ၸိုၼ်ႇႁႅင်း တွၼ်ႈသၢမ်သိပ်း

တွၼ်ႈသၢမ်သိပ်း

ၶိင်ႇၶၢဝ်းႁႅင်ႈႁွင် သဵင်ႁိင်ႇႁွၵ်ႈဝူဝ်းၵွင်းၵွင်းၵႅင်းၵႅင်း ဢဝ်ႁႅင်းဢီးမၢၵ်ႇလေႃႉ ပၼ်ႇလူင်ၵႂႃႇၼႂ်းယုမ်းၼႂ်းယွမ်ႇ တီႈႁၢင်ႇၵႆၵူၼ်းၼၼ်ႉလွႆးလွႆး၊ ၵူၼ်းႁေႃႈလေႃႉဝူဝ်းၼၼ်ႉၵေႃႈ ပႃးတင်းၶွၼ်ႉသေ ၽတ်ႉဝူဝ်းမၼ်းလူင်ၵႂႃႇတိၵ်းတိၵ်း။ သႅင်ၼူၼ်းၼင်ႈတၢင်းလင်ၼၼ်ႉတႄႉ ႁႅၼ်မုင်ႈတူၺ်းၼႂ်းထိူၼ်ႇပႃႇမႆႉ ဢၼ်မၼ်းလႄႈတင်းမႄႈလတ်းၽႃႇလူင်ၵႂႃႇၼၼ်ႉ ၸိုင်ပေႉၵႅၼ်ႇငိၼ်းငဝ် ၼူၵ်ႉတွင်ႉလေႃးၵွပ်ႈၸပ်းၵိင်ႇမႆႉႁႅင်ႈ ႁွင်ႉၶၢၼ်ပၢဝ်ႇ “တွင်ႉလေႃး…တွင်ႉလေႃး…” သမ်ႉပေႃးၶႂ်ႈပဵၼ်ၼူၵ်ႉသေ ႁွင်ႉၸိုဝ်ႈ “လႅင်းမိူင်း…လႅင်းမိူင်း..”ၼႆယဝ်ႉ။

လူမ်းထူဝ်းထွင်းမႃးၼိုင်ႈၵမ်း ဢၢႆႁွမ်မွၵ်ႇထိူၼ်ႇမွၵ်ႇၶိူဝ်း တွင်ႈမႃးထိုင်ၶူႈၼင် သုတ်ႇၼူမ်မႅၼ်ႈၺႃး ပႃးဢဝ်ၸႂ်ၶႂ်ႈပိတ်းမႃးပၵ်းသႂ်ႇၼိူဝ်ဝိၼ်ႇႁူၼၼ်ႉယဝ်ႉလူး၊ ၽိူဝ်မႆႉၽိူဝ်တွၵ်ႇလူၼ်ႇႁူင်ႈတူၵ်းလိၼ် ၼႃႈမိူင်းမူဝ်းမွင်ၼႃႇၵေႃႈ ၼႂ်းထိူၼ်ႇၼႂ်းၶိူဝ်းတႄႉ ၼင်ႇႁၢင်ႈလီသိူဝ်းဝႆႉယူႇ မွၵ်ႇၶမ်းၵီႈၸွမ်းလမ်းမႆႉ ပဵၼ်သွႆႉယွႆႉယွတ်ႇႁူင်ႈၸွမ်းၵၢၼ်ႈၸွမ်းဝႂ် ႁၢင်ႈလီႁၢင်ႈငၢမ်း။

မိူဝ်ႈထိုင်ၼႂ်းပႃႇမႆႉဢုမ်ႇသုမ်ႇၼႃ သွင်ၶႃမႄႈလုၵ်ႈၵေႃႈ ၽႄၵၼ်ၵႂႃႇႁႃၽၼ်းမႆႉၽၼ်းၽိုၼ်း ၵေႃႉတီႈၵေႃႉတၢင်း ႁင်းၽႂ်ႁင်းမၼ်းယဝ်ႉ။ ၽွင်းသႅင်ၼူၼ်း တိုၵ်ႉၽၼ်းမႆႉယူႇတူၵ်ႉတူၵ်ႉႁင်းၵူၺ်းၼၼ်ႉ ဢမ်ႇတၼ်းႁူႉတၼ်းႁၼ်သင်ၼၼ်ႉ ၸင်ႇသမ်ႉလႆႈငိၼ်းသဵင်လင်မၢၵ်ႇတႅၵ်ႇလူင်မေႃးမႃး ပလိင်ႈ!!… ၵိုင်ႈ..ၵိုင်ႈ!!. လင်ယွၼ်ႈတွင်ႈထိုင်ၼင်လိၼ်မိူင်းပေႃးသၼ်ႇလူင်ၵႂႃႇသဵင်ႈ။ မိူဝ်ႈငိၼ်းၼင်ႇၼၼ် သႅင်ၼူၼ်းၼၼ်ႉတႄႉ ပႅတ်ႈၽိုၼ်းမၼ်းသေ ဢႅၼ်ႇလႅၼ်ႈၽႃႇယုမ်းလတ်းၶိူဝ်းလူင်ၵႂႃႇၸူးတၢင်းသဵင်မၢၵ်ႇလင်မေႃးၼၼ်ႉယဝ်ႉ။

