင်း၊ ပဵၼ်ၼၼ်မႃးၸဵမ်ပၢၼ်ပေႃႈမႄႈယဝ်ႉပၢၼ်လုၵ်ႈပၢၼ်လၢင်း ပၼ်ႇတူင်ႇယူႇၵႂႃႇၸိူင်ႉၼၼ် ၽဝၶဝ်ၼၼ်ႉ တူၵ်းယူႇၼႂ်းတၢင်းတၼ် ဢၼ်ႁၼ်ဝၼ်းၶိုၼ်းမိူၼ်ၵၼ်ယူႇတႃႇသေႇၼၼ်ႉယဝ်ႉ။
ၶမ်းလၢဝ်ၵေႃႈ ယူႇလဵပ်ႈႁဵၼ်းၸၢတ်ႈပၢၼ်ၵူၼ်းဝၢၼ်ႈၶဝ်သေ ၼင်ႈယူႇႁိမ်းၸမ်မေႃယႃယဝ်ႉ “ယူႇမိူၼ်ၸိူင်ႉၼင်ႇၶဝ်ၼႆႉၵေႃႈ တင်းလီပျေႃႇယူႇၼေႃ ဢမ်ႇလူဝ်ႇႁူႉႁင် ဢမ်ႇလႆႈဝူၼ်ႉႁင်”
“ႁဝ်းမႃးၸႂ်ႉၸၢတ်ႈပၢၼ်ၸိူင်ႉၼႆၸွမ်းၵၼ်ဢမ်ႇလီႁႃႉ”
ၶမ်းလၢဝ်ၵေႃႈ ယၵ်ႉတူၺ်းမေႃယႃသေယဝ်ႉ “ဢိုမ်ႈ..ႁဝ်းၵေႃႈဝႃႈၼၼ်”
ၶမ်းလၢဝ်တႄႉ ဢၢၼ်းဝႃႈတေႁဵတ်းႁူင်းႁဵၼ်းသေလင်ၼိုင်ႈၼႆယူႇ ၵူၺ်းၵႃႈ ၵူၼ်းဝၢၼ်ႈၶဝ်သမ်ႉ ဢမ်ႇပေႃးပၼ်ႁႅင်းၵႃႈႁိုဝ် ၵွပ်ႈလူဝ်ႇႁႃၵိၼ်လဵင်ႉတွင်ႉၵၼ်လႄႈ ဢမ်ႇသူႈတၼ်း၊ လုၵ်ႈဢွၼ်ႇၵေႃႈ ႁႂ်ႈမီးၵၢင်ၸႂ်ၶႂ်ႈမေႃလိၵ်ႈႁဵၼ်းလၢႆးဢၼ်ဝႃႈၼၼ်ႉၵေႃႈဢမ်ႇႁၼ်ၺႃး ယွၼ်ႉပိူဝ်ႈ ဢမ်ႇမီးၽႂ်ႁဵတ်းၼႄဝႃႈ ၵႃႈၶၼ်လိၵ်ႈလၢႆးၼၼ်ႉ မၼ်းႁဵတ်းလႆႈတင်းၼမ်ၼႆ။
သမ်ႉဝႃႈဢမ်ႇမီးႁူင်းႁဵၼ်းသေတႃႉ ၼင်ႇႁိုဝ်လုၵ်ႈဢွၼ်ႇပေႃးတေၶႂ်ႈႁဵၼ်းၼၼ်ႉ မၼ်းၵေႃႈၵႂႃႇလဵၼ်ႈၵေႃႉၶဝ်ႁေ တႅမ်ႈလိၵ်ႈၸွမ်းၸိူဝ်းၵၢင်ပၢင်ႇၼၼ်ႉၼႄၶဝ်ၵႂႃႇ သွၼ်ၶိတ်ႇၶုတ်ႇၸွမ်းလိၼ်ပေႃးပဵၼ်ႁွႆးပဵၼ်ယွင်းသေယဝ်ႉ တႅမ်ႈၼႄႁႂ်ႈၶဝ်ႁဵတ်းၸွမ်း ၵ ၶ င ၵႂႃႇ ဝၼ်းမၼ်းႁိုင် လုၵ်ႈဢွၼ်ႇၵေႃႈသမ်ႉပေႃးတွင်း ႁွင်ႉသႅၼ်ႇပၼ်းၸွမ်းတၢင်းပဵၼ်သဵင်ၶဝ်ယူႇသဵင်ႈ ၸွမ်းလိၼ်ၵေႃႈပေႃးပဵၼ်တူဝ်လိၵ်ႈလၢႆးယူႇသဵင်ယဝ်ႉလူး။
