တွၼ်ႈႁူၵ်း
ၶမ်းလၢဝ်ၼၼ်ႉၵေႃႈ မိူဝ်ႈလႆႈႁူပ်ႉလႆႈႁၼ်လၢႆၸိူဝ်ႉလၢႆလွင်ႈ ႁူမ်ႈပႃး လွင်ႈဢၼ်မေႃယႃလၢတ်ႈတီႈမၼ်းမိူဝ်ႈၼႂ်ၵႆႈၼၼ်ႉသေ ဢဝ်မၼ်းမႃးၵဵပ်းဝူၼ်ႉယူႇတင်းဝၼ်းယဝ်ႉ၊ ယၢမ်းၵၢင်ၶမ်ႈ ၼိူဝ်ၽိူၼ်မူႇၶဝ်ႈ ၾႆးပိူင်းဝွႆးဝွႆး ၶမ်းလၢဝ် ၸင်ႇလၢတ်ႈၸူးၵႂႃႇတီႈၼၢႆးၶမ်းလႅင်
“ၶႃႈတေၸၢမ်းတူၺ်း!..”
ဢဝ်ၼၢႆးသမ်ႉပေႃးၵိုတ်းၵိၼ်ၶဝ်ႈၵႂႃႇၵႅပ်ႉၼိုင်ႈ ယၵ်ႉတူၺ်းၶမ်းလၢဝ်သေ
“လီယဝ်ႉ! ပေႃးဢမ်ႇၸၢမ်းၵေႃႈဢမ်ႇႁူႉလူး မိူဝ်ႈလႂ်ဢမ်ႇပဵၼ်ၸင်ႇဝႃႈၵၼ်ၵေႃႈလႆႈယူႇ”
လႅင်းမိူင်းသႂ်ၼၼ်ႉၵေႃႈ တၵ်းဢဝ်ၽၵ်းၵၢတ်ႇၼႂ်းဝၢၼ်ႇၼၼ်ႉ သႂ်ႇပၼ်ၶမ်းလၢဝ်
“ၵိၼ်ၼမ်ၼမ်လႄႈ”
“ၵိၼ်ယူႇၵူႈဝၼ်း သမ်ႉပေႃးၶႂ်ႈပဵၼ်မူင်ႈၽၵ်းၵၢတ်ႇယဝ်ႉဢိူဝ်ႈ”
ဝၢႆးသေၵိၼ်ၶဝ်ႈၵိၼ်သင်ယဝ်ႉ ၼၢႆးၵေႃႈၸူဝ်းႁွင်ႉဢဝ်ၶမ်းလၢဝ် မိူဝ်းတၢင်းႁိူၼ်းၶိင်းၵႄႇၶဝ်ၼၼ်ႉယဝ်ႉ။ လုင်းၵႄႇလွႆႁိူင်းၶဝ်ၼၼ်ႉၵေႃႈ ဢိူဝ်ႈဢေႃႈၵႂႃႇၵူၺ်း၊ ၶမ်းလၢဝ်ၵေႃႈ ၼင်ႇဢၼ်လႆႈႁၼ်ႁူင်းႁဵၼ်းယွၵ်းၽင်ႉလူင်ၵႂႃႇမူတ်းၼၼ်ႉ လႆႈတုၵ်းယွၼ်းႁႂ်ႈ မႄးၵုမ်းလုမ်းလႃးၶိုၼ်းမူတ်းမူတ်းလႄႈ သင်ႁႂ်ႈလီ ႁဵတ်းပၼ်ဢၼ်မႂ်ႇၼႆသေတႃႉ၊ ၶိင်းၵႄႇၼၼ်ႉၵေႃႈ ယင်းဢမ်ႇပႆႇပၼ်ၶေႃႈတွပ်ႇလႆႈဝႃႈ တေႁဵတ်းပၼ်လႄႈ ပေႃးဝႃႈၶမ်းလၢဝ်တေမႃးသွၼ်ၼႆၵေႃႈ လၢတ်ႈဝႃႈတေႁႂ်ႈၵူၼ်းဝၢၼ်ႈၶဝ် ၵႂႃႇၽဵဝ်ႈပၼ်သေ ပိုတ်ႇသွၼ်ၵႂႃႇထႃႈ ၸူဝ်ႈၵႃႈပႆႇလႆႈႁဵတ်းပၼ်ႁူင်းႁဵၼ်းထႅင်ႈၼၼ်ႉၼႆၵူၺ်းယူႇ။
