တွၼ်ႈသၢမ်သိပ်းသၢမ်
ယၢမ်းၵၢင်ၼႂ်ၸဵမ်ၸဝ်ႉ တႃဝၼ်းဢွၵ်ႇႁူဝ်လွႆမႃးလွႆးလွႆး သဵင်ၼူၵ်ႉဢႅၼ်ႇလႅၼ်ႈမိၼ်ၽၢႆႈလိုပ်ႈလူၺ်းၵၼ် ပဵၼ်ဝၼ်းဢၼ်ၾႃႉပၢင်ႇမိူင်းၸိုၼ်ႈသႂ်လီတႄႉတႄႉယဝ်ႉ။ လႅင်းမိူင်းသႂ်ၵေႃႈ ႁႅၼ်းၶူဝ်းႁႅၼ်းလဵင်းမၼ်းသေ ႁၢင်ႈႁႅၼ်းတူဝ်ဢွၵ်ႇႁိူၼ်းၵႂႃႇယူႇ၊ ၶမ်းလၢဝ်လႆႈႁၼ်မၼ်းသိမ်းၶူဝ်း မိူၼ်တေမိူဝ်းၼင်ႇၼၼ်ၵေႃႈ
“တေမိူဝ်းယဝ်ႉ ဢမ်ႇသူင်ႇဢမ်ႇသင်ႇၵၼ်ထႅင်ႈယဝ်ႉၼႆႉၼေႃႈ”
လႅင်းမိူင်းသႂ်ဝၢင်းထူင်ၶူဝ်းမၼ်းသေ “ၶႃႈတေမိူဝ်းယဝ်ႉ ပေႃးဝႃႈၶႃႈပႆႇလႆႈႁဵတ်းၸွမ်းၼင်ႇယိူင်းဢၢၼ်းၶႃႈမီးၼၼ်ႉ ၶႃႈတေဢမ်ႇပွၵ်ႈမႃးၶိုၼ်းယဝ်ႉ”
“ယူဝ်ဝႃႈတေမႃးၸွႆႈၵၼ် လိူဝ်သေဢမ်ႇၸွႆႈသင်ယဝ်ႉ ယင်းပၢႆလႆႈၸၢႆႇၵႃႈလဝ်ႈပၼ်ထႅင်ႈႁေ ႁမ်ႉဝႃႈတေဢမ်ႇမႃးၶိုၼ်းၼႆထႅင်ႈ ဢမ်ႇဢၢၼ်းမႃးတႅၼ်းၼီႈၵဝ်ၶိုၼ်းယဝ်ႉၵႃႈ”
ၶမ်းလၢဝ်ၵေႃႈ မႄးယုၵ်ႉဢဝ်ထူင်လႅင်းမိူင်းသႂ်ၸေးသႂ်ႇပၼ်တီႈလင်ယဝ်ႉ ယဵင်ႇယေႈတူပ်းႁူဝ်မႃႇလႅင်းမိူင်းသႂ်ၵႂႃႇ −
“ၵဝ်ဢမ်ႇႁူႉဝႃႈတၢင်းယိူင်းဢၢၼ်းမႂ်းၼၼ်ႉတေပဵၼ်သင် ၶႂ်ႈႁဵတ်းသင် ပေႃးဝႃႈမႂ်းမီးငိုၼ်း မႂ်းတိုၼ်းႁဵတ်းလႆႈ၊ သမ်ႉဝႃႈ မႂ်းတေပဵၼ်ၶူး၊ ပဵၼ်သိုၵ်း၊ ပဵၼ်မေႃယႃ ပေႃးမႂ်းဢမ်ႇမီးငိုၼ်း မႂ်းၵေႃႈဢမ်ႇၸၢင်ႈႁဵတ်းလႆႈၼင်ႇၵၢင်ၸႂ်မႂ်းလေႃႇ မႂ်းၵႂႃႇပဵၼ်လၢဝ်းပၢၼ်းဢဝ်လႃႈၵဝ်ဝႃႈ”
သမ်ႉပေႃးဢဝ်လႅင်းမိူင်းသႂ်ယၵ်ႉတူၺ်းၼႃႈၶမ်းလၢဝ်ၵႂႃႇယဝ်ႉၼိမ်ယူႇ။
“မႂ်းထၢင်ႇၵဝ်လၢတ်ႈလႅၼ်ႈၵႂႃႈ ၵဝ်လၢတ်ႈတေႉဢိူဝ်ႈၼႆႉ”
“ၶႃႈၵေႃႈဢမ်ႇလႆႈဝႃႈသင်လူး..ၶႃႈမိူဝ်းၵွၼ်ႇယဝ်ႉၼႃႈ”
“ပိူၼ်ႈမိူဝ်းယူႇႁႃႉမိူဝ်ႈၼႆႉ!..”
“ဢမ်ႇမိူဝ်း.. ၶႃႈတေပႆမိူဝ်းၵူၺ်း ၶီႇလူတ်ႉမိူဝ်းၵေႃႈဢမ်ႇပိူင်ႈသင်ၵၼ်ၼင်ႇၵဝ်ႇ တၢင်းယၢပ်ႇပေႃးတၢၼ်ႇၼႆႉ”
“မၼ်းၵေႃႈၸႂ်ႈယူႇၵဝ်ႇလႂ်”
ၼၢႆးၵေႃႈ ဢဝ်ႁေႃႇၶဝ်ႈႁေႃႇၽၵ်း မႃးပၼ်လႅင်းမိူင်းသႂ်သေယဝ်ႉ ၶမ်းလၢဝ်ၵေႃႈ ၸွမ်းၵႂႃႇသူင်ႇတၢင်းဢွၵ်ႇဝၢၼ်ႈၼၼ်ႉသေ တူၺ်းၸွမ်းလင်မၼ်းမိူဝ်းၵႂႃႇလွႆးလွႆးယဝ်ႉ။
ၶမ်းလၢဝ်ၼၼ်ႉၵေႃႈ မႄးသိုပ်ႇပူင်သွၼ်ပၼ်လိၵ်ႈလုၵ်ႈႁဵၼ်းမၼ်းၵႂႃႇ ဝၼ်းယဝ်ႉဝၼ်း၊ ဝူင်ႈသိုပ်ႇလိူၼ် လိူၼ်သိုပ်ႇပီ ၶၢဝ်းၵတ်းပူၼ်ႉၵႂႃႇ ၶၢဝ်းမႆႈထိုင်မႃး ပီႊ 2018 ၵႂႃႇယဝ်ႉ 2019 မႃးထိုင် သိုပ်ႇၸူး 2020 လႄႈ ႁူင်းႁဵၼ်းမၼ်းၼၼ်ႉၵေႃႈ ပူၵ်းတင်ႈသၢင်ႈၶိုၼ်ႈမႃးပဵၼ်တီႈပဵၼ်တၢင်းလႆႈလီယဝ်ႉ၊ ပီႊၼႆႉ ၸၼ်ႉႁဵၼ်းမၼ်းၵေႃႈ မီးမႃးထိုင် ၸၼ်ႉ 4 ယဝ်ႉ၊ လုၵ်ႈႁဵၼ်းဢၼ်ၶိုၼ်ႈႁွတ်ႈထိုင် ၸၼ်ႉ 4 ၼၼ်ႉတႄႉၵေႃႈ ၵိုတ်းမွၵ်ႈ 10 ပၢႆၼႆႉၵူၺ်းယဝ်ႉ၊ ၼွင်ႉလႅင်ၼၼ်ႉတႄႉၵေႃႈ တႄႇၸဵမ်မိူဝ်ႈသွၼ်ၸွႆႈၶမ်းလၢဝ်မႃး ၶမ်းလၢဝ်ၼၼ်ႉၵေႃႈ ၽိုၵ်းသွၼ်ပၼ်ႁႂ်ႈမၼ်းပဵၼ်ၶူးၸွႆႈသွၼ်လုၵ်ႈဢွၼ်ႇမႃးသေယဝ်ႉ ႁဵတ်းၶူးၸွႆႈမၼ်းတေႃႇထိုင်မိူဝ်ႈလဵဝ်ယဝ်ႉ။
တႄႇၸဵမ်မိူဝ်ႈပီႊ 2016 တေႃႇပေႃးထိုင် ပီႊ 2020 ၼႆႉၼႆၵေႃႈ လႆႈဝႃႈပီႊၼိုင်ႈလႄႈပီႊၼိုင်ႈ ၵၢၼ်ႁဵၼ်းၵၢၼ်သွၼ်မၼ်းလႅၵ်ႈလၢႆႈၵႂႃႇၸွမ်းငဝ်းလၢႆးယူႇတႃႇသေႇယဝ်ႉ။ မၢင်လွင်ႈၶႂ်ႈႁဵတ်းၵူၺ်းၵႃႈဢမ်ႇၸၢင်ႈႁဵတ်း မၢင်လွင်ႈဢမ်ႇထၢင်ႇသေ လႆႈႁဵတ်းပဵၼ်မႃးၵေႃႈမီးယူႇ။
ၼႂ်းဝၢင်းႁူင်းႁဵၼ်း မၼ်းၶတ်းၸႂ်ပူၵ်းပွင်မႃး ပေႃးတၢၼ်ႇဝႃႈပဵၼ်ႁိူၼ်းလူင်ၼိုင်ႈလင်ယဝ်ႉ၊ မီးတင်းသူၼ်ၽၵ်းလွမ်ႉႁွပ်ႈႁူင်းႁဵၼ်းဝႆႉ၊ မီးသႃလႃးၼင်ႈလိုဝ်ႈဝႆႉ ၸွမ်းၸဵင်ႇၶၢင်ႈႁူင်းႁဵၼ်း တၢင်းၼႃႈလႄႈတင်းလင်သွင်ၽၢႆႇ၊ မီးဢူႇၸႃး၊ ပုင်ႈပၢင်ႈ၊ မီးပၢင်ႇမၢၵ်ႇၼင်လႄႈသဝ်လၵ်းၵူဝ်း ဢွင်ႈတီႈလဵၼ်ႈႁႅင်း တီႈလဵၼ်ႈတၢင်းလဵၼ်ႈဝႆႉႁင်းမၼ်းယူႇယဝ်ႉ။ လိူဝ်ၼၼ်ႉယင်းမီး တီႈႁုင်မိုဝ်ႉလႄႈ ၼွင်ပႃပႃးထႅင်ႈယူႇ။
ၶၢဝ်းသွမ်ႈၼႃး၊ ဢဝ်ၶဝ်ႈ၊ ပေႃႉၶဝ်ႈၼႆၵေႃႈ ႁႂ်ႈလုၵ်ႈႁဵၼ်းမၼ်းၵႂႃႇၸွႆႈႁဵတ်းယဝ်ႉ၊ ယဝ်ႉၵေႃႈ တီႈလုင်းၸရေးၼၼ်ႉ တေမိူဝ်းႁဵတ်းၸေႈသႃၸွမ်းၵူႈပီႊပီႊ၊ လုၵ်ႈႁဵၼ်းဢၼ်သူၼ်ၸႂ်လွင်ႈယဵပ်းၶူဝ်းတေႃးၶူဝ်းၸိူဝ်းၼႆႉၵေႃႈ လႆႈသူင်ႇမိူဝ်းႁဵၼ်းတီႈၼၢႆးပၢင်ႇယူႇ၊ လွင်ႈသၢၼ်ၵူၺ်သၢၼ်သွင်းၼႆၵေႃႈ ယွၼ်းတၢင်းၸွႆႈထႅမ်ၵူၼ်းၼႂ်းဝၢၼ်ႈၶဝ် ႁႂ်ႈမႃးၸွႆႈသွၼ်ပၼ်ႁေ ၼင်ႇႁိုဝ်လုၵ်ႈဢွၼ်ႇၶဝ်ပေႃးတေမေႃတိၼ်မေႃမိုဝ်းၼၼ်ႉ မၼ်းၵေႃႈၶဝ်ႈႁႃႁႂ်ႈပိူၼ်ႈမႃးသွၼ်၊ မၢင်မဵဝ်းပေႃးဝႃႈၶဝ်မေႃႁဵတ်းယဝ်ႉ ႁႂ်ႈၶဝ်ၼင်ႇၵၼ်သွၼ်ၵၼ်ၶိုၼ်း ၸိူဝ်းၼႆႉၵေႃႈမီး။ လိူဝ်သေၼၼ်ႉ လွင်ႈႁဵတ်းၶဝ်ႈမုၼ်းၶဝ်ႈပွင်းၼႆၵေႃႈ ႁႂ်ႈၵူၼ်းဢၼ်မေႃႁဵတ်းလီလီၼၼ်ႉ မႃးသွၼ်ပၼ်တီႈႁူင်းႁဵၼ်းသေ ႁဵတ်းၵိၼ်ၸွမ်းၵၼ်ၵႂႃႇ မိူၼ်ပဵၼ်ႁိူၼ်းတွၼ်ႈတႃႇလုၵ်ႈဢွၼ်ႇၵူႈဝၢၼ်ႈဝၢၼ်ႈယဝ်ႉ။
ပေႃးဝႃႈပိၵ်ႉႁူင်းႁဵၼ်းၶၢဝ်းႁႅင်ႈယဝ်ႉၼႆၵေႃႈ ၵူႈပီႊပီႊ တေမီးပၢင်ၶႄႉၶဵင်ႇလုၺ်းၼမ်ႉၶႄႉၵၼ်ယူႇ၊ ၼမ်ႉဢၼ်ၶဝ်လုၺ်းၶႄႉၵၼ်ၼၼ်ႉတႄႉ ပဵၼ်ၼမ်ႉႁွင်ႈဢၼ်မီးယူႇတီႈဝၢၼ်ႈၶဝ်ၼၼ်ႉၵူၺ်း တင်းၵူၼ်းလူင်လႄႈလုၵ်ႈဢွၼ်ႇ ဢွၼ်ၵၼ်မႃးပႂ်ႉတူၺ်းမႃးပၼ်ႁႅင်းၵၼ် သဵင်သႅၼ်ႇမေႃးပၼ်း ပေႃးတၢၼ်ႇပွႆးဢၼ်ၼိုင်ႈလႄႈ မိူၼ်ပွႆးသူင်ႇသင်ႇပၢင်လူင်းႁူင်းႁဵၼ်းၼၼ်ႉယဝ်ႉ။
ၶမ်းလၢဝ်ၼၼ်ႉၵေႃႈ ယူႇယူႇၵႆႉၵႂႃႇဢၢပ်ႇၼမ်ႉႁွင်ႈၼႃႇႁေ ပိူၼ်ႈၵေႃႈသွၼ်မၼ်းလုၺ်းၼမ်ႉလႄႈ မိူဝ်ႈလဵဝ်မၼ်းၵေႃႈလႆႈဝႃႈလူၺ်းၼမ်ႉၶႅၼ်ႇမႃးလႄႈ ဢမ်ႇၵူဝ်ၼမ်ႉယဝ်ႉ။
တႃႇတေႁဵတ်းမႃးလႆႈမွၵ်ႈၼႆႉၵေႃႈ လႆႈၶဵင်ႇတႃႉတၢင်းၼမ်ၼၼ်ႉယဝ်ႉ၊ ဢမ်ႇမီးၽႂ်ႁၼ်လီၸွမ်းလွင်ႈဢၼ်မၼ်းဝူၼ်ႉလႄႈ ဢၼ်မၼ်းၶႂ်ႈႁဵတ်းၼၼ်ႉသေၵႃႈႁိုဝ်၊ ပေႃးၵႂႃႇယွၼ်းတၢင်းၸွႆႈထႅမ်ပိူၼ်ႈၼႆၵေႃႈ ဢမ်ႇပေႃးမီးၽႂ်ၶႂ်ႈပၼ်တၢင်းႁူမ်ႈမိုဝ်းလႄႈ မိူၼ်ၵူဝ်တေလႆႈဢဝ်ပိင်ႇၺႃႇၵႂႃႇပၼ်ပိူၼ်ႈယဝ်ႉ ၵူဝ်ပိူၼ်ႈတေမႃးႁိမ်ၵၢၼ်ၶဝ်ၼၼ်ႉယူႇ။ ၶမ်းလၢဝ်တႄႉၵေႃႈ ဢမ်ႇယွမ်းသုမ်း သမ်ႉဝႃႈတေၺႃးပိူၼ်ႈလႃႇ ပိူၼ်ႈဝႃႈၼႃႈထိုဝ်ၼႃႈလိူမ်ႈၼႃႇတၢၼ်ႇလႂ်ၵေႃႈ မၼ်းယင်းတိုၵ်ႉတိုဝ်တၼ်သေ ဢွၼ်ႈဝွၼ်းပိူၼ်ႈလႆႈယူႇ၊ ၵမ်ႈၽွင်ႈပိူၼ်ႈၶၢၼ်ႉႁၼ်လႄႈ ႁဵတ်းပၼ်မၼ်းၵေႃႈယင်းမီးယူႇယဝ်ႉ။
ယွၼ်ႉဢမ်ႇမီးငိုၼ်းလႄႈ ပိူၼ်ႈဝႃႈႁိုဝ်ၵေႃႈႁူႉၵႃႈလႆႈၶၢမ်ႇယဝ်ႉ ၵႂၢမ်းလႃႇၼၼ်ႉ လႃႇယဝ်ႉၵေႃႈယဝ်ႉၵူၺ်း၊ ပိင်ႇၺႃႇဢၼ်ပိူၼ်ႈပၼ်လုၵ်ႈႁဵၼ်းမၼ်းၼၼ်ႉ တေဢဝ်ၵႂႃႇပဵၼ်ၽွၼ်းလီတႃႇၶဝ်လႆႈၶၢဝ်းယၢဝ်းၼႆလႄႈ ပေႉၸႂ်သေႁဵတ်းၵႂႃႇယူႇ။
ပေႃးဝႃႈႁႂ်ႈလုၵ်ႈၶဝ်ၵႂႃႇႁဵတ်းၼႃးၸွႆႈပိူၼ်ႈၵေႃႈ မႃးလႃႇမႃးဝႃႈႁင်းၶမ်းလၢဝ် ၸႂ်ႉလုၵ်ႈၶဝ်ႁဵတ်းၵၢၼ် မၢင်ၵေႃႉၵေႃႈဢမ်ႇပၼ်လုၵ်ႈၶဝ်မႃးၶိုၼ်ႈႁူင်းႁဵၼ်းၸိူဝ်းၼႆႉၵေႃႈၺႃးမႃးယဝ်ႉ၊ တႃႇႁႂ်ႈပေႃႈမႄႈၶဝ်ပေႃးတေပွင်ႇၸႂ်ၼၼ်ႉၵေႃႈ မၼ်းလႆႈသပ်းလႅင်းလၢတ်ႈၼႄ ပွၵ်ႈၼိုင်ႈယဝ်ႉပွၵ်ႈၼိုင်ႈ လႆႈလၢတ်ႈ တေႃႇၶဝ်ပေႃးႁၼ်ၼမ်ႉႁၼ်တူဝ်မၼ်းမႃး ႁၼ်လုၵ်ႈဢွၼ်ႇၶဝ်မေႃၵၢၼ်မေႃငၢၼ်းမႃးၼႆၵေႃႈ ၸင်ႇတေပၼ်တၢင်းႁူမ်ႈမိုဝ်းလႆႈၼၼ်ႉယဝ်ႉ။
ၽွင်းၶၢဝ်းၵူၼ်းပဵၼ်ဝတ်းပဵၼ်ဢၢၼ်ၼမ် ၵမ်ႈၽွင်ႈၵေႃႈၶၢၼ်ဝႃႈပဵၼ်ၶူဝ်ႇဝိတ်ႉယဝ်ႉႁိုဝ်၊ ၶၢဝ်ႇလိုဝ်းလင်ၸွတ်ႈတူဝ်ႈလုမ်ႈၾႃႉယူႇသေတႃႉ တွၼ်ႈတႃႇၵူၼ်းဝၢၼ်ႈၶဝ်တႄႉ လႅင်းၾူင်းဢမ်ႇတူဝ်ႈထိုင်လႄႈ ဢမ်ႇပေႃးသူႈတူၺ်းၵၼ်၊ ယွၼ်ႉၵႆဝဵင်းလႄႈ တႃႇလမ်းၶိုတ်းၶၢဝ်ႇငၢဝ်းၼၼ်ႉၵေႃႈ တူၵ်းလိုၼ်းႁႅင်းၼႃႇ ၵူၼ်းဝၢၼ်ႈၶဝ်ၵေႃႈ ဢမ်ႇပေႃးသူၼ်ၸႂ်ၵၼ်သေၵႃႈႁိုဝ် မီးၵိၼ်မီးယူႇၵူၺ်းၵေႃႈ ၼင်ႇႁၢင်ႈပဵင်းပေႃးယဝ်ႉ၊ ၵၢင်ၼႂ်ၵႂႃႇသူၼ်ၵႂႃႇၼႃးႁေ ၵၢင်ၶမ်ႈၵေႃႈ မႃးႁိူၼ်းၶိုၼ်းႁေ ၵိၼ်ၶဝ်ႈၵိၼ်သင်ယဝ်ႉၵေႃႈ ၼွၼ်းယဝ်ႉ ဢမ်ႇလႆႈၵႂႃႇတုမ်ႉယွၼ်ႈသင်ၶဝ် ၶဝ်ၵေႃႈဢမ်ႇလႆႈသူၼ်ၸႂ်မၼ်း။ ပေႃးပဵၼ်ဝတ်းပဵၼ်ဢၢၼ်မႃးၵေႃႈ ႁႃၵိၼ်ယႃထိူၼ်ႇယႃၶိူဝ်း ၼင်ႇဢၼ်ယၢမ်ႈႁဵတ်းၵိၼ်ၵၼ်မႃးၼၼ်ႉႁေ ၶႅၼ်းၵႂႃႇႁဵတ်းၼၼ်ႉၵူၺ်း၊ ပေႃးပဵၼ်ႁႅင်းၼႃႇယႃဢမ်ႇၶႅၼ်းၼႆၵေႃႈ ၸင်ႇဢွၼ်ၵႂႃႇႁူင်းယႃၵူၺ်းၼႃႇ။
ၵူၺ်းၵႃႈ ငဝ်းလၢႆးၼႂ်းဝဵင်းပဵၼ်ႁိုဝ်ၼႆၼၼ်ႉၵေႃႈ မေႃယႃၶဝ်၊ ၶမ်းလၢဝ်ၶဝ်တႄႉ ၶတ်းၸႂ်ႁႃတီႈၵပ်းသိုပ်ႇ တူၺ်းၸွမ်းငဝ်းလၢႆးယူႇတႃႇသေႇယဝ်ႉ။
ယၢမ်းၶမ်ႈၶိုၼ်းလိုၵ်းယဵၼ် သဵင်လူတ်ႉၶိူင်ႈမႃးၵိုတ်းယူႇၼႃႈႁိူၼ်းၼၼ်ႉသေ ၼၢႆးၶမ်းလႅင်လႄႈတင်းၶမ်းလၢဝ်ဢွၼ်ၵၼ်ဢွၵ်ႇမႃးတူၺ်း လႆႈႁၼ်ပဵၼ်မေး ၸၢႆးလူင်လုၵ်ႈၼၢႆးၶမ်းလႅင် ဢၼ်ယူႇတၢင်းဝၢၼ်ႈႁူၵ်းၼၼ်ႉယဝ်ႉ။
“ဢေးႁၢၼ်ႇႁႃႉ!! မႃးႁဵတ်းႁင်လႃႇၶၢဝ်းၼႆႉ”
“ပီႈလူင်ဢမ်ႇယူႇလီပဵၼ်ႁႅင်းၼႃႇယဝ်ႉဝႃႈမႄႈႁဝ်းႁူႉ!!”
“ႁႃ! ႁဵတ်းၼၼ်ႁႃႉ ဢိူဝ်ႈၵမ်ႉဢႄႈ ၵဝ်ဢဝ်သိူဝ်ႈၼႃၵဝ်ၵမ်ႉၼိုင်ႈ”
“ႁွင်ႉမေႃယႃမႃးယဝ်ႉႁႃႉ!!” ၶမ်းလၢဝ်မႆႈၸႂ်သေထၢမ်ၸွမ်း။
“ဢေႃႈ တိုၵ်ႉႁႂ်ႈပိူၼ်ႈမိူဝ်းႁွင်ႉမႃးယူႇၶႃႈ!!”
ၶဝ်ၵေႃႈဢွၼ်ၵၼ်မိူဝ်းၵႂႃႇတၢင်းဝၢၼ်ႈႁူၵ်းၼၼ်ႉယဝ်ႉ၊ ၶမ်းလၢဝ်ၵေႃႈ ႁေႃႈလူတ်ႉၶိူင်ႈတၢင်ႇၼၢႆးၶမ်းလႅင်မိူဝ်းၵႂႃႇ။ ႁွတ်ႈထိုင်ၽၵ်းတူၵိူၼ်ႇယဝ်ႉ ၶမ်းလၢဝ်ၵေႃႈ ဢမ်ႇႁတ်းယဵပ်ႇၶဝ်ႈၼႂ်းႁိူၼ်းသေဢိတ်း ၸင်ႇပိၵ်ႉသူပ်းမၼ်းသေ ထၢမ်ၸူး ၼၢင်းႁၢၼ်ႇ
“ပီႈလူဝ်း!! သၢင်ႇလူင်ၸွင်ႇလႆႈမိူဝ်းဝဵင်းၶႃႈႁႃႉမိူဝ်ႈပူၼ်ႉမႃးလၢႆဝၼ်းၼႆႉ..”
“ဢိူဝ်ႈ မိူဝ်ႈဝူင်ႈပူၼ်ႉၼၼ်ႉမၼ်းတိုၵ်ႉၵႂႃႇမႃးၵူၺ်းဢိူဝ်ႈ ႁၼ်ၼႂ်းဝဵင်းပိူၼ်ႈပိၵ်ႉၵၢတ်ႇၼႆဢိူဝ်ႈမၼ်းမႃးလၢတ်ႈၼႄၶႃႈ”
ၶမ်းလၢဝ်သုတ်ႉထွႆလင်ဢွၵ်ႇၵႂႃႇထႅင်ႈသွင်သၢမ်ယၢင်ႈသေ လၢၵ်ႈၸၼ်ၶႅၼ်ၼၢႆးဢွၵ်ႇႁၢင်ႇၵႂႃႇယဝ်ႉ သွပ်ႉသႅပ်ႉသႂ်ႇႁူၼၢႆး “ၶႃႈဝႃႈ သၢင်ႇလူင်လႅပ်ႈၸပ်းၶူဝ်ႇဝိတ်ႉဢၼ်ပိူၼ်ႈဝႃႈၼၼ်ႉယဝ်ႉဝႃႈၼၢႆး”
ပေႃးမီးၶၢဝ်ႇမီးငၢဝ်းၼႆ ၶမ်းလၢဝ်ၼၼ်ႉၵေႃႈ ၵႆႉၵႆႉဢုပ်ႇၶႆႈၼႄၼၢႆးတႃႇသေႇႁေ ဢဝ်ၼၢႆးၵိုင်ႉၵၢင်ႉတူၵ်းၸႂ်ယဝ်ႉ။
“ၸႂ်ႈယူႇႁႃႉဢေႉ ထၢမ်တူၺ်းဢေးႁၢၼ်ႇလူး ႁၢင်ႈၽၢင်မၼ်းမိူၼ်ႁိုဝ်တေႉၼၼ်ႉ”
“ပီႈလူဝ်း..ၸွင်ႇသၢင်ႇလူင်ဢႆယူႇႁႃႉ! ”
“ဢေႃႈ ဢႆၶႃႈဢေႃႈ မၼ်းၶၢင်းဝႃႈၶေႃးၶူမ်းၼႃႇၼႆၶႃႈဢေႃႈ”
“ၸႂ်ႈယဝ်ႉဝႃႈၼၢႆး!! မၼ်းပဵၼ်ၶူဝ်ႇဝိတ်ႉတေႉဢိူဝ်ႈ..”
ၼၢင်းႁၢၼ်ႇၵေႃႈ ဢမ်ႇပေႃးႁူႉၸၵ်းလႄႈထၢမ်ၸူး “မေႃသွၼ်ဝႃႈႁင်ၶႃႈၵေႃႈ ဢူႈဢၢႆႈၸၢႆးၶဝ်ပဵၼ်ႁင်ၶႃႈၵေႃ”
“မၼ်းပဵၼ်ရေႃးၵႃႇဢၼ်ၽႄႈလၢမ်းယူႇမိူဝ်ႈလဵဝ်ၼႆႉယဝ်ႉ ၼႂ်းဝဵင်းၵေႃႈလၢမ်းႁႅင်းၼႃႇယဝ်ႉၵႃႈထၢင်ႇ ငိုၼ်းၾူင်းသဵင်ႈႁေဢမ်ႇလႆႈၵပ်းမိူဝ်းတီႈႁိူၼ်းလၢႆဝၼ်းၼႃႇယဝ်ႉ”
“ၸွင်ႇၶဝ်တေပဵၼ်ႁင်ၶႃႈ!!”
“ငိၼ်းဝႃႈပေႃးဢမ်ႇလႆႈသမ်းယႃႁႄႉၵင်ႈတႄႉၵေႃႈ ပဵၼ်ႁႅင်းၼႃႇဝႃႇ တၢင်းပဵၼ်မဵဝ်းၼႆႉသမ်ႉၸပ်းၵၼ်ငၢႆႈၼႃႇ ပေႃးယူႇၸွမ်းၵၼ်ၵေႃႈ ၸပ်းၵၼ်လႆႈယဝ်ႉၼႆဢိူဝ်ႈ”
ၵမ်းၼၼ်ႉမေႃယႃၵေႃႈႁွတ်ႈမႃးထိုင် ႁၼ်ၶမ်းလၢဝ်ၶဝ်ၸုၵ်းဢုပ်ႇၵၼ်ယူႇၼႃႈၵိူၼ်ႇလႄႈ
“မေႃသွၼ်ၶဝ်ၵေႃႈမႃးႁႃႉၼႆႉ!! ငိၼ်းဝႃႈပဵၼ်ႁၢႆႉႁႅင်းၼႃႇယဝ်ႉ မိူၼ်ႁိုဝ်ဝႆႉၶႃႈပီႈလူဝ်း”
“ၵူႈဝၼ်းတႄႉမၼ်းၵေႃႈဝႃႈ ပဵၼ်ဝတ်းၵူၺ်းၵမ်ႉၵေႃႈႁၢႆယူႇၼႆလႄႈ တင်းၵႂႃႇႁဵတ်းၵၢၼ်ယူႇဢေႃႈ ၵူၺ်းၵႃႈ မိူဝ်ႈဝႃးမိူဝ်ႈသိုၼ်းၼႆႉတႄႉ မၼ်းၶႂ်ႈႁိူဝ်ႉႁိူဝ်ႉဝႆႉလႄႈ ၶႃႈဝႃႈႁႃးၵႂႃႇႁႃမေႃယႃၼႄႇ မၼ်းတႄႉဝႃႈ ဢမ်ႇပဵၼ်ႁင်ႁိူဝ်ႉၵူၺ်း ၼွၼ်းလိုဝ်ႈၵေႃႈၶႅၼ်းယဝ်ႉၼႆၵေႃႈဢမ်ႇလႆႈမိူဝ်းၼၼ်ႉၶႃႈၼႃႇ၊ မိူဝ်ႈၼႆႉ မၼ်းၵေႃႈလႅပ်ႈတေၶၢၼ်ၸႂ်ယူႇၶႃႈယူဝ်ႉၼွၼ်းၶၢင်းယူႇတၢင်းဝၼ်း ၸင်ႇႁႂ်ႈဢၢႆႈၸၢႆးမိူဝ်းႁွင်ႉမေႃယႃႁေ ၶႃႈၵေႃႈမိူဝ်းႁွင်ႉမႄႈႁဝ်းၶဝ်မႃးၼၼ်ႉၼႃႇ”
“ပေႃးပဵၼ်ၼၼ်တေႁဵတ်းႁိုဝ်ၶႃႈလႃႇ!”
မေႃယႃၵေႃႈ ယၵ်ႉတူၺ်းၶမ်းလၢဝ်ၶႃၼၢႆးၶမ်းလႅင်ႁေ “ၼၢႆးႁဝ်းလႄႈမေႃသွၼ်ဢွၼ်ၵၼ်ပွၵ်ႈမိူဝ်းတီႈႁိူၼ်းၶိုၼ်းၵွၼ်ႇၶႃႈလႄႈ ၶႃႈတေၸတ်းၵၢၼ်ၵႂႃႇၵူၺ်း” ဢဝ်ၽႃႈပူၵ်ႉသူပ်းၼႂ်းထူင်မၼ်းၼၼ်ႉ ယိုၼ်ႈပၼ်ၶမ်းလၢဝ်ၶႃၵႂႃႇ “ၸူဝ်ႈၽွင်းၼႆႉယႃႇပေၽွမ်ႈဢွၵ်ႇႁိူၼ်းၵႂႃႇႁူပ်ႉၽႂ်ၶႃႈၼႃႈ ၾၢင်ႉဝႆႉၶႅၼ်းသေပွႆႇႁႂ်ႈမၼ်းပဵၼ်ၵႂႃႇၵႆ”
ၶမ်းလၢဝ်လႄႈၼၢႆး ဢွၼ်ၵၼ်ပွၵ်ႈမိူဝ်းၵႂႃႇၶိုၼ်းတီႈႁိူၼ်းယူႇယဝ်ႉ။