ဢမ်ႇၸမ်ဢမ်ႇၵႆ မုင်ႈႁၼ်မႄႈၼွၼ်းၵူဝ်ႈဢိူၵ်ႇလိူတ်ႈယူႇယဝ်ႉလႄႈ ႁႅင်းသမ်ႉပေႃးဢူၼ်ႈ လူမ်ႉလူင်းၵႂႃႇၵမ်းလဵဝ် တႃႇၸူးႁွတ်ႈထိုင်မႄႈမၼ်းလႆႈၼၼ်ႉၵေႃႈ သမ်ႉပေႃးလႆႈၵၢၼ်းထူၵၢၼ်းထူၵႂႃႇယဝ်ႉ၊ တူဝ်ဢွၼ်ႇမၼ်းၼၼ်ႉ လႆႈၶဝ်ႈၸူးၸမ်မႄႈ ဢၼ်ယင်းတိုၵ်ႉၶတ်းၸႂ်ထူၺ်ႈၸႂ်ယူႇလွႆးလွႆးသေယဝ်ႉ မိုဝ်းမၼ်းၼၼ်ႉၵေႃႈယိပ်းဢဝ်မိုဝ်းမႄႈသေ လူမ်းထူၺ်ႈၸႂ်မႄႈလႆႈၵိုတ်းၵႂႃႇယဝ်ႉ။

သႅင်ၼူၼ်းၼၼ်ႉတႄႉ ဢမ်ႇၸၢင်ႈႁဵတ်းႁိုဝ် လိူဝ်သေၶဝ်ႈမႃးၵွတ်ႇဢဝ်မႄႈမၼ်းယဝ်ႉ ႁွင်ႉႁွင်ႉႁႆႈႁႆႈယူႇၼႂ်းၵၢင်ပႃႇထိူၼ်ႇ ဢၼ်မီးၼူၵ်ႉဢွၼ်ႇၼႆႇဢွၼ်ႇတႆႇငွၵ်ႈၸွမ်းတူၺ်း မီးတွင်ႉလေႃးႁွင်ႉၶၼ်မေႃး ထႅင်ႈႁႅင်းသဵင်ႁွင်ႉႁႆႈၵႂႃႇ။ ႁႆႈၵႃႈႁိုဝ်ၵေႃႈဢမ်ႇဢိမ်ႇ ၼမ်ႉတႃၼၼ်ႉၵေႃႈ တေႃႈဢမ်ႇႁၼ်တေမူတ်းလႆႈ ထိုင်ဝၼ်းထၢၼ်ႈပေႃးၶမ်ႈယဝ်ႉလူး၊ ၶိင်ႇၶၢဝ်းႁႃႁိူၼ်း ၼူၵ်ႉၶဝ်ၵေႃႈၶဝ်ႈႁႃႁၢင်း ၼၢင်းယိင်းဢွၼ်ႇၵေႃႉၵူၼ်းလဵဝ်ၵေႃႈ ႁူႉၵႃႈတေလႆႈဝၢႆႇပွၵ်ႈၶိုၼ်း ၸုင်ၸၼ်လၢၵ်ႈဢဝ် တူဝ်မႄႈမၼ်း တၢင်ႇလေႃႉဢွၼ်ႇၶဝ်ၼၼ်ႉ မိူဝ်းၵႂႃႇႁင်းမၼ်းလွႆးလွႆး ၼႂ်းၵၢင်တၢင်း ႁူၵ်ႉႁၢမ်းလူင်ၼၼ်ႉၵႂႃႇယဝ်ႉ။

သဵင်လေႃႉဢွတ်ႇဢႅတ်ႇဢွတ်ႇဢႅတ်ႇ ဝူဝ်းသူဝ်းလူင်သွင်တူဝ်ၼၼ်ႉၵေႃႈ ၼိမ်ယဵၼ်လူင်မိူဝ်းႁႃႁိူၼ်းၵႂႃႇလွႆးလွႆး ၸဝ်ႈမၼ်းဢမ်ႇမီးႁႅင်းႁေႃႈၵေႃႈ သွင်တူဝ်တႄႉႁူႉမေႃတွင်းတၢင်းသေ ဢွၼ်မိူဝ်းၵႂႃႇယဝ်ႉ။

ၼိူဝ်သဵၼ်ႈတၢင်းၼၼ်ႉ လႆႈငိၼ်းသဵင်တိၼ်ၵူၼ်းမေႃးမႃး ၸင်ႇသမ်ႉမႃးငွၵ်ႈတူၺ်း လေႃႉဝူဝ်းၶဝ် ႁၼ်ယိင်းသၢဝ်ၼင်ႈငဝ်ၸုၼ်းၸုၼ်းယူႇႁင်းၵူၺ်းလႄႈ ၽူႈယိင်းထဝ်ႈၼွၼ်းတၢႆယူႇႁဵတ်းၼၼ်ၼၼ်ႉ ၵူၼ်းမွၵ်ႈၸဵတ်းပႅတ်ႇၵေႃႉ လၢတ်ႈၵႂၢမ်းမၢၼ်ႈဢုပ်ႇၵၼ်သေ မႃးႁႄႉၼႃႈလေႃႉယဝ်ႉၵိုတ်းၵႂႃႇ လၢၵ်ႈၸၼ်ဢဝ်သႅင်ၼူၼ်းလူင်းလေႃႉမႃးသေ ႁွင်ႉၵႂႃႇၼႂ်းယုမ်းၶၢင်ႈတၢင်းၼၼ်ႉယဝ်ႉ ႁၢင်ႈႁႅၼ်းထွတ်ႇၵူၼ်ၶဝ် သႅင်ၼူၼ်းၶတ်းၸႂ်ဢႅၼ်ႇလႅၼ်ႈပၢႆႈ ၵူၺ်းဢမ်ႇပေႉႁႅင်းလႆႈလႄႈ သမ်ႉဝႃႈၶတ်းၸႂ်ပိတ်ႉပိတ်ႉထၢၵ်ႇထၢၵ်ႇတဵၼ်ႈၽိုတ်ႉဢီးတၢၼ်ႇႁိုဝ်ၵေႃႈ ဢမ်ႇပေႉႁႅင်းၵူၼ်းၼမ်လႆႈ။

ႁွင်ႉသႅၼ်ႇယွၼ်းတၢင်းၸွႆႈထႅမ်ယူႇၵေႃႈ ဢမ်ႇမီးၽႂ်ႁူႉငိၼ်း၊ တိူင်ႇၵၢဝ်ႇၾႃႉၾီယူႇၵေႃႈ ဢမ်ႇမီးၽႂ်မႃးၸွႆႈ ၵူၺ်းလႆႈၶၢမ်ႇ ဢၢႆႈၵူၼ်းယွၵ်းၸိူဝ်းၼၼ်ႉ ပူၼ်ႉပႅၼ်လူလၢႆ ၽဝၸၢတ်ႈပၢၼ်သၢဝ်မၼ်းလႄႈ ပၢၼ်ပဵၼ်ၽူႈယိင်းၵေႃႉၼိုင်ႈၼၼ်ႉ လႆႈၶၢမ်ႇတၢင်းဢၢႆ ၽုၵ်ႇၽင်ႁွႆးၸဵပ်းၼႂ်းၸႂ်မၼ်းၵႂႃႇတေႃႇၸူဝ်ႈယဝ်ႉ။ ၶမ်ႈၶိုၼ်းလပ်းသိင်ႇလူင်ၼၼ်ႉတႄႉ လႆႈပဵၼ်ပိုၼ်းႁုၵ်ႉႁၢႆႉလူင်သႅင်ၼူၼ်း တင်းၸူဝ်ႈၸၢတ်ႈပၢၼ်ၵေႃႈ ဢမ်ႇမီးဝၼ်းမွတ်ႇႁၢႆၵႂႃႇလႆႈယဝ်ႉ။