မိူဝ်ႈလႆႈႁူႉလႆႈငိၼ်းၼင်ႇၼၼ် ၶမ်းလၢဝ်ၶႃၼၢႆးၵေႃႈ လႆႈဢွၼ်ၵၼ်ယွၼ်းၶႂၢင်ႉပွၵ်ႈၶိုၼ်းယဝ်ႉ။ လႆႈႁၼ်ၶိင်းၵႄႇၶဝ်ၼၼ်ႉ ဢမ်ႇပေႃးသူၼ်ၸႂ်ၼိူဝ်လွင်ႈႁူင်းႁဵၼ်းၼႆႉသင်သေဢိတ်း ဢမ်ႇမီးၵေႃႈ ဢၢပ်ႈတေဢမ်ႇၸႂ်ႈလွင်ႈယၢပ်ႇတွၼ်ႈတႃႇၶဝ်ၼၼ်ႉယဝ်ႉ၊ မီးၵေႃႈလီ ဢမ်ႇမီးၵေႃႈဢမ်ႇပဵၼ်သင်ၼၼ်ႉၵူၺ်း။
“တူၺ်းမိူၼ်လုင်းၵႄႇတမ်ႉဢမ်ႇပေႃးသူၼ်ၸႂ်လွင်ႈၼႆႉသင်ၵႃႈႁိုဝ်လႃႇ”
ၼၢႆးၵေႃႈထူၺ်ႈၸႂ်လူင်မႃး ၼင်ႇဢမ်ႇၶႂ်ႈလၢတ်ႈသင်ထႅင်ႈယဝ်ႉလႄႈ “ဢိူဝ်ႉ! ၼႆႉယင်းတိုၵ်ႉတႄႇႁႅၵ်ႈၵူၺ်း ဢမ်ႇပႆႇလႆႈၸိမ်းတူၺ်းၼမ်ႉလႅမ်ႉမၼ်းသေဢိတ်းလူးၵွၼ်ႇ”
သွင်ၶႃၵေႃႈ ယဵၼ်လူင်မိူဝ်းၵႂႃႇတေႃႇပေႃးသုတ်းတၢင်းယူႇယဝ်ႉ။
ယၢမ်းၵၢင်ၼႂ် မိူင်းတိုၵ်ႉပၢင်ႇမႃးၼၼ်ႉ ၶမ်းလၢဝ်လႄႈၼၢႆး ႁူမ်ႈပႃးလႅင်းမိူင်းသႂ်ၵေႃႈ ဢွၼ်ၵၼ်ၵႂႃႇတီႈႁူင်းႁဵၼ်းယူႇ။ ၵူၺ်းၵႃႈ ဢမ်ႇလႆႈႁၼ်ၽႂ်သေၵေႃႉဢၼ်မႃးၸွႆႈ တေႃႈၼင်ႇၶိင်းၵႄႇၵေႃႈယင်းဢမ်ႇမႃးတူၺ်းသေဢိတ်းလူးၵွၼ်ႇ။
“မိူဝ်ႈၼႆႉဢမ်ႇၸႂ်ႈႁႃႉၼၢႆး ၶဝ်ဝႃႈတေမႃးၽဵဝ်ႈပၼ် တမ်ႉႁၼ်ၽႂ်မႃးလႃႇ”
