တွၼ်ႈသၢမ်သိပ်းႁႃႈ
ၽေးၶဵၼ်ရေႃးၵႃႇဢမ်ႇပႆႇႁၢႆ ၽေးငရၢႆးလိပ်းၼၼ်ႉၵေႃႈ ပေႃႇၵိူတ်ႇဢွၵ်ႇမႃးယဝ်ႉ ၶၼ်ၵုၼ်ႇၵႃႈၶိုၼ်ႈ ယႃႈမဝ်းၵမ်ၵေႃႈလိူင်ႇၽႄႈတိူၼ်းၼမ် ၵူၼ်းလၵ်ႉၵူၼ်းၸူၼ်လိူင်ႇႁႅင်းမႃး လိူဝ်သေၵူႈပွၵ်ႈပွၵ်ႈတေႉၼၼ်ႉယဝ်ႉ။ ၵႂႃႇႁႆႈၵႂႃႇသူၼ် ဢမ်ႇလွၵ်ႉသေႃးၵေႃႈဢမ်ႇမီးၽႂ်ၶဝ်ႈ မိူဝ်ႈလဵဝ်ၼႆႉတႄႉ လွၵ်ႉသေႃးၵေႃႈယင်းတိုၵ်ႉၶဝ်ႈလႆႈယူႇ။ ဝၢၼ်ႈၼိုင်ႈယဝ်ႉဝၢၼ်ႈၼိုင်ႈ ၵမ်းၵမ်းဝႃႈ ၺႃးၽူႈလၵ်ႉၼႆတိၵ်းတိၵ်း။ ၸွမ်းဝၢၼ်ႈၸွမ်းႁိူၼ်းၵေႃႈ ၵႆႉၵႆႉလႆႈငိၼ်း ၽူဝ်မေးၽိတ်းၵၼ်ယူႇတႃႇသေႇယဝ်ႉ။
ၶမ်ႈၼိုင်ႈ ၶမ်းလၢဝ်လုၵ်ႉတၢင်းဝၢၼ်ႈၸိင်ပွၵ်ႈမႃး သဵၼ်ႈတၢင်းတႃႇတေမႃးၸူးႁိူၼ်းမၼ်းၼၼ်ႉ လႆႈလတ်းၽၢၼ်ႇႁိူၼ်းပိူၼ်ႈမႃးထႅင်ႈယူႇလၢႆလၢႆလင်၊ မိူဝ်ႈၵႂႃႇဢမ်ႇပေႃးၸမ်ပေႃးၵႆ ႁိူၼ်းၼွင်ႉၶမ်းၶွင်ႇ လုၵ်ႈႁဵၼ်းမၼ်းၼၼ်ႉ လႆႈငိၼ်းဢူႈမႄႈၶဝ်ၽိတ်းၵၼ် သဵင်ႁွင်ႉလုၵ်ႈဢွၼ်ႇ၊ သဵင်သႅၼ်ႇႁွင်ႉၶၢင်းၵူဝ်ဢိုတ်ႇႁႆႈၵေႃႉပဵၼ်မေး သဵင်လင်ပေႃႉထုပ်ႉၶူဝ်းႁိူၼ်းပၼ်းၼၼ်ႈဢူၼ် ဢၼ်ၽူဝ်ၵေႃႉႁဵတ်း ငိၼ်းလီဝႃႈငိၼ်းလီ။
ၽွင်းမႄႈၼွင်ႉၶမ်းၶွင်ႇလႅၼ်ႈဢွၵ်ႇႁိူၼ်း ဢုမ်ႈတင်းၶမ်းၶွင်ႇပႃးၼၼ်ႉ လႆႈမူပ်ႇထူလူမ်ႉၼွၼ်းၵႂႃႇၼႃႈၽၵ်းတူ သမ်ႉမီးတင်းၽႃႉသပ်းပိူၵ်ႈသႂ်ႇသၼ်လင်လႄႈ ၽႃႉၼၼ်ႉ လႆႈထုၵ်ႇမိုဝ်းယႂ်ႇလူင် ယိပ်းမႃးပိူၵ်ႈသႂ်ႇပၼ်သၼ်ၶေႃးၼၼ်ႉထႅင်ႈ တီႈမႄႈဢမ်ႇၵႃး သပ်းသႂ်ႇပႃးလုၵ်ႈဢွၼ်ႇ သဵင်ပေႃးယဵၼ်လူင်ၵႂႃႇ မႅၼ်ႈမိူဝ်ႈၶမ်းလၢဝ်မႃးႁွတ်ႈထိုင်ၼႃႈၽၵ်းတူၵိူၼ်ႇၼၼ်ႉလီလီ။
ၶမ်းလၢဝ်ႁွင်ႉသႅၼ်ႇ ယွၼ်းတၢင်းၸွႆႈထႅမ် ၵူၺ်းၵႃႈ ၵူၼ်းၵေႃႉၼၼ်ႉၵေႃႈ လႅၼ်ႈလမ်းမႃးၸူးၶမ်းလၢဝ်၊ ၶမ်းလၢဝ်ၼႅတ်ႈလႅၼ်ႈ ၵူၼ်းၵေႃႉၼၼ်ႉၼႅတ်ႈလမ်းၸွမ်းၶမ်းလၢဝ်တိၵ်းတိၵ်း၊ ၶမ်းလၢဝ် တင်းလႅၼ်ႈတင်းႁွင်ႉႁႂ်ႈပိူၼ်ႈဢွၵ်ႇမႃးၸွႆႈယူႇ၊ ၼႂ်းၵိဝ်ႇၵၢင်ဝၢၼ်ႈၼၼ်ႉ မီးၵူၼ်းဢွၵ်ႇမႃးတူၺ်း ပေႃးဢူၼ်ပၼ်းယူႇသဵင်ႈယဝ်ႉ ဢၼ်ၵူၼ်းၼမ်လိူဝ်ပိူၼ်ႈၼၼ်ႉတႄႉ ပဵၼ်ႁိူၼ်းၼွင်ႉၶမ်းၶွင်ႇၶဝ်ၼၼ်ႉၵူၺ်း။
ဢူႈၼွင်ႉၶမ်းၶွင်ႇၶဝ်ၼၼ်ႉတႄႉ ဢမ်ႇမီးၽႂ်ႁတ်းႁဵတ်းႁင်တီႈမၼ်း ၽႂ်ႁၼ်ၵေႃႈဝႄႈပၢႆႈၵူဝ်ၵႂႃႇၵေႃႉလႂ်ၵေႃႉၼၼ်ႉယဝ်ႉ၊ သမ်ႉဝႃႈလႅၼ်ႈလမ်းလူၺ်းၵၼ်ပေႃးႁွပ်ႈဝၢၼ်ႈၵေႃႈ ဢမ်ႇမီးၽႂ်မႃးၸွႆႈ တေႃႇထိုင်ဢူႈၼွင်ႉၶမ်းၶွင်ႇၼၼ်ႉ လႆႈၵိုတ်းလိုဝ်ႈႁိူဝ်ႉၵႂႃႇ ပိူၼ်ႈၵေႃႈဢွၼ်ၵၼ်မႃးမတ်ႉဢဝ်မၼ်းဝႆႉယဝ်ႉ။
မိူဝ်ႈၶမ်းလၢဝ်ၶဝ်ႈမိူဝ်းၵႂႃႇတီႈႁိူၼ်းၼွင်ႉၶမ်းၶွင်ႇ ၵေႃႉဢၼ်တိုၵ်ႉၸင်ႇႁႃလႆႈ ႁူၵ်းၶူပ်ႇ လႄႈတင်းမႄႈၶဝ်ၼၼ်ႉၵေႃႈ လႆႈႁၼ်မီးၽႃႈၶၢဝ်ႁူမ်ႇတူဝ်ဝႆႉတင်းသွင်ၵေႃႉယဝ်ႉၼႃႇ။ သီႇသူပ်းမၼ်းၼၼ်ႉသၼ်ႇတိၼ်းတိၼ်း ၼမ်ႉတႃၸိုမ်ႉယမ်းလုၵ်ႈႁူၺ်ႇတႃ ၼွင်းလူၼ်ႉမႃးၼိူဝ်ၵႅမ်ႈ မိူဝ်းၶွၼ်သၢႆႉႁူမ်ႇတူမ်းသူပ်းမီႇႁႆႈၼၼ်ႉဝႆႉလႄႈ မိုဝ်းၶွၼ်ၶႂႃတဝ်ႉလိၼ်ဝႆႉ ၼင်ႈၶုပ်ႉၶဝ်ႇဢိုတ်ႇႁႆႈ တေႃႇၼႃႈၵူၼ်းတၢႆသွင်ၵေႃႉၼၼ်ႉယဝ်ႉ။
ၵမ်းၼၼ်ႉ မေႃယႃ ဢွၼ်တိုၼ်းၵေႃႈ မႃးယူႇတၢင်းၼႃႈမၼ်းသေ လပ်ႉၼႃႈမၼ်းဝႆႉယဝ်ႉပွႆႇႁႂ်ႈမၼ်းႁွင်ႉႁႆႈၵႂႃႇႁဵတ်းၼၼ်၊ တေႃႈၼင်ႇ မေႃယႃပဵၼ်ၽူႈၸၢႆး ဢၼ်လႆႈႁူပ်ႉႁၼ်ၵူၼ်းတၢႆယူႇတႃႇသေႇၼၼ်ႉၵေႃႈ ၼမ်ႉတႃယင်းၸိုမ်ႉယမ်းတီႈလၢႆႇတႃမႃးယဝ်ႉ။
ယွၼ်ႉယႃႈမဝ်းၵမ်ၼၼ်ႉသေ ႁဵတ်းႁႂ်ႈၵူၼ်းၽိူၵ်ႇၸိုၼ်ႈၶၢဝ်သႂ် လႆႈလူႉသဵင်ႈတၢႆၵႂႃႇ၊ ၵွပ်ႈမၼ်းသေ ႁဵတ်းႁႂ်ႈၼႃႈႁိူၼ်းတႅၵ်ႇယၢႆႈ၊ ၵွပ်ႈမၼ်းသေ ႁဵတ်းႁႂ်ႈဝၢၼ်ႈမိူင်းလႆႈသုၵ်ႉသၵ်ႉ ၵူၼ်းလၵ်ႉၵူၼ်းၸူၼ်လိူင်ႇၼမ် ၵူၼ်းယွၼ်းလိူင်ႇၼမ်၊ ၵူၼ်းလီလီ လႆႈပႅတ်ႈလၢႆႈၵႂႃႇတင်းၼမ် ၵွပ်ႈသင်လႄႈ မၼ်းတေလႆႈမႃးယႃႉၽဝၸၢတ်ႈပၢၼ်ၵူၼ်းမိူင်းႁဝ်းလႆႈထိုင်တၢၼ်ႇၼႆႉၼေႃ။
ယႃႈမဝ်းၵမ်မၼ်းၶဝ်ႈမႃးမိူဝ်ႈလႂ်ၼႆၽႂ်ဢမ်ႇတၼ်းႁူႉ ၽိူဝ်ႇႁူႉၵေႃႈ သမ်ႉပေႃးလိူင်ႇၼမ်ၽႄႈလၢမ်းၼႃႇယဝ်ႉလူး၊ သမ်ႉဝႃႈလုၵ်ႈဢွၼ်ႇဢမ်ႇၵိၼ်သေတႃႉ မိူဝ်ႈဢူႈမႄႈပဵၼ်ၵူၼ်းၵေႃႉၵိၼ်ၼၼ်ႉ ဢမ်ႇၼမ်ၵေႃႈဢေႇ မၼ်းတိုၼ်းပၼ်ၽွၼ်းတုမ်ႉယွၼ်ႈတေႃႇလုၵ်ႈဢွၼ်ႇမႃးယဝ်ႉ၊ ႁၼ်လႆႈတူဝ်ယၢင်ႇမၼ်းယဝ်ႉလူး ၼွင်ႉၶမ်းၶွင်ႇၼၼ်ႉ။
မိူဝ်ႈပဵၼ်ၸိူင်ႉၼႆမႃး ၽႂ်ၵေႃႈဢမ်ႇၸွႆႈသင်လႆႈ တေဝႃႈႁိုဝ်ၵေႃႈ တေႃႇၼင်ႇၶိင်းႁဵင်ၼၼ်ႉ ယင်းပဵၼ်ၵူၼ်းၵႃႉၶၢႆမၼ်းလူးၵွၼ်ႇ၊ ယင်းဝႃႈ လႆႈၵိၼ်ယဝ်ႉႁဵတ်းၵၢၼ်ၵျႃႉၼႃႇၼႆလူး မိူဝ်ႈတႄႇတႄႉၵျႃႉၼႃႇ ၽႂ်ၽႂ်ၵေႃႈဢွၼ်ၵၼ်သိုဝ်ႉၵိၼ် ၵျႃႉဝႃႈၵျႃႉ ဢဝ်ဝၢၼ်ႈပေႃးသၢၼ်ႈၵႂႃႇမူတ်းယဝ်ႉၼၼ်ႉယိုင်။
တိၼ်မိုဝ်းပဵၼ်ၶႃႈတွင်ႉ ယႃႈပဵၼ်ၶႃႈသူပ်းၵႂႃႇယဝ်ႉ ဢမ်ႇလႆႈၵိၼ်ဢမ်ႇယူႇလႆႈ မီးသင်လႅၵ်ႈလႆႈၶႂ်ႈၶၢႆပၼ်မူတ်းယဝ်ႉ မၢင်ၵေႃႉ ႁိူၼ်းၵေႃႈၶၢႆ၊ ၼႃးၵေႃႈၶၢႆ ၶၢႆဢမ်ႇၶႂ်ႈလိူဝ်သင်ယဝ်ႉ ယင်းထၢမ်ၶၢႆလုၵ်ႈၶၢႆမေးထႅင်ႈၵွၼ်ႇလႃႈ။
