တွၼ်ႈသိပ်းပႅတ်ႇ
ဝၢႆးသေၸၢင်းဝူၺ်ႇၶၢႆႉၽၢတ်ႇဢွၵ်ႇၵႂႃႇ တႃလႆႈငိုၼ်းၼႂ်းတပ်ႉသိုၵ်းၼၼ်ႉၵေႃႈ ယူပ်ႈယွမ်းလူင်းတႄႉတႄႉ။ ၵူၺ်းၵႃႈ ၵူၼ်းမိူင်းၼႂ်းပိုၼ်ႉတီႈ ဢၼ်ႁဵတ်းၵၢၼ်တေႃႉသူင်ႇၵုၼ်ႇၼၼ်ႉတႄႉၵေႃႈ ၶိုၼ်းပဵၼ်ၵၢၼ်လီမႃးၶိုၼ်းယူႇ၊ ၵူႈပွၵ်ႈၼၼ်ႉ ၸၢင်းဝူၺ်ႇႁဵတ်းမူတ်းလႄႈ ၵူၼ်းမီးလူတ်ႉမီးၵႃးလူင်ၶဝ်ၵေႃႈ ဢမ်ႇၸၢင်ႈၵိၼ်ၸၢင်ႈႁပ်ႉသူင်ႇႁႂ်ႈပဵၼ်ၵၢၼ်၊ တွၼ်ႈတႃႇၼႂ်းသိုၵ်းတႄႉၵေႃႈ ႁႂ်ႈပေႃးလႆႈငိုၼ်းလီမိူၼ်ၼင်ႇ ၸၢင်းဝူၺ်ႇမီးယူႇၼၼ်ႉတႄႉၵေႃႈ ဢမ်ႇပေႃးလႆႈလီလႄႈ လွင်ႈၶွၼ်ႇၵေႃႈ ၶႂ်ႈမီးပၼ်ႁႃၵၼ်မႃးယဝ်ႉ။ ၽၢႆႇတၢင်းၸဝ်ႈပၢင်ႇ ဢၼ်လႆႈၸႂ်ယူႇၼိူဝ်ၵွင်ငိုၼ်းၵွင်ၶမ်း ႁႃမႃးလူၺ်ႈလၢႆးငၢႆႈ ဢမ်ႇသူၼ်ၸႂ်ဝႃႈ ငိုၼ်းဢၼ်လႆႈမႃးၼၼ်ႉ ဢဝ်မႃးတီႈၼိူဝ်ႉလိူတ်ႈႁိူဝ်ႇၶႆးၽႂ် သွၼ်ႇႁႂ်ႈပဵၼ်ငိုၼ်းၵူၺ်းယဝ်ႉ၊ ပေႃးမီးငိုၼ်းမႃးသမ်ႉ ႁဵတ်းၵႃႈဝႃႈၵႃႈပဵၼ် ၵိၼ်ၵျေႃႇၵိၼ်မူၼ်ႈ ဝၼ်းဝၼ်းၶိုၼ်းၶိုၼ်း၊ ပေႃးမီးငိုၼ်း ၽူႈယိင်းတိုၼ်းႁၵ်ႉဢၼ်ဝႃႈၼၼ်ႉၵေႃႈ တေႃႈမီးၵူၼ်းယိင်းၼုမ်ႇသၢဝ်ၶၢဝ်လဝ်း ၶဝ်ႈမႃးၸူးမႃးႁႃမၼ်းပေႃးဢမ်ႇၶၢတ်ႇတေႉၼင်ႇဝႃႈ၊ မေးမၼ်းၼၼ်ႉၵေႃႈ ဢဝ်ၵေႃႉၼိုင်ႈယဝ်ႉၵေႃႉၼိုင်ႈ ဢမ်ႇၶၢတ်ႇႁေပွၵ်ႈ သမ်ႉဝႃႈဢသၢၵ်ႈမၼ်းတေယႂ်ႇယဝ်ႉသေတႃႉ မေးမၼ်းၼၼ်ႉ ႁၢင်ႈလီႁၢင်ႈလဝ်းလၢႆလၢႆတေႉၼင်ႇဝႃႈ။
