ဢမ်ႇဝႃႈလဵၵ်ႉယႂ်ႇၼုမ်ႇထဝ်ႈ၊ ႁဵတ်းၵၢၼ်သင်ၵေႃႈယဝ်ႉ ပဵၼ်မေႃယႃၵေႃႈယဝ်ႉ တၢင်းပဵၼ်ၼၼ်ႉ ႁူႉပဵၼ်လႆႈတီႈၵူၼ်းၵူႈၵေႃႉလႄႈ တၢင်းပဵၼ်ပၢႆးၸႂ်ၼၼ်ႉၵေႃႈ ပဵၼ်မႃးလႆႈတီႈၵူၼ်းၵူႈၵေႃႉမိူၼ်ၵၼ်။
ၼႂ်းလိၵ်ႈႁူဝ်ၼႆႉတႄႉ တေမႃးၶႆႈလၢတ်ႈၼႄၸိူင်းၵူဝ်းရီးယႃးၸၢၼ်း ဢၼ်မီးၸိုဝ်ႈဝႃႈ Daily Dose of Sunshine ပဵၼ်ၸိူင်းဢၼ်သၢင်ႈမႃးၼႂ်းပီႊ 2023 လႄႈ တင်းမူတ်းမီးယူႇ 12 တွၼ်ႈ၊ တေဢွၵ်ႇဝႆႉတၢင်း Netflix ပဵၼ်လွင်ႈၵဵဝ်ႇလူၺ်ႈၼႂ်းႁူင်းယႃပၢႆးၸႂ်၊ ဢၼ်မီးၼၢင်းၸိူင်းၸိုဝ်ႈႁွင်ႉ ၸွင်ႈတႃႈဢိုၼ်ႈ ပဵၼ်ၼၢင်းမေႃယႃလုမ်းလႃးၵူၼ်းပဵၼ် လႄႈ ပဵၼ်ၵူၼ်းႁၵ်ႉၵၢၼ်ငၢၼ်း ဢၼ်မၼ်းႁဵတ်းၼၼ်ႉတႄႉတႄႉ၊ ၵွပ်ႈပိူဝ်ႈပဵၼ်ၵူၼ်းဢၼ်လီတေႃႇၵူၼ်းပဵၼ်ၼႃႇ လႄႈ ႁဵတ်းႁႂ်ႈၵၢၼ်ငၢၼ်းတူဝ်ၸဝ်ႈၵဝ်ႇပေႃးယူပ်ႈယွမ်းသေ တုမ်ႉတိူဝ်ႉသုၼ်ႇလႆႈ ၵူၼ်းႁူမ်ႈၼႃႈၵၢၼ်ၼႆယူႇ၊ မၼ်းၸင်ႇလႆႈထုၵ်ႇၶၢႆႉၵၢၼ်ၵႂႃႇတီႈ ႁူင်းယႃၵူၼ်းပဵၼ်ပၢႆးၸႂ်ယဝ်ႉ။
ၶၢႆႉမႃးတီႈႁဵတ်းၵၢၼ်မႂ်ႇယဝ်ႉၼႆၵေႃႈ ၵူႈလွင်ႈၼၼ်ႉ လႆႈထူပ်းလွင်ႈဢၼ်ဢမ်ႇထၢင်ႇထိူမ် လႄႈ ထူပ်းလွင်ႈၶဵင်ႇတႃႇယူႇတႃႇသေႇ၊ မိူဝ်ႈထူပ်းလွင်ႈယၢပ်ႇၽိုတ်ႇၼႆၵေႃႈ လွင်ႈတၢင်းၶတ်းၸႂ်မၼ်း ဢၼ်ဢမ်ႇမေႃယွမ်းသုမ်း ႁူမ်ႈပႃး ဢူၺ်းၵေႃႉ လႄႈ ၵူၼ်းႁူမ်ႈၼႃႈၵၢၼ် ဢၼ်ၸႂ်လီတေႃႇၵၼ်၊ မေႃသႂ်ႇၸႂ်ပၼ်ၵၼ်လႄႈ လွင်ႈၶဵင်ႇတႃႉၸိူဝ်းၼၼ်ႉ ဢွၼ်မၼ်းဢဝ်ၶၢမ်ႈပူၼ်ႉၵႂႃႇလႆႈ ယူႇယဝ်ႉ။
ၸွမ်းလူၺ်ႈလွင်ႈသႂ်ႇၸႂ်မၼ်းၼၼ်ႉ ႁဵတ်းႁႂ်ႈၵူၼ်းပဵၼ်ၵေႃႈ လႆႈၸႂ်မၼ်းလႄႈႁၵ်ႉမၼ်းမႃး ၵူၺ်းၵႃႈ မီးၵူၼ်းပဵၼ်ၵေႃႉၼိုင်ႈ ဢၼ်ၸမ်ၸႂ်ၵၼ်တင်းမၼ်းႁႅင်းၼႃႇသေ လႆႈဢွၵ်ႇႁူင်းယႃၵႂႃႇယဝ်ႉ၊ ၵူၺ်းၵူၼ်းပဵၼ်ၵေႃႉၼၼ်ႉသမ်ႉ ၶႃႈတူဝ်တၢႆပႅတ်ႈသေယဝ်ႉ ႁဵတ်းႁႂ်ႈတုမ်ႉတိူဝ်ႉပၢႆးၸႂ်မၼ်းတႄႉတႄႉ ထိုင်တီႈပေႃးဢမ်ႇယူႇလီမႃးလႄႈ ပဵၼ်တၢင်းပဵၼ်ၶီငဝ်မွင်ၸႂ်ၵႂႃႇ။ လွင်ႈတၢင်းဢၼ်ႁဵတ်းႁႂ်ႈပဵၼ် ထႅင်ႈလွင်ႈၼိုင်ႈၵေႃႈ ၵွပ်ႈပဵၼ်ၵူၼ်းၸႂ်လီ ႁၼ်ထိုင်ၵူၼ်းတၢင်ႇၵေႃႉပဵၼ်ယႂ်ႇ ဢမ်ႇမေႃထဵင်ပိူၼ်ႈလႄႈ မေႃၵဵင်ၸႂ်ပိူၼ်ႈၼႃႇသေ ပၼ်ႁႂ်ႈလွင်ႈယၢပ်ႇၸႂ် ဢၼ်မၼ်းဢမ်ႇတွၼ်ႉလၢတ်ႈၼႄၽႂ်ၼၼ်ႉ မႃးၵပ်ႉၵိၼ်းတိုဝ်တၼ် ၼႂ်းဢူၵ်းၼႂ်းၸႂ်မၼ်းၼႃႇၼၼ်ႉယဝ်ႉ ၊ မၼ်းပဵၼ်ႁၢႆႉႁႅင်းထိုင်တီႈ တူဝ်မၼ်းၼၼ်ႉၵေႃႈ လႆႈၶဝ်ႈယူတ်းယႃတူဝ်ၼႂ်းႁူင်းယႃၵမ်းလဵဝ်ယူႇ။
ဝၢႆးသေဢွၵ်ႇႁူင်းယႃမႃးယဝ်ႉ သမ်ႉဝႃႈပႆႇၶႅၼ်းလီလႄႈ တိုၵ်ႉလႆႈၵိၼ်ယႃယူႇသေတႃႉ မၼ်းၵေႃႈလႆႈမႃးႁဵတ်းၵၢၼ်ၼႂ်းႁူင်းယႃၶိုၼ်းယူႇ၊ တႃႇတေမႃးႁဵတ်းၵၢၼ်လႆႈၼၼ်ႉၵေႃႈဢမ်ႇငၢႆႈ မၼ်းလႆႈၶၢမ်ႇႁႅင်းမိပ်ႇငႅၼ်းၽၢႆႇၼွၵ်ႈ သၢႆတႃၵူၼ်းတၢင်းၼွၵ်ႈတူၺ်းၸူး ပႃးလူၺ်ႈလွင်ႈထၢင်ႇလဵၵ်ႉ၊ လွင်ႈဢမ်ႇႁၢၼ်ႉၸႂ် ၵွပ်ႈပိူဝ်ႈမၼ်းပဵၼ်ၵူၼ်းပဵၼ်သေ တေမႃးယူတ်းယႃၵူၼ်းပဵၼ်ၼႆၼၼ်ႉယဝ်ႉ။ ၵူၺ်းၵႃႈ သမ်ႉဝႃႈ မၼ်းပဵၼ်တၢင်းပဵၼ်ပၢႆးၸႂ်ယူႇသေတႃႉ မၼ်းၵေႃႈ ယင်းႁဵတ်းၵၢၼ်လႆႈမိူၼ်ၵဝ်ႇ၊ ႁဵတ်းၵၢၼ်ၵႂႃႇမိူၼ်ၵူၼ်းယူဝ်းယူဝ်းလႆႈလႄႈ မိူၼ်ပဵၼ်ၵူၼ်းယူဝ်းယူဝ်းၵေႃႉၼိုင်ႈၼၼ်ႉၵူၺ်း။
ၵွပ်ႈၼၼ် ႁဝ်းၶႃႈၵူႈၵေႃႉၼၼ်ႉ မီးသုၼ်ႇပဵၼ်တၢင်းပဵၼ်ပၢႆးၸႂ်ၵၼ်လႆႈၵူႈၵေႃႉလႄႈ ဢမ်ႇဝႃႈတေထူပ်းလွင်ႈသင်ၵေႃႈယဝ်ႉ ယွမ်းႁပ်ႉလွင်ႈဢၼ်မၼ်းပဵၼ်ယူႇသေ လုမ်းလႃးပၢႆးယူႇလီၵၼ်ၵႂႃႇသေၵမ်း။
ၼႂ်းၸိူင်းႁူဝ်ၼႆႉ သင်ဝႃႈလႆႈတူၺ်းၸိုင် လိူဝ်သေလၢတ်ႈလူၺ်ႈလွင်ႈၼႂ်းႁူင်းယႃပၢႆးၸႂ်၊ လွင်ႈၽဝၸွင်ႈတႃႈဢိုၼ်ႈယဝ်ႉ ယင်းပၼ်တၢင်းႁူႉတၢင်းႁၼ် လၢႆလၢႆမဵဝ်းထႅင်ႈ လႄႈ ယင်းလၢတ်ႈၼႄပႃး ၽၢင်ႁၢင်ႈတၢင်းပဵၼ်ပၢႆးၸႂ် လွင်ႈတၢင်းဢၼ်ႁဵတ်းႁႂ်ႈပဵၼ်တင်းပဵၼ်သေဢမ်ႇၵႃး မီးထႅင်ႈလွင်ႈဢၼ်လီသူၼ်ၸႂ်တင်းၼမ်ၼၼ်ႉယဝ်ႉ လႆႈဝႃႈပဵၼ်ၸိူင်းဢၼ်ပၼ်တၢင်းမူၼ်ႈၸႂ်ဢမ်ႇၵႃး ပၼ်တၢင်းႁူႉတၢင်းႁၼ်ပႃး ယူႇယဝ်ႉ။
ၼပ်ႉယမ်ၽူႈလူလိၵ်ႈႁဝ်းၶဝ်ယူႇဢေႃႈ
ပၢႆၵမ်−သႅၼ်ငဝ်း
24/12/2023