ပေႃးၵၢင်ၶမ်ႈမႃးၼႆ မၼ်းတေၵႆႉၵႆႉမိူဝ်းလႄႇႁိူၼ်းပိူၼ်ႈသေယဝ်ႉ မိူဝ်းၶႆႈၼႄဢပုမ်ႇ၊ ၶႆႈပိုၼ်းၸိူဝ်းၼႆႉၼႄပိူၼ်ႈ ၸဵမ်လုၵ်ႈဢွၼ်ႇၵူၼ်းလူင်ၵေႃႈ ႁၢင်ႈသူၼ်ၸႂ်သူၼ်ၶေႃးသေ ငွၵ်ႈၶေႃးထွမ်ႇၵၼ်ယူႇ ဢဝ်သမ်ႉပေႃးၸမ်ၸႂ်ၵၼ်မႃး၊ ဢုပ်ႇၵၼ်ၵေႃႈငၢႆႈ လၢတ်ႈသင်ၵေႃႈယုမ်ႇ မီးသင်ၵေႃႈၶႂ်ႈပၼ်ၶႂ်ႈတွၼ်ႈၵၼ်သေ ယူႇႁိုင်ႁိုင် မၼ်းၵေႃႈလႆႈႁဵတ်းႁူင်းႁဵၼ်း ဢၼ်မိူၼ်သႃလႃး လုၵ်ႈဢွၼ်ႇမႃးႁဵၼ်းလိၵ်ႈၵၢင်ဝၼ်း ၵူၼ်းလူင်မႃးၶွၼ်ႈတုမ်ၵၼ် ၵၢင်ၶမ်ႈ ဝႆႉပဵၼ်ဢွင်ႈတီႈလႅၵ်ႈလၢႆႈတၢင်းႁူႉၵၼ် သွၼ်ပၼ်တူဝ်လိၵ်ႈဝၼ်းဢိတ်းဝၼ်းဢွတ်းပၼ်ၵႂႃႇ။
မေႃယႃလႄႈၶမ်းလၢဝ်ၵေႃႈ တႄႇၼႃႈႁိူၼ်းႁူမ်ႈၵၼ်သေ တႃႇၼႃႈႁိူၼ်းပေႃးတေယူႇလွတ်ႈလႆႈ သွင်ၵေႃႉၽူဝ်မေးၼၼ်ႉၵေႃႈ ႁဵတ်းႁႆႈႁဵတ်းသူၼ်ၵႂႃႇမိူၼ်ပိူၼ်ႈယဝ်ႉ၊ မေႃယႃၵေႃႈ ၵမ်ႉထႅမ်ၶမ်းလၢဝ် ႁႂ်ႈႁဵတ်းမေႃသွၼ်ၵႂႃႇလႄႈ မၼ်းၼၼ်ႉတႄႉ ၵေႃႉတေပဵၼ်ၵူၼ်းႁဵတ်းၵၢၼ်ၵူၺ်းၼႆယဝ်ႉ၊ သမ်ႉဝႃႈ တေပဵၼ်မေႃယႃ ဢမ်ႇယၢမ်ႈလႆႈႁဵတ်းၵၢၼ်ႁႆႈၵၢၼ်သူၼ် ၸိူင်ႉပိူၼ်ႈမႃးသေပွၵ်ႈၵေႃႈ တွၼ်ႈတႃႇၼႃႈႁိူၼ်းၼႆၼၼ်ႉ ဢမ်ႇမေႃၵေႃႈၵႃႈတေလႆႈႁဵတ်းယဝ်ႉ၊ ႁဵတ်းၵႂႃႇတိၵ်းတိၵ်းၵေႃႈ ပဵၼ်မႃးၵူၺ်းမၼ်းယူႇ။
