“ပၢႆႈ” ၼႆၼၼ်ႉ ပဵၼ်သဵၼ်ႈတၢင်းၸိုဝ်ႈၸႂ်ႈယူႇႁႃႉ၊ ပၢႆႈၼႆၼၼ်ႉ ပဵၼ်သဵၼ်ႈတၢင်းလွတ်ႈ ဢၼ်လီလိူဝ်သေပိူၼ်ႈႁိုဝ် မၢင်ၵမ်း မၢင်ၵမ်းမႃးၵေႃႈ ၵူၼ်းၸိူဝ်း ယူႇတီႈၵမ်ၵိၼ်း၊ ဢမ်ႇမီးသဵၼ်ႈတၢင်းလိူၵ်ႈၼမ်၊ မီးၸၢတ်ႈပၢၼ်ယူႇမိူၼ်ၼင်ႇၵူၼ်းတူၵ်းၶွၵ်ႈ၊ ဢမ်ႇမီးပဝ်ႉမၢႆယိူင်းဢၢၼ်းသင်ၼၼ်ႉ တေၸၢင်ႈဝူၼ်ႉ ဢၢၼ်းတေပၢႆႈယူႇလႄႈ ၶႂ်ႈပၢႆႈဢွၵ်ႇၵႂႃႇတူင်ႇဝူင်းၼၼ်ႉ ယူႇၵူၺ်း။
ၵွပ်ႈၼၼ်လႄႈ ၸင်ႇလႆႈဢဝ်တင်းၸိူင်းၵူဝ်းရီးယႃးၸၢၼ်းၶူင်သၢင်ႈဢွၵ်ႇမႃး ဢၼ်မီးၸိုဝ်ႈ ၽၢႆႇဢင်းၵိတ်ႉဝႃႈ “Escape” ၸၢႆးၸိူင်းမၼ်း ပဵၼ်သိုၵ်းၵူဝ်းရီးယႃးႁွင်ႇ ယူႇၼႂ်းဢွင်ႈတီႈ ဢၼ်ဢမ်ႇမီးသုၼ်ႇလွတ်ႈလႅဝ်း ဢမ်ႇမီးတၢင်းယိူင်းဢၢၼ်းပဝ်ႉမၢႆသင် လႆႈႁဵတ်းၸွမ်းၶေႃႈသင်ႇလွင်ႈလဵဝ်၊ ၶႂ်ႈႁဵတ်းသင်ၵေႃႈ ႁဵတ်းဢမ်ႇလႆႈ၊ ၵူၺ်းၵႃႈ မၼ်းၸၢႆးသမ်ႉ မီးယိူင်းဢၢၼ်း ၶႂ်ႈပဵၼ်ၵူၼ်းလဵပ်ႈႁဵၼ်းပိုၼ်ႉတီႈၼႃႈလိၼ်လွင်ႈဢႅဝ်ႇလႄႇၼႆလႄႈ၊ မိူဝ်ႈမၼ်းတေပေႃးသိုၵ်းၼၼ်ႉ မၼ်းၵေႃႈဝၢင်းၽႅၼ်တႃႇတေ ပၢႆႈႁႂ်ႈပေႃးဢွၵ်ႇလွတ်ႈပူၼ်ႉ တီႈယူႇဢၼ်မိူၼ်ငရၢႆးလူင်ၼၼ်ႉယဝ်ႉ။
လိူဝ်သေမၼ်းယဝ်ႉ ယင်းမီးဢူၺ်းၵေႃႉမၼ်းထႅင်ႈၵေႃႉၼိုင်ႈ လုၵ်ႉၵူဝ်းရီးယႃးၸၢၼ်းသေၶဝ်ႈမႃးလႄႈ မၼ်းၸႂ်ထိုင်မႄႈမၼ်းယဝ်ႉ လႆႈယွၼ်းပၢႆႈၵႂႃႇၸွမ်းၸၢႆးၸိူင်းၵႂႃႇ။ ၸွမ်းၼင်ႇပိူင်ၶဝ်ၼၼ်ႉၵေႃႈ မီးယူႇဝႃႈ “ၽႂ်ပၢႆႈတပ်ႉ တေၺွပ်းထိုင်တၢႆ” ပိူၼ်ႈၵေႃႈၸွမ်းတိၺွပ်းၶႃ ဢဝ်တင်းႁႅင်းသိုၵ်း ၼပ်ႉႁူဝ်သိပ်း ၵႂႃႇဝႅတ်ႉလွမ်ႉ ယိုဝ်းၵွင်ႈသႂ်ႇဢမ်ႇထၢတ်ႇဢမ်ႇဝၢႆး၊ လႅၼ်ႈၶဝ်ႈထိူၼ်ႇၶဝ်ႈလွႆ မုင်ႈၼႃႈၸူးသဵၼ်ႈတၢင်း ဢၼ်ၶႃဢၢင်ႈဢၢၼ်းဝႃႈ တေထိုင်ၼၼ်ႉၵႂႃႇတိၵ်းတိၵ်း။ ပိူၼ်ႈမီးၶိူင်ႈၵွင်ႈၵၢင်ႇၸေးမိုဝ်း လႄႈ ၵူၼ်းၼမ်သေယဝ်ႉ သွင်ၶႃသမ်ႉယူႇတီႈၵၢင်ပၢင်ႇႁေ ဢူၺ်းၵေႃႉၸၢႆးၸိူင်းၼၼ်ႉၵေႃႈ ထုၵ်ႇပိူၼ်ႈယိုဝ်းတၢႆၵႂႃႇပႅတ်ႈယဝ်ႉ။ ၸၢႆးၸိူင်းၵေႃႈ ၼင်ႇၵႃႈႁဵတ်းလႆႈ ၵွင်ႈလဝ်းလဵဝ် ယိုဝ်းတုမ်ႉတွပ်ႇၶိုၼ်းသေ သိုပ်ႇဢႅၼ်ႇလႅၼ်ႈပၢႆႈၵႂႃႇတိၵ်းတိၵ်း ယဵပ်ႇယၢင်ႈၶဝ်ႈၼႂ်းပိုၼ်ႉတီႈ လႅၼ်လိၼ်ၵူဝ်းရီးယႃးသွင်ၽၢႆႇတိတ်းၸပ်းၵၼ်လႄႈ ပဵၼ်ဢွင်ႈတီႈဢၼ်မီးမၢၵ်ႇၽင်ဝႆႉယူႇၵူႈတီႈတီႈၼၼ်ႉယဝ်ႉ။
မၼ်းဢမ်ႇၵူဝ်ဝႃႈမိူဝ်ႈယဵပ်ႇယၢင်ႈၶဝ်ႈၵႂႃႇၼၼ်ႉ တေၵႂႃႇတၢႆယွၼ်ႉမၢၵ်ႇတႅၵ်ႇႁိုဝ်၊ ၵွပ်ႈမၼ်းမီးၶေႃႈႁတ်ႉမၼ်ႈဝႆႉဝႃႈ “တေယူႇႁိုဝ်တေတၢႆ မၼ်းယွၼ်းပဵၼ်ၵူၼ်းၵေႃႉလိူၵ်ႈသဵၼ်ႈတၢင်းၸၢတ်ႈပၢၼ်မၼ်းႁင်းၵူၺ်း” ၶၢဝ်းတၢင်းဢၼ်မၼ်းလႅၼ်ႈပၢႆႈၵႂႃႇ တေႃႇပေႃးႁွတ်ႈယိူင်းမၢႆမၼ်းၼၼ်ႉ မၼ်းၵေႃႈလႆႈၶၢမ်ႇတၢင်းပိူၼ်ႈ ၸွမ်းလိုပ်ႈလမ်းယိုဝ်းယူႇတိၵ်းတိၵ်းယဝ်ႉ။
