တွၼ်ႈသိပ်းၵဝ်ႈ
ၸၢႆးၵေႃႉၼၼ်ႉၵေႃႈ မိူၼ်မီးၶေႃႈၵႂၢမ်းယူႇၼႂ်းၸႂ် ဢၼ်ၶႂ်ႈလၢတ်ႈမွၵ်ႇၼႄဝၼ်းၸိုၼ်ႈၼၼ်ႉမိူၼ်ၵၼ်။
“ပေႃႈမႄႈၶႃႈ လူႉသဵင်ႈၵႂႃႇၸဵမ်မိူဝ်ႈၶႃႈလႆႈသွင်ၶူပ်ႇၼၼ်ႉဢေႃႈ ၶႃႈလႄႈတင်းပီႈၼွင်ႉၶႃႈ ယူႇၸွမ်းၼၢႆးႁဝ်းမႃးၸဵမ်လဵၵ်ႉၶႃႈယဝ်ႉ။ ဢၼ်ၶႃႈလႆႈမႃးတီႈၼႆႈၵေႃႈ ယွၼ်ႉပိူဝ်ႈ ၼႃႈႁိူၼ်းႁဝ်း မီးလုၵ်ႈၸၢႆးသၢမ်ၵေႃႉၼႆၶႃႈဢေႃႈ၊ ၵူၺ်းၵႃႈ ဢၼ်မီးယူႇတီႈႁိူၼ်းတႄႉ မီးၶႃႈလႄႈၼွင်ႉယိင်းၶႃႈၵူၺ်း ပီႈဢၢႆႈလူင်ၶႃႈၵေႃႈ ၵႂႃႇႁဵတ်းၵၢၼ်မိူင်းထႆးႁေ ပီႈဢၢႆႈၵေႃႉၵၢင်ၵေႃႈ ႁၢႆလၢႆၵႂႃႇၸဵမ်မိူဝ်ႈႁႃႈပီႊပူၼ်ႉယဝ်ႉ ဢမ်ႇႁူႉဝႃႈမၼ်းၵႂႃႇမီးတီႈလႂ် ၵမ်ႈၽွင်ႈၵေႃႈဝႃႈၺႃးပိူၼ်ႈဢဝ်ၵႂႃႇႁဵတ်းသိုၵ်းယဝ်ႉ၊ ၵမ်ႈၽွင်ႈၵေႃႈဝႃႈ ၺႃးပိူၼ်ႈဢဝ်ၵႂႃႇႁႅမ်တၢႆပႅတ်ႈယဝ်ႉၼႆၶႃႈဢေႃႈ။ ၸူးၸႂ်ၶႃႈတႄႉၶႂ်ႈဢွၵ်ႇၸွမ်းႁႃယူႇ ၵူၺ်းၵႃႈ ၼၢႆးႁဝ်းၵေႃႈသမ်ႉထဝ်ႈၼႃႇယဝ်ႉၶႃႈလႄႈ ႁမ်ႉပႆဢမ်ႇလႆႈထႅင်ႈႁေ ဢမ်ႇမီးၽႂ်လုမ်းလႃးမၼ်းၶႃႈၼႃႇ၊ ၼွင်ႉယိင်းၶႃႈၵေႃႈ သမ်ႉလူဝ်ႇၶိုၼ်ႈႁူင်းႁဵၼ်းယူႇဢေႃႈ ပီႈဢၢႆႈလူင်တႄႉၵေႃႈ သမ်ႉလူဝ်ႇႁႃငိုၼ်းလဵင်ႉၼႃႈႁိူၼ်းမၼ်းႁေ သူင်ႇပၼ်ၼွင်ႉယိင်းၶိုၼ်ႈႁူင်းႁဵၼ်းထႅင်ႈႁေၼၼ်ႉၶႃႈၼႃႇ၊ ပေႃးဢမ်ႇမီးၶႃႈယဝ်ႉ ၵၢၼ်တီႈႁိူၼ်းႁဝ်းၵေႃႈ သမ်ႉဢမ်ႇမီးၽႂ်ႁဵတ်းၽႂ်ႁႃယဝ်ႉၶႃႈဢေႃႈ၊ ပီႊၼႆႉ ၼွင်ႉယိင်းၶႃႈယူႇၸၼ်ႉသိပ်းယဝ်ႉ ၸူးၸႂ်တႄႉၶႂ်ႈႁႂ်ႈမၼ်းႁဵၼ်းႁႂ်ႈယဝ်ႉၶႃႈဢေႃႈ၊ ၵူၺ်းၵႃႈ မိူဝ်ႈပဵၼ်ၸိူင်ႉၼႆ မၼ်းၵေႃႈ ၵႃႈတေလႆႈဢွၵ်ႇႁူင်းႁဵၼ်းၵႂႃႇၵူၺ်းၶႃႈယဝ်ႉ”
မၼ်းၵေႃႈဝူၼ်ႉပၼ်ႁႃလူင်ၼႃႈႁိူၼ်းမၼ်းၼၼ်ႉသေယဝ်ႉ ၶိုၼ်းသိုပ်ႇလၢတ်ႈၸူးဝၼ်းၸိုၼ်ႈ “ပေႃးဝႃႈမီးၶႃႈယူႇ မၼ်းၵေႃႈတေလႆႈႁဵၼ်းတဵမ်တီႈလႄႈ တေၸၢင်ႈတွပ်ႇပူၼ်ႉလႆႈယူႇ ၵွပ်ႈပိူဝ်ႈမၼ်းၵေႃႈ ပဵၼ်လုၵ်ႈႁဵၼ်းဢၼ်ၵတ်ႉၶႅၼ်ႇမႃးတႃႇသေႇၶႃႈဢေႃႈ ၼႂ်းႁဝ်းပီႈၼွင်ႉၼႆႉ ၼွင်ႉယိင်းႁဝ်းပဵၼ်ၵေႃႉဢၼ်လႆႈႁဵၼ်းသုင်လိူဝ်ပိူၼ်ႈယဝ်ႉၶႃႈ သင်ပဵၼ်လႆႈ ႁဝ်းၵေႃႈၶႂ်ႈႁႂ်ႈမၼ်းလႆႈသိုပ်ႇႁဵၼ်းၵႂႃႇတေႃႇထိုင်ၸၼ်ႉၸွမ်ၵွၼ်ႇဢေႃႈ ၵူၺ်းၵႃႈ မၼ်းၵေႃႈဢမ်ႇပဵၼ်လႆႈယဝ်ႉ” သမ်ႉပေႃးဢဝ်ၼမ်ႉတႃမၼ်းၸိုမ်ႉယမ်း ဢိုတ်ႇႁႆႈဢွၵ်ႇမႃးယူႇ။
“ၵွပ်ႈပိူဝ်ႈၶႃႈလႆႈမႃးႁဵတ်းသိုၵ်းသေ ႁဵတ်းႁႂ်ႈမၼ်းဢမ်ႇလႆႈၵႂႃႇၶိုၼ်ႈႁူင်းႁဵၼ်း၊ လႆႈလုမ်းလႃးၼၢႆးႁဝ်းတၢင်ၶႃႈၵႂႃႇၶႃႈဢေႃႈ၊ မိူဝ်ႈဝူင်ႈပူၼ်ႉ မၼ်းၵေႃႈပွင်ႇၶၢဝ်ႇမႃးဝႃႈ ၼၢႆးႁဝ်းပဵၼ်ႁႅင်းၼႃႇယဝ်ႉလႄႈ ၶႃႈၵေႃႈယွၼ်းၶႂၢင်ႉမိူဝ်းၸႂ်းႁိူၼ်းၶႃႈဢေႃႈ ၵွပ်ႈပိူဝ်ႈၶႃႈတိုၵ်ႉပဵၼ်ၵူၼ်းမႂ်ႇၵူၺ်းလႄႈ ၶဝ်ၵေႃႈဢမ်ႇပၼ်ၶႃႈမိူဝ်း ၶဝ်တင်းပၢႆဝႃႈ “မၼ်းတၢႆယဝ်ႉႁႃႉ ပေႃးပႆႇတၢႆၵေႃႈ ဢမ်ႇလူဝ်ႇမိူဝ်း” ၼႆႁင်းၶႃႈထႅင်ႈဢေႃႈ၊ ၶႃႈၵေႃႈမႆႈၸႂ်လႄႈ ယွၼ်းႁႂ်ႈဢူၺ်းၵေႃႉၸွႆႈႁေ လႆႈလၵ်ႉမိူဝ်းၵၢင်ၶမ်ႈၶႃႈယဝ်ႉ၊ ၽိူဝ်ႇမိူဝ်းႁွတ်ႈၵူၺ်း ၼၢႆးႁဝ်းပေႃးလႆႈလူႉသဵင်ႈၵႂႃႇယဝ်ႉၶႃႈၼႃႇ”
တင်းလၢတ်ႈ ၼမ်ႉတႃမၼ်းၵေႃႈ တူၵ်းယွတ်ႇၸွမ်းမႃးသေ ၼိမ်ယဵၼ်ၵႂႃႇၵႅပ်ႉၼိုင်ႈယဝ်ႉ
“မိူဝ်ႈပဵၼ်ၸိူင်ႉၼၼ် ၶႃႈၵေႃႈဢမ်ႇၸၢင်ႈပွၵ်ႈမိူဝ်းတီႈတပ်ႉၶိုၼ်းလႆႈႁေယဝ်ႉ ၶဝ်ၵေႃႈဝႃႈၶႃႈလၵ်ႉပၢႆႈၼႆသေ မႃးၺွပ်းဢဝ်ၶႃႈမႃးယူႇၼႂ်းၶွၵ်ႈၶင်ၼႆႉ ၸဵမ်မိူဝ်ႈဝၼ်းၼၼ်ႉၶႃႈဢေႃႈ ၶႃႈၵေႃႈဢမ်ႇလႆႈႁူႉလွင်ႈတီႈႁိူၼ်းၶႃႈထႅင်ႈယဝ်ႉ ဢမ်ႇႁူႉဝႃႈမိူဝ်ႈလဵဝ်ဢေးၼွင်ႉတေပဵၼ်ၸိူင်ႉႁိုဝ်”
ၼင်ႈႁႅၼ်မုင်ႈၵႂႃႇတူၺ်းတၢင်းဝၢၼ်ႈၶဝ် ဢၼ်မီးလုၵ်ႈလွႆလူင်ႁႄႉၶႅၼ်ႈဝႆႉၼၼ်ႉလႄႈ ဝၼ်းၸိုၼ်ႈၵေႃႈ လႆႈမုင်ႈႁႅၼ်ၵႂႃႇတူၺ်းၸွမ်း။
“လုၵ်ႉတီႈၼႆႈၵႂႃႇတီႈဝၢၼ်ႈသူၵႆယူႇႁႃႉ…”
“ပေႃးပႆတိၼ်ဢဝ်တႄႉႁိုင်ယူႇမွၵ်ႈ 6 ၸူဝ်ႈမူင်းၼႆႉၶႃႈဢေႃႈ”
“ႁဝ်းတေမိူဝ်းတူၺ်းပၼ်ၼႃႈ” ဝၼ်းၸိုၼ်ႈယၵ်ႉတူၺ်းဝၢၼ်ႇၶဝ်ႈ ဢၼ်ပိူၼ်ႈသႂ်ႇမႃးပၼ်ၼၼ်ႉ ဢမ်ႇယွမ်းသေဢိတ်း “ဢမ်ႇတွင်ႉမႆႈၵေႃႈၵိၼ်သေဢိတ်ႉၼိုင်ႈလႄႈ သူတေဢဝ်ႁႅင်းတီႈလႂ် ပႂ်ႉႁူပ်ႉၼွင်ႉယိင်းသူၶိုၼ်းလႆႈလႃႇ” လၢတ်ႈယဝ်ႉၵေႃႈ ပႆဢွၵ်ႇၵႂႃႇပႅတ်ႈယူႇယဝ်ႉ။
ၸဝ်ႈပၼ်ႇၼၼ်ႉတႄႉၵေႃႈ မွင်းဝႃႈၸဝ်ႈလွၼ်ႉၶိူဝ်းမႃးၵူၺ်း သမ်ႉပေႃးႁႂ်ႈလုၵ်ႈၼွင်ႉမၼ်း ႁၢင်ႈႁႅၼ်းၶွင်လီမဵဝ်းဝၢၼ်ဝႆႉ တႃႇၵိၼ်လဵင်ႉၵၼ်ယူႇၼႂ်းႁိူၼ်းမၼ်းၼၼ်ႉယဝ်ႉၼႃႇ၊ လုၵ်ႈၼွင်ႉမၼ်း တေလႆႈၵိၼ်ႁိုဝ်ဢမ်ႇလႆႈၵိၼ်တႄႉဢမ်ႇလႆႈဝူၼ်ႉယဝ်ႉ ၵူၺ်းၵႃႈ တႃႇၸဝ်ႈမၼ်းပေႃးတေလႆႈၵိၼ်လီၼၼ်ႉ မၼ်းတိုၼ်းႁၢင်ႈႁႅၼ်းၽွမ်ႉတူဝ်ႈတၼ်းဝႆႉပၼ် ၶိုၵ်ႉၶႅမ်ႉလီၼႃႇ ၵိၼ်တႄႇဢဝ်ႁူဝ်ၶမ်ႈၵႂႃႇယဝ်ႉ။
ဝၼ်းၸိုၼ်ႈၵေႃႈ ဢဝ်တင်းလူတ်ႉၶိူင်ႈတီႈႁိူၼ်းၸဝ်ႈပၢင်ႇၼၼ်ႉသေ မိူဝ်းၵႂႃႇတၢင်းဝၢၼ်ႈၸၢႆးၵေႃးဝိၶဝ်ၼၼ်ႉႁင်းၵူၺ်းမၼ်းလႄႈ မိူဝ်းႁူပ်ႉၼွင်ႉယိင်းၸၢႆးၵေႃးဝိ ဢိၵ်ႇတင်း ပီႈဢၢႆႈလူင်ၶဝ် ဢၼ်လုၵ်ႉမိူင်းထႆးမႃးၼၼ်ႉ ယူႇယဝ်ႉ။ ၼၢႆးၶဝ်ၼၼ်ႉၵေႃႈ လႆႈပူၼ်ႉၶၢပ်ႈတူဝ်မၼ်းၵႂႃႇ ဝၢႆးသေၸၢႆးၵေႃးဝိထုၵ်ႇတိၺွပ်းမႃးတီႈပၢင်သဝ်းမွၵ်ႈ 3 ဝၼ်း လႄႈ ၶဝ်ၵေႃႈလႆႈႁဵၼ်းသွမ်းယဝ်ႉတူဝ်ႈၵႂႃႇယဝ်ႉ။
တီႈႁိူၼ်းၶဝ်တႄႉၵေႃႈ ဢမ်ႇႁူႉဝႃႈၸၢႆးၵေႃးဝိတေထုၵ်ႇပိူၼ်ႈမႃးၶင်ဝႆႉ ၵူၺ်းဝူၼ်ႉဝႃႈ ၼၢႆးမၼ်းတၢႆလႄႈ ပိူၼ်ႈတေပၼ်မၼ်းမႃးယူႇၼႆသေ ဢွၼ်ၵၼ်မွင်းပႂ်ႉမၼ်းယူႇၵူႈဝၼ်း ၼၼ်ႉယဝ်ႉ။ ဝၼ်းၸိုၼ်ႈၵေႃႈ လႆႈဢဝ်လွင်ႈၼၼ်ႉမႃးၶႆႈၼႄမၼ်းၵႂႃႇသေ ၵႂႃႇယွၼ်းၸဝ်ႈပၼ်ႇ ဢၼ်တိုၵ်ႉမဝ်းလဝ်ႈယူႇၼၼ်ႉ ႁႂ်ႈပွႆႇပၼ်ၸၢႆးၵေႃးဝိ ၼႆလႄႈ ၸဝ်ႈပၼ်ႇၵေႃႈ ပေႃးဝႃႈပဵၼ်ဝၼ်းၸိုၼ်ႈၼႆ မၼ်းၵေႃႈဢမ်ႇၸၢင်ႈထဵင်သင်လႆႈၵႃႈႁိုဝ် ပၼ်ၶႂၢင်ႉၵႂႃႇၵမ်းလဵဝ် ယူႇယဝ်ႉ။
ၵွပ်ႈပိူဝ်ႈတီႈႁိူၼ်းၶဝ်ၼၼ်ႉ ၸၢႆးၵေႃးဝိသမ်ႉႁဵတ်းသိုၵ်းသေ ပီႈဢၢႆႈလူင်သမ်ႉ ယူႇမိူင်းထႆးလႆႈတီႈလႆႈတၢင်းလီယဝ်ႉလႄႈ ဢမ်ႇၶႂ်ႈမႃးယူႇတီႈဝၢၼ်ႈၶဝ်ၶိုၼ်းယဝ်ႉ၊ ၼွင်ႉယိင်းၶဝ်ၼၼ်ႉၵေႃႈ ဢမ်ႇလႆႈၵႂႃႇႁူင်းႁဵၼ်းမႃးလၢႆလိူၼ်ယဝ်ႉ တေသိုပ်ႇႁဵၼ်းၵေႃႈ ဢမ်ႇၶိုတ်းပိူၼ်ႈလႆႈယဝ်ႉလႄႈ ပိူၼ်ႈသမ်ႉပေႃးၸမ်တွပ်ႇလိၵ်ႈယဝ်ႉသေ ဝၢႆးလိုဝ်ႈႁဵၼ်းမႃးႁိုင် ၼႂ်းၵၢင်ၸႂ်မၼ်းၵေႃႈ ဢမ်ႇမီးၵၢင်ၸႂ်ၶႂ်ႈသိုပ်ႇႁဵၼ်းယဝ်ႉ မၼ်းၵေႃႈ တႅပ်းတတ်းတေၵႂႃႇယူႇၸွမ်းပီႈဢၢႆႈလူင်ၶဝ်ၵူၺ်း ၼႆယူႇ။
ဝၼ်းၸိုၼ်ႈၵေႃႈ ဢမ်ႇၸၢင်ႈၸွႆႈသင်လႆႈတေႉတေႉ လိူဝ်သေၸွႆႈႁႂ်ႈ ၸၢႆးၵေႃးဝိၼၼ်ႉလႆႈထူပ်းၵၼ်တင်း ၼွင်ႉယိင်းလႄႈပီႈဢၢႆႈမၼ်းၼၼ်ႉၵူၺ်း။ ဝၢႆးသေဝၼ်းၸိုၼ်ႈမိူဝ်းၵႂႃႇတၢင်းဝၢၼ်ႈၸၢႆးၵေႃးဝိၶဝ်ၼၼ်ႉ ႁၼ်ၵူၼ်းဝၢၼ်ႈၶဝ် လွမ်ႉႁူဝ်ႉသူၼ်ဢမ်ႇပႆႇယဝ်ႉလႄႈ မၼ်းၵေႃႈ ဢဝ်တိုဝ်ႉတၢင်းၼႆႉသေ ႁႂ်ႈၵူၼ်းသိုၵ်းၶဝ်လႆႈၵႂႃႇၸွႆႈႁဵတ်းလႄႈ ႁႂ်ႈၸၢႆးၵေႃႉဝိၸွမ်းၵႂႃႇပႃးယဝ်ႉ။
ၸၢႆးၵေႃးဝိၼၼ်ႉၵေႃႈ လႆႈႁူပ်ႉၺႃးၼွင်ႉယိင်းမၼ်းလႄႈ ပီႈဢၢႆႈမၼ်းၶိုၼ်းသေ လွင်ႈႁူပ်ႉထူပ်းၵၼ်ပွၵ်ႈၼႆႉ ပဵၼ်ပွၵ်ႈလိုၼ်းသုတ်း ဢၼ်တေလႆႈၽၢတ်ႇယၢၼ်ၵၼ်ၵႂႃႇလႄႈ တေဢမ်ႇၸၢင်ႈလႆႈၶိုၼ်းႁူပ်ႉႁၼ်ၵၼ်ထႅင်ႈတင်းႁိုင် ၼၼ်ႉယဝ်ႉ။
ၸဝ်ႈလွၼ်ႉၶိူဝ်းၶႃၵေႃႈ ၶၢဝ်းတၢင်းပွၵ်ႈၼႆႉ လႆႈဝႃႈယူႇႁိုင်ပဵၼ်လၢႆဝၼ်းယူႇ၊ ယၢမ်းႁူဝ်ၶမ်ႈလပ်းသိင်ႇၸွမ်ႉႁွမ်ႉ ဝၼ်းၸိုၼ်ႈၵေႃႈ လႆႈသွင်ႉမိူဝ်းၵႂႃႇတၢင်းသႅင်ႇပႃႈပွၵ်းၶဝ်ၼၼ်ႉသေ ႁၼ်ၵူၼ်းသွင်သၢမ်ၵေႃႉ ဢွၼ်ၵၼ်မႃးဝႅင်းပၢင်လဝ်ႈၵၼ်ယူႇလႄႈ ၼၼ်ႉတႄႉ ပဵၼ်ၵူၼ်းဢၼ်ပႂ်ႉၵဵပ်းၶွၼ်ႇၶဝ်ၸွမ်းတၢင်းမိူဝ်ႈမႃး ၼၼ်ႉယဝ်ႉ။
“ပႃႈ!! မၢႆဝႆႉလႄႈၼႃႈငိုၼ်းလိူၼ်ဢွၵ်ႇၸင်ႇၵွႆႈပၼ်” ၵူၼ်းၼႂ်းပၢင်လဝ်ႈၵေႃႉၼိုင်ႈလၢတ်ႈၸူးပႃႈပွၵ်း။
“ငိုၼ်းလိူၼ်မႂ်းလႄႈဢၼ်မႂ်းၸိုၵ်းၼၼ်ႉ ၸွင်ႇမၼ်းပေႃးပၼ်ႁႃႉမႃႈ ပေႃးငိုၼ်းလိူၼ်ဢွၵ်ႇ တႅၼ်းပႆႇပေႇမႂ်းသမ်ႉပေႃးၸိုၵ်းၵႂႃႇထႅင်ႈယဝ်ႉယိုင်”
“ပဵၼ်သိုၵ်းၵေႃႈ မိူၼ်ၼႆၵူၺ်းဢိူဝ်ႈပႃႈ ၸၢင်ႈၵႂႃႇႁႃငိုၼ်းတီႈလႂ်လႃႇ”
“ဢမ်ႇၸႂ်ႈသူၵႂႃႇၵဵပ်းၶွၼ်ႇပိူၼ်ႈၸွမ်းတၢင်းၸိူဝ်းၼၼ်ႉႁႃႉ ၵဝ်ႁၼ်လုင်းသူမႃးၺႃးသူယူႇလူးသွင်သၢမ်ဝၼ်းၼၼ်ႉ”
“ၸႂ်ႈဢိူဝ်ႈၵၢၼ်တႄႉပဵၼ်ၵၢၼ်ႁဝ်း ငိုၼ်းတႄႉႁိုဝ်ၵႃႇၸႂ်ႈငိုၼ်းႁဝ်းၼႄႇ လႆႈၵႃႈႁိုဝ်ၵေႃႈ လႆႈပၼ်ပိူၼ်ႈမူတ်းမူတ်းယဝ်ႉ”
“သူႁမ်ႉဢမ်ႇလၵ်ႉဢဝ်ဝႆႉႁေဢိတ်ႉလႃႇၵဝ်ဝႃႈ”
“ဢမ်ႇၶႂ်ႈႁဵတ်းၵဝ်ႇပႃႈႁဝ်းၵေႃႈ ပေႃးဢမ်ႇၸႂ်ႈၶေႃႈသင်ႇ ႁဝ်းတမ်ႉဢမ်ႇၶႂ်ႈၵဵပ်းႁေဢိတ်းလေႃႇ ၽႂ်ၽႂ်ၵေႃႈႁႃၵိၼ်လဵင်ႉတွင်ႉၵၼ် ၸွင်ႇၶႅၼ်းၶဝ်ၵေႃႈမီးငိုၼ်းၼႃႇဢမ်ႇၸႂ်ႈ”
