တွၼ်ႈႁႃႈ
သႅင်ၼူၼ်းၼၼ်ႉၵေႃႈ လွမ်ငွၵ်ႈတူၺ်းၵႂႃႇၼႂ်းႁိူၼ်း ဢၼ်လပ်းသိင်ႇၽိုတ်းၽိုတ်းၼၼ်ႉသေ ဢမ်ႇလႆႈႁၼ်သင်ၼၼ်ႉလႄႈ ၸင်ႇႁွင်ႉႁႃၶမ်းလၢဝ်လွႆးလွႆးယူႇ၊ ၽွင်းဢၼ်သႅင်ၼူၼ်း ဢၢင်ႈယဵပ်ႇၽၵ်းတူၶဝ်ႈႁိူၼ်းၵႂႃႇၼၼ်ႉ လႅင်းမိူင်းသႂ်ၵေႃႈ ဢဝ်တင်းၾႆးထၢတ်ႈမႃးပၼ်မၼ်းသေ
“ၼႆႉၶႃႈၾႆးထၢတ်ႈ”
သႅင်ၼူၼ်းယိပ်းဢဝ်ယဝ်ႉ “ၸူမ်းၶႃႈ” ၶဝ်ႈမိူဝ်းၼႂ်းႁိူၼ်းသေ မိူဝ်းၸပ်းငွႆးၾႆးဢၼ်မီးယူႇၼႂ်းႁိူၼ်းၼၼ်ႉလႄႈ ၵႂႃႇၸူးတီႈၶမ်းလၢဝ်ၼွၼ်းၼၼ်ႉယဝ်ႉ။
“ပီႈလပ်းယဝ်ႉႁႃႉ.. ” လႆႈႁၼ်ၶမ်းလၢဝ်ၽိုၼ်ႉတူဝ် ယၵ်ႉဝၢႆႇတူၺ်းၸူးမၼ်း “ပီႈပဵၼ်ႁိုဝ်မႃးၶႃႈ..လႆႈၵိၼ်ၶဝ်ႈၵိၼ်ယႃယဝ်ႉၼႄႇ..ၶႃႈဢဝ်ၶဝ်ႈၵၢပ်ႇတုင်မႃးလဵင်ႉဢေႃႈ”
“ဢိုမ်ႈ!”
ၸူဝ်ႈၽွင်းဢၼ်ၶမ်းလၢဝ်ဢမ်ႇယူႇလီၼၼ်ႉ သႅင်ၼူၼ်းၵေႃႈၵွပ်ႈႁိူၼ်းၸမ်လႄႈ တေမႃးလႄႇမႃးၸႂ်းၶမ်းလၢဝ်ၵူႈဝၼ်း၊ ၵႆႉမႃးဢုပ်ႇမႃးလၢတ်ႈတေႃႇမၼ်းတႃႇသေႇ ၵူၺ်းၵႃႈ ၶမ်းလၢဝ်ဢမ်ႇပေႃးယူႇလီႁေ ဢမ်ႇပေႃးသႂ်ႇၸႂ်ၼၼ်ႉၵေႃႈ ဢမ်ႇလႆႈသူၼ်ၸႂ်မၼ်း ဢေႃႈဢိုမ်ႈ ၵႂႃႇႁဵတ်းၼၼ်ၵူၺ်း။
သႅင်ၼူၼ်းၵေႃႈဢမ်ႇႁူႉတေလၢတ်ႈသင်ထႅင်ႈယဝ်ႉလႄႈ သင်ႇၶမ်းလၢဝ် “ၶႃႈမိူဝ်းယဝ်ႉၼႃႈ” ဢွၵ်ႇၵႂႃႇပႅတ်ႈယူႇ။
ၶမ်းလၢဝ်ၼၼ်ႉၵေႃႈ တူၺ်းတင်းငွႆးၾႆးဢၼ်လႅင်းမၢပ်ႈလႅင်းမၢပ်ႈ လႄႈတင်းငဝ်းလင်သႅင်ၼူၼ်း မိူဝ်ႈတိုၵ်ႉဢွၵ်ႇၽၵ်းတူၵႂႃႇၼၼ်ႉယဝ်ႉ။ ၸွမ်းလူၺ်ႈလွင်ႈၶမ်ၸႂ် ဢၼ်ႁဵတ်းႁႂ်ႈဝူၼ်ႉၼမ်ယူႇၼၼ်ႉ ၸင်ႇလႆႈႁွင်ႉထၢမ်ၵႂႃႇတီႈ သႅင်ၼူၼ်း
“ပဵၼ်သင်လႄႈ တေလႆႈပွႆႇႁႂ်ႈႁူင်းႁဵၼ်းၼၼ်ႉ ႁၢမ်းၵႂႃႇၸိူင်ႉၼၼ်လႃႇ”
ဢဝ်သႅင်ၼူၼ်းၵိုတ်းၵႂႃႇသေ ၼၢႆးလႄႈတင်းလႅင်းမိူင်းသႂ်ၼၼ်ႉၵေႃႈ မိူၼ်တေလႆႈငိၼ်းယူႇဝွႆးဝွႆး မိုင်ယဵၼ်ထွမ်ႇၸွမ်းယူႇ။
“မၼ်းဢမ်ႇမီးမေႃသွၼ်လႄႈ လၢႆႈႁၢမ်းၵႂႃႇပႅတ်ႈၶႃႈဢေႃႈ”
“ႁူင်းႁဵၼ်းၼၼ်ႉမီးၸဵမ်မိူဝ်ႈလႂ်ပုၼ်ႉလႃႇ..”
“ႁိုင်ယဝ်ႉၶႃႈ တေလႆႈမွၵ်ႈႁႃႈပီႊၼႆႉယဝ်ႉၶႃႈယူဝ်ႉ မေႃသွၼ်မၼ်းမႃးသွၼ်လႆႈယူႇမွၵ်ႈၶိုင်ႈပီႊၼႆႉၵူၺ်းလႄႈ ဢိုတ်းႁဵၼ်းသေယဝ်ႉ မိူဝ်းၸႂ်းႁိူၼ်းႁေ ဢမ်ႇၶိုၼ်းပွၵ်ႈမႃးသွၼ်ထႅင်ႈႁေပွၵ်ႈၶႃႈယဝ်ႉ၊ ဝၢႆးႁေၼၼ်ႉ တီႈၼႆႈၵေႃႈ ဢမ်ႇမီးမေႃသွၼ်ႁေပွၵ်ႈလႄႈ ႁူင်းႁဵၼ်းၸင်ႇလႆႈဢိုတ်းၵႂႃႇပႅတ်ႈၶႃႈဢေႃႈ”
“လုၵ်ႈဢွၼ်ႇၼႂ်းဝၢၼ်ႈၼႂ်းသူၼ်ၼႆႉၵေႃႈ ဢမ်ႇလႆႈသွၼ်လိၵ်ႈသွၼ်လၢႆးၵၼ်ႁေယဝ်ႉဢိူဝ်ႈၼေႃႈ”
“ပေႃးပဵၼ်လုၵ်ႈဢွၼ်ႇၸၢႆးတႄႉ ယူႇဝတ်ႉယူႇၵျွင်းၵေႃႈ မုၼ်ၸဝ်ႈၶဝ်သွၼ်ပၼ်ယူႇၵူၺ်းၼင်ႇၵဝ်ႇၶႃႈ မၢင်ပွၵ်ႈပေႃးၽႅတ်ႈၵႂႃႇႁိမ်းၵျွင်းၼႆ လႆႈငိၼ်းသဵင်ၸဝ်ႈသၢင်ႇၶဝ်ဢၢၼ်ႇလိၵ်ႈ ၸႂ်သမ်ႉပေႃးသိူဝ်းၸွမ်းၼၼ်ႉၶႃႈယဝ်ႉ၊ မၢင်ပွၵ်ႈႁၼ်ပိူၼ်ႈယိပ်းပပ်ႉလိၵ်ႈပပ်ႉလၢႆး ၶႂ်ႈႁူႉယူႇၵေႃႈ ဢမ်ႇၸၢင်ႈႁဵတ်းႁိုဝ် ဢၢၼ်ႇၵေႃႈဢမ်ႇမေႃၶႃႈၼႃႇၼႆ ပေႃးပိူၼ်ႈဢၢၼ်ႇၼႄ ၸင်ႇလႆႈႁူႉၵူၺ်းၶႃႈဢေႃႈ”
ၶမ်းလၢဝ်ၵေႃႈ ထူၺ်ႈၸႂ်လူင်မႃးၵႅပ်ႉၼိုင်ႈသေ ၶိုၼ်ႈသဵင်လင်လၢတ်ႈၸူး သႅင်ၼူၼ်း ၼင်ႇၶႂ်ႈႁႂ်ႈၵူၼ်းတၢင်းၼွၵ်ႈငိၼ်းၼၼ်ႉယဝ်ႉ။
“ပေႃးဝႃႈတေႉ ၵူၼ်းႁူႉလိၵ်ႈႁူႉလၢႆးၵေႃႈမီးယူႇလူး ပေႃးဝႃႈၶႂ်ႈႁႂ်ႈလုၵ်ႈလၢၼ်ၸဝ်ႈၵဝ်ႇမေႃယူႇတေႉၼႆ ဢၼ်ႁူႉဢၼ်မေႃၼၼ်ႉ လီဢဝ်ၸႅၵ်ႇမႅင်ႇပၼ်ယူႇ ၵူၺ်းၵႃႈ ဢမ်ႇၸမ်ပဵၼ် တေလႆႈပဵၼ်မေႃသွၼ်ယဝ်ႉ ၸင်ႇတေသွၼ်ပၼ်လႆႈလူး ၽူႈႁူႉၽူႈမေႃၼၼ်ႉ သွၼ်ပၼ်လႆႈၵူႈၵေႃႉယဝ်ႉ ၵူၼ်းမိူင်းၼႆႉၶီႈထီႇတၢင်းႁူႉၼႃႇလူင်”
သမ်ႉပေႃးဢဝ်ၼၢႆးဢၼ်ၵိၼ်ၶဝ်ႈၵၼ်ယူႇၼႂ်းသွင်ႇၾႆးၼၼ်ႉ ၵႅၼ်ႉဢွၵ်ႇမႃးယဝ်ႉ။
ယၢမ်းၵၢင်ၼႂ်ႁူဝ်မိူင်းပၢင်ႇသႂ် လုၵ်ႈလႅတ်ႇမူၼ်ႉႁူဝ်လွႆတၢင်းဢွၵ်ႇမႃးဝွႆးဝွႆး ၶမ်းလၢဝ်ၵေႃႈ ဢွၵ်ႇၸႂ်သင်ဢမ်ႇႁူႉယဝ်ႉ ၸင်ႇပႆလဵပ်ႈၵႂႃႇတၢင်းႁူင်းႁဵၼ်းမိူဝ်ႈဝႃးၼၼ်ႉသေ လႆႈႁၼ်ႁူင်းႁဵၼ်းဢၼ်တဵတ်ႇယဵၼ် ႁူဝ်ႉမၼ်းသမ်ႉပေႃးယွၵ်းၵွႆၽင်ႉဝႆႉၼၼ်ႉ။ မၼ်းၸင်ႇပႆၶဝ်ႈၵႂႃႇၼႂ်းဝၢင်းႁူဝ်ႉသေယဝ်ႉ လႆႈႁၼ်ႁူင်းႁဵၼ်းဢၼ်မုင်းလဵၵ်းဝႆႉယူႇၼၼ်ႉ ၽႃၵင်ႈမၼ်းတႄႉ ဢမ်ႇႁႄႉလူမ်းလႆႈယဝ်ႉ တိၼ်သဝ်မၼ်းၼၼ်ႉၵေႃႈ ပူၵ်ႇသမ်ႉပေႃးလၢပ်ႈဝႆႉယူႇ ၽၢၵ်ႈသိူဝ်ႇမၼ်းၵေႃႈ သမ်ႉပေႃးၽင်ႉယွၵ်းလူင်ဝႆႉယဝ်ႉၼႃႇ၊ တူၺ်းႁိမ်းႁွမ်းၸိူဝ်းၼၼ်ႉသေ ပႆလူင်ဢွၵ်ႇႁူင်းႁဵၼ်းၼၼ်ႉမႃးယဝ်ႉ ႁၼ်ႁွႆးတိၼ်ဝူဝ်းတိၼ်ၵႂၢႆး ဢုၵ်းလုၵ်းဢွၵ်းလွၵ်းပဵၼ်သၢႆပဵၼ်သၢႆ ၵႂႃႇတၢင်းလူင်ပႃႇမႆႉ တၢင်းတူၵ်းဝၢၼ်ႈၼၼ်ႉယဝ်ႉ။ ႁၢင်ႈဢၼ်မၼ်းလႆႈႁၼ်မိူဝ်ႈဝႃးၼၼ်ႉ ၵွပ်ႈလိုမ်းဢမ်ႇလႆႈလႄႈ ၸင်ႇလႆႈလုၵ်ႉမႃးတူၺ်းတဵမ်ၸဝ်ႉယူႇ။
မၼ်းၵေႃႈၸင်ႇၶိုၼ်းလဵပ်ႈပၼ်ႇတူၺ်းၸွမ်းလႅၼ်ဝၢၼ်ႈတၢင်းႁွင်ႇ ဢၼ်မီးတူင်ႈၼႃးတူၺ်းၵႂႃႇပေႃးဢမ်ႇသုတ်းသၢႆတႃလႆႈ ၸွမ်းတေးၼႃးၼၼ်ႉၵေႃႈ လႆႈႁၼ်မႅၼ်ႈၺႃး လုၵ်ႈဢွၼ်ႇယိင်းသွင်သၢမ်ၵေႃႉ လူၺ်းဢႅၼ်ႇလမ်းၵၼ်ယူႇၸွမ်းတေးၼႃး ၽွင်းဢူႈမႄႈၶဝ် ယင်းတိုၵ်ႉသွမ်ႈၼႃးၵၼ် ပဵၼ်သၢႆပဵၼ်သၢႆယူႇၼႂ်းတူင်ႈၼႃးၼၼ်ႉယဝ်ႉ။ လုၵ်ႈဢွၼ်ႇလဵၵ်ႉမၢင်ၵေႃႉၼၼ်ႉၵေႃႈ တဝ်လဵၼ်ႈၼမ်ႉၼႂ်းတူင်ႈၼႃးၼၼ်ႉယူႇ။
မၼ်းၸင်ႇသမ်ႉၶိုၼ်းလဵပ်ႈၵႂႃႇ တၢင်းဢွၵ်ႇဝၢၼ်ႈၼၼ်ႉထႅင်ႈ ႁၼ်ၶဝ်ႈၼႃးၶဵဝ်ဢၼ်တိုၵ်ႉသွမ်ႈယဝ်ႉၵႂႃႇၼၼ်ႉ ပေႃးတင်ႈတုၵ်းသုၵ်းတၵ်းသၢၵ်းဝႆႉယဝ်ႉ၊ ပၼ်ႇႁွပ်ႈဝၢၼ်ႈယဝ်ႉလႄႈ ၽႃႇၶဝ်ႈမႃးၼႂ်းၵၢင်ဝၢၼ်ႈသေယဝ်ႉ ႁူပ်ႉၺႃးသႂ်ႇမေႃယႃ ၵေႃႉဢၼ်မႃးယူတ်းယႃမၼ်းၼၼ်ႉ တီႈၼႂ်းၵၢင်တၢင်းၼၼ်ႉသေ မေႃယႃၸင်ႇတူင်ႉတၵ်ႉၸူး
“မႃးပႆလႆႈၸိူင်ႉၼႆတႄႉ ၶႅၼ်းလီယဝ်ႉၶႃႈၼေႃႈ..”
“ဢေႃႈ..”
“ၵႂႃႇတၢင်းလႂ်မႃးၶႃႈ..”
“လႄႇလဵၼ်ႈတူၺ်းၼႂ်းဝၢၼ်ႈၸိူဝ်းၼႆႉၵူၺ်း..”
“ဢေႃ..ငိၼ်းဝႃႈ သူတေမႃးႁဵတ်းမေႃသွၼ်ၼႆၶႃႈႁႃႉ”
ၶမ်းလၢဝ်ဢၼ်တႅပ်းတတ်းပႆႇလႆႈၼၼ်ႉၵေႃႈ ဢမ်ႇပႆႇၸၢင်ႈလၢတ်ႈလႄႈ ၸင်ႇလၢႆႈၵႂၢမ်းထၢမ်ၵႂႃႇၶိုၼ်း။
“ဢမ်ႇၸႂ်ႈဝႃႈမေႃယႃယူႇတၢင်းဝၢၼ်ႈၸိင်ပူၼ်ႉၼႆၶႃႈႁႃႉ ၸွင်ႇၵႆၶႃႈ”
“ဢမ်ႇၵႆၼႃ.. ပေႃးၶႂ်ႈၵႂႃႇလႄႇႁဝ်းႁွင်ႉၵႂႃႇလႄႇတူၺ်းလႆႈယူႇၵူၺ်း”
“ဢမ်ႇယဝ်ႉၶႃႈ..မၼ်းၵေႃႈတေဢမ်ႇပိူင်ႈသင်ၵၼ်ၼင်ႇၵဝ်ႇပေႃးပဵၼ်ဝၢၼ်ႈၸိူင်ႉၼႆယူႇတႄႉ”
“ပေႃးလႅၵ်ႈလၢႆႈၸႂ်ၵေႃႈ လၢတ်ႈလႆႈယူႇၶႃႈၼႃ”
“တေၵႂႃႇတၢင်းလႂ်ထႅင်ႈၶႃႈ မီးၵူၼ်းပဵၼ်တေလႆႈၵႂႃႇတူၺ်းၶႃႈႁႃႉ”
မေႃယႃၵေႃႈယၵ်ႉတူၺ်းၸူးၶမ်းလၢဝ်သေယုမ်ႉယဝ်ႉ “ဢေႃႈ..”
တၢင်းယုမ်ႉၶဝ်ၼၼ်ႉ သင်ပဵၼ်သၢဝ်တၢင်ႇၵေႃႉတႄႉ တေတုမ်ႉလေႃႇႁူဝ်ၸႂ် ပေႃးသၼ်ႇၶွၼ်းဝႆၵႂင်မဝ်းၵႂႃႇၸွမ်းယဝ်ႉ၊ မၼ်းပဵၼ်ၶမ်းလၢဝ်ၵူၺ်းလႄႈ ဢမ်ႇသၼ်ႇဝႆၸွမ်းၵူၺ်း။
“ယူႇဝၢၼ်ႈၼႆႉႁိုင်ယဝ်ႉၶႃႈႁႃႉ တူၺ်းမိူၼ်မေႃယႃႁဝ်း ဢၢပ်ႈတေဢမ်ႇၸႂ်ႈၵူၼ်းၸႃႇတိၼႂ်းဝၢၼ်ႈၼႆႉၶႃႈလူး”
“ႁဵတ်းႁိုဝ်ႁူႉလႃႇ!..”
“ပေႃးမႃးတူၺ်းၵူၼ်းဝၢၼ်ႈၸိူဝ်းၼႆႉ တေဢမ်ႇလဵင်ႉလုၵ်ႈႁႂ်ႈဢွၵ်းလႅတ်းႁေယဝ်ႉ သူင်ႇလုၵ်ႈႁဵၼ်းလႆႈသုင်လႄႈ မီးၼမ်ႉၸႂ် ႁႂ်ႈၶိုၼ်းပွၵ်ႈမႃးပူၵ်းပွင်တူင်ႇဝူင်းၶိုၼ်းလႆႈလေႃႇ ၶဝ်ဢမ်ႇမီးပၢႆးဝူၼ်ႉၸိူင်ႉၼၼ်လူးၵွၼ်ႇ တမ်ႉဢမ်ႇႁူႉ၊ ႁႂ်ႈပေႃးၵိၼ်ပေႃးယူႇ တႃႇဝၼ်းလႂ်ဝၼ်းၼၼ်ႉၵူၺ်း ပဵၼ်လွင်ႈယၢပ်ႇတႃႇၶဝ်ၼႃႇယဝ်ႉ၊ ပေႃးလႆႈလီလႆႈပဵၼ် လႆႈၵိၼ်လီၼုင်ႈလိူင်ႇၵူၺ်းၵေႃႈ သမ်ႉပေႃးၵျႃႉၼႃႇ တွၼ်ႈတႃႇၶဝ်ယဝ်ႉဢမ်ႇၸႂ်ႈႁိုဝ်လႃႇ၊ မီးလုၵ်ႈမီးလၢင်းၵေႃႈ လႆႈၸႂ်ယႂ်ႇပႂ်ႉၵိၼ်ၶဝ်ႁႂ်ႈၶဝ်လဵင်ႉၵူၺ်းၵေႃႈ ပဵင်းပေႃးယဝ်ႉဢမ်ႇၸႂ်ႈႁိုဝ်၊ ဝၢၼ်ႈၼႆႉၸင်ႇပဵၼ်ၼႆလႄႈ ၸင်ႇဢမ်ႇၸၢင်ႈၶိုၼ်ႈယႂ်ႇလႆႈ ယွၼ်ႉပၢႆးဝူၼ်ႉၵူၼ်းမၼ်းဢမ်ႇၶိုၼ်ႈယႂ်ႇၼၼ်ႉၼႃႇ”
“ၵိုင်ႉၵၢင်ႉတႅပ်းတတ်းၶဝ်ၵႂႃႇၸိူင်ႉၼၼ် ဢမ်ႇဝႆးၼႃႇပူၼ်ႉတီႈၶႃႈႁႃႉ”
“မၼ်းပဵၼ်ၸိူင်ႉၼၼ်ယူႇယဝ်ႉဢမ်ႇၸႂ်ႈၶႃႈႁိုဝ်”
“ၶႂ်ႈဝႃႈသူၵေႃႈ ပဵၼ်ၵူၼ်းမီးၼမ်ႉၸႂ်ပူၵ်းပွင်ပၼ်တူင်ႇဝူင်း ႁႂ်ႈၶိုၼ်ႈယႂ်ႇယူႇယဝ်ႉၶႃႈလူး၊ သူႁဵတ်းႁႂ်ႈမၼ်းဢမ်ႇပဵၼ်ၸိူင်ႉၼၼ် လႆႈယူႇဢမ်ႇၸႂ်ႈၶႃႈႁိုဝ်လႃႇ.. ပူၵ်းပွင်ပၼ်ပၢႆးဝူၼ်ႉၶဝ် ႁႂ်ႈမၼ်းၶိုၼ်ႈယႂ်ႇမႃးဢၼ်ဝႃႈၼၼ်ႉ…”
ဢဝ်ၶမ်းလၢဝ်ပေႃးၵိုတ်းမိုင်လူင်ၵႂႃႇ ၶေႃႈၵႂၢမ်းဢၼ်မၼ်းလႆႈလၢတ်ႈၼၼ်ႉၵေႃႈ ၼင်ႇဝႃႈလႆႈၶိုၼ်းတုမ်ႉယွၼ်ႈၸဝ်ႈၵဝ်ႇမႃးယဝ်ႉ၊ ႁဵတ်းႁႂ်ႈမၼ်းဝူၼ်ႉႁၼ်တူဝ်ၵဝ်ႇ ဢၼ်ႁၼ်သုၼ်ႇတူဝ်ၵေႃႉၼိုင်ႈမိူၼ်ၵၼ်လႄႈ ဢဝ်မၼ်းပေႃးဢမ်ႇၸၢင်ႈတၵ်းသဵင်သင်လႆႈယဝ်ႉ။
“ၶႅၼ်သူ..ၸွင်ႇတိုၵ်ႉၶတ်းယူႇႁႃႉ” မေႃယႃလၢႆႈၵႂၢမ်းၵႂႃႇပႅတ်ႈသေ ၸင်ႇႁဵတ်းႁႂ်ႈၶမ်းလၢဝ်လူမ်ၸႂ်မႃးၶိုၼ်း။
“ၶႅၼ်းမႃးယဝ်ႉ”
“သူၸိုဝ်ႈႁွင်ႉသင်ၶႃႈ..”
“ၶမ်းလၢဝ်!”
“ႁဝ်းၸိုဝ်ႈ ဢွၼ်တိုၼ်း”
“ႁွင်ႉမေႃယႃတွင်းငၢႆႈလိူဝ်ၶႃႈယဝ်ႉ!”
“ၸိူင်ႉၼၼ်ႁႃႉ.. တီႈတေႉၼႂ်းဝၢၼ်ႈၸိူဝ်းၼႆႉ ၽႂ်ၵေႃႈဢမ်ႇတွၼ်ႉႁွင်ႉၸိုဝ်ႈႁဝ်းသေပွၵ်ႈၼင်ႇၵဝ်ႇ ႁွင်ႉမေႃယႃလၢႆလၢႆယဝ်ႉ”
ၽွင်းဢၼ်တိုၵ်ႉပႆလူင်မိူဝ်းယူႇၼၼ်ႉ လႆႈႁၼ်တႂ်ႈလၢင်ႈႁိူၼ်းလင်ၼိုင်ႈၼၼ်ႉ ငိၼ်းသဵင်လုၵ်ႈဢွၼ်ႇပေႃးသႅၼ်ႇႁွင်ႉပၼ်း လိုပ်ႈလမ်းလူၺ်းၵၼ် သဵင်ၸီးသဵင်လႅမ်လူင်ၵႂႃႇသဵင်ႈယဝ်ႉ။ မီးၸဵမ်လုၵ်ႈဢွၼ်ႇလဵၵ်ႉၼိုင်ႈၶူပ်ႇ သွင်ၶူပ်ႇ တေႃႇထိုင် ၸဵတ်းပႅတ်ႇၶူပ်ႇၼႆႉယဝ်ႉ၊ တီႈၼၼ်ႈ ယင်းဢမ်ႇႁၼ်မီးၵူၼ်းလူင်သေၵေႃႉလႃႈ ဢႅၼ်ႇလမ်းလူၺ်းၵၼ် ပႆတိၼ်လႅင်လၢႆလၢႆယဝ်ႉ။
“ပဵၼ်သင်လႄႈတေလႆႈမႃးႁၼ်ၸိူင်ႉၼႆလႃႇ”
ၶွၼ်းႁူဝ်မၼ်းဝႆဝုတ်းဝုတ်းယဝ်ႉ။ မေႃယႃဢၼ်ႁၼ်ၶမ်းလၢဝ် သူၼ်ၸႂ်လုၵ်ႈဢွၼ်ႇၸိူင်ႉၼၼ်မႃးၵေႃႈ
“လႆႈမႃးႁၼ်လုၵ်ႈဢွၼ်ႇၶဝ်လဵၼ်ႈမီမူၼ်ႈၵၼ် လီၵျေႃႇလီမူၼ်ႈၸိူင်ႉၼႆ သမ်ႉပေႃးၶႂ်ႈပဵၼ်လုၵ်ႈဢွၼ်ႇၵႂႃႇၶိုၼ်းယဝ်ႉ ဢမ်ႇဝႃႈၼၼ်ႁႃႉ”
ဢဝ်ၶမ်းလၢဝ်ၼၼ်ႉပေႃးယုမ်ႉဢွၵ်ႇမႃးယူႇ။
“မေႃယႃတေၵႂႃႇတၢင်းလႂ်ထႅင်ႈၶႃႈလႃႇၼႆႉ”
“မိူဝ်ႈၸႅတ်ႈၵူၼ်းပဵၼ်တီႈႁိူၼ်းၼၢႆးၶမ်းလႅင်ၶဝ်ၼၼ်ႉၼႃႇ”
“ၶႃႈဢမ်ႇၸႂ်ႈႁႃႉ!!..” လၢတ်ႈဢွၵ်ႇမႃးၼင်ႇတူၵ်းၸႂ်ယူႇ။
“ၸႂ်ႈယဝ်ႉ တေတူၵ်းၸႂ်ႁဵတ်းသင်လႃႇ”
“ဢမ်ႇလူဝ်ႇၸႅတ်ႈယဝ်ႉ ၶႃႈၶႅၼ်းလီၼႃႇယဝ်ႉ”
မေႃယႃၵေႃႈ ၵိုင်ႉၵၢင်ႉသုတ်ႉၵႂႃႇႁိမ်းၸမ်ၶမ်းလၢဝ်ၼၼ်ႉသေ ဢဝ်မိုဝ်းမၼ်းတႃႈသႂ်ႇၼႃႈၽၢၵ်ႇၶမ်းလၢဝ်ၵႂႃႇ ၸဝ်ႈမၼ်းဢမ်ႇတၼ်းႁူႉတူဝ် သမ်ႉပေႃးၶုၼ်ႇၽႅတ်းလူင်ၵႂႃႇယဝ်ႉ။
“တေႁဵတ်းသင်ၶႃႈ!”
“ၶႅၼ်းတေႉယဝ်ႉလူး…”
မေႃယႃၵေႃႈ မိူဝ်းဝႄႉၸႅတ်ႈတူၺ်းပၼ်ပၢႆးယူႇလီတီႈၼၢႆးၶမ်းလႅင်ၵႂႃႇယဝ်ႉ၊ ၵွပ်ႈဝႃႈ မိူဝ်ႈဝႃး ၼၢႆးၶမ်းလႅင်ဢမ်ႇပေႃးယူႇလီၵႂႃႇႁႃမေႃယႃဢမ်ႇၺႃးလႄႈ မိူဝ်ႈၼႆႉမေႃယႃၵေႃႈ လႆႈမႃးတူၺ်းပၼ်ၼၼ်ႉယဝ်ႉ။