ၼၢႆးၵေႃႈထူၺ်ႈၸႂ်လူင်မႃးသေယဝ်ႉ ယၵ်ႉတူၺ်းၼႃႈၶမ်းလၢဝ် ဢၼ်ဢမ်ႇပေႃးလီသေၵႃႈႁိုဝ်ၼၼ်ႉလႄႈ “ဢိူဝ်ႈ!..ႁဵတ်းၵႂႃႇပႂ်ႉထႃႈၶဝ်လႄႈ ၵမ်ႉၵေႃႈတေဢွၼ်ၵၼ်မႃးယဝ်ႉ”
ၼၢႆးၸင်ႇဢဝ်သဵမ်ပၼ်ၶမ်းလၢဝ် ႁႂ်ႈၸွၼ်ႉယိူဝ်ႈတၢင်းၼႃႈႁူင်းႁဵၼ်းၼၼ်ႉၼႆယူႇ ၵူၺ်းၵႃႈၶမ်းလၢဝ်ၼၼ်ႉသမ်ႉ ဢမ်ႇတွၼ်ႉယိပ်းသဵမ်ႁေပွၵ်ႈလႄႈ သင်ဢမ်ႇယၢမ်ႈႁၼ် ၶေးတေဢမ်ႇႁူႉပိူၼ်ႈၸႂ်ႉႁဵတ်းသင်လူးၵွၼ်ႇ၊ သမ်ႉဝႃႈယၢမ်ႈႁၼ်ၵေႃႈ ပေႃးဢမ်ႇလႆႈမႃးယိပ်းတူၺ်းၼႆ ယင်းဢမ်ႇႁူႉဝႃႈ ပိူၼ်ႈႁဵတ်းႁိုဝ်ၸွၼ်ႉယိူဝ်ႈၵွၼ်ႇယဝ်ႉ၊ တူၼ်ႈယိူဝ်ႈယႂ်ႇဢမ်ႇယႂ်ႇၵေႃႈ ၸေႃႉၶုတ်းသႂ်ႇၶုတ်းသႂ်ႇ တၢၼ်ႇပိူၼ်ႈၶူတ်ႉလိၼ်ယဝ်ႉ။ ၼၢႆးဢၼ်ႁၼ်ၸိူင်ႉၼၼ်ၵေႃႈ မိူၼ်တေဢမ်ႇၸႂ်ႈလၢႆးမၼ်းယဝ်ႉလႄႈ ဢဝ်ၽႃႉပၼ်ႁႂ်ႈမၼ်းတီႇၽၼ်းတူၼ်ႈမႆႉယုမ်းယႂ်ႇ ၼႂ်းဝၢင်းႁူင်းႁဵၼ်းၼၼ်ႉၼႆယူႇ။ ပေႃးမၼ်းငႃယဝ်ႉ ၽၼ်းသႂ်ႇတူၼ်ႈမႆႉၼႆၵေႃႈ မိုဝ်းမၼ်းပွႆႇၽႃႉပႅတ်ႈၵႂႃႇ ၼင်ႇပိူၼ်ႈသိင်းႁိၼ်ၼၼ်ႉလႄႈ ၽႃႉၼၼ်ႉၵေႃႈ သမ်ႉပေႃးသဵၼ်ဝူင်သဵၼ်ဝၢင် တူၵ်းယူႇႁိမ်းလႅင်းမိူင်းသႂ်ၼၼ်ႉယဝ်ႉ။
“ပီႈၼၢင်း!! ႁဵတ်းသင်လႃႇ တေဢဝ်ၵၼ်ႁႂ်ႈတၢႆႁႃႉ”
ၶမ်းလၢဝ်ၵေႃႈ ၵႂႃႇၵဵပ်းဢဝ်ႁေ “မၼ်းၶႂ်ႈယၢမ်ႈၵႂႃႇယဝ်ႉဢိူဝ်ႈ! ၽႃႉမၼ်းပွတ်းပႅတ်ႈဢိၼ်ႉ လူဝ်ႇၺႃးလႅဝ်းႁမ်းငၢႆးၼႆႉဢိူဝ်ႈ ၸင်ႇၽၼ်းၶႅမ်ႉ”