မိူဝ်ႈယႃႈမဝ်းၵမ်လိူင်ႇၼမ်မႃး ၼႂ်းဝၢၼ်ႈၵေႃႈဢမ်ႇလီယူႇသေဢိတ်းယဝ်ႉ ႁိူၼ်းၵေႃႈႁၢင်ႇ ၼႃးၵေႃႈႁၢမ်း ၵမ်ႈၽွင်ႈၵေႃႈတၢႆ ၵမ်ႈၽွင်ႈၵေႃႈႁၢႆ ၵမ်ႈၽွင်ႈၵေႃႈပၢႆႈ၊ ႁိူၼ်းယေးသူၼ်ႁႆႈၼႃး ႁၢမ်းၵႂႃႇတင်းၼမ်ၼၼ်ႉယဝ်ႉ။
ႁူင်းႁဵၼ်း ဢၼ်ယၢမ်ႈပဵၼ်ႁူင်းႁဵၼ်းလီယူႇလီၵျေႃႇလီမူၼ်ႈၼႆၼၼ်ႉၵေႃႈ သမ်ႉပေႃးမွင်သေႃႇႁေႃႇ ယဵၼ်သီႇသီႇဝႆႉယဝ်ႉ လုၵ်ႈႁဵၼ်းဢၼ်ယၢမ်ႈမီးၼပ်ႉပၢၵ်ႇၼၼ်ႉ ယၢမ်းၼႆႉတႄႉ မီးယူႇမွၵ်ႈသၢဝ်းသၢမ်သိပ်းၼႆႉၵူၺ်းယဝ်ႉၼႃႇ။ ၵမ်ႈၽွင်ႈၵေႃႈပၢႆႈၵႂႃႇၸွမ်းဢူႈၸွမ်းမႄႈၶဝ် ၸိူဝ်းၵေႃႉယႂ်ႇၵေႃႈ ဢွၵ်ႇၵႂႃႇႁဵတ်းၵၢၼ်ႁဵတ်းငၢၼ်းသေ ၵႂႃႇၵေႃႉတီႈၵေႃႉတၢင်းၵၼ်မူတ်းယဝ်ႉ။
ႁႅင်းၸႂ်မေႃသွၼ်မိူဝ်ႈလႆႈႁၼ်ၸိူင်ႉၼၼ်ၵေႃႈ တူၵ်းၵႂႃႇႁႅင်းတေႉတေႉၼၼ်ႉယဝ်ႉ တႃႇတေထိုင်ဝၼ်းမိူဝ်ႈၼႆႉလႆႈၵေႃႈ လႆႈၸႂ်ႉၶၢဝ်းယၢမ်း ဢဵၼ်ႁႅင်းတင်းၼမ်လူး၊ မၼ်းပဵၼ်ယွၼ်ႉသင်ၼေႃ ႁဝ်းႁဵတ်းသင်ၽိတ်းပိူင်ႈၵႂႃႇလႃႇ ၼင်ႈဝူၼ်ႉၶႆႈၸႂ်ၸိူင်ႉႁိုဝ်ၵေႃႈ ဢမ်ႇလႆႈၶေႃႈတွပ်ႇမၼ်းဢွၵ်ႇမႃး၊ တၢင်းယိူင်းဢၢၼ်းဢၼ်ဝႃႈပဵၼ်မေႃသွၼ်ၼၼ်ႉ ၼင်ႇႁၢင်ႈၶႆႈၸိူမ်ႈၵႂႃႇၵမ်းလွႆးလွႆးယဝ်ႉ။
ၼႂ်းဝၢင်းႁူင်းႁဵၼ်းဢၼ်ဝႃႈမၼ်းႁၢင်ႈလီ မီးတူၼ်ႈမႆႉသီၶဵဝ်လွမ်ႉႁွပ်ႈဝႆႉ တူၼ်ႈမွၵ်ႇၵီႈပူင်းယူႇၼၼ်ႉၵေႃႈ ဢမ်ႇမီးၵူၼ်းမႃးပိတ်းသုတ်ႇၼူမ်ယဝ်ႉ၊ တူၼ်ႈမၢၵ်ႇၵွၼ်ႈၼႃႇ ၵူၼ်းၵိၼ်ပေႃးဢမ်ႇပေႉလႆႈယဝ်ႉ၊ ၶမ်းလၢဝ်ၼင်ႈသေမိူၼ်ႇတူၺ်းႁူင်းႁဵၼ်းၼၼ်ႉယဝ်ႉ ထူၺ်ႈၸႂ်လူင်မႃးၵမ်းယဝ်ႉၵမ်းယူႇ။
မေႃယႃၵေႃႈ ၶဝ်ႈမႃးဝႄႉၼႂ်းႁူင်းႁဵၼ်းၼၼ်ႉ ႁၼ်ၶမ်းလၢဝ်မိူၼ်ႇယူႇလႄႈ မႃးၼင်ႈယူႇႁိမ်းမၼ်းသေ
“ပေႉဝူၼ်ႉသင်လူင်လၢင်လႃႇ!!”