ယၢမ်းၵၢင်ၼႂ်မိူင်းပႆႇပၢင်ႇ မေႃယႃဢွၼ်တိုၼ်းၵေႃႈ ႁေႃႈတင်းလူတ်ႉၶိူင်ႈ ပတ်ႉထူဝ်းဢဝ်ၽုၼ်ႇမုၵ်ႉပိဝ်လူင်ၵႂႃႇတၢင်းလင်ၵႂၼ်းပေႃးယုၺ်းလူင်ဝႆႉ၊ လူတ်ႉၶိူင်ႈၼၼ်ႉၵေႃႈ လႆႈၵိုတ်းၵႂႃႇတီႈလေႃႉဢၼ်ဢမ်ႇမီးဝူဝ်းယဝ်ႉလႄႈ ပိၼ်ႈပူၵ်းယူႇႁိမ်းတၢင်း သမ်ႉမီးပႃးၵူၼ်းၼွၼ်းတၢႆမိူဝ်ဢိူၵ်ႇၵူဝ်ႈၽုၼ်ႇမုၵ်ႉဝႆႉယူႇ၊ ႁဵတ်းႁႂ်ႈမၼ်းၵိုင်ႉၵၢင်ႉတူၵ်းၸႂ်ၵႂႃႇၵမ်းလဵဝ် မိူဝ်ႈၽိုၼ်ႉတူဝ်တူၺ်း ပဵၼ်မႄႈသႅင်ၼူၼ်းၶဝ်ၼႆ၊ တီႈဢမ်ႇၸမ်ဢမ်ႇၵႆၼၼ်ႉၵေႃႈ လႆႈႁၼ်ၵူၼ်းယိင်းဢွၼ်ႇ ၼွၼ်းမိူၼ်ၵူၼ်းတၢႆဝႆႉယူႇၶၢင်ႈတၢင်းဝႆႉယူႇယဝ်ႉၼႃႇ၊ မၼ်းၸင်ႇၶဝ်ႈၵႂႃႇတူၺ်းၸမ် ဢဝ်သႅင်ၼူၼ်းတူၵ်းၸႂ်တိုၼ်ႇၵူဝ် ၶုၼ်ႇထိပ်ႇဢီးမေႃယႃ ပေႃးပိၼ်ႈလူမ်ႉလူင်ၵႂႃႇယဝ်ႉ။

မေႃယႃလႆႈႁၼ် ႁၢင်ႈၽၢင်သႅင်ၼူၼ်း ႁူဝ်ယုင်ႈဢၢဝ်ႇယၢဝ်ႇ သိူဝ်ႈၶူဝ်းယွၵ်းၵွႆ ၼိူဝ်ႉၼင်မၢၼ်ႉၵမ်ႇ မိူၼ်တေၵူဝ်မေႃယႃၼႃႇလႄႈ တင်းသၼ်ႇတင်းၶူတ်းတူဝ်မၼ်း ၼင်ႈသုတ်ႉထွႆလင်ၵႂႃႇတိၵ်းတိၵ်း၊ မေႃယႃ တေၶဝ်ႈၵႂႃႇၸမ်ၵေႃႈဢမ်ႇလႆႈ လၢတ်ႈတေႃႇၵေႃႈ လႆႈငိၼ်းသဵင် ဢၼ်မေႃးယူႇၼႂ်းၵူင်ၶေႃးမၼ်းဢွၵ်ႇမႃးဝႃႈ “ၸွႆႈဢိၼ်ႉၼိုင်ႈ ၸွႆႈၶႃႈၽွင်ႈ” ႁွင်ႉမေႃးယူႇၸိူင်ႉၼၼ်တိၵ်းတိၵ်းၵူၺ်း။

မေႃယႃၵေႃႈ ၼင်ႇၵႃႈႁဵတ်းလႆႈ ၵပ်းၸၢၵ်ႈလၢတ်ႈဝေႃး ပွင်ႇၶၢဝ်ႇမိူဝ်းပၼ်ၵႂႃႇတီႈလုင်းၵၢင်ႉလုင်းႁဵင်ၶဝ် ႁႂ်ႈၵူၼ်းဝၢၼ်ႈဢွၼ်ၵၼ်မႃးၸွႆႈၵၼ်ၵႂႃႇယဝ်ႉ။

ႁိူၼ်းသုမ်ႉၶႃးဢွၼ်ႇၼႃႈႁိူၼ်းၼၢႆးၶမ်းလႅင်ၶဝ်ၼၼ်ႉၵေႃႈ သဵင်ၵူၼ်းပၼ်းၸွင်ႇၸွင်ႇလူင်ဝႆႉယဝ်ႉ၊ ပုၼ်ႈတႃႇသႅင်ၼူၼ်းၼၼ်ႉတႄႉ မိူၼ်ဢမ်ႇႁူႉဢမ်ႇႁၼ် ၼင်ႈငွမ်ယူႇၼႂ်းၸွၵ်ႉၼၼ်ႉတိၵ်းတိၵ်းၵူၺ်း၊ ၽႂ်လၢတ်ႈတေႃႇၵေႃႈသုတ်ႉပၢႆႈ ၽႂ်ၵေႃႈဢမ်ႇႁတ်းၶဝ်ႈၸမ်မၼ်းသေၵေႃႉယဝ်ႉ။

ၽွင်းၶမ်းလၢဝ်တိုၵ်ႉၼွၼ်းယူႇလႄႈ မဝ်းလဝ်ႈပႆႇၸၢႆႇၼၼ်ႉ ၸင်ႇသမ်ႉမီးသဵင်ၾူင်းမေႃးမႃးႁိမ်းႁူမၼ်းလႄႈ တၢဝ်းဢဝ်မႃးသေယဝ်ႉ “ႁလူဝ်..”

