တွၼ်ႈသၢမ်သိပ်းသီႇ
ပေႃးဝႃႈမီးၵူၼ်းၸပ်းတၢင်းပဵၼ်ၼႆၵေႃႈ ၶမ်းလၢဝ်တႄႉ ဢမ်ႇၸၢင်ႈသွၼ်လိၵ်ႈလႆႈယဝ်ႉ ၵႃႈတေလႆႈပွင်ႇပၼ်တီႈလုၵ်ႈႁဵၼ်းၶဝ်ၶိုၼ်းၵူၺ်း။ ယင်းလီ သမ်ႉဝႃႈၼႂ်းဝၢၼ်ႈလႅင်းၾူၼ်းဢမ်ႇတူဝ်ႈထိုင်လႆႈလီသေတႃႉ မီးဝေႃးၵပ်းသိုပ်ႇၵၼ်လႆႈယူႇ မၼ်းၸင်ႇလႆႈၵပ်းမိူဝ်းတၢင်းႁိူၼ်းလုင်းၵႄႇၶဝ် လႄႈ ပိၵ်ႉဢိုတ်းႁူင်းႁဵၼ်းသေ ႁႂ်ႈၾၢင်ႉပၢႆးယူႇလီၵၼ်ၵႂႃႇ ၸွမ်းၼင်ႇဢၼ်မၼ်းႁူႉမႃး ပေႃးပဵၼ်ဝတ်းပဵၼ်ဢႆၵေႃႈ ႁႂ်ႈၵိၼ်ပၼ်ၼမ်ႉၶိင်ၸိူဝ်းၼႆႉၼမ်ၼမ်ၼႆသေ သူင်ႇသင်ႇၽၢၵ်ႇၵႂၢမ်းဝႆႉယဝ်ႉ ႁူင်းႁဵၼ်းမၼ်းၵေႃႈလႆႈဢိုတ်းၵႂႃႇယူႇ။
ယႃႁႄႉၵင်ႈၼင်ႇဢၼ်မေႃယႃၶဝ်ႁႃမႃးၼၼ်ႉ မၼ်းဢမ်ႇမီးတူဝ်ႈထိုင်ပၼ်လႆႈၵူၼ်းၵူႈၵေႃႉလႄႈ လႆႈသမ်းပၼ်တီႈ ၵူၼ်းဢၼ်ၸၢင်ႈမီးတၢင်းပဵၼ်တိတ်းၸပ်းလႆႈငၢႆႈလႄႈ ၵူၼ်းဢၼ်တေလႆႈၵႂႃႇၼႂ်းဢွင်ႈတီႈဢၼ်မီးၵူၼ်းတိတ်းၸပ်းတၢင်းပဵၼ်လႆႈငၢႆႈၼၼ်ႉၵူၺ်း။
ၵူၼ်းၼႂ်းဝၢၼ်ႈၶဝ်ၵေႃႈ မိူဝ်ႈႁူႉဝႃႈႁိူၼ်းသၢင်ႇလူင်ၶဝ်ပိူၼ်ႈဢမ်ႇပၼ်ၶဝ်ႈၼႆၵေႃႈ ဢမ်ႇမီးၽႂ်ႁတ်းၶဝ်ႈႁိူၼ်းသေၵေႃႉတေႉၼင်ႇဝႃႈ ပေႃးဝႃႈရေႃးၵႃႇ ၵႃႇလလူင်ၼႆၵူၺ်းၵေႃႈ ၶဝ်ဢွၼ်ၵၼ်ၵူဝ်ၼႃႇၼႃႇယဝ်ႉ။
ပေႃးဝႃႈသၢင်ႇလူင်ၸပ်းယဝ်ႉ လုၵ်ႈမေးမၼ်း ဢမ်ႇလွတ်ႈမိူၼ်ၵၼ်လႄႈ ၶဝ်ပေႃႈမႄႈလုၵ်ႈပဵၼ်ၵၼ်ၵႂႃႇတင်းႁိူၼ်းယဝ်ႉ။ ၶမ်းလၢဝ်လႄႈတင်းၼၢႆးၼၼ်ႉတႄႉၵေႃႈ လႆႈပႂ်ႉတူၺ်းၼႂ်းၶၢဝ်းတၢင်း 14 ဝၼ်းယူႇ၊ ၵူၺ်းၵႃႈ ဢၼ်လီမႆႈၸႂ်ၼၼ်ႉသမ်ႉ မေႃယႃ ဢွၼ်တိုၼ်းၵေႃႈ လႆႈၸပ်းၵႂႃႇယဝ်ႉ။
ပေႃးဝႃႈမေႃယႃၸပ်းၼႆ ၽႂ်ၵေႃႈသမ်ႉပေႃးဢမ်ႇႁတ်းဢွၵ်ႇႁိူၼ်းဢွၵ်ႇယေးၵၼ်သေၵေႃႉယဝ်ႉ ၼႂ်းဝၢၼ်ႈၼၼ်ႉၵေႃႈသမ်ႉပေႃးယဵၼ်သီႇသီႇယူႇ၊ ပေႃးဢမ်ႇလူဝ်ႇၼႃႇၼႃႇၼႆ တမ်ႉဢမ်ႇၶႂ်ႈဢွၵ်ႇႁိူၼ်းၵၼ်ယဝ်ႉ။ တေႃႈၼင်ႇမေႃယႃၽူၺ်းႁွမ်လႄႈမေႃယႃၶမ်းဢွင်ႇၼၼ်ႉၵေႃႈ တင်းဢမ်ႇႁတ်းၵႂႃႇတၢင်းလႂ်ယဝ်ႉ။
လႆႈဝႃႈမေႃယႃဢွၼ်တိုၼ်းၼၼ်ႉ ပဵၼ်ႁႅင်းၼႃႇတေႉတေႉယဝ်ႉ၊ သမ်ႉဝႃႈပဵၼ်မေႃယႃ ယူတ်းယႃၵူၼ်းပဵၼ်ၼႆသေတႃႉၵေႃႈ မိူဝ်ႈပဵၼ်မႃးၼၼ်ႉ ဢမ်ႇမီးၽႂ်မႃးယူတ်းယႃပၼ်လႄႈ လႆႈလုမ်းလႃးတူဝ်ၵဝ်ႇၵႂႃႇၵူၺ်း။
ၽွင်းၼၼ်ႉသမ်ႉ ပဵၼ်ၶၢဝ်းၾူၼ် ၾူၼ်လူင်လူမ်းလူင်ၵေႃႈတူၵ်းႁႅင်းဝႃႈႁႅင်း တင်းဝၼ်းတင်းၶိုၼ်း သွင်သၢမ်ဝၼ်း ဢမ်ႇႁိူတ်ႇႁေပွၵ်ႈ ၵူၼ်းၵေႃႈဢမ်ႇၸၢင်ႈၵႂႃႇတၢင်းလႂ်လႆႈ။ ယွၼ်ႉၽူၼ်တူၵ်းထပ်းၵၼ်လၢႆဝၼ်းၼႃႇလႄႈ ၼမ်ႉၼႂ်းၼႃးၵေႃႈၶိုၼ်ႈသုင်မႃး ႁွတ်ႈထိုင်ပႃးတိၼ်သဝ်ႁိူၼ်း သမ်ႉပေႃးၶႂ်ႈပဵင်းဢႅဝ်ၼႆႉယဝ်ႉၼႃႇ၊ တူၼ်ႈၶဝ်ႈဢၼ်မီးယူႇၼႂ်းၼႃးၼၼ်ႉၶႅၼ်းတေဢမ်ႇၸၢင်ႈဝႃႈယဝ်ႉ မၼ်းတေၸူမ်ယူႇၼႂ်းၼမ်ႉၼမ်ၵႃႈႁိုဝ်ၼႆ။
တေၵႂႃႇဢဝ်ၶိုၼ်းၵေႃႈဢမ်ႇၸၢင်ႈႁဵတ်းသင်မၼ်းလႆႈယဝ်ႉလူး၊ ၵႃႈလႆႈၼင်ႈငွမ်လွမ်မွင်းဝႃႈ မိူဝ်ႈလႂ်ၼမ်ႉတေယွမ်းယူႇႁဵတ်းၼၼ်ၵူၺ်းဢမ်ႇၸၢင်ႈႁဵတ်းႁိုဝ် မိူဝ်ႈလႆႈသုမ်းၵေႃႈ ၵႃႈတေလႆႈသုမ်းယဝ်ႉ။
ၼႂ်းၶၢဝ်းတၢင်းသွင်သၢမ်ပီႊမႃးၼႆႉ ထိူၼ်ႇပႃႇမႆႉ လူႉၵွႆၼမ်ၼႃႇ ၸဝ်ႈသူၼ်ၸဝ်ႈႁႆႈၶဝ်ၵေႃႈ ၶႂၢၵ်ႈတီႈလိၼ်ၵႂႃႇတိၵ်းတိၵ်း၊ ၸွမ်းႁိမ်းႁွမ်းဝၢၼ်ႈၼၼ်ႉ သမ်ႉပေႃးဢမ်ႇမီးထိူၼ်ႇမႆႉပႃႇၼႃ မိူၼ်မိူဝ်ႈၵူႈပွၵ်ႈယဝ်ႉလႄႈ ပဵၼ်သူၼ်ပဵၼ်ႁႆႈၵႂႃႇမူတ်းယဝ်ႉ။
ပေႃးဝႃႈၼမ်ႉထူမ်ႈဝၢၼ်ႈဢုင်ၼႆၵေႃႈ ဝၢၼ်ႈႁူၵ်းဢၼ်ယူႇတီႈတႅမ်ႇၼၼ်ႉ ယိုင်ႈၶႅၼ်းတေထူမ်ႈၼႃႇလိူဝ်ပိူၼ်ႈယဝ်ႉ ၶမ်းလၢဝ်ၵေႃႈ ပဵၼ်ဢၼ်မႆႈၸႂ်မႃးသေ ဢမ်ႇသူၼ်ၸႂ်ယဝ်ႉဝႃႈတေပဵၼ်သင်၊ ၵူဝ်ဝႃႈ ပေႃးပဵၼ်မႃးတေႉ ၽေးသၽႃႇဝၼၼ်ႉ လီၵူဝ်လိူဝ်သေတၢင်းပဵၼ်ၼႆလႄႈ ၸူဝ်းဢဝ်ၵူၼ်းၼႂ်းဝၢၼ်ႈ ၶီႇႁိူဝ်းသေလူင်းၵႂႃႇတူၺ်းယဝ်ႉ။
ၽိူဝ်ႇလႆႈႁၼ်ၵေႃႈ ပဵၼ်ဢၼ်တူၵ်းၸႂ်တူၵ်းၶေႃးတႄႉတႄႉ လင်ႁိူၼ်းၵူၼ်းၵိုတ်းဢဝ် ႁိူၼ်းၶႃသုင်ၼၼ်ႉၵူၺ်း၊ ႁိူၼ်းတွပ်းႁိူၼ်းတႅမ်ႇၸိူဝ်းၼၼ်ႉ ၸူမ်ႁၢႆၵႂႃႇၼႂ်းၼမ်ႉတင်းသဵင်ႈယူႇ၊ မၢင်လင်ႁိူၼ်းမၼ်းၶိူင်ႇၶမ်ႉလႄႈ မုင်ႈႁၼ်ၸွမ်မၼ်းဝႆႉ ၵူၺ်းၵႃႈ ႁိူၼ်းၶႃးၽႃသၢၼ်မႆႉမူဝ်ႇမွင်ႁဵတ်းၼၼ်ႉတႄႉ လႆလွင်ႈၵႂႃႇၸွမ်းၼမ်ႉၵမ်ႈၼမ်ယဝ်ႉ။ ၵမ်ႈၽွင်ႈၵေႃႈလွတ်ႈမႃးလႆႈ ၵူၺ်းၵႃႈ ဢမ်ႇမီးတီႈယူႇတႃႇလွတ်ႈၽေး၊ လႆႈၼင်ႈၵတ်းသၼ်ႇထွင်ႇလူမ်းၶၢမ်ႇၽူၼ်ယူႇ ၸွမ်းၸိၵ်းၸွမ်ႁိူၼ်းၼၼ်ႉၵေႃႈမီးယဝ်ႉ။ ဢၼ်ႁၢႆလၢႆဝႆႉယူႇၵေႃႈမီး ၵမ်ႈၼမ်ၵေႃႈ တေပဵၼ်လုၵ်ႈဢွၼ်ႇလႄႈၵူၼ်းထဝ်ႈ ဢၼ်ၸွႆႈထႅမ်တူဝ်ၵဝ်ႇဢမ်ႇလႆႈၼၼ်ႉယဝ်ႉ။
ၶမ်းလၢဝ်ၶဝ်ၵေႃႈ ၼင်ႇၵႃႈၸွႆႈလႆႈၶတ်းၸႂ်ၸွႆႈၵႂႃႇ မီးႁိူဝ်းၽၢႆးဢွၼ်ႇၵူၺ်းၵေႃႈ ပဵၼ်ႁႅင်းၸွႆႈတေႃႉတၢင်ႇၵူၼ်း ႁႂ်ႈပေႃးၵႂႃႇတီႈလွတ်ႈၽေးလႆႈယူႇ။ တင်းဝၼ်းတင်းဝၼ်း တေႃႉသူင်ႇၵူၼ်းၵႂႃႇၵႂႃႇမႃးမႃး သုတ်းဝၼ်းၵႂႃႇမိူဝ်ႈလႂ်ယဝ်ႉၵေႃႈဢမ်ႇႁူႉ ၵမ်ႉၵေႃႈပေႃးလပ်းသိင်ႇယဝ်ႉ၊ ၸွမ်းၼင်ႇလင်ႁိူၼ်း ႁူဝ်ၼပ်ႉၵူၼ်းဝၢၼ်ႈမီးယူႇၼၼ်ႉ ယင်းတိုၵ်ႉႁၢႆလၢႆဝႆႉယူႇထႅင်ႈ မွၵ်ႈသိပ်းပၢႆပၢႆၼႆႉယဝ်ႉ။
သမ်ႉဝႃႈၵူၼ်းတေလွတ်ႈမႃးယူႇတီႈလွတ်ႈၽေးယဝ်ႉသေတႃႉ ၵူၼ်းၸိူဝ်းၼၼ်ႉၵေႃႈ လီလႆႈၸႅတ်ႈထတ်းတူၺ်းပၢႆးယူႇလီပၼ်ယူႇ၊ ၵူၺ်းၵႃႈ တႃႇၵပ်းသိုပ်ႇပိူၼ်ႈၼၼ်ႉ ၶမ်းလၢဝ်ၵေႃႈမိူဝ်ႈၸဝ်ႉႁၢင်ႈပႃးဝေႃးမႃးယူႇ ၽိူဝ်ႇတေၵပ်းသိုပ်ႇတူၺ်း ဝေႃးမၼ်းၵေႃႈတူၵ်းႁၢႆၵႂႃႇတၢင်းလႂ်ဢမ်ႇႁူႉယဝ်ႉ။
ဢမ်ႇၸၢင်ႈႁဵတ်းႁိုဝ် ၶမ်းလၢဝ်ၽၢႆးႁိူဝ်းမိူဝ်းၵႂႃႇၶိုၼ်းတၢင်းဝၢၼ်ႈဢုင် သိုပ်ႇၽၢႆးၵႂႃႇတၢင်းဝၢၼ်ႈၸိင် ႁွတ်ႈထိုင်ၶိုင်ႈတၢင်း တီႈလႆႈၶိုၼ်ႈၵွင်းလွႆဢိတ်ႉၼိုင်ႈၼၼ်ႉၵေႃႈ ဢမ်ႇမီးၼမ်ႉထူမ်ႈယဝ်ႉ။ မၼ်းၸင်ႇသိုပ်ႇမိူဝ်းၵႂႃႇတၢင်းႁိူၼ်းၶိင်းႁိင်းႁဵင်ၶဝ်ႁေ ၵႂႃႇယူႇၼႃႈႁိူၼ်းယဝ်ႉႁွင်ႉၸူး “မေႃယႃ!! ၸွင်ႇယူႇၶႃႈ”
ၶိင်းႁဵင်လႆႈငိၼ်းသဵင် ဢွၵ်ႇမႃးငွၵ်ႈတူၺ်း
“မေႃသွၼ်!! ဢွၵ်ႇႁိူၼ်းမႃးႁဵတ်းသင်လႃႇ ဢမ်ႇၸႂ်ႈဝႃႈတေလႆႈယူႇၼႂ်းႁိူၼ်းၼႆႁိုဝ်”
“တီႈဝၢၼ်ႈႁဝ်းလႄႈဝၢၼ်ႈႁူၵ်း ၼမ်ႉထူမ်ႈႁႅင်းၼႃႇယဝ်ႉလုင်းႁဵင်ႁဝ်းႁူႉ မိူဝ်ႈလဵဝ်ၼႆႉၶိင်းၵႄႇၵေႃႈႁႃဢမ်ႇပႆႇထူပ်းဝႃႈ ၶႃႈဢၢင်ႈလၢတ်ႈမႃးၸဵမ်ၸဝ်ႉၵဝ်ႇ ဢမ်ႇတၼ်းႁေၵေႃႈလိုမ်းပႅတ်ႈယဝ်ႉ ၽိူဝ်ႇၶုၵ်းၸႂ်လႆႈ ၶႃႈၵေႃႈသမ်ႉႁႃဝေႃးၶႃႈဢမ်ႇႁၼ်ယဝ်ႉယိုင်”
လုင်းႁဵင်ၼၼ်ႉတိုၵ်ႉမိူၼ်ႇမိုင်ၸိုၵ်းငိူဝ်ႈယူႇ ပၢၵ်ႇဝၼ်းႁဵင်ပီႊ ၸူဝ်ႈၵိူတ်ႇမႃးၼၼ်ႉ တီႈဝၢၼ်ႈၶဝ်ယူႇၸိူဝ်းၼၼ်ႉ ဢမ်ႇတွၼ်ႉႁၼ်ဝႃႈ ၼမ်ႉထူမ်ႈဝၢၼ်ႈဢုင်ႁေပွၵ်ႈ ဝၢၼ်ႈႁူၵ်းတႄႉၵေႃႈ ၵႆႉထူမ်ႈယူႇမၢင်ပီႊ ပေႃးၼမ်ႉႁႅင်းၼႃႇ။ ငိၼ်းဝႃႈ လုင်းၵႄႇၵေႃႈႁႃဢမ်ႇပႆႇထူပ်းၼႆၵေႃႈ မၼ်းတေႁၢႆႉႁႅင်းတၢၼ်ႇႁိုဝ်ၼႆ မၼ်းဢမ်ႇပႆႇႁၼ်ႁၢင်ႈမၼ်းၵွၼ်ႇလႃႈဝႃႈပဵၼ်ၸိူင်ႉႁိုဝ်ဝႆႉ။
လုင်းႁဵင်ၵေႃႈဢွၼ်ၸူဝ်းဢဝ်ၵူၼ်းဝၢၼ်ႈၶဝ်ၵမ်ႈၽွင်ႈ ၵႂႃႇၸွႆႈထႅမ်ၵၼ်ယဝ်ႉ၊ တီႈဝၢၼ်ႈၶၢႆးမူဝ်လႄႈဝၢၼ်ႈၶုမ်ႇၼၼ်ႉတႄႉၵေႃႈ သဵၼ်ႈတၢင်းပေႃးဢမ်ႇၸၢင်ႈၵႂႃႇၸၢင်ႈမႃးလႆႈၼၼ်ႉယိုင် လိၼ်ယူတ်ႇၵူၼ်ႇထူမ်တၢင်း တူၼ်ႈမႆႉယႂ်ႇမႆႉလူင်လူမ်ႉပင်းသႂ်ႇ ၶဝ်ၵေႃႈ လႆႈဢွၼ်ၵၼ်မႄးသဵၼ်ႈတႃႈသၢႆတၢင်းၶဝ်ၵႂႃႇလွႆးလွႆးယဝ်ႉ။ မိူဝ်ႈၽွင်းၼၼ်ႉတႄႉ ၽႂ်ၵေႃႈသမ်ႉပေႃးဢမ်ႇၶႂ်ႈၸၢင်ႈၸွႆႈၽႂ်လႆႈယဝ်ႉၼၼ်ႉၼႃႇ။
ႁိုင်ယူႇသၢမ်သီႇဝၼ်း ၼမ်ႉႁႅင်ႈၵႂႃႇယဝ်ႉသေတႃႉ ၵူမ်ႇဢုင်ငႂ်ႈတိုၵ်ႉၶမ်တဵမ်ႁိူၼ်းဝႆႉယူႇ ဢမ်ႇလႆႈထူဝ်းထွင်းၵႂႃႇပႃး လင်ႁိူၼ်းထုၵ်ႇလိၼ်ထူမ်ၸူမ်ႁၢႆၵႂႃႇၸွမ်းၼမ်ႉၸိူဝ်းၼႆႉမႃးၵေႃႈမီးမႃးယဝ်ႉ။ ၵူၼ်းဝၢၼ်ႈၶဝ် ဢၼ်လႆႈသုမ်းႁိူၼ်းသုမ်းယေး သုမ်းၶူဝ်းၶွင်ၸိူဝ်းၼၼ်ႉၵေႃႈ ပဵၼ်ၼမ်ႉႁူၼမ်ႉတႃမႃးယဝ်ႉ။
ၽေးသၽႃႇဝၼၼ်ႉ ၽႂ်ၵေႃႈဢမ်ႇၶႂ်ႈႁႂ်ႈမၼ်းပဵၼ်ၼင်ႇၵဝ်ႇ ၵူၺ်းၵႃႈ ၵွပ်ႈၵူၼ်းဢမ်ႇႁၵ်ႉသၽႃႇဝလႆႈပဵၼ်ၵႂႃႇၼႆ ၽႂ်ၵေႃႈသမ်ႉဢမ်ႇၶိုၼ်းၼႄးတူဝ်ၵဝ်ႇလႃႈ။ မိူဝ်ႈမၼ်းပဵၼ်မႃးယဝ်ႉ ဢမ်ႇၸၢင်ႈႁဵတ်းသင်တီႈမၼ်းလႆႈ ၼင်ႇဢၼ်ပွင်ပဵၼ်ႁဵတ်းၵႂႃႇလႆႈၼၼ်ႉၵေႃႈ ဢွၼ်ၸွႆႈထႅမ်ၵၼ် ၸိူဝ်းမီးၵေႃႈယိုၼ်ႈမႅင်ႇ ၸိူဝ်းဢမ်ႇမီးၵေႃႈ ပိုင်ႈႁူမ်ႈၽူၺ်းၵၼ်ၵႂႃႇ ၸွႆႈႁဵတ်းၸွႆႈသၢင်ႈသေယူႇၵႂႃႇႁဵတ်းၼၼ်ၵူၺ်းယဝ်ႉ။
လိူၵ်ႈဢမ်ႇလေႇ တီႈၼႃႈႁိူၼ်းၼၢႆးၶမ်းလႅင်ၶဝ်ၼၼ်ႉၵေႃႈ မီးတင်းထူဝ်ႈလူင်သွင်သၢမ်လမ်း ၵိုတ်းတမ်းယႆၵၼ်လူင်ဝႆႉ၊ ၸင်ႇသမ်ႉမီးၸၢႆးၼုမ်ႇဢၼ်ယၢမ်ႈႁၼ် ပုင်ႇႁၢင်ႈၵူၼ်းလူင်ဝႆႉၼၼ်ႉ ၵၢၼ်းလူင်ၶိုၼ်ႈႁိူၼ်းမႃးႁွင်ႉႁႃ “ၼၢႆး!! ၸွင်ႇယူႇႁိူၼ်းႁိုဝ်”
ၼၢႆးၶမ်းလႅင်လႄႈၶမ်းလၢဝ်ၶႃၼၼ်ႉ ဢွၵ်ႇမႃးတူၺ်း ဢမ်ႇထၢင်ႇဢမ်ႇထိူမ် သမ်ႉပဵၼ် ဢၢႆႈၸၢႆးၼုမ်ႇဝၼ်းၼၼ်ႉ ဢမ်ႇႁၼ်ၵၼ်ပေႃးႁိုင် သမ်ႉပေႃးမီးၼူတ်ႇမီးၵၢမ်ႈမီးႁႅင်း တူဝ်ၶိင်းၵႅၼ်ႇၶႅင်မင်ႈသင်ႈလူင်ဝႆႉယဝ်ႉ။
“ဢၢႆႈၼွင်ႉႁိုဝ်လႃႇ!! ဢမ်ႇၺႃးၵၼ်လၢႆပီႊၵူၺ်း သမ်ႉပေႃးထဝ်ႈမႃးပဵၼ်တၢၼ်ႇၼႆႉႁႃႉၼႆႉ”
“ပီႈၵေႃႈထဝ်ႈမိူၼ်ၵၼ်ယဝ်ႉ ပေႃးတၢၼ်ႇပုင်ႇမႄႈႁိူၼ်းယဝ်ႉယိုင်” ၶမ်းလၢဝ်ဢၼ်ၼုင်ႈတင်းသိၼ်ႈ ယူင်ႇယၢင်ႇထူင်ႇထဵဝ်ႈ တိုၵ်ႉၼင်ႈႁေလုၵ်ႉ ပႆႇတၼ်းဝႅတ်ႉလီလီ ပႃးတင်းၶူၼ်ႁူဝ်မူၺ်းၵဝ်ႈဝႆႉပုင်ႇႁၢင်ႈမႄႈႁိူၼ်းတေႉၼင်ႇၵဝ်ႇ။
“ထဝ်ႈၵႂႃႇတေႉႁႃႉၼႆႉမႃႈ ၸူဝ်ႈမႂ်းမိူဝ်းၵႂႃႇၼႆႉ ၼင်ႇႁၢင်ႈၵဝ်ပေႃးဢမ်ႇတၼ်းလႆႈယၵ်ႉၸမ်ႈတေႉဢိူဝ်ႈ”
“တေႇၼႃႈႁိူၼ်းယဝ်ႉလႄႈ ၸင်ႇပဵၼ်ၼႆၵႂႃႈ”
“ၵဝ်ၼႆႉႁႃႉတေႇၼႃႈႁိူၼ်း မႂ်းဝူၼ်ႉတူၺ်းၵူၼ်းဢၼ်တေမႃးဢဝ်ၵဝ်ၵွၼ်ႇလူး”
“တေႉဢိူဝ်ႈၼေႃႈ ပေႃးမိူၼ်ၼႆယိုင်ႈၶႅၼ်းႁႃယၢပ်ႇယဝ်ႉယူဝ်ႉၼၼ်တႄႉ”
“လုၵ်ႈၵဝ်မီးၼမ်ၼႃႇယဝ်ႉ..ဢမ်ႇလူဝ်ႇယဝ်ႉမႂ်းဝႃႈ”
သမ်ႉဝႃႈၶၢဝ်းယၢမ်းတေလႅၵ်ႈလၢႆႈၵႂႃႇ ၵူၼ်းဢၼ်ယၢမ်ႈလႆႈႁူႉၸၵ်းၵၼ်ၼၼ်ႉ ပေႃးမႃးႁူပ်ႉၵၼ်ၶိုၼ်းၼႆ ဢမ်ႇမီးသင်လႅၵ်ႈလၢႆႈလွင်ႈၸမ်ၸႂ်လႆႈ လႅင်းမိူင်းသႂ်လႄႈၶမ်းလၢဝ်ၼၼ်ႉၵေႃႈ တေႃႈၼင်ႇၼၼ်ယဝ်ႉ။
လႅင်းမိူင်းသႂ် လႆႈဢဝ်ၶူဝ်းၶွင်ဢၼ်ၸမ်ပဵၼ် မႃးၸွႆႈထႅမ်ၵူၼ်းဝၢၼ်ႈၸိူဝ်းလႆႈထူပ်းလွင်ႈယၢပ်ႇၼၼ်ႉသေယဝ်ႉ ဢဝ်ယႃႈယႃၵႂႃႇၸွႆႈထႅမ်ပၼ်တီႈႁူင်းယႃယဝ်ႉၵေႃႈ ပွၵ်ႈမိူဝ်းၵႂႃႇၶိုၼ်း။
ၵူၼ်းႁိူၼ်းလႅင်းမိူင်းသႂ်ၼၼ်ႉ လႆႈဝႃႈပဵၼ်သထေးၼႆၵေႃႈဝႃႈယဝ်ႉ ႁဵတ်းၵၢၼ်ပၢႆးမၢၵ်ႈမီး ၵဵဝ်ႇလူၺ်ႈလွင်ႈၵၢၼ်တေႃႉသူင်ႇ ဢမ်ႇဝႃႈလွင်ႈတေႃႉသူင်ႇမၢၵ်ႇၶဝ်ႈတဝ်ႈၼမ်ႉဢွၵ်ႇၼွၵ်ႈမိူင်း၊ တေႃႉဢဝ်ၶူဝ်းၶွင်ၼွၵ်ႈမိူင်းၶဝ်ႈမႃး လႆႈဝႃႈပဵၼ်ၶွမ်ႇပၼီႇယႂ်ႇလူင်ဢၼ်ၼိုင်ႈ၊ လိူဝ်သေၼၼ်ႉ ယင်းပဵၼ်ၸဝ်ႈၶွင်ႁူင်းလႅမ်း၊ ၸဝ်ႈၶွင်တီႈလိၼ် မီးၵႂႃႇၵူႈတီႈၵူႈဝဵင်းယဝ်ႉ။
သမ်ႉဝႃႈလႅင်းမိူင်းသႂ် တေလႆႈဢႃႇယု 24 ၵူၺ်းသေတႃႉ ဢူႈၶဝ်ၵေႃႈ ႁႂ်ႈမၼ်းၵုမ်းၵူၼ်းႁဵတ်းၵၢၼ် ၽၢႆႇၵၢၼ်တေႃႉသူင်ႇၵႂႃႇ၊ ၵူၺ်းသမ်ႉၺႃးၽွင်း တၢင်းပဵၼ်ၶူဝ်ႇဝိတ်ႉၽႄႈလၢမ်းသေ ၼႃႈၵၢၼ်မၼ်းၵေႃႈလႆႈသုမ်းၵႂႃႇၼမ်ယူႇ၊ တေႃႈၼင်ႇၵူၼ်းမၢၵ်ႈမီးၸိူင်ႉၼင်ႇၶဝ် ယင်းၵိၼ်းၸႂ် ၵူၼ်းၸိူဝ်းဢၼ်ယူႇၼႂ်းဝၢၼ်ႈၸိူဝ်းၼၼ်ႉလူး တေလႆႈထူပ်းလွင်ႈယၢပ်ႇတၢၼ်ႇႁိုဝ်ၼႆ ၼင်ႇၵႃႈပွင်ပဵၼ်လႆႈၼၼ်ႉ ဢဝ်တင်းၼမ်ႉၸႂ်လႄႈၶူဝ်းၶွင် မႃးၸွႆႈထိုင်ၵူၼ်းဝၢၼ်ႈဢုင်ၶဝ်လႄႈ လင်ႁိူၼ်းၵူၼ်းၸိူဝ်းဢၼ်မီးတၢင်းယၢပ်ႇၽိုတ်ႇၼၼ်ႉၵႂႃႇယူႇယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