“ဢိုမ်ႈ..ႁဝ်းဝူၼ်ႉဝႃႈ ႁဝ်းပဵၼ်ၶူးဢမ်ႇလႆႈလွင်ႈထိုင်တၢၼ်ႇၼႆႉႁႃႉ”
“ပေႃးသူပဵၼ်ၶူးဢမ်ႇလႆႈလွင်ႈ ႁဝ်းၵေႃႈပဵၼ်မေႃယႃဢမ်ႇလီၵႂႃႇယဝ်ႉ”
မေႃယႃၵေႃႈ သုတ်ႇဢဝ်လူမ်းၵတ်းလူမ်းယဵၼ် ၼႂ်းႁူင်းႁဵၼ်းၼၼ်ႉသေ “ႁူင်းႁဵၼ်းၵတ်းယဵၼ်လီပေႃးတၢၼ်ႇၼႆႉ တေမီးၽႂ်ႁဵတ်းလႆႈမိူၼ်ၼႆလႃႇ ႁဝ်းဢမ်ႇတွၼ်ႉႁၼ်ၵူၼ်းသၢင်ႈႁူင်းႁဵၼ်း ႁႂ်ႈပေႃးမိူၼ်ၼင်ႇႁိူၼ်းႁဝ်းလႆႈသေၵေႃႉၼႃ လိူဝ်သေသူ”
“ၵူၺ်းၵႃႈ..မိူဝ်ႈလဵဝ်ဢမ်ႇမီးလုၵ်ႈႁဵၼ်းယဝ်ႉလူး”
“ဝၼ်းဢိုတ်းႁဵၼ်းလူး တေႁဵတ်းႁိုဝ်မီးလႃႇ”
“ဝၼ်းဢိုတ်းႁဵၼ်းၼၼ်ႉ ယိုင်ႈၶႅၼ်းပဵၼ်ဝၼ်းဢၼ်လုၵ်ႈႁဵၼ်းၵိုၼ်းလိူဝ်ပိူၼ်ႈယဝ်ႉ ၵူၺ်းၵႃႈ ႁဝ်းၵေႃႈ ဢမ်ႇလႆႈႁၼ်ၸိူင်ႉၼၼ်မႃး ပီႊပၢႆယဝ်ႉ ၸဵမ်မိူဝ်ႈ ၼမ်ႉထူမ်ႈဝၢၼ်ႈႁဝ်းပီႊၼၼ်ႉမႃး၊ သမ်ႉဝႃႈမႄးႁဵတ်းၶိုၼ်းႁူင်းႁဵၼ်းယဝ်ႉသေတႃႉ ဢမ်ႇမီးလုၵ်ႈႁဵၼ်းမႃးမိူၼ်ၵဝ်ႇ လိူဝ်သေၼၼ်ႉ လုၵ်ႈႁဵၼ်းၵေႃႈဢေႇၵႂႃႇတိၵ်းတိၵ်း မၼ်းပဵၼ်ယွၼ်ႉသင်လႃႇ၊ ယွၼ်ႉႁဝ်းဢမ်ႇလီႁႃႉ”
“ယွၼ်ႉႁဵတ်းလီယဝ်ႉလႄႈ မၼ်းဢမ်ႇဢွၵ်ႇမႃးၼင်ႇၵၢင်ၸႂ်သူလႆႈသေ ၸင်ႇႁဵတ်းႁႂ်ႈတုၵ်ႉၸႂ်ၼၼ်ႉယဝ်ႉ”
“မၼ်းပဵၼ်ၼၼ်တေႉႁႃႉတေႃႈ..”
“တေဝူၼ်ႉၼမ်ႁဵတ်းသင်လႃႇ ၵမ်ႉတေၸဵဝ်းထဝ်ႈယဝ်ႉ”
“ဢမ်ႇပႆႇထဝ်ႈၵွၼ်ႇႁႃႉၼႆႉမိူၼ်ၼႆ..”
“ဢမ်ႇၼႃ တိုၵ်ႉၼုမ်ႇမိူၼ် 18 ယူႇၵူၺ်း”
ၶမ်းလၢဝ်ယၵ်ႉတူၺ်းမေႃယႃယဝ်ႉ ယုမ်ႉဢၢႆဢၢႆဢွၵ်ႇမႃးဢိတ်ႉၼိုင်ႈ ၸင်ႇၶိုၼ်းလၢတ်ႈၸူးလူၺ်ႈသဵင်ၶေႃႈၵႂၢမ်းမဝ်မဝ်ၵႂႃႇ “ 18 မၼ်းၵေႃႈပူၼ်ႉမႃး 10 ပီႊယဝ်ႉ ဢမ်ႇတၼ်းႁူႉတၼ်းႁၼ် ႁဝ်းသမ်ႉပေႃးမႃးထိုင် 28 ယဝ်ႉၼႆႉၼေႃ ဢမ်ႇထၢင်ႇဝႃႈ ႁဝ်းတေမႃးပဵၼ်ၵူၼ်းမိူၼ်ပိူၼ်ႈၸိူင်ႉၼႆ”
“ပဵၼ်သင်လႄႈဝႃႈၼၼ်..”