မေႃယႃလႄႈၶမ်းလၢဝ် ယူႇၼႂ်းဝၢၼ်ႈဢွၼ်ႇၼၼ်ႉသေ ပွင်သၢင်ႈၼႃႈႁိူၼ်းဢွၼ်ႇသွင်ၶႃ ထိုင်မိူဝ်ႈလဵဝ် 2024 ယဝ်ႉၼႆၵေႃႈ သမ်ႉပေႃးမီးလုၵ်ႈယိင်းၼုမ်ႇတုတ်းၼုတ်း မေႃပႆသိုင်ႉသၢင်ႉသိုင်ႉသၢင်ႉ မွၵ်ႈၶူပ်ႇပၢႆယဝ်ႉလူး။
ၶမ်းလၢဝ်ၵေႃႈ ဢဝ်လုၵ်ႈၼွၼ်းဝႆႉၼႂ်းဢူႇသေယဝ်ႉ မႃးၵွၼ်ႉၶဝ်ႈၵွၼ်ႉၽၵ်း သႂ်ႇဝၢၼ်ႇတမ်းၼိူဝ်ၽိူၼ်ၶဝ်ႈၼၼ်ႉသေ
“ႁဝ်းမႃးယူႇတီႈၼႆႈႁိုင်ၵႃႈႁိုဝ်ယဝ်ႉ ဢမ်ႇတၼ်းသူၼ်ၸႂ်သင် ဢမ်ႇတၼ်းဝူၼ်ႉသင် လုၵ်ႈႁႃးပေႃးမေႃပႆယဝ်ႉၼေႃ”
မေႃယႃၵေႃႈ ယၵ်ႉတူၺ်းၼႃႈၶမ်းလၢဝ်သေယဝ်ႉ “ၼၼ်ႉယဝ်ႉ..လႆႈႁၼ်ၼႃႈသူ လႆႈယူႇၸွမ်းသူလႄႈလုၵ်ႈ ၵူႈဝၼ်းၵူႈဝၼ်းၸိူင်ႉၼႆၵူၺ်းၵေႃႈ ပေႃးယဝ်ႉၼႃ ဢမ်ႇလူဝ်ႇဝူၼ်ႉယဝ်ႉ”
“သူႁဵတ်းၵၢၼ်လဵင်ႉႁဝ်းမႄႈလုၵ်ႈ တေႁိူဝ်ႉတေႉယဝ်ႉ”
“ႁိူဝ်ႉမိူဝ်ႈၼႆႉၵေႃႈ မိူဝ်ႈၽုၵ်ႈႁၢႆယဝ်ႉၼႃ သမ်ႉဝႃႈၵူၼ်းႁိူၼ်းႁဝ်း တေလိူဝ်မႃးထႅင်ႈသေၵေႃႉၼိုင်ႈၵေႃႈ ႁဝ်းဝႃႈႁဝ်းႁဵတ်းပေႉယူႇၼႃႈ”
“ႁဝ်းဝႃႈတႄႉ လႅပ်ႈတေမီးယဝ်ႉ”
“သူၵေႃႈတေႁိူဝ်ႉမႃးထႅင်ႈယဝ်ႉ ယၢပ်ႇၸႂ်သူယဝ်ႉၼႃႈႁၵ်ႉ”
“ပေႃးၵူၼ်းႁိူၼ်းႁဝ်းၼမ်မႃး ယွင်ၶဝ်ႈႁဝ်းၵေႃႈၼမ်မႃး ပေႃးလုၵ်ႈၵေႃႉယႂ်ႇမႃးၵေႃႈ တေၵိၼ်ၼမ်မႃး ၵၢၼ်သူၵေႃႈတေၼမ်မႃးထႅင်ႈဢေႃႈပီႈဢိူၺ်”