လႅင်းမိူင်းသႂ်သုတ်ႉပၢႆႈၵႂႃႇတၢင်းၼၢႆးၼၼ်ႉဝႆးဝႃႈဝႆးယဝ်ႉ “ ၵူၼ်းယိင်းႁင်ဝႃႈ ပေႃးၶႂ်ႈလီၵူဝ်ယဝ်ႉယိုင်”
ၼၢႆးၵေႃႈမႄးသွပ်ႉသႅပ်ႉမၼ်းၵႂႃႇ “ပေႃးယိပ်းၽႃႉယိပ်းမိတ်ႈႁဵတ်းၼႆ ယႃႇၶႂ်ႈၵႂႃႇၶတ်းမၼ်းလႃးလႃး”
“ႁဵတ်းႁင်ၶႃႈလႃႇၼၢႆး..မၼ်းႁၢႆႉၼႃႇၶႃႈႁႃႉ”
“ဢိူဝ်ႈ…ႁူႉမွၵ်ႈၼႆႉၵူၺ်းလႃႈၼႃႈ ပေႃးဢမ်ႇၵူဝ်မၢတ်ႇၸဵပ်းၵေႃႈ”
ယၢမ်းၼၼ်ႉ သႅင်ၼူၼ်းၵေႃႈႁွတ်ႈမႃးသေ သၢႆတႃလႅင်းမိူင်းသႂ်ၼၼ်ႉတႄႉ ဝၢႆႇယၵ်ႉတူၺ်းၸူး ပေႃးဢမ်ႇၽၢတ်ႇလႆႈ၊ သႅင်ၼူၼ်းၵေႃႈ တူင်ႉတၵ်ႉယုမ်ႉၸူးၼင်ႇဢူၼ်ႈဢွၼ်ႇသေယဝ်ႉ ဢဝ်တင်းသဵမ်ဢၼ်မၼ်းဝႅၵ်ႇမႃးၼၼ်ႉ ၸွၼ်ႉယူႇတီႈႁိမ်းၼၢႆးၼၼ်ႉသေ ဢုပ်ႇၵၼ်ယူႇ။
“ယူဝ်ဝႃႈတေဢမ်ႇမီးၽႂ်မႃးယဝ်ႉ!..” ၼၢႆးလၢတ်ႈ။
“ၶႃႈမႃးႁႃတီႈႁိူၼ်းဢမ်ႇႁၼ်ၽႂ်.. ထၢမ်တူၺ်းပႃႈထွၼ်းႁေ ၸင်ႇႁူႉဝႃႈၼၢႆးႁဝ်းၶဝ်မႃးႁူင်းႁဵၼ်းၼႆ ၶႃႈမႃးငွၵ်ႈတူၺ်းယူႇၵမ်းၼိုင်ႈ ႁၼ်ၼၢႆးၼႆၵေႃႈ ၼႅတ်ႈမိူဝ်းဢဝ်သဵမ်မႃးၼႆႉၶႃႈယိုင်”
“ၶိင်းၵႄႇၶဝ်ဢမ်ႇလႆႈလၢတ်ႈဝႆႉႁႃႉၼႆႉ”
“တူၺ်းတႄႉဢမ်ႇဢၢပ်ႈမီးၽႂ်ႁူႉၶႃႈ သင်လၢတ်ႈတႄႉ တေမီးၵူၼ်းမႃးယူႇၵူၺ်းၶႃႈဢေႃႈ”
“ႁႅင်ႉၶိင်းၵႄႇၼႆႉၸၢင်ႈပဵၼ်ၼႆဢေႉ..ဝႃႈလႃးၵေႃႈမၼ်းလိုမ်းႁႃႉတေႃႈ.. လူဝ်ႇမိူဝ်းတူၺ်းယူႇယူဝ်ႉၼႆႉမႃႈ”
