တွၼ်ႈသၢမ်သိပ်းႁူၵ်း
ၽွင်းၶၢဝ်းၵတ်း ယၢမ်းၵၢင်ၼႂ်လႃႈ ၵၢင်ဝၼ်းၶိုၼ်ႈသုင် လႅတ်ႇမႆႈတၢၼ်ႇတၢၼ်ႇ သဵင်ဢၢၼ်ႇလိၵ်ႈလုၵ်ႈႁဵၼ်းၶဝ် ပဵၼ်သိူင်းပဵၼ်သိူင်းၼၼ်ႉ ၸင်ႇသမ်ႉမီးသဵင်မၢၵ်ႇတႅၵ်ႇလင်မေႃးပၼ်းယွၼ်ႈတွင်ႈထိုင်ႁူင်းႁဵၼ်း ပလိူင်ႈ! လိူင်ႈလိူင်ႈ ၵိုင်ႈၵိုင်ႈ သဵင်လင်ၸီးတွင်ႈမေႃးမႃးၼႂ်းႁူ ပေႃးဢမ်ႇလႆႈငိၼ်းသဵင်သင်ၵႂႃႇၵမ်းၼိုင်ႈ ၼင်လိၼ်မိူင်းပေႃးသၼ်ႇ ႁူင်းႁဵၼ်းပေႃးၶဝ်ႇၶွၼ်းလူင်ၵႂႃႇသဵင်ႈ လုၵ်ႈဢွၼ်ႇၶဝ်ၵေႃႈတူၵ်းၸႂ် သမ်ႉပေႃးတိုၼ်ႇၽူင်ႉတႅၵ်ႇယၢႆႈ ဢမ်ႇထၢင်ႇဝႃႈ တီႈၼႂ်းဝၢင်းႁူင်းႁဵၼ်းၶဝ်ၼၼ်ႉ တေမီးလုၵ်းလူင်ယႂ်ႇယႂ်ႇဝႆႉယူႇလႄႈ သူၼ်ၶဝ်သုမ်ႉသႃလႃး တီႈလဵၼ်ႈတၢင်းလဵၼ်ႈၶဝ် လူႉလႅဝ်ၽင်ႉယွၵ်းလူင်ၵႂႃႇသဵင်ႈယဝ်ႉ။ ၶမ်းလၢဝ်ၵေႃႈၵႂင်ၵႂင်ၵႃးၵႃးမူတ်းယဝ်ႉ ဢမ်ႇႁူႉဝႃႈတေလႆႈႁဵတ်းႁိုဝ်လီ တေယူႇတီႈၼႂ်းႁူင်းႁဵၼ်းႁႃႉ တေႁႂ်ႈလုၵ်ႈဢွၼ်ႇၶဝ်ပွၵ်ႈမိူဝ်းႁႃႉ၊ မၢၵ်ႇလူင်လုၵ်ႈၼၼ်ႉသမ်ႉ လုၵ်ႉတၢင်းလႂ်မႃး တင်းၵူဝ်တင်းမႆႈၸႂ်လုၵ်ႈႁဵၼ်းမၼ်းလေႃးၵၼ် ပဵၼ်သုၵ်ႉပဵၼ်သၵ်ႉမူတ်းယဝ်ႉ။
မိူဝ်ႈပိူၼ်ႈငိၼ်းသဵင်မၢၵ်ႇတႅၵ်ႇၼၼ်ႉၵေႃႈ ၵူၼ်းဝၢၼ်ႈၶဝ်ၵမ်ႈၽွင်ႈ ဢွၼ်ၵၼ်မႆႈၸႂ်သေမႃးတူၺ်းမႃးၸွႆႈၵၼ်သေ ႁႂ်ႈလုၵ်ႈႁဵၼ်းၶဝ်ပွၵ်ႈမိူဝ်းၶိုၼ်း ၵူၼ်းလူင်ၶဝ်ၵမ်ႈၽွင်ႈၵေႃႈမိူဝ်းသူင်ႇယဝ်ႉ၊ ဝၢႆးသေဝၼ်းၼၼ်ႉ ငဝ်းလၢႆးၼႂ်းဝၢၼ်ႈၶဝ်ၵေႃႈဢမ်ႇလီလႄႈ လႆႈဢိုတ်းႁူင်းႁဵၼ်းဝႆႉၸူဝ်ႈၶၢဝ်းယူႇယဝ်ႉ။