“ၼႆႉၸွင်ႇၸႂ်ႈမေႃသွၼ်ၶမ်းလၢဝ်ႁႃႉ!!” သဵင်ဢၼ်ယၢမ်ႈငိၼ်း မေႃယႃဢွၼ်တိုၼ်း။

“ဢိုမ်ႈ..” တႃၵေႃႈဢမ်ႇမိုၼ်းသဵင်တႄႉတွပ်ႇလၢတ်ႈၵႂႃႇယူႇ။

“သူ..ပွၵ်ႈမႃးၶိုၼ်းလႆႈယဝ်ႉၼႃႈ မိူဝ်ႈလဵဝ် သႅင်ၼူၼ်းလူဝ်ႇသူတေႉတေႉဢိူဝ်ႈ”

“သႅင်ၼူၼ်းပဵၼ်သင်!”

“မႄႈၶဝ်လူႉယဝ်ႉ…ၸဵဝ်းမႃးလႄႈၼႃႈ”

မိူဝ်ႈၶမ်းလၢဝ်လႆႈငိၼ်းၼင်ႇၼၼ် ၸႂ်ၶေႃးပေႃးဢမ်ႇလီလူင်မႃးယဝ်ႉ မၼ်းၼႅတ်ႈႁွပ်ႇဢဝ်ၶူဝ်းမၼ်းသႂ်ႇထူင်ပိူဝ်ႉသေ ဢဝ်တင်းလူတ်ႉၶိူင်ႈၼွင်ႉၸၢႆးမၼ်းၼၼ်ႉ ႁေႃႈဢွၵ်ႇႁိူၼ်းမႃးၵူၺ်း သမ်ႉပေႃးဢမ်ႇတၼ်းလႆႈသူင်ႇသင်ၽႂ်ယဝ်ႉၼႃႇ။

မိူဝ်ႈၼႆႉသမ်ႉမႅၼ်ႈဝၼ်းလိူၼ်ႁႃႈလပ်းလႄႈ ထုင်းဢၼ်ပူႇမွၼ်ႇယၢမ်ႈဢွၼ်ႁဵတ်းမႃးၼၼ်ႉဝႃႈ ဢမ်ႇပၼ်ပူၼ်ႉၵူၼ်းတၢႆၶၢမ်ႈလိူၼ်ၼႆလႄႈ ၶဝ်ၵေႃႈလႆႈပူၼ်ႉၵႂႃႇယဝ်ႉ။ ၶမ်းလၢဝ်ၼၼ်ႉတႄႉ ႁိုဝ်တၼ်းၶိုတ်းပိူၼ်ႈပူၼ်ႉၶၢပ်ႈတူဝ်မႄႈသႅင်ၼူၼ်းၶဝ်ၼၼ်ႉယဝ်ႉ မၼ်းႁွတ်ႈထိုင်ၵေႃႈ မႅၼ်ႈၽွင်းပိူၼ်ႈၵႂႃႇသူင်ႇၵူၼ်းတၢႆတီႈၼႂ်းပႃႇႁဵဝ်ႈၼၼ်ႉယဝ်ႉၼႃႇ၊ ၶဝ်ႈႁိူၼ်းမႃးၵေႃႈ သမ်ႉပေႃးဢမ်ႇႁၼ်ၽႂ်၊ ၵူၺ်းငိၼ်းသဵင် ႁွင်ႉယူႇလွႆးလွႆးၼႂ်းၵူင်ၶေႃးၼၼ်ႉဝႃႈ “မႄႈ..မႄႈ…မႄႈ..” တူဝ်ၵူၼ်းသမ်ႉ မီးယူႇၼႂ်းၸွၵ်ႉၼၼ်ႉယဝ်ႉ။

ၶမ်းလၢဝ်လႆႈႁၼ်သႅင်ၼူၼ်း ၼင်ႈႁႆႈယူႇႁင်းၵူၺ်းၸိူင်ႉၼၼ်ၵေႃႈ ၼႅတ်ႈၶဝ်ႈၵႂႃႇၵွတ်ႇဢဝ်မၼ်းယူႇ၊ ဢမ်ႇထၢင်ႇ သႅင်ၼူၼ်းတေသုတ်ႉထွႆလင်ၵႂႃႇ ၼင်ႇဝႃႈၵူဝ်မၼ်းၼႃႇၼႃႇၼၼ်ႉယဝ်ႉ။

“သႅင်ၼူၼ်း ၼႆႉပဵၼ်ပီႈၶမ်းလၢဝ်ဢိူဝ်ႈ ပီႈမႃးယဝ်ႉၼႃႈ ဢမ်ႇပဵၼ်သင်ယဝ်ႉၼႃ”

ၶတ်းၸႂ်ၶျေႃးဝွၼ်းၵႂႃႇလွႆးလွႆးယူႇ ၵူၺ်းၵႃႈ သႅင်ၼူၼ်းၼၼ်ႉ ယိုင်ႈၶႅၼ်းသုတ်ႉပၢႆႈမၼ်းၵႂႃႇတိၵ်းတိၵ်း၊ မၼ်းပေႃးဢမ်ႇႁူႉတေလႆႈႁဵတ်းႁိုဝ်ယဝ်ႉ၊ ဢွၵ်ႇႁိူၼ်းမႃးၼင်ႈပႂ်ႉယူႇတၢင်းၼွၵ်ႈႁိူၼ်းၼၼ်ႉသေ ယၵ်ႉတူၺ်းႁိမ်းႁွမ်းႁိူၼ်း ဢၼ်ငႅဝ်ငဝ်ၼႃႇၼႃႇ ပႃးတင်းသၢႆတႃ ဢၼ်ၼႄႁၼ်ဝႃႈ “မိူဝ်းဢဝ်လိူၼ်ပၢႆၵူၺ်း ၵူႈလွင်ႈမၼ်းတၼ်းလႅၵ်ႈလၢႆႈၵႂႃႇထိုင်တၢၼ်ႇၼႆႉယဝ်ႉႁႃႉ..” ၼင်ႈဢိင်ၽႃသေ တင်းႁိူဝ်ႉတူဝ်ႁိူဝ်ႉၸႂ်ၼႃႇလႄႈ လပ်းမွႆႈၵႂႃႇတီႈၼၼ်ႈယဝ်ႉ။

ၵူၼ်းဝၢၼ်ႈၶဝ်ၵေႃႈ ဢွၼ်ၵၼ်ၵႂႃႇသူင်ႇမႄႈသႅင်ၼူၼ်းၶဝ်ယဝ်ႉ ၶိုၼ်းပွၵ်ႈႁိူၼ်းၵႂႃႇႁင်းၽႂ်ႁင်းမၼ်းလႄႈ ၵူၼ်းဢၼ်ယူႇၼႂ်းဝၢၼ်ႈၵမ်ႈၽွင်ႈၵေႃႈ ဢွၼ်ၵၼ်မႃးၸွႆႈၽဵဝ်ႈၸွႆႈသိမ်းသေ ပွၵ်ႈမိူဝ်းၵႂႃႇႁင်းၽႂ်ႁင်းမၼ်း၊ ၶမ်းလၢဝ်ၼၼ်ႉတႄႉၵေႃႈ ပိူၼ်ႈမႃးပိူၼ်ႈမိူဝ်းၵႂႃႇယဝ်ႉ မၼ်းယင်းဢမ်ႇတိုၼ်ႇလူးၵွၼ်ႇ ၵၢင်ဝၼ်းၸူမ်လပ်ႉလွႆၵႂႃႇ မၼ်းၸင်ႇတေတိုၼ်ႇမိုၼ်းတႃမႃး ႁၼ်ၼႂ်းႁိူၼ်းၼၼ်ႉသမ်ႉပေႃးလပ်းသိင်ႇၽိုတ်းၽိုတ်း မီးၵူၼ်းႁိုဝ်ဢမ်ႇမီးၵူၼ်းၵေႃႈဢမ်ႇႁူႉ ယဵၼ်သီႇသီႇလူင်ဝႆႉ ၵမ်ႈၽွင်ႈပေႃးၶီႈယၢၼ်ႈတင်းတေဢမ်ႇႁတ်းၶဝ်ႈလူးၵွၼ်ႇ ၼင်ႇဝႃႈမၼ်းမီးၽီမႄႈသႅင်ၼူၼ်းၶဝ်ဝႆႉယူႇၼၼ်ႉယဝ်ႉ။

ၶမ်းလၢဝ်ၵေႃႈ ပႆၶဝ်ႈၵႂႃႇၼႂ်းလပ်းသိင်ႇၼၼ်ႉသေ ၶိုၼ်ႈမိူဝ်းၵႂႃႇၼိူဝ်ၶဵင်ႇၽြႃး လၢမ်းလိမ်းတၢဝ်းႁႃးၾႆးၶိတ်ႇလႄႈၾႆးတဵၼ်းၼၼ်ႉယဝ်ႉ ၸပ်းတဵၼ်းပၼ်ၵႂႃႇ။ ႁႃငွႆးၾႆးသေၸပ်းသႂ်ႇ ယဝ်ႉၵေႃႈ ၵႂႃႇၼင်ႈယူႇႁိမ်းသႅင်ၼူၼ်းတီႈဢမ်ႇၸမ်ဢမ်ႇၵႆ ၼင်ႈၼိမ်ယူႇႁဵတ်းၼၼ်ၵူၺ်း။