ယွၼ်ႉမီးယိူင်းဢၢၼ်းလႄႈ ၶေႃႈႁတ်ႉမၼ်ႈ ဢမ်ႇဝႃႈသဵၼ်ႈတၢင်းဢၼ်မၼ်းလိူၵ်ႈၵႂႃႇၼၼ်ႉ တေထူပ်းလွင်ႈယၢပ်ႇၽိုတ်ႇတၢၼ်ႇႁိုဝ်ၵေႃႈ မၼ်းဢမ်ႇယွမ်းထွႆလႄႈ ဢဝ်ပူၼ်ႉလွတ်ႈမႃးလႆႈ လိုၼ်းသုတ်းမႃး မၼ်းၵေႃႈလႆႈႁဵတ်းၸွမ်းၼင်ႇၵၢင်ၸႂ် တၢင်းမုင်ႈမွင်း လွင်ႈဢၼ်မၼ်းၶႂ်ႈပဵၼ်ၼၼ်ႉၵႂႃႇယူႇယဝ်ႉ။
ဢွင်ႈတီႈဢၼ်ဢမ်ႇပၼ်လွင်ႈလွတ်ႈလႅဝ်းထၢင်ႇႁၢင်ႈ၊ ဢွင်ႈတီႈဢၼ်ၵပ်ႉၵိၼ်းယူႇယၢပ်ႇၼၼ်ႉ ၽႂ်ၵေႃႈဢမ်ႇၶႂ်ႈယူႇလႄႈဢမ်ႇၶႂ်ႈပဵၼ်၊ ၵူၺ်းၵႃႈ မၢင်ပွၵ်ႈမႃး ၸၢတ်ႈပၢၼ်ၼၼ်ႉၵေႃႈ ဢမ်ႇၸၢင်ႈလိူၵ်ႈၵိူတ်ႇလႆႈဝႃႈ ၶႂ်ႈၵိူတ်ႇတီႈဢၼ်မီးၸၼ်ႉထၢၼ်ႈ၊ မၢၵ်ႈမီးလီပဵၼ် ၼၼ်ႉလႆႈ မိူဝ်ႈၵိူတ်ႇမႃးၼႂ်းၼႃႈႁိူၼ်းဢၼ်ၵွတ်းၽၢၼ် ပဵၼ်ၸၼ်ႉၶႃႈၼႆၵေႃႈ လႆႈသိုပ်ႇပဵၼ်ၶႃႈ ႁဵတ်းလုၵ်ႈၼွင်ႉပိူၼ်ႈၵႂႃႇ ထုၵ်ႇပိူၼ်ႈထၢင်ႇလဵၵ်ႉတဵၵ်းတဵင်ၼၼ်ႉ ဢမ်ႇၸၢင်ႈထဵင်လႆႈၼၼ်ႉ ႁူႉတိုၼ်းဢမ်ႇမီးၽႂ်ၶၢမ်ႇလႆႈ ၸၢႆးၸိူင်းႁဝ်းၵေႃႈ ၵွပ်ႈဢမ်ႇမီးဢၼ်တိုတ်ႉၼွင်ႇႁတ်ႉမၼ်ႈ ဢမ်ႇမီးဢူႈမႄႈယဝ်ႉလႄႈ လႆႈႁႃတၢင်းပၢႆႈဢွၵ်ႇမႃး တႃႇၶဝ်ႈပဵၼ်ၵူၼ်းမိူင်းၵူဝ်းရီးယႃးၸၢၼ်း တႃႇသိုပ်ႇႁဵတ်းတၢင်းယိူင်းဢၢၼ်းမၼ်းၵႂႃႇထႅင်ႈႁႂ်ႈပေႃးလႆႈၼႆၼၼ်ႉယဝ်ႉ။
လိူဝ်သေၼၼ်ႉ ၵူၼ်းၵေႃႉဢၼ်ပဵၼ်ႁူဝ်ၼႃႈၽူႈဢွၼ်ႁူဝ်ၸၢႆးၸိူင်း ၵူၼ်းၵေႃႉဢၼ်ၸွမ်းလိုပ်ႈလမ်းယိုဝ်းၸၢႆးၸိူင်းၶဝ်ၼၼ်ႉၵေႃႈ ပဵၼ်ၵူၼ်းၵေႃႉဢၼ် ယုမ်ႇဝႃႈ မိူဝ်ႈၵိူတ်ႇမႃးပဵၼ်ၸိူင်ႉႁိုဝ်ၵေႃႈ တေလႆႈယူႇၸိူင်ႉၼၼ် မႂ်းပဵၼ်ၶႃႈၵေႃႈ တေလႆႈသိုပ်ႇပဵၼ်ၶႃႈၵႂႃႇထႅင်ႈလႄႈ မိူဝ်ႈလႂ်မႂ်းပၢႆႈမႂ်းၵေႃႈတေလႆႈတၢႆ၊ မႂ်းဢမ်ႇမီးတၢင်းလိူၵ်ႈ ၵဝ်ၵေႃႈဢမ်ႇမီးတၢင်းလိူၵ်ႈမိူၼ်ၵၼ်ၼႆသေ သမ်ႉဝႃႈမၼ်းတေမီးလွင်ႈဢၼ်ၶႂ်ႈႁဵတ်းၶႂ်ႈပဵၼ်ယူႇၵေႃႈ ယွၼ်ႉၶေႃႈၵႂၢမ်းဝႃႈဢမ်ႇမီးတၢင်းလိူၵ်ႈၼႆၼၼ်ႉ မႃးပိၵ်ႉဢိုတ်းပႅတ်ႈသေ လႆႈသိုပ်ႇယူႇၵႂႃႇ လူၺ်ႈတီႈၸဝ်ႈၵဝ်ႇၵေႃႈ ဢမ်ႇလႆႈမီးတၢင်းသိူဝ်းသင်သေၵႃႈႁိုဝ်ၼၼ်ႉယဝ်ႉ။
သင်ၸိူဝ်ႉဝႃႈဢွင်ႈတီႈၼၼ်ႈ မၼ်းပၼ်လွင်ႈထၢင်ႇႁၢင်ႈလွတ်ႈလႅဝ်းယူႇလႄႈ မီးသုၼ်ႇ၊ တိုဝ်ႉတၢင်း လႆႈႁဵတ်းၸွမ်းလွင်ႈၶႂ်ႈလႆႈၶႂ်ႈပဵၼ်ၼၼ်ႉယူႇၼႆ လွင်ႈၸႂ်ၶႂ်ႈပၢႆႈဢၼ်ဝႃႈၼၼ်ႉ ၸွင်ႇတေမီးမႃးၼႂ်းႁူဝ်ယူႇႁိုဝ်ၼႆ လီလႆႈၶႆႈၸႂ်ဝူၼ်ႉတူၺ်းယူႇ။
ပၢႆႈတႃႇႁႂ်ႈပေႃးလွတ်ႈပူၼ်ႉၼၼ်ႉ တိုၼ်းတေလႆႈႁူပ်ႉလွင်ႈၶဵင်ႇတႃႉယဝ်ႉ၊ ပၢႆႈတႃႇဢဝ်တူဝ်လွတ်ႈ ဢွင်ႈတီႈၵမ်ၵိၼ်း လႄႈ ပၢႆႈတႃႇၵႂႃႇၸူးယိူင်းမၢႆႁႂ်ႈပေႃးလႆႈၼၼ်ႉ မၼ်းတိုၼ်းတေလႆႈထူပ်းလွင်ႈယၢပ်ႇတင်းၼမ်၊ သင်ဢမ်ႇမီးယိူင်းဢၢၼ်း၊ ၽႅၼ်ၵၢၼ် ဢမ်ႇဝႃႈပၢႆႈၵႂႃႇတၢင်းလႂ်ၵေႃႈ တႃႇႁႃလႆႈတၢင်းဢွၵ်ႇ တႃႇပူၼ်ႉလွတ်ႈလႆႈၼၼ်ႉ တေယၢပ်ႇယူႇ တႃႇတေယွမ်းသုမ်းပႅတ်ႈၶိုင်ႈတၢင်းၼၼ်ႉၵေႃႈ မီးၼမ်ယူႇၵူၺ်း။
ဢမ်ႇဝႃႈတေလိူၵ်ႈသဵၼ်ႈတၢင်းလႂ် သဵၼ်ႈတၢင်းဢၼ်ၸဝ်ႈၵဝ်ႇလိူၵ်ႈၼၼ်ႉ ပဵၼ်ႁိုဝ်မႃးၵေႃႈ တိုၼ်းတေလႆႈဢဝ်ပုၼ်ႈၽွၼ်းၵႂႃႇယူႇယဝ်ႉ။
ပၢႆၵမ်−သႅၼ်ငဝ်း
17/09/2024