ဢမ်ႇႁူႉဝႃႈၸုမ်းသိုၵ်းလႂ်လၢႆလၢႆ လတ်းၽၢၼ်ႇၽႅတ်ႈဝၢၼ်ႈၶဝ်မႃး ၸွမ်းထိူၼ်ႇၵေႃႈ ပေႃးပဵၼ်သိုၵ်းယူႇသဵင်ႈ တေၵႂႃႇတၢင်းလႂ်ၵေႃႈ ပဵၼ်ဢၼ်လီမႆႈၸႂ်ယူႇတႃႇသေႇယဝ်ႉ၊ ၵူႈပွၵ်ႈ ယၢမ်ႈမီးယူႇသိုၵ်း ၵူၺ်းၵႃႈ ၵႂႃႇၵႂႃႇမႃးမႃးႁိုင်ႁိုင်ၼိုင်ႈပွၵ်ႈၵူၺ်း မိူဝ်ႈလဵဝ်တႄႉ တူင်ႉတူင်ႉၼိုင်ၼိုင်ယူႇတႃႇသေႇလႄႈ ၵႆႉၵႆႉလႆႈငိၼ်းသဵင်မၢၵ်ႇတႅၵ်ႇ ၸွမ်းႁူၺ်ႈၸွမ်းလွႆ ၵွင်ႈလင်လူင်မေႃးထိုင်ၼႂ်းဝၢၼ်ႈယူႇယဝ်ႉ။
ယၢမ်းၵၢင်ၶိုၼ်းၶၢဝ်းၼွၼ်းယဵၼ် ၵူၺ်းၵႃႈဢမ်ႇမီးသဵင်ယဵၼ် မီးသဵင်သႅၼ်ႇႁွင်ႉလင်ၵွင်ႈပေႃးတဵမ်ဝၢၼ်ႈ “ပၢႆႈလႄႈ! ပၢႆႈလႄႈ..” ၾႆးႁုပ်ႇမႆႈလင်ႁိူၼ်းၵူၼ်းပေႃးလုၵ်ႉပဵၼ်ၾႆး သဵင်ၵွင်ႈလၼ်ႇၼၼ်ႈပၼ်းဢူၼ် ဢမ်ႇႁူႉတေလႆႈပၢႆႈၵႂႃႇတၢင်းလႂ်ယဝ်ႉ။ ၸဵမ်လုၵ်ႈဢွၼ်ႇၵူၼ်းလူင် တီႈဝၢၼ်ႈၸိင် ဢွၼ်ၵၼ်လႅၼ်ႈလူင်မႃးတၢင်းဝၢၼ်ႈဢုင်ယဝ်ႉ၊ တီႈႁိူၼ်းၼႂ်းဝၢၼ်ႈဢုင်ၼၼ်ႉၵေႃႈ ၵူၼ်းသမ်ႉပေႃးၵိုၼ်းၶွၼ်ႈဝႆႉယူႇ။
ၸွမ်းသၢႆသဵၼ်ႈတၢင်းမိူဝ်းဝဵင်းၵေႃႈ တေႃႈဢမ်ႇလွတ်ႈၽေးမိူၼ်ၵၼ် ၵႆႉၵႆႉမီးသိုၵ်းယိုဝ်းၵၼ်ယူႇတႃႇသေႇ။
ၵၢင်ၼႂ်မိူင်းလႅင်းမႃး လႆႈႁၼ်ၵူၼ်းမၢတ်ႇၵူၼ်းၸဵပ်းမီးၼမ် ၽႂ်ၽႂ်ၵေႃႈ ဢွၼ်ၵၼ်ထၢမ်ႁႃမေႃယႃယဝ်ႉ ၵူၺ်းၵႃႈ ႁႃၸိူင်ႉႁိုဝ်ၵေႃႈဢမ်ႇထူပ်း ၶမ်းလၢဝ်ၼၼ်ႉၵေႃႈ လႆႈမိူဝ်းၸွမ်းၶႆႈၵႂႃႇတၢင်းဝၢၼ်ႈၸိင်ၼၼ်ႉယူႇ၊ မိူဝ်ႈလႆႈမိူဝ်းႁၼ်ဝၢၼ်ႈၸိင်ၼၼ်ႉ ႁဵတ်းႁႂ်ႈမၼ်းသမ်ႉပေႃးမိူၼ်ႇမိုင်ၵႂႃႇ သိုပ်ႇယဵပ်ႇယၢင်ႈတမ်းတိၼ်ပေႃးဢမ်ႇလႆႈ ၼႂ်းၸႂ်ဢိုၵ်ႉၼိုၵ်ႉမႃး မိူဝ်ႈလႆႈႁၼ် လင်ႁိူၼ်းၵူၼ်းၵိုၼ်း သုမ်ႉၶႃးလဵၵ်းမုင်းတဵမ်လင် ထုၵ်ႇၾႆးၽဝ်ၵိုတ်းၽဝ်ႇဢမ်ႇလိူဝ်သင်သေဢိတ်းယဝ်ႉၼၼ်ႉ၊ ဢမ်ႇၸၢင်ႈႁဵတ်းႁိုဝ် မၼ်းၵေႃႈၽႃႇႁွႆးၾႆးမႆႈၼၼ်ႉလူင်ၵႂႃႇ မၢင်တီႈၾႆးယင်းတိုၵ်ႉလုၵ်ႉမႆႈၵႂၼ်းတိုၵ်ႉၺူဝ်းယူႇလူးၵွၼ်ႇ၊ သမ်ႉဝႃႈဢမ်ႇလႆႈႁၼ်သင် ဢမ်ႇမီးသင်ယဝ်ႉသေတႃႉၵေႃႈ ႁႂ်ႈပေႃးယုမ်ႇၸႂ်လႆႈၼၼ်ႉ ဢမ်ႇဝႃႈတူဝ်လိပ်းႁိုဝ်တူဝ်တၢႆ မၼ်းၵေႃႈတေဢၢၼ်းႁႃႁႂ်ႈထူပ်းယဝ်ႉ။ ၼႂ်းပႃႇၽုင်မုၵ်ႉၾႆးၵိုၼ်းၸိူင်ႉၼၼ် တေပဵၼ်တူဝ်လိပ်းႁိုဝ်တူဝ်တၢႆ ဢမ်ႇႁၼ်သင်သေမဵဝ်းယဝ်ႉ တေႃႈၼင်ႇလုပ်ႇၵူၺ်းၵေႃႈ ယင်းတေမႆႈၵႂႃႇပႃးယဝ်ႉၼႆ ဢမ်ႇတၼ်းဝူၼ်ႉၺႃး၊ ဝူၼ်ႉဝႃႈတေလႆႈႁူပ်ႉၵူၼ်းၵေႃႉဢၼ်ၸိုဝ်ႈႁွင်ႉ မေႃယႃဢွၼ်တိုၼ်းၼၼ်ႉယူႇၵူၺ်းယဝ်ႉ။
ႁႃတေႃႇမိူင်းၶမ်ႈၵေႃႈဢမ်ႇႁၼ်သင်ယဝ်ႉ ဢၼ်မၼ်းလႆႈႁၼ်ယူႇၼၼ်ႉတႄႉ ဝၢၼ်ႈဢုင်ဢွၼ်ႇၶဝ်ၼၼ်ႉၵေႃႈ မုင်ႈႁၼ်ပဵဝ်ၾႆးလုၵ်ႉႁုၼ်ႈႁုၼ်ႈယူႇထႅင်ႈယဝ်ႉၼႃႇ မၼ်းၼၼ်ႉၵေႃႈ ၼႅတ်ႈဢႅၼ်ႇလႅၼ်ႈမိူဝ်းၵႂႃႇၶိုၼ်းၵမ်းလဵဝ်၊ မိူဝ်ႈမိူဝ်းၸွမ်းတၢင်းၼၼ်ႉသမ်ႉ ၺႃးသႂ်ႇၸုမ်းသိုၵ်းလႄႈ မၼ်းလႆႈပၢႆႈပႅပ်ႉယုမ်းဝႆႉ ပႂ်ႉတေႃႇၵူၼ်းၸိူဝ်းၼၼ်ႉသမ်ႉပေႃးပူၼ်ႉၵႂႃႇယူႇယဝ်ႉ။
ႁၼ်ၵူၼ်းၸိူဝ်းၼၼ်ႉယဝ်ႉ ၼႂ်းၸႂ်တႄႉၸဵပ်းၸႂ် ၶႂ်ႈႁႂ်ႈၶဝ်လႆႈလူႉတၢႆၵႂႃႇမိူၼ်ၵၼ်ဢိူဝ်ႈ၊ တူဝ်လဵဝ်ႁင်းၵူၺ်း ႁဵတ်းသင်ဢမ်ႇၸၢင်ႈ ၶိူင်ႈမိုဝ်းသင်ၵေႃႈဢမ်ႇမီး ၵၢမ်ႇလီဢၼ်ၶဝ်ဢမ်ႇႁၼ်မၼ်းၵွၼ်ႇယဝ်ႉ။ ဝၢႆးၶဝ်ပူၼ်ႉၵႂႃႇ မၼ်းၼႅတ်ႈဢႅၼ်ႇလႅၼ်ႈမိူဝ်းၵႂႃႇဝၢၼ်ႈၶဝ် ၸဵမ်ႁိူၼ်း ၸဵမ်ႁူင်းႁဵၼ်း သမ်ႉပေႃး လူႉလႅဝ်မႆႈၵႂႃႇမူတ်းယဝ်ႉၼႃႇ၊ ၵူႈလွင်ႈဢၼ်လႆႈသၢင်ႈမႃးတင်းႁိုင်ၼၼ်ႉ လႆႈထုၵ်ႇၾႆးၽဝ်ယႃႉလႅဝ်ၵႂႃႇၼႂ်းၸူဝ်ႈၽႅပ်ႉတႃၵူၺ်း တူၺ်းသေဢဝ်ၼမ်ႉတႃတူၵ်းယူႇၵူၺ်းယဝ်ႉ ဢမ်ႇၸၢင်ႈႁဵတ်းသင်လႆႈ။