မိူဝ်ႈတိုၵ်ႉၼင်ႈႁေတူၺ်းသႅင်ၼူၼ်းယူႇၼၼ်ႉ ၸင်ႇသမ်ႉမီးသဵင်တိၼ်လႄႈ သဵင်တွႆႇၽၵ်းတူ ႁွင်ႉၸူးလူၺ်ႈသဵင်ၵူၼ်း “ၶမ်းလၢဝ် ၸွင်ႇယူႇတၢင်းၼႂ်းႁႃႉ!”

“ပီႈမေႃႁႃႉ ၶဝ်ႈမႃးလႄႈ..”

မိူဝ်ႈမေႃယႃၶဝ်ႈမႃး သႅင်ၼူၼ်းၼႅတ်ႈသုတ်ႉပၢႆႈၵႂႃႇမႅပ်ႉတၢင်းလင်ၶမ်းလၢဝ်ၵမ်းလဵဝ် ၸိူင်ႉၼင်ႇလုၵ်ႈဢွၼ်ႇ ၵူဝ်ၵူၼ်းလူင်ၼၼ်ႉယဝ်ႉ။

ငွႆးၾႆးလႅင်လႅင် ဝွတ်ႈဝွႆးႁၢႆၵႂႃႇၼႂ်းလပ်းသိင်ႇယဝ်ႉလႄႈ သႅင်ၼူၼ်းၼၼ်ႉၵေႃႈ လပ်းမွႆႈၵႂႃႇသေ ၶမ်းလၢဝ်တင်းမေႃယႃ ၼင်ႈဢုပ်ႇၵၼ် တႂ်ႈငွႆးၾႆးလႅင်ဝွႆးဝွႆးတမ်းယူႇၼႂ်းၵၢင်ၼၼ်ႉယဝ်ႉ။ တူၺ်းတႄႉမိူၼ်ၵူၼ်းၵဝ်းၵၼ်ယူႇ ၵူၺ်းၵႃႈ လွင်ႈဢၼ်ၶႆႈဢုပ်ႇလၢတ်ႈၼႄၵၼ်ၼၼ်ႉတႄႉ ႁိုဝ်ၸၢင်ႈလၢတ်ႈၼႄတၢင်းလႂ်လႆႈ တႃႇတေလၢတ်ႈဢွၵ်ႇမႃးၵေႃႈ တေႃႈပဵၼ်သဵင်ဢၼ်ၵပ်ႉတိပ်ႇဢူၵ်းႁူဝ်ၸႂ်ၵူၼ်းၵေႃႉလၢတ်ႈမၼ်းယူႇ၊ လွင်ႈသႅင်ၼူၼ်း ဢၼ်မေႃယႃလႆႈႁူႉႁၼ်ၼၼ်ႉၵေႃႈ လၢတ်ႈဢွၵ်ႇမွၵ်ႇၼႄၶမ်းလၢဝ်ၵႂႃႇတင်းမူတ်းယဝ်ႉ။

သၢႆလႅင်းငွႆးၾႆး ဝွႆးမွတ်ႇႁၢႆၵႂႃႇၼႂ်းလပ်းသိင်ႇ ၸွမ်းသဵင်ၽၵ်းတူ ဢၼ်မေႃယႃပိၵ်ႉဢိုတ်းၵႂႃႇပႅတ်ႈၼၼ်ႉယဝ်ႉ၊ ၶမ်းလၢဝ်တႄႉၵေႃႈ ႁိုဝ်တေၸၢင်ႈလပ်းလႆႈ သဵင်ၼၼ်ႉတဵတ်ႇယဵၼ်ၼႃႇသေတႃႉ ၼႂ်းၸႂ်တႄႉႁွၼ်ႉလိူတ်ႇမႆႈ ဝူၼ်ႉပေႃးဢမ်ႇပွင်ႇယဝ်ႉ၊ တေလႆႈႁဵတ်းႁိုဝ်။

ၵၢင်ၼႂ်ၾႃႉပၢင်ႇမိူင်းလႅင်း ၶမ်းလၢဝ်တိုၼ်ႇမႃးၵေႃႈ လႆႈႁၼ်သႅင်ၼူၼ်း ၼင်ႈမိူၼ်ႇမိုင်လူင်ယူႇတီႈၽၵ်းတူႁိူၼ်းၼၼ်ႉသေ ၶမ်းလၢဝ်လုၵ်ႉမႃးၼင်ႈႁိမ်းမၼ်းယဝ်ႉ။

“ၼူၼ်း..ဝူၼ်ႉသင်ယူႇလႃႇ”

သႅင်ၼူၼ်းၵေႃႈယၵ်ႉတူၺ်းၶမ်းလၢဝ်ယဝ်ႉ ဢမ်ႇလႆႈလၢတ်ႈသင် ၼင်ႈမိူၼ်ႇယူႇႁဵတ်းၼၼ်ၵႂႃႇၵူၺ်း။

ဝၼ်းယဝ်ႉဝၼ်းပူၼ်ႉၵႂႃႇ သႅင်ၼူၼ်းၵေႃႈ ဢမ်ႇၵႂႃႇတၢင်းလႂ် မီးယူႇတီႈႁိူၼ်းၼၼ်ႉၵူၺ်းသေ မီးၶမ်းလၢဝ်မိူဝ်းယူႇပဵၼ်ၵေႃႉယဝ်ႉ။ ၵူၺ်းၵႃႈ ပေႃးတေယူႇႁဵတ်းၼၼ်တိၵ်းတိၵ်းၵေႃႈ ဢမ်ႇပဵၼ်ၼႆလႄႈ ၶိင်းၵႄႇၶိင်းႁဵင်ၶဝ်ၵေႃႈ ႁွင်ႉဢဝ်ၸိူဝ်းပဵၼ်ပီႈၼွင်ႉၸိူဝ်ႉၶိူဝ်းမၼ်းၼၼ်ႉမႃးတုမ်ၵၼ်သေ လၢတ်ႈႁႂ်ႈ မႃးဢဝ်သႅင်ၼူၼ်းမိူဝ်းယူႇၸွမ်းၶဝ်ၼႆယူႇ။ သမ်ႉဝႃႈပဵၼ် ပီႈၼွင်ႉၸိူဝ်ႉၶိူဝ်းလဵဝ်ၵၼ်ၵေႃႈ ဢမ်ႇမီးၽႂ်ၶႂ်ႈႁပ်ႉသႅင်ၼူၼ်းမိူဝ်းယူႇၸွမ်းသေၵေႃႉ မၢင်ၸိူဝ်းၵေႃႈ လၢတ်ႈဝႃႈဢမ်ႇၶႂ်ႈလႆႈ၊ မၢင်ၵေႃႉၵေႃႈဝႃႈ မၼ်းၵေႃႉယႂ်ႇၼႃႇယဝ်ႉ တေၵႂႃႇလုမ်းလႃးမၼ်းၵေႃႈဢမ်ႇပဵၼ်လႆႈ သင်လုၵ်ႈဢွၼ်ႇတႄႉၵေႃႈဝႃႈႁေ၊ ၵမ်ႈၽွင်ႈၸိူဝ်းမီးလုၵ်ႈမီးလၢင်းၵေႃႈ ပေႃးဢဝ်မိူဝ်းယူႇၸွမ်းႁဝ်း လုၵ်ႈဢွၼ်ႇႁဝ်းသမ်ႉတေၵူဝ်မၼ်းႁေယဝ်ႉဢိူဝ်ႈ၊ မၢင်ၸိူဝ်းၵေႃႈ ၵူၼ်းယွင်ႇၸိူင်ႉၼၼ် ပၼ်ၽႂ်ၵေႃႈဢမ်ႇၶႆႈလႆႈလေႃႇ ပွႆႇမၼ်းယူႇၸိူင်ႉၼၼ်လႃႈ၊ ပွႆႇၵႂႃႇႁေလႃႈ ၵူၼ်းပေႃးၵေႃႉယႂ်ႇယဝ်ႉ၊ ဢမ်ႇမီးၽႂ်မႃးႁပ်ႉဢဝ်မၼ်းႁေၵေႃႉ။

ၶမ်းလၢဝ်ၵေႃႈ ႁွင်ႉဢဝ်သႅင်ၼူၼ်းမိူဝ်းယူႇၸွမ်းၵၼ်ၵႂႃႇ တီႈႁိူၼ်းၼၢႆးၶမ်းလႅင်ၶဝ်ၼၼ်ႉ ယူႇယဝ်ႉ။ ၵူႈဝၼ်းဝၼ်း သႅင်ၼူၼ်းၼၼ်ႉတႄႉ ၼင်ႈမိူၼ်ႇငဝ်ယူႇႁဵတ်းၼၼ်တိၵ်းတိၵ်းၵူၺ်း ၶမ်းလၢဝ်သမ်ႉပေႃးဢမ်ႇႁူႉတေႁဵတ်းႁိုဝ်တီႈမၼ်းယဝ်ႉ လိူဝ်သေ ၸွႆႈယူႇႁိမ်းၸမ်မၼ်းၵႂႃႇၼၼ်ႉၵူၺ်း။

သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။