ၶမ်းလၢဝ်ငိၼ်းၼၢႆးလၢတ်ႈၸိူင်ႉၼၼ်ၵေႃႈ ပႅတ်ႈၽႃႉမၼ်းသေ ၶႃႈတေမိူဝ်းတူၺ်းလႂ်ၼၢႆး.. ၼၢႆးယင်းပႆႇတၼ်းလႆႈလၢတ်ႈသင် မၼ်းသမ်ႉပေႃးလႅၼ်ႈလူင်ဢွၵ်ႇၵႂႃႇယဝ်ႉၼႃႇ။
မိူဝ်ႈႁွတ်ႈထိုင်ႁိူၼ်းၶိင်းၵႄႇ၊ ႁၼ်ၶိင်းၵႄႇၼင်ႈၶႃၵၢႆႇၵွၼ်း ဢိင်တင်ႇၼင်ႈႁေ သူတ်ႉၼမ်ႉၼဵင်ႈတင်းလႅၼ်းယႃႈတွင်မၼ်း ယူႇတီႈၼိူဝ်ၸၢၼ်းၼၼ်ႉလႄႈ ၶမ်းလၢဝ်ၵေႃႈယူႇတႂ်ႈလၢင်ႈႁေႁွင်ႉၸူး
“လုင်းၵႄႇ!! လုင်းၵႄႇ..”
“ၽႂ်မႃးႁွင်ႉလႃႇၼႆႉမႃႈ” ယိပ်းတင်းလႅၼ်းယႃႈမၼ်းၼၼ်ႉသေ မႃးငွၵ်ႈတူၺ်းတီႈၸၢၼ်းၼၼ်ႉ ႁၼ်ၶမ်းလၢဝ်ယဝ်ႉၵေႃႈ။
“ၼၢင်းမီးလွင်ႈႁင်လႃႇ”
“မိူဝ်ႈၼႆႉလုင်းၵႄႇဝႃႈ ႁႂ်ႈဢွၼ်ၵၼ်ၵႂႃႇၽဵဝ်ႈႁူင်းႁဵၼ်းၼႆၶႃႈႁိုဝ် ဢမ်ႇႁၼ်ၽႂ်မႃးၶႃႈလႃႇ ၶႂ်ႈမႃးထၢမ်ဝႃႈလုင်းၵႄႇဝႃႈ..လႆႈလၢတ်ႈယူႇႁႃႉၼႆဢေႃႈ”
“ဢိူဝ်ႈ.. ၵဝ်လၢတ်ႈႁႂ်ႈဢၢႆႈၸွႆႉႁႂ်ႈမိူဝ်းလၢတ်ႈယူႇဢိူဝ်ႈၼႆႉ” မၼ်းၸင်ႇၵူမ်ႈၼႃႈတူၺ်းၵႂႃႇတၢင်းၶွၵ်ႈဝူဝ်းၼၼ်ႉသေႁွင်ႉလၢတ်ႈၵႂႃႇ “ဢၢႆႈၸွႆႉ! မႂ်းလႆႈမိူဝ်းလၢတ်ႈယူႇႁႃႉ”
“ဢေႃႈ! မိူဝ်းလၢတ်ႈယူႇၶႃႈပေႃႈႁဝ်း” ဢၢႆႈၸွႆႉပဵၼ်လုၵ်ႈလဵင်ႉတီႈႁိူၼ်းၶိင်းၵႄႇၶဝ် မၼ်းၵေႃႈၽဵဝ်ႈၶီႈဝူဝ်းယူႇၼႂ်းၶွၵ်ႈၼၼ်ႉယဝ်ႉ။
“ဢိူဝ်ႈ..ဢိူဝ်ႈ.. ၵၢၼ်ၶဝ်ပႆႇယဝ်ႉလႄႈ ၶဝ်ပႆႇတၼ်းၵႃႈဝႃႈၼၢင်းဢိူၺ်ႉ!”
ၶိင်းၵႄႇၼၼ်ႉၵေႃႈ မႄးၶဝ်ႈၵႂႃႇၼင်ႈသူတ်ႉၼမ်ႉၼဵင်ႈမၼ်းသေယဝ်ႉ၊ ၶမ်းလၢဝ်ၵေႃႈ ဢမ်ႇႁူႉဝႃႈတေႁဵတ်းၸိူင်ႉႁိုဝ်ယဝ်ႉလႄႈ သင်ဝႃႈတေႁဵတ်းၵူၼ်းမွၵ်ႈသၢမ်သီႇၵေႃႉၵူၺ်းတႄႉ ဢၢပ်ႈဢမ်ႇယဝ်ႉလႆႈယဝ်ႉၼႆသေ၊ မၼ်းၸင်ႇမိူဝ်းတူၺ်းၵႂႃႇ တီႈၼႂ်းဝၢၼ်ႈၸိူဝ်းၼၼ်ႉ ၶဝ်ႈမိူဝ်းတူၺ်းႁိူၼ်းၼိုင်ႈယဝ်ႉႁိူၼ်းၼိုင်ႈယူႇ ၵမ်ႈၼမ်ၵေႃႈဢမ်ႇပေႃးမီးၽႂ်ယူႇႁိူၼ်း တေဢွၼ်ၵၼ်ၵႂႃႇၼႃးၵႂႃႇသူၼ်မူတ်းယဝ်ႉ၊ တင်းၵႂႃႇတင်းငွၵ်ႈတူၺ်းၸွမ်းႁိူၼ်းပိူၼ်ႈ ၸင်ႇႁၼ်မႅၼ်ႈလုင်းၸၢမ်ႇ ၽၼ်းမႆႉယူႇတၢင်းၼႃႈႁိူၼ်းမၼ်းၼၼ်ႉ တူၵ်ႈ!..တူၵ်ႈ!!..ၼႆၵေႃႈ ၶမ်းလၢဝ်ၸင်ႇႁွင်ႉၸူးၵႂႃႇ
“လုင်း!! ဢမ်ႇၵႂႃႇၸွႆႈၵၼ်ႁဵတ်းလိူမ်ႈလႆႇၸွမ်းႁူင်းႁဵၼ်းၶႃႈႁႃႉ”
“တေၵႂႃႇႁဵတ်းသင်.. လုၵ်ႈဢွၼ်ႇၵေႃႈဢမ်ႇမီးႁေၵေႃႉ ဢမ်ႇၵႂႃႇယဝ်ႉၼၢင်းဢူၺ်ႉ!”
ယၢမ်းၼၼ်ႉၸင်ႇသမ်ႉႁၼ်ပႃႈၶမ်း ပႆမႃးတၢင်းၼၼ်ႉသေ “ပႃႈၶႃႈ..ဢမ်ႇၵႂႃႇလိူမ်ႈလႆႇတီႈႁူင်းႁဵၼ်းၶႃႈႁႃႉမိူဝ်ႈၼႆႉ”
“ဢမ်ႇၵႂႃႇယဝ်ႉၼၢင်းဢူၺ်ႉ! လူဝ်ႇၵႂႃႇသွမ်ႈၼႃးဢိူဝ်ႈမိူဝ်ႈၼႆႉ လႆႈဢဝ်ဝၼ်းပိူၼ်ႈဝႆႉၼၼ်ႉၼႃႇ ပႃႈဢမ်ႇတၼ်းၵႂႃႇယဝ်ႈ” ပႆပူၼ်ႉၽႅတ်ႈမၼ်းၵႂႃႇယူႇယဝ်ႉ။
ယၢမ်းၼၼ်ႉၸင်ႇသမ်ႉမီးပႃႈၶွင်ႇ ယူႇၼႃႈၵိူၼ်ႇမၼ်းၼၼ်ႉသေ ပွင်ႉၸူးလုၵ်ႈၸၢႆးမၼ်းဢၢႆႈလႅင်း ဢၼ်ၸင်ႇႁႃပဵၼ်လုၵ်ႈဢွၼ်ႇမွၵ်ႈ 14 ပီႊ ၼႆႉၵူၺ်းၼၼ်ႉဝႃႈ “ၵႂႃႇၼႃးလိုမ်းၵႂၢႆးဢၼ်ဝႃႈ ပဵၼ်ၶိူဝ်ပေႃႈလုၵ်ႈၼႆႉယဝ်ႉ တေၽၼ်းမႆႉသမ်ႉလိုမ်းၽႃႉႁိုဝ်ႉ! ၵႂႃႇတၢင်းဝၼ်းၵေႃႈႁိုဝ်တေလႆႈႁင်မႃးႁိူၼ်းၼႄႇ”
“ပႃႈမိူဝ်ႈၼႆႉၽဵဝ်ႈႁူင်းႁဵၼ်းၶႃႈဢေႃႈ ဢမ်ႇၵႂႃႇၶႃႈႁႃႉ ”
“ဢမ်ႇၵႂႃႇယဝ်ႉၼၢင်းဢူၺ်ႉ ဢၢႆႈလႅင်းႁဝ်းၵေႃႈဢမ်ႇၸၢင်ႈၵႂႃႇႁူင်းႁဵၼ်းၼင်ႇၵဝ်ႇ”
“ဢၢႆႈၼွင်ႉၵေႃႈယင်းတိုၵ်ႉၵေႃႉလဵၵ်ႉယူႇ ထိုင်ပၢၼ်လီလႆႈႁဵၼ်းလိၵ်ႈႁဵၼ်းလၢႆးၶႃႈဢေႃႈ”
“ၼၢင်းဢူၺ်ႉ ပႃႈမီးလုၵ်ႈၸၢႆးၵေႃႉလဵဝ်ၵူၺ်း ပေႃးဝႃႈပွႆႇၵႂႃႇႁူင်းႁဵၼ်းၵေႃႈ ဢမ်ႇမီးၵူၼ်းႁဵတ်းၵၢၼ်လဵင်ႉႁႃးႁေယဝ်ႉလေႃႇ”
ပႃႈၶွင်ႇၵေႃႈ ဢိုတ်းၵိူၼ်ႇသေၶဝ်ႈႁိူၼ်းမိူဝ်းၵႂႃႇယဝ်ႉ၊ ၶမ်းလၢဝ်ၵေႃႈ ထူၺ်ႈၸႂ်လူင်ၶဝ်ႈ..ထူၺ်ႈၸႂ်လူင်ဢွၵ်ႇ..ယူႇတၢင်းႁိုင် ၸင်ႇမိူဝ်းႁွတ်ႈထိုင်တၢင်းၽႄ ၼႂ်းၵိဝ်ႇၵၢင်ဝၢၼ်ႈၼၼ်ႉ ငိၼ်းသဵင်ႁွင်ႉသႅၼ်ႇလုၵ်ႈဢွၼ်ႇၶဝ် လႅၼ်ႈလမ်းလူၺ်းၵၼ် သဵင်ႁွင်ႉႁႆႈလုၵ်ႈဢွၼ်ႇ ဢၼ်ၼင်ႈငွမ်ယူႇၸွမ်းၸဵင်ႇၸွၵ်ႉႁူဝ်ႉၸိူဝ်းၼၼ်ႉသေ ႁဵတ်းႁႂ်ႈမၼ်းယိုင်ႈၶႅၼ်းထူၺ်ႈၸႂ်လူင်မႃးထႅင်ႈယဝ်ႉ။
“မိုင်တူၺ်းသင်ယူႇၶႃႈ..” ၼႆႉတႄႉပဵၼ်သင်မေႃယႃဢွၼ်တိုၼ်းယဝ်ႉ။
ၶမ်းလၢဝ်ၵေႃႈဝၢႆႇတူၺ်းမေႃယႃသေ “မီးၵၢၼ်ၼႂ်းဝၢၼ်ႈၼႆႉၶႃႈႁႃႉ ဢေႃ..ပေႃးဢမ်ႇမီးၵၢၼ်ၽႂ်တေႁဵတ်းႁိုဝ်မႃးၼႆ”
“လၢတ်ႈၵူၺ်းတွပ်ႇၵူၺ်း.. ႁဝ်းဢမ်ႇလူဝ်ႇလၢတ်ႈသင်ယဝ်ႉ တေၵႂႃႇတၢင်းလႂ်လႃႇ ပၢႆႈၵၢၼ်ယူႇႁႃႉတေႃႈ”
တူၺ်းႁၢင်ႈတူၺ်းၽၢင်ၶမ်းလၢဝ်ၼၼ်ႉၵေႃႈ မိူၼ်ၵူၼ်းတေၵႂႃႇႁဵတ်းၵၢၼ်မႃးၼၼ်ႉသေ မေႃယႃၸင်ႇလၢတ်ႈတီႈမၼ်းၼင်ႇၼႆယဝ်ႉ။
“မႃးႁႃၵူၼ်းႁဵတ်းၵၢၼ်ၶႃႈဝႃႇ ဢမ်ႇဢၢပ်ႈမီးၽႂ်ယဝ်ႉ ၵႂႃႇၵွၼ်ႇယဝ်ႉၶႃႈၼႃႈ”
“ႁဵတ်းၵၢၼ်သင်ၶႃႈ လၢတ်ႈႁႂ်ႈႁဝ်းၸွႆႈလႆႈယူႇၶႃႈၼႃ”
“ၽဵဝ်ႈႁူင်းႁဵၼ်းၶႃႈဢေႃႈ ပေႃးမေႃယႃတၼ်းၵေႃႈ ၵႂႃႇၸွႆႈၵၼ်လႆႈယူႇၶႃႈၼႃႈ”
မိူဝ်ႈဢၼ်ၽႅတ်ႈမိူဝ်းၵႂႃႇတၢင်းႁိူၼ်း လုင်းသၢင်ႇမိူင်းလႄႈမႄႈသၢင်ႇၼူႉၶဝ်ၼၼ်ႉ ၶႃၽူဝ်မေးမိူၼ်တေႁၼ်ၶမ်းလၢဝ်သေ
“မေႃသွၼ်တေၵႂႃႇတၢင်းလႂ်ၶႃႈ!..”
“ဢေႃ.. တေၵႂႃႇၽဵဝ်ႈတီႈႁူင်းႁဵၼ်းဢေႃႈ”
“ဝႃႈၼၼ်ႁႃႉ ဢမ်ႇႁၼ်ၶိင်းၵႄႇၶဝ်မႃးလၢတ်ႈလႃႇ ၶိင်းလူင်”
“ဢိူဝ်ႈ..ႁဝ်းၵေႃႈဢမ်ႇလႆႈငိၼ်းၶဝ်ဝႃႈႁိုဝ်လူင်ၼၼ်ႉ..”
“ဢိူဝ်ႈ!..မိူဝ်ႈၼႆႉႁဝ်းၵေႃႈဢမ်ႇလူဝ်ႇၵႂႃႇလႂ်ၵဝ်ႇ ၵႂႃႇလႄႈၼၢႆးၼႆႉ.. ႁဝ်းဢွၼ်ၵၼ်ၵႂႃႇၸွႆႈမေႃသွၼ်ၶဝ်”
“ဢိူဝ်ႈဢိူဝ်ႈ ႁဝ်းဢဝ်ၵုပ်းႁဝ်းၵမ်ႉလႄႈပေႃးၼၼ်”
လုင်းသၢင်ႇမိူင်းၶႃၽူဝ်မေးၵေႃႈ ဢွၼ်ၵၼ်ၵႂႃႇၸွမ်းၶမ်းလၢဝ်ယူႇယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