ၵူၼ်းဝၢၼ်ႈၸိူဝ်းၼၼ်ႉၵေႃႈ ဢမ်ႇၸၢင်ႈႁဵတ်းႁိုဝ် သမ်ႉဝႃႈသဵၼ်ႈတၢင်း တၢင်းၼႃႈ တေလႆႈထူပ်းပၢင်တိုၵ်းႁႃႉ တေယူႇလွတ်ႈႁိုဝ် ၵႃႈတေလႆႈဢဝ်ၵၢမ်ႇမၼ်းဝႃႈၵူၺ်းယဝ်ႉ ဢွၼ်ၵၼ်မုင်ႈၼႃႈမိူဝ်းၵႂႃႇၼႂ်းဝဵင်းၼၼ်ႉ ပဵၼ်ယိုတ်ႈပဵၼ်သၢႆယူႇ။
ၶမ်းလၢဝ်ၵေႃႈ တေႃႈဢမ်ႇလိူဝ်လႆႈမိူၼ်ၵၼ် တူဝ်လဵဝ်ႁင်းၵူၺ်း လႅၼ်ႈလမ်းမိူဝ်းၵႂႃႇၸွမ်းလင်ပိူၼ်ႈ ၶႅပ်းတိၼ်သမ်ႉပေႃးၶၢတ်ႇ လႆႈပႆတိၼ်လၢႆမိူဝ်းၵူၺ်းယဝ်ႉ၊ ဢွၼ်ၵၼ်သိုပ်ႇၶၢဝ်းတၢင်းၵႂႃႇ ပေႃးႁိူဝ်ႉၵေႃႈလိုဝ်ႈႁေ မိူဝ်းလိုဝ်ႈၵႂႃႇၸွမ်းတၢင်း ယူဝ်ဝႃႈတေလႆႈလိုဝ်ႈႁိူဝ်ႉလိုဝ်ႈၸႂ်လီလီ ဢွၵ်ႇၼွၵ်ႈတၢင်းၵႂႃႇၵူၺ်း သမ်ႉပေႃးလႆႈငိၼ်းသဵင်မၢၵ်ႇတႅၵ်ႇဢၼ်ပိူၼ်ႈၽင်ဝႆႉယူႇယဝ်ႉၼႃႇ။ ပေႃးတၢႆၵေႃႈ ႁဵတ်းၶုမ်ၵႂႃႇတီႈၼၼ်ႈပၼ်ၵူၺ်းယဝ်ႉ ဢမ်ႇတၢႆၵေႃႈ ၸွႆႈၵၼ်ႁၢမ်ႁေမိူဝ်းၵႂႃႇတိၵ်းတိၵ်း ပႆတၢင်းသုတ်းဝၼ်းသုတ်းၶိုၼ်းၵေႃႈ ဢွၼ်ၵၼ်ႁွတ်ႈထိုင် ဢွင်ႈတီႈၵူၼ်းပၢႆႈၽေး တီႈမီးၵူၼ်းၼမ်ၵူၼ်းလၢႆမႃးယူႇသၢင်ႈၵိၼ်သဝ်းဝႆႉယူႇ ၼၼ်ႉယဝ်ႉ။
ၶမ်းလၢဝ်ၼၼ်ႉတႄႉၵေႃႈ မိူဝ်ႈႁွတ်ႈထိုင်ၼႆၵေႃႈ တိၼ်ၼၼ်ႉဢမ်ႇႁူႉၼိူဝ်ႉသင်ယဝ်ႉ တင်းလိူတ်ႈတင်းၵူမ်ႇၶူၼ်းလေႃးၵၼ် သမ်ႉပေႃးဢမ်ႇႁၼ်ႁွႆးၸဵပ်းယဝ်ႉလူး။ လုၵ်ႈႁဵၼ်းမၼ်းၼၼ်ႉ ဢမ်ႇႁၼ်ဢူႈမႄႈၶဝ်ယဝ်ႉၼႆၵေႃႈ ဢွၼ်ၵၼ်မႃးႁႃမၼ်း မီးယူႇလၢႆၵေႃႉ၊ ၵမ်ႈၽွင်ႈၵေႃႈတွင်ႉမႆႈၶဝ်ႈ ၵမ်ႈၽွင်ႈၵေႃႈၵူဝ် ၵမ်ႈၽွင်ႈၵေႃႈႁွင်ႉႁႆႈ ပေႃးပဵၼ်သဵင်လုၵ်ႈဢွၼ်ႇယူႇသဵင်ႈ။
