တွၼ်ႈပႅတ်ႇ
သႅင်ၼူၼ်း ႁွတ်ႈမႃးၸူးလႅင်းမိူင်းသႂ် ဢမ်ႇႁၼ်ၶမ်းလၢဝ်လႄႈ
“ပီႈၶမ်းလၢဝ်ၶႃႈလူး”
“ဢေႃ..မိူဝ်းၵႂႃႇယဝ်ႉ မၼ်းၵူဝ်လပ်းသိင်ႇလႄႈ ႁႂ်ႈပီႈပႂ်ႉၼွင်ႉၼႆဝႃႇ”
သၢႆတႃဝၢၼ်ဝၢၼ် ယၵ်ႉတူၺ်းၸူး သႅင်ၼူၼ်း သမ်ႉပေႃးဢၢႆၼႃႈမႆႈမႃးယဝ်ႉယိုင်။ ၸင်ႇတွပ်ႇၸူးၶိုၼ်း
“ၶႃႈယူဝ်ဝႃႈ ပီႈမိူဝ်းပႅတ်ႈယဝ်ႉၵွၼ်ႇဢေႃႈၼႆႉ”
“ဢမ်ႇပႆႇၸၢင်ႈမိူဝ်း..ပေႃးၼွင်ႉပႆႇမႃးထိုင်..”
“ပဵၼ်သင်လႄႈဝႃႈၼၼ်ၶႃႈ..”
“ပီႈမွင်းပႂ်ႉ..ႁႂ်ႈလႆႈပႆႁူမ်ႈၶၢင်း ယၢင်ႈၸွမ်းတၢင်းသဵၼ်ႈလဵဝ် ၼႂ်းၵႄႈလုၵ်ႈလၢဝ်လႅင်းယူႇၼႆႉၼၼ်ႉၼႃႇ” တင်းလၢတ်ႈတင်းႁႅၼ်မုင်ႈတူၺ်းလုၵ်ႈလၢဝ် ၶပ်ႉယႆၸႅၼ်ႇသႅမ်းႁၢင်ႈလီ ႁိူဝ်ႈလႅင်းပေႃးတဵမ်ၾႃႉလူင်ဝႆႉယဝ်ႉ။ သႅင်ၼူၼ်းၵေႃႈ ႁႅၼ်မုင်ႈတူၺ်းၵႂႃႇၸွမ်းၵၼ်ယူႇ။
“လိူၼ်လွင်ႈယဝ်ႉလႄႈ ၸင်ႇလႆႈဝႃႈမၼ်းႁၢင်ႈလီၼၼ်ႉယဝ်ႉ”
“လိူၼ်လွင်ႈႁိုဝ်လိူၼ်မူၼ်း ပေႃးမီးၵူၼ်းၸိုဝ်ႉႁွင်ႉသႅင်ၼူၼ်းတႄႉ ႁၢင်ႈလီတႃႇသေႇယဝ်ႉပီႈဝႃႈ”
“သႅင်ၼူၼ်းမီးၵူၼ်းၸိုဝ်ႈၼမ်လၢႆ တေဝႃႈပဵၼ်ၼွင်ႉၵေႃႈ ပေႉၵႅၼ်ႇယိၼ်းဢၢႆ၊ ၵူၼ်းဝၢၼ်ႈၼွၵ်ႈသၢဝ်ႁၢင်ႈၸႃႉ ၸိူင်ႉၼင်ႇႁဝ်းတႄႉ ဢမ်ႇပဵၼ်လႆႈၵေႃႉပီႈႁွင်ႉၶႃႈယူဝ်ႉၼေႃ”