ပေႃးဢမ်ႇမီးငိုၼ်းမႃးၵေႃႈ ႁႂ်ႈၵူၼ်းမၼ်းလုၵ်ႈၼွင်ႉမၼ်း ၵႂႃႇႁႃၵဵပ်းၶွၼ်ႇၵူၼ်းမိူင်း ၸွမ်းတႃႈၸွမ်းတၢင်း၊ ၸွမ်းၵၢတ်ႇၸွမ်းသႃးၸိူဝ်းၼႆႉယူႇ၊ ၵူၼ်းမိူင်းၵေႃႈ ဢမ်ႇၸၢင်ႈႁဵတ်းႁိုဝ် ၵွပ်ႈပဵၼ်လွင်ႈၵႃႉလွင်ႈၶၢႆလႄႈ ပေႃးဢမ်ႇႁဵတ်းၵေႃႈဢမ်ႇမီး ပေႃးဢမ်ႇပၼ်ၵေႃႈဢမ်ႇၸၢင်ႈႁဵတ်း ၶဝ်ယွၼ်းၵႃႈႁိုဝ်ၵေႃႈ ၵႃႈလႆႈပၼ်ၵႂႃႇ။
လိူဝ်သေၵဵပ်းၶွၼ်ႇယဝ်ႉ သမ်ႉပၢႆၵဵပ်းသိုၵ်းပႃးထႅင်ႈႁေ ၸႃႉၸိူဝ်းဢၼ်မီးလုၵ်ႈလၢင်းၼမ်ၼၼ်ႉ သမ်ႉပေႃးၵဵပ်းလူင်ၵႂႃႇၵူႈႁိူၼ်းယူႇယဝ်ႉ။ ပေႃးဢမ်ႇႁဵတ်းသိုၵ်းၵေႃႈသမ်ႉဝႃႈ ႁႂ်ႈပၼ်ငိုၼ်းၼႆယူႇ၊ ၵမ်ႈၽွင်ႈဢၼ်ဢမ်ႇၶႂ်ႈႁဵတ်းၼၼ်ႉၵေႃႈ ၶၢမ်ႇသဵင်ႈငိုၼ်းဢဝ် ဢမ်ႇမီးၵေႃႈႁႃၵူႈယဝ်ႉ၊ မၢင်ၸိူဝ်းဢၼ်ႁဵတ်းလႆႈၵေႃႈ လႆႈၵႂႃႇႁဵတ်းယူႇ၊ မၢင်ၸိူဝ်းၵေႃႈ ၵိၼ်းၸႂ်ႁႅင်းၼႃႇ ငိုၼ်းၵေႃႈဢမ်ႇမီး ၵူၼ်းၵေႃႈဢမ်ႇၸၢင်ႈၵႂႃႇၼႆၵေႃႈ ယင်းဢမ်ႇယွၼ်ႇယၢၼ်းပၼ်လႄႈ ဢမ်ႇၵႂႃႇၵေႃႈသမ်ႉတဵၵ်းၺွပ်းၵႂႃႇဢဝ်ၵေႃႈမီးယဝ်ႉ။ ၵမ်ႈၽွင်ႈဢၼ်ၺွပ်းၵႂႃႇၼၼ်ႉၵေႃႈ သမ်ႉလၵ်ႉပၢႆႈသေ ပေႃးၺွပ်းလႆႈၶိုၼ်းၵေႃႈ ဢဝ်သႂ်ႇၶွၵ်ႈၶင်ဝႆႉယူႇ။
ပေႃးဢမ်ႇမီးသိုၵ်းႁႂ်ႈၵဵပ်းၵေႃႈ သမ်ႉၵႂႃႇႁႃပၢၼ်းၽိတ်းၵူၼ်းဝၢၼ်ႈသေ ပေႃးၽိတ်းၵၼ်မႃးသမ်ႉ ၺွပ်းၵႂႃႇတင်းမူတ်းယဝ်ႉ ႁွင်ႉႁႂ်ႈဢဝ်ငိုၼ်းၵႂႃႇထုတ်ႇဢဝ်ၶိုၼ်းၼႆၵေႃႈႁဵတ်း။
ၵူၼ်းၼႂ်းပိုၼ်ႉတီႈဢၼ် ၸဝ်ႈပၼ်ႇဢုပ်ႉပိူင်ႇယူႇၼၼ်ႉ ၵူၼ်းဢၼ်ဢမ်ႇၶၢမ်ႇလႆႈၵေႃႈ ဢွၼ်ၵၼ်ပၢႆႈၵႂႃႇယူႇတၢင်ႇဝၢၼ်ႈတၢင်ႇမိူင်းပႅတ်ႈ သမ်ႉဝႃႈမီးတိူၵ်ႇႁႆႈလွၵ်းၼႃးယူႇၵေႃႈ ၵႃႈလႆႈပႅတ်ႈႁေၵႂႃႇယဝ်ႉ။ ၵမ်ႈၽွင်ႈဢၼ်သေလၢႆၼႆၵေႃႈ ယဵၼ်ႉၵၼ်ႈသေၶၢမ်ႇယူႇၵႂႃႇၵေႃႈမီး၊ ဢၼ်ယူႇၵေႃႈ ၵမ်ႈၼမ်မီးၵူၼ်းၵႄႇၵူၼ်းၶၢဝ်ႉၵူၺ်း၊ ၵူၼ်းၼုမ်ႇတႄႉ ဢမ်ႇပေႃးၶႂ်ႈၵိုတ်းယဝ်ႉ ၸိူဝ်းၵိုတ်းၵေႃႈ လုၵ်ႈဢွၼ်ႇၵူၺ်း ပေႃးပဵၼ်ၽူႈၸၢႆးၼႆ ၶဝ်ၵေႃႈၵဵပ်းၵႂႃႇပဵၼ်သိုၵ်းလႄႈ ဢၼ်ဢမ်ႇၶႂ်ႈႁဵတ်းသိုၵ်းၼႆၵေႃႈ ပၢႆႈၵႂႃႇၸဵမ်လဵၵ်ႉယူႇ။ ပေႃးပဵၼ်ၽူႈယိင်းၵေႃႈ ဢမ်ႇပႆႇယႂ်ႇတဵမ်တူဝ် ပေႃးၵႂႃႇပဵၼ်မေးၵူၼ်းသိုၵ်းၶဝ်ယူႇယဝ်ႉ ၸိူဝ်းဢၼ်ဢမ်ႇၶႂ်ႈယူႇၵေႃႈ ဢွၵ်ႇၵႂႃႇႁႃႁဵတ်းၵၢၼ်ၼွၵ်ႈမိူင်းပႅတ်ႈ။
ၸဝ်ႈလွၼ်ႉၶိူဝ်းၵေႃႈ ႁိုင်ႁိုင်ၼိုင်ႈပွၵ်ႈ ဢွၵ်ႇယဵမ်ႈလႄႇလုၵ်ႈၼွင်ႉမၼ်း ပႃးတင်းဝၼ်းၸိုၼ်ႈႁေ ၶႃၵေႃႈလႆႈဢွၼ်ၵၼ် မႃးၼႂ်းၼႃႈတီႈၸဝ်ႈပၼ်ႇၼၼ်ႉယဝ်ႉ။ မိူဝ်ႈၵႂႃႇႁွတ်ႈၸွမ်းတၢင်းၼၼ်ႉၵေႃႈ လႆႈႁၼ်ၵူၼ်းသိုၵ်းၶဝ် ဢွၼ်ၵၼ် ပႂ်ႉတၢင်းၵဵပ်းၶွၼ်ႇယူႇ။ ဝၼ်းၸိုၼ်ႈၶဝ် ဢွၵ်ႇၶၢဝ်းတၢင်းၵႆလႄႈ သမ်ႉဢမ်ႇလႆႈၼုင်ႈၶူဝ်းသိုၵ်း ဢမ်ႇလၢတ်ႈလႆႈဝႃႈပဵၼ်ၵူၼ်းၵူၼ်းသိုၵ်း။ ၵူၼ်းမႃးၵဵပ်းမၼ်းသမ်ႉပဵၼ်ၵူၼ်းမႂ်ႇ လႆႈႁွင်ႉၵႃးၶႃၵိုတ်းယဝ်ႉ ၵဵပ်းငိုၼ်းတီႈၶႃယူႇ၊ ဝၼ်းၸိုၼ်ႈၵေႃႈ ဢမ်ႇလႆႈထၢမ်သင်ၼမ် ၸူၵ်းဢဝ်ငိုၼ်းမၼ်းပၼ်ၵႂႃႇ။ ၸဝ်ႈလွၼ်ႉၶိူဝ်းဢၼ်ႁၼ်ၼင်ႇၼၼ်ၵေႃႈ