ၶမ်းလၢဝ်ၼၼ်ႉတႄႉ ၼင်ႇၵႃႈမၼ်းႁဵတ်းလႆႈ ဢွင်ႈတီႈလႂ်လႅပ်ႈမီးၶဝ်ႈမီးၽၵ်းၼႆၵေႃႈ ၵႂႃႇႁႃတူၺ်းယဝ်ႉ ၵူၺ်းၵႃႈ တီႈႁုင်မိုဝ်ႉၵႅင်ၼၼ်ႉ ၶဝ်ႈၽၵ်းသမ်ႉပေႃးမူတ်းသဵင်ႈယဝ်ႉလူး ဢမ်ႇလိူဝ်သေယူတ်ႇသေဢိတ်းယဝ်ႉ။ ၶဝ်ႈသၢၼ်ၵူၺ်းၵေႃႈဢမ်ႇလိူဝ်ယဝ်ႉ တေႃႈၼင်ႇၼမ်ႉယင်းဢမ်ႇလႆ တေၸၢင်ႈႁဵတ်းႁိုဝ်ထႅင်ႈယဝ်ႉ။
ဢမ်ႇမီးၵေႃႈၵႃႈတေလႆႈဢိုပ်းၵူၺ်းယဝ်ႉၼႆႁိုဝ် မၼ်းၵေႃႈႁိုဝ်တေပၼ်လုၵ်ႈဢွၼ်ႇဢိုပ်းလႆႈ ၵႂႃႇၸွမ်းၶွၵ်းၸွမ်းၶေႇၼႂ်းမေႃႈၶဝ်ႈဢၼ်ပႆႇလႆႈလၢင်ႉၼၼ်ႉ ၶဝ်ႈၶႅမ်ႈၵေႃႈဢမ်ႇၵိုတ်းယဝ်ႉ ဢဝ်ၵိူဝ်ဢွႆသႂ်ႇၼႂ်းဢၢင်ႇၼၼ်ႉသေ ႁွပ်ႇလူင်ၵႂႃႇတၢင်းလုၵ်ႈဢွၼ်ႇယူႇၼၼ်ႉယဝ်ႉ။
လုၵ်ႈဢွၼ်ႇၶဝ်ၵေႃႈ မိူဝ်ႈလႆႈၵိၼ်ယဝ်ႉ ဢွၼ်ၵၼ်ၼွၼ်းယဵၼ်ၵႂႃႇႁင်းၽႂ်ႁင်းမၼ်း၊ ၶမ်းလၢဝ်ယၵ်ႉတူၺ်းၸိူဝ်းၶဝ်သေ ဢိုတ်ႇႁႆႈၸဵတ်ႉၼမ်ႉတႃမၼ်းယူႇႁင်းၵူၺ်းယဝ်ႉ၊ ဢၼ်ဢမ်ႇႁၼ်ဢူႈမႄႈၶဝ်ၼၼ်ႉ ဢမ်ႇၸႂ်ႈဝႃႈ ႁႃၶဝ်ဢမ်ႇႁၼ် ၵွပ်ႈပိူဝ်ႈ ဢမ်ႇၸၢင်ႈပွၵ်ႈမႃးႁႃၶဝ်လႆႈၼၼ်ႉယဝ်ႉ။
ပၢင်တိုၵ်းၼၼ်ႉ မၼ်းၶႃႈသၢႆၸႂ်ၵူၼ်းဢမ်ႇမီးတၢင်းၽိတ်းသင် လႆႈတၢႆၵႂႃႇသေဢမ်ႇၵႃး လႆႈဢဝ်လုၵ်ႈဢွၼ်ႇ ဢမ်ႇမီးဢူႈမႄႈၵႂႃႇတင်းၼမ် ၼၼ်ႉယဝ်ႉ။ မိူဝ်ႈလႂ်ၼႂ်းမိူင်းႁဝ်းၼၼ်ႉ ပၢင်တိုၵ်းတေၵိုတ်းလိုဝ်ႈလႆႈလႃႇ မိူဝ်ႈလႂ်ၵူၼ်းမိူင်းႁဝ်းၼၼ်ႉ တေလႆႈယူႇၵတ်းၵတ်းယဵၼ်ယဵၼ် သၢႆၸႂ်ၵူၼ်းၽိူၵ်ႇၸိုၼ်ႈၶၢဝ်သႂ်ၼၼ်ႉ တေလႆႈသုမ်းယွၼ်ႉမၼ်းထႅင်ႈမွၵ်ႈႁိုဝ် မၼ်းၸင်ႇတေပဵင်းပေႃး တွၼ်ႈတႃႇတေလႅၵ်ႈဢဝ် လွင်ႈဢၼ်ဝႃႈ ၵတ်းယဵၼ်ၼၼ်ႉလႆႈ။
ၶမ်းလၢဝ်ၼၼ်ႉၵေႃႈ ယႃႇဝႃႈၽႃႈႁူမ်ႇလႃႈ တေႃႈၼင်ႇၶူဝ်းမၼ်း ယင်းဢမ်ႇဢဝ်ၸပ်းတူဝ်မႃးလႄႈ တႃႇလုၵ်ႈဢွၼ်ႇၶဝ်ၼၼ်ႉၵေႃႈ ဢမ်ႇမီးယဝ်ႉ မၼ်းသမ်ႉပေႃးလႆႈၵႂႃႇယွၼ်းဢဝ်တီႈပိူၼ်ႈမႃးယူႇ၊ ၸဵမ်မိူဝ်ႈမႃးထိုင် ဢမ်ႇလႆႈႁၼ်မႅၼ်ႈ ၼၢႆးၶမ်းလႅင်ႁေၵမ်း မိူဝ်ႈၶုၵ်းၸႂ်လႆႈႁေ ၵႂႃႇထၢမ်ပိူၼ်ႈၵေႃႈ ပိူၼ်ႈသမ်ႉဝႃႈဢမ်ႇႁၼ်ၼႆထႅင်ႈ၊ ထၢမ်သၢင်ႇလူင်ၶႃၽူဝ်မေးၵေႃႈ ဝႃႈဢမ်ႇႁၼ်ၼႆႁေ မၼ်းတင်းမႆႈၸႂ်တင်းၵူဝ်မႃးယဝ်ႉ ဢမ်ႇႁူႉၼၢႆးၸွင်ႇတေပဵၼ်သင် ၽိူဝ်လိူဝ်ၶႃၵေႃႈဢမ်ႇပေႃးလီႁေ ၸွင်ႇတေပႃးၵႂႃႇၸွမ်းၾႆးယဝ်ႉႁိုဝ် ဢမ်ႇဝူၼ်ႉၵေႃႈဢမ်ႇယူႇလႆႈ။
ၶမ်ႈၶိုၼ်းၼႆႉ တွၼ်ႈတႃႇၶမ်းလၢဝ်ၼၼ်ႉ ႁိုင်ဝႃႈႁိုင်ၼႃႇၼႃႇယဝ်ႉ၊ ၼွၼ်းၵေႃႈဢမ်ႇလပ်း ၸင်ႇလုၵ်ႉမႃးၼင်ႈႁေဢွမ်ႇၾႆးယူႇၼႂ်းၵၢင်ပၢင်ႇ ဢၼ်မီးလူမ်းလူင်ထူဝ်းထွင်းၽတ်ႉဢဝ်ၶႆႇၾႆး ပေႃးၽူင်ႉပိဝ်တူင်ႉယၢပ်ႈယၢပ်ႈ မီးယူႇႁင်းမၼ်းၵေႃႉလဵဝ်ၵူၺ်းလႄႈ ၼင်ႈႁေႁွင်ႉႁႆႈ သဵင်ဢိုတ်ႇႁႆႈၼၼ်ႉသမ်ႉပေႃးလင်မေႃးဢွၵ်ႇမႃးယဝ်ႉ။
ယၢမ်းၼၼ်ႉ ၸင်ႇမီးၾႆးၵႃးလူင်သၢမ်လမ်းႁိူဝ်ႈပိူင်းလႅင်းထွင်ႇမႃး တၢင်းၼႃႈမၼ်းၼၼ်ႉသေ ဢဝ်တႃသမ်ႉပေႃးၵႅၼ်းလူင်ၵႂႃႇယဝ်ႉ၊ မီးၵူၼ်းလၢႆလၢႆၵေႃႉ လူင်းၵႃးမႃး ၵူၼ်းၼႂ်းသုမ်ႉၼၼ်ႉၵေႃႈ ဢွၼ်ၵၼ်ဢွၵ်ႇမႃးတူၺ်း၊ ၵူၼ်းၸိူဝ်းၼၼ်ႉတႄႉပဵၼ် ၵူၼ်းဢၼ်မႃးၸွႆႈထႅမ်ၶဝ်ႈၼမ်ႉတၢင်းၵိၼ်တီႈၵူၼ်းပၢႆႈၽေးၶဝ်ယဝ်ႉ။
ၵူၼ်းၵေႃႉၼိုင်ႈလူင်းၵႃးမႃး ထွတ်ႇဢဝ်တင်းသိူဝ်ႈမၼ်း မႃးႁူမ်ႇပူဝ်ႉသႂ်ႇတီႈၶမ်းလၢဝ်သေ “ၵတ်းပေႃးတၢၼ်ႇၼႆႉ မႃးၼင်ႈႁဵတ်းႁင်ၼႂ်းၵၢင်ပၢင်ႇၸိူင်ႉၼႆ၊ ပဵၼ်သင်လႄႈဢမ်ႇၼွၼ်း”