“လိူဝ်သေၼွင်ႉ ပီႈဢမ်ႇၸၢင်ႈႁွင်ႉၽႂ် သမ်ႉဝႃႈသႅင်ၼူၼ်းမီးပဵၼ်လၢႆမိုၼ်ႇၵူၼ်းၵေႃႈ တေႃႈတေပဵၼ်လႆႈၼွင်ႉၵူၺ်း ၵေႃႉပီႈမၢႆဝႆႉၼႂ်းၸႂ်”
သွင်ၶႃ ဢုပ်ႇၵၼ်ၵဝ်းၵၼ်လူင်မိူဝ်း ၼႂ်းငဝ်းလပ်းသိင်ႇတႂ်ႈလႅင်းလၢဝ် မီးတင်းႁိင်ႇႁွႆႈၵူၼ်ႈၶဵဝ် ပိူင်းထွင်ႇႁိူဝ်ႈပၼ်သၢႆလႅင်းတၢင်းႁၵ်ႉၶဝ် ႁႂ်ႈပေႃးႁၢင်ႈလီတိူဝ်းမႃးထႅင်ႈ ယဝ်ႉ။
ၶမ်းလၢဝ်ၼၼ်ႉတႄႉၵေႃႈ ႁိူဝ်ႉတူဝ်ႁိူဝ်ႉၸႂ်ၼႃႇယဝ်ႉလႄႈ ဢၢပ်ႇၼမ်ႉၵိၼ်ၶဝ်ႈယဝ်ႉၵေႃႈ သမ်ႉပေႃးၼွၼ်းၸဵမ်ၸဝ်ႉၸဵမ်ၸဵဝ်းယူႇ၊ လႅင်းမိူင်းသႂ်တႄႉ ဢၢပ်ႇၼမ်ႉမႃးယဝ်ႉ မိူဝ်းႁဵတ်းၶႅၵ်ႇသႅင်ၼူၼ်းၶဝ်ၵူၺ်းယဝ်ႉ။
ယၢမ်းၵၢင်ၼႂ် ႁူဝ်မိူင်းသႂ်သိူင်ႁိူင် ၵူၼ်းၼွၼ်းလူင်ၸိူင်ႉၼင်ႇၶမ်းလၢဝ်ၼၼ်ႉၵေႃႈ တေႃႈပႆႇလုၵ်ႉလႆႈ၊ လႅင်းမိူင်းသႂ်ၼၼ်ႉတႄႉ လုၵ်ႉသုတ်ႇလူမ်းၵတ်းလူမ်းယဵၼ် တီႈၵၢင်ၸၢၼ်းၼၼ်ႉသေ ငွၵ်ႈၶေႃးႁႅၼ်မုင်ႈတူၺ်း ၵႂႃႇတၢင်းႁိူၼ်းသႅင်ၼူၼ်းၶဝ်ၼၼ်ႉယဝ်ႉ။ ၵေႃႉပဵၼ်ၼၢႆးၼၼ်ႉတႄႉ ႁဵတ်းၶဝ်ႈၽၵ်းယူႇၼႂ်းသွင်ႇၾႆးသေယဝ်ႉ ထၢမ်ၸူးမၼ်း−
“မႃးႁိူၼ်းလၢႆမွင်းလႃႇၶမ်ႈဝႃး..”
“ဢိုဝ်..လိုၵ်းယူႇၶႃႈၼၢႆး ဢမ်ႇတၼ်းတူၺ်းဢွမ်မွင်းယဝ်ႉ”
“ၼင်ႇႁၢင်ႈငိၼ်းသဵင်တိၼ်ၶိုၼ်ႈႁိူၼ်းမႃး ၵႆႇပေႃးၶၼ်ယဝ်ႉႁိုဝ်..”
“ၼၢႆးဢမ်ႇပႆႇၼွၼ်းၵွၼ်ႇၵႃႈၶၢဝ်းၼၼ်ႉ..”
“ငိၼ်းသဵင်တိၼ်လႄႈတိုၼ်ႇဢိူဝ်ႈ!”