“ႁဝ်းႁႃႉ လႆႈၸႂ်ၽိတ်းႁူဝ်ပိူၼ်ႈ ဢမ်ႇႁူႉဝႃႈ ႁဝ်းတေၵႂႃႇႁႃလွင်ႈႁႃတၢင်းသေၽိတ်းႁူဝ်ပိူၼ်ႈလႆႈတႃႇသေႇၼႃ၊ တေႃႈၼင်ႇဢူၺ်းၵေႃႉႁဝ်း ၺႃးၸူႉမၼ်းယွၼ်းၶၢတ်ႇ မၼ်းတိူဝ်ႉၸႂ်ႁွင်ႉႁႆႈယူႇတိၵ်းတိၵ်းလႄႈ ႁဝ်းၵေႃႈလႆႈၵႂႃႇဢဝ်တႃမိုဝ်းတွႆႇပၼ်ၼႃႈၸူႉမၼ်း တႃသမ်ႉပေႃးမၢၼ်ႉလူင်ၵႂႃႇတေႉဢိူဝ်ႈ” ယၵ်ႉတူၺ်းၵမ်မိုဝ်းမၼ်းယူႇ။
“သူသမ်ႉပေႉမႃးႁႅင်းလႃႇ..”
“တေပဵၼ်ယွၼ်ႉႁဝ်းလႆႈၸႂ်တွႆႇမူၺ်းယူဝ်ႉ ႁိူၼ်းၼႃႉႁဝ်း ၶဝ်မီးတီႈတွႆႇမူၺ်း ႁဝ်းၵေႃႈသမ်ႉၵျိူၵ်ႈၸွမ်းၶဝ်ၸဵမ်မိူဝ်ႈၵေႃႉလဵၵ်ႉယဝ်ႉ ၶဝ်သွၼ်ႁဝ်းလဵၼ်ႈ”
မေႃယႃၼိမ်ယဵၼ်ယၵ်ႉတူၺ်းၶမ်းလၢဝ်သေ
“ႁဝ်းၵေႃႈထၢင်ႇယူႇၼႃ သူလၢတ်ႈဝႃႈဢမ်ႇၵျိူၵ်ႈႁဵၼ်း သမ်ႉႁဵတ်းႁိုဝ်ဢွင်ႇၸၼ်ႉ10 လႃႇ”
“လၢတ်ႈယူႇယဝ်ႉ ႁဝ်းႁၢႆႉၼႆ မိူဝ်ႈပီႊဢၼ်ႁဝ်းၶိုၼ်ႈၸၼ်ႉ 10 ၼၼ်ႉ လိူၵ်ႈလိူၵ်ႈ ႁဝ်းသမ်ႉႁူႉၵႂၢမ်းလပ်ႉ ၶူးလူင်တင်းၶူးသွၼ်ပၢႆးၼပ်ႉၸၼ်ႉႁဝ်းၼၼ်ႉ ပဵၼ်ၸူႉၵၼ် ႁဝ်းၵေႃႈလႆႈထႆႇၶႅပ်းႁၢင်ႈဢဝ်သၢၵ်ႈသေႇမၼ်းဝႆႉႁေ ဢဝ်ၵႂႃႇလွၵ်ႇၶူးလူင်ၼၼ်ႉယိုင်၊ မၼ်းၵေႃႈဢမ်ႇၸႂ်ႈလွင်ႈယၢပ်ႇလေႃႇပုၼ်ႈတႃႇႁဝ်း မေးၶူးလူင်လႄႈတင်းမႄႈႁဝ်းၼၼ်ႉသမ်ႉ မိုတ်ႈၵၼ်ဝႆႉလႄႈ မၼ်းၵေႃႈၵူဝ်ႁဝ်းတေဢဝ်ၼေမေးမၼ်းၼၼ်ႉၼႃႇ”
“သူဢွင်ႇၸၼ်ႉသိပ်းၼႆ ပိူၼ်ႈဢမ်ႇထၢင်ႇပိူင်ႈသင်ၵဝ်ႇႁႃႉ”
“ဢေႇၵွၼ်ႇလေႃႇ သင်ဢူႈမႄႈႁဝ်းႁဵတ်းၶူးသွၼ်ၼႂ်းႁူင်းႁဵၼ်းၼၼ်ႉတႄႉ ၶႅၼ်းတေၼႃႇၵွၼ်ႇယဝ်ႉ ပိူၼ်ႈၵေႃႈမႃးထၢမ်ဢိူဝ်ႈမႂ်းႁဵတ်းႁိုဝ်ဢွင်ႇပူၼ်ႉၸၼ်ႉသိပ်းလႃႇ ႁဝ်းၵေႃႈႁဵတ်းဝႃႈ တွပ်ႇၸိူင်ႉပိူၼ်ႈတွပ်ႇၼၼ်ႉယိုင်၊ တီႈတေႉႁဝ်းၵေႃႈဢမ်ႇႁူႉၼႃဝႃႈ ၶူးလူင်ႁဵတ်းႁိုဝ်ဢဝ်ႁဝ်းဢွင်ႇ ႁဝ်းတႄႉပေႃးဢွင်ႇၵေႃႈပေႃးယဝ်ႉ၊ မိူဝ်ႈၼၼ်ႉ မႄႈႁဝ်းၶဝ်ၵေႃႈတူၵ်းၸႂ်ဢိူဝ်ႈ လိၵ်ႈၵေႃႈဢမ်ႇတူၺ်းႁေ သမ်ႉဢွင်ႇၸၼ်ႉသိပ်းၼၼ်ႉ ၶဝ်တႄႉဝူၼ်ႉဝႃႈၶႃႈလႅပ်ႈဢမ်ႇဢွင်ႇယဝ်ႉ ပေႃးဢမ်ႇဢွင်ႇၵေႃႈ လၢတ်ႈႁႂ်ႈၶႃႈၸွႆႈၵၢၼ်ၶဝ်ၼႆဝႃႇ ႁဝ်းလွတ်ႈၵႂႃႇလႄႈ ၶဝ်လႆႈသူင်ႇႁဝ်းၵႂႃႇသိုပ်ႇႁဵၼ်းထႅင်ႈၼၼ်ႉယိုင် ႁဝ်းဢမ်ႇၶႂ်ႈႁဵတ်းၶူးလႄႈ မိူဝ်ႈႁဝ်းလႆႈၵႂႃႇယူႇၵႆႁူၵႆတႃၶဝ် ႁဝ်းယိုင်ႈၶႅၼ်းၸူမ်းယဝ်ႉ”
“သူသမ်ႉလႆႈၶိုၼ်ႈႁဵၼ်းယူႇႁႃႉ..”
“ဢမ်ႇ.. ႁဝ်းၵေႃႈၵိၼ်ႁေလႄႇႁေ ပေႃးၶၢၼ်ႉၵေႃႈ လဵၼ်ႈၵဵမ်းႁေ ဢမ်ႇမီးငိုၼ်းၵေႃႈ ယွၼ်းၶဝ်ႁေႁဵတ်းၼၼ်ၼၼ်ႉယိုင် ႁဝ်းယူႇလႆႈသွင်ပီႊၼႆႉယူဝ်ႉ မႄႈႁဝ်းၵေႃႈမႃးလႄႇလႄႈ ၺွပ်းလႆႈယဝ်ႉ ႁႂ်ႈႁဝ်းပွၵ်ႈမႃးၶိုၼ်း ႁဝ်းၵေႃႈမႃးၽိတ်းႁူဝ်ပိူၼ်ႈႁေ တူၵ်းထွင်ႇႁေၶိုၼ်းၼိုင်ႈယဝ်ႉၵေႃႈ ဢူႈႁဝ်းၸႂ်ႉႁဝ်းမႃးႁဵတ်းၶူးတီႈၼႆႈၼၼ်ႉယိုင်”
မေႃယႃၵေႃႈ ဢမ်ႇသိုပ်ႇထၢမ်ထႅင်ႈယဝ်ႉယၵ်ႉတူၺ်းၼႃႈၶမ်းလၢဝ်သေယုမ်ႉယူႇႁဵတ်းၼၼ်ၵူၺ်း။
“ၵူၺ်းၵႃႈႁဝ်းၵေႃႈသေလၢႆယူႇၼႃ သင်ဝၼ်းၼၼ်ႉ ႁဝ်းလႆႈၶိုၼ်ႈႁဵၼ်း ႁဝ်းတင်းတေလႆႈႁူႉမေႃလိူဝ်သေၼႆႉ ၵႂႃႇလႆႈၵႆလိူဝ်သေၼႆႉထႅင်ႈ”
“ႁဝ်းဝႃႈ ပဵၼ်ၼႆၵေႃႈလီယူႇလူး သင်သူႁဵၼ်းသုတ်း သူတင်းတေဢမ်ႇႁူႉၸၵ်းဝၢၼ်ႈၼႆႉ ႁူင်းႁဵၼ်းလင်ၼႆႉၵေႃႈ တေဢမ်ႇပဵၼ်မႃးလႆႈၵွၼ်ႇယဝ်ႈ..”
“ပီႈလၢတ်ႈမႃးၵေႃႈ ႁမ်ႉၸႂ်ႈယူႇၵဝ်ႇ..”