ပိူၼ်ႈတႄႉၵေႃႈဢွၼ်ၵၼ်တေႃႉၶူဝ်းလူင်းၵႃးယဝ်ႉ ၵိုတ်းၶမ်းလၢဝ်လႄႈတင်း လႅင်းမိူင်းသႂ်ၼၼ်ႉၵူၺ်း ၼင်ႈဢုပ်ႇၵၼ်ယူႇတီႈမုၵ်ႉၾႆးၼၼ်ႉ။
“တေႁဵတ်းႁိုဝ်ၼွၼ်းလပ်းလႆႈ လပ်းတႃၵမ်းလႂ် ၵဝ်ႁၼ်ႁၢင်ႈၾႆးမႆႈမီးယူႇၼႂ်းတႃၼၼ်ႉ သမ်ႉပေႃးဢမ်ႇႁတ်းလပ်းတႃယဝ်ႉ” တင်းႁႆႈတင်းလၢတ်ႈ “ၼၢႆးၵေႃႈဢမ်ႇလႆႈမႃးၸွမ်း ပီႈမေႃၵေႃႈႁႃဢမ်ႇထူပ်း..” ၵူမ်ႈၼႃႈၵူမ်ႈတႃသေ သိုတ်ႉႁႆႈယူႇႁိမ်းလႅင်းမိူင်းသႂ်ၼၼ်ႉယဝ်ႉ။
လႅင်းမိူင်းသႂ်ၵေႃႈ လုပ်ႈလင်မၼ်းလွႆးလွႆးယဝ်ႉ၊ မၼ်းၸင်ႇတေၾၢင်ႉႁၼ်တိၼ်ၶမ်းလၢဝ် သမ်ႉပေႃးၵူမ်ႇၶႆးလူင်ဝႆႉ ဢၼ်ဢမ်ႇလႆႈတိုဝ်းသႂ်ႇၶႅပ်းတိၼ်သင်ၼၼ်ႉ။ ၶမ်းလၢဝ်ၼၼ်ႉၵေႃႈ ဢမ်ႇတၼ်းႁူႉဝႃႈလပ်းၵႂႃႇမိူဝ်ႈလႂ် တိုၼ်ႇမႃးၶိုၼ်း သမ်ႉပေႃးၼွၼ်းယူႇၼႂ်းၵႃးၼၼ်ႉယဝ်ႉယိုင်။
လႅင်းမိူင်းသႂ်ၵေႃႈ ယိပ်းတင်းၶဝ်ႈမုၼ်းမယူၺ်းၼၼ်ႉသေ ၸုၵ်းယူႇႁိမ်းၽၵ်းတူၵႃးတူၺ်းမၼ်း
“တိုၼ်ႇယဝ်ႉႁႃႉ!! ”
“ဢိုမ်ႈ.. ႁဝ်းတၼ်းလပ်းၵႂႃႇၸဵမ်မိူဝ်ႈလႂ်လႃႇ”
“မိူဝ်ႈၶမ်ႈဝႃး..” မိုင်ၵႂႃႇၵႅပ်ႉၼိုင်ႈသေ “ဢေႃ..မိူဝ်ႈၵၢင်ၼႂ်ၸဝ်ႉ မိူဝ်ႈမိူင်းပႆႇလႅင်းၼၼ်ႉၼေႈ”
“လုၵ်ႈဢွၼ်ႇၶဝ်လူး…”
“ၵိၼ်ၶဝ်ႈဢိမ်ႇယဝ်ႉဝႃႈ လႅၼ်ႈယူႇၸွမ်းၵၢင်ပၢင်ၼၼ်ႉ ၶဝ်လႆႈၵေႃႉၼမ် သဵင်ၶဝ်ပေႃးဢူၼ်ယူႇသဵင်ႈယဝ်ႉ”
“လီယဝ်ႉ…ပေႃးၼၼ်ၵေႃႈ” ၶမ်းလၢဝ်လူင်းၵႃးမႃး ႁႅင်းသမ်ႉပေႃးဢမ်ႇၶႂ်ႈမီးသေဢိတ်း လႅင်းမိူင်းသႂ်သမ်ႉပေႃးလႆႈႁွင်းတူဝ်မၼ်းဝႆႉယူႇ။
“ၸွင်ႇတေၵႂႃႇႁူင်းယႃႁႃႉ ၶႃႈတေၵႂႃႇသူင်ႇ တူၺ်းမိူၼ်ပီႈဢမ်ႇပေႃးယူႇလီယဝ်ႉ!”
“တီႈၼႆႈပိူၼ်ႈမီးမေႃယႃယူႇ ၵဝ်ၵေႃႈဢမ်ႇပေႃးၶႂ်ႈၵႂႃႇၵႃႈႁိုဝ်”
လႅင်းမိူင်းသႂ်ၵေႃႈ ဢဝ်တင်းၶႅပ်းတိၼ်ၵူႈၼိုင်ႈမႃးပၼ်ၶမ်းလၢဝ်တိုဝ်းၵႂႃႇယဝ်ႉ။ ၸူဝ်းၵၼ်ၵႂႃႇတီႈပိူၼ်ႈႁပ်ႉၸႅတ်ႈၵူၼ်းပဵၼ်ၼၼ်ႉလႄႈ မိူဝ်ႈၸႅတ်ႈမႃးယဝ်ႉ ၶမ်းလၢဝ်ၼၼ်ႉၵေႃႈ လႆႈၼွၼ်းၽႅၼ်ၼမ်ႉၵိူဝ်ယူႇယဝ်ႉၼႃႇ။
လႅင်းမိူင်းသႂ်ၵေႃႈ ၶမ်းလၢဝ်ပဵၼ်ၸိူင်ႉၼႆယဝ်ႉ ဢမ်ႇပႆႇၸၢင်ႈပွၵ်ႈမိူဝ်းၸွမ်းလုၵ်ႈၼွင်ႉမၼ်းလႆႈ မိူဝ်းၵေႃႈဢမ်ႇတမ်းၸႂ်သေ လဵၼ်ႈၸွမ်းလုၵ်ႈဢွၼ်ႇၶဝ်ပႂ်ႉဝႆႉယူႇ တေႃႇထိုင်ၵၢင်ဝၼ်းၶမ်ႈယဝ်ႉၸင်ႇၶိုၼ်းပွၵ်ႈမိူဝ်း။
ၵွပ်ႈပိူဝ်ႈပဵၼ်ၽူႈၸၢႆးဢွၵ်ႇတၢင်းၵေႃႉလဵဝ်ၵူၺ်းလႄႈ သမ်ႉပဵၼ်ၵႃးဢၼ်ၵႃႈၶၼ်ယႂ်ႇထႅင်ႈႁေ ၸင်ႇမိူဝ်းႁူပ်ႉၺႃး ၸုမ်းယိပ်းၵွင်ႈၵၢင်ႇၶဝ်ၸွမ်းတၢင်းယဝ်ႉ၊ ၸုမ်းၶဝ်ၼၼ်ႉၵေႃႈ မႃးတတ်းႁႄႉႁူဝ်ၵႃးမၼ်း ဢဝ်မၼ်းသမ်ႉပေႃးလႆႈၵိုတ်းၵႃးၵႂႃႇ၊ ၶဝ်ၵေႃႈဢဝ်ၵွင်ႈမႃးငႃမၼ်း ၸီႉသႂ်ႇႁႂ်ႈမၼ်းလူင်းၵႃးသေယဝ်ႉ ၼင်ႈၶုပ်ႉၶဝ်ႇ ၸႅတ်ႈထတ်းၶူဝ်းၶွင်ၸွမ်းတူဝ်မၼ်းသေဢမ်ႇၵႃး ၼႂ်းၵႃးမၼ်းၼၼ်ႉၵေႃႈ သွၵ်ႈသွၵ်ႈတဝ်တဝ် ႁႄႈဝႃႈပဵၼ်ၵူၼ်းၽူႈၶဵၼ်ၶဝ်ၼႆသေ တိၺွပ်းမၼ်းဝႆႉယူႇ။ ၸဵမ်ငိုၼ်း ၶူဝ်းၶွင်ၵႃႈၶၼ်ယႂ်ႇ ဢၼ်မီးယူႇတီႈၼႂ်းၵႃး ၶူဝ်းၶွင်ၸပ်းတူဝ်မၼ်းၼၼ်ႉ ၶဝ်ဢဝ်ၵႂႃႇမူတ်းယဝ်ႉ။
လႅင်းမိူင်းသႂ်ၼၼ်ႉၵေႃႈ သမ်ႉဝႃႈၶတ်းၸႂ်လၢတ်ႈ ထဵင်ၶိုၼ်းတၢၼ်ႇႁိုဝ်ၵေႃႈ ၶဝ်ဢမ်ႇထွမ်ႇသေဢမ်ႇၵႃး ၶဝ်ပၢႆမတ်ႉမိုဝ်းပႄႈပိၵ်ႇသေ ၸွပ်ႇၸွပ်ႇထၢမ်ထၢမ်မၼ်း လွင်ႈၽူႈၶဵၼ်ၶဝ်ယူႇတိၵ်းတိၵ်း၊ ပေႃးလၢတ်ႈဝႃႈဢမ်ႇႁူႉၵေႃႈၺႃးသူၼ်ႈၵွင်ႈ ပေႃးထၢမ်ယဝ်ႉဢမ်ႇလၢတ်ႈၵေႃႈၺႃးသူၼ်ႈတိၼ် ၶဝ်ပေႃႉပေႃႉထုပ်ႉထုပ်ႉ ႁႅင်းၶၢမ်ႇပေႃးဢမ်ႇၶႂ်ႈမီးယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ
