တွၼ်ႈသၢမ်သိပ်းသွင်
သမ်ႉဝႃႈၵူၼ်းတၢႆ တေတၢႆၵႂႃႇယဝ်ႉသေတႃႉ ၵူၼ်းယူႇတႄႉဢမ်ႇယဝ်ႉလႆႈလူး ယင်းတိုၵ်ႉဝူၼ်ႉထိုင်ၸႂ်ထိုင်ယူႇတိၵ်းတိၵ်း၊ ယင်းဢမ်ႇပႆႇပွႆႇဝၢင်းလႆႈ လႅင်းမိူင်းသႂ်ၼၼ်ႉတႄႉ ပေႃးဢမ်ႇၶႂ်ႈပဵၼ်ၵူၼ်းလႆႈယဝ်ႉ၊ ၵူႈဝၼ်းၵူႈဝၼ်းၼင်ႈၵိၼ်လဝ်ႈမဝ်း ယူႇတီႈသႅင်ႇၼၢင်းႁွမ်ၶဝ်ႁေ ပေႃးၵၢင်ၶမ်ႈ ၶမ်းလၢဝ်ႁဵတ်းၵၢၼ်ယဝ်ႉၵေႃႈ မႃးၽႃၽိူဝ်းမိူဝ်း ၵၢင်ၼႂ်ၶမ်းလၢဝ်ၵႂႃႇႁူင်းႁဵၼ်းယဝ်ႉၵေႃႈပႆႇလုၵ်ႉ ပေႃးပွၵ်ႈမႃးၶိုၼ်းသမ်ႉဢမ်ႇယူႇႁိူၼ်းယဝ်ႉ။ ပူၼ်ႉၵႂႃႇပဵၼ်သွင်ဝူင်ႈၵေႃႈ ဢမ်ႇမီးလွင်ႈလႅၵ်ႈလၢႆႈသင်မႃး လိူဝ်သေႁၢင်ႈၽၢင်ၵူၼ်းၵူၺ်းဢၼ်လႅၵ်ႈလၢႆႈၵႂႃႇ ယွမ်ႁႅင်ႈ ဢမ်ႇၸိုၼ်ႈဢမ်ႇပၢင်ႇ ၶီႈလဝ်ႈၼႆၼၼ်ႉ မၼ်းဢွၵ်ႇမႃးႁႅင်းၼႃႇယဝ်ႉလူး။ ၶမ်ႈၼိုင်ႈ ၶမ်းလၢဝ်ၵေႃႈ မႃးၼင်ႈၸွမ်းမၼ်းသေ ၵိၼ်ၸွမ်းမၼ်းၵႂႃႇ ၼင်ႇႁိူဝ်ႉၸႂ်ႁိူဝ်ႉၶေႃးသေယဝ်ႉ လၢတ်ႈႁင်းမၼ်း။
“ၵိၼ်လႄႈၶႂ်ႈၵိၼ်ၵေႃႈ ၵိၼ်ႁႂ်ႈဢိမ်ႇလႄႈ မိူဝ်ႈလႂ်မႂ်းၵိၼ်ဢိမ်ႇယဝ်ႉ ယႃႇလိုမ်းသိမ်းၽိူၼ်မႂ်းၼႃႈ၊ မိူဝ်ႈလႂ်မႂ်းဢိမ်ႇယဝ်ႉ ၸင်ႇၵွႆႈမိူဝ်းႁိူၼ်းၼႃႈ”
ဢိုၵ်ႉလဝ်ႈဢၼ်ႁိုဝ်ႈသႂ်ႇဝႆႉၼႂ်းၵွၵ်းယဝ်ႉၵေႃႈ လုၵ်ႉပႅတ်ႈလႅင်းမိူင်းသႂ်ၵႂႃႇ၊ ၽွင်းၼၼ်ႉ လႅင်းမိူင်းသႂ်ၸင်ႇလၢတ်ႈၸူးၶမ်းလၢဝ် “ပီႈ! ၶႃႈၸႂ်ထိုင်သႅင်ၼူၼ်း..” ႁွင်ႉႁႆႈဢွၵ်ႇမႃးယဝ်ႉ။
ၶမ်းလၢဝ်ၵေႃႈ တေႃႈဢဝ်ၼမ်ႉတႃယိုင်ႈႁူၺ်ႇမႃးသေ ယၵ်ႉတူၺ်းလႅင်းမိူင်းသႂ်ယဝ်ႉ “ၵိၼ်လဝ်ႈၵေႃႈ ဢမ်ႇၸွႆႈသင်လႆႈလူး”
“ၶႃႈတေလႆႈႁဵတ်းႁိုဝ်လႃႇ!! မီးမိူဝ်ႈမဝ်းလဝ်ႈၵူၺ်းၼႃႇ ဢၼ်လႆႈႁၼ်ၶဝ်..”
ၶမ်းလၢဝ်ၵေႃႈ မႄးၼင်ႈၸွမ်းလႅင်းမိူင်းသႂ်ႁေ
“တွၼ်ႈတႃႇၵဝ် သမ်ႉဝႃႈဢမ်ႇလႆႈႁူပ်ႉ၊ ဢမ်ႇလႆႈလၢတ်ႈတေႃႇၵေႃႈယဝ်ႉ လွင်ႈလီလီဢၼ်မီးႁူမ်ႈၵၼ်ၼၼ်ႉ မၢႆတွင်းဝႆႉၼႂ်းဢူၵ်းႁူဝ်ၸႂ်ၵဝ် တေတွင်းဝႆႉဝႃႈ ၼႂ်းၸၢတ်ႈပၢၼ်ၵဝ်ၼႆႉ မီးၵူၼ်းၸိုဝ်ႈႁွင်ႉသႅင်ၼူၼ်းယူႇလႄႈ မၼ်းယၢမ်ႈပဵၼ်ၼွင်ႉယိင်းၵဝ် မၼ်းပဵၼ်ၵူၼ်းယဵၼ်ႇငႄႈလီႁၵ်ႉ မၼ်းပဵၼ်ၵူၼ်းမေႃဢုပ်ႇမေႃလၢတ်ႈ မၢင်ပွၵ်ႈယင်းပဵၼ်ၵူၼ်းလၢတ်ႈၼမ်လူးၵွၼ်ႇ သမ်ႉဝႃႈတူဝ်တၢႆၵႂႃႇယဝ်ႉသေတႃႉ ၼႂ်းၸႂ်ၵဝ်တႄႉ မၼ်းယင်းတိုၵ်ႉမီးသၢႆၸႂ်ယူႇဢိူဝ်ႈ”
ႁႅၼ်မုင်ႈတူၺ်းတွင်ႉၾႃႉ ဢၼ်မီးလုၵ်ႈလၢဝ်ပေႃးသႅမ်းယူႇသဵင်ႈလႄႈ မႅင်းႁိင်ႇႁွႆႈလႅင်းၵူၼ်ႈပေႃးၶဵဝ်ယူႇၼၼ်ႉ။
“ၵဝ်ဢမ်ႇႁူႉဝႃႈ ဝၢႆးသေၵူၼ်းတၢႆၵႂႃႇယဝ်ႉၼၼ်ႉ မၼ်းတေၵႂႃႇပဵၼ်သင် ၵႂႃႇယူႇတီႈလႂ် ၵူၺ်းၵႃႈ ၵူၼ်းဢၼ်တိုၵ်ႉမီးယူႇၼၼ်ႉ သင်ဝႆႉၸႂ်ဢွႆႇႁွႆႈၸပ်းၸွမ်းမၼ်းၵေႃႈ ၵူၼ်းၵေႃႉၼၼ်ႉတေတုၵ်ႉၵူၺ်း ၵူၼ်းတၢႆမၼ်းဢမ်ႇၸၢင်ႈမႃးၼင်ႈထွမ်ႇယဝ်ႉလႄႈ မႃးဢုပ်ႇလၢတ်ႈၸွမ်းလႆႈယဝ်ႉ၊ မႂ်းတေႁွင်ႉႁႆႈၵေႃႈႁႆႈလႄႈ တေတိူဝ်ႉၸႂ်ၵေႃႈတိူဝ်ႉၸႂ်လႄႈ ၵူၺ်းၵႃႈ မႂ်းၵေႃႈထုၵ်ႇလီယူႇၸွမ်းလွင်ႈပဵၼ်တေႉမၼ်းၽွင်ႈဢိူဝ်ႈ”
ၶမ်းလၢဝ်ၵေႃႈ ႁိုဝ်ႈလဝ်ႈသႂ်ႇၵွၵ်းမၼ်းထႅင်ႈႁေ ဢိုၵ်ႉၵိၼ်ယဝ်ႉၸင်ႇသိုပ်ႇလၢတ်ႈထႅင်ႈ “ဢမ်ႇဝၼ်းၼိုင်ႈႁဝ်းၵေႃႈတိုၼ်းတေတၢႆၵႂႃႇၵူႈၵေႃႉယဝ်ႉ ဢမ်ႇႁူႉဝၼ်းမၼ်းၵူၺ်း ဝႆႉၵိၼ်မိူဝ်ႈၵဝ်တၢႆၽွင်ႈလႄႈ” လၢၵ်ႈၶူတ်ႇလဝ်ႈလႅင်းမိူင်းသႂ်ၼၼ်ႉမႃးတူၼ်ၵႂႃႇ။
လႅင်းမိူင်းသႂ် မဝ်းသမ်ႉပေႃးၶႂ်ႈပၢင်ႇယဝ်ႉ “ပီႈတေႁဵတ်းသင်လႃႇ!!”
“ၵိၼ်လဝ်ႈဢိူဝ်ႈ!!”
ၶမ်းလၢဝ်ၼၼ်ႉၵေႃႈ ၵိၼ်သမ်ႉပေႃးမဝ်းဢမ်ႇႁူႉတူဝ်ႁူႉၶိင်းမႃးလႄႈ လႅင်းမိူင်းသႂ်သမ်ႉပေႃးလႆႈၸေးမိူဝ်းယဝ်ႉ။
မိူဝ်ႈတိုၵ်ႉၸေးမိူဝ်းၵႂႃႇၸွမ်းတၢင်းၼၼ်ႉၵေႃႈ ႁဵတ်းႁႂ်ႈမၼ်းသမ်ႉပေႃးၶုၵ်းၸႂ်လႆႈ မိူဝ်ႈၶႃတႄႇၸႃႉမႃးႁေ ၶမ်းလၢဝ်ပၢႆႈမိူဝ်းဢဝ်လူတ်ႉလူမ်ႉၸွမ်းတၢင်းၼၼ်ႉ လႆႈၸေးမၼ်းတေႃႇပေႃးႁွတ်ႈထိုင်ႁိူၼ်းၼၼ်ႉလႄႈ
“ပီႈ!! တိုၵ်ႉၼၵ်းမိူၼ်ၵဝ်ႇယူႇလူး..”
ၶမ်းလၢဝ်ၼၼ်ႉၵေႃႈ ၵမ်ၶူၼ်ႁူဝ်လႅင်းမိူင်းသႂ်သေယဝ်ႉ ႁွင်ႉသႅၼ်ႇလူင်မိူဝ်းၵႂႃႇၼႂ်းၵၢင်တၢင်းၼၼ်ႉလင်လင် “ၵဝ်တေမိူဝ်းႁိူၼ်း!!”
“မိူဝ်းယူႇၼႆႉၼႃႇ…” လႅင်းမိူင်းသႂ်တွပ်ႇ။
ၶမ်းလၢဝ်ၼၼ်ႉၵေႃႈ တဵၼ်ႈတဵၼ်ႈၶဝ်ႇၶဝ်ႇၶွၼ်းၶွၼ်းလႅင်းမိူင်းသႂ် သမ်ႉပေႃးထိင်းတူဝ်မၼ်းဢမ်ႇလႆႈလႄႈ ဢွၼ်လူမ်ႉလူင်ၵႂႃႇၼႂ်းၵၢင်တၢင်းၼၼ်ႉတင်းသွင်ၵေႃႉယဝ်ႉ။ လိူၵ်ႈလိူၵ်ႈ တီႈၼၼ်ႈၵေႃႈ သမ်ႉပဵၼ်ဢုင်ထႅင်ႈႁေ ၵိင်ႈၵႂႃႇၵိင်ႈမႃးတေႃႇပေႃးလုၵ်ႉလႆႈ၊ လုၵ်ႉမႃးႁၼ်ၼႃႈၵၼ်ယဝ်ႉၵေႃႈ ၶူဝ်ယူႇတင်းႁိုင် တဝ်ႉၽႃၽိူဝ်းႁွင်ႉၵႂၢမ်းၸွမ်းၵၼ်မိူဝ်းၵႂႃႇယဝ်ႉ။
ယၢမ်းၵၢင်ၼႂ် ၽူၼ်တူၵ်းႁိူတ်ႇယဝ်ႉ လႅတ်ႇဢွၵ်ႇပိူင်းထွင်ႇၸႅင်ႈ တွင်ႉၾႃႉသမ်ႉပေႃးသွမ်ႇသိူင်ႁိူင် မွၵ်ႇၵုမ်ႈၶၢဝ်ၸႅၼ်ႇပဵၼ်ဢၼ်လီယၵ်ႉလီယဵမ်ႈ လူမ်းထူဝ်းထွင်း ၶဝ်ႈၼႂ်းႁူးၽႃ သဵင်ၼၢႆးထဝ်ႈႁွင်ႉႁႃၶီႈလဝ်ႈၶႃၶမ်ႈဝႃးၼၼ်ႉ ပေႃးဢမ်ႇလႅပ်ႈငိၼ်းႁင်လႄႈ ၼွၼ်းမွႆႈလပ်းယူႇ။
ၶမ်းလၢဝ်ၼၼ်ႉတႄႉ တိုၼ်ႇမႃးပေႃးဢမ်ႇတွင်းလႆႈယဝ်ႉဝႃႈ ၶမ်ႈဝႃးၼၼ်ႉမၼ်းႁဵတ်းႁိုဝ်ႁေမႃးႁွတ်ႈႁိူၼ်း၊ ၵူၺ်းႁူႉဝႃႈ တိုၼ်ႇမႃးယဝ်ႉၵေႃႈ ႁူဝ်တိုၵ်ႉၼၵ်းယူႇ ၵတ်ႉၵႃႈပဵၼ်ဝၼ်းလိုဝ်ႈလႃႈ သင်ၼၼ်တႄႉဢမ်ႇၸၢင်ႈၵႂႃႇသွၼ်လိၵ်ႈယဝ်ႉ။
လႅင်းမိူင်းသႂ်တႄႉႁၢႆၵႂႃႇၸဵမ်ၸဝ်ႉယဝ်ႉ၊ ၸွမ်းၼင်ႇဢၼ်ႁူႉၵၼ်ယူႇၼၼ်ႉတႄႉ လႅပ်ႈတေမီးတီႈသႅင်ႇၼၢင်းႁွမ်ၶဝ်ၼၼ်ႉၵူၺ်း၊ မိူဝ်ႈလုၵ်ႉမႃးလႆႈယဝ်ႉ ၶမ်းလၢဝ်လဵပ်ႈမိူဝ်းၵႂႃႇတၢင်းသႅင်ႇၼၢင်းႁွမ်ၶဝ် ဢမ်ႇလႆႈႁၼ်လႅင်းမိူင်းသႂ်လႄႈ
“ပီႈႁွမ်!! ဢၢႆႈၼွင်ႉလူး..”
“ဢမ်ႇႁၼ်ၵူၺ်ႉမိူဝ်ႈၼႆႉတႄႉ..”
“မၼ်းၵႂႃႇလႂ်လႃႇမႃႈမိူဝ်ႈၼႆႉ ဢမ်ႇၸႂ်ႈဝႃႈ ယွင်ႇႁေၵႂႃႇၸွမ်းၶႆႈသႅင်ၼူၼ်းယဝ်ႉယူဝ်ႉၼႆႉ!!”
လိူၵ်ႈလိူၵ်ႈဢွၵ်ႇၸႂ်ႁင်းႁေၵေႃႈဢမ်ႇႁူႉ ၸင်ႇသမ်ႉလဵပ်ႈၵႂႃႇတၢင်းႁူင်းႁဵၼ်းယဝ်ႉ ယူႇၵႆၵႆႁေမုင်ႈႁၼ်လႅင်းမိူင်းသႂ် ပႆၶဝ်ႈၵႂႃႇၼႂ်းဝၢင်းႁူင်းႁဵၼ်းၼၼ်ႉ ၸင်ႇတေထူၺ်ႈၸႂ်လူမ်မႃးယဝ်ႉ။ ၵူၺ်းၵႃႈ ၵွၵ်းႁူဝ်မၼ်းၼၼ်ႉၵေႃႈ ဢမ်ႇႁူႉပေႉမႃးဝူၼ်ႉႁင်။
“ႁိူဝ်ႇ!! ၵမ်ႉၵႂႃႇၽႅၼ်ၶေႃးၼႂ်းႁူင်းႁဵၼ်းတေႁဵတ်းႁိုဝ်ၼၼ်ႉမႃႈ” ၼႅတ်ႈလႅၼ်ႈလူင်ၵႂႃႇတၢင်းႁူင်းႁဵၼ်းၼၼ်ႉဝႆးဝႃႈဝႆး လူမ်းမဝ်းတၼ်းပေႇၵႂႃႇမိူဝ်ႈလႂ်ပေႃးဢမ်ႇႁူႉယဝ်ႉ။
ၵႂႃႇႁၼ်လႅင်းမိူင်းသႂ် ယိပ်းၸိူၵ်ႈဝႆႉယူႇလႄႈ ၼႅတ်ႈၶဝ်ႈၵႂႃႇႁိမ်ဢဝ်ၸိူၵ်ႈၼၼ်ႉၵမ်းလဵဝ် ဢဝ်လႅင်းမိူင်းသႂ်ႇပေႃးတူၵ်းၸႂ် ၶုၼ်ႇဢီးမၼ်း သမ်ႉပေႃးဝူင်လူမ်ႉလူင်ၵႂႃႇၼႂ်းၵၢင်ပၢင်ႇႁူင်းႁဵၼ်းၼၼ်ႉယဝ်ႉၼႃႇ။
“ပီႈမႃးႁဵတ်းသင်လႃႇၼႆႉ!!..”
ၶမ်းလၢဝ်တဝ်ႉလုၵ်ႉၶိုၼ်ႈမႃးသေယဝ်ႉ ၶႂ်ႈလၢတ်ႈဢမ်ႇၶႂ်ႈလၢတ်ႈႁေ “ၵဝ်ၵေႃႈ မႃးတူၺ်းႁူင်းႁဵၼ်းၵူၺ်းဢိူဝ်ႈ.. မႂ်းမႃးႁဵတ်းသင်လႃႇ”
“ၶႃႈႁႃႉ..”
သဵင်လႅင်းမိူင်းသႂ်ယဵၼ်ၵႂႃႇ ၶမ်းလၢဝ်ၼႅတ်ႈယၵ်ႉတူၺ်းၼႃႈမၼ်းႁေ ဝူၼ်ႉယူႇၼႂ်းၸႂ် “ယႃပေလၢတ်ႈၼႃႈ မၼ်းတေမႃးႁဵတ်းလွင်ႈဢၼ်ၵဝ်ဝူၼ်ႉဝႆႉ”
“ၶႃႈမႃးလႄႇႁူင်းႁဵၼ်းၵူၺ်း ၶုၵ်းၸႂ်လႆႈၶိုၼ်း ႁူင်းႁဵၼ်းၵဝ်ႇယွၵ်းမိူဝ်ႈပူၼ်ႉ ဢမ်ႇထၢင်ႇဝႃႈ တေပဵၼ်တီႈပဵၼ်တၢင်းမႃးလႆႈလီတၢၼ်ႇၼႆႉ၊ ႁၼ်ႁူင်းႁဵၼ်းလီယူႇမိူၼ်ၼႆတႄႉ ပီႈၵေႃႈလႅပ်ႈတေသွၼ်လုၵ်ႈႁဵၼ်းလႆႈလီယူႇ”
ၶမ်းလၢဝ်ၸင်ႇလူမ်ၸႂ်မႃး ၵူၺ်းၵႃႈပႆႇၵတ်းၸႂ်လႆႈ “ဢဝ်မႃးႁဵတ်းႁင်လႃႇၸိူၵ်ႈၼၼ်ႉ..”
“ဢေႃႈ! မၼ်းမတ်ႉၽၵ်းတူႁူဝ်ႉဝႆႉ ၶႃႈၽုၺ်ႇဢွၵ်ႇႁေ လႆႈယိပ်းမႃးပႃးဢေႃႈၼႆႉ..”
“ဢေႃ.. ၸိူင်ႉၼၼ်ႁႃႉ!!” သမ်ႉပေႃးထူၺ်ႈၸႂ်လူမ်ဢွၵ်ႇမႃး သူႈ..သူႈ..
သွင်ၶႃၵေႃႈၶဝ်ႈၵႂႃႇၼင်ႈၼႂ်းႁူင်းႁဵၼ်းၶဝ်ၼၼ်ႉသေ
“ပီႈ!! ႁိူဝ်ႉၼႃႇၸွင်ႇၸႂ်ႈႁိုဝ်..”
“ဢိုမ်ႈ!” ၶမ်းလၢဝ်ယၵ်ႉတူၺ်းလႅင်းမိူင်းသႂ်သေယုမ်ႉၸူး “ၵူၺ်းၵႃႈ ႁိူဝ်ႉၵေႃႈ ဢဝ်ပူၼ်ႉမၼ်းၵႂႃႇလႆႈယူႇလူး” ႁႅၼ်မုင်ႈတူၺ်းတၢင်းၼႃႈႁူင်းႁဵၼ်းၼၼ်ႉသေယဝ်ႉ သိုပ်ႇလၢတ်ႈထႅင်ႈ “ၸိူင်ႉၼင်ႇၶဝ်ဝႃႈ မၼ်းတေပူၼ်ႉၵႂႃႇၵူၺ်း မိူၼ်ပဵၼ်ၶေႃႈၵႂၢမ်းလၢတ်ႈၽၢၼ်ႇႁူၵႂႃႇသေတႃႉ ၵူၺ်းၵႃႈ မၼ်းၵေႃႈပဵၼ်လွင်ႈဢၼ်ႁဝ်းတေလႆႈယွမ်းႁပ်ႉဝႃႈ မၼ်းၸႂ်ႈတေႉယဝ်ႉ၊ ပေႃးမႃးဝူၼ်ႉတူၺ်းၶိုၼ်း မိူဝ်ႈပူၼ်ႉမႃး လႆႈထူပ်းလွင်ႈသင်မႃးၼပ်ႉပေႃးဢမ်ႇလႆႈ၊ လႆႈႁႆႈၵွပ်ႈမၼ်းမႃးၵေႃႈ ဢမ်ႇတွင်းယဝ်ႉ မိူဝ်ႈၼၼ်ႉ မၼ်းၼၵ်းၼႃၼႃႇသေတႃႉ ၵူၺ်းၵႃႈ မိူဝ်ႈလဵဝ် မၼ်းၵေႃႈဢမ်ႇၸႂ်ႈလွင်ႈယၢပ်ႇယဝ်ႉလူး”
ဢဝ်လႅင်းမိူင်းသႂ်သမ်ႉပေႃးၶူဝ်ဢွၵ်ႇမႃးယဝ်ႉ “ၶႂ်ႈလၢတ်ႈယူႇၵူၺ်းၵႃႈ ဢမ်ႇတွင်းလႆႈၼႆၼႃ..” လႄႈသဵင်ၶူဝ်ၼၼ်ႉၵေႃႈႁၢႆၵႂႃႇ “ၶႃႈတေဢဝ်ပူၼ်ႉမၼ်းၵႂႃႇလႆႈတေႉယူႇႁႃႉ!!”
“ဢမ်ႇလႆႈ!”
“ၼၼ်ႉယဝ်ႉ မၼ်းယၢပ်ႇတေႉဢိူဝ်ႈ”
ၶမ်းလၢဝ်ၵေႃႈ မႄးဢဝ်ၽႃႇမိုဝ်းမၼ်းတွႆႇသႂ်ႇလႅင်းမိူင်းသႂ်ႁေၵမ်းၼိုင်ႈယဝ်ႉ “ဢမ်ႇလႆႈၵေႃႈတေဝႃႈဢမ်ႇလႆႈၼႆၵႃႈ ဢမ်ႇမေႃတွပ်ႇမေႃထဵင်ပိူၼ်ႈၽွင်ႈႁႃႉ!!”
“လၢႆးတွပ်ႇလၢႆးထဵင်ၼႆႉ ပီႈၵူၺ်းမေႃၸႂ်ႉ..”
“ၼႆႉႁမ်ႉပဵၼ်ႁင်လႃႇ ထဵင်ယူႇၼႆႉ..”
သဵင်ၶႃၵေႃႈတဵတ်ႇယဵၼ်ၵႂႃႇၵႅပ်ႉၼိုင်ႈသေယဝ်ႉ ၶမ်းလၢဝ်ၸင်ႇလၢတ်ႈၸူး
“တေဝူၼ်ႉထိုင်ၵေႃႈဢမ်ႇပဵၼ်သင်၊ တေႁွင်ႉႁႆႈၵေႃႈ ဢမ်ႇပဵၼ်သင် ၵူၺ်းၵႃႈ ယႃႇပေၶတ်းၸႂ်လိုမ်းမၼ်းလႄႈ မၼ်းလိုမ်းဢမ်ႇလႆႈ ယွၼ်ႉႁဝ်းယင်းတိုၵ်ႉမီးႁူဝ်ၸႂ်ယူႇၼၼ်ႉၼႃႇ ၵူၺ်းၵႃႈ ၶဝ်တႄႉတေလိုမ်းႁဝ်းၵႂႃႇယဝ်ႉ၊ ဢမ်ႇပွၵ်ႈမႃးယဝ်ႉ မၼ်းပဵၼ်သၽႃႇဝၶူင်းၵၢင်ၼႆႉၵူၺ်းလူး”
“ၶႃႈတေလႆႈမီးႁႅင်းၸႂ်မႃးယူႇႁႃႉ ဢမ်ႇၼၼ်တေလႆႈႁွင်ႉႁႆႈ”
“ဢိူဝ်ႈ! ၵဝ်ဢမ်ႇလၢတ်ႈယဝ်ႉဝႃႈ..”
လႅင်းမိူင်းသႂ်ၵေႃႈ ယၵ်ႉတူၺ်းၶမ်းလၢဝ် လူၺ်ႈသီၼႃႈဢၼ်သဝ်ႈမွင်ဝႆႉၼၼ်ႉသေ “ၸူမ်းယဝ်ႉၼႃႈပီႈ ၸွႆႈပူၵ်းႁႂ်ႈၶႃႈတိုၼ်ႇမႃးၶိုၼ်း”
“မိူဝ်ႈၵႆႈၼႆႉတိုၵ်ႉၼွၼ်းလပ်းယူႇႁႃႉ..”
ယၢမ်းၵၢင်ၶမ်ႈလပ်းသိင်ႇၸွမ်ႉႁွမ်ႉ ၶမ်းလၢဝ်ႁၢင်ႈႁႅၼ်းလိၵ်ႈမၼ်းယူႇၼၼ်ႉ ၸင်ႇသမ်ႉႁၼ်မႅၼ်ႈၺႃး ပပ်ႉတႅမ်ႈလိၵ်ႈဢွၼ်ႇပပ်ႉၼိုင်ႈ ၶႂ်ႈၵဝ်ႇဝႆႉလႄႈ ပဵၼ်ပပ်ႉဢၼ်မၼ်းၵႆႉႁၼ်ယူႇ ၵူၺ်းၵႃႈဢမ်ႇတွင်းလႆႈဝႃႈပဵၼ်ပပ်ႉၽႂ် ၼႂ်းၸႂ်ၵေႃႈမိူၼ်ၶႂ်ႈႁူႉၶႂ်ႈႁၼ်မႃးယဝ်ႉယိပ်းတူၺ်း ၸင်ႇတေႁၼ်ၼႂ်းပပ်ႉၼၼ်ႉ ပဵၼ်လိၵ်ႈတႅမ်ႈထိုင်လႅင်းမိူင်းသႂ်ယဝ်ႉ။
“ဢၢႆႈၼွင်ႉ!! သႅင်ၼူၼ်း..” ႁွင်ႉပေႃးတၢၼ်ႇၵူၼ်းႁၼ်ၽီယဝ်ႉ။
“ပီႈ!! ပဵၼ်ႁင်လႃႇ..” ၼႅတ်ႈလႅၼ်ႈမႃးၸူးၵမ်းလဵဝ်။
“ၼႆႉ!..ပပ်ႉသႅင်ၼူၼ်း..”
လႅင်းမိူင်းသႂ်ၼႅတ်ႈၸၵ်ႉဢၢၼ်ႇၵမ်းလဵဝ်ယဝ်ႉ။ ၼႂ်းပပ်ႉၼၼ်ႉၵေႃႈ တႅမ်ႈထိုင် လိၵ်ႈဢၼ်မၼ်းၶႂ်ႈယိုၼ်ႈၽၢၵ်ႇလႅင်းမိူင်းသႂ် ဢၼ်တႅမ်ႈလိၵ်ႈတႆးဢမ်ႇပီႇ သမ်ႉပေႃးလႆႈၸူၺ်ႉဢၢၼ်ႇဢဝ်ၼၼ်ႉယဝ်ႉ၊ လႅင်းမိူင်းသႂ်ၵေႃႈ တင်းယုမ်ႉတင်းဢၢၼ်ႇၵႂႃႇ။ ၵူၺ်းၵႃႈ ယိုင်ႈဢၢၼ်ႇ ယိုင်ႈလူငၢႆႈမႃး လိၵ်ႈမၼ်းၵေႃႈတႅမ်ႈၽဵၼ်ႈမႃး ၵူၼ်းဢၢၼ်ႇမၼ်းၵေႃႈဝႆးမႃး၊ မိူဝ်ႈလူၵႂႃႇၼႃႈလိုၼ်းသုတ်းၼၼ်ႉ ၸင်ႇသမ်ႉမီးလွင်ႈဢၼ်မၼ်းဢမ်ႇထၢင်ႇတေလႆႈမႃးလူၺႃး။ ဢမ်ႇမိူၼ်လိၵ်ႈဢၼ်လူမႃးၸိူဝ်းပုၼ်ႉယဝ်ႉ ၼႂ်းလိၵ်ႈၼၼ်ႉတႄႉ..
မၢၵ်ႇတႅၵ်ႇ မႄႈတၢႆ မိူဝ်းႁိူၼ်း ၵၢင်ၶမ်ႈ လပ်းသိင်ႇ ၵူၼ်းလၢတ်ႈၵႂၢမ်းမၢၼ်ႈ ၼိုင်ႈ..သွင်…သၢမ်…သီႇ…ႁႃႈ..ႁူၵ်း..ၸဵတ်း..ပႅတ်ႇ… ထွတ်ႇၶူဝ်း
လိၵ်ႈၼၼ်ႉၵေႃႈသုတ်းၵႂႃႇ လႅင်းမိူင်းသႂ်ၵၢင်းသမ်ႉပေႃးသၼ်ႇတိုၼ်းတိုၼ်း ၼမ်ႉတႃပေႃးယိုင်ႈႁူၺ်ႇမႃး ပႃးလွင်ႈၸဵပ်းၸႂ်ဢၼ်ၵႅၼ်းၸီႈထိုင်ၼႂ်းၸႂ်လိုၵ်ႉလိုၵ်ႉၼၼ်ႉၵမ်းလဵဝ်ယဝ်ႉ။
ၼင်ႇမေႃယႃႁူႉႁေ လၢတ်ႈၼႄၶမ်းလၢဝ်ၶဝ်ၼၼ်ႉတႄႉ ဢမ်ႇႁူႉဝႃႈသႅင်ၼူၼ်းၶဝ်လႆႈထူပ်းလွင်ႈသင်တေႉတေႉ ၵူၺ်းႁၼ်ဝႃႈ မႄႈတၢႆယူႇတီႈၼိူဝ်လေႃႉ မိူၼ်တေၺႃးမၢၵ်ႇတႅၵ်ႇလႄႈ လႆႈႁၼ်သႅင်ၼူၼ်းၼွၼ်းယူႇၶၢင်ႈတၢင်းၼၼ်ႉၵူၺ်း၊ ဢၼ်သႅင်ၼူၼ်းလႆႈယွင်ႇၵႂႃႇၼၼ်ႉ တေပဵၼ်ယွၼ်ႉႁၼ်မႄႈတၢႆလႄႈပဵၼ်ၼႆသေ ထၢင်ႇၵၼ်ၵႂႃႇၸိူင်ႉၼၼ်ၵူၺ်းယူႇ။
မိူဝ်ႈလႆႈႁၼ်ၶေႃႈၵႂၢမ်းၼႂ်းလိၵ်ႈၼႆႉ သမ်ႉဝႃႈဢမ်ႇတႅမ်ႈတဵမ်သေတႃႉ မၼ်းၵေႃႈပွင်ႇၸႂ်မႃးၵမ်းလဵဝ်ၼၼ်ႉယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ
