တွၼ်ႈသၢဝ်း
ယွၼ်ႉပဵၼ်ၵူၼ်းယူႇၼိူဝ်ပိူၼ်ႈ၊ မီးဢႃႇၼႃႇၸိသင်ႇပိူၼ်ႈလႆႈလႄႈ ၶႂ်ႈႁဵတ်းသင်ၵေႃႈလႆႈဢၼ်ဝႃႈၼၼ်ႉ မၼ်းပဵၼ်လွၵ်းလၢႆးဢၼ်ငၢႆႈ တွၼ်ႈတႃႇဢဝ်ပေႉပိူၼ်ႈလႆႈၵမ်းလဵဝ်၊ ပေႃးဢမ်ႇပေႉၵေႃႈ တင်ႈၸႂ်တဵၵ်းႁႂ်ႈၵူဝ်ၼၼ်ႉ ပဵၼ်ၵူၼ်းဢၼ်ပိူၼ်ႈၸၢၼ်ႈၸင်းၼႃႇၼၼ်ႉယဝ်ႉ၊ ၵူၺ်းၵႃႈ ၽႂ်တေၸင်းၶဝ်ၼၼ်ႉ ၶဝ်ဢမ်ႇလႆႈသူၼ်ၸႂ်လႄႈ ၶဝ်ယင်းဢမ်ႇႁူႉတူဝ်လူးၵွၼ်ႇ၊ ဝၼ်းၸိုၼ်ႈဢၼ်ယူႇၸွမ်းၵူၼ်းၸိူဝ်းၼၼ်ႉမႃးႁိုင် မၼ်းၵေႃႈႁူႉလီလိူဝ်သေၽႂ်၊ ၵူၼ်းၸိူဝ်းၼၼ်ႉ ဢမ်ႇမီးလေႃႇ ၵၢင်ၸႂ်ဢၼ်မေႃပွင်ႇၸႂ်လႄႈႁၼ်ထိုင်ပိူၼ်ႈ လိူဝ်သေတူဝ်ၵဝ်ႇယဝ်ႉ ဢမ်ႇမီးၽႂ်မႃးတႅၼ်းတၢင်လႆႈ၊ ႁဵတ်းၵၢၼ်ပုၼ်ႈတႃႇၵူၼ်းတၢင်းၼမ်ႁႃႉ ဢဝ်ၵူၼ်းၼမ်ႁဵတ်းပၼ်ၵၢၼ်ၸဝ်ႈၵဝ်ႇႁိုဝ်၊ လွင်ႈဢၼ်လၢတ်ႈလႄႈလွင်ႈဢၼ်ႁဵတ်းၼၼ်ႉ ပဵၼ်ဢၼ်ပႅၵ်ႇပိူင်ႈၵၼ်တႄႉတႄႉယဝ်ႉ။
ဝၼ်းၸိုၼ်ႈၵေႃႈ တႄႇၸဵမ်မိူဝ်ႈပီႊ 2018 မႃး တေႃႇထိုင်ၼႂ်း 2020 မီးၵူၼ်းႁူမ်ႈႁဵတ်းၵၢၼ်ၸွမ်းယူႇလၢႆၵေႃႉယဝ်ႉ၊ ၼႃႈၵၢၼ်ဢၼ်မၼ်းႁဵတ်းၼၼ်ႉၵေႃႈ ပဵၼ်ၵၢၼ်ပႂ်ႉၶတ်းၶႂၢင်လွင်ႈဢမ်ႇလီ၊ လွင်ႈမိူၵ်ႈလိူင်း ၵူၼ်းၸိူဝ်းဢၼ်တေပၼ်ၽွၼ်းတုမ်ႉယွၼ်ႈ တေႃႇၵူၼ်းတင်းၼမ်လႆႈ ၼၼ်ႉယဝ်ႉ။
ၼႂ်းၶၢဝ်းတၢင်းသွင်ပီႊမႃးၼႆႉ လႆႈဝႃႈ လွင်ႈဢၼ်မၼ်းႁဵတ်းသၢင်ႈၼၼ်ႉ ၸွႆႈလႆႈၵူၼ်းၼမ်တႄႉတႄႉ။ ၵူၺ်းၵႃႈ ၸုမ်းမၼ်းၼၼ်ႉၵေႃႈ ႁဵတ်းႁႂ်ႈပဵၼ်တီႈဢမ်ႇႁၢၼ်ႉၸႂ်ၸုမ်းၵူၼ်းလူင်ၶဝ် ဢၼ်ႁဵတ်းႁႂ်ႈ လႆႈထူပ်းလွင်ႈလိူတ်ႇမႆႈမႃးယူႇတႃႇသေႇၼၼ်ႉယဝ်ႉ။ ဝၼ်းၸိုၼ်ႈဢၼ်ယူႇၸွမ်းၶဝ် ႁဵတ်းၵၢၼ်ပၼ်ၶဝ်ယူႇၼၼ်ႉ ပႃႈၼႃႈတႄႉၵေႃႈ ႁဵတ်းၵႂႃႇမိူၼ်ၵဝ်ႇယူႇ ၼင်ႇႁိုဝ်ပိူၼ်ႈပေႃးတေဢမ်ႇထၢင်ႇပိူင်ႈၼိူဝ်မၼ်းမႃး ၼၼ်ႉယဝ်ႉ။
လွင်ႈဢၼ်ၸဝ်ႈပၢင်ႇလႆႈလူႉတၢႆၵႂႃႇၼႆႉ ၸုမ်းၵူၼ်းလူင်ၶဝ်ၵေႃႈ လႆႈႁွင်ႉထူပ်းၵၼ်ထႅင်ႈတီႈၼႂ်းလၢၼ်ႉ KTV တီႈဢၼ်ၸဝ်ႈပၢင်ႇမႃးယူႇပဵၼ်ပွၵ်ႈလိုၼ်းသုတ်း ဢွၼ်တၢင်းမၼ်းတေလႆႈၵႂႃႇႁူင်းယႃ ၼၼ်ႉယဝ်ႉ။
ၸဝ်ႈလွၼ်ႉၶိူဝ်းမီးပၢင်ၵုမ်လႄႈ ဢမ်ႇၸၢင်ႈမႃးၼႆသေ ဝၼ်းၸိုၼ်ႈလႆႈမႃးႁင်းၵူၺ်းယူႇ၊ မိူဝ်ႈဢၼ်ဝၼ်းၸိုၼ်ႈ ၶဝ်ႈၵႂႃႇၼႂ်းႁွင်ႈၶဝ်ယူႇၼၼ်ႉ ဢဝ်မၼ်းသမ်ႉပေႃးလႆႈတူၵ်းၸႂ်တႄႉတႄႉ။ တီႈၼႂ်းႁွင်ႈၼၼ်ႉ လိူဝ်သေမီး ၸဝ်ႈမိူင်းၶမ်း၊ ၸဝ်ႈၸိင်ႇ၊ ၸဝ်ႈပၼ်ႇ ၶဝ်သၢမ်ၵေႃႉယဝ်ႉ ယင်းမီး မူၺ်ႁွမ်ၽွင်း ထုၵ်ႇမတ်ႉမိုဝ်းပႄႈပိၵ်ႇ ဢိုတ်းသူပ်းဝႆႉယူႇပႃႈၼႃႈၶဝ်။
“ပဵၼ်သင်လႄႈႁဵတ်းၸိူင်ႉၼႆၶႃႈလႃႇ!!..”
“မႂ်းဝူၼ်ႉဝႃႈႁဝ်းဢမ်ႇႁူႉလွင်ႈဢၼ်မႂ်းႁဵတ်းႁႃႉ ဢီႇၼႆႉလၢတ်ႈၼႄႁဝ်းမူတ်းယဝ်ႉ”
ဝၼ်းၸိုၼ်ႈၵေႃႈ သီၼႃႈပိူင်ႈမႃးသေ ဝၢႆႇတူၺ်းၸူး မူၺ်ႁွမ်ၽွင်း ဢၼ်ဢမ်ႇၸၢင်ႈလၢတ်ႈသင်လႆႈလႄႈ ၽၢင်ႁၢင်ႈပေႃးဢမ်ႇလီတူၺ်းသေဢိတ်း ၼႃႈၵမ်ႇမၢၼ်ႉ လိူတ်ႈလႅင်ၸိုမ်ႉယမ်းတီႈၶူႈၼင် ႁူဝ်ယုင်ႈႁိူဝ်ႇတႅၵ်ႇႁိူဝ်ႇလႆ ၼႃႈပေႃးယမ်းလူင်ၵႂႃႇသဵင်ႈ၊ သၢႆတႃမူၺ်ႁွမ်ၽွင်းတူၺ်းၸူးမၼ်း ႁူမ်ႈလေႃးႁူဝ်ဢၼ်ၶွၼ်းၼႄယူႇၼၼ်ႉ မၼ်းၵေႃႈႁူႉၵမ်းလဵဝ်ဝႃႈ မူၺ်ႁွမ်ၽွင်းဢမ်ႇလႆႈလၢတ်ႈ ယဝ်ႉၵေႃႈလၢႆးၼႆႉ ပဵၼ်လၢႆးဢၼ်မၼ်းၸႂ်ႉၸွပ်ႇၸႅတ်ႈၵူၼ်းယူႇတႃႇသေႇ ဢဝ်ၵူၼ်းႁဵတ်းၵၢၼ်ႁူမ်ႈၵၼ်သေ ႁႃတၢင်းၽိတ်းပၼ်ၵၼ်ယဝ်ႉ ႁဵတ်းႁႂ်ႈလၢတ်ႈၵႂၢမ်းလပ်ႉဢွၵ်ႇမႃး လူၺ်ႈတီႈဢမ်ႇလူဝ်ႇလႆႈၸႅတ်ႈထၢမ်သင်ၵေႃႈ ႁူႉလွင်ႈ။ ဝၼ်းၸိုၼ်ႈၵေႃႈ ႁဵတ်းမိူၼ်ဢမ်ႇႁူႉဢမ်ႇႁၼ်သေ
“လွင်ႈသင်ၶႃႈလႃႇ!! ဢမ်ႇႁၼ်မီးလွင်ႈသင်ၶႃႈလူး”
“ပဵၼ်လုၵ်ႈၵူၼ်းလူင်ယဝ်ႉ ဝူၼ်ႉဝႃႈႁဝ်းတေဢမ်ႇႁတ်းႁဵတ်းသင်တီႈမႂ်းလႆႈႁႃႉ မွၵ်ႈဢူႈသူၼၼ်ႉၵူၺ်း ဢမ်ႇၸၢင်ႈႁဵတ်းသင်ႁဝ်းလႆႈလေႃႇ” ၸဝ်ႈပၼ်ႇလၢတ်ႈ။
“ယုမ်ႇၸႂ်မႂ်းသေႁႂ်ႈႁဵတ်းပၼ်ၵၢၼ် ဢမ်ႇဝူၼ်ႉမႅၼ်ႈဝႃႈမႂ်းတေပဵၼ်ၵူၼ်းႁၵ်းလင်သေ မႃးႁဵတ်းလွင်ႈမိူၵ်ႈလိူင်းၸိူင်ႉၼႆ”
ဝၼ်းၸိုၼ်ႈၵေႃႈ ၼင်ႈယၵ်ႉတူၺ်းၶဝ်သေ ယုမ်ႉယူႇၸုတ်းၵုတ်းယဝ်ႉ၊ လၢတ်ႈၵႂႃႇသဵင်ၼိမ်ယဵၼ် “လွင်ႈမိူၵ်ႈလိူင်းဢၼ်ဝႃႈၼၼ်ႉ ပဵၼ်သင်ၶႃႈလႃႇ ၸွင်ႇၸႂ်ႈလွင်ႈဢၼ် ဢဝ်လုၵ်ႈဢွၼ်ႇ ဢႃႇယုပႆႇတဵမ် 18 မႃးႁဵတ်းၵၢၼ်ၶႃႈၼႄႇ၊ ဢမ်ႇၼၼ်ၵေႃႈ ဢဝ်ယႃႈမႃးၶၢႆၼႂ်းလၢၼ်ႉKTV ၼႆၶႃႈႁႃႉ၊ ဢေႃ!..ဢမ်ႇၼၼ်ၵေႃႈ ၵႂႃႇၸူၼ်ဢဝ်ငိုၼ်းပိူၼ်ႈၸွမ်းတၢင်းၸိူင်ႉၼၼ်ၶႃႈႁိုဝ် ၶႃႈဢမ်ႇတွင်းလႆႈဝႃႈ ၶႃႈတၼ်းၵႂႃႇႁဵတ်းလွင်ႈၸိူဝ်းၼၼ်ႉၸဵမ်မိူဝ်ႈလႂ်”
ဢဝ်သီၼႃႈၶဝ်ပေႃးၵမ်ႇလမ်လူင်မႃးၵမ်းလဵဝ်ယဝ်ႉ၊ ၸဝ်ႈပၼ်ႇဢၼ်ၸႂ်ဢမ်ႇယၢဝ်းလႆႈယဝ်ႉၼၼ်ႉ ၼႅတ်ႈပုင်ႈလူင်မႃးၸူးဝၼ်းၸိုၼ်ႈ ဢၼ်ၸုၵ်းၼိမ်တူၺ်းၶဝ် လူၺ်ႈသၢႆတႃဢၼ်ဢမ်ႇတိုၼ်ႇၵူဝ်သေဢိတ်းလႄႈ မၼ်းၸဝ်ႈၵေႃႈ လၢတ်ႈလေႃးပႃးလွင်ႈၸႂ်လမ်သေ ဢမ်ႇၸၢင်ႈႁဵတ်းသင်လႆႈတီႈဝၼ်းၸိုၼ်ႈလႄႈ ၵႂႃႇမိပ်ႇငႅၼ်းၶေႃးမူၺ်ႁွမ်ၽွင်း သမ်ႉပေႃးထူၺ်ႈၸႂ်ဢမ်ႇလႆႈ ၼၼ်ႉဝႃႈ−
“မႂ်း!! ဝၢင်းၽႅၼ်ၶႃႈႁႅမ်ၸဝ်ႈပၢင်ႇလႄႈ လွင်ႈၼႃႈၵၢၼ် ဢၼ်ႁဝ်းလႆႈလူႉသုမ်းမႃးၸိူဝ်းၼၼ်ႉၵေႃႈ ပဵၼ်ၽႅၼ်ၵၢၼ်မႂ်း ႁဝ်းႁူႉဢိူဝ်ႈ.. လိူဝ်သေမႂ်းယဝ်ႉ မီးၽႂ်ထႅင်ႈလႃႇ ဢၼ်ႁူႉလွင်ႈၽၢႆႇၼႂ်းႁဝ်းသေႁဵတ်းၸိူင်ႉၼႆလႆႈ”
ဝူၼ်ႉဝႃႈပေႃးႁဵတ်းတီႈမူၺ်ႁွမ်ၽွင်း တေႁဵတ်းႁႂ်ႈဝၼ်းၸိုၼ်ႈၸႂ်ဢူၼ်ႈဢွၼ်ႇလႆႈလႄႈ ဝၼ်းၸိုၼ်ႈၵေႃႈၼင်ႈလူင်းတီႈတင်ႇသေ “ႁႃးႁႃး…ႁႃး..ၸိူင်ႉၼႆႁႃႉပဵၼ်ၽူႈဢွၼ်ႁူဝ်ပိူၼ်ႈ ၸိူင်ႉၼႆႁႃႉပိူၼ်ႈႁွင်ႉဝႃႈၽူႈႁတ်းႁၢၼ် ႁတ်းပေႉၵိၼ်ၽူႈယိင်းၵူၺ်း၊ မေႃပေႉၵိၼ်ၵူၼ်းဢူၼ်ႈဢွၼ်ႇၵူၺ်း ပဵၼ်ၽူႈဢွၼ်လူႉၼႆ ၸင်ႇတေထုၵ်ႇမႅၼ်ႈယူဝ်ႉ”
ၸဝ်ႈပၼ်ႇၵေႃႈ ပွႆႇမူၺ်ႁွမ်ၽွင်းသေ ပႆမႃးၸူးဝၼ်းၸိုၼ်ႈယဝ်ႉ “မႂ်း!!” ၸိၼႃႈဝၼ်းၸိုၼ်ႈ ပႃးတင်းလွင်ႈၸႂ်လမ်ယဝ်ႉ “မႂ်းတေလႆႈႁူႉလွင်ႈၵဝ်ယူႇၵူၺ်း!!”
“ၸိူင်ႉၼင်ႇၸိူဝ်းသူၼႆႉႁႃႉ တေႁဵတ်းသင်ၵဝ်လႆႈလႃႇ..” ငႅၼ်ႈၸူးလေႃးပႃးသၢႆတႃဢၼ်လီၽၢၼ်ႈၼၼ်ႉလႄႈ“ပေႃးဢမ်ႇၶႂ်ႈပဵၼ်ၽဵတ်ႇၵေႃႈ ပွႆႇမူၺ်ႁွမ်ၽွင်းၵႂႃႇလႄႈ”
“ဢီႇၼႆႉ!!!” ၶဝ်သၢမ်ၵေႃႉ ၽွမ်ႉၵၼ်ယၵ်ႉတူၺ်းၼႃႈဝၼ်းၸိုၼ်ႈယဝ်ႉ ႁွင်ႉလုၵ်ႈၼွင်ႉၶဝ်ၶဝ်ႈမႃးယူႇ၊ လုၵ်ႈၼွင်ႉၶဝ်ၸိူဝ်းၼၼ်ႉၵေႃႈ ဢွၼ်ၵၼ်ၶဝ်ႈမႃးတေႉၼင်ႇဝႃႈယဝ်ႉ။ “ၺွပ်းမၼ်းဝႆႉလႄႈ!!”
“သူႁၼ်ဝႃႈၵူၼ်းၸိူဝ်းၼႆႉ ပဵၼ်တီႈလီယုၵ်ႉယွင်ႈလႄႈ လီႁဵတ်းၸွမ်းၶေႃႈသင်ႇယူႇၸိူင်ႉၼၼ်ႁႃႉ” ဢဝ်ၵူၼ်းၸိူဝ်းၼၼ်ႉသမ်ႉပေႃးမိုင်ၵႂႃႇယူႇ။ “ပေႃးသူဢွၵ်ႇၵႂႃႇယၢမ်းလဵဝ်” ဝၼ်းၸိုၼ်ႈထူၵ်းဢဝ်ငိုၼ်းၼႅပ်ႇၼိုင်ႈၼႂ်းထူင်မၼ်းၼၼ်ႉမႃးသေ “ဢဝ်ၵႂႃႇလႄႈငိုၼ်းၼႆႉ!!” ႁဵတ်းႁႂ်ႈၵူၼ်းၸိူဝ်းၼၼ်ႉ ဢွၼ်ၵၼ်ႁူၼ်ၵႂႃႇၶိုၼ်းယူႇ။
ၸဝ်ႈပၼ်ႇၵေႃႈ ႁိုတ်းသႂ်ႇၵူၼ်းၸိူဝ်းၼၼ်ႉၵႂႃႇ “ၼႆႉပဵၼ်ၶေႃႈသင်ႇ!!”
“ၶေႃႈသင်ႇၼၼ်ႉ ႁဵတ်းၸွမ်းယဝ်ႉ သူတေလႆႈသင်လႃႇ လႆႈပဵၼ်ၶႃႈၶဝ်ၵႂႃႇထႅင်ႈၵူၺ်းဢိူဝ်ႈ တီႈၼႆႈ ဢမ်ႇၸႂ်ႈတီႈတေမႃးၸႂ်ႉ ဢႃႇၼႃႇႁိုဝ်ၸၼ်ႉထၢၼ်ႈတေႃႇၵၼ်လေႃႇၼႃႈ..” ထူၵ်းဢဝ်ငိုၼ်းထႅင်ႈၼႅပ်ႇၼိုင်ႈမႃးသေ “ဢဝ်ငိုၼ်းၼႆႉၵႂႃႇဢမ်ႇလီႁိုဝ် ယဝ်ႉၵေႃႈ..သၢဝ်ၼႂ်းလၢၼ်ႉၼႆႉ လိူၵ်ႈဢဝ်လႄႈၶႂ်ႈလႆႈၵေႃႉလႂ်ၵေႃႈ၊ ၶႂ်ႈၵိၼ်မဝ်းတၢၼ်ႇလႂ်ၵေႃႈၵိၼ်ၵျေႃႇၵျေႃႇလႄႈ ၶမ်ႈၶိုၼ်းၼႆႉ ပီႈၼၢင်းသူလဵင်ႉၵူၺ်း”
ၶဝ်ၸိူဝ်းၼၼ်ႉၵေႃႈ သမ်ႉပေႃးဢမ်ႇတူင်ႉဢမ်ႇၼိုင်သင်သေၵေႃႉ ၽၢႆႇၼိုင်ႈၵေႃႈပဵၼ်ႁူဝ်ၼႃႈ ထႅင်ႈၽၢႆႇၼိုင်ႈၵေႃႈ သမ်ႉပဵၼ်ငိုၼ်း ဢၼ်ၵူၼ်းသိုၵ်းၸိူင်ႉၼင်ႇၶဝ် ဢမ်ႇမီးတိုဝ်ႉတၢင်းလႆႈယိပ်းတိုဝ်းၼမ်တၢၼ်ႇၼၼ်ႉလႆႈ။
“သူၵေႃႈႁူႉယူႇဢမ်ႇၸႂ်ႈႁႃႉ ၵူၼ်းဢၼ်ၸုၵ်းယူႇပႃႈၼႃႈသူၼၼ်ႉၵေႃႈ ပဵၼ်ၵူၼ်းဢၼ်ႁၼ်ထိုင်ငိုၼ်းလၢႆလၢႆၵူၺ်း သူတေဢဝ်ငိုၼ်းၼႆႉၵႂႃႇၵေႃႈ ဢမ်ႇလႆႈၽိတ်းပိူင်သင်လေႃႇ ယွၼ်ႉပိူဝ်ႈ ႁူဝ်ၼႃႈသူၵေႃႈ ႁဵတ်းၸိူင်ႉၼၼ်ယူႇယဝ်ႉ”
“ၵဝ်ပဵၼ်ၵူၼ်းလူင်သူဢိူဝ်ႈဢၢႆႈ!!” ၸဝ်ႈပၼ်ႇႁိုတ်းသႂ်ႇ။
ဝၼ်းၸိုၼ်ႈၵေႃႈ ပိုဝ်ႈငိုၼ်းဢွၵ်ႇၽၵ်းတူသေ မိုဝ်းတႄႉၸိသႂ်ႇလုၵ်ႈၼွင်ႉၶဝ် ၼႃႈမၼ်းတႄႉတေႃႇၸူးတင်းၸဝ်ႈပၼ်ႇယဝ်ႉ ၶိုၼ်ႈသဵင်ႁိုတ်းသႂ်ႇ “ဢွၵ်ႇၵႂႃႇလႄႈ!!…” ဢဝ်ၸဝ်ႈပၼ်ႇၼၼ်ႉ ပေႃးထွႆလင်ၵႂႃႇတေႉလႄႈ ၵူၼ်းၸိူဝ်းၼၼ်ႉ ႁၼ်ၼင်ႇၼၼ်ၵေႃႈ သမ်ႉပေႃးတိုၼ်ႇၽၢၼ်ႈ ၼႅတ်ႈဢွၼ်ၵၼ်ဢွၵ်ႇၵႂႃႇယဝ်ႉ လၢၵ်ႈဢဝ်မူၺ်ႁွမ်ၽွင်းၵႂႃႇၸွမ်းယူႇ။
ၸဝ်ႈၸိင်ႇႁၼ်ဝၼ်းၸိုၼ်ႈ ဢမ်ႇသႂၢင်းၵိၼ်ၶဝ် တေႃႇၼႃႈလုၵ်ႈၼွင်ႉၶဝ်လႄႈ ပဵၼ်ဢၼ်ဢမ်ႇႁၢၼ်ႉၸႂ်မႃးသေ “မႂ်းမၼ်းၵေႃႈပဵၼ်ၵူၼ်းယိင်း ၸၼ်ႉလဵၵ်ႉဢွၼ်ႇၵူၺ်း ႁတ်းမႃးႁဵတ်းၸိူင်ႉၼႆတေႃႇၵူၼ်းလူင်ၸၼ်ႉယႂ်ႇလိူဝ်မႂ်း ၸိူင်ႉႁဝ်းလႆႈၸိူင်ႉႁိုဝ်”
ဝၼ်းၸိုၼ်ႈၵေႃႈဝိၼ်ႇၼႃႈ ယၵ်ႉတူၺ်းၵႂႃႇတီႈၸဝ်ႈၸိင်ႇၼၼ်ႉသေ “ဢေႃ…ၵူၺ်းၵႃႈတီႈၼႆႈ ဢမ်ႇၸႂ်ႈတီႈၸႅၵ်ႇၸၼ်ႉထၢၼ်ႈၵၼ်ၼႆ လၢတ်ႈယဝ်ႉလူး” ယုမ်ႉဝၢႆႈလႅင်ႈယဝ်ႉ “ၽႂ်မီးငိုၼ်းပဵၼ်ၸဝ်ႈၼႆ ဢမ်ႇယၢမ်ႈငိၼ်းႁႃႉ”
