တွၼ်ႈသၢဝ်းဢဵတ်း
မိူဝ်ႈဝၼ်းၸိုၼ်ႈတိုၵ်ႉယၢင်ႈၽၵ်းတူဢွၵ်ႇၵႂႃႇၼၼ်ႉ ၸင်ႇသမ်ႉငိၼ်းမႅၼ်ႈသဵင်ၼႂ်းၾူင်းၸဝ်ႈမိူင်းၶမ်းမေႃးမႃး “ပဝ်ႉမၢႆမႃးထိုင်ယဝ်ႉ တေလူင်းမိုဝ်းမိူဝ်ႈလႂ်!..”
ၸဝ်ႈမိူင်းၶမ်းတွပ်ႇ ပႃးတၢင်းသၢႆတႃဢၼ်ယၵ်ႉတူၺ်းဝၼ်းၸိုၼ်ႈသေ “ဢိူဝ်ႈ!! မိူဝ်ႈလဵဝ်ၼႆႉလႄႈ..” တွပ်ႇၼႂ်းၽူင်းယဝ်ႉ ႁွင်ႉလၢတ်ႈၸူးဝၼ်းၸိုၼ်ႈၵႂႃႇ “မႂ်းဝူၼ်ႉဝႃႈ မႂ်းဢမ်ႇမီးသင်ဢၼ်တေလႆႈသုမ်းၸိူင်ႉၼၼ်ႁႃႉ ပႂ်ႉတူၺ်းလႄႈ မႂ်းတေလႆႈႁူႉယူႇၵူၺ်း”
ဝၼ်းၸိုၼ်ႈၵေႃႈ ငိၼ်းတဵမ်သွင်ႁူသေ ပိၵ်ႉဢိုတ်းၽၵ်းတူၵႂႃႇယဝ်ႉ။ မိူဝ်ႈဢၼ်မၼ်းပႆဢွၵ်ႇၼႂ်းလၢၼ်ႉမႃးၼၼ်ႉ သဵင်ၽူင်းၵေႃႈမေႃးမႃးသေ ၵေႃႉသိုပ်ႇသမ်ႉပဵၼ်မၢႆၽူင်းၸဝ်ႈလွၼ်ႉၶိူဝ်းယဝ်ႉ ဝၼ်းၸိုၼ်ႈၵေႃႈႁပ်ႉထွမ်ႇၵႂႃႇ ၵူၺ်းၵႃႈဢမ်ႇလႆႈငိၼ်းသဵင်သင် လိူဝ်သေသဵင်ထူၺ်ႈၸႂ် ဢၼ်ၶတ်းၸႂ်လၢတ်ႈ “ဝၼ်းၸိုၼ်ႈ..ပေႃးလႆႈ..ယဝ်ႉ..ၼႃႈ..ၵဝ်ဢမ်ႇၸၢင်ႈ..သိုပ်ႇ..ၸွႆႈထႅမ်..မႂ်း….လႆႈ….ထႅင်ႈ….ယဝ်ႉ……” သဵင်ႈထူၺ်ႈၸႂ်ၼၼ်ႉၵေႃႈ သုတ်းဝွႆႈလွႆးၵႂႃႇတိၵ်းတိၵ်း တေႃႇထိုင်မၼ်းပေႃးဢမ်ႇလႆႈငိၼ်းယူႇယဝ်ႉ။
ဝၼ်းၸိုၼ်ႈၵေႃႈၼိမ်ယဵၼ်ယူႇႁဵတ်းၼၼ် ၼမ်ႉတႃဢွၼ်ႇမၼ်းၼၼ်ႉ ၸိုမ်ႉယမ်းမႃး ဝူၼ်ႉႁၼ်ၶိုၼ်း ဝၼ်းဢၼ်မႄႈမၼ်းလူႉသဵင်ႈတၢႆပႅတ်ႈ ပၼ်ႁႂ်ႈမၼ်းၵိုတ်းၵေႃႉလဵဝ် ယူႇၼႂ်းၵၢင်ပႃႇထိူၼ်ႇ၊ ၼႂ်းၵွင်ၵူၼ်းတၢႆ၊ ၸွမ်းၽုင်ၵူၼ်းမိူၵ်ႈလိူင်း ဢၼ်ဢမ်ႇမီးတၢင်းမုင်ႈမွင်းဝႃႈ သၢႆၸႂ်ဢၼ်မီးယူႇၼၼ်ႉ ၸွင်ႇတေယူႇလွတ်ႈလႆႈႁိုဝ်၊ ဢမ်ႇႁူႉဝႃႈတေၵႂႃႇတၢင်းလႂ် သဵၼ်ႈတၢင်းဢၼ်မီးယူႇၼၼ်ႉ တေဢွၼ်ၵႂႃႇထိုင်တီႈလႂ်လႄႈ တေလႆႈထူပ်းၺႃးသင် မိူဝ်ႈယူႇၼႂ်းလပ်းသိင်ႇမိုတ်းတၼ်လူင်ၼၼ်ႉ ၸင်ႇသမ်ႉမီးၸဝ်ႈလွၼ်ႉၶိူဝ်း မႃးၵွတ်ႇဢုမ်ႈဢဝ်မၼ်းဝႆႉလႄႈ လွင်ႈဢုၼ်ႇၸႂ်ၼႂ်းဝၼ်းၼၼ်ႉ လႆႈထွင်ႇပိူင်းပၼ် ႁႂ်ႈမၼ်းႁၼ်သၢႆလႅင်းမႃးၶိုၼ်းထႅင်ႈၵမ်းၼိုင်ႈၼၼ်ႉယဝ်ႉ။
ၵူၺ်းၵႃႈဝၼ်းမိူဝ်ႈၼႆႉ သၢႆလႅင်းၼၼ်ႉၵေႃႈ လႆႈမွတ်ႈႁၢႆသုတ်းၵႂႃႇယဝ်ႉလႄႈ ၵူၼ်းၵေႃႉလဵဝ် ဢၼ်မၼ်းပိုင်ႈဢိင်လႆႈ ၵူၼ်းၵေႃႉလဵဝ် ဢၼ်မၼ်းႁွင်ႉဝႃႈပီႈၼွင်ႉၵူၼ်းၸမ်ၸႂ်ၵူၼ်းၼႃႈႁိူၼ်းလႆႈၼၼ်ႉ ဢမ်ႇၵိုတ်းလိူဝ်ၽႂ်ယဝ်ႉ၊ တူဝ်ၵေႃႉလဵဝ် ၵူၼ်းၵေႃႉလဵဝ် ဢၼ်မၼ်းဢမ်ႇၶႂ်ႈပဵၼ် ဢမ်ႇၶႂ်ႈႁႂ်ႈမီးထႅင်ႈၼၼ်ႉၵေႃႈ လႆႈၵိူတ်ႇပဵၼ်မႃးၼၼ်ႉ ႁဵတ်းႁႂ်ႈမၼ်းယွမ်းႁပ်ႉဢမ်ႇလႆႈ။ သဵင်လင်ၶေႃႈၵႂၢမ်းၸဝ်ႈမိူင်းၶမ်း ဢၼ်လၢတ်ႈမိူဝ်ႈၵႆႈၼၼ်ႉၵေႃႈ တွင်ႈဢွၵ်ႇမႃးၼႂ်းႁူဝ်မၼ်းယဝ်ႉ၊ ဝိၼ်ႇဝၢႆႇႁူၼ်လင်ၶဝ်ႈၵႂႃႇၸူးၼႂ်းႁွင်ႈၶဝ်ၼၼ်ႉၶိုၼ်းယူႇယဝ်ႉ။
မၼ်းၵေႃႈၵႂႃႇၸုၵ်းယူႇၼႃႈႁွင်ႈၼၼ်ႉ ဢမ်ႇပႆႇၶဝ်ႈၵႂႃႇ လႆႈငိၼ်းသဵင်ၶဝ်ဢုပ်ႇၵၼ်
“ၸဝ်ႈတၼ်းဝၢင်းၽႅၼ်ဝႆႉၸဵမ်မိူဝ်ႈလႂ်လႃႇ ပေႃးဢမ်ႇလၢတ်ႈၵၼ်လူင်ႈၼႃႈဝႆႉႁေဢိတ်း တေလႆႈႁၢင်ႈႁႅၼ်းပၢင်ၵိၼ်လဵင်ႉၶႅမ်ႉၶႅမ်ႉၼၼ်ႉၼႃႇမေႃႉ” ၸဝ်ႈပၼ်ႇလၢတ်ႈၸူးၸဝ်ႈမိူင်းၶမ်း။
“မၼ်းၶတ်းႁူၶတ်းတႃၵၼ်မႃးႁိုင်ၼႃႇယဝ်ႉ ပေႃးၸဝ်ႈပၢင်ႇဢမ်ႇတၢႆ ၵဝ်ၵေႃႈဢမ်ႇႁဵတ်းၸိူင်ႉၼႆၼင်ႇၵဝ်ႇ”
“ဝၼ်းၸိုၼ်ႈမၼ်းတေဢမ်ႇႁူႉယူဝ်ႉ ဝႃႈမီးၸဝ်ႈလွၼ်ႉၶိူဝ်းၵႅတ်ႇၶႄပၼ်မၼ်းယူႇ ပေႃးဢမ်ႇမီးမၼ်းၸဝ်ႈယဝ်ႉ ပႂ်ႉတူၺ်း မၼ်းၵေႃႈတေၺႃးၵိၼ်ထႅင်ႈမိူဝ်ႈလႂ်” ၸဝ်ႈၸိင်ႇလၢတ်ႈၸိမ်။
ဝၼ်းၸိုၼ်ႈၼၼ်ႉၵေႃႈ ၵမ်တႃမိုဝ်းသမ်ႉပေႃးၵႅၼ်ႇၵႅၵ်းၵႅၵ်းယဝ်ႉလႄႈ ၼႃႈၵမ်ႇၼႃႈလမ်ဝႆႉယူႇ၊ ၵူၺ်းၵႃႈ ၵူၼ်းတမ်းလဝ်ႈၵေႃႉၼိုင်ႈမႃးၸူးမၼ်းသေ
“ဢမ်ႇၶဝ်ႈၵႂႃႇၶႃႈႁႃႉ”
ႁဵတ်းႁႂ်ႈမၼ်းမီးသတိမႃးယဝ်ႉ “ၶဝ်ႈၵႂႃႇလႄႈ…ၵႂႃႇၽုၺ်ႇသဵင်ၵႂၢမ်းလင်ႁႅင်းထႅင်ႈလႄႈၼႃႈ လၢတ်ႈဝႃႈ ၵူဝ်ၵူၼ်းတၢင်းၼွၵ်ႈငိၼ်းသဵင်ဢုပ်ႇၵၼ်ၼႆ”
“ဢေႃႈၶႃႈ”
ဝၼ်းၸိုၼ်ႈၵေႃႈ ၸုၵ်းပႃႇၽၵ်းတူၼၼ်ႉသေ ဢဝ်မၢၵ်ႇၵွင်ႈသႂ်ႇမႅၵ်ႉဝႆႉ ပႂ်ႉတေႃႇၵူၼ်းႁဵတ်းၵၢၼ်ၵေႃႉၼၼ်ႉတေဢွၵ်ႇၵႂႃႇၶိုၼ်း၊ ပေႃးဝႃႈၵူၼ်းၵေႃႉၼၼ်ႉ ဢွၵ်ႇပူၼ်ႉၵႂႃႇယဝ်ႉ မၼ်းၵေႃႈသႂၢင်းၵွင်ႈယဝ်ႉ ၽုၺ်ႇၽၵ်းတူ ပလိုင်ႈ!! ယိူင်းၵွင်ႈမၼ်းသႂ်ႇၸိူဝ်းၶဝ် ဢၼ်တိုၵ်ႉၼင်ႈဢမ်ႇႁူႉတူဝ်ယူႇၼၼ်ႉ တိူဝ်ႉၺႃးၼႃႈၽၢၵ်ႇၶဝ်ၵႂႃႇ ၵေႃႉလႂ်ၵေႃႉၼၼ်ႉလႄႈ ဝၼ်းၸိုၼ်ႈမႄးသိုပ်ႇယိုဝ်းသႂ်ႇထႅင်ႈ ၼႃႈဢူၵ်းၶဝ် ၵမ်းၵေႃႉၵေႃႉ ၵူၼ်းၸိူဝ်းၼၼ်ႉၵေႃႈ ၼွၼ်းမူပ်ႇလူမ်ႉထူလူင်ၵႂႃႇသေလႄႈ ၼႂ်းႁွင်ႈၼၼ်ႉၵေႃႈ မီးဢၢႆလိူတ်ႈၶႅဝ်းလႅင်ၼွင်းဢိူင်းလူင်ဝႆႉယဝ်ႉ။
ၼႂ်းႁွင်ႈသဵင်လင်လႄႈ လုၵ်ႈၼွင်ႉၶဝ်ၵေႃႈ ဢွၼ်ၵႂႃႇၵိၼ်ၵျေႃႇမူတ်းယဝ်ႉ ဢမ်ႇမီးၽႂ်လႆႈငိၼ်း၊ လႆႈႁူႉဝႃႈ ၽွင်းၼၼ်ႉ ၼႂ်းႁွင်ႈၵူၼ်းလူင်ၶဝ် ပဵၼ်သင်ယူႇ။ ဝၼ်းၸိုၼ်ႈၵေႃႈ ယၵ်ႉတူၺ်းၶဝ်သေ သိမ်းၵွင်ႈပွတ်းမၼ်းသႂ်ႇသိူဝ်ႈယဝ်ႉ လၢတ်ႈၸူးၶဝ်ၵႂႃႇ
“ၵူၼ်းၸိူင်ႉၼင်ႇသူ!! သိုပ်ႇမီးယူႇၵေႃႈ ပၼ်ၽေးတွၼ်ႈတႃႇပိူၼ်ႈၵူၺ်း”
ပႆဢွၵ်ႇလၢၼ်ႉမႃး ႁေႃႈၵႃးမၼ်းဢွၵ်ႇၶၢဝ်းတၢင်းၵႂႃႇ တီႈဢၼ်ဢမ်ႇမီးပဝ်ႉမၢႆလႄႈ ၼႂ်းသဵၼ်ႈတၢင်းဢၼ်လပ်းသိင်ႇမိုတ်းတၼ်လူင် ၼၼ်ႉယဝ်ႉ။
ယၢမ်းၼၼ်ႉ သၢႆလႅင်းၵႃးဢၼ်ပိူင်းမႃးယူႇပႃႈၼႃႈမၼ်းၼၼ်ႉၵေႃႈ တွင်ႈသႂ်ႇသၢႆတႃမၼ်းႁႅင်းၼႃႇ မၼ်းၵိုင်ႉၵၢင်ႉၼႅတ်ႈငွၵ်းႁူဝ်ၵႃးမၼ်း ဢမ်ႇတၼ်းၾၢင်ႉတူၺ်းဝႃႈ သဵၼ်ႈတၢင်းၼၼ်ႉမၼ်းၵႅပ်ႈလႄႈ မီးၽင်ႇႁိုၵ်းၵိုၵ်းတင်းမႄႈၼမ်ႉဝႆႉယူႇသေ ဢဝ်မၢၵ်ႇၵႃးမၼ်းပလၢတ်ႈတူၵ်းႁိုၵ်းၵႂႃႇ သဵင်ၵႃးသွင်ႉတွင်ႈလိၼ်ၵမ်းယဝ်ႉၵမ်း လုတ်ႈတူၵ်းလူင်းၸူမ်ႁၢႆၼႂ်းၼမ်ႉ တႂ်ႈငဝ်းလပ်းသိင်ႇၼၼ်ႉယူႇယဝ်ႉ။
ၸၢတ်ႈပၢၼ်မၼ်းၼၼ်ႉၵေႃႈ တေႃႈမိူၼ်တေသုတ်းသဵင်ႈၵႂႃႇ ၼႂ်းၶမ်ႈၶိုၼ်းၼႆႉမိူၼ်ၵၼ်ယဝ်ႉလႄႈ ဢမ်ႇႁၼ်လုၵ်ႈလိူၼ်၊ ဢမ်ႇႁၼ်လုၵ်ႈလၢဝ် ဢမ်ႇႁၼ်သၢႆလႅင်း
“ၶိုၼ်းၼႆႉ လပ်းသိင်ႇတေႉယဝ်ႉ”
ၵူၼ်းဢၼ်ၵဵဝ်ႇၶွင်ႈဝၼ်းၸိုၼ်ႈ ထုၵ်ႇၺႃးယိုဝ်းတၢႆၵႂႃႇသၢမ်ၵေႃႉလႄႈ ထုၵ်ႇၺႃးၵႃးၽႃႇတၢႆၵေႃႉၼိုင်ႈ ဝၼ်းၸိုၼ်ႈသမ်ႉႁၢႆလၢႆတူဝ်ဝႆႉသေ ၶဝ်ၵေႃႈထၢင်ႇထိူမ်ဝႃႈ ပဵၼ်ဝၼ်းၸိုၼ်ႈၵေႃႉႁဵတ်းၼႆလႄႈ ၸင်ႇဢဝ်ဝၼ်းၸိုၼ်ႈ သႂ်ႇၼႂ်းသဵၼ်ႈမၢႆ ပဵၼ်ၽူႈမီးတၢင်းၽိတ်းသေ မီးၶေႃႈၸိသင်ႇ ႁႂ်ႈၸွမ်းသွၵ်ႈႁႃတူဝ်ဝၼ်းၸိုၼ်ႈမႃး ဢမ်ႇလႆႈတူဝ်လိပ်းၵေႃႈ ႁႂ်ႈလႆႈတူဝ်တၢႆၼႆယူႇ။
ၶဝ်ဢွၼ်ၵၼ်ၸွမ်းသွၵ်ႈႁႃဝၼ်းၸိုၼ်ႈမႃးလႆႈဝူင်ႈၼိုင်ႈယဝ်ႉ ဢမ်ႇလႆႈႁၼ်တူဝ်တၢႆ ၵူၺ်းၵႃႈ လႆႈႁၼ်ၵႃးဝၼ်းၸိုၼ်ႈမီးၵူၼ်းဢဝ်ၶိုၼ်ႈၽင်ႇၼမ်ႉမႃးယဝ်ႉ၊ ၵူၼ်းတႄႉဢမ်ႇႁၼ်မီး။ သိုပ်ႇမႃးထႅင်ႈသွင်လိူၼ် မႄႈၼမ်ႉၼၼ်ႉၵူၺ်း ပွတ်းတၢင်းတႂ်ႈတီႈၵႃးၸူမ်ၵႆတၢၼ်ႇတၢၼ်ႇ လႆႈႁၼ်ၵူၼ်းၽူးယူႇၼိူဝ်ၼမ်ႉမႃး မၼ်းႁိုင်ယဝ်ႉလႄႈ ဢမ်ႇႁူႉဝႃႈ ၵူၼ်းၵေႃႉၼၼ်ႉပဵၼ်ၽႂ် ၵူၺ်းၵႃႈ သိူဝ်ႈဢၼ်ၵူၼ်းတၢႆၼုင်ႈသႂ်ႇဝႆႉတႄႉ ပဵၼ်သိူဝ်ႈဝၼ်းၸိုၼ်ႈယဝ်ႉ။ ၶဝ်ၵေႃႈဝႃႈ ၼၼ်ႉပဵၼ်တူဝ်တၢႆဝၼ်းၸိုၼ်ႈယဝ်ႉၼႆသေ ၵိုတ်းလိုဝ်ႈၸွမ်းႁႃမၼ်းၵႂႃႇယဝ်ႉ။
ပီႊၼိုင်ႈယဝ်ႉပီႊၼိုင်ႈပူၼ်ႉၵႂႃႇ ဝၢၼ်ႈမိူင်းၵေႃႈဢမ်ႇၼိမ်သဝ်း ၵူၼ်းသုၵ်ႉဢူၼ်ၵဝ်းၵေႃႈၼမ် ၶူဝ်ႇဝိတ်ႉပႆႇသုတ်းသဵင်ႈ သိုၵ်းမၢၼ်ႈသမ်ႉမႃးသိမ်းဢႃႇၼႃႇထႅင်ႈ ၵူၼ်းမိူင်းဢွၵ်ႇၼႄၵၢင်ၸႂ် ထုၵ်ႇယိုဝ်းၶႃႈႁႅမ်တၢႆတင်းၼမ်၊ ပၢင်တိုၵ်းၵေႃႈလိူင်ႇၼမ် သိုၵ်းတႆးတေႃႇသိုၵ်းတႆးၵေႃႈ ပိုတ်းယိုဝ်းၵၼ်ႁႅင်းမႃး လုၵ်ႈမႄႈတႆးၵူၼ်းမိူင်းတႆးၵေႃႈ ဢမ်ႇထုၵ်ႇမႅၼ်ႈၵၼ် ပဵၼ်ႁွင်ႇပဵၼ်ၸၢၼ်းမႃး၊ ၽိတ်းၽႅၵ်ႇတႅၵ်ႇၸတ်ႉၵၼ်ၼိူဝ်ဢွၼ်ႇလၢႆး။ ဝၢၼ်ႈမိူင်းသုၵ်ႉယုင်ႈဢူၼ်ၵဝ်း မိူင်းတႆး တႆးဢမ်ႇထိင်း ပိူၼ်ႈမႃးဢဝ် ပဵၼ်ၶွင်ၵဝ်ၶွင်မႂ်းၵႂႃႇႁင်းၶဝ်ယဝ်ႉ။
ၽွင်းဝၢၼ်ႈမိူင်းသုၵ်ႉၸိူင်ႉၼႆ ၵမ်ႈၽွင်ႈၵေႃႈ ဢွၼ်ၵၼ်ၸႂ်ထိုင်ဝၼ်းၸိုၼ်ႈမႃးယဝ်ႉ၊ သင်ဝၼ်းၸိုၼ်ႈတိုၵ်ႉမီးယူႇတႄႉ မၼ်းတေႁဵတ်းသင်ယူႇလႃႇမိူဝ်ႈလဵဝ်၊ ၵူၼ်းႁူႉၸၵ်းလႄႈၵူၼ်းမိုတ်ႈၵၼ်တင်းမၼ်း ဢၼ်မီး ၶမ်းလိုၼ်း၊ မူၺ်ႁွမ်ၽွင်း၊ ၸၢႆးၵေႃးဝိ၊ လုင်းသု၊ ၸၢႆးလိူၼ် လႄႈ သၢင်ႇမူၼ်း ၸိူဝ်းၼၼ်ႉ ၶဝ်ၸင်ႇၶုၵ်းၶူၼ်ႉထိုင် ဝၼ်းၸိုၼ်ႈ ဢၼ်တၢႆၽၢတ်ႇၶဝ်ၵႂႃႇလႆႈ 4 ပီႊယဝ်ႉသေ လႆႈမႃးႁူပ်ႉထူပ်းၵၼ်ယဝ်ႉ မႃးၶႆႈၼႄၵၼ်ၶိုၼ်း လွင်ႈဢၼ်ဝၼ်းၸိုၼ်ႈလႆႈၶႆႈၼႄၶဝ်ဝႆႉ ယွၼ်ႉသင်လႄႈမၼ်းလႆႈမႃးႁဵတ်းသိုၵ်းၼႆသေ။ သိုပ်ႇၼၼ်ႉ ၶဝ်ၵေႃႈလႆႈၶႆႈၼႄၵၼ်ၵႂႃႇ လွင်ႈဢၼ်လႆႈႁဵတ်းၵၢၼ်ၸွမ်းဝၼ်းၸိုၼ်ႈ လႆႈႁူပ်ႉလႆႈငိၼ်းမႃးၸိူဝ်းၼၼ်ႉ ၸင်ႇသမ်ႉပေႃးလႆႈ ႁဵတ်းတႅမ်ႈပဵၼ်မႃးပပ်ႉဢွၼ်ႇဢၼ်ၼိုင်ႈလႄႈ မိူဝ်ႈဢၼ်တႅမ်ႈယဝ်ႉ ဢၢၼ်းတေဢဝ်တႅမ်ႈဢိတ်ႇပပ်ႉၵႂႃႇ ၵူၺ်းၵႃႈ ပပ်ႉၼၼ်ႉသမ်ႉ လႆႈဢဝ်တူၵ်းပႅတ်ႈၵႂႃႇတီႈ တၢင်းၼႃႈၶိင်းပီးၶႃၶိင်းသၢၼ်း ဢၼ်ဢွၼ်ၵၼ်ဢၢၼ်ႇတင်းၶိုၼ်း သမ်ႉပေႃးလိုမ်းၵိၼ်လဝ်ႈၶႃပႅတ်ႈၼၼ်ႉယဝ်ႉၼႃႇ။
“လူယဝ်ႉႁႃးလႆႈသင်လႃႇၼႆႉ ၶိင်းသၢၼ်း”
“လူမႃးပေႃးသုတ်းယဝ်ႉ ၶေႃႈတွပ်ႇဢၼ်ႁႃးၶႂ်ႈလႆႈၼၼ်ႉႁၢင်ႈဢမ်ႇႁၼ် ယိုင်ႈၶႅၼ်းတၼ်မႃးထႅင်ႈၵူၺ်းယဝ်ႉ”
“သုတ်းယဝ်ႉႁႃႉ!.. မိူၼ်မၼ်းဢမ်ႇသုတ်းလီလႃႇဝႃႈ”
ၶိင်းသၢၼ်းၽိုၼ်ႉၵႂႃႇထႅင်ႈၼႃႈၼိုင်ႈ မီးလိၵ်ႈတႅမ်ႈဝႆႉထႅင်ႈ
သင်ၵုမ်ႇၸၢၼ်ႈၸင်းဢိမ်ႇမိူဝ်ႇ ၵူၼ်းႁဵတ်းလွင်ႈဢမ်ႇလီၸိူဝ်းၼၼ်ႉသေ ပၢႆႈပႅတ်ႈၵူၺ်းၼႆ မိူၼ်တင်းပၼ်ႁႅင်း လွင်ႈထၢင်ႇႁၢင်ႈႁႂ်ႈၶဝ်ႁဵတ်းထႅင်ႈၵူၺ်း။
သင်မီးတၢင်းႁတ်းႁၢၼ် မီးၵၢင်ၸႂ်ၶႂ်ႈတေႃႇသူႈယူႇတႄႉ ဢမ်ႇဝႃႈတေပဵၼ်လွင်ႈသင်မႃးၵေႃႈ တိုၼ်းတေႃႇသူႈသေဢဝ်ပေႉလႆႈယူႇၵူၺ်း။
တၢင်းႁတ်းၼၼ်ႉဢမ်ႇမီးတႃႇတူၵ်းသုမ်း တူၵ်းသုမ်းၵႂႃႇၵေႃႈတိုၵ်ႉပေႉၸႂ်ယူႇ၊ လွင်ႈၵူဝ်တႄႉ ဢမ်ႇမႅတ်ႈသေဢမ်ႇၵႃး ယိုင်ႈၶႅၼ်းသုမ်းၼမ်မႃးထႅင်ႈၵူၺ်း။
လွင်ႈဢမ်ႇလီၶဝ်ၼၼ်ႉ ယႃႇတူၺ်းပဵၼ်တူဝ်ယၢင်ႇ ႁႂ်ႈဢဝ်ပဵၼ်တွၼ်ႈသွၼ်ၵႂႃႇလႄႈ ၸင်ႇတေၸၢင်ႈမူၼ်ႉမႄးလႆႈ။
လွင်ႈဢၼ်သူၶႂ်ႈႁဵတ်းၼၼ်ႉ ႁဵတ်းလႄႈ ဢမ်ႇၸႂ်ႈ ႁႂ်ႈပိူၼ်ႈၵေႃႉႁဵတ်းယဝ်ႉ ၸင်ႇတေပဵၼ်မႃးလႆႈ သူၵေႃႈႁဵတ်းလႆႈမိူၼ်ၵၼ်။
ပိူၼ်ႈႁဵတ်းၵေႃႈပိူၼ်ႈတေလႆႈၵူၺ်း ဢမ်ႇမီးၽႂ်တေတူၺ်းႁၼ်သူ။
ဢမ်ႇမီးသင်ၼႆယႃႇပေလၢတ်ႈ မိူဝ်ႈတူဝ်ၸႂ်ႁဝ်းတိုၵ်ႉမီးႁႅင်းၵႅၼ်ႇၶႅင်ယူႇ။
ၵူၼ်းလီၼၼ်ႉတိုၼ်းမီး မိူဝ်ႈလႂ်သူယင်းတိုၵ်ႉပဵၼ်ၵူၼ်းလီယူႇ။
ႁဵတ်းလွင်ႈလီၵေႃႈ တိုၼ်းတေလႆႈတၢင်းၼႄးယူႇယဝ်ႉ ဢမ်ႇၸႂ်ႈဝႃႈ ၽႂ်ၵေႃႈတေပဵၼ်ၵူၼ်းလီၵူႈၵေႃႉလူး။
လွင်ႈထုၵ်ႇမႅၼ်ႈၼၼ်ႉ မီးတွၼ်ႈတႃႇတူဝ်ၵဝ်ႇၵူၺ်း ပေႃးဢမ်ႇမိူၼ်ၸႂ် တေႁၼ်ပိူၼ်ႈၽိတ်းမႃးယဝ်ႉ။
သမ်ႉဝႃႈၶဝ်ဢမ်ႇလႅၵ်ႈလၢႆႈလႆႈ ၵူၺ်းၵႃႈ ႁဝ်းဢမ်ႇၸႂ်ႈၶဝ် ယိူင်းမၢႆၶေႃႈၸုၵ်းမၼ်ႈႁဝ်းၼၼ်ႉ သိုပ်ႇႁဵတ်းသၢင်ႈၵႂႃႇလႄႈ မိူဝ်ႈယင်းတိုၵ်ႉႁဵတ်းၵႂႃႇလႆႈယူႇ။
ၼႆႉပဵၼ်ၶေႃႈၵႂၢမ်းဝၼ်းၸိုၼ်ႈ ဢၼ်ၽၢၵ်ႇၽင်ဝႆႉ တီႈၸိူဝ်းၶဝ်လႄႈ ဢၼ်တွင်းမၢႆဝႆႉလႆႈၼၼ်ႉယဝ်ႉ။
ၶိင်းသၢၼ်းၶႃၶိင်းပီး လူပပ်ႉသုတ်းယဝ်ႉၵေႃႈ ယၵ်ႉတူၺ်းၼႃႈၵၼ်ႁေ
“မိူၼ်တေဢမ်ႇလႆႈသင် ၵူၺ်းၵႃႈ မၼ်းၵေႃႈႁဵတ်းႁႂ်ႈလႆႈဝူၼ်ႉမႃးဢိူဝ်ႈ ဢၼ်ႁဝ်းလႆႈတုၵ်ႉၶယူႇႁဵတ်းၼႆၼႆႉ ဢမ်ႇၸႂ်ႈယွၼ်ႉၽႂ် ပဵၼ်ယွၼ်ႉႁဝ်းၵူၺ်း၊ ယွၼ်ႉႁဝ်းဢမ်ႇမီးၸႂ်ႁတ်းသူႈလႄႈ ၸင်ႇလႆႈၶၢမ်ႇပၼ်ပိူၼ်ႈ ၸႂ်ႉၵိၼ်ယူႇႁဵတ်းၼႆၼၼ်ႉၼႃႇ ၸိူင်ႉႁဝ်းၼႆႉ သမ်ႉဝႃႈတေၵႂႃႇႁဵတ်းသိုၵ်းၵေႃႈ ၵႂႃႇပဵၼ်လုၵ်ႈၼွင်ႉပိူၼ်ႈႁေ ပဵၼ်ၵူၼ်းၸွမ်းလင်ပိူၼ်ႈၵူၺ်းဢိူဝ်ႈ၊ သမ်ႉဝႃႈႁဝ်းတေပဵၼ်သိုၵ်းႁိုဝ်ဢမ်ႇပဵၼ်သိုၵ်း ပေႃးႁဝ်းမေႃဝူၼ်ႉမေႃသၢင်ႈ ဢမ်ႇၶီႈယၢၼ်ႈပၢႆႈတၢႆ ဢမ်ႇၵူဝ်ဢၢႆသေၶတ်းတႃႉၼႆၸိုင် ႁဝ်းၵေႃႈ ယူဝ်ၶေးတေဢမ်ႇထိုင်ပဵၼ်ၵူၼ်းလႆႈၶၢမ်ႇၸိူင်ႉၼႆၵဝ်ႇမေႃႉ”
ၶိင်းသၢၼ်းၵေႃႈဝႃႈ “ၸႂ်ႈဢိူဝ်ႈ လွင်ႈၼႆႉ မၼ်းၵေႃႈသွၼ်ႁႂ်ႈၵဝ်ႁူႉဝႃႈ ဢၼ်ႁဝ်းတေယူႇလွတ်ႈၵႂႃႇလႆႈၼၼ်ႉ ဢမ်ႇၸႂ်ႈဝႃႈ ႁဝ်းတေပဵၼ်ၵူၼ်းလီႁႃႉၵူၼ်းဢမ်ႇလီ မၼ်းယူႇတီႈဝႃႈ ႁဝ်းတေပဵၼ်ၵူၼ်းၵႅၼ်ႇၶႅင်ႁႃႉ ၵူၼ်းဢူၼ်ႈဢွၼ်ႇၼၼ်ႉယဝ်ႉ၊ ဢမ်ႇဝႃႈယူႇတီႈလႂ် သင်ႁဝ်းၵႅၼ်ႇၶႅင် တေမီးၽႂ်မႃးႁဵတ်းသင်ႁဝ်းလႆႈ ၵူၺ်းၵႃႈ မိူဝ်ႈလႂ်ႁဝ်းဢူၼ်ႈဢွၼ်ႇ ပိူၼ်ႈၵေႃႈတေမႃးၸႂ်ႉၵိၼ်ပေႉၵိၼ်ႁဝ်းယူႇၸိူင်ႉၼႆၼၼ်ႉၼႃႇ”
“ယဝ်ႉၵေႃႉႁႃးသမ်ႉတေၵႂႃႇႁဵတ်းသိုၵ်းႁင်လႃႇၼႆႉ..”
“ဢမ်ႇဝႃႈတေပဵၼ် သိုၵ်းမၢၼ်ႈႁိုဝ်သိုၵ်းတႆး မၼ်းၵေႃႈတိုၼ်းမီးၵူၼ်းလီလႄႈဢမ်ႇလီ၊ ၵူၺ်းၵႃႈ သင်ႁဝ်းပဵၼ်ၵူၼ်းလီ ယူႇတီႈလႂ်ၵေႃႈ ႁဝ်းႁဵတ်းလွင်ႈလီလႆႈယူႇ၊ သင်လွင်ႈလီႁဝ်းၵႅၼ်ႇၶႅင် တီႈဢၼ်ႁဝ်းယူႇၼၼ်ႉ ၵဝ်ယုမ်ႇဝႃႈမၼ်းတိုၼ်းတေပဵၼ်တီႈလီယူႇ”
ၶိင်းသၢၼ်းလၢတ်ႈယဝ်ႉၵေႃႈ လုၵ်ႉႁိူၼ်းၶိင်းပီးၼၼ်ႉသေ ပွၵ်ႈမိူဝ်းႁိူၼ်းမၼ်းၵႂႃႇ တႂ်ႈငဝ်းလပ်းသိင်ႇ ဢၼ်မီးလိူၼ်ၽၢၵ်ႇမၢင်ႈလႅင်းယူႇဝွႆးဝွႆးၼၼ်ႉယဝ်ႉ။
သုတ်းယဝ်ႉ။
ၸိူင်းႁူဝ်ၼႆႉၵေႃႈ ပဵၼ်ဢၼ်သုတ်းၵႂႃႇယဝ်ႉၶႃႈလႄႈ ၸွမ်းလူၺ်ႈတူဝ်ထူပ်းၼမ်ႉၵတ်ႉ ယင်းတိုၵ်ႉယူပ်ႈယွမ်း လူဝ်ႇလႆႈလဵပ်ႈႁဵၼ်းၽိူမ်ႉထႅမ်ထႅင်ႈတင်းၼမ်ယူႇၶႃႈဢေႃႈ။ ဢမ်ႇလိူဝ်လႆႈ ဝႃႇသၼႃႇတၢင်းသူင် ဢၼ်ဢမ်ႇပႆႇၶႂ်ႈပူင်ပူတ်းပွႆႇပႅတ်ႈၼၼ်ႉလႄႈ ၸင်ႇလႆႈသိုပ်ႇႁဵတ်းသၢင်ႈၵႂႃႇ ၼင်ႇၵႃႈပွင်ပဵၼ်လႆႈယူႇၶႃႈ၊ ပေႃးမီးတီႈၽိတ်းတီႈပိူင်ႈ တီႈႁိူင်ႈတီႈၵိူင်းၼႆၵေႃႈ ယွမ်းၼွမ်းယႂ်ႇၼမ်ယူႇၶႃႈ။
ၸိူင်းႁူဝ်ၼႆႉတႄႉၵေႃႈ ဢွင်ႈတီႈပိူင်ပဵၼ်ငဝ်းလၢႆးတင်းသဵင်ႈ ဢမ်ႇၸႂ်ႈလွင်ႈတေႉလႄႈ ပဵၼ်လွင်ႈဢၼ်ဝူၼ်ႉသၢင်ႈမႃးဢဝ်ၵူၺ်း။ သင်တေပဵၼ်ၽွၼ်းလီၵေႃႈ ဢဝ်သိုပ်ႇသၢၼ်ၵႂႃႇၼႃႈ လွင်ႈလႂ်ဢမ်ႇလီၵေႃႈ ႁႂ်ႈမၼ်းယဝ်ႉၵႂႃႇတီႈၼႂ်းၸိူင်းၼႆႉၵူၺ်းၶႃႈလႄႈ။
ယူႇတီႈၶႃႈႁဝ်းၽူႈတႅမ်ႈလိၵ်ႈ ပဵၼ်ဢၼ်ယိၼ်းၸူမ်ၶွပ်ႈၸႂ်ယႂ်ႇၼမ်ထိုင် ၽူႈႁၵ်ႉလိၵ်ႈလၢႆးႁဝ်းၶဝ် ဢၼ်ၶဝ်ႈမႃးလူဢၢၼ်ႇ တေႃႇပေႃးသုတ်းယူႇၶႃႈဢေႃႈ။
ပၢႆၵမ်−သႅၼ်ငဝ်း
27/2/2024-28/3/2024