“ဢိူဝ်ႈဢိူဝ်ႈ…ၶႅၼ်းယူႇသူမေႃဝူၼ်ႉၸိူင်ႉၼႆၵေႃႈ သင်ဝူၼ်ႉဝႃႈၵဝ်ၵေႃႈ ႁႃၵိၼ်လဵင်ႉတွင်ႉမိူၼ်ၶဝ်ၼႆၵေႃႈၶႅၼ်းလီၵဝ်ႇဢိူဝ်ႈမေႃႉ ၵဝ်ၶၢႆသႅင်ႇၼႆႉမၢင်ပွၵ်ႈမႃးၵေႃႈ ႁႃဢလၢင်းၵူၺ်းပေႃးဢမ်ႇၶႂ်ႈႁၼ်ယဝ်ႉယိုင်”
“ၸၢင်ႈတေပဵၼ်ႁင်ဢႄႈ ႁဝ်းႁႃးၼင်ႇၵၼ်ၵူၺ်း ပေႃးမီးၵေႃႈပၼ်ၵႂႃႈ”
“ၸႂ်ႈဢိူဝ်ႈ ၵဝ်ၵေႃႈႁၼ်သူၼင်ႇလုၵ်ႈၼင်ႇလၢင်းၼင်ႇၵဝ်ႇ၊ ပေႃးလူဝ်ႇသူၸွႆႈၵေႃႈ ႁမ်ႉမႃးၸွႆႈယူႇ မၢင်ပွၵ်ႈၵေႃႈလဵင်ႉၽွင်ႈ မၢင်ပွၵ်ႈၵေႃႈ ၵႃႈလႆႈဢဝ်ၽွင်ႈၼၼ်ႉၼႃႇမေႃႉ”
“ၸႂ်လီလိူဝ်သေပႃႈႁဝ်းၼႆႉ ဢမ်ႇမီးၽႂ်ထႅင်ႈယဝ်ႉ”
“ၼၼ်ႉယဝ်ႉ ပေႃးဢမ်ႇမိူၼ်ၽူႈၵွၼ်းႁေဢိတ်း ၸႂ်ႉတႄႉၸႂ်ႉၵၼ်ယူႇမေႃႉ သင်ၵေႃႈပေႃးဢမ်ႇလဵင်ႉၵၼ်ႁေဢိတ်း၊ ႁဵတ်းသူၼ်ၵေႃႈပဵၼ်ႁဝ်း ႁဵတ်းႁႆႈၵေႃႈပဵၼ်ႁဝ်း ပေႃးၶၢႆမႃးသမ်ႉပဵၼ်ငိုၼ်းမၼ်းဝႃႇ”
“ၸႂ်ႈဢိူဝ်ႈ ႁဝ်းၵၢၼ်ႉဢဝ်ႁိူဝ်ႇဢဝ်ႁႅင်းႁဝ်းဢွၵ်ႇ ၶဝ်ႈဝႃႇၽၵ်းဝႃႇ ၵႂႃႇႁဵတ်းၵၢၼ်သုၼ်ႇတူဝ်မၼ်းယႃႇယႃႇ ႁႂ်ႈႁဝ်းပႃးၵႂႃႇႁင်းႁဝ်းၼႆႉ မၼ်းၸႂ်ႈမဵဝ်းပိူၼ်ႈယူႇႁႃႉ သင်လႆႈငိုၼ်းတႄႉၵေႃႈ ၵဝ်ၵေႃႈဢမ်ႇဝႃႈႁင်ၵွၼ်ႇ ”
“သူၼ်မၼ်းႁႆႈမၼ်းဝႃႇ မၼ်းတမ်ႉဢမ်ႇႁဵတ်းသင် ဢမ်ႇလူင်းတိုၼ်းလၢင်းသင်သေမဵဝ်း တေႃႈၼင်ႇၶဝ်ႈပိူၵ်ႇၸိူဝ်ႉၽၼ်းမၼ်း တင်းၵႂႃႇယွၼ်းပိူၼ်ႈယူႇဢမ်ႇႁိုဝ်”
“ႁဝ်းၼႆႉလႆႈႁဵတ်းပၼ်လၢႆလၢႆယဝ်ႉ သမ်ႉဢမ်ႇလႆႈသင်သေဢိတ်ႉၼႆႉမေႃႉ ”
“ဢၼ်ၸႂ်ႉႁဝ်းၵဵပ်းၶွၼ်ႇယူႇၼၼ်ႉၵေႃႈ တႃႇမၼ်းၵူၺ်းၼႃႇ ၸွင်ႇပိူၼ်ႈမီးပိူင်ၸိူင်ႉၼၼ်ႁိုဝ်”
“ႁဝ်းမႃးႁဵတ်းသိုၵ်းလူင်မေႃႉ ၸွင်ႇၶႅၼ်းႁဝ်းမႃးႁဵတ်းၵၢၼ်ပၼ်မၼ်းၵေႃႈဢမ်ႇၸႂ်ႈ ပေႃးဢမ်ႇယူႇလႆႈၵဝ်ၵေႃႈပၢႆႈၵူၺ်းဢိူဝ်ႈ ၵႂႃႇႁဵတ်းၵၢၼ်ၶႃႈလိပ်းပိူၼ်ႈၵေႃႈ တင်းလႆႈငိုၼ်းယူႇမေႃႉ ၶႅၼ်းလိူဝ်သေပဵၼ်ၶႃႈလိပ်းၵူၼ်းၸိူင်ႉၼႆၵူၺ်းၵဝ်ႇ”
“လွႆးလွႆးလႄႈဢၢႆႈ မႂ်းပေႃးဢမ်ႇၵူဝ်ပိူၼ်ႈမႃးငိၼ်းႁေဢိတ်းႁႃႉ”
“ဢၼ်ၵဝ်လၢတ်ႈမၼ်းၵေႃႈၸႂ်ႈတေႉယူႇၼႃႇ”
“ဢိူဝ်ႈ လွင်ႈတေႉၼႆႉၸၢင်ႈပႃးဢဝ်ႁႃးၵႂႃႇယူႇၼႂ်းၶွၵ်ႈၼၼ်ႉၼႃႇမႂ်းဝႃႈ ၵူၼ်းၼႆႉ ဢမ်ႇပေႃးလီလၢတ်ႈလွင်ႈတေႉၼႃႇၽႅဝ်မႂ်းၶႂ်ႈႁူႉ ၵူၼ်းၶီႈပႅတ်ႉၶီႈလႅၼ်ၸိူဝ်းၼႆႉဢိူဝ်ႈ ၵႆႉႁၼ်ၸဵဝ်းၶိုၼ်ႈသၢင်ႉၶိုၼ်ႈသုင်ၼႃႇမႂ်း ၵူၼ်းလီလီတႄႉ ၺွပ်းတူၵ်းၶွၵ်ႈႁေ ပွႆႇပိုၼ်ႉပွႆႇပႅတ်ႈႁေ ဢမ်ႇႁၼ်ပေႃးသူၼ်ၸႂ်ၵၼ်ၵႃႈႁိုဝ်မႂ်းဝႃႈ”
လွင်ႈၶမ်ဢူၵ်းၶမ်ၸႂ် ပေႃးဢမ်ႇၵိၼ်လဝ်ႈဢမ်ႇႁတ်းလၢတ်ႈၼႄၽႂ်ၼၼ်ႉၵေႃႈ လႆႈလၢတ်ႈဢွၵ်ႇမွၵ်ႇၼႄၵႂႃႇၼႂ်းပၢင်လဝ်ႈၼႆႉတင်းသဵင်ႈ ယူႇယဝ်ႉ။
တႃႇတွင်း။ ။ၸိူင်းႁူဝ်ၼႆႉ ပဵၼ်ၸိူင်းဢၼ်ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈတေႉ။
တွၼ်ႈသိပ်းၵဝ်ႈသုတ်းယဝ်ႉ သိုပ်ႇလူၵႂႃႇထႅင်ႈတွၼ်ႈသၢဝ်းၶႃႈ။