“ၼႆႉႁဝ်းပဵၼ်ၵူၼ်းလူင်းတိုၼ်းမၼ်းဢိူဝ်ႈ” ၸဝ်ႈၸိင်ႇလၢတ်ႈၸူးၶိုၼ်း။
“ၵူၺ်းၵႃႈ ၵဝ်ပဵၼ်ၸဝ်ႈလၢၼ်ႉလူး တေႁဵတ်းႁိုဝ်လႃႇ..” ယၵ်ႉတူၺ်းၸိူဝ်းၶဝ် ၵမ်းၵေႃႉၵေႃႉသေ သိုပ်ႇလၢတ်ႈထႅင်ႈ “လွင်ႈဢၼ်ၸဝ်ႈပၢင်ႇလႆႈလူႉတၢႆၵႂႃႇၼၼ်ႉ ဝူၼ်ႉဝႃႈမၼ်းပဵၼ်လွင်ႈဢၼ်ၵဝ်ႁဵတ်းၵႂႃႇႁင်းၵူၺ်း လူၺ်ႈၵူၼ်းတၢင်းၼိူဝ် ဢမ်ႇႁူႉၸိူင်ႉၼၼ်ႁႃႉ!! ၵဝ်ၵေႃႈႁဵတ်းၸွမ်းၵႂၢမ်းသင်ႇၵူၺ်း” ၼင်ႈၶႃၵၢႆႇၵွၼ်းသေ “ဝူၼ်ႉဝႃႈတေပဵၼ်ၽႂ်လႃႇ ၸဝ်ႈလွၼ်ႉၶိူဝ်းၸိူင်ႉၼၼ်ႁႃႉ.. မၼ်းမီးဢႃႇၼႃႇႁဵတ်းသင်လႆႈ သူပေႃးၵုမ်းၵမ်မၼ်းဝႆႉမူတ်းယဝ်ႉလူး..” ယိပ်းဢဝ်ၵွၵ်းလဝ်ႈၼိူဝ်ၽိူၼ်ၼၼ်ႉ မႃးၶွၼ်းၵူၼ်ႈမၼ်းၵႂႃႇၵႂႃႇမႃးမႃးသေ လၢတ်ႈၵႂႃႇထႅင်ႈ “ဢၼ်သုင်လိူဝ်သေၼၼ်ႉဢိူဝ်ႈ.. သင်ဢမ်ႇၶႂ်ႈမိူၼ်ၼင်ႇၸဝ်ႈပၢင်ႇၵေႃႈ ယူႇယဵၼ်ယဵၼ်လႄႈ ပေႃးဢမ်ႇၼၼ် ၵဝ်တေဢမ်ႇဝႆႉၼႃႈသူမိူၼ်ၵၼ်”
ဢဝ်ၶဝ်ပေႃးၼင်ႈငိူဝ်ႈလူင်ၵႂႃႇႁင်းၽႂ်ႁင်းမၼ်းသေ ဝူၼ်ႉယူႇဝႃႈပဵၼ်ၽႂ်ၼႆယူႇႁင်းၶဝ်ယဝ်ႉ။ ဝၼ်းၸိုၼ်ႈလုၵ်ႉၸုၵ်း ၸူၵ်းထွင်းမၼ်းသေ “မိူဝ်ႈၼႆႉလၢၼ်ႉတဵမ်ယဝ်ႉ ဢမ်ႇမီးၵူၼ်းမႃးႁပ်ႉတွၼ်ႈသူၸဝ်ႈယဝ်ႉၼႃႈ!” ယုမ်ႉဝၢႆႈလႅင်ႈၼင်ႇၵူၼ်းဢွင်ႇပေႉသေ ပိုတ်ႇၽုၺ်ႇၽၵ်းတူၵႂႃႇယဝ်ႉ။
တွၼ်ႈသၢဝ်းသုတ်းၵႂႃႇယဝ်ႉ သိုပ်ႇလူထႅင်ႈတွၼ်ႈသၢဝ်းဢဵတ်းၶႃႈ။
တႃႇတွင်း။ ။ ၸိူင်းႁူဝ်ၼႆႉပဵၼ်ၸိူင်းဢၼ်ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈတေႉ။