ၼၢႆးၵေႃႈႁႅၼ်းၶဝ်ႈႁႅၼ်းၽၵ်းသေ ႁႂ်ႈလႅင်းမိူင်းသႂ် ယုၵ်ႉမႃးတမ်းတီႈၵၢင်ၸၢၼ်းၼၼ်ႉယဝ်ႉ၊ ၼၢႆးၼၼ်ႉၵေႃႈၵႂႃႇႁွင်ႉၶမ်းလၢဝ်လုၵ်ႉယူႇ။
“လုၵ်ႉလႄႈယိင်း ၵမ်ႉႁဝ်းလူဝ်ႇၵႂႃႇႁဵတ်းၵၢၼ်တီႈႁူင်းႁဵၼ်းထႅင်ႈယဝ်ႉ”
ၵွပ်ႈတၢင်းၶၢၼ်ႉလေႃးပႃးလွင်ႈဢမ်ႇယၢမ်ႈႁဵတ်းၵၢၼ်ၼၵ်းၼၼ်ႉလႄႈ
“ၸွမ်းတူဝ်ၸွမ်းၶိင်း ပေႃးၵူၼ်ႉၵူၼ်ႉၶိုၼ်ႈၶိုၼ်ႈလူင်ၵႂႃႇသဵင်ႈယဝ်ႉဢေႃႈၼၢႆး ဢမ်ႇလုၵ်ႉလႆႈယဝ်ႉ..”
“ပေႃးပဵၼ်တႄႉ..မၼ်းဢမ်ႇမီးႁႅင်းလၢတ်ႈၸိူင်ႉၼႆလႆႈၶႃႈလေႃႇၼၢႆး ႁဵတ်းၵႅင်ႈၵူၺ်းယဝ်ႉ” လႅင်းမိူင်းသႂ်ႁွင်ႉလၢတ်ႈၸူးၵႂႃႇ။
ၶမ်းလၢဝ် လႆႈငိၼ်းၼင်ႇၼၼ်ၵေႃႈ မိူၼ်တေဢမ်ႇႁၢၼ်ႉၸႂ်မႃးသေ ၶုၼ်ႇလုၵ်ႉပႆဢွၵ်ႇမႃးၸူးလႅင်းမိူင်းသႂ် ၼင်ႇဢမ်ႇပဵၼ်သင်ၼၼ်ႉလႄႈ “ၽႂ်ဝႃႈဢမ်ႇပဵၼ်လႃႇ ဢၼ်လႂ်ၼၵ်းၵေႃႈ ၸႂ်ႉၵၼ်ယွင်ႈတိၵ်းတိၵ်းလူင် ဢႅဝ်ပေႃးတေႁၵ်းယဝ်ႉၼႆႉ” မႄးတဝ်ႉဢႅဝ်မၼ်းၼႄၵႂႃႇ။
“ပီႈႁဵတ်းႁိုဝ်လုၵ်ႉလႆႈလႃႇဢေႉ!!”
ၶမ်းလၢဝ်ၸင်ႇႁူႉတူဝ်မႃးၶိုၼ်းသေ ဝႆႉၼႃႈႁႅင်ႈႁႅင်ႈၸူးလႅင်းမိူင်းသႂ်ၶႃၼၢႆးယဝ်ႉ လႅၼ်ႈလူင်းႁိူၼ်းၵႂႃႇႁႃသုၵ်ႈၼႃႈမၼ်းယူႇ။
“သွင်သၢမ်ဝၼ်းမႃးၼႆႉ မိူၼ်မၼ်းတေလႅၵ်ႈလၢႆႈမႃးယူႇ ၵူၺ်းၵႃႈ ယင်းတိုၵ်ႉမိူၼ်ၵဝ်ႇယူႇ”
“ၸၢႆးၵေႃႈ ပွင်ႇၸႂ်ပၼ်မၼ်းႁေလႄႈ မၼ်းတင်းတေႁိူဝ်ႉယူႇတေႉၼင်ႇၵဝ်ႇဢိူဝ်ႈ ၶမ်ႈဝႃးၼွၼ်းၶၢင်းတင်းၶိုၼ်းယဝ်ႈၼၼ်ႉ လၢႆဝႃႈၼႂ်ၼႆႉ ၼၢႆးဢမ်ႇပူၵ်းမၼ်းလုၵ်ႉ”
ၼၢႆးလႄႈလႅင်းမိူင်းသႂ်ၶႃၵေႃႈ ၵိၼ်ၶဝ်ႈထႃႈမၼ်းၵႂႃႇ။ ၼႂ်းမူႇၶဝ်ႈဢၼ်မီးသွင်ၵေႃႉၼၢႆးလၢၼ်ၵူၺ်းၼၼ်ႉ
“ၸၢႆးတေမိူဝ်းၶိုၼ်းမိူဝ်ႈလႂ်လႃႇ.. ဢမ်ႇၸႂ်ႈဝႃႈတေဢဝ်မေးမိူဝ်းၸွမ်းၼင်ႇၵဝ်ႇယူဝ်ႉၼေႃႈ”
“ဢဝ်မိူဝ်းလႆႈယူႇၶႃႈႁႃႉၼၢႆး.. မိူၼ်ဝႃႈ ၶႃႈတေၽၢတ်ႇဝၢၼ်ႈၼႆႉဢမ်ႇလႆႈယဝ်ႉ ဢမ်ႇၼၼ်ၵေႃႈၶိုၼ်ႈၶူၺ်ပိူၼ်ႈႁေ တေလီယူႇယူဝ်ႉ”
“ၼႆႉယဝ်ႉ ဢၼ်ၼၢႆးၶႂ်ႈလၢတ်ႈ..ယွမ်းၽွင်ႈလႄႈၼႆ ၽွင်းပၢၼ်တိုၵ်ႉႁဵၼ်းယူႇၼႆႉ ယႃႇႁႂ်ႈတၢင်းႁၵ်ႉလႄႈၽူႈယိင်း မႃးပဵၼ်ဢၼ်ၵိတ်ႇၶႂၢင်သဵၼ်ႈတၢင်းႁဝ်းလႄႈ မိူဝ်ႈလႂ်မိူဝ်ႈႁဵၼ်းသုတ်းယဝ်ႉ မိူဝ်ႈၸၢႆးၽွမ်ႉတႃႇတေႁပ်ႉဢဝ်ပုၼ်ႈၽွၼ်းလႆႈယဝ်ႉၼၼ်ႉ ၸင်ႇၵွႆႈဝူၼ်ႉၵေႃႈ ပႆႇတူၵ်းလိုၼ်းၼႃႈ”
“ၵူၺ်းၵႃႈ ၶဝ်ပဵၼ်ၽူႈယိင်းဢၼ်ၶႃႈႁၵ်ႉလႄႈ ၶႃႈၵျိူၵ်ႈမႃးႁိုင်ၼႃႇယဝ်ႉ ၶႃႈပႂ်ႉဢမ်ႇလႆႈယဝ်ႉဝႃႈၼၢႆး”
ႁဵတ်းႁႂ်ႈမၼ်းဝူၼ်ႉထိုင်ၶိုၼ်း ပွၵ်ႈဢွၼ်တၢင်းသုတ်း ၽွင်းဢႃႇယုဢသၢၵ်ႈလႆႈမွၵ်ႈ 10 ၶူပ်ႇ မိူဝ်ႈမၼ်းမႃးၼႂ်းဝၢၼ်ႈၼႆႉ ၽွင်းၶၢဝ်းႁိုဝ်ႉၸိူင်ႉၼႆယဝ်ႉ၊ မၼ်းလႆႈလူမ်ႉလူင်းၵႂႃႇၼႂ်းၵၢင်တၢင်းၼၼ်ႉလႄႈ ႁွင်ႉႁႆႈသေယဝ်ႉ ၸင်ႇသမ်ႉမီးယိင်းဢွၼ်ႇသႅင်ၼူၼ်း ယိုၼ်ႈမိုဝ်းမႃးၸွႆႈမၼ်းသေ လၢတ်ႈမၼ်းဝႃႈ “ယႃႇပေႁႆႈလႄႈပီႈ” သဵင်ဢူၼ်ႈဢွၼ်ႇဝၢၼ်ႁူ သၢႆတႃဝၢၼ်ဝၢၼ် ၵႅမ်ႈတွင်ႇတွင်ႇဢွၼ်ႇၼၼ်ႉ ဢဝ်လႅင်းမိူင်းသႂ် ပေႃးမိူၼ်ႇမိုင်ၵႂႃႇၸွမ်းယဝ်ႉ၊ တႄႇဢဝ်မိူဝ်ႈၼၼ်ႉ သႅင်ၼူၼ်းၵေႃႈ လႆႈပဵၼ်ၵေႃႉမၢႆၸႂ်မၼ်းမႃးယူႇ။ ၸဵမ်မိူဝ်ႈၼၼ်ႉမႃး ပေႃႈမႄႈၵေႃႈ ဢမ်ႇဢွၼ်မၼ်းမႃးထႅင်ႈ၊ ၵွပ်ႈလူဝ်ႇႁဵၼ်းလိၵ်ႈႁဵၼ်းလၢႆးပႃးလႄႈ ဢမ်ႇၸၢင်ႈလႆႈမႃးထိုင် ၵူၺ်းၵႃႈ မိူဝ်ႈမေႃၵႂႃႇမေႃပႆမႃးႁင်းၵူၺ်းယဝ်ႉ၊ ပီႊၼႆႉ မီးၶၢဝ်းယၢမ်းလိုဝ်ႈယၢမ်းတၼ်းမႃးၼႆၵေႃႈ မၼ်းၸင်ႇလႆႈမႃးလိုဝ်ႈတီႈၼႆႈလီလီ တေဢၢၼ်းယူႇတေႃႇၶၢဝ်းယၢမ်းလိုဝ်ႈပေႃးမူတ်းၼႆယဝ်ႉ။
“သမ်ႉဝႃႈၶဝ်တေပဵၼ်သၢဝ်ယဝ်ႉသေတႃႉ ဢႃႇယုယင်းတိုၵ်ႉလဵၵ်ႉယူႇၼႃႇ သိပ်းႁူၵ်းတမ်ႉပႆႇတဵမ်လီ ၸၢႆးပႂ်ႉထႅင်ႈႁေမွၵ်ႈ သွင်သၢမ်ပီၼႆႉလႄႈ”
“ပေႃးဝႃႈၶႃႈၵႂႃႇယဝ်ႉ ၶႃႈတေဢမ်ႇၸၢင်ႈလႆႈမႃးၶိုၼ်းၵူၺ်းဢေႃႈ တေႃႇပေႃးႁဵၼ်းသုတ်းၵေႃႈ ထႅင်ႈပဵၼ်သီႇပီႊၵမ်းလဵဝ် ၸွင်ႇၶဝ်ယင်းတိုၵ်ႉတေပႂ်ႉၶႃႈယူႇႁိုဝ်”
“ၼၼ်ႉတႄႉယူႇတီႈသူသွင်ၵေႃႉ တေတူၵ်းလူင်းၵၼ်ၵူၺ်းၼႃႇ ၽူႈယိင်း..ပေႃးဝႃႈၶဝ်ႁၵ်ႉၵူၼ်းၵေႃႉၼၼ်ႉယဝ်ႉ မၼ်းတိုၼ်းမီးၵတိတေႃႇၵူၼ်းၵေႃႉဢၼ်မၼ်းႁၵ်ႉယူႇယဝ်ႉ ပႅတ်ႇပီႊ ၸၢႆးယင်းပႂ်ႉမႃးလႆႈ ထႅင်ႈသီႇပီႊၵူၺ်းၸၢင်ႈပဵၼ်သင်လႃႇ”
“တေၵႂႃႇသိုပ်ႇႁဵၼ်းတီႈၼွၵ်ႈမိူင်းထႅင်ႈၼႆၵႃႈ ဢမ်ႇၶႂ်ႈႁဵၼ်းၵေႃႈ လၵ်ႉမႃးယူႇတၢင်းၼႆႉႁေယဝ်ႉၼႃႇ ၽႂ်ၵေႃႈဢမ်ႇႁူႉလေႃႇ”
ၶမ်းလၢဝ်လၢတ်ႈတတ်းၵႂၢမ်းၵႂႃႇ၊ လႅင်းမိူင်းသႂ်ၶႃၼၢႆးၵေႃႈ ယၵ်ႉတူၺ်းၶမ်းလၢဝ်သေ ဢမ်ႇသိုပ်ႇလၢတ်ႈသင်ထႅင်ႈယဝ်ႉ။
ၵိၼ်ၶဝ်ႈၵိၼ်သင်ယဝ်ႉ ဢွၼ်ၵၼ်မုင်ႈၼႃႈၵႂႃႇတၢင်းႁူင်းႁဵၼ်းၼၼ်ႉထႅင်ႈလႄႈ၊ ယၢမ်းၼၼ်ႉ ၼႂ်းဝၢင်းႁူင်းႁဵၼ်းၵေႃႈ ၵူၼ်းပေႃးတူင်ႉယူႇသဵင်ႈယဝ်ႉ သဵင်ၽၼ်းမႆႉၽၼ်းတွၵ်ႇၶဝ် မေႃးယူႇတူၵ်ႉတူၵ်ႉတၢၵ်ႉတၢၵ်ႉ၊ ႁူင်းႁဵၼ်းလင်ၵဝ်ႇၼၼ်ႉၵေႃႈ ယႃႉပႅတ်ႈမူတ်းသေယဝ်ႉ လႆႈႁၼ်သဝ်မႂ်ႇမႂ်ႇ သမ်ႉပေႃးပူၵ်းတင်ႈတုၵ်းသုၵ်းတၢၵ်းသၢၵ်းလူင်ၵႂႃႇမူတ်းယူႇ။
“ၵူၼ်းၼမ်ၵျႃႉ..လုၵ်ႉတၢင်းလႂ်တၢင်းလီမႃးၼႆႉ” ၶမ်းလၢဝ်ထၢမ်။
မိူဝ်ႈၼၢႆးလႆႈႁၼ်ၵူၼ်းၸိူဝ်းၼၼ်ႉၵေႃႈ “ၵူၼ်းဝၢၼ်ႈဢၼ်ယူႇႁိမ်းၸမ်ၵၼ်ၼႆႉယဝ်ႉ တေမီးယူႇမွၵ်ႈသီႇႁႃႈဝၢၼ်ႈၼႆႉယဝ်ႈ”
“သီႇႁႃႈဝၢၼ်ႈ!!” ႁဵတ်းႁႂ်ႈၶမ်းလၢဝ်ပေႃးတူၵ်းၸႂ်ယူႇ သီႇႁႃႈဝၢၼ်ႈၼႆၼၼ်ႉ လုၵ်ႈႁဵၼ်းၵေႃႈ ဢမ်ႇၸႂ်ႈဢေႇဢေႇၵူၺ်း သမ်ႉပေႃးၶႂ်ႈႁူၼ်ၵႂၢမ်းၶိုၼ်းယဝ်ႉ။ “တၢႆႁေလႃႈ!..” ၼင်ႈၵွင်ႇယွင်ႇယူႇတၢင်းၶဝ်ႈႁူင်းႁဵၼ်းၼၼ်ႉ ၼင်ႇသဵင်ႈၸႂ်သဵင်ႈၶေႃးယူႇႁင်းမၼ်း။ ယၢမ်းၼၼ်ႉ ၸင်ႇသမ်ႉမီးၵူၼ်းမွၵ်ႈသၢမ်သီႇၵေႃႉ ပႃးတင်းၶိင်းၵႄႇသေ ပႆမႃးတၢင်းၶမ်းလၢဝ်ယူႇၼၼ်ႉလႄႈ ၼၢႆးၸၼ်ႁႂ်ႈၶမ်းလၢဝ်လုၵ်ႉယဝ်ႉ။
“ယူႇလီၵိၼ်ဝၢၼ်ယူႇၶေႃႈၼေႃႈ ပေႃႈႁဵင်”
“ယူႇလီယူႇ..ဢိူဝ်ႈ..ငိၼ်းမေႃယႃဝႃႈမိူဝ်ႈဝႃး ၼၢႆးၶမ်းလႅင်ႁွင်ႉမေႃသွၼ်မႃးၼႆလႄႈ ၵဝ်ၵေႃႈလၢတ်ႈႁႂ်ႈၵူၼ်းတင်းဢိူင်ႇ မႃးၸွႆႈၵၼ် မႄးႁဵတ်းႁူင်းႁဵၼ်းၼၼ်ႉၼႃႇမိူဝ်ႈၼႆႉ” ယၵ်ႉဝၢႆႇတူၺ်းၶိင်းၵႄႇဝၢၼ်ႈဢုင်ၼႆႉသေယဝ်ႉ “ၶိင်းမိူင်းဢိူဝ်ႈ ဢမ်ႇလၢတ်ႈၵဝ်လူင် ဝႃႈမီးမေႃသွၼ်ၼႆ သင်ၼၼ်တႄႉ တေလႆႈဢွၼ်ၵၼ်မႃးႁဵတ်း ၸဵဝ်းယဝ်ႉၸဵဝ်းတူဝ်ႈဢိူဝ်ႈ လုၵ်ႈဢွၼ်ႇၶဝ်ၵေႃႈ တေလႆႈၸဵဝ်းၶိုၼ်ႈႁဵၼ်းဢိတ်ႉၼိုင်ႈၼၼ်ႉၼႃႇမေႃႉ”
ၶိင်းၵႄႇၼၼ်ႉၵေႃႈ ၵူမ်ႈၼႃႈၵူမ်ႈတႃသေ “ၶႃႈၵေႃႈတိုၵ်ႉႁူႉၵူၺ်းၵဝ်ႇၶႃႈဢေႃႈပေႃႈႁဝ်း”
လုင်းႁဵင် ယၵ်ႉတူၺ်းၶမ်းလၢဝ်သေ “ၼႆႉၶႃႈၼေႃႈတေမႃးပဵၼ်မေႃသွၼ်ၼႆႉ”
ၶမ်းလၢဝ်ၵေႃႈငွၵ်းႁူဝ်ၵႂႃႇၵူၺ်း၊ လုင်းႁဵင်ၸင်ႇမႄးဢဝ်မိုဝ်းပႄႈလင်သေယဝ်ႉ ၶိုၼ်းသိုပ်ႇလၢတ်ႈၸူးၵႂႃႇတီႈၶမ်းလၢဝ် “ဢိူဝ်ႈ!…လီယဝ်ႉ.. မႃးယူႇတီႈၼႆႈၵေႃႈ ပေႃးလွင်ႈယူႇလွင်ႈၵိၼ်တႄႉယႃႇမႆႈၸႂ်ၼႃႈ တေႁႂ်ႈၵူၼ်းဝၢၼ်ႈၶဝ်ၶပ်းၶိုင်ပၼ်ၵူၺ်း”
“ဢေႃႈၶႃႈ..” လၢတ်ႈဢွၵ်ႇမႃးၼင်ႇၼၵ်းၸႂ်ဝႆႉယူႇႁင်းမၼ်းယဝ်ႉ။
တူၺ်းပုင်ႇႁၢင်ႈလုင်းႁဵင် ပႃးတင်းထူင်ပႃးဝၼ်ႈၶွၼ်ႇ ၵူၼ်တႆးတဵင်သိူဝ်ႈသုပ်းၼႂ်း သွၼ်ႉသႂ်ႇသိူဝ်ႈတႆးဢမ်ႇမၢတ်ႇမၢၵ်ႇတုမ်ႇ ၵွပ်ႈပုမ်ၶႆဝႆႉႁိုဝ်ဢမ်ႇႁူႉ၊ ၶဵၼ်းႁူဝ်ၶွၼ်ႇတွၼ်ႇၵွပ်ႈၸပ်းတီႈႁူဝ် ၸိူင်ႉၼင်ႇပုင်ႇႁၢင်ႈၵူၼ်းလူင်တႆး ၼၼ်ႉယဝ်ႉ။ သုပ်းသႂ်တင်းၼႃႇရီႇသၢႆၶမ်း တိုဝ်းတင်းၸွမ်ႇမိုဝ်းၶမ်းသႅင်လႅင်ၸၢင်းဢၢင်းလူင်ယဝ်ႉၵေႃႈ ပႃးတင်းၶွၼ်ႉတဝ်ႉလူင်ၼၼ်ႉသေ ပႆလူင်ၶဝ်ႈၵႂႃႇၼႂ်းဝၢင်းႁူင်းႁဵၼ်းၼၼ်ႉလႄႈ လဵပ်ႈၵႂႃႇလဵပ်ႈမႃးယူႇၸွမ်းၸိူဝ်းၼၼ်ႉယဝ်ႉ၊ ႁႅၼ်ၶိုၼ်ႈႁႅၼ်လူင်း တူၺ်းၸွမ်းဢၼ်ၶဝ်ႁဵတ်းၼၼ်ႉယူႇ။
ႁူင်းႁဵၼ်းၵဝ်ႇၼၼ်ႉ လႆႈဢဝ်လဵၵ်းမုင်းဝႆႉပၼ်လႄႈ ဢၼ်မုင်းမၼ်းၼၼ်ႉတႄႉ ဢမ်ႇလႆႈႁႃထႅင်ႈယဝ်ႉ၊ လူဝ်ႇႁႃမႆႉႁႃတွၵ်ႇၼႆၵေႃႈ ၼိုင်ႈႁိူၼ်းသွင်ႁိူၼ်း ၸိူဝ်းၽုၵ်ႇမႆႉမူဝ်ႇမႆႉၵူင်ၼၼ်ႉ ၸွႆႈၵၼ်ဢဝ်မႃး ၵေႃႉလႅမ်ႈသွင်လႅမ်ႈသေ မႃးႁူမ်ႈၵၼ်ၼႆၵေႃႈ ၼင်ႇႁၢင်ႈၵွင်မႆႉတၢင်းၼႃႈႁူင်းႁဵၼ်းၼၼ်ႉ ပဵၼ်ၵွင်လူင်ဝႆႉယူႇယဝ်ႉ။ ၵူၼ်းမႃးႁဵတ်းၼမ်တၢၼ်ႇႁိုဝ်ၵေႃႈ ဢမ်ႇယွမ်းသၢမ်သီႇသိပ်းၼႆႉယဝ်ႉ ဢမ်ႇၸႂ်ႈဝႃႈမႃးၵူႈႁိူၼ်းၼင်ႇၵဝ်ႇလႂ်။ ၵူၼ်းႁဵတ်းမၼ်းၵေႃႈ ပေႃးတူင်ႉလူင်ၵႂႃႇသဵင်ႈ ၵမ်ႈၽွင်ႈႁဵတ်းယူင်ႉမၼ်း၊ ၵမ်ႈၽွင်ႈသၢၼ်ၽႃ၊ ၵမ်ႈၽွင်ႈႁဵတ်းၽိူၼ်ႁဵတ်းတင်ႇ ႁဵတ်းယူႇႁင်းၽႂ်ႁင်းမၼ်း၊ ၵမ်ႈၽွင်ႈၵေႃႈ ၼင်ႈႁေပႂ်ႉတူၺ်း၊ ၵမ်ႈၽွင်ႈၵေႃႈတူဝ်ဢမ်ႇႁဵတ်းသေ ၸႂ်ႉပိူၼ်ႈႁဵတ်း ဢၼ်ပုၼ်ႉဢၼ်ၼႆႉယူႇၵေႃႈမီး။ သဵင်ၵူၼ်း၊ သဵင်ၽၼ်းမႆႉ မေႃးဢူၼ်ဢၢၼ်သူၼ်ႈသိၼ်းသၢၼ်လူင်ၵႂႃႇမူတ်းယဝ်ႉ။
ဢမ်ႇႁိုင်ဢမ်ႇၼၢၼ်း ႁူင်းႁဵၼ်းၼၼ်ႉၵေႃႈ ပဵၼ်ႁၢင်ႈပဵၼ်ၽၢင်မႃး မီးယူင်ႉမီးၶၢပ်ႈမႃး လီယူႇလီသဝ်းမႃးလိူဝ်ၵဝ်ႇ ယူႇယဝ်ႉ။