“လုၵ်ႈဢွၼ်ႇၸိူဝ်းၼႆႉ ဢမ်ႇႁူႉႁႃႉဝႃႈ ၵဝ်ပဵၼ်ၽႂ်ၼႆ”
“တူၺ်းမိူၼ်ၶဝ်ယင်းတိုၵ်ႉပဵၼ်ၵူၼ်းမႂ်ႇယူႇ ဢူႈႁဝ်းၵေႃႈယႃႇသႂ်ႇၸႂ်ၼႃႇၶႃႈလႄႈ”
“ဢိူဝ်ႈ!! ၵဝ်ၵေႃႈလၢတ်ႈယူႇလၢႆပွၵ်ႈယဝ်ႉ ႁဵတ်းႁင်ၶိင်းပၼ်ႇၼႆႉ တိုၵ်ႉႁဵတ်းၼႆယူႇတိၵ်းတိၵ်းဢေႉမႃႈ”
“ၼၼ်ႉယဝ်ႉၶႃႈ သင်သိုပ်ႇပွႆႇဝႆႉၸိူင်ႉၼႆ ယိုင်ႈၶႅၼ်းတေၼႃႇမႃးထႅင်ႈၵူၺ်းဢေႃႈ”
“ၵဝ်ၵေႃႈဢမ်ႇႁူႉတေလႆႈႁဵတ်းႁိုဝ်တီႈမၼ်းယဝ်ႉၶိင်းၼၼ်ႉ ၸူဝ်ႈၸၢင်းဝူၺ်ႇၵႂႃႇၼႆႉၵႂႃႈထၢင်ႇ မၼ်းၸင်ႇႁဵတ်းၼၼ် ၶိင်းၼၼ်ႉ ၶၢတ်ႇငိုၼ်းဢမ်ႇလႆႈလူင် ပေႃးတေပၼ်တၢမ်ႇမိူၼ်လုၵ်ႈဢွၼ်ႇၵေႃႈ မၼ်းသမ်ႉပဵၼ်ၵူၼ်းလူင်ၵေႃႉၼိုင်ႈယဝ်ႉ ပေႃး ဢမ်ႇႁဵတ်းသင်တီႈမၼ်းၵေႃႈ မၼ်းသမ်ႉတေႁဵတ်းၵႂႃႇၸိူင်ႉၼႆတိၵ်းတိၵ်းဢိူဝ်ႈၼႆႉ တေလႆႈႁဵတ်းႁိုဝ်လႃႇမႂ်းဝႃႈ”
ၵူၼ်းၸိူင်ႉၼင်ႇၸဝ်ႈပၼ်ႇၼၼ်ႉ လၢတ်ႈၵေႃႈလႆႈတၢင်းလၢတ်ႈၵူၺ်း မၼ်းဢမ်ႇတွၼ်ႉထွမ်ႇဢဝ်ၵႂၢမ်းၽႂ် လၢတ်ႈပွၵ်ႈလႂ်ႁဵတ်းပွၵ်ႈၼၼ်ႉ ပေႃးႁိုင်ႁိုင်မႃးၵေႃႈ ၶိုၼ်းမိူၼ်ၵဝ်ႇၶိုၼ်းယဝ်ႉ၊ ဢမ်ႇတွၼ်ႉမေႃလႅၵ်ႈလၢႆႈသေပွၵ်ႈ သင်မၼ်းပဵၼ်လွင်ႈလီတႄႉၵေႃႈ တေလီယူႇ ၵူၺ်းၵႃႈ လွင်ႈဢမ်ႇလီမၼ်းၼၼ်ႉ မႃးမွတ်ႇပႅတ်ႈလွင်ႈလီမၼ်းၵႂႃႇမူတ်းယဝ်ႉလႄႈ ႁႃတီႈလီဢမ်ႇမီးယဝ်ႉ၊ ဝၼ်းၸိုၼ်ႈၵေႃႈ သမ်ႉပေႃးဢမ်ႇမီးလွင်ႈသင်တေလၢတ်ႈလႆႈဝႃႈ ႁဵတ်းၸိူင်ႉႁိုဝ်ၼိူဝ်မၼ်းလီ ပေႃးလၢတ်ႈပၼ်ၾၢင်ႉၵူၺ်းတႄႉ မၼ်းၼၼ်ႉဢမ်ႇမီးဝၼ်းလႅၵ်ႈလၢႆႈမႃးလႆႈ၊ ပေႃးတေပၼ်တၢမ်ႇၼႆၵေႃႈ မီးလွင်ႈၵဵင်ၸႂ်ၵၼ်မႃးလႄႈ ၵူဝ်ဝႃႈႁဵတ်းၵႂႃႇယဝ်ႉ တေမီးလွင်ႈပိူင်ႈၸႂ်တေႃႇၵၼ် ဢမ်ႇမႅၼ်ႈၵၼ်မႃး ၵွပ်ႈလူဝ်ႇလႆႈပိုင်ႈဢိင်ၵၼ်ၵႂႃႇထႅင်ႈ ၵႃႈလႆႈဢဝ်ၶေႃႈဢၢင်ႈဢၼ်ဝႃႈ ပဵၼ်ၵူၼ်းလူင်ၵေႃႉၼိုင်ႈၼႆၵူၺ်းယူႇ။
ယွၼ်ႉပိူဝ်ႈၸဝ်ႈလွၼ်ႉၶိူဝ်းတေမႃးႁႃၸဝ်ႈပၼ်ႇ ဢမ်ႇလႆႈလၢတ်ႈလႄႈ မိူဝ်ႈဢၼ်မၼ်းႁၼ်ၵႃး ၶဝ်ႈမႃးတီႈပၢင်သဝ်းၶဝ်ၼၼ်ႉၼႆၵေႃႈ သမ်ႉပေႃးၶုၼ်ႇၽႅတ်းတိုၼ်ႇသေ လုၵ်ႉတီႈၼွၼ်းမၼ်းဝႅၼ်ဝူင်ဝႅၼ်ဝၢင် ဢႅၼ်ႇမႃးႁႃၸဝ်ႈလွၼ်ႉၶိူဝ်းၵမ်းလဵဝ် လူၺ်ႈသီၼႃႈဢၼ်ဢမ်ႇပေႃးလီၵႃႈႁိုဝ်ၼၼ်ႉယဝ်ႉ၊ ၵွပ်ႈမၼ်းႁူႉဝႃႈ ၸဝ်ႈလွၼ်ႉၶိူဝ်းတေႁူႉလွင်ႈ ဢၼ်မၼ်းသူင်ႇၵူၼ်းၵႂႃႇပႂ်ႉတၢင်းၵဵပ်းၶွၼ်ႇ ၼၼ်ႉယဝ်ႉ။
တီႈပၢင်သဝ်းဢၼ်ၸဝ်ႈပၢင်ႇဢုပ်ႉပိူင်ႇၼႆႉ ပဵၼ်ပႃးတီႈသွၼ်ၵၢၼ်သိုၵ်းယူႇယဝ်ႉ၊ ယၢမ်းၼၼ်ႉ သမ်ႉမႅၼ်ႈၽွင်းၵၢင်ဝၼ်းၶၢဝ်းၵိၼ်ၶဝ်ႈလႄႈ ၶဝ်ၵေႃႈ ၼႅတ်ႈႁႅၼ်းၶဝ်ႈလီၽၵ်းဝၢၼ်မႃးတမ်းပၼ် သမ်ႉပေႃးတဵမ်ၽိူၼ်လူင်ဝႆႉယူႇ။ ၵူၺ်းၵႃႈ ၵူၼ်းသိုၵ်းၶဝ်တႄႉၵေႃႈ တေႃႉတႄႉမီးၼမ်ႉၽၵ်းဝၢၼ်ႇၼိုင်ႈ ဢၼ်တၢဝ်းႁႃတူဝ်မၼ်းပေႃးဢမ်ႇၶႂ်ႈႁၼ်မီႇလဵဝ် လႄႈတင်း မၢၵ်ႇၽိတ်ႉၶူဝ်ႈဢွၼ်ႇ ၽိူမ်ႉပၼ်ဢရသႃႇမၼ်းၼၼ်ႉၵူၺ်း။
ဝၼ်းၸိုၼ်ႈၵေႃႈ မိူၼ်တေဢမ်ႇပေႃးမေႃယူႇႁေၵႃႈႁိုဝ် လႆႈလႄႇလဵပ်ႈၵႂႃႇတူၺ်းႁိမ်းႁွမ်းပၢင်သဝ်းၶဝ်ၸိူဝ်းၼၼ်ႉယဝ်ႉ၊ ၸင်ႇသမ်ႉၵႂႃႇပွင်ႇတီႈၶွၵ်ႈၶင် ဢၼ်မီးဢွၼ်ႇၸၢႆးၼုမ်ႇၵေႃႉၼိုင်ႈ ယူႇဝႆႉၼႂ်းမၼ်းၼၼ်ႉ ၼင်ႈသေငဝ်ယူႇလႄႈ ဝၼ်းၸိုၼ်ႈၼၼ်ႉ ၸင်ႇၵႂႃႇတၵ်ႉၸူးမၼ်းယူႇ။
“လၵ်ႉပၢႆႈၵႃႈ ၸင်ႇဝႃႈမႃးမီးယူႇၼႂ်းၼႆႉလႆႈ”
သၢႆတႃဢၼ်ၶီမွင်ၼၼ်ႉ ယၵ်ႉတူၺ်းၸူးဝၼ်းၸိုၼ်ႈၵႂႃႇ လူၺ်ႈမီးၸႂ်ထၢင်ႇထိူမ်ဝႃႈ မၼ်းၼၼ်ႉပဵၼ်ၽႂ်ၼႆယူႇ။ ဝၼ်းၸိုၼ်ႈၵေႃႈ လၢၵ်ႈတုမ်ဢၼ်မီးယူႇႁိမ်းႁွမ်းၸိူဝ်းၼၼ်ႉ မႃးၼင်ႈတေႃႇၼႃႈမၼ်းသေ
“ၶႂ်ႈပၢႆႈယဝ်ႉ ပဵၼ်သင်ဢမ်ႇပၢႆႈၵႂႃႇႁႂ်ႈမၼ်းပူၼ်ႉလႃႇ ပေႃးတေပၢႆႈသေ မႃးၺႃးၸိူင်ႉၼႆ မၼ်းၵေႃႈဢမ်ႇၵိုင်ႇၵႃႈမၼ်းလေႃႇၼႃႈ”
“ၵူၼ်းၸိူင်ႉၼင်ႇသူ တေမႃးပွင်ႇၸႂ်ႁဝ်းလႆႈၸိူင်ႉႁိုဝ်”
“ပေႃးဢမ်ႇလၢတ်ႈၼႄပိူၼ်ႈ ၽႂ်သမ်ႉတေမႃးပွင်ႇၸႂ်လႆႈလႃႇ”
“လၢတ်ႈယဝ်ႉၵေႃႈ ဢမ်ႇမီးၽႂ်သူၼ်ၸႂ်လူး သမ်ႉၸၢင်ႈတေၵႂႃႇလၢတ်ႈႁဵတ်းသင် လၢတ်ႈဢမ်ႇလၢတ်ႈ မၼ်းၵေႃႈဢမ်ႇလႆႈသင်မႃးၼင်ႇၵဝ်ႇ သူဢမ်ႇၸႂ်ႈသိုၵ်း ဢမ်ႇပွင်ႇၸႂ်လေႃႇလွင်ႈၸိူင်ႉၼႆ… ၵႂႃႇလႄႈ တီႈၼႆႈပိူၼ်ႈဢမ်ႇပၼ်ၽႂ်မႃး”
“ဢၼ်ႁဝ်းမႃးယူႇတီႈၼႆႈလႆႈၵေႃႈ ယွၼ်ႉပိူဝ်ႈ ႁဝ်းထုၵ်ႇပိူၼ်ႈၶႃႈႁႅမ်မႄႈႁဝ်းလႄႈ ၵူၼ်းဝၢၼ်ႈႁဝ်းတင်းဝၢၼ်ႈတၢႆမူတ်း မီးႁဝ်းၵူၺ်းဢၼ်လွတ်ႈမႃးလႆႈ ယွၼ်ႉပိူဝ်ႈမီးမေႃႈၶဝ်ႈဢၼ်မႄႈႁဝ်းႁႂ်ႈၸေးၸွႆႈလႄႈ မီးဢွင်ႈၵွတ်ႇမႄႈႁဝ်းဢၼ်ႁပ်ႉမၢၵ်ႇၵွင်ႈတၢင်ႁဝ်းၵႂႃႇ မိူဝ်ႈၼၼ်ႉ ႁဝ်းတိုၵ်ႉၸင်ႇႁႃလႆႈ 7 ၶူပ်ႇၼႆႉၵူၺ်း၊ သင်ၸိူဝ်ႉဝႃႈဢမ်ႇမီးသိုၵ်းတႆးၸွႆႈႁဝ်းဝႆႉ ႁဝ်းၵေႃႈဢမ်ႇႁူႉဝႃႈ ႁဝ်းတေလႆႈထူပ်းၸိူင်ႉႁိုဝ် တေဢိုပ်းတၢႆယူႇၼႂ်းၵၢင်ပႃႇထိူၼ်ႇၼၼ်ႉယဝ်ႉႁိုဝ်၊ တေထုၵ်ႇၸုမ်းမိူၵ်ႈလိူင်းၶဝ်ၼၼ်ႉမႃးႁၼ်ႁေ ယိုဝ်းတၢႆၵႂႃႇၸဵမ်မိူဝ်ႈၼၼ်ႉယဝ်ႉၵေႃႈဢမ်ႇႁူႉ၊ ဢၼ်လွတ်ႈသၢႆၸႂ်မႃးမိူဝ်ႈဝၼ်းၼၼ်ႉ ပဵၼ်ဢၼ်ႁဵတ်းႁႂ်ႈႁဝ်းယိၼ်းၸူမ်းတေႉယဝ်ႉ၊ ၵူၺ်းၵႃႈ ႁဝ်းၵေႃႈလၵ်ႉၼႅင်ၸႂ်ယူႇၵူၺ်းၼႃ”
သဵင်ၶီငဝ်ဢွၼ်ႇၸၢႆးတုမ်ႉတွပ်ႇၶိုၼ်း လေႃးပႃးလွင်ႈၶႂ်ႈႁူႉၶႂ်ႈႁၼ် “ပဵၼ်သင်ၶႃႈလႃႇ!!”
“ယွၼ်ႉပိူဝ်ႈ ႁဝ်းဢမ်ႇမီးမႄႈဢၼ်တေလႆႈမိူဝ်းႁႃယဝ်ႉလႄႈ ဢမ်ႇမီးပီႈၼွင်ႉဢၼ်ႁူႉၸၵ်း သမ်ႉဝႃႈၸႂ်ထိုင်ယူႇၵေႃႈ ဢမ်ႇၸၢင်ႈႁွင်ႉႁႃလႆႈ ဝူၼ်ႉထိုင်မႄႈမိူဝ်ႈလႂ် ဢၼ်ႁဝ်းတွင်းလႆႈၵေႃႈ မိူဝ်ႈၶဝ်ၵွတ်ႇႁဝ်းဝႆႉ ဝၼ်းဢၼ်သၢႆၸႂ်ၶဝ်သုတ်းသဵင်ႈၵႂႃႇၼၼ်ႉၵူၺ်း၊ သင်ဝၼ်းၼၼ်ႉ ႁဝ်းလႆႈတၢႆၵႂႃႇ တေဢမ်ႇလႆႈမႃးၼင်ႈၸႂ်ထိုင်ၶဝ်ယူႇႁဵတ်းၼႆ၊ တေဢမ်ႇလႆႈမႃးႁဵတ်းၵၢၼ်ၸိူင်ႉၼႆယူႇ”
တႃႇတွင်း။ ။ ၸိူင်းႁူဝ်ၼႆႉပိူင်ပဵၼ်ငဝ်းလၢႆး ဢမ်ႇၸႂ်ႈလွင်ႈတေႉ ပဵၼ်လွင်ႈဢၼ်ဝူၼ်ႉသၢင်ႈမႃးဢဝ်ၵူၺ်း။
တွၼ်ႈသိပ်းပႅတ်ႇသုတ်းၵႂႃႇယဝ်ႉ သိုပ်ႇလူထႅင်ႈတွၼ်ႈသိပ်းၸဵတ်းၶႃႈ။