“ၼွင်ႉႁၵ်ႉဢူၺ် မိူဝ်ႈၶၢဝ်းယၢမ်းမၼ်းပႆႇထိုင် ယႃႇၶိုင်ဝူၼ်ႉဢၼ်ယၢပ်ႇၸႂ်ယူႇယဝ်ႉၼႃႈ မိူဝ်ႈလဵဝ်မၼ်းဢမ်ႇပႆႇပဵၼ်မႃး ဝူၼ်ႉၼမ်ၵေႃႈတေၶမ်ၸႂ်ၵူၺ်းၼႃ ပိူၼ်ႈလဵင်ႉလႆႈ ႁဝ်းၵေႃႈလဵင်ႉလႆႈယူႇၵူၺ်းၼႃႈ လုမ်းလႃးတူဝ်သူလႄႈလုၵ်ႈႁဝ်းၵူၺ်းၵေႃႈလႆႈယဝ်ႉ ၵၢၼ်ၼႃႈဝၢၼ်ႈတႃႁိူၼ်း ဝႆႉႁႂ်ႈပီႈၵေႃႉႁဵတ်းလႄႈ မၼ်းဢမ်ႇမီးသင်ဢၼ်ယၢပ်ႇလိူဝ်သေ ပၢႆႈတၢႆယဝ်ႉ တေႃႈၼင်ႇၼၼ် ႁဝ်းၵေႃႈ ၶၢမ်ႈပူၼ်ႉမၼ်းမႃးလႆႈယူႇလူး”
“ၼၼ်ႉယဝ်ႉၼေႃ”
ၵိၼ်ၶဝ်ႈႁူမ်ႈၵၼ်ၵႂႃႇ ၽၵ်းၵၢတ်ႇၵႅင် ၼမ်ႉၽိတ်ႉၶိင်ဢွၼ်ႇၵူၺ်းၵေႃႈ ၸိုင်ပေႉမႃးဝၢၼ်ဝႃႈဝၢၼ် ၶဝ်ႈသမ်ႉပေႃးမူတ်းသဵင်ႈပဵၼ်မေႃႈယဝ်ႉ။
ဝၢၼ်ႈဢွၼ်ႇၵူၼ်းဢမ်ႇၵိုၼ်း ဢမ်ႇၶိုၼ်ႈယႂ်ႇၵေႃႈ ၵူၼ်းမူၼ်ႈယူႇ။
သုတ်းယဝ်ႉ။
ၸိူင်းႁူဝ်ၼႆႉ ဢွင်ႈတီႈ ပိူင်ပဵၼ် ငဝ်းလၢႆး ဢမ်ႇၸႂ်ႈဢၼ်တေႉ ပဵၼ်ဢၼ်ဝူၼ်ႉသၢင်ႈမႃးဢဝ်ၵူၺ်း။
ယူႇတီႈၽူႈတႅမ်ႈလိၵ်ႈၵေႃႈ တူဝ်ထူပ်းယင်းတိုၵ်ႉၵေႇဢေႇမၢင်ယူႇလႄႈ ႁူႉတေမီးတီႈယူပ်ႈယွမ်းတင်းၼမ်ၶႃႈယဝ်ႉ။ ဢမ်ႇလိူဝ်လႆႈတၢင်းသူင်ဝႃႇသၼႃႇ ဢၼ်ႁၵ်ႉသူင်မိုတ်ႈၵၢၼ်တႅမ်ႈၸိူင်းၼႃႇၼၼ်ႉသေ လႆႈတႅမ်ႈဢွၵ်ႇမႃးၵူၺ်းၶႃႈ။ သင်မီးတီႈၽိတ်းတီႈပိူင်ႈ တီႈႁိူင်ႈတီႈၵိူင်း တီႈယူပ်ႈတီႈယွမ်းၵေႃႈ ယွမ်းၼမ်းယႂ်ႇၼမ်ယူႇဢေႃႈ။
ၶွပ်ႈၸႂ်ယႂ်ႇၼမ်ထိုင် ၽူႈလူလိၵ်ႈလၢႆးႁဝ်းၶဝ် ဢၼ်မႃးလူဢၢၼ်ႇပၼ် တေႃႇပေႃးသုတ်းယူႇၶႃႈဢေႃႈ
ပၢႆၵမ်−သႅၼ်ငဝ်း
31/07/2023 −15/11/2024