ၶမ်းလၢဝ်ၶိုၼ်းမႄးထၢမ်
“ၶႃႈတွင်းတွင်းလႆႈယူႇဝႃႈ မိူဝ်ႈပီႊၼၼ်ႉ ပီႈယၢမ်ႈၶႆႈၼႄၶႃႈ လွင်ႈပီႈလႆႈပၢႆႈမႃးယူႇဝၢၼ်ႈၸိင်ၼႆႉ ၵူၺ်းၵႃႈ ဢမ်ႇလႆႈလၢတ်ႈၼႄဝႃႈ ပီႈသမ်ႉၶိုၼ်းႁဵတ်းႁိုဝ်သေ လႆႈမႃးပဵၼ်မေႃယႃၶိုၼ်းၼႆ ၶႃႈယင်းပႆႇႁူႉလူး”
“ၸွမ်းလူၺ်ႈပဵၼ်မေႃယႃ ယူတ်းယႃၵူၼ်းပဵၼ်ယူႇတႃႇသေႇၼၼ်ႉႁိုဝ်ဢမ်ႇႁူႉ မိူဝ်ႈႁဝ်းႁၼ်ၵူၼ်းပဵၼ်မႃးမီးယူႇပႃႈၼႃႈ တေယဵၼ်ႉၸႂ်တူၺ်းဢမ်ႇလႆႈ သမ်ႉဝႃႈၵူဝ်တူဝ်ပေႃးသၼ်ႇၵေႃႈဢမ်ႇၸၢင်ႈႁဵတ်းႁိုဝ် ႁဝ်းၼၼ်ႉၵူဝ်ၵူၺ်း ၵူၺ်းၵႃႈ ၵူၼ်းဢၼ်မီးယူႇပႃႈၼႃႈႁဝ်းၼၼ်ႉတႄႉ တေတၢႆယဝ်ႉ ငဝ်းလၢႆးမၼ်းမိပ်ႇဢီးႁႂ်ႈမၼ်းပဵၼ်လႄႈ ႁဝ်းၸင်ႇလႆႈဢွၵ်ႇပူၼ်ႉလွတ်ႈလႆႈၼၼ်ႉယိုင်”
“ၶႃႈတႄႉ..ငိၼ်းသၢင်ႇမူၼ်းဝႃႈ ပီႈပၢႆႈမေးႁေမႃးၼႆႁိုဝ်လႃႇ”
“ဢေႃ..လွင်ႈၼၼ်ႉႁႃႉ ႁဝ်းဢမ်ႇလႆႈပၢႆႈမေး ႁဝ်းပၢႆႈၵၢၼ်တႄႇၼႃႈႁိူၼ်းၵူၺ်း မိူဝ်ႈၼၼ်ႉ မႄႈႁဝ်းၵေႃႈ..ႁႂ်ႈႁဝ်းတေႇၼႃႈႁိူၼ်းၸွမ်းၽူႈယိင်းၵေႃႉဢၼ်ႁဝ်းဢမ်ႇလႆႈၸႂ်ၼၼ်ႉယဝ်ႉ တေထဵင်ၵေႃႈဢမ်ႇၸၢင်ႈ တေလၢတ်ႈၵေႃႈဢမ်ႇလႆႈ ႁဝ်းၵေႃႈလႆႈပၢႆႈမႃးၼၼ်ႉယိုင်”
“ၸူဝ်ႈမႃးၼႆႉ ၸွင်ႇပႃႈလႆႈမိူဝ်းႁိူၼ်းသေပွၵ်ႈၶႃႈႁႃႉၼႆႉ”
“ဢမ်ႇၼႃ ၶဝ်တင်းတေလိုမ်းႁဝ်းယဝ်ႉၵွၼ်ႇယူဝ်ႉ”
“ဢမ်ႇၶႂ်ႈတေႇၼႃႈႁိူၼ်းထိုင်တၢၼ်ႇၼၼ်ႉတေႉယဝ်ႉၼေႃႈ”
“မိူဝ်ႈၼၼ်ႉၵူၺ်း ဢမ်ႇၸႂ်ႈမိူဝ်ႈလဵဝ်ၼႃ”
ၶမ်းလၢဝ်လၢႆႈၵႂၢမ်းၵႂႃႇ “ၶႃႈတေမိူဝ်းႁိူၼ်းယဝ်ႉ ပီႈမေႃပႆႇမိူဝ်းႁႃႉ”
မေႃယႃၵေႃႈယၵ်ႉတူၺ်းၶမ်းလၢဝ်သေ ဢမ်ႇသိုပ်ႇလၢတ်ႈသင်ထႅင်ႈယဝ်ႉ ယုမ်ႉႁႅင်ႈႁႅင်ႈၵႂႃႇႁဵတ်းၼၼ်ၵူၺ်း။
သိုပ်ႇလူၵႂႃႇတွၼ်ႈတေမႃးၶႃႈ။
